1-2. Ahabw’enki Abakristo bona bashemerire kumanya ebiri kukwata aha kuzocera kutura omu iguru?

ABAHEREZA ba Yehova abingi bine amasiko g’okwija kutura omu nsi ebiro byona. Konka, Abakristo abashukirweho omwika abasigireho bine amasiko g’okuzocera kutura omu iguru. Nibaba bine ekihika c’okureba oku embera zirije kuba ziri ku bariza omu iguru. Konka shi abine amasiko g’okutura omu nsi? Nk’oku twaza kukireba, okuzocera kutura omu iguru nikwija kuretera emigisha abine amasiko g’okutura omu nsi ebiro byona. Obwe rero, yaba twine amasiko g’okutura omu iguru ninga shi omu nsi, tushemerire kumanya ebiri kukwata aha masiko g’okuzocera kuza omu iguru.

² Ruhanga akatuma bamwe omu begi ba Yesu bahandika ebikwatirine n’okuzocera kuza omu iguru. Entumwa Yohaana akashoborora ati: ‘Hati turi abana ba Ruhanga; oku turiba, tikukamanyirwe; konka nitumanya, ngu ku arishururwa, turyashushana na we.’ (1 Yoh 3:2) Obwe rero, Abakristo abashukirweho omwika tibari kumanya oku bari kuba bari bazoka bakaza omu iguru bine omubiri g’omwika. Konka, nibija kureba Yehova ku baritunga ekihembo cabo. Bibuli teri kugamba buri kantu akari kukwata aha by’okuzocera kutura omu iguru, konka hariho ebi entumwa Paulo yagambireho. Abashukirweho omwika nibija kuba bari na Kristo obu ariba ari kumaraho ‘obutegeki bwona n’obushoborozi bwona n’amani gona.’ Omuri ebyo ebi arimaraho harimu ‘omuzigu orihereruka, ari we rufu.’ Bwanyima, Yesu n’abu aritegeka na bo nibija kugarurira byona Yehova. (1 Kor 15:24-28) Obwo ku nibwija kuba buri obwire oburi kushemeza! *

3. Nk’oku biri kugambwa omu 1 Bakorinso 15:30-32, amasiko g’okuzoka gakakwasa gata Paulo?

 ³ Ahabw’okuba Paulo yabire ari kwikiriza ku haribaho okuzoka kikamukwasa kwehanganira ebigezo. (Shoma omu 1 Bakorinso 15:30-32.) Akahandikira Abakorinso ati: ‘Burizoba mba ow’okufa.’ Nambwenu akahandika ati: ‘Nkarwana n’enyamishwa omuri Efeso.’ Hanuya, Paulo nabasa kuba yabire ari kumanyisa ku yarwanire n’enyamishwa zenyine omuri Efeso. (2 Kor 1:8; 4:10; 11:23) Ninga shi nabasa kuba yabire ari kumanyisa Abayudaaya abamuhiganisize n’abandi bantu ababire bari nk’‘enyamishwa.’ (Byak 19:26-34; 1 Kor 16:9) Oku cakuba kiri kona, Paulo akabugana embera zigumire. Konka nabwo, akaguma ayine amasiko g’omu biro eby’omu misho.—2 Kor 4:16-18.

4. Ni bata oku amasiko g’okuzoka gakwasize benetata na banyanyazi omuri obu bwire? (Reba ekishushani c’aha kishembeso.)

⁴ Tutwire omu bwire bugumire. Benetata abamwe nibatwarizibwa kubi. Abandi batwire omu bicweka ebirimu entaro kandi oshanga batine oburinzi. Kandi abandi nibahereza Yehova omu mahanga ahu omurimo gwitu gwayemerezibwe, eco kituma amagara gabo gaza omu kabi. Konka nabwo, abo benetata na banyanyazi bona nibagumizamu kuramya Yehova kandi ni ecokureberaho kirungi ahari itwe. Nibamanya ngu n’obu bakufa omuri obu bwire, Yehova nayija kubazora omu biro eby’omu misho.

5. Ni eha mitekatecere eri kubasa kucendeza amasiko gitu g’okuzoka?

⁵ Paulo akarabura benishe kwerinda emitekatecere eyi bamwe babire bine eri kugira ngu: ‘Abafu ku barabe batazoka, reka twerire, twenywere, ahakuba nyensakare turi ab’okufa.’ Abantu abamwe bakaba bine eyo mitekatecere na Paulo atakabireho. Nabasa kuba yabire ari kugamba ebigambo by’omuri Isaaya 22:13, ebiri kugamba aha mitwarize y’Abisirayeli. Omu mwanya g’okugira obunywani na Ruhanga, bakaba nibeshemeza. Abo Bisirayeli bakaba nibatekateka ku bashemerire kweshemeza ahabw’okuba eshaha yona bari ab’okufa, kandi eyo mitekatecere eriho n’omuri obu bwire. Konka, eyo mitekatecere etahikire ekagira engaruka mbi ah’ihanga ryona rya Israeli.—2 Bus 36:15-20.

6. Ni bata oku amasiko gitu g’okuzoka gari kukwata aha ku turi kutorana abanywani?

⁶ Mazima, twayikiriza ku Yehova arije kuzora abafire kishemerire kukwata aha ku turi kutorana abanywani. Benetata b’omuri Korinso bakaba bashemerire kureka kwekwatanisa n’abantu ababire batari kwikiriza ku haribaho okuzoka. Ni enki eki biri kutwegesa? Tihine akarungi akari kuruga omu banywani babi. Omukristo ku ari kumara obwire n’abo banywani nibashisha emitwarize yeye mirungi. Nambwenu eco nikibasa kutuma yatandika kukora ebintu ebi Ruhanga ari kwanga. Ni yo nshonga Paulo yatwehanangirize ati: ‘Musinduke, mube abahikirire, mureke kushisha.’—1 Kor 15:33, 34.

7. Tukuratize ebiri kugamba omu 1 Bakorinso 15:35-38 ni kiha kibuzo eki abamwe bari kwebuza aha kuzoka?

⁷ Shoma omu 1 Bakorinso 15:35-38. Omuntu ori kwenda ngu abantu babanganise aha kuzoka, nabasa kubuza ngu: ‘Abafu baryazorwa bata?’ Tushemerire kutekateka aha bigambo bya Paulo ahakuba abantu b’omuri obu bwire bine  emitekatecere etari kushushana aha kiri kubaho bwanyima y’okufa. Konka shi, Bibuli neyegesa ki?

8. Ni kiha cokureberaho ekiri kutukwasa kumanya eby’okuzocera kuza omu iguru?

⁸ Omuntu yafa, omubiri gweye nigujunda. Konka Omuhangi w’iguru n’ensi nabasa kumuzora amuha omubiri nk’ogu ari kwenda. (Kut 1:1; 2:7) Paulo akakoresa ecokureberaho c’“embibo” kugira ngu ayereke ku Ruhanga yabire atarije kugarura ogo mubiri gwenyine. Eyo mbibo nebyarwa omu itaka rero erugamu ekimera kisya. Kandi eco kimera kisya nikiba kitari kushushana n’eyo mbibo nce. Paulo akakoresa eco cokureberaho ari kwereka ku Omuhangi ari kubasa kuha omuntu ‘omubiri, nk’oku akunda.’

9. Tukuratize ebiri omu 1 Bakorinso 15:39-41 ni bata oku emibiri eri kutana?

⁹ Shoma omu 1 Bakorinso 15:39-41. Paulo akagamba ku ebyahangirwe byona bitari kushushana. Ecokureberaho: Omubiri gw’ente, ogw’enyonyi n’ogw’ebyenyanja teri kushushana. Akagamba ku eby’omu iguru na byo bitari kushushana, nk’izoba n’okwezi. Nambwenu akagamba ku ‘enyonyozi na zo ziri kukizakizana ekitinisa.’ Mazima n’obu tutari kubasa kukireba n’amisho, hine enyonyozi ezi abanyabwenge omu bya sayansi bayesire eziri kutukura, eza mutare, n’ez’omuhondo, nk’izoba. Paulo akagamba ku ‘hariho eby’omu iguru, n’eby’omu nsi.’ Akaba namanyisa ki? Akaba namanyisa ku omu nsi, twine omubiri gw’enyama, konka omu iguru hariyo abine omubiri g’omwika nk’ogu ba marayika bine.

10. Ni guha mubiri ogu abarije kuzocera kutura omu iguru barije kutunga?

¹⁰ Yetegereze ku Paulo yayongireho ngu: ‘N’okuzoka kw’abafu ni ko kuri. Omubiri gubibwa guri og’okujunda, guzorwa guri og’okutajunda.’ Mazima, omuntu yafa omubiri gweye nigujunda agaruka omu mucucu. (Kut 3:19) Mbwenu shi omubiri  nigubasa kuzorwa guta ‘guri og’okutajunda?’ Paulo akaba atari kugamba aha bantu abarije kuzocera kutura omu nsi nk’abazorirwe na Elia, Elisa na Yesu. Akaba ari kugamba aha bantu abarije kuzocera kutura omu iguru bine omubiri g’omwika. —1 Kor 15:42-44.

11-12. Ni guha mubiri ogu Yesu yazokire ayine, kandi shi abashukirweho omwika abari kufa bo nibagira guha mubiri?

¹¹ Obu Yesu yabire ari omu nsi akaba ayine omubiri gw’enyama. Konka ku yazokire, ‘akahinduka omwika oguri kureta amagara,’ yagaruka omu iguru. Abashukirweho omwika na bo bakaba barije kuzoka bine omubiri g’omwika. Paulo akashoborora ati: ‘Nk’oku twashushine n’ow’omu itaka, ni ko turishushana n’ow’omu iguru.’—1 Kor 15:45-49.

¹² Twayijuka ku Yesu yazokire ayine omubiri g’omwika nikitugasira. Obu Paulo yabire ari kuhendera ebigambo byeye akashoborora ati: ‘Omubiri n’eshagama tibiri kubasa kuhungura Bukama bwa Ruhanga.’ (1 Kor 15:50) Entumwa n’abandi Bakristo abashukirweho omwika bakaba batarije kuzocera kutura omu iguru bine omubiri n’eshagama. Ni ryari obu babire barije kuzoka? Paulo akagamba ku babire barije kuzoka omu biro eby’omu misho. Konka obu Paulo yahandikire ebaruha y’okubanza y’Abakorinso, abegi ba Yesu bamwe bakaba ‘bagwejegerire’ omu kufa, nk’entumwa Yakobo. (Byak 12:1, 2) Ezindi ntumwa n’abandi Bakristo abashukirweho omwika bakaba ‘bagwejegerire’ omu kufa.— Kor 15:6.

13. Ni buha bumanyiso obwabire burayereke okwija kwa Kristo?

¹³ Yesu na Paulo bakagamba aha bwire bw’omutano, ni okugamba okwija kwa Kristo. Ebyabire birije kwereka ku Yesu yija, ni entaro, emisisa, endwara, n’ebindi bintu ebiri kubaho omu nsi. Kandi tukareba  ebyo bintu byatandikire kubaho kwiha omuri 1914. Nambwenu hakaba harije kubaho ekindi kicweka c’obwo buhanuzi. Yesu akagamba ku obutumwa burungi bw’Obukama bwabire buraburirwe ‘omu nsi zona okuba ec’okuhamya aha mahanga gona; obwo nibwo emperu [yabire] erihika.’ (Mat 24:3, 7-14) Paulo akagamba ku ‘ekiro c’okwija kwa Mukama’ ari bwo abashukirweho omwika ababire ‘bagwejegerire’ omu kufa babire barije kuzoka.—1 Tes 4:14-16; 1 Kor 15:23.

14. Ni enki ekiri kuhika aha bashukirweho omwika abari kufa omu bwire bw’okwija kwa Kristo?

¹⁴ Abakristo abashukirweho omwika abari kuheza orugendo rwabo omuri obu bwire nibahika bari kuzoka baza omu iguru. Ebigambo bya Paulo ebiri omu 1 Bakorinso 15:51, 52 nibikihamya biri kugira ngu: ‘Twena titurigwejegera, konka twena turyahindurwa, omu kanya kace, nk’ak’okuhumbya erisho, aha nzamba ey’aha mperu.’ Mazima ebyo bigambo birimu kuhikirira omuri obu bwire! Abo benishe ba Kristo nibija kugira okushemererwa kwingi kandi ‘bagume na Mukama ebiro byona.’—1 Tes 4:17.

15. Ni guha murimo ogu abarihindurwa ‘omu kanya kace nk’ak’okuhumbya erisho’ barikora?

¹⁵ Bibuli netugambira omurimo ogu abarihindurwa ‘omu kanya kace nk’ak’okuhumbya erisho’ barikora omu iguru. Yesu akabagambaho ati: ‘Ori kusingura, akaguma nakora emirimo yange okuhisya aha muheru, ndyamuha obutegeki aha mahanga gona, kandi aryabategeka n’enkoni y’ecoma, nk’oku omuntu ayatagura enyabya z’ibumba, nkanye oku nahirwe Tata obutegeki.’ (Kush 2:26, 27) Nibija kukuratira Omwebembezi wabo bategeke amahanga n’enkoni y’ecoma.—Kush 19:11-15.

16. Ni abantu bangahe abarisingura rufu?

 ¹⁶ Mazima, abashukirweho omwika baryasingura rufu. (1 Kor 15:54-57) Okuzoka kwabo nikutuma batunga omugisha g’okwekwatanisa omu kumaraho ebibi aha rutaro rwa Haramagedoni. Abakristo bingi nibija kuhonoka ‘okubonabona kwingi’ batahe omu nsi ensya. (Kush 7:14) Nibija kwerebera abandi abarisingura rufu, ni okugamba abantu bingi abarizoka. Tekateka okushemererwa oku turigira ku turisingura rufu! (Byak 24:15) Kandi bona abari kuguma bari abesigwa ahari Yehova nibija kusingura orufu oru Adamu yaturagire. Nibija kubaho ebiro byona.

17. Nk’oku biri kugambwa omu 1 Bakorinso 15:58, ni enki eki tushemerire kukora hatiya?

¹⁷ Ebigambo ebi Paulo yahandikire Abakorinso ebiri kukwata aha kuzoka bishemerire kugumya buri Mukristo wena. Twine enshonga ndungi ezishemerire kutuma twayorobera obuhabuzi bwa Paulo bw’okukora cona eki turi kubasa omu ‘murimo gwa Mukama.’ (Shoma omu 1 Bakorinso 15:58.) Ku turikora cona eki turi kubasa tukekwatanisa omuri ogo murimo, n’itwe nitwija kutunga emigisha omu biro eby’omu misho. Obwo bwire nibwija kuba buri kushemeza munonga. Nitwija kwerebera ku okukora kwitu kutarafire busha omuri Mukama.