1, 2. Ka uagu súdini lubéi houn sun kristiánugu hafurendeirun luagu águyuguni sielu?

SUN lubúeingu Heowá busentiwa wasubudirun lanwoun ariñahani luáguti águyuguni sielu. Chóuruti, súdinibei lan ariñahani le houn kristiánugu anuadirúaaña ha yáabaña Ubouagu lugundun gani lan luma hemenigi lun hawinwandun sielu. Lídanti hakesin hiibe-agei lubúeingu Heowá ha hemenigibaña hawinwandun ya Ubouagu, heresibiruba saragu abiniruni seremei águyuguni.

² Adügati Bungiu lun habürühan fiu hádangiñe lani Hesusu disipulugu ha lánina furumiñeti sígulu luagu águyuguni sielu. Ariñagati apostolu Huan: “Niduheñu hínsiñetiña nun, lirahüñühadiwa Bungiu guentó, ani lau sun marufudungili lan woun kátabadiwa lan lídanme lagumuhóun; subudirügü wamuti luagu danme lan le lagiribudun Kristu, ítara waba lan kei ligía” (1 Huan 3:2). Ibidiñeti houn kristiánugu anuadirúaaña ida luba lan ligaburi hawinwandun sielu ni ida luba lan hágubu le siéluna. Lérügüñein wasubudira harihibei lan Heowá. Masubudiragüdün tumuti Bíbülia sun katei libügürü águyuguni sielu woun, fiúrügüñein ariñahani tíchiga. Kei hénpulu ariñagati apostolu Pábulu lúmabaña lan Kristu kristiánugu anuadirúaaña danme le lagünrinchawagun sun “luwuyeri arúeihani, ubafu, luma erei le ubouagubei” ani ‘óunweni, le lagumuhóun ágani’ laganagua. Ani lagumuhóun, lederegerubei Hesusu hama ha arúeihabaña úara luma sun le lábugiñebei habafu lun Heowá ani deregegua hagíame houngua lun (1 Ko. 15:24-28). Mame lubuidun dan ligía! *

3. Kei lariñaguni 1 Korintuna 15:30-32, ka meha gayara lubéi Pábulu adüga seremei lafiñen luagu águyuguni?

 ³ Íderagua lumuti afiñeni luagu águyuguni Pábulu lun lawandun sun luwuyeri óuchawaguni (aliiha huméi 1 Korintuna 15:30-32, TNM). * Ariñagati houn korintuna: “Sagü weyu nagagibudagun luma óunweni.” Ani ariñagayati: “Ageindaguatina hama animaalugu hanarimetiña Éfesu”. Másiñati layanuhaña lan luagu lageindagun hama meni meni animaalugu lidan fulasu le ñein lubéi meha houdin gürigia ariha hageindagun gürigia dandu hámawagua kei hama animaalugu, uburugu Éfesu (2 Ko. 1:8; 4:10; 11:23). O layanuhaña lan luagu híchugun láganigu hama huríu lidere dan lun, ha ítarabaña igaburi kamá “animaalugu hanarimetiña” (Adü. 19:26-34; 1 Ko. 16:9). Meberesenga ka lan uma lagagibudagua Pábulu, súnwandan lagagibudagun luma burí denchaü gama lumoun, lau aban igaburi darangilati.

4. Ida liña lederebudagüdüni emenigini luagu águyuguni hafiñen saragu kristiánugu uguñe weyu? (Ariha humoun iyawaü to luáguboun tidáü garüdia).

⁴ Wawinwanduña giñe lidan dan wuribati. Añahein hádangiñe wíbirigu adügǘwati wuribani houn. Ha híbiri hawinwanduña lidan fulasu le ñein lubéi saragu machouruni ladüga burí wuribu. Lidan amu burí fulasu rútiña gumadimatiña lébeha wapurichiha o hamaharun lun. Íbini ítara, añahagua sun íbirigu ha, áhuduragua lun Heowá ani aban lubuidun hénpulu hagía woun. Manufudeduntiña ladüga subudi hamuti ánhaña lan óunwegua, füramase lan Heowá líchuguni le buídutimabei houn.

5. Ka saminaü gayaraabei ledebilidagüdüni wafiñen luagu águyuguni?

⁵ Ariñagati Pábulu houn líbirigu añahein lan hádangiñe anihein lan aban ligaburi saminaü hawagu dencha lan saragu: “Anhein másaarunbaña lubéi hilaaña richatiña hamuga ha ariñagubaña: ‘Hou wamá, gurá wamá, lugundun haruga wóunwegua’”. Aniheinhali meha ligaburi saminaü le lúmagiñe binadu dan. Másiñati tídangiñe lan liliburun Isaíasi 22:13 lasagarei Pábulu bérusu le, le ñein lubéi lafuranguagüdawa teni hamá meha ísüraelina lun ugundani lánina ibagari lubaragiñe hamuga hayarafadun lun Bungiu. Ítara kei saragu gürigia ha uguñebaña weyu, ariñagatiña meha ísüraelina hawougua: “Gunda, wamá ladüga chátiti ibagari”. Gama lumoun subudi wamuti ida liña lan hagumuchun lílana Ísüraeli (2 Kro. 36:15-20).

6. Ida luba gani lan wafiñen luagu águyuguni lidan wanúadahan kaba lan uma wásügüra dan?

⁶ Lunti ladundehaniwa wafiñen luagu águyuguni lidan luáguti wanúadahan kaba lan uma wásügüra dan. Moun lumuti meha hóundaragun kristiánugu ha korintubaña hama gürigia ha mafiñenbaña luagu águyuni. Ka larufudahabei le woun? Arufudahati manügün lan ni kata buiti gamadagua wamá hama gürigia ha meberesenbaña luagu águyuguni. Gayaraabei ladügün gamadagua wamá hama gürigia ítaratiña lun weferidiruni wechun ani féridi wameime le furendei wamaalibei lúmagiñe Bungiu. Ani gayaraabei ladügün lun wadügün katei le mínsiñeti lun Bungiu. Ligía, líchugunbalin Pábulu adundehani deregüdati le: “Giribu humá lun aban ibagari le suruti, mafigouha humá” (1 Ko. 15:33, 34).

7. Según 1 Korintuna 15:35-38, ka álügüdahani másiñati adüga hamani fiu gürigia luáguti águyuguni?

⁷ (Aliiha huméi 1 Korintuna 15:35-38). Gürigia le busenbei lálugun lun larihín machourun  lan aniheinbei lan águyuguni másiñati ladügüni álügüdahani le: “Ida luba san ligaburi hásaarun hilaaña? Kaba san luwuyeri úgubu hawagu hilaaña danme le hásaarun?” Buídubei lun lakutihóun óunabagülei le líchugubei Pábulu, lugundun saragu gürigia ámuñegueinarügüti hasaminan libügürü le asuseredubei lárigiñe óunweni. Gama lumoun, kátima tarufudahabei Bíbülia?

8. Ka hénpulu gayaraabei líderaguniwa lun gunfuranda wamani buidu águyuguni sielu?

⁸ Dan le lounwen aban gürigia aba lañaladun lúgubu. Gama lumoun Heowá le adügübalin sun katei lau lubafu, gayaraati lásaaragüdüni Heowá gürigia ligía ani ru ligíame ibagari lun (Agu. 1:1; 2:7). Yúsuti meha Pábulu aban hénpulu lun lafuranguagüdüni míchugun lubéi lan Bungiu ligiaméme úgubu houn ha lúnbaña háguyugun, le lunbei ladügüni Bungiu líchuguni “úgubu le labusenrubei” lun kada aban. Adimurehati Pábulu luagu aban liraüraü labu nadü o “ilaü” le abunúti ani aba liabin aban iseri nadü lídangiñe. Amu nadü luéi liraüraü ilaü le abunúbei.

9. Ka lariñagubei 1 Korintuna 15:39-41 luagu ámuñegueinarügü úgubu le aniheinbei?

⁹ (Aliiha huméi 1 Korintuna 15:39-41). Ayanuhati giñe Pábulu luagu ámuñegueinarügü katei le geyegubei wau, le ladügübei Bungiu. Kéiburi, bágasu, dunuru hama úduraü, ámuñegueinarügüti hágubu luáriuagua. Ariñagati giñe amu lan Weyu luéi Hati, ani “ámuñegueinarügü haruni hawariuagua”. Íbini marihin wamanu lau wagu guánarügü, anuhoun to unboun hariñaga sásaamu waruguma burí funatu wéiritu, harutu ñǘbüritu tuma burí waruguma dumariyumatu, kei burí Weyu. Ariñagati giñe Pábulu: “Anihein giñe burí katei siéluna keisi weyu, hati, waruguma, kéisigubeirügü anihein lan ubouaguna”. Ka labusenrunbei lariñagun? Wagía le awinwandubei ya Ubouagu anihein aban úgubu wawagu le lauti abun luma ǘgürügü, ánhañati ha awinwandubaña sielu sífiriti hágubu, kéiburi ánheligu.

10. Ka luwuyeri úgubu lunbei gani hamani ha lúnbaña háguyugun sielu?

¹⁰ Sigiti Pábulu lau afuranguagüdüni le ítara,  lariñaga: “Ítara luba giñe lidan hásaarun hilaaña, ámubei hágubu; labunúa aban úgubu le gañaladadibei, lásaarame le mañaladadibei”. Dan le lounwen gürigia aba lañaladun lúgubu ani aba lagiribudun lidoun múa (Agu. 3:19). Ida lubati ‘lásaarun aban úgubu le mañaladadibei’? Mama layanuhaña Pábulu luagu aban gürigia le lunbei láguyugun ya Ubouagu, kei burí gürigia ha meha lásaaragüdübaña Elíasi, Eliséu luma Hesusu. Layanuhaña Pábulu hawagu ha lúnbaña háguyugun lau aban úgubu sífiriti, mini lan le “úgubu siéluna” (1 Ko. 15:42-44).

11, 12. Ka asansiruni úmabei lagagibudagua Hesusu dan le láguyugunbei, ani kaba wariñaga hawagu kristiánugu anuadirúaaña?

¹¹ Dan meha le ya lubéi Hesusu Ubouagu hágubu meha gürigia lúgububei. Gama lumoun, dan le láguyugun aba ábanhali lan “sífiri ligía le íchugubei ibagari” ani aba lagiribudun sielun. Ítarameme luba háguyugun kristiánugu anuadirúaaña lau úgubu siéluna. Afuranguagüda lumuti Pábulu: “Wágubu guentó, libe lúgubu Adán, le lánina ubóu; gama lumoun lachülürüba weyu lun wibihin amu luwuyeri úgubu libe lúgubu Kristu, le lánina sielu” (1 Ko. 15:45-49).

¹² Súdiniti lun waritaguni máguyugun lan Hesusu lau aban úgubu le ubouaguna. Afuranguagüda lumuti Pábulu ka lan uagu dan le lariñagubei siñá lan“hebelurun gürigia lau hágubu le ubouaguna lidoun larúeihan Bungiu sielu” (1 Ko. 15:50). Mídinbaña meha ni apostolugu ni amu kristiánugu anuadirúaaña sielun lau úgubu le gañaladadibei le lauti ǘgürügü luma abun. Guentoti, ídameti háguyugua? Afuranguagüda lumuti meha Pábulu buidu buidu, ámuñegüba lan lasusereda águyuguni le; masuseredunbei meha lau lóufudagun lárigiñe hounwen. Dan le meha labürühabarun Pábulu furumiñetu ligaradan houn Korintuna, hilaguaaña meha hádangiñe disipulugu kei burí apostolu Santiagu, ha híbiri apostolugu hama amu burí kristiánugu anuadirúaaña, ani añaheingua meha ha híbiri lun hóunwegun (1 Ko. 15:6, Adü. 12:1, 2).

13. Kaba meha asusereda lidan lidaani larúeiha Hesusu le marihúaditi?

¹³ Dandu Hesusu kei Pábulu ayanuhatiña luagu profesía luáguti larúeihan Kristu le marihúaditi, aban dan súdiniti le ñeinba lubéi larihúa wuribu, hárabaganali, sandi luma amu burí katei le lunbei lasuseredun ubouagu. Profesía burí le warihibei agunfulira lúmagiñe irumu 1914, anihagua amu fánreinti súdiniti lídangiñe lun lagunfulirun. Ariñagati Hesusu lapurichihóuba lan uganu luáguti Larúeiha Bungiu “lidan sun ubóu lun lasubudirúniwa lidan sun fulasu; ligíaalimeti lagumuchun ubóu” (Mat. 24:3, 7-14). Ariñagati Pábulu lídanme lan larúeihan Kristu le marihúaditi, kristiánugu lan ha anuadirúaaña ha arumugubaña lidan óunweni hásaaruba lan sielu (1 Tesa. 4:14-16; 1 Ko. 15:23).

14. Ka asuseredubei houn kristiánugu anuadirúaaña ha óunwegubaña lidan lidaani larúeiha Kristu le marihúaditi?

¹⁴ Uguñe weyu, dan le hagumuchuni kristiánugu anuadirúaaña habagari ya Ubouagu aba háguyugun lau lóufudagun sielu. Ida liña wasubudiruni le? Lau dimurei le lariñagubei Pábulu lidan 1 Korintuna 15:51, 52: “Mama sun lánigu Kristu lun hóunweguba lan; hasansirawagúba súngubei, lidan murusun oura, lidan aban léfegechun luma lámurudun aguu, danme le laganbúniwa tumalali fidu”. Lagunfuliruña dimurei le uguñe weyu. Danme le águyuguaaña líbirigu Kristu ha, dayarü halime hagundan lun súnwandan “luma Wabureme” (1 Tesa. 4:17).

15. Kaba hadüga sielu ha asansirawagúbaña “lidan aban léfegechun luma lámurudun aguu”?

¹⁵ Afuranguagüda tumuti Bíbülia le lunbei hadügüni ha lúnbaña hasansirawagún “lidan aban léfegechun luma lámurudun aguu”. Ariñagati Hesusu houn: “Ha agañeirutiña, adügameme hameime le nabusenrubei ladügǘn darí lumoun lébeha, níchuguba ubafu houn luagu burí néchani, ítara kei líchugun Núguchi Bungiu  ubafu nun. Ábame hagumadiruni néchani burí lau badun lánina agumadihani le lauti gürabu, ábame hamurugudaguni keisi sóudieru le lauti múa” (Aruf. 2:26, 27). Hasigirubei Hábuti ani hagünrinchagubei sun néchani “lau badun lánina agumadihani le lauti gürabu” (Aruf. 19:11-15).

16. Ida luba harihini saragu míñunu gürigia leferidiruni óunweni lubafu?

¹⁶ Chóuruti hagañeirubei lan kristiánugu anuadirúaaña óunweni (1 Ko. 15:54-57). Ladügüba háguyugun lun gadan lániña larumadahóun Ubóu, lídanme wuribu Arümahedón le yarafatima haalibei. Saragu míñunu kristiánugu ha lúnbaña hásügürün lau ibagari lídangiñe óunwenbu asufuriruni ábame hebelurun lidoun iseri ubóu (Aruf. 7:14). Harihibei giñe dandu wügüriña kei würiña lau hagu guánarügü leferidiruni óunweni lubafu: háguyugun saragu milu míñunu gürigia ha meha óunwegubaña lidan dan le sügühalibei. Mame lanarime ugundani! (Adü. 24:15). Ani sun ha akipuragubaña houngua úaragu lun Heowá harihibei leferidiruni óunweni lubafu le galagantehabei lúmagiñe Adán ani gayaraabei hawinwandun lun súnwandan.

17. Ka lariñagubei 1 Korintuna 15:58 lun wadügün?

¹⁷ Sun wagía kristiánugu ha wínwangiñabaña uguñe weyu rútiwa saragu seremei luagu lubuidun burí dimurei lánina águyuguni le íchugubei gurasu, le labürühabei Pábulu houn korintuna. Gébunati lun gaganbadi wamá lun adundehani le líchugubei Pábulu, ñein lubéi lariñaga: “Merederagunga ligía huádigimari súnwandan, gánwoungueinarügü lidan luadigimari Wabureme” (aliiha huméi 1 Korintuna 15:58). Ánhawa úaragua ani adüga wameime sun wayaraati lidan dasi le, wibihiba ugundani ámuñegü, aban katei buídutimati, le lanarime lubuidun siñá wamuti adirara wachügüwagu. Ligíati, gebegiti dasi le wadügübei úara luma Wabureme.