1-2. Ntak anade kpukpru mme Christian ẹdiọn̄ọ n̄kpọ ẹban̄a ediset ke n̄kpa n̄ka heaven?

KE OTU mbon emi ẹnamde n̄kpọ ẹnọ Jehovah, mbon emi ẹdoride enyịn ndidu uwem ke nsinsi ke isọn̄ ẹwak ẹkan. Mbon eken emi ẹdade edisana spirit ẹyet aran ẹdori enyịn ndiset n̄kodu ke heaven. Enen̄ede ọdọn̄ mbon emi ẹdisetde ika heaven ndidiọn̄ọ nte uwem mmimọ editiede ini oro. Edi nso ikpanam mbon emi ẹdidude ke isọn̄ ẹkpep n̄kpọ ẹban̄a ediset ke n̄kpa n̄ka heaven? Nte idikụtde ke ibuotikọ emi, ndinam mme owo ẹset ẹka heaven ayada ediwak edidiọn̄ n̄ko ọsọk mbon emi ẹdidude mi ke isọn̄. Ntre m̀mê idori enyịn ndidu uwem ke nsinsi ke heaven m̀mê ke isọn̄, akpana iyom usụn̄ ikpep n̄kpọ iban̄a ediset ke n̄kpa n̄ka heaven.

² Abasi ama anam ndusụk mbet Jesus ẹwet n̄kpọ ẹban̄a ediset ke n̄kpa n̄ka heaven. Apostle John ekewet ete: “Idahaemi nnyịn idi nditọ Abasi, edi owo iyarakede kan̄a se nnyịn ididide. Nnyịn imọfiọk ite ke adan̄aemi Abasi ediwọrọde owụt idem, nnyịn iditie nte enye.” (1 John 3:2) Mbon emi ẹyetde aran idiọn̄ọke nte uwem mmọ editiede Abasi ama anam mmọ ẹset ẹdi spirit ẹkedu ke heaven. Edi imọdiọn̄ọ ke mmọ ẹyekụt Jehovah ke ata ata enyịn, mmọ ẹma ẹsịm heaven. Bible itịn̄ke kpukpru n̄kpọ iban̄a ediset n̄ka heaven, edi apostle Paul ama anam idiọn̄ọ ndusụk n̄kpọ. Mbon emi ẹyetde aran ẹyedu ye Christ ini enye edinamde “kpukpru ukara ye kpukpru unen edikara ye odudu ẹkabade ẹdi ikpîkpu.” Mmọ ẹyedu ye enye  n̄ko ini enye edisobode n̄kpa emi edide “akpatre asua.” Ndien ke akpatre, Jesus ye mbon emi ẹdidianade ye enye ikara ẹyesụk idem mmọ ẹsịne ke idak Jehovah. (1 Cor. 15:24-28) Ini oro eyenem tutu! *

3. Akpa Corinth 15:30-32 owụt ke Paul ndikenịm ke mme owo ẹyeset akan̄wam enye anam nso?

³ Paul ndikenịm ke mme owo ẹyeset ama an̄wam enye yak ọyọ nsio nsio afanikọn̄. (Kot 1 Corinth 15:30-32.) Enye ọkọdọhọ nditọete ke Corinth ete: “Mmosobo n̄kpa iso ye iso ke usen ke usen.” Enye ama ọdọhọ mmọ n̄ko ke ima ‘in̄wana ye ndiọi unam n̄ko ke Ephesus.’ Ekeme ndidi enye eketịn̄ aban̄a nte enye akan̄wanade ye ndiọi unam ke an̄wambre ke Ephesus. (2 Cor. 1:8; 4:10; 11:23) Onyụn̄ ekeme ndidi enye eketịn̄ aban̄a mme Jew ye mbon en̄wen emi ẹkenamde n̄kpọ ye enye nte “ndiọi unam.” (Utom 19:26-34; 1 Cor. 16:9) Eke ekpededi ke otu oro, se idiọn̄ọde edi ke kpa ye emi nsio nsio ikpọ afanikọn̄ ẹkesịmde enye, ke enye ama aka iso enịm ke n̄kpọ ọyọfọn ke ini iso.—2 Cor. 4:16-18.

4. Nso ufọn ke idotenyịn ediset ke n̄kpa anam ọnọ mme Christian mfịn? (Se ndise ikpædem Enyọn̄-Ukpeme emi.)

⁴ Ini nnyịn emi ọdiọk etieti. Ubiatibet okpon ke ererimbot emi etieti, esinyụn̄ awaha ebehe ndusụk nditọete nnyịn. Ndusụk mmọ ẹdụn̄ ke itie emi ekọn̄ an̄wanade, mmọ ẹnyụn̄ ẹdiọn̄ọ ke n̄kpọ ekeme nditịbe nnọ mmimọ ini ekededi. Ke ndusụk idụt, ukara iyakke nditọete nnyịn ẹnyene ifụre ẹkwọrọ ikọ, mmọ ẹnyụn̄ ẹdiọn̄ọ ke ẹkeme ndikọbi mmimọ mîdịghe ẹwot mmimọ ke ntak emi inamde n̄kpọ Jehovah. Kpa ye oro, kpukpru nditọete emi ẹka iso ẹnam n̄kpọ Jehovah, mmọ ẹdot se ikpebede. Idem inyekke mmọ sia mmọ ẹdiọn̄ọ ke edieke ikpade ke idiọk ererimbot emi, ke Jehovah ọn̄wọn̄ọ ndinọ mmimọ uwem emi ọfọnde akan emi.

5. Nso idiọk ekikere ikeme ndinam nnyịn ikûnen̄ede unịm ke mme owo ẹyeset?

⁵ Paul ama akpan nditọete ete ẹkûtiene ukere idiọk ekikere kiet emi ndusụk owo ẹkesikerede. Mmọ ẹkesidọhọ ẹte: “Edieke owo mîdinamke mme akpan̄kpa ẹset, ‘ẹyak nnyịn idia inyụn̄ in̄wọn̄, koro nnyịn iyakpa n̄kpọn̄.’ ” Idịghe eyo Paul ke mme owo ẹketọn̄ọ ẹsikere n̄kpọ oro. Etie nte Paul okokot oto Isaiah 22:13. Itie oro etịn̄ aban̄a ido kiet emi nditọ Israel ẹkenyenede. Utu ke mmọ ndiyom usụn̄ n̄kpere Abasi, mmọ ẹkesịn idem ẹdia uwem. Ido nditọ Israel oro ekedi “yak idia uwem ke n̄kpa eyịre owo ke ekpụk-ọfọn̄.” Ediwak owo mfịn ẹnyene utọ ido oro. Edi Bible etịn̄ se ikediwọrọde mmọ ke utịt ke ntak idiọk ekikere oro.—2 Chron. 36:15-20.

6. Nso utọ owo ke nnyịn mîkpadianke idem edieke inịmde ke mme owo ẹyeset?

⁶ Nnyịn ndidiọn̄ọ ke Jehovah ayanam mme owo ẹset akpana anam ikpekpeme mbon se idian idem. Akana nditọete ke Corinth ẹkûdụk ndụk ye mbon emi ẹkedọhọde ke owo idisetke. Akpana ida ukpepn̄kpọ do: Nnyịn ididiaha udori ndomokiet edieke idụkde ndụk ye mbon emi ẹsidọhọde “yak idia ke ima ikpa imakpa.” Ikpodụk ndụk ye utọ mme owo oro, ekeme ndinam ida uwem nte mmọ ẹdade, ikûnyụn̄ udu uwem aba nte Jehovah ọdọhọde. Imakam ikeme ndikanam idiọkn̄kpọ. Oro akanam apostle Paul enen̄ede odụri mme Christian utọn̄ ete: “Ẹdemede ẹnyụn̄ ẹnam se inende, ẹkûnyụn̄ ẹka iso ẹnam idiọkn̄kpọ.”—1 Cor. 15:33, 34.

7. Akpa Corinth 15:35-38 owụt ke etie nte nso ke ndusụk owo ẹkebụp ẹban̄a ediset ke n̄kpa?

⁷ Kot 1 Corinth 15:35-38. Ekeme ndidi owo emi mîkoyomke mbon en̄wen ẹnen̄ede ẹnịm ke ẹyenam mme owo ẹset ama obụp ete: “Didie ke ẹdinam mme akpan̄kpa ẹset?” Enen̄ede ọfọn yak ikere iban̄a se Paul ọkọbọrọde, sia ediwak owo mfịn ẹtịn̄ nsio nsio n̄kpọ ẹban̄a se isitịbede owo ama akpa; edi enyene esiemmọ etịn̄. Edi nso ke Bible etịn̄?

8. Ewe uwụtn̄kpọ ikeme ndinam n̄kpọ ediset n̄ka heaven emi enen̄ede an̄wan̄a nnyịn?

⁸ Owo ama akpa, idem esie esidiahade. Edi Andikobot ekondo ekeme ndinam enye afiak eset, onyụn̄ ọnọ enye utọ idem se ifọn ye enye. (Gen. 1:1; 2:7) Ini Paul etịn̄de aban̄a ediset n̄ka heaven, enye ama ọnọ uwụtn̄kpọ kiet, emi anamde ikụt ke idịghe ededi idem emi owo akadade akpa Abasi ekeme ndinam enye afiak edidu uwem. Da “n̄kpasịp” emi owo ọtọde ke uwụtn̄kpọ. N̄kpasịp emi owo esịnde ke isọn̄ esitịbe akabade edi eto, ibietke-biet ekpri n̄kpasịp emi ẹkemende ẹsịn ke isọn̄. Uwụtn̄kpọ emi Paul ọkọnọde do anam ikụt ke Andibot nnyịn ekeme ndinọ owo idem “nte enemde enye esịt.”

9. Nso ke 1 Corinth 15:39-41 etịn̄ aban̄a nsio nsio idem?

⁹ Kot 1 Corinth 15:39-41. Paul ama etịn̄ ke Abasi okobot n̄kpọ nsio nsio. Ke uwụtn̄kpọ, nsio nsio orụk idem ẹdu—idem eke enan̄, eke inuen, ye eke iyak. Enye ama etịn̄ n̄ko ke ekpese ikpaenyọn̄, ke oyokụt ke ọfiọn̄ ye utịn idịghe ukem. Paul ọkọdọhọ ke “ntantaọfiọn̄ kiet okpụhọde ye ntantaọfiọn̄ efen ke ubọn̄.” Ntre ke edi. Kpa ye emi nnyịn mîkanke ikụt ke ata ata enyịn, ntaifiọk ẹdọhọ ke ntantaọfiọn̄ edi ke utọ ke utọ; ndusụk ikpọ, ndusụk n̄kpri, ndusụk ndatndat, ndusụk mfia, ndusụk uto uto nte utịn. Paul ama ọdọhọ n̄ko ke ‘idem eke heaven odu, idem eke isọn̄ onyụn̄ odu.’ Nso ke ikọ esie ọkọwọrọ? Mi ke isọn̄, nnyịn  inyene idem obụkidem, edi mbon emi ẹdude ke heaven ẹdi spirit, utọ nte mme angel.

10. Nso orụk idem ke mbon emi ẹsetde ẹka heaven ẹdinyene?

¹⁰ Ke Paul ama eketịn̄ aban̄a nsio nsio orụk idem, enye ama ọdọhọ ete: “Kpasụk ntre ke edi ye ediset mme akpan̄kpa. Ẹtọ ke mbiara, ẹnam eset nte se mîkemeke ndibiara.” Edi imọdiọn̄ọ ke owo ama akpa, idem esidiahade oforo ntan. (Gen. 3:19) Owo anam didie ndien “eset nte se mîkemeke ndibiara”? Paul iketịn̄ke iban̄a owo ndiset mfiak ndu mi ke isọn̄, nte mbon emi Elijah, Elisha, ye Jesus ẹkenamde ẹset. Enye eketịn̄ aban̄a owo emi ẹnamde eset ye “idem eke spirit” man ekeme ndikodu ke heaven.—1 Cor. 15:42-44.

11-12. Jesus ekeset ye nso utọ idem? Mbon emi ẹyetde aran ẹdiset ye nso utọ idem?

¹¹ Ini Jesus okodude ke isọn̄, enye ekenyene idem obụkidem. Edi ini ẹkenamde enye eset, enye ama “akabade edi spirit eke ọnọde uwem” afiak ọnyọn̄ heaven. Kpasụk ntre n̄ko, mme Christian emi ẹyetde aran ẹdiset ye idem emi edinamde mmọ ẹkeme ndidụk heaven. Paul ama etịn̄ nte edisan̄ade ete: “Kpa nte isịnede mbiet enye emi ẹkedade ntan ẹnam, nnyịn iyesịne n̄ko mbiet enye emi edide eke heaven.”—1 Cor. 15:45-49.

¹² Ọfọn yak iti ke Jesus ikesetke ye idem obụkidem. Ini Paul ekperede utịt nneme esie, enye ama etịn̄ ke se ikanam Jesus okûset ye idem obụkidem edi ke “obụk ye iyịp ikemeke ndida obio ubọn̄ Abasi” emi odude ke heaven, nnyene. (1 Cor. 15:50) Mme apostle ye mbon eken emi Abasi edinamde ẹset ẹka heaven ididịghe aba obụk ye iyịp, koro utọ idem enye oro ekeme ndibiara. Ini ewe ke mmọ ẹdiset? Paul okowụt ke edidi ke ini iso, ke ididịghe ndondo oro mmọ ẹkpade. Etisịm ini Paul ekewetde Akpa Corinth, ndusụk mbet Jesus ẹma ẹkpakpan̄a, utọ nte apostle James. (Utom 12:1, 2) Ndien ama ekem, mme apostle eken ye  mbon en̄wen emi ẹyetde aran ẹyekpan̄a n̄ko.—1 Cor. 15:6.

13. Nso iditịbe ke ini edidu Christ?

¹³ Jesus ye Paul ẹma ẹtịn̄ ẹban̄a ini edidu Christ. Ata akpan ini edi oro. Akana ekọn̄, unyekisọn̄, ndiọi udọn̄ọ, ye ndiọi n̄kpọ eken ẹtịbe ke ofụri ererimbot ini oro ama edisịm. Ọtọn̄ọde ke 1914, imokụt ke prọfesi Bible emi ke osu. Edi enyene akpan n̄kpọ en̄wen emi prọfesi oro ọkọdọhọde ke eyetịbe. Jesus ọkọdọhọ ke ‘ẹyekwọrọ eti mbụk ke ofụri isọn̄ nte ntiense ẹnọ kpukpru mme idụt’ ẹte ke Obio Ubọn̄ Abasi ama ọtọn̄ọ ndikara, ‘ndien ekem utịt eyedi.’ (Matt. 24:3, 7-14) Paul ọkọdọhọ ke kpa ini “edidu Ọbọn̄” ke ẹdinam mme Christian emi ẹyetde aran emi ẹkekpade ẹset.—1 Thess. 4:14-16; 1 Cor. 15:23.

14. Nso iditịbe inọ mme Christian emi ẹyetde aran emi ẹkpade ke ini edidu Ọbọn̄?

¹⁴ Edieke Christian emi ẹyetde aran akpade ke ini edidu Ọbọn̄ emi, Abasi anam enye eset inikiet inikiet aka heaven. Se Paul eketịn̄de ke 1 Corinth 15:51, 52 owụt ke edi ntre. Enye ọkọdọhọ ete: “Idịghe kpukpru nnyịn idide ke n̄kpa, edi ẹyekpụhọde kpukpru nnyịn, ke idaha kiet, ke ediyịp enyịn, ke ini ẹfride akpatre obukpon̄.” Se Paul eketịn̄de emi ke osu idahaemi! Ẹma ẹnam nditọete Christ emi ẹset, esịt ayadat mmọ ata etieti. Mmọ ‘ẹyedu ye Ọbọn̄ kpukpru ini.’—1 Thess. 4:17.

15. Nso utom ke mbon emi Abasi edikpụhọrede “ke ediyịp enyịn” ẹdikanam?

¹⁵ Bible ọdọhọ nnyịn utom emi mbon emi Abasi edinamde ẹkpụhọde “ke ediyịp enyịn” ẹdikanamde ke heaven. Jesus ọkọdọhọ mmọ ete: “Owo eke akande onyụn̄  enịmde mme edinam mi tutu esịm utịt, nyọnọ enye odudu ndikara mme idụt, ndien enye ayada esan̄ ukwak akara mme idụt tutu mmọ ẹbomo mbai mbai nte esombat, kpa nte n̄kọbọde odudu nto Ete mi.” (Edi. 2:26, 27) Mmọ ẹyetiene Jesus emi edide Etubom mmọ ẹda esan̄ ukwak ẹkpeme mme idụt nte ekpemerọn̄.—Edi. 19:11-15.

16. Didie ke mbon emi ẹyetde aran ye mme erọn̄ en̄wen ẹdikan n̄kpa?

¹⁶ Bible enen̄ede anam yak idiọn̄ọ ke mme Christian emi ẹyetde aran ẹyekan n̄kpa. (1 Cor. 15:54-57) Mmọ ndiset n̄ka heaven ayanam mmọ ẹkeme ndidiana ye Jesus ntre idiọkido ke ofụri ererimbot ke ini Armageddon. Mme Christian eken, iren ye iban ke miliọn ke miliọn, ‘ẹyeto akwa ukụt ẹwọn̄ọ’ ẹbọhọ ẹdụk obufa ererimbot. (Edi. 7:14) Mbon emi ẹdibọhọde akwa ukụt do ẹyeda enyịn mmọ ẹkụt edikan en̄wen emi ẹkande n̄kpa ini mbon emi ẹkekpan̄ade ẹdisetde ke biliọn ke biliọn! Oh, kere nte esịt edidatde nnyịn ini oro! (Utom 24:15) Ndien ama ekem, kpukpru mbon emi ẹdisọn̄ọde ida ye Jehovah tutu esịm akpatre ẹyekan n̄kpa emi ikadade ito Adam; mmọ ẹyekeme ndidu uwem ke nsinsi ndien.

17. Akpa Corinth 15:58 ọdọhọ inam nso?

¹⁷ Se Paul ekewetde aban̄a ediset ke n̄kpa ọnọ mme Christian ke Corinth ọdọn̄ owo esịt etieti. Akpana kpukpru Christian mfịn ẹkọm Abasi ẹban̄a oro. Imenyene nti ntak ndinam item emi Paul ọkọnọde ete inyene ekese ndinam “ke utom Ọbọn̄” kpukpru ini. (Kot 1 Corinth 15:58.) Edieke isisịnde ofụri ukeme nnyịn inam utom Ọbọn̄ nnyịn, imekeme ndidori enyịn ndidu ata inem uwem ke ini iso. Inua ikemeke nditịn̄ utọ inem uwem emi ididude ke ini iso. Oro oyowụt ke utom emi ikanamde inọ Ọbọn̄ nnyịn ikedịghe ke ikpîkpu.