1-2. Sabwaya jani Akristu otene anofwanyela oziwa sabwaya ya ovenyihiwa mukwani mwa abale adhowa wirimu?

ENJENE mwa iyo animulabela Yehova masaka abano nikana njedhelo nokala mwilaboni ya vati na mukala-kala. Mbwenye mwa Akristu abale ali attikitteliwi, ahikana njedhelo nawi agavenyihiwa mukwani andowa akale wirimu. Awene anotamela oziwa mukalelo onakale egumi wirimu, Akristu abale ahili attikitteliwi antamelelani oziwa mukalelo onakale egumi ya attikitteliwi wirimu? Ninga munasunzele iyo ddima dhinfwarela ovenyihiwa mukwani mwa abale andowa wirimu onele wadheelana mareliho abale anna njedhelo na okala mwilaboni ya vati na mukala-kala. Kintanala akala njedhelo nehu ttokala wirimu obe ttokala velaboni ya vati notene ninofwanyela oziwa sabwa ya ovenyihiwa mukwani wa abale andowa wirimu.

² Mulugu wahaweeddiha arumiwi a Yezu a nsaka zana noroma, na muya waye wi alebe sabwa ya njedhelo ntti nokala wirimu. Murumiwi Joau ohitapulelamo alogaga mazu aba: “Txibarene nilí anaye-wene. Akala elabo kinniziwa, jowi kinimuziwa Mulugu. Amudhaga okweleya, ddabuno nilí ana a Mulugu; enadhe iyo okala, kinathi woneya. Niziwa wi vanavyonihe Yezu, ninere oladdana na iyene, vowi ninere omona mukaleliye.” (1 Jo. 3:2) Mbwenye Akristu abale attikitteliwi Kanziwa mowakwana mwene mukalelo onakale egumi yawa wirimu agavenyihiwa mukwani na maningo omuyani. Mbwenye enziwani jiji agamala wakela nlivo nawa, anere omoona Yehova ekalelo eliye. Bibilia kantapulelamo dhilobo dhinjidhene sabwa ya ovenya mukwani wa abale anadhowe wirimu mbwenye murumiwi Paulo ohitapulelamo vag’onovi. Attikitteliwi  anele okala na Kristu mudhidhi onadhani ottolotxa ‘olamula wotene, onddimuwa wotene na owodha wotene.’ Vina ‘mwiddani omariha onamuttolotxani ddi okwa.’ Omamalelowa Yezu vamodha na attikitteliwi anele olamulela ottiya mmadani mwa Mulugu. Dhahene onele okala mwinya wa etene na dhotene. (1 Kor. 15:24-28) Obu onakale mudhidhi wohagalaliha! *

3. Ninga munlogela 1 Korinto 15:30-32, njedhelo nana Murumiwi Paulo sabwa ya ovenya mukwani nimukamihedhile okosa elobo gani?

³ Njedhelo nana Murumiwi Paulo nawi abale akwile anele ovenyihiwa mukwani nahimukamihedha owanana makattamiho menjene. (Kengesa 1 Korinto 15:30-32.) Iyene wahawaddela akadda Korinto wi: “Ddinovilela okwa.” Vina wahileba mazu aba: “O Éfeso ddihivilela owanana vinama dholudha.” Enoneya ninga iyene wahiwanana-wene vinama, mu arena yo Efeso. (2 Kor. 1:8; 4:10; 11:23) Obe wawaddana Ayuda amukaanela ntxiga akala ninga vinama ‘dholudha.’ (Mer. 19:26-34; 1 Kor. 16:9) Masiki Paulo vagumaniyena makattamiho ottiyana-ttiyana, andhowavi azuzumelaga dhamusogorho nowagalala.—2 Kor. 4:16-18.

4. Njedhelo novenya mukwani ninalibiha dhavi Akristu a masaka abano? (Kang’ana foto ya kapa.)

⁴ Iyo ninkalawo masaka womariha. Sabwa ya ejuwene abalihu enjene anopattiwa na makattamiho a opanga. Dhilabo dhinkala abali ena dhinowaniwa koddo nona kanwodha obareleya, oku dhilabo dhina mabasa a omulabela Yehova anokooddihiwa obe ahimala ofugiwa. Abali ankala dhilabo eso anowika dhigumi dhawa vangovini, wi amulabelege Yehova. Masiki na makattamiho aba abali aba anonikalela yotagiha yaderetu. Sabwani anodhowavi omulabelaga Yehova na ovilela, awene akana muyubuweloni wi masiki akala anoyelela dhigumi dhawa nsaka nttino, Yehova onere waliva dhilobo dhamakamaka mwilaboni eswa.

5. Monelo gani wawopiha ogadhile orimeeliha nroromelo nehu sabwa ya ovenya mukwani?

⁵ Paulo wahakokomeza abali sabwa ya monelo wawopiha wana attu ena walogani dhahi: “Akala akwile kanvenya mukwani, ndoweni nije, nimwe mangwana nikwe veyhu.” Monelo obu ottiya ologiwavi nsaka nttile wahikalawovi masaka a mundduni. Enkala ninga iyene walogile mazu ali va Izaiya 22:13, anloga sabwa ya elemelelo yana ana Izrayeli. Ottiya olibiha mandano awa na Yehova, awene azuzumeletxa esile dhafunani. Elemelelo yana ana Izrayeli jiji “ndoweni nije, nimwe vowi mangwana ninokwa” vina masaka abano yubuwelo eji ekalawovi. Sabwa ya dhilobo dhotakala dhakosa nlogo na Izrayeli omagomelowa ahigweliwa masoso manddimuwa vaddiddi.—2 Map. 36:15-20.

6. Njedhelo nehu nawi attu anele ovenya mukwani ninpatta dhavi mandano ansakulehu?

⁶ Iyo ninoziwa wi Yehova onele wavenyiha abale akwile nona eji enopatta nsakulano nehu n’omarho. Abali akala o’Korinto anfwanyeela ogwadda mandano na abale aharumeela sabwa y’ovenya mukwani. Eji enonisunziha elobo masaka abano, iyo ninofwanyela warabela attu ana dhubuwelo dhawi nibaze ojavo elabo ovanene. Okalaga mudhidhi mwinjene na attu anna dhubuwelo ninga esuwene egahika vangovini nroromelo nehu anittukulelaga okosa dhilobo dhinidda Yehova. Nona Paulo wahiloga dhahi: “Eyelelani weddana mukalelo wapama, txelelani othega!”—1 Kor. 15:33, 34.

7. Attu ena akosa mavuzo gani sabwa ya ovenyihiwa mukwani nanda 1 Korinto 15:35-38, onloga eni?

⁷ Kengesa 1 Korinto 15:35-38. Abale aharumeela ovenyihiwa mukwani vina atamela wawaganyedhiha ena anvuza dhahi: “Aliba okwa anvenya dhavi mukwani?” Ninofwanyela otanalela deretu mukalelo wawakulile murumiwi Paulo nivuzo ntti vowi attu awinjiva masaka abano akana monelo dhottiyana-ttiyana sabwa ya mikalelo dhinakale abale anavenyihiwe mukwani. Mbwenye txini ensunziha Bibilia?

8. Nladdaniho gani ninnikamihedha ononelamo sabwa ya ovenya mukwani wa abale anadhowe okala wirimu?

⁸ Muttu agakwa maningo aye anovudda. Mbwenye oddule opaddutxile erimu na elabo ya vati, onowodha onvenyiha muttu anvahaga maningo ofanyelela. (Wita 1:1; 2:7) Paulo wahilabihedha nladdaniho ntti wila anonihedhemo wi Mulugu kanawiyihedhe maningo akakene. Katanalela ‘ejile enpadduwa na beu’ obe ‘ttaga ya muri-murivi.’ Ttaga eng’ono egamala waliwa enomela buwiteya muri muswa. Vasogorhova muriya onobala beu dhig’ono mbwenye dhottiya-ttiyana. Paulo walabihedha nladdaniho nnti ninoniha wi Mulugu onele wavaha ‘maningo oligana bari [munfuneliye].’

9. Ninga munlogela 1 Korinto 15:39-41, ottiyana gani oliwo wa maningo?

⁹ Kengesa 1 Korinto 15:39-41. Paulo wahizinddiyela wi dhilobo dhipaddutxiwe na mikalelo dhottiyana-ttiyana. Ninga motagiha vahikala ottiyana wa maningo a balame, a oba na maningo a vinama. Iyene wahiloga wi nigang’ana odhulu ninowona wi mweri onottiyana na nzuwa. Wahidhowanavi alogaga wi “neneri-neneri enarya na mukalelo wottiyana”. Pumwenemo masiki vahinonihu na mento ehu, mbwenye a sientista anologa wi dhihikalawo neneri dhottiyana-ttiyana dhina dhing’ono, dhina dhinddimuwa dhina s’ofila, dhotxena na dhina dha kori ya njano. Paulo vina ohiloga wila “dhikalawo vina vitagano  dhodhulu na vitagano dha vati”. Na mukalelo gani? Iyo vatapano mwili wehu bwa nama na nikami oku dhitagano dhodhulu s’omuyani, ninga motagiha ekalelo ya angelo.

10. Ekalelo gani ya maningo enavenyihiwena abale anadhowe okala wirimu?

¹⁰ Koona elogile Paulo vasogorhova: “Ovenya mukwani onakale dhawene: anekiwa maningo okwa, anvenya maningo ahinkwa.” Txibarene maningo omuttu agakwa anovudda omamalelowa anokala mbwebwe. (Wita 3:19) Onapadduwe dhavi ovenya wa “maningo ahinkwa”? Paulo kawaddana attu abale anavenyihiwe wi akale velaboni ya vati ninga motagiha abale avenyihiwe na Eliya, Eliseu vina na Yezu. Paulo wawaddana attu abale anavenyihiwe mukwani anadhowe okala wirimu na ‘maningo odhala muya.’—1 Kor. 15:42-44.

11-12. Masadduwo gani ampadduweli Yezu avenyihiwaga mukwani, vina masadduwo akakene anapadduwela dhavi attikitteliwi agavenyihiwa mukwani?

¹¹ Yezu valiye velaboni ya vati wahikaana mwili wa nama na nikami. Mbwenye muvenyedhiweye mukwani wana ‘ekalelo y’omuyani’ vina wahiyelela okala wirimu. Yakakene jimpadduwa na Akristu abale ali attikitteliwi awene anvenyihiwa na ekalelo y’omuyani wi akale wirimu. Paulo ohitapulelamo alogaga dhahi: “Vatapano ninladdanana na muthu obuddutxiwe mmathakani; nsaka ntho ninere oladdana na ole odhile odhulu.”—1 Kor. 15:45-49.

¹² Paulo wahifiyedha mutoma munddimuwa wa diskursu yaalogiye sabwa y’ovenya mukwani. Katanalela ekalelani yamakamaka Yezu kavenyihiwe mukwani na maningo omuttu. Nona Paulo wahiloga wahinonihedhamo dhahi: “Mwili wehu, oli nama na nikami, kunwodha wakeliwa mumweneni wa Mulugu” oli wirimu. (1 Kor. 15:50) Arumiwi na attikitteliwi kanvenyihiwa mukwani wi adhowe wirimu na mwili onvudda oli nama na nikami. Awene agavenyihiwe mudhidhi gani? Paulo wahiloga wi ovenyihiwa mukwani oku ogapadduwile musogorho kugali ovenyihiwa mukwani ogapadduwile mudhidhene obule.  Paulo mwalebeliye 1 Korinto, ‘arumiwi ena ahimala’ okwa ninga motagiha murumiwi Tiago. (Mer. 12:1, 2) Nsakanene nttile arumiwi ene na attikitteliwi ena ali ‘ahinatti ovenyihiwa mukwani.’—1 Kor. 15:6.

13. Txini egalagihile “odha” wa Kristu?

¹³ Yezu vamodha na Paulo ahiloga dhinereye musogorho dhihinattigi-wene opadduwa oromana nsaka niromile okalawo malogo a attu ofiyedha—odha wa Kristu. Dhilobo dhigazinddiyelihile odha wa Kristu sisi: koddo, maredda oraviheya, ottekenyeya wa elabo, na masoso mena ehinapadduwege elabo yotene. Iyo ninowona wakwanihedheya wa mavuhulo aba a Bibilia oromana yaka ya 1914. Yezu alogaga vizinddiyelo esi; wahilogamo vina dhilobo dhapama dhigapadduwile. Iyene wahiloga wi muselu wapama wa wimetxiwa omwene wa Mulugu, ogahilaleyiwa ‘mwilaboni mwetemwene wi malogo otene ewe omamalelowa pugafiyile ogoma wa [elabo].’ (Mt. 24:3, 7-14) Paulo ohiloga wi siku ntti, siku na “odha” wa Nabuya ogali mudhidhi ogavenyihiwe Akristu ali attikitteliwi ‘amalile okwa.’—1 Tes. 4:14-16; 1 Kor. 15:23.

14. Txini enaapadduwele attikitteliwi nsaka na odha wa Nabuya?

¹⁴ Akristu ali attikitteliwi angomiha mabasawa velaboni ya vati agakwa anottukuleliwa wirimu. Ebaribari eji ya mazu a Mulugu alogile Murumiwi Paulu enoneya va 1 Korinto 15:51, 52: “Ddinfuna dduziwiheni ntikiniho niviteyile: okwa, kaninakwe netene (n’ekalelo enkwa muthu); vano netene ninere osadduliwa. Ejiyá enapadduwe vowaguva, ninga enira okapila wa mento, vanárume parhaza womariha. Pumwenemo! Vanobiwe parhaza, anero’venya n’ekalelo yohikwa vina; iyo ninere osadduliwa.” Mazu aba alogile murumiwi Paulo ofiyedha ovanene anowakwanihedheyavi!  Abali aba a Kristu agamala ovenyihiwa mukwani anokaana wagalala owakwana vina awene ‘anelege akala na Nabuya masiku otene.’—1 Tes. 4:17.

15. Mabasa gani anjeedhela okosa abale anasadduliwe momaguva ninga “enira okapila wa mento”?

¹⁵ Bibilia ononaddela txini empadduwa nabale anttukuleliwa wirimu momaguva ninga enirha “okapila wa mento”. Yezu ohalogana dhahi: “Abale ahinawodhiwe na Satana muroromelani mwawa aniravi ofuna waga mpaka omagomelo ddinere wavaha omwinya wakene oddivahile Babaga, wi athonge malogo otene. Anere weddiha malogoyá na fibo ya mujila.”(Ovuh. 2:26, 27) Awene anere ottida mabasa attomeliwani osapiha—mabila amalogo na fibo ya mujila —Ovuh. 19:11-15.

16. Attu enjene anawodhe dhavi opemberha okwa?

¹⁶ Attikitteliwi anele opemberha okwa. (1 Kor. 15:54-57) Ovenyihiwa wawa mukwani onele wawodhiha opemberha obure wamwilaboni nsaka na koddo ya Armagedón. Akristu matxikwi na matxikwi, alobwana na ayana anele ‘oviluwa mugoyini enddimuwa’ wi akale mwilaboni eswa. (Ovuh. 7:14) Awene anele wirela onamoona mukalelo onagomihiwe okwa—na ovenyihiwa mukwani wa muttitti munddimuwa wa attu akwile wale. (Mer. 24:15) Katanalela mukalelo onakalihu nigafiya nsaka ninapadduwe dhilobo esi etene abale anakale oweddeyana na Yehova! Anere opemberha okwa oraveyile na Adamu. Anerege okala mwilaboni ya vati na mukala-kala.

17. Nitanalelaga 1 Korinto 15:58 Txini enfwanyelihu okosa?

¹⁷ Akristu a masaka abano anopangarhazeya na mazu a Paulo alebeliye akadda Korinto anloga sabwa ya ovenya mukwani. Nona iyo nikana sabwa ya dhinjene dhinittukulela wiwelela mazu alogile Murumiwi Paulo wi ninofwanyela ‘ozuzumela mabasa a Nabuya.’ (Kengesa 1 Korinto 15:58.) Nigakala attu oweddeyana vina nivilibihedhe mmabasani a Yehova mpaka apale vanwodhelihu ninele okala attu ottaba. Musogorho mpo mundha ninele okana egumi yohagalaliha opitta elobo-elobovi entanalela iyo okala yaderetu masaka abano. Kakana ebaribari wi mabasa animukoseliwe Yehova txipo kunttiddana vati.