1-2. Ngatta ammuan nakuan na ngamin nga Cristiano i nelangitan nga paginnolay?

MAGARU ta aripan ni Jehova i magiddanama nga mattolay tu mannanayun ta davvun. Magiddanama gapa i karuan nga nazelugan nga Cristiano nga mapaginnolay ira ta langi. Interesadu ira nga ammuan nu kunnasi noka i pattoleda ta langi. Ngem ngatta ammuan nakuan gapa yatun danuri magiddanama nga mattolay ta davvun? Magigiammu tam taw nga artikulo nga mangiyawa tu bendision i nelangitan nga paginnolay maski turi ira ta magiddanama nga mattolay tu mannanayun ta davvun. Interesadu ittam nakuan ta nelangitan nga paginnolay maski nu nelangitan onu neravvunan i iddanama tam.

² Zinog na Dios i karuan ta disipulos ni Jesus ta ollu-siglo nga itura i meyannung ta nelangitan nga paginnolay. Nipakanawag ni apostol Juan: “Ána ngana ittam na Dios, ngem ariat-tam paga nga ammu nu anni noka i pabbalinat-tam. Ngem ammu tam tu . . . mabbalin ittam tu kagitta na.” (1 Juan 3:2) Yayya nga ari nga ammu na nazelugan ira nga Cristiano nu anni noka i pattoleda ta langi sonu mapaginnolay ira. Ngem literal noka nga masingadda si Jehova sonu alawatadda i bala-baloda. Ari nga kagian nittam na Biblia i ngamin nga detalye meyannung ta nelangitan nga paginnolay, ngem egga ira kinagi ni apostol Pablo meyannung tatun. Kavulu noka ni Cristo i nazelugan ira sonu ‘affutanna ngamin  i mammaguray ira, ngamin i egga i pakawayya anna pakapangnguada.’ Fuera paga tatun, ‘patulukanna noka i patay.’ Kabalin natun, pammagurayan ngana noka ni Jehova i ngamin nga addena, nelagum ngana si Jesus, i kakavvuluna nga mammaguray, anna i ngamin nga ganna-gannug. (1 Cor. 15:24-28) Talaga makakkasta noka yatun nga tiempo! *

3. Segun ta 1 Corinto 15:30-32, anni i nakua ni Pablo megafu ta pangurugna ta paginnolay?

³ Naattamman ni Pablo i nadduruma nga kapurueba megafu ta pangurugna ta paginnolay. (Bibbigan i 1 Corinto 15:30-32.) Kinagina ta taga-Corinto ira: “Kaggaggaw nga arubangak-ku i patay!” Kinagina paga: ‘Nakillaban ngà ta neyarig ira nga simaron nga ayam toye ta Efeso.’ Posible nga tukuyan ni Pablo i ayam ira nga kinalabanna ta aggayaman ta Efeso. (2 Cor. 1:8; 4:10; 11:23) Posible gapa nga tukuyanna i Judio anna i karuan nga nangokkontra nisa nga neyarig ta “simaron nga ayam.” (King. 19:26-34; 1 Cor. 16:9) Maski anni tatun ta dua, nepallo i nikaziga-riga ni Pablo. Ngem nangurug lagapa yayya ta makasta nga mappange.​—2 Cor. 4:16-18.

4. Kunnasi nga mapasikan i Cristiano ira ta maddaggun megafu ta paginnolay? (Innan i letratu ta vungun.)

⁴ Mattolay ittam ngana ta delikadu nga tiempo. Karuan ta wawwaragi tam i biktima na krimen. Delikadu gapa i situasion na tanakuan megafu ta maddian ira ta lugar nga egga ira i gerra. Masserbi gapa i tanakuan nu sitaw megamma i trabahu tam nga pallayyagayya. Ngem maski nu mefuku ira onu mappeligro i inangoda, itulu-tuloyda lagapa i masserbi kani Jehova. Makasta nga ehemplo danaw nga wawwaragi tam. Ariadda maganassing maski nu matay ira ta maddaggun, megafu ta ammuda nga mas makasta nga mappange i iyawa ni Jehova.

5. Anni nga peligroso nga appana-panono i mamakkafi ta pangurug tam ta paginnolay?

⁵ Sinabarangngan ni Pablo i wawwaragina meyannung taw nga peligroso nga appana-panono na karuan: “Nu ari gammabba nga maginnolay i natay ira, mapia ngana laman nu ‘Kuman anna uminum ittam ta matay ittam nonumma.’” Kakuruganna, dati ngana nga kurugan yatun na karuan nige paga ta kaggawan ni Pablo. Awayyana nga nibasena yatun ta Isaias 22:13 nu sitaw mabibbig tam i appana-panono na Israelita ira. Imbes nga ayatadda nakuan i Dios, mas ayatadda i pappaga-pagayayya. Kurugan danatun nga Israelita nga mawag tu magenjoy ira ta pattoleda sangawe megafu ta ariadda mabba ammu nu kanni ira nga matay. Aru gapa i mangurug tatun sangawe. Ngem netura ta Biblia i marake ira nga resulta natun nga mali nga appana-panono na nasion na Israel.​—2 Cro. 36:15-20.

6. Kunnasi nakuan nga afektan na pangurug tam ta paginnolay i pappili tam tu kokkofun?

⁶ Ammu tam nga paginnolayan noka ni Jehova i natay. Yatutta afektan nakuan natun i pappili tam tu kokkofun. Mawag tu lillitan na wawwaragi ta Corinto danuri ari nga mangurug ta paginnolay. Egga gapa i magigiammu tam tatun. Marake i efektona nittam nu makikkofun ittam turi ira ta awan tu pakialamda ta mesimmu ta mappange anna pappaga-pagayayya laman i kayàda. Madaral paga i makasta ira nga ugali tam anna baka makakua ittam tu gannug nga ikalussaw na Dios. Yatutta, nitabarang ni Pablo: “Panolian nu lagu i mapia nga appana-panono nu anna immangan nu ngana i mattagaruli.”​—1 Cor. 15:33, 34.

7. Segun ta 1 Corinto 15:35-38, anni i posible nga iyavu na karuan meyannung ta paginnolay?

⁷ Bibbigan i 1 Corinto 15:35-38. Baka egga ngana nangiyavu nittam: “Kunnasi na paginnolay na natay ira?” Megafu tatun, baka madduda ittam ngana ta paginnolay. Ngem makasta nu pannonopattam i tabbag ni Pablo megafu ta nadduruma i kurugan na totolay ta mesimmu kabalin nga matay i tadday. Ngem anni i ituttuddu na Biblia?

8. Anni nga ilustrasion i makoffun nittam tapenu malippawa tam i nelangitan nga paginnolay?

⁸ Nu matay i tolay, mavunno i baggina. Ngem mawayya yayya nga paginnolayan na Namaratu ta uniberso anna iddanna yayya tu baggi nga kawaganna. (Gen. 1:1; 2:7) Nangusa si Pablo tu tadday nga ilustrasion tapenu ipasingan nga ari tu mawag nga itoli na Dios i parehu lagapa nga baggi. Nonopan i tadday nga “vullung” onu vukal na mula. Nu memula ta davvun yatun nga vukal, mamegafu yatun nga mattalovu anna mabbalin tu bagu nga mula. Yatun nga bagu nga mula ay neruma ta baddi nga vukal nga namegafuananna. Inusa ni Pablo yaw nga ilustrasion tapenu ipasingan nga makeyawa i Namaratu tu “ikaya na nga baggi.”

9. Segun ta 1 Corinto 15:39-41, anni i nadduruma nga klase na baggi?

⁹ Bibbigan i 1 Corinto 15:39-41. Kinagi ni Pablo nga nadduruma i klase na pinaratu. Madduma-ruma i pattag na maginango nga pinaratu kagitta na ayam, mammanu, anna manango. Kinagina paga nga masingattam ta langi i nadduman na bilag ta vulan. Tapus niyammunna nga ‘madduma-ruma i kasta na biti-bitun.’ Maski nu ariattam masingan i nadduman danatun, kagian na sientista ira nga nadduruma i klaseda. Egga i red giant, white dwarf, anna yellow star, kagitta na bilag tam. Kinagi gapa ni Pablo nga “egga i nelangitan ira nga baggi anna egga gapa i neravvunan ira nga baggi.” Anni i kayà kagian natun? Taw ta davvun, nepattaggan i baggi tam, ngem  ta langi, espiritu i baggida kagitta na baggi na anghel ira.

10. Anni noka nga klase na baggi i meyawa ta mapaginnolay mappange ta langi?

¹⁰ Kinagi ni Pablo: “Kunnaw noka nu maginnolay i natay ira. Mavunno i baggi nu metanam, ngem ari ngana vuluvuga madaral noka nu maginnolay.” Ammu tam nga nu matay i tadday nga tolay, mavunno i baggina anna mattoli ta gavu. (Gen. 3:19) Anni gafu i kayà kagian ni Pablo ta baggi nga “ari ngana vuluvuga madaral noka nu maginnolay”? Arianna nga tukuyan i tolay nga napaginnolay ta davvun, gittana pinaginnolay da Elias, Eliseo, anna Jesus. Tukuyanna i tolay nga napaginnolay tapus napeggan tu “baggi nga nespirituan” tapenu awayyana nga mattolay ta langi.​—1 Cor. 15:42-44.

11-12. Anni i nabbalinan na baggi ni Jesus turi ta napaginnolay yayya, anna kunnasi nga kunnatun gapa i mesimmu ta nazelugan ira?

¹¹ Ta kegga ni Jesus ta davvun, nepattaggan i baggina. Ngem turi ta napaginnolay yayya, nabbalin yayya tu ‘espiritu nga makeyawa tu inango’ anna nanoli yayya ta langi. Kunnatun gapa i mesimmu ta nazelugan ira nga Cristiano. Mapaginnolay ira anna mapeggan ira tu baggi nga makapattolay ta langi. Nipakanawag ni Pablo: “Nu kunnasi na nikegitta na kasissinnat-tam ta tolay nga naggafu ta davvun, duttal noka i aggaw nga megitta ittam gapa ta kasissinnan na Tolay nga naggafu ta langi.”​—1 Cor. 15:45-49.

¹² Makasta nu daddammattam nga turi ta napaginnolay si Jesus, ari nga nabbalin uli tu nepattaggan i baggina. Nipakanawag yatun ni Pablo ta ultimu nga parte na kinagina meyannung ta paginnolay: “I baggi nga daga anna pattag, ay awan tu kesipattan na ta Pammagurayan na Dios” ta langi. (1 Cor. 15:50) Sonu maginnolay gafu ta langi danuri apostol anna nazelugan ira, ari nga daga anna pattag nga mavunno i baggida. Ngem kanni ira nga mapaginnolay? Kinagi ni Pablo nga ta mappange paga yatun anna ari insigida nga mesimmu kabalin na pateda. Turi ta nitura ni Pablo i  1 Corinto, “natay ngana” i karuan nga disipulos kagitta ni apostol Santiago. (King. 12:1, 2) Tapus tumunug gapa nga ‘matay’ i karuan nga apostol anna nazelugan ira.​—1 Cor. 15:6.

13. Anni i mesimmu ta “kegga” ni Jesus?

¹³ Egga i importante nga mesimmu nga dati ngana nga neprofesiya ni Jesus anna ni Pablo​—i kegga ni Cristo. Tatun nga tiempo, egga i gerra, lunig, taki, anna kinamarake nga mesimmu ta interu mundo. Masingattam nga matuttuppal ngana yaw nga profesiya namegafu paga turi ta 1914. Ngem egga paga i importante nga mesimmu. Kinagi ni Jesus nga melayyagayya i mapia nga dumug na Pappatulan na Dios ‘ta tanga-ravvunan tapenu kannammuan na ngamin nga sinolay.’ Tapus “ta kabalin naw, duttal ngana i panuppalan.” (Mat. 24:3, 7-14) Nakagi gapa ni Pablo nga i “kegga na Yafu” ay i tiempo gapa tapenu mapaginnolay danuri nazelugan nga “natay ngana.”​—1 Tes. 4:14-16, NW; 1 Cor. 15:23.

14. Anni i mesimmu nu matay i tadday nga nazelugan durante ta kegga ni Cristo?

¹⁴ Sangawe, nu egga matay nga nazelugan, insigida yayya nga mapaginnolay mappange ta langi. Pakurugan yatun na kinagi ni Pablo ta 1 Corinto 15:51, 52: “Ari tu sittam ngamin i matay. Ngem ta pangurianan nga kapaguni na trumpeta, moli ittam ngamin ta manganannuan laman nga kagitta na kalistu na pakkuridam na mata.” Matuttuppal ngana sangawe yatun nga kinagi ni Pablo! Sonu mapaginnolay danaw nga wawwaragi ni Cristo, kuruga magayayya ira megafu ta ‘kanayun ngana noka ira ta dian na Yafu.’​—1 Tes. 4:17.

15. Anni noka i kuan danuri na moli ta “kalistu na pakkuridam na mata”?

¹⁵ Ipakannammu na Biblia nittam nu anni i kuan ta langi danuri i moli ta “kalistu na pakkuridam na mata.” Kinagi ni Jesus tannira:  “Danuri i mangaffu ta marakay anna mamarulo ta urè adde ta pangurianan, ay iddak-ku ta pakawayya nga mammaguray ta nasa-nasion, ta kunna pinangiyawa na Yamà niakan, nga kagitta da i nanammi ta baston nga balayang anna bakka-bakkad-da noka ira nga kunna banga.” (Nep. 2:26, 27) Tuttuladda gafu si Jesus gukaban na pangusada ta baston nga balayang tapenu imagurayan i nasa-nasion.​—Nep. 19:11-15.

16. Kunnasi nga affutan noka na aru nga totolay i patay?

¹⁶ Manawag nga affutan noka na nazelugan i patay. (1 Cor. 15:54-57) Sonu mapaginnolay ira, manguffun ira tapenu malsa i kinamarake ta interu mundo sonu umay i gerra na Armagedon. Minillion gapa nga Cristiano nga “nakeyattam ta nepallo nga kadara-darum” i mattolay noka ta napabagu nga mundo. (Nep. 7:14) Masingadda i tanakuan paga nga kaffu na patay​—i paginnolay na binillion nga natay taw ta davvun. Siguradu nga makapagayayya yatun sonu mesimmu! (King. 24:15) Affutan gapa danuri makapattalupaddian nga matalo kani Jehova i patay nga narensiada kani Adan. Megafu tatun, makapattolay ira noka tu mannanayun.

17. Anni i ipagaram na 1 Corinto 15:58 nga kuattam?

¹⁷ Mappappabalo ittam nakuan ta makapagaram ira nga nitura ni Pablo para ta taga-Corinto ira meyannung ta paginnolay. Kuattam gafu i adde na mawayya tam ta ‘trabahu tam nga masserbi ta Yafu’ tapenu matuttul tam i tabarang ni Pablo. (Bibbigan i 1 Corinto 15:58.) Nu kunnatun i kuattam, meddanamattam i kuruga makapagayayya nga mappange. Arayyu nga mas makasta yatun nga pattolay anne ta maski anni nga manono tam. Siguradu nga pakurugan natun nga ari nga kakenga i nabbabbannagattam para ta Yafu.