1-2. Omolwashike Ovakriste aveshe va pumbwa okulihonga shi na sha nenyumuko laavo tava ka nyumukila meulu?

OVANHU vahapu ovo tava longele Jehova kunena ove na eteelelo loku ka kala nomwenyo fiyo alushe kombada yedu. Ashike, oshixupe shOvakriste ovavaekwa oshi na eteelelo loku ka kala nomwenyo meulu. Ovavaekwa ovo ova halelela okushiiva nghee onghalamwenyo yavo monakwiiwa tai ka kala ya tya meulu. Ndele ongahelipi shi na sha naavo ve na eteelelo loku ka kala kombada yedu? Ngaashi hatu ke shi mona, ovo tava ka nyumuninwa meulu otava ka etela omanangeko noupuna ovo ve na eteelelo loku ka kala nomwenyo waalushe kombada yedu. Kashi na nee mbudi kutya otu na eteelelo loku ka kala meulu, ile okombada yedu, atusheni otu na okukala tu na ohokwe menyumuko lomeulu.

² Kalunga okwa nwefa mo ovahongwa vamwe vaJesus vomefelemudo lotete va shange shi na sha neteelelo lomeulu. Omuyapostoli Johannes okwa ti: “Paife otwa ninga ovana vaKalunga, ashike inatu hololelwa natango kutya ohatu ka kala twa tya ngahelipi. Ndele otu shi shii kutya ngeenge okwe liholola, ohatu ka kala twe mu fa.” (1 Joh. 3:2) Onghee hano, Ovakriste ovavaekwa kave shii kutya otava ka kala va tya ngahelipi ngeenge ova nyumuninwa meulu ve na omalutu opamhepo. Ashike, ngeenge ova pewa ondjabi yavo otava ka mona Jehova meityo lopafaneko. Ombiibeli inai popya ouyelele aushe u  na sha nenyumuko lomeulu, ashike omuyapostoli Paulus okwa popya ouyelele umwe u na sha naasho. Ovavaekwa otava ka kala pamwe naKristus eshi ta ka “xulifa po omapangelo aeshe naavo ve na eenghonopangelo.” Naasho osha kwatela mo ‘efyo, olo li li omutondi waxuuninwa.’ Xuuninwa, Jesus naavo tava ka pangela pamwe naye otave ke liyandja kuJehova nokuyandja oinima aishe meke laYe. (1 Kor. 15:24-28) Osho itashi ka kala tuu efimbo litunhula! *

3. Ngaashi sha ulikwa mo 1 Ovakorinto 15:30-32, eitavelo laPaulus menyumuko ole mu kwafela a ninge shike?

³ Eitavelo laPaulus li na sha nenyumuko ole mu kwafela e lididimikile omayeleko e lili noku lili. (Lesha 1 Ovakorinto 15:30-32.) Okwa lombwela Ovakorinto a ti: “Onda taalela efyo efiku keshe.” Paulus okwa ti yo: “Onda lwa noilyani muEfeso.” Otashi dulika a li ta popi kombinga yaashi a li a lwa noilyani yovenevene mokapale komaudano muEfeso. (2 Kor. 1:8; 4:10; 11:23) Ile tashi dulika a li ta popi shi na sha noutondwe wOvajuda nosho yo vamwe ovo va li va fa ‘oilyani.’ (Oil. 19:26-34; 1 Kor. 16:9) Kashi na nee mbudi kutya okwa li ta popi kombinga yashike, Paulus okwa li a taalela omayeleko a kwata moiti. Ashike nande ongaho, okwa li e na etaleko liwa li na sha nonakwiiwa. — 2 Kor. 4:16-18.

4. Ongahelipi eteelelo lenyumuko tali dulu okupameka Ovakriste kunena? (Tala efano kombada yoshifo.)

⁴ Otu li pefimbo lidjuu neenghono. Ovamwatate novamwameme vamwe ova ninga oihakanwa yominyonena. Vamwe ove li meenhele omo mu na oita, nove udite vehe li meameno. Vamwe vali otava longele Jehova moilongo omo oilonga yetu yokuudifa ya shilikwa ile va tulilwa po eendjidikila. Ashike ovamwatate novamwameme va tya ngaho, otava twikile okulongela Jehova nove li oshihopaenenwa shiwa kufye. Ihava kala va tila, molwaashi ove shii kutya nonande ova kanife eemwenyo davo paife, Jehova ote ke va pa osho sha denga mbada monakwiiwa.

5. Oikala ya nyika oshiponga ilipi tai dulu okunghundipaleka eitavelo letu li na sha nenyumuko?

⁵ Paulus okwa londwela ovamwaxe shi na sha netaleko la nyika oshiponga olo vamwe va li ve na, a ti: “Ngeenge oonakufya itava nyumunwa, ‘natu lyeni nokunwa osheshi mongula ohatu fi.’” Oikala ya tya ngaho oya li ko nale nokuli nofimbo Paulus ina dalwa. Otashi dulika a li a tofa muJesaja 22:13, oo a li a yukifwa koikala yOvaisrael. Ponhele yokweehena popepi naKalunga, ova li tava lalakanene omalihafifo. Ngaashi shi li kunena, oikala yOvaisrael ovo oya li ashike “okuhafela onghalamwenyo pokafimbo, molwaashi oya li tai ka xula po efimbo keshe.” Ombiibeli oya popya shi na sha noidjemo inyikifa oluhodi yoshiwana shOvaisrael omolwokudiladila kwa tya ngaho kwa puka. — 2 Omaf. 36:15-20.

6. Ongahelipi eteelelo letu lenyumuko tali dulu okukuma ovo hatu endafana navo?

⁶ Oushili oo kutya Jehova ota ka nyumuna oonakufya, ou na okukuma ehoololo letu li na sha naavo hatu endafana navo. Ovamwatate muKorinto ova li va pumbwa okuhenuka okweendafana naavo va li inava itavela menyumuko. Oshilihongomwa kufye kunena: Ngeenge otwa kala hatu endafana pandjikilile naavo vehe na ko nasha nonakwiiwa, nova pitifa komesho omalihafifo, otave ke tu nwefa mo nai. Okukala efimbo lihapu novanhu va tya ngaho otashi dulu okunyona po etaleko liwa lOmukriste nosho yo elihumbato laye. Ovanhu va tya ngaho otava dulu okunwefa mo omunhu a longe osho Kalunga e tonde.  Nomolwaasho Paulus e va ladipika nouladi a ti: “Ningeni eendunge nokulonga osho sha yuka, ndele hawii.” — 1 Kor. 15:33, 34.

7. Ngaashi sha ulikwa mo 1 Ovakorinto 15:35-38, epulo li na sha nenyumuko lilipi tashi dulika vamwe va li ve na?

⁷ Lesha 1 Ovakorinto 15:35-38. Umwe oo tashi dulika a hala okukuna omalimbililo muvakwao e na sha nenyumuko, otashi dulika a pule ta ti: “Oonakufya otava ka nyumunwa ngahelipi?” Oshi li pandunge okudiladila kenyamukulo laPaulus, molwaashi ovanhu vahapu kunena ove na omataleko e lili noku lili e na sha naasho hashi ningwa po konima yefyo. Ndele Ombiibeli otai ti ngahelipi?

8. Efaneko lilipi tali dulu oku tu kwafela tu ude ko enyumuko lomeulu?

⁸ Ngeenge omunhu okwa fi olutu laye ohali olo. Ashike, Ou a shita ounyuni ota dulu okunyumuna omunhu a tya ngaho noku mu pa olutu tali wapalele. (Gen. 1:1; 2:7) Paulus okwa longifa efaneko tali ulike kutya Kalunga ita ka nyumuna omunhu nolutu olo a fya nalo. Diladila ashike “kombuto” yoshimeno. Ombuto yoshimeno ngeenge ya kunwa medu ohai twiyuka, ndele tai ningi okameno kape. Okameno oko kape ohaka kala ka yooloka ko kombuto. Paulus okwa longifa eyelekanifo la tya ngaho, opo a ulike kutya Omushiti wetu ota dulu okupa omunhu olutu “ngaashi she mu wapalela.”

9. 1 Ovakorinto 15:39-41 ova popya shike shi na sha nomaludi omalutu?

⁹ Lesha 1 Ovakorinto 15:39-41. Paulus okwa popya kutya ope na eyooloko linene li na sha nokushitwa kwomalutu. Pashihopaenenwa, ope na omalutu opambelela a yoolokafana, ngaashi omalutu eengobe, oudila nosho yo eeshi. Okwa popya kutya, ohatu mono eyooloko pokati ketango nomwedi mewangandjo. Okwa ti yo kutya, “onyofi keshe oi na oshinge shayo shi lili.” Osho oshoshili nokuli nonande ihatu mono eyooloko la tya ngaho nomesho etu okomutwe. Ovanongononi ova popya kutya  ope na omaludi eenyofi a yoolokafana, dimwe oda kula, dimwe odinini, dimwe odi tilyana nadimwe odi shunga da fa etango. Paulus okwa popya yo kutya “ope na omalutu omeulu nosho yo omalutu okombada yedu.” Ngahelipi mbela? Kombada yedu oku na omalutu opambelela, ashike meulu omu na omalutu opamhepo ngaashi oo ovaengeli.

10. Ovo tava ka nyumuninwa meulu otava ka kala ve na omalutu a tya ngahelipi?

¹⁰ Didilika osho omuyapostoli Paulus a popya vali, a ti: “Osho osho tashi ka ningwa eshi ovafi tava ka nyumunwa. Omalutu oo a fya otaa nyonauka, ashike ovanhu otava ka nyumunwa nomalutu ihaa nyonauka.” Otu shi shii kutya omunhu ngeenge okwa fi, olutu laye ohali olo ndele ta shuna mondwi yedu. (Gen. 3:19) Ndele ongahelipi ovanhu tava ka “nyumunwa nomalutu ihaa nyonauka”? Paulus ka li ta popi enyumuko lovanhu ovo va li va nyumunwa va kale kombada yedu, ngaashi ovo va nyumunwa kuElia, Elisa nosho yo Jesus. Ndele okwa li ta popi kombinga yaavo va nyumuninwa omalutu omeulu, sha hala okutya “opamhepo.” — 1 Kor. 15:42-44.

11-12. Elunduluko lilipi Jesus a li a mona eshi a nyumunwa, nongahelipi ovavaekwa tava ka mona oshinima sha faafana?

¹¹ Eshi Jesus a li kombada yedu okwa li e na olutu lopambelela. Ndele eshi a nyumunwa, “okwa ninga omhepo hai yandje omwenyo” nokwa shuna meulu. Sha faafana, Ovakriste ovavaekwa navo otava ka nyumunwa nomalutu opamhepo. Paulus okwa ti: “Ngaashi ashike twa fa oo a shitwa mondwi yedu, ohatu ka kala yo twa fa oo a dile meulu.” — 1 Kor. 15:45-49.

¹² Paulus okwa li ta divilike eendjovo daye di na sha nenyumuko. Osha fimana okushiiva kutya Jesus ka li a nyumunwa nolutu lopanhu. Paulus okwa ti: “Ombelela nohonde itai ka fyuulula Ouhamba waKalunga” womeulu. (1 Kor. 15:50) Ovayapostoli nosho yo ovavaekwa vakwao itava ka nyumuninwa meulu nomalutu haa nyonauka opambelela nohonde. Otava ka nyumunwa naini? Paulus okwa  popya kutya vo kava li tava ka nyumunwa mepakumo leisho ile diva ngeenge ova fi, ndele omokweendela ko kwefimbo konima yefyo lavo. Pefimbo olo Paulus a shanga Ovakorinto votete, ovahongwa vamwe ova hangwa va “fya nale,” pashihopaenenwa, ngaashi omuyapostoli Jakob. (Oil. 12:1, 2) Ovayapostoli vamwe nosho yo ovavaekwa ova li tava ka “fya nale.” — 1 Kor. 15:6.

13. Oshike tashi ka ningwa po pefimbo lokukala po kwaJesus?

¹³ Jesus naPaulus ova li tava popi kefimbo le likalekelwa mondjokonona, efimbo lokukala po kwaKristus. Efimbo la tya ngaho ola li tali ka hololwa koita, komakakamo edu, komikifi dolutapo nosho yo koinima ii oyo tai ka ningwa mounyuni aushe. Omaxunganeko oo Ombiibeli okwa kala taa wanifwa okudja mo 1914. Ope na vali oshitukulwa shimwe sha fimana shedidiliko olo. Jesus okwa popya kutya onghundana iwa yOuhamba waKalunga, oo wa dikwa po, oya li tai ka udifilwa “ounyuni aushe opo ovanhu vomoiwana aishe ve i ude, opo nee exulilo tali uya.” (Mat. 24:3, 7-14) Paulus okwa popya kutya pefimbo ‘lokukala po kwOmwene,’ Ovakriste ovavaekwa “ovo va fya” otava ka nyumuninwa meulu. — 1 Tes. 4:14-16; 1 Kor. 15:23.

14. Oshike tashi ka ningilwa Ovakriste ovavaekwa ovo va fya pefimbo lokukala po kwaKristus?

¹⁴ Ovavaekwa ovo tava fi kunena, ohava nyumukile omwenyo womeulu mepakumo leisho. Osho osha kolekwa keendjovo daPaulus odo di li mo 1 Ovakorinto 15:51, 52, odo tadi ti: “Atushe itatu ka fya, ndele ohatu ka shitululwa mepakumo leisho pefimbo leshiko lenghuma laxuuninwa.” Eendjovo odo daPaulus otadi wanifwa paife. Kakele kenyumuko lavo, ovamwaxe vaKristus ovo, otava ka mona  ehafo linene eshi tava ka “kala alushe pamwe naye.” — 1 Tes. 4:17.

15. Ovo tava ka nyumunwa “mepakumo leisho” otava ka pewa oilonga ilipi?

¹⁵ Ombiibeli oya popya shi na sha noilonga oyo tai ka longwa kwaavo tava ka nyumukila meulu “mepakumo leisho.” Jesus okwe va lombwela a ti: “Omufindani ou ta diinine fiyo okexulilo osho nde mu lombwela ohandi ke mu pa eenghonopangelo a pangele oiwana, ngaashi Tate e di pa nge. Nomufindani oo ota ka denga oiwana nodibo yoshivela, opo e i nyanyaule ngaashi oitoo yedu.” (Eh. 2:26, 27) Otava ka shikula Omuwiliki wavo notava ka lifa oiwana nodibo yoshivela. — Eh. 19:11-15.

16. Ongahelipi ovanhu vahapu tava ka finda efyo?

¹⁶ Ovavaekwa otava ka finda efyo filufilu. (1 Kor. 15:54-57) Enyumuko lavo otali ke va pitika opo va kwafele mokuxulifa po owii aushe kombada yedu pefimbo loita yaArmagedon. Ovakriste vakwao omamiliyona ovalumenhu novakainhu otava ka “pita moudjuu munene” nokuya mounyuni mupe. (Eh. 7:14) Ovo tava ka xupa kombada yedu otava ka mona nghee efyo tali findwa vali, eshi ovanhu omabiliyona ovo va fya tava ka nyumunwa. Diladila ashike kehafo olo hatu ka mona eshi oshiningwanima osho tashi ka ningwa! (Oil. 24:15) Aveshe ovo ve li ovadiinini filufilu kuJehova otava ka finda efyo olo twa fyuulula kuAdam. Otava ka kala nomwenyo fiyo alushe.

17. Tu na momadiladilo 1 Ovakorinto 15:58, oshike tu na okuninga paife?

¹⁷ Omukriste keshe e na omwenyo oku na okupandula eendjovo dehekeleko di na sha nenyumuko, odo Paulus a li a shangela Ovakorinto. Otu na omatomheno mawa okudulika komayele aPaulus, tu ninge ngaashi hatu dulu “moilonga yOmwene.” (Lesha 1 Ovakorinto 15:58.) Ngeenge otwa kala alushe hatu ningi ngaashi hatu dulu moilonga oyo, ohatu ka teelela nodjuulufi onghalamwenyo ya denga mbada monakwiiwa. Onakwiiwa ya tya ngaho, otai ka kala ya denga mbada shi dulife pwaasho hatu diladila. Osho otashi ka ulika kutya oilonga oyo twa kala hatu longele Omwene kai fi oshimha.