1-2. Na cava meda kauaitaka kina na lotu vaKarisito kece na veivakaturi i lomalagi?

LEVU na dauveiqaravi i Jiova nikua era nuitaka mera bula tawamudu e vuravura. Era nuitaka na ivovo ni lotu vaKarisito lumuti mera lai bula i lomalagi, era via kila ena vakacava tu na bula e kea. Ia vakacava o ira na nuitaka mera bula e vuravura? Eda na dikeva ena ulutaga qo na sala ena yaga kina na veivakaturi ni bula i lomalagi, ena nodra vakalougatataki na bula tawamudu e vuravura. Se mani cava gona na noda inuinui, e bibi meda kauaitaka na veivakaturi i lomalagi.

² Na Kalou e dusimaka eso na tisaipeli i Jisu ena imatai ni senitiuri mera volatukutukutaka na bula i lomalagi. E vakamacalataka na yapositolo o Joni: “Qo eda sa luve ni Kalou, e se sega ga ni matata na veika e baleti keda ena gauna se bera mai. Eda kila ni gauna ena vakaraitaki mai kina eda na vakataki koya.” (1 Joni 3:2) Koya gona, era sega ni kila na lotu vaKarisito lumuti ena vakacava tu na bula i lomalagi nira sa kabula vakayalo. Ia e macala nira na raici Jiova nira rawata na nodra icovi. E sega ni vakamacalataka vakamatailalai na iVolatabu na veivakaturi i lomalagi, ia e vakamacalataka na yapositolo o Paula eso na ka. Era sa na tiko vata kei Karisito na lumuti ni mai “vakamalumalumutaka vakadua na matanitu kece, lewa kece, kei na kaukaua kece.” Qori e okati tale ga kina na “iotioti ni meca . . . o mate.” Oti ena qai vakamalumalumutaki koya o Jisu vei Jiova, wili kina o ira na veiliutaki kei koya kei na ka kece. (1 Kor. 15:24-28) Dua dina na gauna vakairogorogo qori! *

3. Me vaka e tukuni ena 1 Korinica 15:30-32, e yaga vakacava vei Paula nona vakabauta na veivakaturi?

 ³ Nona vakabauta o Paula na veivakaturi, e vosota kina e levu na ituvaki dredre. (Wilika 1 Korinica 15:30-32.) E kaya vei ira e Korinica: “Au voleka ga ni mate e veisiga.” E vola tale ga ni “vala kei ira na manumanu kila mai Efeso.” De dua e kaya tiko o Paula ni a vala sara ga kei ira na manumanu ena valenisarasara e Efeso. (2 Kor. 1:8; 4:10; 11:23) Se rairai tukuni ira tiko na Jiu dau veivorati, kei na so tale era vaka na “manumanu kila.” (Caka. 19:26-34; 1 Kor. 16:9) Se mani cava e vakaibalebaletaka, e macala ga ni sotava o Paula e levu na ituvaki vakadomobula, ia e nuidei ni na vakaicovitaki ena gauna se bera mai.—2 Kor. 4:16-18.

4. E vakayaloqaqataki ira vakacava na lotu vaKarisito nikua na veivakaturi? (Raica na iyaloyalo ena waqana.)

⁴ E vakadomobula na gauna eda donuya tu qo. Eso na tacida era vakaleqai ena basulawa. Eso tale era tiko ena vanua e yaco tu kina na ivalu qai leqataki na nodra bula. Eso era qaravi Jiova tiko ena vanua e vakadredretaki se vakatabui kina noda cakacaka. E rawarawa sara mera biu e valeniveivesu se vakamatei ena vuku ni nodra yalodina. Ia era qaravi Jiova tiko ga ena vosota, era ivakaraitaki vinaka dina. Era nuidei ke ra mani vakamatei ena gauna qo, ena uasivi sara na sala e vakalougatataki ira kina o Jiova ena gauna se bera mai.

5. Na raicala cava e rawa ni vakaluluqataka noda vakabauta na veivakaturi?

⁵ E vakasalataki ira na tacina o Paula mera qarauna nodra raicala eso, era kaya: “Ke ra na sega ni vakaturi na mate, ‘meda kana ga, da gunu, nida na mate nimataka.’” A laurai tale ga na rai qori vei ira eso ni bera mada ga na gauna i Paula. A rairai lavetaka tiko na ka e tukuni ena Aisea 22:13, me baleta na nodra itovo na Isireli. Era guta ga na marau, era sega ni toro voleka vua na Kalou. E vaka mera kaya tiko “meda marau mada ga yani nikua ni se rawa,” e levu e va tale ga qori nodra rai nikua. Ia, e volatukutukutaki ena iVolatabu na leqa era qai sotava na Isireli ena vuku ni rai qori.—2 Vei. 36:15-20.

6. Ena uqeti keda vakacava na inuinui ni veivakaturi meda digia vinaka noda ilala?

⁶ Nida vakabauta ni o Jiova ena vakaturi ira na mate, e bibi sara meda qarauna noda ilala. E vinakati vei ira na lotu vaKarisito e Korinica mera kua ni vakailala kei ira na sega ni vakabauta na veivakaturi. Na cava eda vulica kina nikua? E veivakaleqai nida vakailala kei ira na guta na marau ena gauna qo. Ke da vakailala kei ira, ena cala noda rai, ena vakaleqa tale ga noda itovo. Ena rawa sara ga nida lai muria kina na ivakarau ni bula e cata na Kalou, na ivalavala ca. E veivakadreti gona o Paula: “Ni yadra mai moni cakava na ka e dodonu, ni kua ni cakava na ka ca.”—1 Kor. 15:33, 34.

7. Me vaka e tukuni ena 1 Korinica 15:35-38, na cava era na rairai taroga eso me baleta na veivakaturi?

⁷ Wilika 1 Korinica 15:35-38. Ni dua e saga mera vakatitiqataka e levu na veivakaturi, ena rairai taroga: “Era na vakaturi vakacava na mate?” Ena yaga vakalevu nida vakasamataka na isaunitaro e  tukuna o Paula, ni levu nikua e duidui nodra rai ena ka e yaco nida mate. Ia na cava e vakavulica na iVolatabu?

8. Na ivakatautauvata cava ena matata kina vei keda na veivakaturi ni bula i lomalagi?

⁸ Ni dua e mate, ena vuca na yagona. Ia o koya e bulia na lomalagi kei na vuravura e rawa ni vakaturi koya tale, me bulia vou tale na yagona. (Vkte. 1:1; 2:7) E tukuna o Paula e dua na vakatautauvata meda kila kina, ni sega ni vinakati sara vua na Kalou me vakatura e dua ena yago vata ga e mate kina. Vakasamataka mada na “sorenikau.” Ena kadre na sorenikau e tei qai tubu me dua na kau vou. Na kau e tubu qori, e duatani sara mai na sorenikau lailai. E vakayagataka na ivakatautauvata qori o Paula me vakaraitaka, ni rawa vua na Dauveibuli me vakarautaka na yago “me vaka ga na nona lewa.”

9. Na cava e tukuni ena 1 Korinica 15:39-41 me baleta na duidui ni veika e bulia o Jiova?

⁹ Wilika 1 Korinica 15:39-41. E tukuna o Paula ni levu sara na ka e bulia o Jiova ena kedra veimataqali. Kena ivakaraitaki, e duidui sara na yagodra na bulumakau, manumanuvuka kei na ika. E kaya tale ga nida na raica ni duidui na siga mai na vula. E kaya ni “kalokalo mada ga era sega ni tautauvata ena kedra lagilagi.” De dua eda se bera ni raica sara ga e matada, ia era vakadinadinataka na saenisi ni tiko na ka era vakatoka me kalokalo damudamu vakaitamera, kalokalo leka vulavula, kei na kalokalo dromodromo me vaka na matanisiga. E tukuna tale ga o Paula ni “tiko na yago vakalomalagi, e tiko tale ga na yago vakavuravura.” Na cava e vakaibalebaletaka? O keda na bula e vuravura, eda kabula vakayago,  era kabula vakayalo na bula i lomalagi me vakataki ira na agilosi.

10. E duatani vakacava na yagodra na vakaturi mera bula i lomalagi?

¹⁰ Dikeva na ka sa qai tukuna o Paula: “E vaka kina nodra vakaturi na mate. E vuca ni tei, ena sega tale ni vuca ni sa vakaturi.” E macala ni na vuca na yago nida mate qai veisau me kuvuniqele. (Vkte. 3:19) Ena rawa gona vakacava ni sega tale ni “vuca na yago ni sa vakaturi”? E sega ni vakaibalebaletaki ira tiko na vakaturi e vuravura o Paula, me vakataki ira e vakatura o Ilaija, Ilaisa, kei Jisu. E vakaibalebaletaki ira ga na vakaturi mera bula i lomalagi ena “yago vakayalo.”—1 Kor. 15:42-44.

11-12. E veisau vakacava na yago i Jisu ena gauna e vakaturi kina? E tautauvata vakacava qori ena nodra vakaturi na lumuti?

¹¹ E mai bula e vuravura o Jisu ena yago vakatamata, ia e vakaturi me “kabula vakayalo, me vu ni bula,” e qai lesu i lomalagi. Era na vakaturi tale ga na lotu vaKarisito lumuti mera kabula vakayalo. E vakamacalataka o Paula: “Me vaka ga na noda ucui koya e vu mai na kuvuniqele, eda na ucui koya tale ga e vu mai lomalagi.”—1 Kor. 15:45-49.

¹² E bibi meda nanuma tiko ni a sega ni vakaturi o Jisu ena yago vakatamata. Ni vakarau tinia o Paula nona vakamacalataka na veivakaturi, e kaya: “Na yago kei na dra ena sega ni rawata na matanitu ni Kalou” e lomalagi. (1 Kor. 15:50) Koya gona, ni ratou vakaturi na yapositolo kei ira na vo ni lumuti, na yagodra ena sega ni vakayago se vakadra, se me vuca rawarawa. Era na vakaturi ena gauna cava? E vakamacalataka o Paula nira na sega ni vakaturi ke ra mate ena gauna ya, ia ena qai yaco qori ena dua na gauna e muri. Eso mada ga na tisaipeli era sa “moce, oya era sa mate”  ena gauna e vola kina o Paula na 1 Korinica, kena ivakaraitaki na yapositolo o Jemesa. (Caka. 12:1, 2) Qori tale ga na ka ena yacovi ratou na vo ni yapositolo kei ira na lumuti ni toso na gauna.—1 Kor. 15:6.

13. Na cava na ivakatakilakila ni nona tiko o Jisu?

¹³ Erau vakamacalataka ruarua o Jisu kei Paula e dua na gauna vakairogorogo se bera mai, ya na nona tiko o Karisito. Na cava na ivakatakilakila ni gauna qori? Na ivalu, uneune, matedewa kei na levu tale na ka ca e vuravura. Eda sa vakadinadinataka na parofisai vakaivolatabu qori me tekivu mai na 1914. E dua tale ga na ka bibi ena yaco tiko. E kaya o Jisu ni na vunautaki ena veiyasa i vuravura na itukutuku vinaka ni Matanitu ni Kalou sa tauyavu, me “ivakadinadina ena veimatanitu kece, sa na qai yaco na icavacava.” (Maciu 24:3, 7-14) E vakamacalataka o Paula ni gauna ena “tiko kina na Turaga,” era na vakaturi na lotu vaKarisito lumuti era “sa moce, oya era sa mate.”—1 Ces. 4:14-16; 1 Kor. 15:23.

14. Na cava ena yacovi ira na lumuti era mate donuya nona tiko o Karisito?

¹⁴ O ira na lumuti era sa vakaotia na nodra bula e vuravura ena gauna qo, era na vakaturi sara ina bula i lomalagi. E vakadeitaka qori o Paula ena ka e vola ena 1 Korinica 15:51, 52: “Eda na sega ni moce kece, oya meda mate, ia eda na veisau kece, vakasauri me vaka na sauriva ni mata, ni tagi tiko na iotioti ni biukila.” Sa vakayacori sara tiko ga ena gauna qo na ka e vola o Paula! Nira sa vakaturi na taci Karisito qo, era na  marau vakalevu; era na qai “dau tiko vata ga kei na Turaga.”—1 Ces. 4:17.

15. Na itavi cava era na qarava o ira na vakaturi me “vaka na sauriva ni mata”?

¹⁵ E vakamacalataka na iVolatabu na itavi era na lai qarava i lomalagi o ira na vakaturi me “vaka na sauriva ni mata.” E tukuna vei ira o Jisu: “O koya ena qaqa, e muria tale ga na noqu cakacaka me yacova na icavacava, au na solia me lewa na veimatanitu, ena vakatawai ira na lewenivanua ena ititoko kaukamea mera vurumemea kina me vaka na iyaya qele, na lewa vata ga e solia vei au o Tamaqu.” (Vkta. 2:26, 27) Era na muria na nodra iLiuliu ena itavi me qaravi, ya mera vakatawai ira na veimatanitu ena ititoko kaukamea.—Vkta. 19:11-15.

16. Sala cava era na qaqa kina vei mate e levu?

¹⁶ E macala ga nira na qaqa vei mate na lumuti. (1 Kor. 15:54-57) Nira vakaturi, era na veivuke ena kena vakaoti na veika ca e vuravura raraba ena ivalu na Amaketoni sa voleka. E vica vata na milioni na yalewa kei na tagane lotu vaKarisito era na “bula sivia na veivakararawataki levu” mera bula yani ena vuravura vou. (Vkta. 7:14) O ira na bula qori e vuravura, era na vakadinadinataka e dua tale na sala e rawati kina na qaqa vei mate, ya nodra vakaturi mai e vica vata na bilioni era mate tu. Vakasamataka mada na levu ni noda marau ena gauna qori! (Caka. 24:15) O ira kece na yalodina vei Jiova, era na qaqa vei mate, na mate e vakadewa mai o Atama. Era na qai bula tawamudu.

17. Nida vakasamataka na 1 Korinica 15:58, na cava meda cakava ena gauna qo?

¹⁷ E macala ga nida vakavinavinakataka na lotu vaKarisito kece nikua, na vosa veivakacegui i Paula me baleta na veivakaturi e vola vei ira e Korinica. E tiko gona na vuna vinaka meda muria kina na veiuqeti i Paula meda vakaitavi vakalevu ena “cakacaka ni Turaga.” (Wilika 1 Korinica 15:58.) Ke da yalodina qai gumatua ena cakacaka qori, eda na vakanamata ena bula marautaki se bera mai. Ena sega ni vakatauvatani rawa na totoka ni bula ena gauna qori. Ena vakadeitaka ni sega ni ka wale na noda veiqaravi ena cakacaka ni Turaga.