1-2. Ɛbɛ yɔɔ pɩpɔzʋʋ se Krɩstʋ ñɩma tɩŋa ɩsɔɔlɩ se patɩlɩ mba pakaɣ fezuu se pakpa ɛsɔdaa yɔ pɔ-yɔɔ tɔm?

SƆNƆ, Yehowa sɛyaa sakɩyɛ wɛnɩ lidaʋ se pakaɣ caɣʋ wezuu tɛtʋ yɔɔ tam. Ɛlɛ, Yehowa ta num Krɩstʋ ñɩma nabɛyɛ pazɩ nɛ pɛwɛnɩ lidaʋ se pakaɣ-wɛ fezuu nɛ pacaɣ wezuu ɛsɔdaa. Patam numwaa mba, pɔsɔɔlaa se patɩlɩ ɛzɩma pe-wezuu caɣʋ kaɣ wɛʋ ɛsɔdaa yɔ. Ɛlɛ mba pɛwɛnɩ lidaʋ se pakaɣ caɣʋ wezuu tɛtʋ yɔɔ yɔ, ɛbɛ yɔɔ pɩwɛɛ se pɔsɔɔlɩ ɖɔɖɔ se patɩlɩ mba pakaɣ fezuu se pakpa ɛsɔdaa yɔ pɔ-yɔɔ tɔm? Ɛzɩ ɖɩkɔŋʋʋ naʋ yɔ, mba pakaɣ fezuu se pakpa ɛsɔdaa yɔ, pe-femtu kaɣ yebu nɛ mba pɛwɛnɩ lidaʋ se pakaɣ caɣʋ tɛtʋ yɔɔ tam yɔ, pehiɣ wazasɩ ɖɔɖɔ. Pʋyɔɔ lɛ, paa ɖɩwɛnɩ lidaʋ se ɖɩcakɩ wezuu tam ɛsɔdaa yaa tɛtʋ yɔɔ yɔ, pɩwɛɛ se ɖɩsɔɔlɩ se ɖɩtɩlɩ mba pakaɣ fezuu se pakpa ɛsɔdaa yɔ, pɔ-yɔɔ tɔm.

² Ɛsɔ tɩŋnɩ e-fezuu kiɖeɖeu yɔɔ nɛ ɛsɩnɩ kajalaɣ pɩnzɩ mɩnʋʋ taa Yesu tɔmkpɛlɩkɩyaa nabɛyɛ nɛ pama ɛsɔdaa kpaʋ lidaʋ yɔɔ tɔm. Apostoloo Yohanɛɛsɩ mawa se: “Lɛɛlɛɛyɔ ɖɩkɛ Ɛsɔ piya, ɛlɛ patɩtɩɩlɩzɩta nɛ pawɩlɩ-ɖʋ mbʋ ɖɩkaɣ kɛʋ yɔ. Ðɩnawa se alɩwaatʋ ndʋ palɩzɩɣ-ɩ nɛ pawɩlɩ yɔ, ɖɩkaɣ wɛʋ ɛzɩ ɛnʋ yɔ.” (1 Yoh. 3:2) Ye mbʋ, Krɩstʋ ñɩma patam numwaa ɩɩsɩŋ ɛzɩma pakaɣ wɛʋ alɩwaatʋ ndʋ pefeziɣ-wɛ nɛ pakpa ɛsɔdaa nɛ pɛwɛɛnɩ fezuu taa tomnasɩ yɔ. Ɛlɛ pakaɣ naʋ Yehowa alɩwaatʋ ndʋ pamʋʋ pa-kɩhɛyʋʋ yɔ. Bibl tɩyɔɔdɩ mba pefeziɣ se pakpa ɛsɔdaa yɔ pɔ-yɔɔ tɔm tɩŋa, ɛlɛ apostoloo Pɔɔlɩ yɔɔdɩ pɔ-yɔɔ tɔm natʋyʋ. Patam numwaa nɛ Krɩstʋ pakaɣnɩ wɛʋ alɩwaatʋ ndʋ “[ɛɖɩzɩɣ] kominawaa tɩŋa nɛ ñʋndɩnaa kpeekpe  nɛ ɖoŋ kpeekpe” yɔ. Ɛɖɩzɩɣ ɖɔɖɔ ‘sɩm, mbʋ pɩkɛ kɛdɛzaɣ koyindu yɔ.’ Kɛdɛzaɣ ɖeɖe lɛ, Yesu nɛ mba ɛ nɛ wɛ pɔtɔkɩ kewiyitu yɔ, pakaɣ luzuu pa-maɣmaɣ pa-tɩ nɛ wondu tɩŋa Yehowa tɛɛ. (1 Kɔr. 15:24-28) Pɩkaɣ kɛʋ alɩwaatʋ kɩbandʋ siŋŋ! *

3. 1 Kɔrɛntɩ mba 15:30-32 wɩlɩɣ se tisuu mbʋ Pɔɔlɩ wɛnɩ sɩɖaa femtu yɔɔ yɔ, pɩsɩnɩ-ɩ nɛ ɛla we?

³ Tisuu mbʋ Pɔɔlɩ wɛnɩ sɩɖaa femtu yɔɔ yɔ, pɩsɩnɩ-ɩ nɛ ɛɖɔkɩ ɛ-tɩ kala ndɩ ndɩ taa. (Kalɩ 1 Kɔrɛntɩ mba 15:30-32.) Eheyi Kɔrɛntɩ mba se: “Paa kɩyakʋ ŋgʋ, mɛwɛ sɩm nɔɔ taa.” Pɔɔlɩ mawa ɖɔɖɔ se: “Malʋbɩnɩ tɛtɛgbɩna Efɛɛzɩ.” Pɩtɩla, ɛyɔɔdaɣ ɛzɩma ɛlʋbɩnɩ kpɩna maɣmaɣ Efɛɛzɩ lone naɖɩyɛ taa yɔ pɩ-tɔm na. (2 Kɔr. 1:8; 4:10; 11:23) Yaa pɩtɩla, ɛyɔɔdaɣ ɛzɩma Yuuda ñɩma nɛ ɛyaa lalaa mba pɛwɛ ɛzɩ “tɛtɛgbɩna” yɔ pakaɖɩnɩ-ɩ yɔ pɩ-tɔm na. (Tʋma 19:26-34; 1 Kɔr. 16:9) Paa pɩtɩɩkɛ suwe yɔ, Pɔɔlɩ katɩ kala sɔsɔna. Ɛlɛ, ɛɛwɛnɩ lɩmaɣza kɩbana cee wayɩ yɔɔ.—2 Kɔr. 4:16-18.

4. Ɛzɩma sɩɖaa femtu lidaʋ kpazɩɣ ɖoŋ Krɩstʋ ñɩma sɔnɔ? (Cɔnɩ takayaɣ huyuu yɔɔ kɩlɛmʋʋ.)

⁴ Ðɩwɛ kaɖɛ alɩwaatʋ taa. Palakɩ ɖo-koobiya nabɛyɛ kañatʋ lakasɩ. Lalaa ñɛwɛ ajɛɛ wena a-taa palakɩ you yɔ, nɛ pe-weziŋ wɛ kaɖɛ taa. Lalaa ɖɔɖɔ ñɛsɛɣ Yehowa ajɛɛ wena a-taa pakaɖɩɣnɩ ɖɔ-tɔm susuu tʋmɩyɛ yɔ, nɛ powoki pɩ-yɔɔ nɛ pɛsɛɣ Yehowa paa pɩpɩzɩɣ se piyele nɛ paɖɩɣ-wɛ salaka yaa pakʋ-wɛ yɔ. Ɛlɛ, koobiya mba, pa-tɩŋa powobi pɩ-yɔɔ nɛ pɛsɛɣ Yehowa, nɛ pɛkɛnɩ-ɖʋ kɩɖaŋ kɩbaŋ siŋŋ. Sɔɔndʋ ɛɛkpaɣ-wɛ mbʋ pʋyɔɔ yɔ panawa se paa pelesi pe-weziŋ sɔnɔ yɔ, Yehowa labɩ tamaɣ se ɛkaɣ-wɛ haʋ mbʋ pɩkpaɖɩ ɖeu yɔ cee wayɩ.

5. Lɩmaɣza kɩdɛkɛda wena pɩzɩɣ nɛ acamɩ tisuu mbʋ ɖɩwɛnɩ sɩɖaa femtu yɔɔ yɔ?

⁵ Pɔɔlɩ heyi e-koobiya se pakpa pa-tɩ nɛ lɩmaɣza kɩdɛkɛda wena ɛyaa nabɛyɛ wɛna yɔ. Ɛyaa mba pɔyɔɔdʋʋ se: “Ye paafeziɣ sɩɖaa yɔ, ‘ɖɩtɔɔ nɛ ɖɩñɔɔ, mbʋ pʋyɔɔ yɔ cee ɖɩkaɣ sɩbʋ.’” Ɛyaa nabɛyɛ kaawɛnɩ lɩmaɣza ana, halɩ pʋcɔ nɛ pɩtalɩɣ Pɔɔlɩ alɩwaatʋ taa. Pɩtɩla tɔm ndʋ tɩwɛ Izaayii 22:13 taa yɔ Pɔɔlɩ labɩnɩ tʋmɩyɛ, nɛ tɔm ndʋ titukuuni wɛtʋ ndʋ Izrayɛɛlɩ piya kaawɛna yɔ. Mbʋ ɛzɩ Izrayɛɛlɩ piya kaañɔnɩ Ɛsɔ lɛ, sɩɩkam sɩ-lɩmaɣza leleŋ nɩʋ yɔɔ. Toovenim taa lɛ, Izrayɛɛlɩ piya nzɩ sɩmaɣzaɣ se pɩwɛɛ se sɩnɩɩ leleŋ si-wezuu caɣʋ taa lɛɛlɛɛyɔ mbʋ pʋyɔɔ yɔ, si-wezuu pɩzɩɣ nɛ kɩsɩɩ tɩnaɣ paa alɩwaatʋ ndʋ. Halɩ ɛyaa sakɩyɛ wɛnɩ lɩmaɣza ana sɔnɔ ɖɔɖɔ. Ɛlɛ, Bibl yɔɔdʋʋ kɩdɛkɛdɩm mbʋ pɩɩtalɩ Izrayɛɛlɩ samaɣ, mbʋ pʋyɔɔ yɔ kaawɛnɩ lɩmaɣza kɩdɛkɛda ana yɔ pɩ-tɔm.—4 Aw. 36:15-20.

6. Ðoŋ weyi pɩwɛɛ se sɩɖaa femtu lidaʋ ɛwɛɛnɩ ɛyaa mba ɖɩlɩzɩɣ se pɛkɛ ɖa-taabalaa yɔ pɩ-yɔɔ?

⁶ Ðɩnawa se Yehowa kaɣ fezuu sɩɖaa nɛ pʋyɔɔ lɛ, pɩwɛɛ se tɔm ndʋ tɩwɛɛnɩ ɖoŋ ɛyaa mba ɖɩlɩzɩɣ se pɛkɛ ɖa-taabalaa yɔ pɩ-yɔɔ. Pɩɩcɛyaa se Kɔrɛntɩ koobiya ɩkpa pa-tɩ nɛ pataaɖʋ taabalɩyɛ nɛ ɛyaa mba pataawɛɛnɩ tisuu sɩɖaa femtu yɔɔ yɔ. Pɩkpɛlɩkɩɣ-ɖʋ lɔŋ sɔnɔ ɖɔɖɔ. Ɛnɩ yɔ: Pɩwɛɛ se ɖɩkpa ɖa-tɩ nɛ taabalaa mba pamaɣzɩɣ leleŋ nɩʋ ɖeke yɔɔ nɛ pa-paa fɛyɩnɩ mbʋ pɩkaɣ labʋ cee wayɩ yɔ. Ye ɖɩkpakɩɣ alɩwaatʋ nɛ ɖa nɛ wɛ ɖɩcakɩ yɔ, pakaɣ wɛnʋʋ ɖoŋ kɩdɛkɛdɩŋ ɖɔ-yɔɔ. Ye toovenim Krɩstʋ tʋ nɔɔyʋ ɛkpakɩɣ alɩwaatʋ nɛ ɛ nɛ ɛyaa mba pacakɩ yɔ, ɛpɩzɩɣ nɛ elesi wɛtʋ kɩbandʋ ndʋ ɛwɛna yɔ. Halɩ ɛyaa mba, papɩzɩɣ potuyi-i nɛ ɛla mbʋ Ɛsɔ paɖɩɣ yɔ. Pʋyɔɔ Pɔɔlɩ seɣti-ɖʋ se: “Ife mɩ-lɩmaɣza taa ɛzɩ siɣsiɣ wɛtʋ pɔzʋʋ yɔ nɛ itaayele nɛ kɩwɛɛkɩm labʋ malɩnɩ-mɩ.”—1 Kɔr. 15:33, 34.

7. Ɛzɩ 1 Kɔrɛntɩ mba 15:35-38 wɩlʋʋ yɔ, tɔm ndʋ ɛyaa nabɛyɛ pɩzɩɣ nɛ pɔpɔzɩ sɩɖaa femtu yɔɔ?

⁷ Kalɩ 1 Kɔrɛntɩ mba 15:35-38. Ɛyʋ weyi ɛsɔɔlaa se eyele nɛ lalaa pɩtɩ sɩɖaa femtu yɔɔ yɔ, ɛpɩzɩɣ nɛ ɛpɔzɩ se: “Ɛzɩma pakaɣ sɩɖaa fezuu?” Pɩwɛɣ ɖeu se ɖɩmaɣzɩ ɛzɩma Pɔɔlɩ cosi tɔm ndʋ tɩ-yɔɔ yɔ pɩ-yɔɔ; mbʋ pʋyɔɔ yɔ sɔnɔ ɛyaa wɛnɩ lɩmaɣza ndɩ ndɩ mbʋ pɩtalɩɣ ɛyaa pa-sɩm wayɩ yɔ pɩ-yɔɔ. Ɛlɛ, tɔm ndʋ Bibl wɩlɩɣ?

8. Kɩɖaʋ ŋgʋ pɩzɩɣ kɩsɩnɩ-ɖʋ nɛ ɖɩtɩlɩ ɛzɩma mba pakaɣ fezuu se pakpa ɛsɔdaa yɔ, pakaɣ wɛʋ yɔ?

⁸ Alɩwaatʋ ndʋ nɔɔyʋ sɩkɩ yɔ, e-tomnaɣ ɖazɩɣ. Ɛlɛ Weyi ɛlɩzɩ kedeŋa yɔ, ɛpɩzɩɣ nɛ efezi ɛyʋ ɛnʋ nɛ ɛha-ɩ tomnaɣ ŋga pɩpɔzʋʋ-ɩ yɔ. (Kiɖe 1:1; 2:7) Pɔɔlɩ labɩnɩ tʋmɩyɛ kɩɖaʋ nakʋyʋ se ɛwɩlɩ se pɩɩkaɣ pɔzʋʋ se Ɛsɔ efezi ɛyʋ ɛnʋ nɛ tomnaɣ kʋɖʋmaɣ ŋga. Maɣzɩ “piye” yaa “ɖomaɣ” yɔɔ nɛ ŋna. Alɩwaatʋ ndʋ poɖuu ɖomaɣ yɔ, kɔñɔʋ nɛ kapɩsɩ tɩʋ kɩfalʋʋ. Tɩʋ kɩfalʋʋ ŋgʋ, kɩwɛ ndɩ kpem nɛ ɖomaɣ. Pɔɔlɩ labɩnɩ tʋmɩyɛ kɩɖaʋ ŋgʋ se ɛwɩlɩ se ɖa-Lɩzɩyʋ pɩzɩɣ nɛ ɛha paa weyi “tomnaɣ ɛzɩ ɛsɔɔlʋʋ yɔ.”

9. Suwe 1 Kɔrɛntɩ mba 15:39-41 yɔɔdʋʋ tomnasɩ ndɩ ndɩ nzɩ sɩwɛɛ yɔ sɩ-yɔɔ?

⁹ Kalɩ 1 Kɔrɛntɩ mba 15:39-41. Pɔɔlɩ yɔɔdaa se tomnasɩ nzɩ payɩ Ɛsɔ lɩzaa yɔ, sɩwɛ ndɩ ndɩ. Naŋ, sumasɩ, nɛ kpakpasɩ, po-tomnasɩ wɛ ndɩ ndɩ. Ɛyɔɔdaa ɖɔɖɔ se ye ɖɩcɔnɩ ɛsɔdaa yɔ, ɖɩnaɣ se tʋkaɣ wɛ wɩsɩ nɛ fenaɣ pɛ-hɛkʋ taa. Ɛtasɩ yɔɔdʋʋ se “paa tɩɩŋa ŋga lɛ, ka-ñalɩmɩyɛ wɛ ndɩ nɛ tɩɩŋa lɛɛka.” Pɩkɛ toovenim, paa ɖɩɩnaɣ tʋkaɣ ŋga nɛ ɖɛ-ɛsa yɔ. Ñɩnɩyaa heyiɣ-ɖʋ se tɩnzɩ wɛ ndɩ ndɩ, nasɩyɩ paɣlaa, nasɩyɩ tɩpaɣlɩ, nasɩyɩ sɛwa, nasɩyɩ hʋlʋmɩ nɛ lɛɛsɩ wɛɛnɩ sʋtʋ lɩm tɔlɩm, ɛzɩ wɩsɩ mbʋ yɔ. Pɔɔlɩ yɔɔdaa ɖɔɖɔ se “ɛsɔdaa tomnasɩ wɛɛ nɛ tataa tomnasɩ ñɛwɛɛ ɖɔɖɔ.” Ɛzɩma tɩyɛ? Tɛtʋ yɔɔ lɛ tomnasɩ wɛna, ɛlɛ ɛsɔdaa lɛ, fezuu taa tomnasɩ wɛna, ɛzɩ tomnasɩ nzɩ Ɛsɔ tiyiyaa wɛna yɔ.

10. Tomnaɣ ŋga ɛyaa mba pakaɣ fezuu se pacaɣ wezuu ɛsɔdaa yɔ pakaɣ wɛnʋʋ?

 ¹⁰ Na tɔm ndʋ Pɔɔlɩ yɔɔdɩ pʋwayɩ yɔ. Ɛyɔɔdaa se: “Mbʋ ɖɔɖɔ sɩɖaa femtu wɛɛ. Poɖuu tomnaɣ ŋga kaɖazɩɣ yɔ; pefeziɣ tomnaɣ ŋga kaaɖazɩɣ yɔ.” Ðɩnawa se alɩwaatʋ ndʋ nɔɔyʋ sɩkɩ yɔ, e-tomnaɣ ɖazɩɣ nɛ ɛpɩsɩ mʋzʋʋ. (Kiɖe 3:19) Ye mbʋ, ɛzɩma papɩzɩɣ nɛ pefezi ɛyʋ nɔɔyʋ nɛ “tomnaɣ ŋga kaaɖazɩɣ yɔ”? Pɔɔlɩ taayɔɔdʋʋ ɛyaa mba pefezi-wɛ se pacaɣ wezuu tɛtʋ yɔɔ yɔ pɔ-tɔm na; ɛzɩ ɛyaa mba Eliya, Eliizee, nɛ Yesu paafezaa yɔ. Ɛlɛ, Pɔɔlɩ yɔɔdaɣ ɛyaa mba pefezi-wɛ nɛ paha-wɛ tomnaɣ ŋga kapɩzɩɣ nɛ kacaɣ wezuu ɛsɔdaa yɔ pɔ-tɔm na, pʋ-tɔbʋʋ se “fezuu taa ñɩŋga.”—1 Kɔr. 15:42-44.

11-12. (a) Lɛɣzɩtʋ ndʋ labɩ Yesu hɔɔlʋʋ taa alɩwaatʋ ndʋ pefezi-i yɔ? (b) Nɛ ɛzɩma lɛɣzɩtʋ kʋɖʋmtʋ ndʋ tɩkaɣ labʋ patam numwaa hɔɔlʋʋ taa?

¹¹ Alɩwaatʋ ndʋ Yesu kaawɛ tɛtʋ yɔɔ yɔ, ɛɛwɛnɩ ɛyʋ tomnaɣ. Ɛlɛ alɩwaatʋ ndʋ pefezi-i yɔ, ɛpɩsɩ “fezuu ŋgʋ kɩhaɣ wezuu yɔ” nɛ ɛpɩsɩ ɛsɔdaa. Mbʋ ɖɔɖɔ pakaɣ fezuu Krɩstʋ ñɩma patam numwaa nɛ paha-wɛ tomnaɣ ŋga kapɩzɩɣ nɛ kacaɣ wezuu ɛsɔdaa yɔ. Pɔɔlɩ lɩzɩ pɩ-taa se: “Ɛzɩ ɖɩkɛʋ weyi palabɩ-ɩ nɛ mʋzʋʋ yɔ ɛ-lɛzʋʋ yɔ, mbʋ ɖɔɖɔ ɖɩkaɣ kɛʋ ɛsɔdaa tʋ lɛzʋʋ.”—1 Kɔr. 15:45-49.

¹² Pɩcɛyaa se ɖɩtɔzɩ se petifezi Yesu nɛ ɛyʋ tomnaɣ. Alɩwaatʋ ndʋ Pɔɔlɩ tɛzaɣ maʋ ɛ-tɔm yɔ, ɛyɔɔdɩ mbʋ pʋyɔɔ petifezi Yesu nɛ ɛyʋ tomnaɣ yɔ pɩ-tɔm. Ɛyɔɔdaa se: “Tomnaɣ nɛ calɩm paapɩzɩɣ nɛ pehiɣ Ɛsɔ Kewiyaɣ” ɛsɔdaa. (1 Kɔr. 15:50) Paakaɣ fezuu apostoloowaa nɛ patam numwaa lalaa se pakpa ɛsɔdaa nɛ tomnaɣ nɛ calɩm tomnasɩ nzɩ sɩɖazɩɣ yɔ. Ɛzɩmtaa pakaɣ-wɛ fezuu? Pɔɔlɩ kaayɔɔdaa se alɩwaatʋ ndʋ pakaɣ-wɛ fezuu yɔ, tɩwɛnɩ ɛsɩndaa, ɛlɛ pɩtɩkɛ pa-sɩm wayɩ kpaagbaa. Alɩwaatʋ ndʋ Pɔɔlɩ maɣaɣ Kɔrɛntɩ mba takayaɣ kajalaɣ ñɩŋga yɔ, tɔmkpɛlɩkɩyaa nabɛyɛ kaatɛm ‘ɖou sɩm taa.’ Pa-taa nɔɔyʋ lɛ apostoloo Yakubu. (Tʋma 12:1, 2) Apostoloowaa lalaa nɛ patam numwaa pakaɣ ‘ɖou sɩm taa’ pʋwayɩ.—1 Kɔr. 15:6.

13. Ɛbɛ kaɣ labʋ Yesu wɛʋ alɩwaatʋ taa?

¹³ Yesu nɛ Pɔɔlɩ paayɔɔdaa se alɩwaatʋ kɩcɛyɩtʋ natʋyʋ wɛnɩ ɛsɩndaa. Alɩwaatʋ ndʋ lɛ Krɩstʋ wɛʋ alɩwaatʋ. Krɩstʋ wɛʋ alɩwaatʋ taa, yoŋ, tɛtʋ ñamsʋʋ, kʋdɔmɩŋ nɛ lakasɩ kɩdɛkɛdɩsɩ lɛɛsɩ kaɣ labʋ ɛjaɖɛ kpeekpe yɔɔ. Kpaɣnɩ pɩnaɣ 1914, ɖɩwɛɛ nɛ ɖɩnaɣ se Bibl natʋ tɔm ndʋ tɩwɛɛ nɛ tɩlakɩ. Yʋsaɣ kɩbaŋa nakɛyɛ wɛɛ ɖɔɖɔ. Yesu yɔɔdaa se pakaɣ susuu tɔm kɩbandʋ se Ɛsɔ Kewiyaɣ paɣzɩ ka-tʋmɩyɛ. Pakaɣ tɔm ndʋ susuu “tɛtʋ kpeekpe yɔɔ se pɩkɛnɩ ajɛɛ kpeekpe aseɣɖe, nɛ ɖɩnɛ ɛlɛ ɛjaɖɛ tɛm kaɣ kɔm.” (Mat. 24:3, 7-14) Pɔɔlɩ yɔɔdaa se “Kɩbaɣlʋ wɛʋ alɩwaatʋ taa,” pakaɣ fezuu patam numwaa mba “poɖo sɩm taa yɔ” se pacaɣ wezuu ɛsɔdaa.—1 Tes. 4:14-16; 1 Kɔr. 15:23.

14. Ɛbɛ lakɩ Krɩstʋ ñɩma patam numwaa mba pasɩkɩ Krɩstʋ wɛʋ alɩwaatʋ taa yɔ pɔ-hɔɔlʋʋ taa?

¹⁴ Krɩstʋ ñɩma patam numwaa mba pasɩkɩ lɛɛlɛɛyɔ yɔ, pefeziɣ-wɛ kpaagbaa se pacaɣ wezuu ɛsɔdaa. Tɔm ndʋ Pɔɔlɩ ma 1 Kɔrɛntɩ mba 15:51, 52 taa yɔ, tɩñɩkɩɣ niye tɔm ndʋ tɩ-yɔɔ. Ɛmawa se: “Ða-tɩŋa ɖɩɩkaɣ ɖou sɩm taa, ɛlɛ ɖa-tɩŋa pɩkaɣ-ɖʋ lɛɣzʋʋ kpaagbaa, ɛzɩ ɛsɩyɛ piɖuu yɔ, alɩwaatʋ ndʋ payaɣ kɛdɛzaɣ ɛgandɩyɛ yɔ.” Pɔɔlɩ tɔm ndʋ, tɩwɛɛ nɛ tɩlakɩ lɛɛlɛɛyɔ! Alɩwaatʋ ndʋ pefeziɣ Krɩstʋ koobiya mba yɔ, pa-taa kaɣ labʋ leleŋ siŋŋ; pakaɣ “wɛʋ Kɩbaɣlʋ cɔlɔ paa ɛzɩmtaa.”—1 Tes. 4:17.

15. Ɛyaa mba pɩkaɣ-wɛ lɛɣzʋʋ, “ɛzɩ ɛsɩyɛ piɖuu yɔ,” tʋmɩyɛ nɖɩ pakaɣ labʋ?

¹⁵ Bibl heyiɣ-ɖʋ tʋmɩyɛ nɖɩ mba pɩkaɣ-wɛ lɛɣzʋʋ, “ɛzɩ ɛsɩyɛ piɖuu yɔ” pakaɣ labʋ ɛsɔdaa yɔ. Yesu heyiɣ ɛyaa mba se: “Weyi ɛwakɩ nɛ ɛɖɔkʋʋ ma-lakasɩ nɛ pɩkɔɔ pɩtalɩ tɩnaɣ  yɔɔ yɔ, mankaɣ-ɩ haʋ ɖoŋ ajɛɛ yɔɔ, nɛ ɛkaɣ ɛyaa ɖiyuu nɛ ñɩɣyʋʋ ɖaʋ se pɩsa nɛ pɩpɛlɩ-wɛ hɔɔlasɩ hɔɔlasɩ ɛzɩ cʋʋ ñanzɩ yɔ, ɛzɩ man-Caa haʋ-m ɖoŋ yɔ.” (Natʋ 2:26, 27) Pakaɣ tɩŋʋʋ Yesu wayɩ nɛ peɖiyi ajɛɛ nɛ ñɩɣyʋʋ ɖaʋ.—Natʋ 19:11-15.

16. Ɛzɩma tɩyɛ ɛyaa sakɩyɛ kaɣ wabʋ sɩm?

¹⁶ Pɩwɩlɩɣ kpayɩ kpayɩ se patam numwaa kaɣ wabʋ sɩm. (1 Kɔr. 15:54-57) Pe-femtu kaɣ-wɛ haʋ waɖɛ se paɖʋ nesi nɛ paɖɩzɩ kañatʋ lakasɩ tɩŋa Armaagedɔɔ you ŋgʋ kɩwɛnɩ ɛsɩndaa yɔ kɩ-taa. Krɩstʋ ñɩma lalaa mba pɛkpɛndɩ miiliyɔɔwaa sakɩyɛ yɔ, pakaɣ lɩnʋʋ “kʋñɔŋ sɔsɔʋ taa” nɛ pacaɣ wezuu ɛjaɖɛ kɩfaɖɛ taa. (Natʋ 7:14) Ɛyaa mba, pakaɣ naʋ nɛ pɛ-ɛsa ɛzɩma patasɩɣ wabʋ sɩm yɔ alɩwaatʋ ndʋ pefeziɣ ɛyaa miiliyaarɩwaa sakɩyɛ mba paasɩba yɔ. Maɣzɩ nɛ ŋna ɛzɩma ɖa-taa kaɣ labʋ leleŋ siŋŋ alɩwaatʋ ndʋ piti lakasɩ nzɩ sɩlakɩ yɔ! (Tʋma 24:15) Nɛ mba payɩ pɔɖɔkʋʋ pe-siɣsiɣ wɛtʋ Yehowa ɛsɩndaa yɔ, pakaɣ ɖɔɖɔ wabʋ sɩm mbʋ Aɖam ɖɛzɩ-wɛ yɔ. Pakaɣ wɛnʋʋ waɖɛ se pacaɣ wezuu tam.

17. Ɛzɩ 1 Kɔrɛntɩ mba 15:58 yɔɔdʋʋ yɔ, ɛbɛ pɩwɛɛ se ɖɩla lɛɛlɛɛyɔ?

¹⁷ Pɩpɔzʋʋ se Krɩstʋ ñɩma mba payɩ pɛwɛ wezuu lɛɛlɛɛyɔ yɔ, pɛwɛɛnɩ ɛsɩmɩyɛ sɩɖaa femtu tɔm ndʋ Pɔɔlɩ ma Kɔrɛntɩ mba nɛ tɩhɛzɩɣ laŋɩyɛ yɔ tɩ-yɔɔ. Pɩmʋnaa se ɖitisi nɛ ɖɩɖɔ lɔŋ weyi Pɔɔlɩ tasɩ-ɖʋ se ɖɩla “tʋma sakɩyɛ Kɩbaɣlʋ tʋmɩyɛ taa” lɛɛlɛɛyɔ yɔ ɩ-yɔɔ. (Kalɩ 1 Kɔrɛntɩ mba 15:58.) Ye ɖɩlakɩ ɖo-ɖoŋ ɖeɖe tʋmɩyɛ nɖɩ ɖɩ-taa paa ɛzɩmtaa yɔ, ɖɩpɩzɩɣ nɛ ɖɩwɛɛnɩ lidaʋ se ɖɩkaɣ hiɣu taa leleŋ siŋŋ ɖe-wezuu caɣʋ taa cee wayɩ. Alɩwaatʋ ndʋ, tɩkaɣ wɛʋ ɖeu siŋŋ nɛ pɩkpaɖɩ mbʋ payɩ pɩ-yɔɔ ɖɩpɩzɩɣ nɛ ɖɩmaɣzɩ yɔ. Pɩtʋʋ fɛyɩ se ɖɩkaɣ naʋ se pana wena ɖɩñakɩ yɔ, atɩkɛ falaa Kɩbaɣlʋ taa.