1, 2. Kukwe mikadre gare jai nitre gaikröta ño kä kwinbiti yebätä, ¿ye ñobätä ütiäte nitre kristiano jökrä kräke?

NITRE näin kä kwinbiti ye gaikröta ño yebätä kukwe meden mada mikata gare ye ni Jehová mikaka täte jökrä tö mikabätä gare jai. Metrere, nitre dianinkä nänkäre kä kwinbiti tö kukwe ye mikai gare jai ñobätä ñan aune kukwe kwin ye tä niaratre kräke ja känenkäre. Aune nitre kwati Jehová mikaka täte nünain kä tibienbätä tö kukwe ye mikai gare jai ñobätä ñan aune nitre gaikröta nünankäre kä kwinbiti ye köböire kukwe kwin keta kabre rabai kwetre yebätä.

² Ngöbökwe nitre ruäre ja tötikaka Jesukwe siklo kena mikani kukwe tike nüna kä kwinbiti yebätä. Apóstol Juan käkwe niebare: “Ni abko nena Ngöbö ngäbriänkätre era metre bkänä, akwa ni rabadi ño mrä, ye abko Ngöbö ngämi mike gare. Akwa Jesukristo rükadita angwane, niara abko ño nikwe tuadi ja okwä jenbti, aisete ni rabadi niara kwrere arato” (1 Juan 3:2). Aisete nitre dianinkä nänkäre kä kwinbiti yekwe nünain ño aune ngrabare ja üaire ye ño ye ñaka gare ietre. Kukwe kwin biain ietre ngwane Jehová tuai kwetre yebrä gare ietre. Nitre näin kä kwinbiti ye gaikröta ño yebätä Biblia ñaka kukwe mike gare krubäte, akwa tä kukwe ruäre mike gare. Ñodre, Kristokwe gobrantre, ji dokwä ngwanka krikri, nitre dite dite aune “rüe mrä” gata ye gaite ngwane, nitre dianinkä nänkäre kä kwinbiti täi siba arato niebare Pablokwe. Mrä mada, Jesús, nitre gobranka ben aune jondron jökrä ja mikai Jehová kisete (1 Cor. 15:24-28). ¡Kukwe ye kwin krubäte! *

3. 1 Corintios 15:30-32 tä niere erere, ¿Pablo nämäne tödeke nitre krütani gaikröta yei ye köböire dre nuainbare kwe?

 ³ Nitre krütanina gaikröta yei Pablo nämäne tödeke, ye käkwe niara dimikani kä ngwen nüke jai kukwe tare keta kabre ben (ñäkädre 1 Corintios 15:30-32 yebätä). Niebare kwe nitre Corinto ie: “Köbö kwatirekwatire tita kä krübätete rätäninkä gatabti”. Aune niebare kwe: “Jändrän ngwarbe romon romon, ben rüdre, kwrere jire tikwe rübare nitre krübäte krübäte ben juta Efeso nete”. Jondron nire metre ben ja metani kwe juta yete yebätä nämäne blite raba ruin nie (2 Cor. 1:8; 4:10; 11:23). O nitre judío ja mikani niara rüere jondron nire romon romon kwrere yebätä nämäne blite raba ruin nie (Hech. 19:26-34; 1 Cor. 16:9). Kukwe ye jökrä ben Pablo ja tuani töi jämebiti ñobätä ñan aune kukwe kwin nämäne niara kräke ja känenkäre ye nämäne töite yebätä (2 Cor. 4:16-18).

4. ¿Nitre krütanina mikaita nire yei tö ngwanta ye tä nitre kristiano nengwane mike ño dite? (Üai kena täräkwatabätä mikadre ñärärä).

⁴ Kä tare näire nita nüne arato. Ja mräkätre ruärebätä kukwe tare nuainbarera. Mada abokän tä nüne ñaka kwin rü ye köböite. Aune kä mada känti sribi nuainta nikwe ye ñäkäita, yebätä ñaka tä nemen nuäre ja mräkätre kräke Jehová mikakäre täte. Akwa yebiti ta, ja mräkätre ye tä Jehová mike täte jankunu aune tä kukwe kwin bämike ni jökrä kräke. Ñaka tätre kä jürä ngwen jabätä ñobätä ñan aune krütadre ngwane, Jehovata kukwe kwin käbämike ietre ye gare ietre yebätä.

5. Nitre krütani gaikröta ie tö ngwanta nikwe, ¿akwa ni raba kite kukwe meden niere jai köböite ni ñan jatai tödeke jankunu kukwe kwin yei?

⁵ Pablo ja mräkätre ruäre mikani mokre nämäne töbike blo krubäte yebätä. Nämänentre niere: “Ngöbökwe ñan ni krütanikrütani mikadreta nire angwane, ¡Nane ni krütadre jetbe, aisete ari mröre kri, ari dö ñaen kabre!”. Mekerabe Pablo ye känenkri, nitre kwati nämänena töbike kore. Ye medenbätä, Pablo nämäne blite Isaías 22:13 yebätä raba ruin nie, känti nitre israelita nämäne töbike ño mikata gare. Nitre israelita krötadre Jehová ken näre akwa nämänentre ja näkwite jondron kä nebätä ye jiebiti. Nitre kwati kä nengwane erere nitre israelita ye nämäne niere jai: “Kä ngwen juto jabätä ja nire nikwe ye chitani yebätä”. Akwa ye köböite kukwe tare namani bare bätätre ye gare nie (2 Crón. 36:15-20).

6. ¿Nitre krütanina gaikröta ie tö ngwanta nikwe ye raba ni dimike ño ja ketamuko ño känene?

⁶ Nitre krütanina gaikröta ie tödekata nikwe ye raba ni dimike ja ketamuko meden känändre nikwe ye känene kwin. Nitre krütanina gaikröta ye nire ñaka nämäne kain ngäbiti yebe ja mräkätre Corinto ñaka ja ketadre ribebare ietre. ¿Kukwe ye tä dre driere nie? Nire nire töita ja näkwitabätä kukwe nengwane aibebätä yebe ja ketadre krubäte ye köböite kukwe ñaka kwin rabai bare nibätä. Ja ketadre bentre ye köböite kukwe ja jie ngwankäre kwin aune kukwe kwin nuainta nikwe ye raba nente nikän. Aune ye raba niken ni ngwena kukwe meden tuin käme Ngöböi ye nuainne siba arato. Ye medenbätä, 1 Corintios 15:33, 34 yekänti Pablokwe mäträbare krörö: “Munkwe töbikata kuin ja käne, käkwe ñan ja mika ngite mda”.

7. 1 Corintios 15:35-38 tä niere erere, ¿nitre krütanina gaikröta yebätä nitre ruäre raba kukwe meden ngwentari?

⁷ (Ñäkädre 1 Corintios 15:35-38 yebätä). Nitre krütani gaikröta yebätä ni iti  raba kukwe ruäre niere ñaka mikakäre era jai. Raba kukwe ne kwrere ngwentari: “¿Ni krütanina se abko rükadreta nire ño sere? ¿Ni krütani rükadreta nire angwane, rabadi ño ngrabare ruen?”. Pablokwe dre mikani gare kukwe yebätä ye nikwe mikadre gare jai ye ütiäte krubäte ñobätä ñan aune gata ye bitikäre dreta nemen bare yebätä nitre kwati tä kukwe jene jene niere. ¿Akwa dre drieta Bibliakwe?

8. ¿Nitre näin kä kwinbiti gaikröta ño ye kukwe keteiti medenbiti ni dimikata mike gare kwin jai?

⁸ Ni iti tä krüte ngwane ngrabare kwe tä ngütete. Kä kwinta aune kä tibien ye ñaka nämäne jire akwa Jehovakwe sribebare, yebätä raba nitre krütani ye miketa nire aune ngrabare meden ribeta kwetre jai ye bien ietre (Gén. 1:1; 2:7). Ngöbö ñaka tä ngrabare arabe bienta, ñakare aune tö ngrabare meden biain ietre ye erere tä bien ietre. Kukwe ye mikakäre gare Pablokwe kukwe keteiti bämikani. Blitabare kwe nura yebätä. “Nura” ye nökata dobote aune tä nementa mure mada. Nura mu ye ñaka ja erebe nura chi yebe.

9. ¿Ngrabare bätäkä ngwarbe tärä yebätä 1 Corintios 15:39-41 tä dre niere?

⁹ (Ñäkädre 1 Corintios 15:39-41 yebätä). Jondron bätäkä ngwarbe sribebare Ngöbökwe yebätä blitabare Pablokwe. Ñodre, nibi ngrabare, nukwä ngrabare, gwa ngrabare, jondron ye ñaka ja erebe. Ñänä aune sö ye ñaka ja erebe. Aune “muke kwatirekwatire abko trä tärä bä jene jene” niebare kwe arato. Ñaka raba tuin nie akwa nitre científico tä niere erere, muke krikri, kia, tainbrere, ngwenbrere aune sübrüre ñänä kwrere ye tärä. “Jändrän kä käinbti amne jändrän kä temenbtä abko bä ñakare ja kwrere jökrä” niebare Pablokwe arato. ¿Yebiti dre gäräbare kwe? Nire nire tä nüne kä tibienbätä ye abokän ngrabare ja ngätäre, akwa nire nire tä nüne kä kwinbiti abokän ngrabare ja üaire, ñodre angeletre.

10. ¿Nitre gaikröta nünankäre kä kwinbiti ye gaikröta ngrabare ñobiti?

¹⁰ Pablokwe kukwe ye mikani gare junkunu. Niebare kwe: “Ye kwrere, ni krütanikrütani mikadita nire Ngöbökwe angwane, rakadikä kore arato nibtä: Ni ngätä tä niken ngwarbe abko doboi mikata, akwa Ngöbökwe ni mikadita nire angwane,  ni ngätä niken ngwarbe ñakare jire chi mda abko biandi kwe nie”. Bäkänä, nire tä krüte ngrabare kwe tä ngütete aune tä nikwiteta dobore (Gén. 3:19). Akwa, ¿“ngätä niken ngwarbe ñakare jire chi” yebiti mika raba nementa ño nire? Nitre gaikröta kä tibienbätä ye ñan aibätä Pablo nämäne blite, ñodre nitre ganinkröta Eliakwe, Eliseokwe aune Jesukwe erere, ñakare aune nitre gaikröta ngrabare üairebiti nünankäre kä kwinbiti medenbätä nämäne blite (1 Cor. 15:42-44).

11, 12. Jesús ganinkröta ngwane, ¿dre namani barebätä aune ye erere dre rabai bare nitre dianinkä nänkäre kä kwinbiti yebätä?

¹¹ Jesús nämäne kä tibienbätä ngwane ngrabare ja ngätäre nämäne kwe. Akwa ganinkröta ngwane namani ni üaire ja nire bianka ye erere aune nikaninta kä kwinbiti. Ye erere arato, nitre dianinkä nänkäre kä kwinbiti gaikröta ni üaire erere. Pablokwe mikani gare: “Dobro dätebare nire abko kwrere ni bäta ja täritäri mtare kä nebtä, ye kwrere Ngöbökwe ni mikadita nire angwane, ni kä käinbti kä Kristo bä ño ngrabare, ye kwrere ni ngrabare bä rabadi arato” (1 Cor. 15:45-49).

¹² Jesús ñaka ganinkröta ni ngrabare kä tibienbätä ererebiti ye nikwe ngwandre törö jai ye ütiäte krubäte. Kukwe kädrie nämäne Pablokwe jatanina krüte ngwane, ñobätä nämäne kukwe ye mike gare ye mikani gare krörö kwe: “Ngöböta gobrane, ye känti ni ngrabare tä niken ngwarbe ye ñan raba nebe nüne jire chi” (1 Cor. 15:50). Nitre apóstol aune nitre mada dianinkä ye ñaka raba niken kä kwinbiti ngrabare ja ngätärebiti aune krokobiti ñobätä ñan aune ye tä niken ngwarbe. Ne madakäre, ¿niaratre gaikröta ñongwane? Nitre gaikröta ye rabai bare ja känenkäre aune ñaka niaratre krütadre ye bätäräbe ye Pablokwe mikani gare metre. Pablokwe 1 Corintios tikani ngwane, nitre ja tötikaka ruäre, ñodre apóstol Santiago ye “krütanina”. Aune apóstol mada mada bätä nitre dianinkä nänkäre kä kwinbiti mada mada ye krütai ja känenkäre (1 Cor. 15:6; Hech. 12:1, 2).

13. ¿Jesús rabaira gobrane ngwane kukwe meden rabai bare?

¹³ Kukwe ütiäte rabai bare ja känenkäre yebätä  Jesús aune Pablo blitabare. Ye abokän Jesús rabaira gobrane yebätä. Kukwe keta kabre käkwe kukwe ütiäte ye bämikai. Ñodre, rü, dobo krikri, bren taretare aune kukwe mada rabai bare käbiti tibien. Profecía ne jatani nemen bare kä 1914 yete ja käne. Akwa yete kukwe ütiäte keteiti tä arato. “Kukwe kwin Gobran Ngöbökwe yebätä ye driedi kä jökräbiti tibien kukwe mikakäre gare nitre juta jökrä te ie”, aune ye bitikäre nitre käme ye gaite niebare Jesukwe (Mat. 24:3, 7-14, TNM). Dänkien rabaira gobrane ngwane, nitre dianinkä nänkäre kä kwinbiti krütanina ye gaikröta nünankäre kä kwinbiti mikani gare Pablokwe (1 Tes. 4:14-16; 1 Cor. 15:23).

14. Kristo niena gobrane näire, ¿nitre dianinkä nänkäre kä kwinbiti tä krüte yebätä dreta nemen bare?

¹⁴ Kä nengwane nitre dianinkä nänkäre kä kwinbiti tä krüte ngwane, bengwairebe gakröta nünankäre kä kwinbiti. ¿Ñokänti gare nie? Kukwe niebare Pablokwe 1 Corintios 15:51, 52 yebätä. Yete nieta: “Nitre tödekaka Jesubti ñan krütadre jökrä angwane niara jatadita, akwa Ngöbökwe ni jökrä kwitadi. Trombeta jükadi ngö rabadi kä mrä mikakäre gare angwane, nitre tödekaka Jesubti jökrä rikwitadi jötrö ngwarbe Ngöbö diebti, nita okwä kwata metete jötrö ngwarbe, ye kwrere”. Kukwe ne tä nemen bare kä nengwane. Niaratre gaikröta ngwane Kristo etebatre nebätä kätä nemen juto täte, täitre käre “Dänkienbe” yebätä (1 Tes. 4:17).

15. ¿Nitre rikwitadi batibe ño okwä kwata metateta jötrö ngwarbe ye kwrere yekwe dre nuaindi kä kwinbiti?

¹⁵ Nitre rikwitadi batibe ño okwä kwata metateta jötrö ngwarbe ye kwrere yekwe dre nuaindi kä kwinbiti mikata gare Bibliakwe. Jesukwe niebare: “Nire nire käkwe ja tare nikadre tödekabtä tibti, käkwe ti rükandrete ñakare abko ni rüe ganainkä kwrere amne nire nire käkwe ti kukwei mikadi täte, ye abko tikwe mikadi gobrane nitre nünanka kä ketareketare temen yebti. Ti Rün käkwe ja di biani gobrankrä kore tie, ye kwrere tikwe ja di biandi ietre gobrankrä. Ti abko tä gobrane  krörö: Angwane niara käkwe gobrandi ja di kribti amne, bäsi dobro sribeta kantrare metata krito ribi jierore bti amne tä ngidiente kiakia jökrä, ye kwrere gobrandi kwe” (Apoc. 2:26, 27). Näintre jankunu niaratre jie ngwanka ye jiebiti aune juta jökrä ye ngübaibiti kwetre “krito ribi jierore” yebiti (Apoc. 19:11-15).

16. ¿Nitre kwati krubäte käkwe gata ye ganaindi ño?

¹⁶ Erametre, nitre dianinkä nänkäre kä kwinbiti käkwe gata ganaindi (1 Cor. 15:54-57). Niaratre gaikröta ye köböire kukwe kämekäme nuainta kä tibienbätä ye diainkä kwetre rü Armagedón yete siba. Nitre kristiano kwati krubäte rabaite nire ja tare nikadi kri ye bitikäre aune näintre kä bä nuäre yete (Apoc. 7:14). Nitre kwati krubäte krütanina mekerabe ye gaikröta, ye ngwane gata ye ganain kwäräbe ye nitre brare aune merire käkwe tuai ja okwä jeñebiti. ¡Kukwe ye käkwe kä mikai juto krubäte nibätä! (Hech. 24:15, TNM). Aune ni jökrä käkwe ja ngwain metre Jehovai ye käkwe gata nükani Adán köböite ye ganaindi aune raba nüne kärekäre.

17. 1 Corintios 15:58 tä niere erere, ¿nikwe dre nuaindre?

¹⁷ Kukwe ütiäte krubäte tikabare Pablokwe nitre Corinto ie nitre krütanina gaikröta yebätä. Yebätä nitre kristiano jökrä tä debe bien krubäte kä nengwane. Kukwe keta kabre tärä nie kukwe niebare Pablokwe ne mikakäre täte, “sribi ni Dänkienkwe” ye munkwe nuain jankunu (ñäkädre 1 Corintios 15:58 yebätä). Nikwe ja ngwain metre aune dre dre ni raba nuainne ye jökrä nikwe nuaindi sribi yebätä ngwane, kä ja känenkäre kwin tä ni kräke. Kukwe ye bäri kwin ni tärä bämike ja töite ye kräke. Ye ngwane, sribi nuainta nikwe ni Dänkienbe ye ñaka nuaindi ngwarbe rabai gare nie.