1-2. Ịyẹ tị́ du ká angịnyị nya ịKịrayịsị wuu ka jẹ́ ang u-uhye nya owuleji bwula igu rụ ka epwoohe?

IRU nya angịlẹ kị wẹẹ gbịgba ha iJihova lẹẹlẹẹ la ẹhị ọrịrịị-rịrị nyọka hịhị gboyi myị́ oyi ám̀ odehe. Ma, angịnyị nya ịKịrayịsị ịmányị-mányị ịlẹ ká iJihova ya ida wụ́, la ẹhị ọrịrịị-rịrị nyọka wuleji bwula igu ka epwoohe. Angịlẹ ká Ohe ya ida wụ́ wẹ kaa tịtọ nyọka jẹ́ jaabwọ ká ọhịhị nyaa ka la e-epwoohe. Ma, ịyẹ à tị́ du ká angịlẹ kị la ẹhị ọrịrịị-rịrị nyọka hịhị ám̀ odehe ka tịtọ nyọka jẹ́ ang u-uhye nyọọwa? Jaabwọ kahị wẹẹ ka yẹ, owuleji bwula igu ka epwoohe ka kpa ahị ọwawa lụmẹ-lụmẹ wa angịlẹ kị la ẹhị ọrịrịị-rịrị nyọka hịhị gboyi myị́ oyi ám̀ odehe. Lẹ, kori kahị la ẹhị ọrịrịị-rịrị nyọka hịhị e-epwoohe lee ám̀ odehe, ọ baba kahị ka jẹ́ ang u-uhye nya owuleji bwula igu rụ ka epwoohe.

² Ohe kpa angịjụgbẹyị nya iJisọsị ịla oyi ọhọhẹ ịhyẹ ụgbẹyị nyọka da ẹla u-uhye nya owuleji bwula igu rụ ka epwoohe. Ọlẹrụ ịJọn ya nyori: “Ahị ri anyị nya Ohe Oluhye ịnyịlẹhị lẹ. Ma, jaabwọ kahị ka la lụka ọọwa kpangga lẹ, ị chọọ ehe mẹjẹẹhị lẹka. Ang ọlẹ kahị jẹ́ ri yẹkẹẹ jaabwọ ká ịKịrayịsị ayịdang la kpangga, ahị tịtị ka la ịnyịnyị lụka ọlẹ ká ịKịrayịsị ka mwọọgịlẹ warị lẹlẹ.” (1 Jọn. 3:2) Lẹ, angịnyị nya ịKịrayịsị ịlẹ ká Ohe ya ida wụ́, á jẹ́ abwọlẹ kị ka la ụka kị ka wulaa eji la ugbinyịrọ nya olegu rụ ka epwoohe kpá lẹka. Ma, ị ka jẹ́-ẹ yẹ iJihova lẹhị nyịlaa ụka kị ka ye uri nyaa. ỊBayịbụụ á ya ẹla myị́ ẹla u-uhye nya owuleji bwula igu rụ ka epwoohe ka, ma ọlẹrụ ịPọlụ ya ẹla ọhẹ u-uhye nyamwụ. Angịnyị nya ịKịrayịsị ịlẹ ká Ohe ya ida wụ́ ka juwa ta ịKịrayịsị ụka ọlẹ kọ ka “ta ọngịrị nya igomenti ọnyị myị́ ọnyị wuu bala ịngịrị myị́ ịngịrị ịkịla ilodehe ọlẹ wuu ayịreji.” “Igu ọlẹ kọ . . . ri oluji ohyẹẹkpẹ-ẹkpẹ” ka tayịreji ịnyịnyị. Ohyẹẹkpẹ-ẹkpẹ lẹ, iJisọsị bala angịlẹ kị ka kpeji balọọ à ka kpịlaa bala ang ịkịla wuu kaka ji ekpeleji nya iJihova  lẹlẹ. (1 Kọr. 15:24-28) Ụka ọwẹ ka kpịpyọ lụmẹ! *

3. Jaabwọ ká ụpwụ nya 1 Ala ịKọrịntị 15:30-32 ya, ịyẹ ọmyịmyị ọlẹ ká ịPọlụ la u-uhye nya owuleji bwula igu à tị́ dọọ ụbwọ nyọka họ?

³ Ọmyịmyị ọlẹ ká ịPọlụ la u-uhye nya owuleji bwula igu dọọ ụbwọ nyọka bọhụ ẹ-ẹpwụ nya akama ịdatị-datị. (Wa 1 Ala ịKọrịntị 15:30-32.) O byi ala ịKọrịntị yẹkẹẹ: “M̀ kaa juwa ẹ-ẹpwụ ọnụ nya igu ogbugbu ẹnụ myị́ ẹnụ.” ỊPọlụ myịmyị da ụpwụ nyori, am “ayịdang dọmwụ ma uya ta iyo ịlẹpwamẹ . . . ụ-ụwa e-epweji nya Efesọsị lẹ.” Ọhẹka, ịPọlụ wẹẹ ya ẹla u-uhye nya uya ọ-mama ta iyo ịlam-ịlam ụ-ụwa i-ikpọdọda ọhẹ Efesọsị. (2 Kọr. 1:8; 4:10; 11:23) Lee, ọ ka ri ọtụpyịpyị o-bwu ẹga nya ala iJuu bala angịkịla ịlẹ kị lala “iyo ịlẹpwamẹ” kọ wẹẹ ya ẹla rụ́ myị́. (Ụkụr. 19:26-34; 1 Kọr. 16:9) Ọnyị myị́ ọnyị ko ri, ịPọlụ yẹ akama ịtụka-ịtụka ẹ-ẹhị. Ma, ọ tị la irya ọnyịịla u-uhye nya ijuju.​—2 Kọr. 4:16-18.

4. Ányị ẹhị ọrịrịị-rịrị nya owuleji bwula igu à tị́ da angịnyị nya ịKịrayịsị ụbwọ alẹ? (Yẹ ifoto ọla ẹbẹ nya ọgbanyẹ.)

⁴ Ahị jam hịhị ụ-ụka ọlẹ kọ luhihi. Alagbụrụ kaa họ aanahị ịhyẹ ẹla. Aanahị ịkịla tị juwa ẹ-ẹga ọlẹ ká ẹwụ ọdada ji, du kị kaa kụ́ la uko. Ẹ-ẹpwụma ịhyẹ, angịnyị nya iJihova á la iwe nyọka kpa ẹrụ ọnyịịla pyẹ gbadaa ka, ma ị tị kaa gbịgba ha iJihova nanana nyori ị ka waa ju agba lee ọ dọmwụ nwaa chajị nyọọwa myị́. Aanahị ịwẹ wuu kaa kịnyaa ẹ-ẹpwụ nya ịgba ọgbagaba nya iJihova du kị ri ọgụ-ẹpẹtẹ ọnyịịla hahị. Ị́ kaa juhi ka, chajị ị jẹ́ nyori ọhịhị nyaa á dọmwụ gwaa gụ́ myị́ lẹẹlẹẹ wẹwẹ, iJihova myị ọnụ nyọka ya ang ọlẹ kọ há gụ́ ọọwa yẹẹyẹẹ haa ị-ịlahị.

5. Irya ọtịpyọ oyina à tị́ ka du ká ọmyịmyị ọlẹ kahị la u-uhye nya owuleji bwula igu ka la dẹwụ-dẹwụ?

⁵ ỊPọlụ byi aanamwụ nyị hwabwọ hi irya ọtịpyọ ọlẹ ká angịhyẹ la nyori: “Ó ri ká owuleji bwula igu ọhẹ á jị kaka ịnyịlẹhị lẹ, ịnọ, ahị tị tị . . . ‘ri ang oriri bala ọ-nwa ang ọnwanwa wu ẹpwụ alẹ mẹ. Chajị, ahị juwa ka gbu myị́ ijuju.’” Angịhyẹ la irya ọlịịwẹ ene nya ahyẹẹnụ nya ịPọlụ. Ọhẹka, ọ wẹẹ gba ẹla ọwẹ kpehe bwu ụpwụ nya Ayịsaya 22:13, ko ya ẹla rụ́ abwẹla nya ala Isirẹlụ. Ọkọkọ nyọka tụ́ ju Ohe Oluhye chwẹẹ, ị ku ọhịhị nya ụya ọyaya. Abwẹla ọlẹ ká ala Isirẹlụ la ri, “alẹ ahị jẹ́ lẹ, ijuju ahị ka gbu myị́,” ko ri abwẹla ọlẹ ká angịnyị lụmẹ-lụmẹ la alẹ ịnyịnyị. Ma, ịBayịbụụ tị da ẹla ọtịpyọ ọlẹ kọ họ ta ala Isirẹlụ chajị nya irya ọ-la kpakpa-ka nyaa ju.​—2 Ego. 36:15-20.

6. Ányị ọmyịmyị ọlẹ kahị la u-uhye nya owuleji bwula igu à tị́ ka gu abwọlẹ kahị kaa chụ aligu nyahị?

⁶ Ahị jẹ́ nyori iJihova ka wule angịlẹ kị gbu eji, lẹ ọọwa ka gụ abwọlẹ kahị kaa chụ angịlẹ kị ka ri aligu nyahị. Aanahị ịla ịKọrịntị baba nyọka chị ebwo hi angịlẹ kị myị́ nyori owuleji bwula igu nyị́ ji ka. Ahị ka jẹ́-ẹ jẹ́ ang bwu ẹga nyaa alẹ: Kori kahị kaa bịrị ụka lụmẹ-lụmẹ bala aligu ịlẹ ká ẹla nya ijuju á ri ẹla nyaa ka bala ọ-kaa kụ́ irya u-uhye nya ụya ọyaya kem, abwẹla nyaa ka chị wuhi ịnyịnyị myị́. Kori ká ọngịnyị nya ịKịrayịsị á bịrị ụka lụmẹ bala ọngọlịnyị, irya ọnyịịla bala abwẹla nyamwụ ka yẹda myị́. Angịịwa ka dọmwụ dudu kọ ka họ ang ịlẹ kị wụ́ iJihova ẹjẹ myị́. Lẹ, ịPọlụ ya ẹla lọngịrị-ọngịrị nyori: “Anụ cheri kanụ nwụ irya nyanụ rịrị kpakpakpa, kanụ juwa cheji ba ọhọbịrị ọhọhọ mẹ.”​—1 Kọr. 15:33, 34.

7. Jaabwọ ká ụpwụ nya 1 Ala ịKọrịntị 15:35-38 mẹjẹ, ịtọ ẹla oyina angịhyẹ à tị́ ka tọ myị́ u-uhye nya owuleji bwula igu?

⁷ Wa 1 Ala ịKọrịntị 15:35-38. Ọngịnyị ọlẹ kọ tịtọ ká angịkịla ka la ịwẹ ọdada u-uhye nya owuleji bwula igu ka towo myị́ nyori: “Ányị, ị tị́ ka jẹ́-ẹ wule ọngọ gbugbu eji bwula igu myị́ wẹẹ?” Ọ há kahị ka kụ irya u-uhye nya ọwẹwẹ  nya ịPọlụ, chajị angịnyị lụmẹ-lụmẹ la ọmyịmyị nyịlaa u-uhye nya ang ọlẹ kọ kaa họ ta angịnyị ụka kị gbu kpá. Ma, ẹlịyẹ ịBayịbụụ à tị́ mẹjẹ?

8. Ọ-chụ pwokwita oyina à tị́ ka dahị ụbwọ nyọka jẹ́ ang u-uhye nya owuleji bwula igu ka hịhị e-epwoohe?

⁸ Ụka ká ọngịnyị-ị́ gbu, ịnyịrọ nyamwụ kaa mama. Ma, ọngọlẹ kọ họ uhye-ọgba bala odehe wuu lẹpwụ-lẹpwụ la ọ-kpa ịngịngịhyẹ ka, ka jẹ́-ẹ wule ọngọọwa eji bala ọ-ka ya ugbinyịrọ ọlẹ kọ baba họọ. (Ọmwụ. 1:1; 2:7) ỊPọlụ chụ ẹla ọhẹ pwokwita, ọlẹ kọ mẹjẹ nyori Ohe-é baba nyọka gba ugbinyịrọ ọwọwa kpehe ka. Kụ irya nya ang lala “ajẹ nya ịrayịsị” lee “ajẹ” nya ang ọkịla wẹẹ. Ẹjẹ nya ang ọlẹ kị ya tọ kaa bwu kaka ri onyeewe. Onyeewe ọọwa tị kaa datị pyịnyẹng hi ẹjẹ ochiche ọlẹ kị ya tọ. ỊPọlụ ya ẹla u-uhye nya ọ-chụ pwokwita ọwẹ nyọka mẹjẹ nyori ọngọlẹ kọ họhị ka jẹ́-ẹ “hu ẹchẹ nya ugbinyịrọ ọlẹ kọ họ́ọ” ha ọngịnyị.

9. Ẹlịyẹ ụpwụ nya 1 Ala ịKọrịntị 15:39-41, à tị́ ya u-uhye nya ugbinyịrọ ịdatị-datị?

⁹ Wa 1 Ala ịKọrịntị 15:39-41. ỊPọlụ ya nyori Ohe nyị́ họ ang myị́ ang wuu la ugbinyịrọ ookpokpo ka. Ọ-chụ pwokwita, ugbinyịrọ ụma ịdatị-datị ji, lala ịnya iyo, ịchịnụ bala ịnya iyenyi. O ya nyori, ahị kaa yẹ ọdatị ẹ-ẹga nya ẹnu bala ọya u-uhye ọgba. Ọ tị myịmyị ya nyori, “ụma nya ụhị ọháha nya ọdọchụ ọnyọnyọọnyị datị hi ẹchẹ nya ụhị nya ọdọchụ ọkịla ọọnamwụ.” Ẹla ọwẹ ri ịnyịlẹhị, kori kahị dọmwụ jẹ́ yẹ ọdatị la ugbẹhị ọkpụkpụrụ nyahị ka wẹwẹ. Angị chị ang ehe ya jehi nyori ịdịchụ ụma ịdatị-datị nyị juwa. Ịhyẹ ri ịtụka, ịkịla ri ichiche, ịhyẹ la ịmịla, ịkịla la owuru, ịkịla tị la ịmịla lala ẹnụ. ỊPọlụ myị́myị́ ya nyori ‘ẹchẹ nya ugbinyịrọ ọlẹ ká angịlẹ kị ji epwoohe la lẹ, ọ datị hi ẹchẹ nya ugbinyịrọ ịlẹ ká angịlẹ kị jam odehe ọlẹ la ịnyịnyị.’ Etu nya ẹlẹwẹ tị ri ányị? Ám̀ odehe, ahị la ugbinyịrọ ọlam, ma ụ-ụwa e-epwoohe, ugbinyịrọ nya olegu a juwa lẹ, ko ri ụma nyọlẹ ká alegu-ẹrụ la.

10. Ụma nya ugbinyịrọ oyina angịlẹ kị ka wuleji bwula igu ka epwoohe à tị́ ka la?

¹⁰ Jẹ́ nyori ịPọlụ myị́myị́ yẹkẹẹ: “Ịnyịnyị-ịnyịnyị ọ la ẹ-ẹga nya owuleji bwula igu nya  angị gbugbu lẹlẹ. Ị kaa hu ụma nya ugbinyịrọ ọmama nya ọngịnyị ehe kpa kaka ju eji. Ma, ugbinyịrọ ọlẹ ká ọngịnyị ehe ka la lụka nya owuleji bwula igu nyamwụ lẹ, ugbinyịrọ ọọwa á ka jẹ́-ẹ mama kpá myị́ ẹnẹnẹhẹ kaka.” Ahị jẹ́ nyori ụka ká ọngịnyị-ị́ gbu, ugbinyịrọ nyamwụ kaa mama yẹ la ọpyị tịrẹkpẹ. (Ọmwụ. 3:19) Lẹ, ányị ị tị ka jẹ́-ẹ wule ugbinyịrọ ọlẹ kọ ka “jẹ-ẹ mama kpá myị́ ẹnẹnẹhẹ kaka” eji? A-angịlẹ kị wuleji bwula igu wẹ odehe ọlẹ lala angịlẹ ká Ịlayịja, Ịlayịcha bala iJisọsị wuleji, ịPọlụ à wẹẹ ya ẹla rụ́ ka. ỊPọlụ wẹẹ ya ẹla rụ́ angịlẹ kị ka wuleji la ugbinyịrọ ọlẹ kị ka jẹ́-ẹ hịhị e-epwoohe, ko ri ugbinyịrọ nya olegu.​—1 Kọr. 15:42-44.

11-12. Ányị iJisọsị à tị́ yẹda ụka ọlẹ kọ wuleji bwula igu? Ányị angịlẹ ká Ohe ya ida wụ́ à tị́ kaa yẹda ụ-ụgbẹyị ọlịnyị-ịnyị?

¹¹ Ụka ká iJisọsị jam odehe ọlẹ, ọ la ugbinyịrọ ọlam. Ma, ụka kọ wuleji bwula igu, ọ wẹ ka “ri olegu ọlẹ kọ kaa hu ọhịhị ha,” lẹ ọ rụ tịrẹkpẹ ka epwoohe lẹlẹ. Ịnyịnyị, angịnyị nya ịKịrayịsị ịlẹ ká Ohe ya ida wụ́ ka wuleji bwula igu la ugbinyịrọ ọlẹ kị ka jẹ́-ẹ hịhị e-epwoohe. ỊPọlụ da ẹla ọọwa wụlẹ yẹkẹẹ: “Jaabwọ kaahị angịnyị ehe wuu ju abwụma nya ugbinyịrọ nya ọpyị ọlẹ ta Adam nya ọgbanyẹ lẹ, ịnyịnyị-ịnyịnyị, ahị ka ju abwụma nya ugbinyịrọ nya epwoohe ta ịKịrayịsị . . . Lẹlẹ.”​—1 Kọr. 15:45-49.

¹² Ahị baba nyọka kpịtịya nyori iJisọsị á wuleji bwula igu la ugbinyịrọ nya ọngịnyị ehe ka. Ụka ọlẹ ká ịPọlụ wẹẹ kpa ẹla oyaya nyamwụ u-uhye nya owuleji bwula igu wẹ ocheju, ọ wụlẹ ang odudu kọ lịnyị ụka ọlẹ ko yẹkẹẹ: “Ugbinyịrọ bala ịwọ nya ọngịnyị ehe olodehe ọlẹ, á ka jẹ́-ẹ ri ugu nya ịpyị Adịrahụ nya Ohe Oluhye myị́ kaka.” (1 Kọr. 15:50) Alẹrụ bala angịkịla ịlẹ ká Ohe ya ida wụ́, á ka wuleji ka epwoohe la ugbinyịrọ bala ịwọ nya ọngịnyị ehe ọlẹ kọ jẹ́-ẹ mama ka. Ụka oyina ị tị́ ka wulaa eji bwula igu? ỊPọlụ ya nyịlẹhị-lẹhị nyori owuleji bwula igu ọwẹ nyị juwa ị-ịlahị, ẹ-ẹla ọlẹ kọ ka họ i-ijata ụka kị gbu bwaa ka. Ụka ọlẹ ká ịPọlụ da ụpwụ nya 1 Ala ịKọrịntị, angịjụgbẹyị ịhyẹ “gbu ene-ene lẹ.” Ọ-chụ pwokwita ri ọlẹrụ iJemsi. (Ụkụr. 12:1, 2) Alẹrụ ịkịla bala angịkịla ịlẹ ká  Ohe ya ida wụ́ ka “gbu” ị-ịlahị nyọọwa wẹẹ.​—1 Kọr. 15:6.

13. Ịyẹ à tị́ ka họ ụka nya ijata ojiji nya iJisọsị?

¹³ IJisọsị bala ịPọlụ yẹ ọmwụ u-uhye nya ụka ọdatị-datị ọlẹ kọ juwa ị-ịlahị. Ụka ọọwa ri ijata ojiji nya ịKịrayịsị. Lụka nya ijata ojiji ọwẹ, ẹwụ ọdada, ọpyị ọ-hụ́ jigi-jigi, ẹdụrụ nya ịdọlọ-dọlọ, bala ang ịtịpyọ ịkịla ka họ chị odehe ọnụ wuu. Ahị yẹ ká ọmwụ ọyẹyẹ ọlẹpwụ nya ịBayịbụụ ọwẹ wẹẹ họ jịra bwu ẹka nya 1914. Ụpa ọkpọnchị ọkịla nya ang ẹjẹẹ ịwẹ tị ka ji ịnyịnyị. IJisọsị ya nyori nyị ka kpa oja ọnyịịla nyori Ịpyị-Adịrahụ nya Ohe Oluhye nyị juwa kpeji lẹ, pyẹ “ẹ-ẹga myị́ ẹga nya odehe ọlẹ wuu. Chajị kọ ka ri ang nya ibeenu ha alepwoja myị́ epwoja wuu ene ká ọmyịmyị nya odehe ọlẹ ka pwụ eji.” (Mat. 24:3, 7-14) ỊPọlụ họ kahị jẹ́ nyori “lụka ọlẹ ká Ọngọlahị la ka mwẹẹkpẹ warị” [“ijata ojiji nya Ọngọlahị,” NW ] ka ri ụka nya owuleji bwula igu ha angịnyị nya ịKịrayịsị ịlẹ ká Ohe ya ida wụ́ ịlẹ “kị gbugbu ene nya ụka ọọwa.”​—1 Tẹs. 4:14-16; 1 Kọr. 15:23.

14. Ịyẹ à tịị họ ta angịnyị nya ịKịrayịsị ịlẹ ká Ohe ya ida wụ́ kị tị gbu lụka nya ijata ojiji nya ịKịrayịsị?

¹⁴ Angịnyị nya ịKịrayịsị ịlẹ ká Ohe ya ida wụ́ kị tị gbu lẹẹlẹẹ kaa wuleji bwula igu i-ijata rụ ka hịhị e-epwoohe. Ẹla ọlẹ ká ịPọlụ ya ụ-ụpwụ nya 1 Ala ịKọrịntị 15:51, 52 myị ọnụ ju ẹla ọwẹ. Ụwa yẹkẹẹ: “Ahị angịnyị nya Ohe Oluhye ịlẹ wuu kahị jam la ọhịhị á ka gbu wuu ene nya ụka ọọwa ka. Ma, ị ka nyẹẹhị ugbinyịrọ ọlẹ deeji, ahyaahị-ahyaahị lala ụka nya ẹhị ọ-mwụ biri lụka ọlẹ ká opyike ohyẹẹkpẹ nya Ọngọlahị ka chị.” Ẹla ọlẹ ká ịPọlụ ya wẹ, wẹẹ họ jịra lẹẹlẹẹ! Ụka kị wuleji bwula igu, aanịna nya ịKịrayịsị ịwẹ ka ye ọkẹkẹnị ọtụka; ị ka “hụwa ta Ọngọlahị pyịyọọ.”​—1 Tẹs. 4:17.

15. Ụkụrwọ oyina à tị́ juwa godayị gbe angịlẹ kị ka nyẹ-nyẹ la “ụka nya ẹhị ọ-mwụ biri”?

¹⁵ ỊBayịbụụ ya ang ọlẹ ká angịlẹ kị ka nyẹ-nyẹ  la “ụka nya ẹhị ọ-mwụ biri” ka họ e-epwoohe jehi. IJisọsị byaa yẹkẹẹ: “Ọng myị́ ọng ọlẹ kọ la ọkụrụ-kụrụ bwu ẹpwụ nya uya ọmama chajị nya ọmyịmyị ọlala nyamwụ bala ọ-ka juwa kpa ụkụrwọ ọnyịịla ọhọhọ nyamwụ ụ-ụwa gbee pwụ ọbaba lẹ aalẹ, ọngọọwa, m tịtị ka hu kọ ka ri olegbeju o-juwa kpẹhị rịrị alepwoja la datị-datị lụka ohyẹẹkpẹ lẹlẹ. Ọọwa lẹ, ọngọọwa a ka juwa kpa ọgọdọ nya oje-oje gbe alepwoja ịịwa, ka juwa haa elego jaabwọ kị kaa kpa ang be ọta nya ọpyị ene yịgẹ-yịgẹ, jaabwọ kaam ayịdang tịtị ye ọngịrị ọlịnyị bwu ẹga nya Ohe Oluhye Adam lẹẹ lẹlẹ.” (Ọwụr. 2:26, 27) Ị ka ba iJisọsị jẹ bala ọ-kpẹhị rịrị ẹpwụma la ọgọdọ nya oje-oje.​—Ọwụr. 19:11-15.

16. Ányị iru nya angịnyị ehe à tị́ ka bwu la ọkụrụ-kụrụ u-uhye nya igu?

¹⁶ Ọ la gbagbịla nyori, angịlẹ ká Ohe ya ida wụ́ ka la ọkụrụ-kụrụ u-uhye nya igu. (1 Kọr. 15:54-57) Owuleji bwula igu nyaa ka ya iwe haa nyọka dụbwọ ta ang onyobyi ọnyị myị́ ọnyị ayịreji lụka nya ẹwụ nya Amagẹdọn ọlẹ kọ wẹẹ warị. Ụka ọọwa, uku-uku nya angịnyị nya ịKịrayịsị alẹng bala anyang ka “ri angị bebe bwu ẹpwụ nya akama ọtụka-ọtụka” ọọwa ju ka ẹpwụ nya odehe onyeewe. (Ọwụr. 7:14) Angịlẹ kị be wẹẹ ám̀ odehe ọlẹ ka kpẹhị nyịlaa yẹ ọkụrụ-kụrụ ọkịla u-uhye nya igu ụka ká uku-ụnọ nya angịnyị ịlẹ kị gbu ka wuleji bwula igu. Kụ irya jaabwọ kahị ka chị ọkẹkẹnị kaka ba ụka ká ang ịnyịịla-ịnyịịla ịwẹ ka họ wẹẹ! (Ụkụr. 24:15) Angịlẹ wuu kị ji oye nya iJihova kpẹẹkpẹẹ ka la ọkụrụ-kụrụ u-uhye nya igu ọlẹ kahị ri ugu nyamwụ bwu ẹga nya Adam ịnyịnyị. Ị ka jẹ́-ẹ hịhị gboyi myị́ oyi.

17. Ẹlịyẹ ụpwụ nya 1 Ala ịKọrịntị 15:58, à tị́ juhi ọhụ kahị ka họ lẹẹlẹẹ?

¹⁷ Omyi ẹla nya ẹjẹ ọkpụ́kpụ́ ọlẹ ká ịPọlụ ya u-uhye nya owuleji bwula igu, kọ da du kịla ala ịKọrịntị ka myị̀ ọngịnyị nya ịKịrayịsị ọnyị myị́ ọnyị ọlẹ kọ jam la ọhịhị lẹẹlẹẹ lẹhị. Ahị la ang odudu ọlẹ kahị ka ju ihi nya ẹla ọlẹ ká ịPọlụ ya nyori ahị nyị họ jaabwọ kaahị nyị ka họ ba myị́ ẹ-ẹpwụ nya “ụkụrwọ nya Ọngọlahị.” (Wa 1 Ala ịKọrịntị 15:58.) Kori  kahị kaa họ jaabwọ kahị ka jụ́ họ ba myị́ ụka myị́ ụka ẹ-ẹpwụ nya ụkụrwọ ọwẹ, ahị ka jẹ́-ẹ yẹhị rịrị gbe ọhịhị nya ọkẹkẹnị ị-ịlahị. Ụka ọọwa ka kpịpyọ gụ́ ịngịngịhyẹ ọlẹ kahị ka yahị guru gbe. Ọ ka mẹjẹ́ẹhị nyori ụkụrwọ nya Ọngọlahị ọlẹ kahị wẹẹ họ, á ri ang ododu kpong-kpong ka.