1-2. Soglea Kristanvamnim sorga voilea punorjivontponna vixim kiteak zannam zaunk zai?

AIZ Jehovachi seva kortolea zaiteank prithumer sasnank jieuncho bhorvonso asa. Punn thoddeank Jehovan obhixikt kelam. Ani tankam sorgar punorjivont zauncho bhorvonso asa. Hea obhixiktank sorgar jivit koxem astolem tem zannam zaunk zai. Punn tea vixim prithumer jieuncho bhorvonso asloleamnim pasun kiteak zannam zaunk zai? Karonn sorginchea punorjivontponna udexim prithumer jieuncho bhorvonso asloleank pasun besanvam mellttolim. Tor amkam sorgar jieuncho bhorvonso asum vo prithumer, sorga voilea punorjivontponna vixim ami zannam zaunk zai.

² Poilea xekddeantlea Jezuchea thoddea xisank sorginchea punorjivontponna vixim borounk Devan prerit kel’le. Apostl Juanvan mhunttlem: “Ami Devachim bhurgim, punn fuddarak ami kitem zatoleanv tem ozun porian ugddapem zalem na. Punn jea disa tem ugddapem zatolem, tea disa ami Tache sarkim zatoleanv mhonn amkam khatri asa.” (1 Juanv 3:2) Tor obhixikt Kristanv sorgar gelea uprant tanchem jivit koxem astolem tem tankam khobor na. Punn te sorgar voitat tednam tankam Jehovak pollounk mellttolem. Sorga voilea punorjivontponna vixim Bible-ant sogli mahiti na. Punn apostl Paulun hea vixim thoddim mahiti dilea. Krist “sogllea Odhikariancho ani Podviancho bhosm” korta tednam obhixikt tachea sangata astole. Te ‘nimanno dusman mornnacho’ pasun bhosm kortole. Xevottak, Jezu ani tachea  sangata raj choloupi apleak ani aplea tabeant asa tem soglem Jehovachea adhin kortole. (1 Kor. 15:24-28) To kitlo boro vell astolo nhoi! *

3. 1 Korintkarank 15:30-32-ant sanglolea pormonnem, punorjivontponnacho bhorvonso aslolean Pauluk koxi modot zali?

³ Punorjivontponnacho bhorvonso aslolean, Paulu zaitea torechea trasancho fuddo korunk xoklo. (1 Korintkarank 15:30-32.) Tannem Korintkarank oxem sanglem: “Dor disa mornnachea sonkoxttant hanv asam.” Ani uprant mhunnttlem: “Efezant tea savzam kodde hanv loddai korunk pavlom.” Hanga, Efezantlea eka khella-moidanant ranvotti zonvaram sangata zhuzlo tea vixim to sangtalo astolo. (2 Kor. 1:8; 4:10; 11:23) Vo “savzam,” hem utor uzar korun taka tras dilolea Judev ani heram vixim to sangtalo astolo. (Itihas 19:26-34; 1 Kor. 16:9) Pauluk bhirankull poristhitincho fuddo korcho poddlo. Punn tacho fuddar boro astolo mhunn taka khatri asli.—2 Kor. 4:16-18.

4. Punorjivontponnacho bhorvonso Kristanvank aiz koso modot korta? (Masikachem fuddlem chitr polloiat.)

⁴ Ami kotthin poristhitint jietat. Amchea thoddea bhav-bhoinnancher ot’teachar zala. Thodde oslea zageamnim ravtat, zoim zhuz zata ani tim surokxit nant. Thoddea desamnim Jehovachea lokank porgott korunk porvangi na. Ani tim toxim kortat zalear odhikari tankam bondkhonnint ghalunk xoktat vo tim aplo jiv pasun hogddaunk xoktat. Tori astana, tim soglim bhav-bhoinnam Jehovachi bhokti kortat, ani tim amkam ek borem udharonn zaun asat. Tim bhienant, karonn tim aplo jiv hogddaitat zalear pasun Jehova tankam boro fuddar ditolo mhunn khatri asa.

5. Koslea torechea chukichea chintpak lagon punorjivontponnacher aslolo amcho bhorvonso halonk xokta?

⁵ Paulun bhav-bhoinnank hea chukichea chintpa vixim xittkailem: “Dev zor mel’leam monxank punorjivont korcho na, . . . ‘borench khaum-ia ani pieum-ia, kiteak faleam ami mortoleanv.’” Oslea torechem chintop, Pauluchea poilim jiel’lea lokanchea monant pasun aslem. To ghoddie hanga, Izaias 22:13-antlim Israelitkaranchim utram sangtalo astolo. Deva sangata asloli tanchi ixttagot ghott korchea bodlek, te apleacheruch dhean ditale. Moronn kednam ieta tem khobor na dekhun, aiz zata titli moja korcho sobhav tea Israelitkarank aslo. Ani aiz pasun lokank tosloch sobhav asa. Punn tea raxttrachea hea chukichea chintpak lagon zalolea vaitt porinnama vixim amkam Bible-ant vachunk melltta.—2 Itihas 36:15-20.

6. Punorjivontponnacher amcho bhorvonso unno zaina zaunk ami konna lagim ixttagot korunk zaina?

⁶ Tor Jehova meloleank porot jivont kortolo mhunn ami zannant dekhun ami konnam lagim ixttagot kortat tachea vixim ami chotrai dovrunk zai. Karonn Korintantlea bhav-bhoinnamnim pasun punorjivontponnacher bhavarth dovrinant toslea lokam lagim ixttagot dovorchea vixim chotrai dovrunk zai asli. Ami pasun tanchea thaun hem lisanv xiktat: Fuddara vixim chintinastana, aiz mauz-moja marchea vixim chintat tosleam sangata ami ixttagot kortat zalear tancho amcher vaitt porinnam zaunk xokta. Ani ami amcheo boreo sonvoim-o hogddaitolim ani tanchea bhaxen chintunk lagtolim. Tea bhair, te lok amkam Devak manvona tem korunk pasun urba diunk  xoktat. Takach lagon Paulun tankam oxem sanglem: “Soirannar ieiat ani tumchi vankddi vatt soddun diat.”—1 Kor. 15:33, 34.

7. 1 Korintkarank 15:35-38-ant sanglolea pormonnem, dusreanchea monant punorjivontponna vixim dubhav ghalunk proitn kortat te kitem vicharunk xoktat?

⁷ 1 Korintkarank 15:35-38 vachat. Dusreanchea monant punorjivontponna vixim dubhav ghalunk proitn kortat te ghoddie oxem vichartale: “Meleant tankam Dev koxim punorjivont kortolo?” Paulun oslea lokank dilolea zobabacher ami dhean diunk zai. Karonn aiz zaitea lokank melea uprant kitem zata tea vixim veg-veglli patienni asa. Punn Bible kitem xikoita?

8. Sorga voilem punorjivontponn somzonk amkam khoinchem udharonn modot korunk xokta?

⁸ Devan kainch nastana vixv rochlo. Tor, ek munis morta tednam tachi kudd kuson kainch urona zalear-ui taka punorjivont korta tednam novi kudd diunk taka kotthin nhoi. (Ut. 1:1; 2:7) Punorjivont korunk taka tachea adlea kuddichi goroz na mhunn somzaunk Paulun ek udharonn dilem. Eka ‘bim-e’ vixim chintat. Ek bim zomnint roilea uprant ti vaddtta ani novem zhadd zata. Bim-ek tea zhadda sangata sor kelear, tem zhadd pollounk ekdom vegllem dista. “Dev, Apnnench tharailam toxem, ang ditolo” mhunn dakhounk Paulun hem udharonn uzar kelem.

9. 1 Korintkarank 15:39-41-ant Paulu kitea modem ontor sangta?

⁹ 1 Korintkarank 15:39-41 vachat. Devan rochloli rochnna veg-vegllea torechi ani akarachi asa mhunn Paulun sanglem. Udharonnak, nusteank, suknneank ani zonvarank veg-veglli kudd asa. Teach bhaxen ontrolla voilea suria ani chondrima modem pasun ontor asa. Tea bhair, “noketram modem porian porzoll vegllo-vegllo” asa mhunn tannem sanglem. Amchea dolleamnim ghoddie disona toslim veg-vegllea torechim  noketram asat. Thoddim vhodd, lhan, tambddim, dhovim, ani thoddim amchea suria sarkim holldduvea rongachim. Tea bhair, “prithver kuddi asat toxench ontrallar-ui kuddi asat” mhunn pasun Paulun sanglem. To kitem mhunnonk sodhtalo? Prithumer jietoleank zoxi rogta-masachi kudd asa, toxich sorgar asloleank, ainzam sarki veg-vegllea torechi kudd asa.

10. Sorgar punorjivont zaloleank koslea torechi kudd astoli?

¹⁰ Paulu fuddem kitem mhunntta tem polloiat: “Mel’leanchem punorjivontponn-ui toxench: biam vori ami vomptanv ti kudd vinaxi, Dev voir kadta ti ovinaxi.” Melea uprant eka munxachi kudd kusta ani mati zata. (Ut. 3:19) Tor tantuntlean ‘Dev ek ovinaxi kudd koso voir kaddtta?’ Paulu hanga Elija, Elisha, ani Jezun prithumer kelam toslea punorjivontponna vixim uloinaslo. Punn sorga voili kudd mhunnche, “atmik kudd” melltta toslea punorjivontponna vixim to uloitalo.—1 Kor. 15:42-44 Povitr Pustok – Novo Korar.

11-12. Jezu punorjivont zalo tednam taka kosli kudd mell’lli, ani obhixiktank pasun tosli kudd koxi melltta?

¹¹ Jezu prithumer aslo tednam taka rogta-masachi kudd asli. Punn to punorjivont zalo tednam, to ‘jivit divpi atmo zaun’ sorgar gelo. Teach bhaxen, obhixikt Kristanv otmik kuddin punorjivont zatat. Paulun somzailem: “Zoxem ami matiechea monxachem sarkem gheun aileanv, toxench sorga voilea sarkem ami ghetoleanv (vers 49, NW).”—1 Kor. 15:45-49.

¹² Jezu rogta-masan punorjivont zaunk na hem zannam zavop mhotvachem. Karonn, punorjivontponna vixim aplem ulovop sompoitana Paulun oxem mhunnttlem: ‘Amchea masa-rogtak sorgar aslolea Devachea Rajeant daiz zoddunk tank na.’ (1 Kor. 15:50) Tor sorgar punorjivont zatole apostl ani obhixikt, kusta toslea rogta-masachea kuddin jive zaunchenant.  Tanchem punorjivontponn kednam zatolem? Te melea uprant, hem rokddench zaunchem na, punn fuddem zaunchem asa mhunn Paulun sanglem. Paulun 1 Korintkarank hi chitt boroili tednam, apostl Jakoba sarke, thodde xis ‘morun gel’le.’ (Itihas 12:1, 2) Ani her apostl ani obhixikt Kristanv uprant ‘morun gele.’—1 Kor. 15:6.

13. Jezuchea ienneachea vellar kitem ghoddttolem?

¹³ Jezun ani Paulun eka khas vella vixim, mhunnche Kristachea iennea vixim sanglem. Tea vellar, zhuz, bhuimkamp, duens ani her vaitt ghoddnneo ghoddttoleo mhunn sanglolem. 1914 thaun hi Bible-antli bhasaunni purnn zata tem ami polloitat. Punn anik ek ghoddnni pasun ghoddchi asli. Devachea Rajea vixim xubhvortoman “ak’khea sonvsarant porgott zatolem. Ani tea uprant xevott ietolo” mhunn Jezun sanglolem. (Mt. 24:3, 7-14) ‘Somiachea ienneachea’ vellar “meleant” tim obhixikt Kristanvam pasun, punorjivont zatolim mhunn Paulun sanglem.—1 Tes. 4:14-16; 1 Kor. 15:23.

14. Kristachea ienneachea vellar mortat tea obhixikt Kristanvanchem kitem zatolem?

¹⁴ Aichea disamnim obhixikt mortat tednam te rokddech punorjivont zaun sorgar voitat. Hem amkam 1 Korintkarank 15:51, 52-ant Paulun sanglolea hea utrantlean kolltta: “Ami sogllim morchim nanv, punn eke ghoddie bhitor, dollo bittbitt’ta mhonnosor, nimanne tuturechea sadar Dev amam-soglleanchem rupantor kortolo.” Paulun mhunnttlolim him utram aiz purnn zait asat! Te punorjivont zatat tednam, hea Kristachea bhavank khub khuxalkai mellttoli ani te ‘Somiachea sangata sodam-sodankal’ astole.—1 Tes. 4:17.

15. “Dollo bittbitt’ta mhonnosor” punorjivont zatat te sorgar kitem kortole?

 ¹⁵ “Dollo bittbitt’ta mhonnosor” punorjivont zatat te sorgar kitem kortole mhunn Bible sangta. Jezu tankam sangta: “Zoit vhortoleank ani xevott porian Mhoji chakri kortoleank, Mhojea Bapa koddsun Hanvem ghetla toch odhikar taka raxttrancher ditolom ani, matiechea aidonancho churo kortat toxem, to lokhonddache betkattien tancher raj choloitolo.” (Prok. 2:26, 27) Te Jezucho pattlav korun eka lokhonddachea betkattien raxttrancher raj choloitole.—Prok. 19:11-15.

16. Zaito lok mornnacher zoit koso mellounk xoktolo?

¹⁶ Obhixikt Kristanv mornnacher zoit melloitole mhunn kainch dubhav na. (1 Kor. 15:54-57) Te punorjivont zatat dekhun Armaged’don-achea zhuza vellar sonvsarant aslolem soglem noxtteponn te kaddunk xoktole. Lak’khamnim her Kristanv ‘nixttur dhumallea thaun’ novea sonvsarant salvar zatole. (Prok. 7:14) Tea salvar zalolea Kristanvank anik ek torechem punorjivontponn pollounk mellttolem. Tem mhunnttlear, adim melolea lak’khamnim lokanchem punorjivontponn. Mornnacher hem anik ek zoit amkam kitlem khuxalkai haddttolem tea vixim chintat! (Itihas 24:15) Ani Jehovak purnn toren visvaxi ravtat tim Adanva thaun ailolea mornnacher zoit melloun ghetolim ani sasnak jieunk xoktolim.

17. 1 Korintkarank 15:58-nt sanglam tem monant dovrun ami aiz kitem korunk zai?

¹⁷ Punorjivontponna vixim Paulun Korintkarank boroilem tem buzvonn dita dekhun, aiz dor ek Kristanv khuxal asa. Tor ‘Somiache sevent’ amchean zata tem soglem korunk ani Paulun dil’lo sol’lo pallunk amkam borim karonnam asat. (1 Korintkarank 15:58 vachat.) Ami oxem korit ravtat tednam, amkam fuddarak khub khuxalkaiechem jivit mellttolem. Tem jivit amchean chintunk zaina titlem borem astolem. Hea toren, Somiachea sevent ami kelolo vavr nirfoll zauncho na mhunn amkam khatri melltta.