1-2. Sumsing lamu hkrung rawt ai lam hpe Hkristan yawng hpa majaw myit lawm ging ai kun?

YEHOWA hpe nawku daw jau ai masha law malawng gaw, ginding aga hta htani htana asak hkrung na matu myit mada ai. Raitim, ngam nga ai namman chya hkam ai Hkristan ni gaw, sumsing lamu de hkrung rawt na matu myit mada ai. Shanhte gaw htawm hpang hte seng ai asak aprat hpe grai chye mayu ma ai. Ginding aga myit mada lam nga ai ni gaw gara hku kun? Sumsing lamu hkrung rawt ai lam gaw, ginding aga hta htani htana asak hkrung na matu myit mada ai ni hpe mung shaman chyeju lu shangun na hpe anhte chye wa na re. Sumsing lamu hta (sh) ginding aga hta, gara myit mada lam nga ai raitim, sumsing lamu hkrung rawt ai lam hpe myit lawm ging ai.

² Sumsing lamu myit mada lam hte seng ai lam hpe ka na matu tsa ban langai na Yesu a sape nkau mi hpe Karai Kasang shatsam ya wa ai. “Karai Kasang a kashu kasha ni, anhte ya e rai nga ga ai rai nna, anhte hpa mi tai na, garai n dan pru nga ai: . . . shi dan pru nga yang, anhte shi hte bung na ga ai, anhte chye ga ai” ngu kasa Yawhan tsun ai. (1 Yh 3:2) Dai majaw, namman chya hkam ai ni gaw, wenyi hkum hte sumsing lamu de hkrung rawt ai shaloi, gara hku byin na hpe shanhte n chye ai. Sumsing shaman chyeju lu la ai shaloi, Yehowa hpe teng sha mu lu na re. Sumsing lamu de hkrung rawt ai lam hpe Chyum Laika hta ahkri ahkrai n tsun da ai.  Kasa Pawlu gaw dai hte seng ai lam nkau mi hpe tsun dan ai. ‘Du aya yawng mayawng, up ai ahkang, hpung dagu yawng mayawng’ hte “hpang chyahtum na hpyen wa ngu ai, si hkrung si htan” hpe Hkristu shamyit kau ai aten hta namman chya hkam ai ni gaw Hkristu hte arau nga nga na re. Yesu hte shi hte rau uphkang na ni gaw, tinang nan mung, yawng mayawng hpe mung Yehowa hpang de bai ap ya na re. (1 Ko 15:24-28) Grai ngwi pyaw ai aten rai na re. *

3. 1 Korinhtu 15:30-32 hku nga yang hkrung rawt ai hpe kam ai gaw Pawlu hpe gara hku karum ya ai kun?

³ Hkrung rawt ai hte seng ai Pawlu a makam masham gaw manghkang amyu myu hpe hkam jan lu hkra karum ya ai. (1 Korinhtu 15:30-32 hpe hti u.) “Shani shagu si” hkrung si htan hte shi hkrum nga ai ngu Korinhtu masha ni hpe tsun ai. “Ngai gaw Ehpesu mare hta . . . matse labye hte gasat” nga ai ngu nna mung tsun ai. Ehpesu mare na shingjawng shara hta dusat ni hte gasat wa ai lam hpe tsun mayu ai rai na re. (2 Ko 1:8; 4:10; 11:23) Shi hpe ninghkap ai Yuda masha ni hte kaga ni gaw “matse labye” hte bung ai ngu nna mung tsun mayu ai rai na re. (Kas 19:26-34; 1 Ko 16:9) Shi gaw laja lana re ai manghkang ni hkrum ai. Raitim, htawm hpang hte seng ai kaja ai ningmu gaw matut nga ding yang re.​—2 Ko 4:16-18.

4. Hkrung rawt ai myit mada lam gaw ya aten na Hkristan ni hpe gara hku n-gun lu shangun ai kun? (Makawp sumla hpe yu u.)

⁴ Anhte gaw shoihpa nga ai aten hta asak hkrung nga ai. Hpunau nauna nkau gaw tara tawt lai ai lam ni hkrum nga ai. Nkau mi gaw majan byin ai shara hta nga nga ai majaw, shimlum ai lam n nga ai. Nkau gaw, wanglu wanglang n lu hkaw tsun ai shara ni hta nga nga ai. Hkaw tsun yang, htawng jahkrak hkrum na, asak shoihpa hkrum na masa nga tim, Yehowa hpe matut nna nawku nga ai. Anhte a matu kaja ai kasi ningli re. Ya aten hta si mat tim, htawm hpang hta grau kaja ai asak aprat lu na ngu Yehowa ga sadi jaw da ai hpe chye ai majaw shanhte n hkrit ai.

5. Gara myit jasat gaw hkrung rawt ai hte seng ai makam masham hpe gawng kya shangun ai kun?

⁵ ‘Si mat ai ni bai n hkrung rawt wa na rai yang gaw, anhte sha ga, lu ga, hpawt ni si na ga ai’ ngu ai shoihpa nga ai ningmu hpe koi na matu hpunau ni hpe Pawlu sadi jaw ai. Shi a prat garai n du shi ai aten kaw nna pyi, dai zawn ningmu nga wa ai. Israela ni a myit jasat hpe tsun da ai Esaia 22:13 hpe shi lakap da ai. Karai Kasang hte nihtep hkra nga na malai, pyaw daw lam hpe sha grau myit lawm nga ai. “Galoi si na n chye ai majaw, dai ni pyaw pyaw nga ga” ngu ai Israela ni a myit jasat gaw ya aten na masha law law hta mung nga nga ai. Raitim, shanhte hta dai zawn myit jasat nga ai majaw, n kaja ai akyu sha lu la ai lam Chyum Laika hta tsun da ai.​—2 Hl 36:15-20.

6. Hkrung rawt ai myit mada lam nga ai ni gaw manang lata ai shaloi gara hku lata ging ai kun?

⁶ Yehowa gaw si mat ai masha ni hpe bai jahkrung ya lu ai hpe kam ai ni gaw manang lata ai shaloi, atsawm sha lata ging ai. Korinhtu na hpunau nauna ni gaw, hkrung rawt ai lam hpe n kam ai ni hte n kanawn ging ai. Htawm hpang hte seng nna ahpa atang sawn la ai ni hte ayan kanawn ai gaw, n kaja ai akyu sha lu la na hpe sharin la lu ai. Shanhte gaw jet ai Hkristan ni a myit jasat hte kaja ai akyang ni hpe pyi jahten kau ya lu ai. Karai Kasang n ra ai yubak mara ni hpe galaw na matu shadut chye ai. Dai majaw, “ding man ai hku hkan na, dum hprang mu, yubak hkum galaw myit” nga nna Pawlu sadi jaw da ai.​—1 Ko 15:33, 34.

7. 1 Korinhtu 15:35-38 hta mu lu ai hte maren masha nkau mi hta hkrung rawt ai hte seng ai gara ga san ni nga ai kun?

⁷ 1 Korinhtu 15:35-38 hpe hti u. Hkrung rawt ai lam hpe ntsen ai myit nga shangun mayu ai marai langai gaw ndai hku san chye ai: ‘Si mat ai ni gaw kaning rai bai rawt lu na kun?’ Ya aten na masha law law hta si mat ai hpang hpa byin na hte seng nna ningmu amyu myu nga ai majaw, Pawlu a mahtai hpe myit ai gaw kaja ai. Raitim, Chyum Laika gaw hpa sharin ya ai kun?

8. Sumsing lamu de hkrung rawt ai lam hpe chye na na matu gara ga shadawn gaw karum ya ai kun?

⁸ Marai langai si mat ai shaloi, shi a hkum hkrang gaw yat mat ai. Ninggawn tawa hpe hpa n nga ai kaw nna hpan lu ai Wa gaw, dai wa hpe bai jahkrung ya lu nna, htap htuk ai hkum hkrang bai jaw lu ai. (Nin 1:1; 2:7) Mi na hkum hkrang dingsa hte maren n re ai lam ga shadawn langai hte Pawlu tsun dan ai. Nli tum a lam hpe yu yu ga. Dai nli tum hpe hkai dat yang, tu kaba wa nna hpun nnan byin wa ai. Dai hpun nnan gaw nli tum hte grai shai mat sai. Hpan Madu gaw jaw mayu ai hkum hpe jaw lu ai lam dai ga shadawn hpe lang nna Pawlu sanglang dan ai.

9. Hkum amyu myu nga ai hpe 1 Korinhtu 15:39-41 hta hpa tsun da ai kun?

⁹ 1 Korinhtu 15:39-41 hpe hti u. Hpan da ai hkum amyu myu nga ai lam Pawlu tsun ai. Ga shadawn, ginding aga hta dumsu, u, nga ni zawn re ai hkum amyu myu nga ai. Sumsing lamu hta mung jan hte shata a shai ai lam, “shagan langai ngai shagan gale hta hpung shingkang shai” ai lam hpe mung tsun ai. Anhte a myi hte n mu lu tim, shagan ni gaw kaji, kaba, ahkyeng, ahpraw, nkau mi gaw jan zawn htoi ai ngu nna hpungtang hpaji du ni tsun ai. ‘Sumsing lamu na hkum ni hte ginding aga na hkum ni’ nga ai ngu nna mung Pawlu tsun ai. Gara hku nna kun? Ginding aga hta hkum shan nga ai. Sumsing lamu hta gaw lamu kasa ni zawn wenyi hkum nga ai.

10. Sumsing lamu de hkrung rawt mat na ni gaw kaning re ai hkum hkrang hte kun?

 ¹⁰ “Si mat ai ni a bai hkrung rawt wa na lam mung, dai hte maren rai nga ai. Dai hkum hkrang gaw ga hta lup makoi ai shaloi, hten mat yat mat chye nga ai; bai hkrung rawt ai shaloi n hten n mat chye ai rai na ra ai” ngu Pawlu matut tsun ai. Masha langai si mat yang, shi a hkum hkrang gaw yat mat nna, ga yun bai tai mat ai. (Nin 3:19) Rai yang, “bai hkrung rawt ai shaloi” hkum hkrang gaw n hten n mat chye ai ngu hpa majaw tsun ai kun? Elia, Elisha hte Yesu jahkrung ya wa ai ni a lam hpe Pawlu tsun nga ai n re. “Wenyi hkum” hte sumsing lamu de hkrung rawt mat ai ni a lam hpe tsun nga ai re.​—1 Ko 15:42-44, JCLB.

11-12. Yesu hkrung rawt ai shaloi gara galai shai ai lam byin wa ai kun? Namman chya hkam ai ni mung gara hku byin na kun?

¹¹ Ginding aga hta Yesu asak hkrung ai shaloi hkum shan hte re. Hkrung rawt ai shaloi, “asak jahkrung ya ai wenyi” byin mat nna, sumsing lamu de lung mat wa ai. Dai hte maren, namman chya hkam ai ni mung wenyi hkum hte hkrung rawt na re. “Ga yun hte galaw ai masha wa hte bung ai gawng shingyan hpe anhte gun ga ai hte maren, sumsing lamu na du sa ai masha wa hte bung ai gawng shingyan mung anhte gun na ra ga ai” ngu Pawlu sanglang dan ai.​—1 Ko 15:45-49, JCLB.

¹² Hkrung rawt ai hte seng ai Pawlu a bawngban ai lam gaw ahkyak dik ai daw hta du nga sai. Yesu gaw shinggyim hkum hkrang hte n hkrung rawt ai hpe chye na matu ahkyak ai. “Hkum shan yan asai gaw sumsing lamu na Karai Kasang a mungdan a sali wunli n dagraw lu ai” ngu Pawlu tsun da ai. (1 Ko 15:50) Kasa ni hte kaga namman chya hkam ai ni gaw, hten mat chye ai hkum hkrang hte sumsing lamu de hkrung rawt na n re. Shanhte gara aten hta hkrung rawt na kun? Si ai hte kalang ta hkrung rawt na n re ai sha, aten langai ngai hta hkrung rawt na hpe ahkyak shatai tsun nga ai re. 1 Korinhtu laika hpe Pawlu ka ai aten hta kasa Yaku hte  hpawn, sape nkau mi gaw si mat sai. (Kas 12:1, 2) Kaga kasa ni hte namman chya hkam ai ni gaw asak naw hkrung ai. Hpang hta si mat wa ai.​—1 Ko 15:6.

13. Yesu bai du sa ai aten hta hpa ni byin na kun?

¹³ Yesu hte Pawlu gaw labau hta grai ahkyak ai Hkristu bai du ai aten ladaw hpe tsun nga ai re. Dai aten hta majan ni, nnang nawn ai ni, ana zingli ni hte kaga n kaja ai lam ni gaw mungkan ting hta byin nga na re. Ndai Chyum Laika myihtoi ga gaw, 1914 kaw nna hpring tsup wa sai. Dai sha n-ga, kaga ahkyak ai lam mung byin wa na re. Karai A Mungdan shiga hpe “masha amyu baw shagu a matu mara sakse tai lu u ga, mungkan ting hta e hkaw dan lu na rai nga ai; dai hpang e dai jahtum ai gaw du na ra ai” ngu Yesu tsun ai. (Mat 24:3, 7-14) “Madu bai du sa ai shaloi” yup pyaw mat ai namman chya hkam ai ni hkrung rawt mat na ngu Pawlu tsun ai.​—1 Ht 4:14-16; 1 Ko 15:23.

14. Si mat ai namman chya hkam ai ni gaw Hkristu bai du sa ai aten laman hpa byin mat na kun?

¹⁴ Ya aten hta si mat ai namman chya hkam ai ni gaw, sumsing lamu de kalang ta hkrung rawt na re. Dai lam hpe 1 Korinhtu 15:51, 52 hta lawm ai Pawlu a ga ni gaw shagrin ya ai. “Anhte yawng yup pyaw mat na n rai; . . . hpang chyahtum na pahtau ngoi wu ai shaloi e, akajawng sha, myi grip mi hta e, anhte yawng hte gaw lai mat na ra ga ai.” Pawlu a dai ga ni gaw ya hpring tsup nga sai. Hkristu a hpunau ni hkrung rawt ai shaloi, tsep kawp kabu gara lam lu la nna, “Madu hte rau tut nawng e a nga nga” na re.​—1 Ht 4:17.

15. “Myi grip mi hta e” galai shai mat ai ni gaw hpa bungli ni galaw ra na kun?

¹⁵ “Myi grip mi hta e” galai shai mat ai ni sumsing lamu hta galaw na bungli hte seng nna Chyum Laika hta tsun da ai. “Dang lu ai wa hte, prat htum hkra nye a arawn alai hkan nang ai wa hpe, masha mungdan ni a ntsa  e up ai ahkang ngai jaw na we ai: shi gaw shanhte hpe hpri sumdoi hte up nna, di bu sama a di bu ni hpe zawn a grawp kau ai, shanhte hkrum na ma ra ai: ning re ai ahkang nye Wa kaw na ngai lu la ai” ngu Yesu tsun ai. (Shr 2:26, 27) Namman chya hkam ai ni gaw, Yesu hte arau masha mungdan ni a ntsa hpri sumdoi hte uphkang na re.​—Shr 19:11-15.

16. Masha law law gaw si hkrung si htan hpe gara hku awng dang lu na kun?

¹⁶ Namman chya hkam ai ni gaw si hkrung si htan hpe tsep kawp awng dang na re. (1 Ko 15:54-57) Shanhte hkrung rawt ai shaloi, Hara Magedon majan laman, ginding aga na n kaja ai lam yawng hpe jahten kau ai hta lawm lu na re. Wan hku law ai Hkristan ni gaw, “ru tsang kaba kata na hkrang pru wa nna” mungkan nnan de asak hkrung let shang lu na re. (Shr 7:14) Shanhte gaw, si mat wa ai wan hkying hku law ai masha ni bai hkrung rawt wa ai shaloi, si hkrung si htan hpe awng dang ai hpe myi hte chyaw mu lu na re. Kade daram pyaw na hpe shingran yu u. (Kas 24:15) Yehowa hpe sadi dung ai lam madun wa ai ni gaw, Adam kaw na lu la ai si hkrung si htan hpe awng dang lu nna, htani htana asak hkrung lu na re.

17. 1 Korinhtu 15:58 gaw ya hpa galaw na matu n-gun jaw ai kun?

¹⁷ Hkrung rawt ai lam hte seng nna Korinhtu ni hpe Pawlu ka wa ai laika a matu Hkristan yawng chyeju dum ging ai. “Madu a bungli” hpe ya aten hta dang lu ai daram galaw na matu tsun da ai Pawlu a hpaji jaw ga hpe hkan sa ging ai. (1 Korinhtu 15:58 hpe hti u.) Dai bungli hpe sadi dung let, myit rawt let galaw na nga yang, ngwi pyaw ai htawm hpang prat lu na re. Dai aten gaw anhte myit mada lu ai hta grau kaja ai aten rai na re. Madu a bungli gun hpai ai gaw kaman lila n byin ai hpe chye lu na re.