XTUUTYUM ARTIKEL 50
“Wii wëre ti toote uf keruuft?”
“Toot, woo is tayn kewine? Toot, woo is tayn angel?” (1 CORÍNTIOS 15:55)
LIIT 141 Tas leepe is een wuner
WAS TUUN MER SIIN? *
1-2. Warom sole al ti kriste iwer tas ufxtaye fer im himel se leepe lërne?
TI MEYERSTE layt woo hayt Yeehoowa tiine, hofe fer imer uf te eyert leepe. Awer een kleene krup fon kesalpte kriste hoft uf kextii wëre fer im himel leepe. Tiise kesalpte wole kërn wise wii wërt sayn leepe im himel sin. Awer, warom tii woo ti eyertlich hofnung hon, sole aach too triwer lërne? Wii mer siin tuun, tas himlixe ufxtaye tuut aach seechen pringe fer tii woo ti hofnung hon fer uf te eyert fer imer leepe. Tan, ekaal was unser hofnung is — uf te eyert orer im himel leepe —, mer sole al lërne iwer tas himlixe ufxtaye.
2 Kot hot etliche fon Yeesus sayn eyerste tisipele kelënkt se xraype iwer tas himlixe ufxtaye. Te aphostel Yoohan hot aus keleet: “Yets sin mer Kot sayn khiner, awer es waar noch net ketsaycht was mer sin wëre. Meyer wise tas, wën eyer taytlich ketsaycht wërt, wëre mer soo wii tee.” (1 João 3:2) Tan, ti kesalpte wise net wii wërt sayn leepe im himel sin noo tas se uf kextii wëre; awer tii tuun Yeehoowa siin wën se sayn peloonung kriin. Ti Piipel xprecht net iwer yeete kleenichkheet iwer tas ufxtaye fom toot fer im himel se leepe. Awer te aphostel Phaul hot welche informatsyoone too triwer kep. Ti kesalpte wëre mit Kristus sin wën eyer “yeete rechiirung, autoriteet un macht fernicht” — too tepay is “te letste faynt, te toot”. Am ën, Yeesus un tii woo mit tëm rechiire, tuun sich selepst un ale ti tinge unich Yeehoowa xtele. (1 Cor. 15:24-28) Was fer een wunerlich tsayt wërt tas sin! *
3. Tëm noo 1 Coríntios 15:30-32, wii hot Phaul sayn klaape aan tëm ufxtaye tëm keholef?
3 Phaul sayn klaape aan tëm ufxtaye hot tëm keholef fiile proope aus hale. (Lees 1 Coríntios 15:30-32.) * Tee hot fer ti korinter kesaat: “Yeete taach xteen ich foer te toot.” Un tee hot aach kexrip: “[Ich] hon keeche wilte tiere in Ëfeso kekhëmpft.” Fiilaycht waar tee am xpreche iwer keeche woere tiere in een arena in Ëfeso khëmpfe. (2 Cor. 1:8; 4:10; 11:23) Orer im xtant, waar tee am xpreche iwer ti yuute un anere woo hon sich keeche tëm kextelt — woo soo wii “wilte tiere” waare. (Atos 19:26-34; 1 Cor. 16:9) Een tuun was wolt eyer saan, Phaul hot xrooe kefoere mit kemacht; awer soo wii soo, hot eyer wayter keklaapt tas sayn futuer teet froo sin. (2 Cor. 4:16-18)
Eene familye leept in een lant woo unser aarwayt ferpoot is. Soo wii soo, tuun se wayter Yeehoowa aan peete mit xtark klaape tas Kot hot kuute tinge tsu tëne kepleent. (Kuk te apsats 4.)
4. Wii tuut ti hofnung fom ufxtaye ti kriste hayt ferxtërke? (Kuk tas pilt am aanfang fom piichelche.)
4 Meyer leepe in kefeerliche tsayte. Etliche fon unser priiter hon xon weeche ti kriminaliteet kelit. Anere leepe in pletse woo sin weeche te kriich fernicht — in pletse woo se khene sich net sicher fine. In welche lënter, Yeehoowa sayn tiiner khene net fray preetiche. Noch soo, tuun se tëm tiine opwool khente se in kexpërt orer um keprung wëre. Soo wii soo, tiise priiter tuun wayter Yeehoowa aan peete un sin een xeen payxpiil fer uns. Tii hon khee pang wayl tii wise tas, soo kaar wën se sayn leepe hayt ferliire, Yeehoowa ferxprecht etwas fiil peser tsu tëne in te futuer kepe.
5. Was fer kefeerlich mënung khent unser klaape aan tëm ufxtaye ferxweeche?
5 Phaul hot sayn priiter aan kesaat keeche een kefeerlich mënung woo welche hate: “Wën ti toote net uf keruuft wëre, tan ‘wole mer ese un trinke, wayl moye xtërpe mer’.” Etliche hate xon tiise aanung foer Phaul sayn taache. Im xtant, waar tee am penutse ti wërter fon Isaías 22:13, woo xpreche iwer ti aanxtelung fon te israeliter. Xtats sich tichter pay Yeehoowa xafe, hon se sayn luste kesuucht. In khortse wërter, ti aanxtelung fon te israeliter waar: “Hayt sin mer too, moye wise mer net” — etwas woo fiile tuun hayt tenke. Awer, ti Piipel xprecht iwer ti xlechte resultaate fon tiise aanxtelung. (2 Crô. 36:15-20)
6. Wii sol ti hofnung fom ufxtaye petrefe weer mer wii froynt raus suuche?
6 Meyer wise tas Yeehoowa tuut ti toote uf xtaye, un tas sol petrefe weer mer wii froynt raus suuche. Ti priiter in Korinto praychte uf phase fer net tsayt fertraype mit layt woo hon tas ufxtaye ap kextos. Was is ti lisyoon fer uns? Niks kuutes khan khome wën mer wii froynte raus suuche layt woo ploos noo sayn luste keen, un woo khimere sich net mit was in te futuer pasiirt. Tsu fiil tsayt mit tiise sort layt fertraype khan een krist sayn kuut aanxtelung un kewoonheete fersaue. In woerheet, khan eyer aan fange tinge mache woo Kot hast — sinte. Tes weeche, hot Phaul tiise xtark aanreet kep: “Pringt ayre ferninftichkheet tsurik un macht was kerecht is; tuut net sinte.” (1 Cor. 15:33, 34)
WAS FER SORT KHËRPER KRIIN SE?
7. Tëm noo 1 Coríntios 15:35-38, was fer frooch iwer tas ufxtaye khent fiilaycht yemant mache?
7 Lees 1 Coríntios 15:35-38. * Yemant woo wolt tas ufxtaye im frooch xtele, fiilaycht khent frooe: “Wii wëre ti toote uf keruuft?” Es is kuut fer uns triwer noo tenke aan Phaul sayn antwort, wayl fiile hayt hon sayn aychne mënung iwer was pasiirt noom toot. Awer, was lërnt ti Piipel?
Phaul hot een soome un een plants penutst fer se aus leye tas Kot khan, fer tii woo eyer uf ruuft, een khërper kepe woo tsu tëne tiint (Kuk te apsats 8.)
8. Was fer ferklaychung khan uns helfe tas ufxtaye fer im himel se leepe ferxteen?
8 Wën yemant xtërpt, sayn khërper ferkeet. Awer, Tee woo tas kans Uniwërsum fon kaar niks kemacht hot, khan een persoon uf ruufe un een khërper xenke woo fer ti persoon tiint. (Gên. 1:1; 2:7) Phaul hot een ferklaychung kemacht fer se tsayche tas Kot praucht net te selwiche khërper tsurik pringe. Tee hot iwer een “khërneche”, orer “soome”, kexproch. Een soome woo is im krunt keplantst, tuut sich ëntwikele un een naye plants wëre. Ti naye plants is kans anerste wii te kleene soome. Phaul hot tiise ferklaychung penutst fer se tsayche tas unser Kriatoer khan “een khërper [kepe] tëm noo was Tëm kefalt”.
9. Was tuut 1 Coríntios 15:39-41 saan iwer unerxiitliche sorte khërper?
9 Lees 1 Coríntios 15:39-41. * Phaul hot kemërkt tas Kot hot fiile unerxiitliche khërper kemacht. Tsum payxpiil, ti khërper fon te rints fii, ti feechel un ti fixe sin kans anerste eene fon te anere. Tee hot aach kesaat tas, im himel, siin mer ti unerxiit tswixich ti Sun un te moon. Un tee hot aach kexrip tas “ti hërlichkheet fon yeete xtërn is eensich”. Un tas is woer, soo kaar wën mer net ti unerxiit mit unser aue siin khene. Ti syentiste saan tas es kept unerxiitliche sorte xtërne: welche sin kroos, etliche sin kleener; welche sin root, etliche sin ways un noch anere sin kelp — soo wii ti Sun! Phaul hot aach kesaat tas “es kept himlixe khërper un eyertliche khërper”. Was wolt eyer saan? Uf te eyert sin ti khërper mit flayx kemacht, awer im himel kepts kaystliche khërper, soo wii ti engele sayns.
10. Was fer sort khërper tuun tii woo uf kextii sin fer im himel se leepe kriin?
10 Kuk was Phaul saat neekst: “Soo is tas aach mim ufxtaye fon te toote. Wërt keseet te khërper woo ferkeet, un tuut uf xtaye te khërper woo fer imer halt.” Kewis, noom toot, te mënxliche khërper ferkeet sich un keet retuer tsum xtaap. (Gên. 3:19) Tan, wii khan eene “khërper woo fer imer halt” uf kextii wëre? Phaul waar net am xpreche iwer yemant woo is tsurik tsum leepe keprung fer uf te eyert leepe, soo wii ti mënxe woo Eliias, Eliseu un Yeesus uf keruuft hon. Phaul waar am xpreche iwer een persoon woo mit een himlixe khërper uf kextii is, es wil saan, “een kaystliche khërper”. (1 Cor. 15:42-44)
11-12. Was fer ënerung is mit Yeesus pasiirt wii eyer uf keruuft is, un was eenliches tuut mit te kesalpte pasiire?
11 Wën Yeesus uf te eyert waar, hat eyer eene khërper fon flayx; awer wii eyer uf keruuft waar, is eyer “een kayst kewoer woo leepe kept” un is tsurik tsum himel kang. In te selwich aat, ti kesalpte kriste teete uf keruuft wëre mit een khërper woo khan im himel leepe. Phaul hot aus keleet: “Soo wii mer tas pilt sin fon tëm woo fom xtaap kemacht kep is, wëre mer aach tas pilt sin fon tëm woo himlix is.” (1 Cor. 15:45-49)
12 Es is wichtich sich erinere tas Yeesus is net uf kextii mit een mënxliche khërper. Wën Phaul waar neekst am ën fon sayn ausleyung kewees, hot eyer kesaat warom: “Flayx un pluut khene net Kot sayn Raych [im himel] ërpe.” (1 Cor. 15:50) In te selwich aat, ti aphostele un anere kesalpte teete net uf kextii wëre fer im himel se leepe mit khërper fon flayx un pluut, woo ferkeen. Un wanee teete se uf keruuft wëre? Phaul hot kesaat tas se teete uf keruuft wëre in een tsayt in te futuer, net klaych noo tëne sayn toot. In te tsayt woo Phaul 1 Coríntios kexrip hot, welche tisipele — tsum payxpiil, te aphostel Tyako — hate xon “im toot in kexloof”. (Atos 12:1, 2) Anere aphostele un kesalpte teete, mit te tsayt, aach ‘im toot in xloofe’. (1 Cor. 15:6)
TE TOOT IS ËNTLICH AP KEWUN
13. Was teet torich Yeesus sayn “presëns” pasiire?
13 Yeesus un Phaul hon xon foer heyer kexproch iwer een wichtich tsayt fon tëm mënxliche kexicht — Kristus sayn presëns. Torich tiise tsayt, fiile xlechte tinge teete uf te kans welt pasiire: kriiche, eyertxutere, krankheete un soo wayter. Fon 1914 aan, siin mer tiise piiplix profetsii sich erfiile. Awer noch was wichtiches teet aan tiise tsayt pasiire. Yeesus hot kesaat tas ti kuute notisye fon Kot sayn inkexteltne Raych teete ‘uf te kans pewoont eyert kepreeticht wëre, tsum tsaye fer ale natsyoone; un tan teet tas ën khome’. (Mat. 24:3, 7-14) Phaul hot kesaat tas in ‘te presëns fom Hër’, ti kesalpte woo sin im toot in kexloof teete uf keruuft wëre fer im himel se leepe. (1 Tes. 4:14-16; 1 Cor. 15:23)
14. Was pasiirt mit te kesalpte woo torich Kristus sayn presëns xtërpe?
14 Ti kesalpte kriste woo hayt xtërpe, wëre in te selwich xtun uf keruuft fer im himel se leepe. Phaul pewayst tas mit te wërter fon 1 Coríntios 15:51, 52: “Meyer tuun net al im toot in xloofe, awer meyer tuun al ferënert wëre, in een kleen xtun, xnel wii ti aue plinsle, torich te letste trompeet ruf.” Phaul sayn wërter sin hayt am sich erfiile! Noo tëne sayn ufxtaye, Kristus sayn priiter tuun sich mechtich fraye; tii tuun “imer mit tëm Hër” sin. (1 Tes. 4:17)
Tii woo sin “xnel wii ti aue plinsle” ferënert, tuun mit Yeesus khëmpfe keeche al ti xlechter woo uf te eyert sin (Kuk te apsats 15.)
15. Was fer aarwayt tuun tii, woo sin “xnel wii ti aue plinsle” ferënert, mache?
15 Ti Piipel saat uns was fer aarwayt tuun tii, woo sin “xnel wii ti aue plinsle” ferënert, im himel mache. Yeesus saat tëne: “Fer tee woo kewine tuut un sich aan mayne weeche pis aans ën halt, kepe ich autoriteet iwer ti natsyoone, soo wii ich autoriteet fon tëm Fater kriit hon. Un tee tuut ti layt rechiire mit een ayse xtok, un tii wëre fernicht soo wii leetkruuche woo in xtike kemacht sin.” (Apo. 2:26, 27) Tii tuun sayn Fiirer in tiise aarwayt noo keen — ti natsyoone rechiire mit een ayse xtok. (Apo. 19:11-15)
16. Wii tuun fiile mënxe te toot ap kewine?
16 Sicher, ti kesalpte tuun te toot ap kewine. (1 Cor. 15:54-57) Weeche sayn ufxtaye, khene se mit helfe aan tëm Armaxeton kriich, woo tuut al ti xlechtichkheet uf te welt ap kewine. Milyoone fon anere kristliche mëner un fraae tuun “ti kroos tripulatsyoon” iwerleepe, un in te naye welt rin keen. (Apo. 7:14) Tan, tuun se mit sayn aychne aue siin, too uf te eyert, een aner kewine keeche te toot — tas ufxtaye fon pilyoone layt woo in te ferkangne tsayte kextorep sin. Iwerlee tich ti frayt woo mer xpiire tuun wën tiise wunerlich ewent pasiirt! (Atos 24:15) Un ale tii woo kans troy tsu Yeehoowa plaype, tuun keeche te toot kewine, woo se fon Aatam keërpt hon: tii tuun fer imer leepe!
17. Was tuut 1 Coríntios 15:58 uns yets uf muute se mache?
17 Yeete krist woo hayt am leepe is, sol petanklich sin fer Phaul sayn ufmuutiche wërter iwer tas ufxtaye, woo eyer fer ti korinter kexrip hot. Meyer hon kuute uersache fer Phaul sayn wërter aan heere un unser pestes “im Hër sayn aarwayt” mache. (Lees 1 Coríntios 15:58.) * Wën mer imer fiil se tuun hon in tiise aarwayt, khene mer een wërklich froo leepe in te futuer hofe. Unser leepe wërt fiil peser wii mer uns foer xtele khene! Es lost uns noch sicher tas unser xweyer aarwayt im Hër is net umsonst.
LIIT 140 Ëntlich, eewiches leepe!
^ parágrafo 5 Te tsweete xtik fon 1 Coríntios kapitel 15 xprecht iwer welche kleenichkheete fon tëm ufxtaye, hauptseechlich ti kesalpte kriste sayns. Awer Phaul sayn wërter sin aach wichtich fer tii woo tsu te anere xeef keheere. Tiise artikel tuut tsayche wii ti hofnung fom ufxtaye sol unser leepe hayt petrefe un uns kuute uersache kepe fer ti tsukhunft mit hofnung kuke.
^ parágrafo 2 “Frooche fon te leeser” in tiise piichelche leet Phaul sayn wërter aus, woo in 1 Coríntios 15:29 xteen.
^ parágrafo 3 (1 Coríntios 15:30-32) Warom sin mer aach yeete xtun ins kefoer? 31 Yeete taach xteen ich foer te toot. Priiter, tas is soo sicher wii mayn frayt iwer aych, woo ich in Yeesus Kristus, unser Hër, xpiire. 32 Wën ich, soo wii anere mëner, hon keeche wilte tiere in Ëfeso kekhëmpft, fer was tiint mich tas? Wën ti toote net uf keruuft wëre, tan “wole mer ese un trinke, wayl moye xtërpe mer”.
^ parágrafo 7 (1 Coríntios 15:35-38) Awer, yemant tuut saan: “Wii wëre ti toote uf keruuft? Yaa, mit was fer sort khërper tuun se khome?” 36 Tume persoon! Was tuu seest praucht eyerst xtërpe, eep es lepeentich kemacht wërt. 37 Un was tuu seest is net te khërper woo sich ëntwikele tuut, awer ploos een khërneche — een wayts soome, orer een aner sort soome; 38 awer Kot kept iim een khërper tëm noo was Tëm kefalt; un fer yeete soome kept eyer sayn aychne khërper.
^ parágrafo 9 (1 Coríntios 15:39-41) Net ale ti khërper sin ekaal: ti mënxe hon een sort khërper, ti rints fii anere, ti feechel anere un ti fixe noch anere. 40 Un es kept himlixe khërper un eyertliche khërper, awer ti hërlichkheet fon te himlixe khërper is fon een sort un ti hërlichkheet fon te eyertliche khërper is fon een aner sort. 41 Ti Sun, te moon un ti xtërne hon yeete eene sayn aychne hërlichkheet. In woerheet, ti hërlichkheet fon yeete xtërn is eensich.
^ parágrafo 17 (1 Coríntios 15:58) Tes weeche, mayne liipe priiter, sayt fest, xtram, un hot imer fiil fer im Hër sayn aarwayt se mache, un wist tas ayer xweyer aarwayt im Hër net umsonst is.
