1-2. Pine nemene matre loi e tro la nöjei Keresiano a wangatrune la melehmaca e hnengödrai?

 ALANYIMU enehila la itre hlue i Iehova ka mejiune troa mele palua e celë fen. Ngo hetrenyi palakö e celë fen la itre xaa hna iën ka mejiune troa mel e hnengödrai. Angatr a ajane troa atre la pengöne la mele i angatr elany. Ngo pine nemene matre nyipiewekë fe tro la itre xaa mamoe a atre la ewekë cili? Tune la hne së hna troa ce wang, tro la itre ka mele palua e celë fen a kepe thangan qa ngöne la melehmaca e hnengödrai. Ngacama ka mejiune së troa mel e hnengödrai maine e celë fen, ngo loi e tro sa atrepengöne hnyawa la melehmaca e hnengödrai.

² Jëne la uati hmitrötr, hnei Akötresieti hna upe la itre ka cinyihane la Tusi Hmitrötr, troa qaja la melehmaca e hnengödrai. Öni Ioane aposetolo: “Easë enehila la itre nekö i Akötresie, ngo tha mama pala kö la pengö së elany. Ngo atre hi së ka hape, e mama ha nyidrë, tro sa tui nyidrë.” (1 Ioane 3:2) Ame la itre Keresiano hna iën, thatre kö angatr la pengöne la itre u. Ngo xecie koi angatr laka, ame la angatr a kapa la edrö i angatr, angatre hë lai a troa öhnyi Iehova. Nyipici laka, tha hnei Tusi Hmitrötr kö hna qaja hnyawane la mel ne la itre hna iën thupene la kola amele angatr hmaca. Ame pe, öni Paulo aposetolo ka hape, tro la itre hna iën a ceme Keriso ngöne la kola troa “lepe apatrene la nöjei mus, me nöjei trene mus,”  memine “la mec, lo ithupëjia tixenuë.” Thupene lai, tro Iesu memine la itre hna iën a nue hmaca la musi koi Iehova. Nge tro Iesu a nue la nöjei ewekë asë kowe la Keme i nyidrë. (1 Kor. 15:24-28) Celë hi lai itre ewekë ka lolo hne së hna lapa treqen. *

3. Thenge la 1 Korinito 15:30-32, nemene la hnei Paulo hna kuca?

³ Hnei Paulo hna xomihnine la nöjei pengöne jol ke, hetre mejiune i angeic kowe la melehmaca. (E jë la 1 Korinito 15:30-32.) Öni angeic koi angetre Korinito: “O drai palahi eni a qëmeke kowe la mec.” Nge öni angeic hmaca: “Hnenge hna isi me itre öni wael e Efeso.” Maine jë, hna kuië angeic kowe la itre öni wael ngöne la hnë kuci elo e Efeso. (2 Kor. 1:8; 4:10; 11:23) Maine pena, angeic a qaja la angetre Iudra me itre xan ka icilekeu, nge hna aceitunë angatr me itre öni wael. (Itre hu. 19:26-34; 1 Kor. 16:9) Ngacama hna anyimua thele troa humuthi Paulo, ngo hnei angeic palahi hna catre mejiun.—2 Kor. 4:16-18.

4. Tune kaa la aqane akeukawane la hni së hnene la melehmaca? (Wange ju la pane iatr.)

⁴ Easa melëne la itre ijine ka ngazo. Hna qanangazone la itre xaa trejin. Ame itre xan, angatr a mel ngöne la itre nöj ka isi, matre angatr a xou troa humuthi angatr. Nge ame itre xan, angatr a nyihlue i Iehova ngöne la itre nöj hna wathebone la huliwa ne cainöj. Ngacama hna xomehnöthe la mele i angatr, ngo angatr palahi a catre atrunyi Iehova. Eje hi, itre tulu lai koi së. Atre hnyawa hi angatr laka, maine tro angatr a mec, tro kö Iehova a eatrëne la itre hna thingehnaean. Nge celë hi la ka akeukawane la hni angatr.

5. Nemene la aqane mekun ka troa thë la lapaune së kowe la melehmaca?

⁵ Hnei Paulo hna hmekën la itre trejin göne la aqane mekun celë: “Maine pëkö mele hmaca, ‘xeni jë së me ij, ke elanyi tro sa mec.’ ” Celë hi aqane waiewekë ekö ngöne la hneijine i Paulo. Maine jë, angeic a amexeje lo hna qaja ngöne Isaia 22:13 göne la aqane ujë i angetre Isaraela. Tha hnei angatre kö hna thele Akötresie, hnei angatre pe hna thel la itre nyine iamadrinë. Kösë angatr a hape, “enehila hi la ijine mel, ngo tha elanyi kö.” Celë hi aqane mekune la itre atr enehila. Ngo Tusi Hmitrötr a qaja ka hape, hetre ethane la aqane mekune cili.—2 A. l. ite jo. 36:15-20.

6. Nemene la aqane tro la mejiune kowe la melehmaca a xatua së troa iëne hnyawa la itre sinee së?

⁶ Ame la mejiune kowe la melehmaca, tre, kola xatua së troa iëne hnyawa la itre sinee së. Nyipiewekë tro la itre Keresiano ne Korinito a thupën, matre tha tro kö a nyisineene la itre atr ka tha mejiune kö kowe la melehmaca. Nemene la ini koi së? Ijije hi troa ajojezi së hnene la itre sinatro ka thele la itre nyine iamadrinë, me saze la aqane waiewekë së, me itre hne së hna majemine ka loi. Tro fe angatr a upi së troa kuca la ngazo, ewekë hna methinën hnei Akötresie. Celë hi matre, öni Paulo: “Inamacane pi thenge la ka meköt, nge the majemine kö kuca la ngazo.”—1 Kor. 15:33, 34.

7. Thenge la 1 Korinito 15:35-38, nemene la hna qaja hnei itre xan göne la melehmaca?

⁷ E jë la 1 Korinito 15:35-38. Maine  jë, tro la ketre atr a thele tro sa luelu göne la mejiune kowe la melehmaca. Tro angeic a qaja ka hape: “Troa amelene tune kaa la itre ka mec?” Alanyimu la itre ka mejiune kowe la itre ini ka thoi göne la melehmaca. Celë hi matre loi e tro sa ce wang la hna qaja hnei Paulo. Ngo nemene la mekuna i Tusi Hmitrötr?

8. Nemene la ceitune ka xatua së troa trotrohnine la kola amelene la ketre atr e hnengödrai?

⁸ Ame la kola meci la atr, kola hnyiqetr la ngönetrei angeic me ae trootro uti hë paatr. Ngo ijije hi tro la Atre Xup asë a amelene la ketre atr ngöne la ketre ngönetrei ka lolo. (Gen. 1:1; 2:7) Hnei Paulo hna qaja la ketre ceitune ka amamane laka, atreine hi Akötresie troa amelene la ketre atr ngöne la ngönetrei ka hnyipixe. Hnei angeic hna qaja la itine feja hna jum, nge ka cia. Tha itine hmaca kö ngo ketre feja. Jëne la ceitune celë, Paulo a amamane laka, ijije hi tro la Atre Xupi së a hamëne “la ngönetrei thenge la aja i Nyidrë.”

9. Nemene la hna qaja hnei Paulo ngöne 1 Korinito 15:39-41 göne la eisapengönene la itre ngönetrei?

⁹ E jë la 1 Korinito 15:39-41. Öni Paulo ka hape, nyimutre la itre ewekë hna xup. Ame e celë fen, nyimutre la itre pengöne ngönetrei, tune la itre öni ka tru, itre waco, me itre ie. Nge tune fe e hnengödrai laka, isapengöne kö la jö memine la treu. Nge “ka ketrepengöne fe la lolo ne la itre wëtresij.” Eje hi, tha öhne kö së la itre xaa wëtresij, ngo itre ka inamacan a hë itre ej ka hape, itre wëtresij ka tru me ka madra, maine ka co me ka wië maine hmedr tune la jö. Ketre, öni Paulo ka hape, “hetre ngönetrei thatraqane la hnengödrai me thatraqane la ihnadro.” Ame la itre ka mel e celë fen, hetrenyi angatr la ngönetrei ne fen ka hetre ijön. Nge ame la itre ka mel e hnengödrai, tre, ngönetrei ne u tune la itre angela.

10. Ka tune kaa la ngönetrei ne la itre hna amelene hmaca e hnengödrai?

 ¹⁰ Öni Paulo e thupen ka hape: “Ceitune lai memine la troa amelene hmaca la itre ka mec. Hna jum ngöne la ka hnyiqetr, nge hna amejën ngöne la ka tha hnyiqetre kö.” Ame la kola mec la ketre atr, kola hnyiqetre la ngönetrei angeic me bëeke kowe la xaxau. (Gen. 3:19) Ngo tune kaa la aqane troa amejën la ngönetrei “ngöne la ka tha hnyiqetre kö”? Tha Paulo kö a qaja la itre hna amelene hmaca e celë fen, tune lo itre atr hna amelen hnei Elia me Elisaia me Iesu. Nyidrëti pe a qaja la itre hna amelene hmaca ngöne la “ngönetrei thatraqane la hnengödrai.”—1 Kor. 15:42-44.

11-12. Ka tune kaa la ngönetrei Iesu ngöne lo kola amele nyidrëti hmaca, nge tune kaa la itre hna iën?

¹¹ Ame lo Iesu e celë fen, hetrenyi nyidrë la ngönetrei ne atr. Ngo ame lo kola amele nyidrëti hmaca, “nyidrëti hi la u ne iamele,” nge hnei nyidrëti hna bëek a tro hnengödrai. Tune la itre Keresiano hna iën, troa amele angatre hmaca ngöne la ngönetrei thatraqane la hnengödrai. Öni Paulo: “Pine laka, hna hnaho së hnaijine lo atr hna xupe hnei dro, ketre tun, tro fe së elanyi lai a tune lo atr ka uti qaa hnengödrai.”—1 Kor. 15:45-49.

¹² Tha hna hnaho Iesu kö ngöne la ngönetrei ne atr. Pine nemen? Pine laka, öni Paulo göne la melehmaca: “Tha tro kö a sine la Baselaia i Akötresie hnei madra me ijön.” (1 Kor. 15:50) Eje hi, tha tro kö a amelen la itre aposetolo me itre hna iën ngöne la ngönetrei ne madra me ijön ka troa hnyiqetr. Eu la ijine troa amele angatre hmaca? Öni Paulo ka hape, troa amele angatr e thupen, ngo tha ngöne kö la ijine angatr a mec. Ame lo Paulo a cinyihane la pane tusi nyidrë koi angetre Korinito, hetre itre Keresiano “ka meköle hë ngöne la mec,” tui Iakobo aposetolo. (Itre hu. 12:1, 2) Itre xaa aposetolo  me hna iën a troa “meköle . . . ngöne la mec” e thupen.—1 Kor. 15:6.

13. Nemene la itre ewekë ka troa traqa ngöne la ijine troa traqa hnei Keriso?

¹³ Hnei Iesu me Paulo hna qaja la ketre ijine ka sisitria, ene la kola troa traqa hnei Keriso. Hnei Iesu hna perofetan ka hape, troa hetre isi ngöne la ijine cili me sa, me sine mec, me itre xaa jol e cailo fen. Nge qaane lo 1914, kola eatr la hna perofetane celë. Ngo hetre ketre ithuemacany ka nyipiewekë hna hamën hnei Iesu. Öni nyidrë, “tro ha cainöjëne la maca ka loi ne la Baselaia e cailo fen nyine anyipicine kowe la nöjei nöj; ame hna traqa pi la pun.” (Mat. 24:3, 7-14) Nge öni Paulo ka hape, ame ngöne la ijine troa traqa hnei Keriso, tro ha amelene hmaca la itre Keresiano hna iën “ka meköle ngöne la mec.”—1 Thes. 4:14-16; 1 Kor. 15:23.

14. Nemene la ka traqa ngöne la kola mec hnene la ketre Keresiano hna iën?

¹⁴ Ame la itre Keresiano hna iën ka mec enehila ke, troa canga amele angatr hmaca e hnengödrai. Celë hi lai hna qaja hnei Paulo ngöne 1 Korinito 15:51, 52: “Tha tro kö së asë a meköl aqeanyi ngöne la mec, ngo tro pe së asë a ketrepengön, nge tro ha traqa lai kösë samek. Nge tro lai a traqa ngöne la kola ufi trutru tixenuë.” Kola eatr enehila la itre trengewekë i Paulo. Eje hi, madrine la itre trejin me Keriso ngöne la kola troa amelene angatr hmaca ke, “tro pala pë hë angatr a ce me Joxu.”—1 Thes. 4:17.

15. Nemene la hnëqa hna troa ahnithe kowe la itre hna saze “kösë samek”?

¹⁵ Nemene la hnëqa hna troa ahnithe  kowe la itre hna saze “kösë samek”? Öni Iesu: “Ame kowe la atre ka huun, me nyixölene la itre huliwang uti hë la pun, tro hë ni a aijijë angeic troa mus kowe la itre nöj, nge tro angeic a musinëne la itre atr hnene la sine tö kopa, matre troa lep anyilanyilanyi angatr, kösë ewekë hna xup hnei dro ka fedr, nge musi lai hnenge hna kapa qaathei Kaka.” (Hna ama. 2:26, 27) Haawe, tro Iesu me itre hna iën a musinëne la itre nöj hnene la sine tö kopa.—Hna ama. 19:11-15.

16. Nemene la aqane tro la itre atr a hune kowe la mec?

¹⁶ Eje hi, tro la itre hna iën a hun kowe la mec. (1 Kor. 15:54-57) Kola troa amele angatr hmaca matre tro angatr a apatrene la itre atr ka ngazo, ngöne la isi Amagedro. Itre milio lao hlue i Iehova ka troa mele pe “qa ngöne la akötr atraqatr” matre troa lö kowe la fene ka hnyipixe. (Hna ama. 7:14) E cili, tro hë angatr a öhne la itre miliar lao atr hna troa amelene hmaca. Drei la ketre madrin ka tru ke, ase hë ngaane la mec! (Itre hu. 24:15) Ketre, tro fe la itre ka mele nyipici koi Iehova a hune kowe la mec. Eje hi, tro fe angatr a hane mele palua.

17. Nemene la hna ithuecatre koi së ngöne 1 Korinito 15:58?

¹⁷ Haawe, loi e tro së isa ala caasi a wangatrune la hna qaja hnei Paulo koi angetre Korinito, göne la mejiune kowe la melehmaca. Tro lai a xatua së “tro pala hi a tru hnei huliwa . . . koi Joxu.” (E jë la 1 Korinito 15:58.) Eje hi, maine tro sa catre eatrëne la huliwa cili, tro hë sa madrin. Pane mekune jë së la mele ka lolo elany ngöne la fene ka hnyipixe! E cili, tro ha mama koi së laka, tha ka gufa kö “la itre trengecatre [së] koi Joxu.”