1-2. Ɔdiya nɛ ɛjɛɛji Ācɛ O Yɛce Ukraist cika ō jé odee lɛyikwu oheyi ŋma ɔlekwu ku ācɛ nōo gáā lā ɔkpanco a?

ƐYINƐHI ku ācɛ nōo yɔ i gba Ujehofa ɛ̄gbā babanya a, lɛ eyiyoce ō lā oyeeyi opiyooo ipu ɛcɛ nyā. Amáŋ, Ācɛ O Yɛce Ukraist ligii nɛ Ujehofa lɛ anɔ tu uwa ɛyi a, lɛ eyiyoce oheyi ŋma ɔlekwu gā ɔkpanco. Ācɛ nōo gáā lā ɔkpanco a yɔ i ceyitikwu kéē jé ɛgɛ nɛ oyeeyi ku uwa géē lɛ ɔkpanco a. Amáŋ ɔdiya nɛ aala ɔhá a cika ō jé odee lɛyikwu ɛgɛ nɛ oyeeyi géē lɛ ɔkpanco a? Ɛgɛ nɛ alɔ gáā nwu a, ācɛ nōo gáā heyi ŋma ɔlekwu gā ɔkpanco a géē bi ɔ̄hā alɛwa wa gē lɛ aala ɔhá nōo gáā lā oyeeyi opiyoo ipu ɛcɛ nyā. Ohigbu ɛnyā, ɔdaŋ ku alɔ lɛ eyiyoce ō lā ipu ɛcɛ amāŋ ɔkpanco, ó cika ō he alɔ ɔtu ō jé odee lɛyikwu oheyi ŋma ɔlekwu ku ācɛ nōo gáā gā ɔkpanco a.

² Ɔwɔico ya ku ayikpo ku Ujisɔsi eko aflɛyi a kóō ta ɔkpá lɛyikwu oheyi ŋma ɔlekwu ku ācɛ nōo gáā cɔcɛ́ mla Ukraist a. Ɔcocɛhɔ Ujɔni kahinii: “Abālɔbányā alɔ wɛ ayí Ɔwɔicō, ɔdā nɛ̄ alɔ í wɛ ɛ̄cɔ̄bū ā í tá péee ɛ́ɛ́ ŋ́, amáŋ alɔ kē jé ka eko nɛ̄ Ohɔ́nyɛtá gā, alɔ géē lɛbɛ̄ɛka anú ā.” (1 Ujɔ́n. 3:2) Ācɛ O Yɛce Ukraist néē lɛ anɔ ta uwa ɛyi a i jé ɛgɛ néē gáā lɛ eko duuma néē kwu uwa i heyi ŋma ɔlekwu nyɔ i lā ɔkpanco ŋ. Amáŋ, é géē má Ujehofa eko néē miyɛ ule ku uwa. Ubáyíbu i da alɔ ɛjɛɛji odee lɛyikwu oheyi ŋma ɔlekwu ku ācɛ nōo gáā nyɔ i lā ɔkpanco a ŋ, amáŋ ɔcocɛhɔ Upɔlu da alɔ ɔdā ōhī lɛyikwu ɔ. Ācɛ O Yɛce Ukraist néē lɛ anɔ ta uwa ɛyi a géē yɔ mla Ukraist eko nɛ ó “géē yá odúúdú ajɔ̄ɔ̄cɛ́, íkwu mɛ́mla ɔfú lé.” Ɛnyā kē lɛ ō ya ‘mla olɛla amoomɛ nōo wɛ ikwū a.’  Amoomɛ, Ujisɔsi mla ācɛ nōo gáā cɔcɛ́ mla anu a géē kpo oduudu odee ba ɛhaajɛ ku Ujehofa. (1 Ukɔ́r. 15:24-28) Ó géē wɛ eko ku eeye nɛhi! *

3. Ɛgɛ nɛ ɔkpá ku 1 Ācɛ Ukɔ́rīnti 15:30-32 ka a, ɔdi nɛ ɔdā nɛ Upɔlu kpɔtuce lɛyikwu oheyi ŋma ɔlekwu a ta ɔ abɔ kóō ya a?

³ Ɔtu okpoce ku Upɔlu lɛyikwu oheyi ŋma ɔlekwu a ta ɔ abɔ kóō lɔtu unwalu ɛyɛɛyɛyi. (Jé 1 Ācɛ Ukɔ́rīnti 15:30-32.) Ó da ayinɛ nōo yɔ Ukɔrinti a kahinii: “N lɛyí cíikwū ɛ̄cī dóódu.” Upɔlu klla kahinii: ‘N nuunu ta ɛbɛ́ ipaci ipu Ɛfesɔsi.’ Á jé ŋ, ó yɔ i kɛla lɛyikwu unu ō nu ta ɛbɛ́ eyī caa ipu igeli ku Ɛfɛsɔsi. (2 Ukɔ́r. 1:8; 4:10; 11:23) Amāŋ ó kē lɔfu yɔ i kɛla lɛyikwu ō ya ŋmo nōo yɔ i wa ŋma ɛgiyi ācɛ Ujiyu mla ācɛ ɔhá nōo lɛbɛɛka “ɛbɛ́ ipaci” a. (Ācot. 19:26-34; 1 Ukɔ́r. 16:9) Ɛgɛ duuma nōó wɛ, Upɔlu má owe nɛɛnɛhi, amáŋ ó gɔbu yɔ i lɔtu ohigbu ka ó jé ka anuɔ géē gweeye ɛcɔbu.—2 Ukɔ́r. 4:16-18.

4. Ɛgɛnyá nɛ eyiyoce ka oheyi ŋma ɔlekwu a lɔfu tu ɔtu okpoce ku Ācɛ O Yɛce Ukraist iyē icɛ a? (Má ifoto nōo yɔ iyɔbu a.)

⁴ Alɔ lā eko nōo bɔbi nɛhi. Ó lɛ ɔdobɔbi ōhī nōo ya ayinɛ alɔ duu ɛ. Ōhī ku uwa lā ɛga néē yɔ i kpo ɛfú néē klla lɛ ogbotu ŋ. Ipu éwo ōhī, ācɛ ō gba Ujehofa ɛ̄gbā yɔ ɛga néē lɛ abɔ ci uklɔ ku alɔ. Amáŋ é gɔbu yɔ i gba ɔ ɛ̄gbā kpɔ naana néē lɔfu kpo uwa tu inu agba, amāŋ ŋmo uwa gla a. Ayinɛ alɔ nyā kē lɛ ɛnɛɛnɛ ocabɔ taajɛ lɛ alɔ. É gē yuufi ŋ, ohigbu ka é jé ka ɔdaŋ kéē kóō gekwu babanya, Ujehofa cokonu ku ɛcɔbu olɔhi lɛ uwa.

5. Ɛlá ō gbo obɔbi nyá lɔfu ya ku ɔtu okpoce ku alɔ lɛyikwu oheyi ŋma ɔlekwu a kóō hii lɔfu gɛ ŋ ma a?

⁵ Upɔlu da ayinɛ nu kéē hi yɛce ɛlá ō gbo obɔbi nōo kahinii: “Ɔ́dāŋ kéē je ācɛ nēe gekwú ā héyī ŋmá ɔlékwū ŋ́, ó lɛ ā ayíka, ‘Ālɔ̄ lé ucɛ, klla gwá ejé ohígbū ka óócí alɔ í kwú!’ ” Ó lɛ ācɛ ōhī nōo lɛ ɛdɔ ɛlá ō gbo nyā gbɔbu lɛ eko ku Upɔlu. Á jé ŋ, ó yɔ i kɛla ŋma ipu ɔkpá ku Ayisáya 22:13, nōo kɛla lɛyikwu uce ō ya ku ācɛ Isrɛlu a. Ikɔkɔ néē géē tubla Ɔwɔico ajaajɛ a, ɔnyɛ ō jé ku abɔyi uwa he uwa ɔtu fiyɛ a. Ku ɛlā ɔkwɛyi a, uce ō ya ku ācɛ Isrɛlu a wɛ ō “lé ucɛ, klla gwá ejé ohígbū ka óócí [é géē] kwú,” uce ō ya nyā kē kpɔ icɛ duu. Amáŋ, Ubáyíbu da alɔ ɔdā obɔbi nōo ya da ācɛ Isrɛlu ohigbu ɛlá ō gbo obɔbi ɔɔma a.—2 Úklɔ́ 36:15-20.

6. Ɛgɛnyá nɛ ɔtu okpoce ku alɔ lɛyikwu oheyi ŋma ɔlekwu a cika ō lɛ abɔ kwu alɔ iyē o jé ɛdɔ ācɛ nɛ alɔ gē fu kéē wɛ ɔkpa ku alɔ a?

⁶ Alɔ jé ku Ujehofa géē je ācɛ nōo kwū a heyi ŋma ɔlekwu, ɛnyā kē cika ō lɛ abɔ kwu alɔ iyē, o jé ɛdɔ ācɛ nɛ alɔ géē fu kéē wɛ ɔkpa ku alɔ a. Ayinɛ nōo yɔ Ukɔrinti a i cika ō wɛ ɔkpa ku ācɛ nōó kpɔtuce ka oheyi ŋma ɔlekwu géē yɔ a ŋ. Ɛlā ō nwu yɔ lɛ alɔ icɛ duu: Ɔdaŋ ku alɔ gē lɛ eko taajɛ gē yɔ mla aɔkpa ku alɔ nōó lɛ ɛlá wu ɛcɔbu a ŋ, nɛ ɔnyɛ ō jé gē he uwa ɔtu foofunu a, é géē lɛ abɔ kwu alɔ ɔwɛ obɔbi. Ɔdaŋ ka Ɔcɛ O Yɛce Ukraist ɔkwɛyi gbɔɔ ō lɛ eko taajɛ gē yɔ mla ɛdɔ ācɛ ɛgɔɔma, ó gáā lɛ uce olɔhi ō ya gɛ ŋ. Ɛdɔ ācɛ ɛgɔɔma kóō lɔfu ya ka ó gbɔɔ ō ya ɔdā nɛ Ujehofa i dɔka a ŋ. Ɛnyā ya ɛɛ nɛ Upɔlu tu ukɔ́ lɔfu lɔfu kahinii: “Eyī kóō gbo aá gɔɔ mɛ́ɛ̄, cɛ́ɛ́ kú aá bīyíne kú Ɔwɔicō gɛ ŋ́.”—1 Ukɔ́r. 15:33, 34.

7. Ɛgɛ nɛ ɔkpá ku 1 Ācɛ Ukɔ́rīnti 15:35-38 mafu lɛ a, ɔka nyá lɛyikwu oheyi ŋma ɔlekwu nɛ ācɛ ōhī lɔfu da a?

⁷ Jé 1 Ācɛ Ukɔ́rīnti 15:35-38. Ɔcɛ nōo dɔka ō ya ku ācɛ ɔhá kéē hii kpɔtuce  oheyi ŋma ɔlekwu a ŋ lɔfu da ɔka kahinii: “Ɛ́gɛ́nyā nēé géē je ɔ̄cɛ héyī ŋmá ɔlékwū lɛ ā?” Ó géē lɔhi ku alɔ gbɛla tu ohi ku Upɔlu, ohigbu ku ācɛ alɛwa icɛ lɛ ɔtu okpoce ɛyɛɛyɛyi ku ɔdā nōo gē ya da ācɛ igbihi néē gekwu a. Amáŋ ɔdi nɛ Ubáyíbu kē nwu a?

8. Aciije nyá gáā ta alɔ abɔ ó jɛyi ku oheyi ŋma ɔlekwu gā ɔkpanco a?

⁸ Eko duuma nɛ ɔcɛ gekwu, ɔkpiye ku nu gē je wa. Amáŋ Ɔcɛ nōo ya ɛjɛɛji odee abɔyinu a lɔfu je ɔcɛ ɔɔma heyi ŋma ɔlekwu klla géē je ɔkpiye nɛ ó cɛgbá a lɛ ɔ. (Ohút. 1:1; 2:7) Upɔlu yuklɔ mla aciije éyi nōo mafu ka Ɔwɔico i gáā bi ɔcɛ ɔɔma cigbihi wa oyeeyi mla ɔkpiye ekponu ɔɔma gɛ ŋ. Gbɛla lɛyikwu “ikpó ocikāpa,” amāŋ ɛdɔ “īkpō” ɔhá. Eko néē lɛ ikpo ku ɔdɛhɔ ɔɔma nyi, ó gē gbɔɔ ō je klla géē je piya ɔdɛhɔ ɛyipɛ. Ɔdɛhɔ ɛyipɛ nōo yɔ i je a, wɛ ɛyɛɛyi gwu ikpo ligii néē nyi a ta. Upɔlu bi ocabɔ nyā le mafu lɛ alɔ ku Ɔwɔico géē je “ɛdɔ kú iyē nōo he [ɔ] ɔtū” a lɛ ɔcɛ duuma.

9. Ɔdi nɛ ɔkpá ku 1 Ācɛ Ukɔ́rīnti 15:39-41 da alɔ lɛyikwu ɛdɔ ku ɔkpiye ɛyɛɛyɛyi a?

⁹ Jé 1 Ācɛ Ukɔ́rīnti 15:39-41. Upɔlu ka ku Ɔwɔico i ya ɛjɛɛji ɔkpiye ɛdɔ ekponu ŋ. Ocabɔ mafu, ɔkpiye ku aɛna, aigbaanɔ mla aɛbeenyi wɛ ɛyɛɛyɛyi. Ó ka ku eko duuma nɛ alɔ leyi má ico, alɔ gē má ɛyɛɛyɛyi nōo yɔ ɔtahɛ ku ɛnɔ mla ɔya a. Ó klla kahinii: “Ɛgahi ɛdɔ ɛyɛ́ɛyɛ́yí kōō yɔ̄ ipú aínyílɔ́wɔ ā dúú.” Ɛnyā wɛ ɔkwɛyi, naana nɛ alɔ i gē má ɛyɛɛyɛyi a mla eyī ku alɔ ŋ ma. Ācɛ Usayɛnsi da alɔ ka inyilɔwɔ lɛ ɛdɔ ɛyɛɛyɛyi, ōhī wɛ ɛnɛhi, ōhī wɛ ɛnɛ̄ŋcɛ́, ōhī wɛ ɔnɔwa, ōhī wɛ ɛnɛhɛ, ōhī ku uwa klla wɛ uyellow bɛɛka ɛnɔ ku alɔ a. Upɔlu klla ka “iyē kú ɔkpáncō yɔ̄, iyē kú ɛcɛ yɔ̄” duu. Ɔdi wɛ ɛyi ɛlā ku nu a? Ipu ɛcɛ amanya, alɔ lɛ ɔkpiye ɔlamu, amáŋ ɔkpiye ku alelekwu yɔ ɔkpanco a, bɛɛka ɛ̄nɛ̄ alelekwu otɛhɔ lɛ a.

10. Ɛdɔ ɔkpiye nyá nɛ ācɛ nōo gáā nyɔ i lā ɔkpanco a gáā lɛ a?

¹⁰ Má ɔdā nɛ Upɔlu klla ka kpɔ a. Ó  kahinii: “Ɛ́gɛ́nyā nōó gáā lɛ eko nēé lɛ ācɛ nēe gewkú ā héȳi ŋmá olékwū á. Eko nēé nyi iyē ɔ́ɔmā, ó wɛ iyē nōo gekwú. Eko nēé kwú ɔ̄ ú héyī ŋmá ɔlékwū, ó gáā kwú glá gɛ ŋ́.” Alɔ jé ka igbihi nɛ ɔcɛ gekwu, ɔkpiye ku nu gē je wa cɛɛ ó kwu piya ajɛ anca. (Ohút. 3:19) Ɛgɛnyá nōó gáā tɔɔtɛ ku ɔkpiye néē gáā heyi ŋma ɔlekwu kóō hii “kwú glá gɛ ŋ́” ma a? Upɔlu i yɔ i kɛla lɛyikwu ācɛ nɛ Ɛliyija, Ɛlayissa, mla Ujisɔsi heyi wa ipu ɛcɛ nyā ŋ. Upɔlu yɔ i kɛla lɛyikwu ɔcɛ néē heyi ŋma ɔlekwu kóō nyɔ i lā ɔkpanco, ɔɔma kē wɛ “iyē kú alelékwu.”—1 Ukɔ́r. 15:42-44.

11-12. Opiyabɔ nyá nɛ Ujisɔsi má eko nɛ ó heyi ŋma ɔlekwu a, ɔwɛ ɛgɛnyá nɛ Ācɛ O Yɛce Ukraist néē lɛ anɔ tu uwa ɛyi a kē má ɛdɔ opiyabɔ ekponu ɔɔma a?

¹¹ Eko nɛ Ujisɔsi lā ipu ɛcɛ nyā a, ó lɛ ɔkpiye ɔlamu. Amáŋ eko néē je ɔ heyi ŋma ɔlekwu a, ó kwu piya “alelékwū nōo í je oyēeyī,” klla kwu cigbihi gā ɔkpanco. Ɔwɛ ekpo ɔɔma duu, Ācɛ O Yɛce Ukraist néē lɛ anɔ tu uwa ɛyi a géē heyi ŋma ɔlekwu mla iyē ō nyɔ i lā ɔkpanco. Upɔlu kahinii: “Ɛ́gɛ́nɛ̄ nɛ̄ alɔ lɛbɛ̄ɛka ɔ̄cɛ nēé bī ajɛ le yá ɔ̄ ā, ɛ́gɔ́ɔmā nɛ̄ alɔ géē lɛbɛ̄ɛka ɔ̄cɛ nōo ŋmá ɔkpáncō ɛ̄cī éyi á.”—1 Ukɔ́r. 15:45-49.

¹² Upɔlu yɔ i bi ɛlā nɛ ó yɔ i ka lɛyikwu oheyi ŋma ɔlekwu a wa oŋmɛyi ɛ. Ó wɛ ɔdā ō cɛgbá ō jé ku Ujisɔsi i heyi ŋma ɔlekwu mla ɔkpiye ɔlamu ŋ. Eko nɛ Upɔlu yɔ i bi ɛlā nɛ ó yɔ i ka a wa oŋmɛyi a, ó ka ɔdā nōo ya a. Ó kahinii: “Ɔdā nōo lɛ ɔkpíye mla oyī í gáā lɛ ukpɛ̄ kú ajɔ̄ɔ̄cɛ́ kú Ɔwɔico [nōo yɔ ɔkpanco a] glá ŋ́.” (1 Ukɔ́r. 15:50) É gáā je acotɛhɔ mla Ācɛ O Yɛce Ukraist néē lɛ anɔ tu uwa ɛyi a heyi ŋma ɔlekwu kéē nyɔ i lā ɔkpanco mla oyi mla ɔkpiye nōo gē wa ŋ. Eko nyá néē gáā je uwa heyi ŋma ɔlekwu a? Upɔlu ka kéē géē je uwa heyi ŋma ɔlekwu ɛcɔbu, ó wɛ oboobu néē kwū a ŋ. Ɛpleeko nɛ Upɔlu ta ɔkpá aflɛyi ku Ukɔrinti a, ayikpo ōhī bɛɛka Ujemisi a “le pɛ́ gekwú ɛɛ́.” (Ācot. 12:1, 2) Ōhī ku acotɛhɔ mla Ācɛ O Yɛce Ukraist néē lɛ  anɔ tu uwa ɛyi a géē ‘pɛ kwū’ igbihaajɛ.—1 Ukɔ́r. 15:6.

13. Ɔdi gáā ya ɛpleeko nɛ Ujisɔsi gáā wa a?

¹³ Ujisɔsi mla Upɔlu ka akacɛ lɛyikwu eko o cɛgbá éyi nōo i wa, eko ɔɔma a kē wɛ eko nɛ Ukraist gáā wa a. Ɛpleeko nɛ Ukraist gáā wa a, ɛfú ō kpo, ajɛ ō jiliye klla hɛ wulu, ōcē ɛyɛɛyɛyi mla aɔdobɔbi ɔhá géē yɔ i ya ipu oduudu ɛcɛ. Alɔ kē má ku akacɛ ku Ubáyíbu nyā yɔ i ya jila ŋmifi ihayi ku 1914. Ó klla lɛ aya o cɛgbá ɔhá nōo mafu ō wa ku Ujisɔsi. Ujisɔsi kéē géē tɔɔna ɔkoolɔhi ka Ajɔɔcɛ ku Ɔwɔico yɔ i lé ɔcɛ́ babanya “gā odúúdú kú ɛcɛ kóō wɛ ijáalí lɛ éwo dóódu. Cɛɛ eko nɛ̄ ɛcɛ í mɛ ā le yá.” (Umát. 24:3, 7-14) Upɔlu ka ku eko “nɛ̄ Óndú ā géē wā ā,” géē wɛ eko néē géē je Ācɛ O Yɛce Ukraist néē lɛ anɔ tu uwa ɛyi nōo “le pɛ́ gekwú ɛɛ́” ma heyi ŋma ɔlekwu gā ɔkpanco.—1 Utes. 4:14-16; 1 Ukɔ́r. 15:23.

14. Ɔdi gáā ya da ācɛ néē lɛ anɔ tu uwa ɛyi nōo kwū ɛpleeko ō wa ku Ukraist a?

¹⁴ É géē je ācɛ néē lɛ anɔ ta uwa ɛyi nōo kwū babanya a heyi ŋma ɔlekwu boobu gā oyeeyi ɔkpanco. Alɔ jé ɛnyā ŋma ɛlā nɛ Upɔlu ta nōo yɔ ipu ɔkpá ku 1 Ācɛ Ukɔ́rīnti 15:51, 52 nōo kahinii: “Ó wɛ ɛjɛ̄ɛ̄jī alɔ gáā kwú ā ŋ́, amáŋ ɛjɛ̄ɛ̄jī alɔ géē je pīyabɔ̄. Ó í yá fíyaa bɛɛka eyī ōcēbeé ā eko nēe le opo amōōmɛ ā tá.” Aɛlā ku Upɔlu nyā yɔ i ya jila babanya! Eko duu néē lɛ uwa heyi ŋma ɔlekwu, ayinɛ ku Ujisɔsi nyā géē lɛ eeye nɛhi; é géē “bá pī Óndú ā eko dóódu piyóó.”—1 Utes. 4:17.

15. Uklɔ nyá yɔ i gbeyi ācɛ néē gáā je piyabɔ “bɛɛka eyī ōcēbeé ā”?

¹⁵ Ubáyíbu da alɔ uklɔ nɛ ācɛ néē gáā le piyabɔ “bɛɛka eyī ōcēbeé ā” gáā ya ɔkpanco  a. Ujisɔsi da uwa kahinii: “Ɔ̄cɛ nōo le ɔfú kú ebilíi yálé nōo klla gē yá ɔdā nɛ̄ n da ɔ́ kóō yá ā gajaajɛ, n géē je ɛdɔ kú íkwu nɛ̄ Ádā um je ga um ā lɛ ɔ́ lɛyíkwu aéwo ā. Ó géē bī ogblo kú oje le gbō uwā, klla í ca uwá ɛ́gɛ́nɛ̄ ɛtɛ́ gē ca putuu ā.” (Mafú 2:26, 27) É géē yɛce Ujisɔsi nōo wɛ otrɛyi ku uwa a, klla géē gbo aéwo a mla ogblo ku oje.—Mafú 19:11-15.

16. Ɛgɛnyá nɛ alɛwa ku ācɛ gáā ya ikwū lé a?

¹⁶ Ó teyi peee, ku ācɛ néē lɛ anɔ tu uwa ɛyi a géē ya ikwū lé. (1 Ukɔ́r. 15:54-57) Oheyi ŋma ɔlekwu ku uwa géē jɛga lɛ uwa kéē tabɔ lɛ ɔdobɔbi duudu fu ŋma ipu ɛcɛ nyā, ɛpleeko ku ɛfú ku Amagɛdɔn nōo i wa a. Umiliyɔn ku ācɛ ɔhá nōo wɛ Ācɛ O Yɛce Ukraist a géē “wi ŋmá eko kú ákanya nɛ̄hi ā á” gā ipu ɛcɛ ɛyipɛ a. (Mafú 7:14) Ācɛ nōo wi nōo yɔ ipu ɛcɛ nyā a, géē má ɛdɔ oyale ikpɛyi ku ikwū ɔhá, eko néē lɛ ubiliyɔn ku ācɛ nōo kwū eko igble a heyi ŋma ɔlekwu. Gbɛla lɛyikwu ɛdɔ eeye nɛ alɔ gáā gwo, eko nɛ aɔdā ohidaago nyā le ya a! (Ācot. 24:15) Ɛjɛɛji ācɛ nōo kē hayi kpaakpa lɛ Ujehofa a, géē yale ikpɛyi ku ikwū néē lugwu ku nu ŋma ɛgiyi Adam a. É géē lɛ ɛnɛɛnɛ ɛga ō lā oyeeyi opiyoo.

17. Ɔdi nɛ ɔkpá ku 1 Ācɛ Ukɔ́rīnti 15:58 ta alɔ ɔtu kwu ɔtu ō ya babanya a?

¹⁷ Ɛlā ō ta ɔtu kwu ɔtu nɛ Upɔlu ta gē lɛ ācɛ Ukɔrinti lɛyikwu oheyi ŋma ɔlekwu a, cika ō je ɛjɛɛji Ācɛ O Yɛce Ukraist nōo yeeyi babanya eyī nɛhi. Ó lɛ ɔdā ō cɛgbá nōo ya nɛ alɔ cika ō lɛyi taajɛ lɛ ukɔ́ ku Upɔlu, ó ya ɔdā duuma nɛ alɔ ya gla ‘ipú úklɔ́ nɛ̄ alɔ gē yá lɛ Óndú ā.’ (Jé 1 Ācɛ Ukɔ́rīnti 15:58.) Ɔdaŋ ku alɔ gē ya ɛjɛɛji ɔfu ku alɔ ipu uklɔ ɔɔma, alɔ géē lɛ eyiyoce ku ɛcɔbu nɛ eeye géē yɔ caba caba a. Oyeeyi eko ɔɔma géē lɔɔnyɛ fiyɛ ɔdā duuma nɛ alɔ lɔfu gbɛla a. Ó géē mafu lɛ alɔ ka uklɔ nɛ alɔ i ya lɛ Ɔwɔico a i bonu ŋ.