1-2. Тʹема рʹабуна бона жийана ль әʹзмана чьма бона һʹәму шагьртед Иса Мәсиһ фәрз ә?

ПʹЬРʹАНИЙА мәрьвед кӧ ньһа Йаһоԝа Хԝәдерʹа хьзмәт дькьн һивийа жийана һәр-һәйи йа ль рʹуйе әʹрде нә. Ле бәле, һьнә шагьртед бь рʹӧһʹ кʹьфшкьри жи манә, йед кӧ һивийа жийана ль әʹзмана нә. Шагьртед бь рʹӧһʹ кʹьфшкьри һьлбәт дьхԝазьн пебьһʹәсьн кӧ жийана ԝан ԝе ль әʹзмана чаԝа бә, ле гәло әв тʹема бона кәсед кӧ ԝе ль рʹуйе әʹрде бьжин чьма фәрз ә? Әме бьвиньн кӧ рʹабуна Мәсиһийед бь рʹӧһʹ кʹьфшкьри ԝе бона кәсед кӧ һʹәта-һʹәтайе ль сәр әʹрде бьжин жи бәрәкʹәта бинә. Ләма һевийа мә чь бә жи – жийана ль әʹзмана йан жийана ль сәр әʹрде – гәрәке әм рʹьнд дина хԝә бьдьн рʹабуна бона жийана ль әʹзмана.

² Жь бина бәр Хԝәде, һьнә шагьртед Иса Мәсиһ дәрһәԛа һевийа әʹзмани дьньвисин. Мәсәлә, Йуһʹәннайе шанди ӧса гот: «Ньһа әм зарʹед Хԝәде нә у һәла һе нә әʹйан ә әме бьбьнә чь. Ле әм ве йәке заньн кӧ чахе Иса әʹйан бә, әме бьбьнә мина ԝи» (1 Йуһʹн. 3:2). Демәк, шагьртед бь рʹӧһʹ кʹьфшкьри ньзаньн кӧ жийана ль әʹзмана ԝе чаԝа бә. Ле бәле, әԝ заньн кӧ гава әԝе хәлата хԝә бьстиньн, әԝе Йаһоԝа рʹу бь рʹу бьвиньн. Кʹьтеба Пироз һур бь һур набежә кӧ рʹабуна бона жийана ль әʹзмана ԝе чаԝа бә, ле Паԝлосе шанди дәрһәԛа ве йәке һьнә әʹламәти да. Гава Иса Мәсиһ  «кʹока һәр сәрԝертийе, һʹӧкӧмәтийе у ԛәԝате бинә» у «дьжмьне хьлазийе», демәк мьрьне, жь кʹокева рʹакә, кәсед бь рʹӧһʹ кʹьфшкьри ԝе ль щәм ԝи бьн. Хьлазийеда, Иса Мәсиһ у һәмпʹадшед ԝи ԝе хԝә у һәр тьшти тʹәсмили Йаһоԝа бькьн (1 Корн. 15:24-28). *

3. Чаԝа кӧ 1 Корьнтʹи 15:30-32 нишан дькә, һевийа рʹабуна мьрийа чаԝа али Паԝлос дькьр?

³ Бь сайа һевийа рʹабуна мьрийа, Паԝлосе шанди ль һьмбәри щурʹә-щурʹә тәнгасийа сәбьр кьр (1 Корьнтʹи 15:30-32 бьхунә). Әԝи Корьнтʹийарʹа ӧса гот: «Әз һәр рʹож дәст жь әʹмьре хԝә дькʹьшиньм!» Ӧса жи ньвиси кӧ әԝи ль Әфәсе «тʹәви сәʹва», демәк тʹәви һʹәйԝанед хоф шәрʹ кьрьбу. Дьбә кӧ Паԝлос ль аренайа Әфәсе бь һʹәйԝанарʹа шәрʹ кьрьбу (2 Корн. 1:8; 4:10; 11:23). Йан жи, ԝи бәлки бәʹса Щьһуйа у кәсед дьн дькьр, йед кӧ мина һʹәйԝанед хоф мьԛабьли ԝи дәрдькʹәтьн (Кʹар. Шанд. 19:26-34; 1 Корн. 16:9). Сәбәб чь бу жи, әшкәрә йә кӧ Паԝлосе шанди рʹасти дәрәщед хоф һатьбу. Ле диса жи, әԝи һевийа хԝә тʹӧ щара ӧнда нәдькьр (2 Корн. 4:16-18).

4. Һевийа рʹабуна мьрийа чаԝа мерхасийе дьдә мә? (Бьньһерʹә шькле рʹуйе журнале.)

⁴ Иро, дьнйа пʹьрʹ хьраб ә. Һьнә хушк у бьред мә сәва шәрʹ йан зӧлм у зордарийе зьрар дитийә. Һьнә хушк у бьред мә жи ль ԝәлатед кӧ ише бәлакьрьна мьзгине һатийә ԛәдәхә кьрьн, дьжин. Диса жи, әԝана хьзмәта Йаһоԝа надьн сәкьнандьн, у амьнийа ԝан мәрʹа мәсәлә йә. Әԝ заньн кӧ һәгәр әԝана жийана хԝә ӧнда бькьн жи, Йаһоԝа ԝе жийанәкә дьһа баш бьдә ԝан.

5. Кʹижан ньһерʹандьна шаш дькарә баԝәрийа мә бь рʹабуна мьрийа сьст бькә?

⁵ Ль рʹожед Паԝлосе шанди, һьнә кәс ӧса дьфькьрин: «Һәгәр рʹабуна мьрийа ԝе тʹӧнәбә, дә иди ‹әм бьхԝьн-вәхԝьн, чьмки әме сьбе бьмьрьн›». Бь әʹсле хԝә, әв ньһерʹандьна нәрʹаст пешийа рʹожед Паԝлос жи һәбу. Мәсәлә, Ишайа 22:13 дьбежә ԝәки Исраелийед кӧ жь Хԝәде дур дькʹәтьн у ль хԝәстьнед хԝә дьгәрʹийан, әʹйни тьшт дьготьн. Иро жи, гәләк кәс дьбежьн: «Жийан кьн ә, ль кʹефа хԝә бьньһерʹә!» Ле бәле, тʹәриха мьләте Исраел нишани мә дькә кӧ ньһерʹандьнәкә ӧса ахьрийа пʹьрʹ хьраб тинә (2 Дир. 36:15-20).

6. Баԝәрийа мә һьндава рʹабуна мьрийа, ча гәрәке сәр бьжартьна һәвала һʹӧкӧм кә?

⁶ Әԝ йәк кӧ Йаһоԝа дькарә мьрийа рʹакә, гәрәке сәр бьжартьна мә дәрһәԛа һәвала һʹӧкӧм кә. Мәсәлә, лазьм бу кӧ хушк у бьред ль Корьнтʹе хԝә жь кәсед кӧ рʹабуна мьрийа баԝәр накьн, дур бьгьрьн. Әв йәк тьштәки фәрз мә һин дькә: Ԝе баш бә кӧ әм тʹәви кәсед кӧ тʹәне бона иро дьжин һәвалтийе нәкьн, чьмки һәгәр әм бь кәсед ӧсарʹа пʹьрʹ ԝәхт дәрбаз кьн, әԝана дькарьн сәр ньһерʹандьн у рʹабун-рʹуньштьна мә хьраб һʹӧкӧм бькьн. Ләма, Паԝлосе шанди шагьртед Иса Мәсиһ ӧса тʹәми дькьрьн: «Рʹаст бьфькьрьн, сәр һʹьше хԝәда ԝәрьн, иди гӧна нәкьн» (1 Корн. 15:33, 34).

7. Ль гора 1 Корьнтʹи 15:35-38, дьбәк һьнә кәса дәрһәԛа рʹабуна мьрийа чь дьпьрсин?

⁷ 1 Корьнтʹи 15:35-38 бьхунә. Һьнә кәсед кӧ рʹабуна мьрийа баԝәр нәдькьрьн, бәлки ӧса дьпьрсин: «Мьри  чаԝа дькарьн рʹабьн?» Гәрәке әм рʹьнд дина хԝә бьдьн щаба Паԝлос, чьмки иро жи дәрһәԛа жийана паши мьрьне щурʹә-щурʹә фькьр һәнә. Ле бәле, Кʹьтеба Пироз ль сәр ве йәке чь дьбежә?

8. Кʹижан мәсәлә дькарә али мә бькә, кӧ әм рʹабуна бона жийана ль әʹзмана фәʹм бькьн?

⁸ Гава мәрьв дьмьрә, бәдәна ԝи дьрʹьзә. Ле бәле, Хԝәде, йе кӧ Әʹфьрандаре һәр тьшти йә, дькарә ви кәси бь бәдәнәкә ну рʹакә (Дәстп. 1:1; 2:7). Паԝлос бь мәсәләке нишан кьр кӧ гава Хԝәде кәсәки бона жийана ль әʹзмана рʹадькә, нә лазьм ә кӧ әԝ бь әʹйни бәдәне рʹакә. Мина кӧ тʹохьмәк те чандьн у гиһайе кӧ же дәрдькʹәвә, жь тʹохьме бьчʹук пʹьрʹ щӧдә йә, Хԝәде жи дькарә «ль гора хԝәстьна хԝә бәдәнәке» чекә.

9. Ль гора 1 Корьнтʹи 15:39-41, чь щурʹә бәдән һәнә?

⁹ 1 Корьнтʹи 15:39-41 бьхунә. Паԝлос гот кӧ щурʹә-щурʹә бәдән һәнә. Мәсәлә, бәдәнед деԝер, чʹьвик у мәʹсийа жь һәв щӧдә нә. Ӧса жи, әԝи гот кӧ тәʹв жь һиве щӧдә йә, у «һәр стәйркәк бь рʹәԝша хԝә жь һәв тенә фьрԛикьрьне». Бәле, һәр чьԛас әм фьрԛийа дь нава стәйркада бь чʹәʹве хԝә навиньн жи, зандар дьбежьн кӧ һьнә стәйркед мәзьн, бьчʹук, сьпи, сор у зәр һәнә. Мәсәлә, тәʹва мә, стәйркәкә зәр ә. Хенщи ве, Паԝлос гот кӧ ԛальбед, демәк бәдәнед әʹзмани у бәдәнед дьнйайи һәнә. Әԝ чь те һʹәсабе? Ль дьнйайе, бәдәнед жь гошт һәнә, ле ль әʹзмана, бәдәнед жь рʹӧһʹ һәнә, мәсәлә бәдәнед мәләка.

10. Кәсед кӧ ԝе ль әʹзмана бьжин ԝе бь бәдәнәкә чаԝа бен рʹакьрьн?

¹⁰ Паше, Паԝлос ӧса ньвиси: «Бь ви аԝайи жи рʹабуна мьрийа йә: Ԛальбе дерьс те чандьне, йе нәдерьс ԝе рʹабә». Гава мәрьв дьмьрә, бәдәна ԝи дьрʹьзә у вәдьгәрә ахе (Дәстп. 3:19). Демәк бәдән чаԝа нәрʹьзибунеда те  рʹакьрьн? Паԝлос ль вьр бәʹса инсанед кӧ бона жийана ль сәр әʹрде тен рʹакьрьн – мина кәсед кӧ жь алийе Елйас, Елиша у Иса Мәсиһва һатьбун рʹакьрьн – нәдькьр. Әԝи бәʹса ԝан кәса дькьр, йед кӧ бь бәдәнәкә әʹзмани, демәк бь «бәдәна рʹӧһʹани» тен рʹакьрьн (1 Корн. 15:42-44).

11-12. Иса Мәсиһ бь бәдәнәкә чаԝа һат рʹакьрьн, у кәсед бь рʹӧһʹ кʹьфшкьри бь бәдәнед чаԝа тен рʹакьрьн?

¹¹ Гава Иса Мәсиһ ль дьнйайе дьжит, бәдәна ԝи, бәдәнәкә физики бу, ле гава әԝ жь мьрьне рʹабу, әԝ бу «рʹӧһʹәки жийиндайине» у вәгәрийа әʹзмана. Мина ԝи, шагьртед бь рʹӧһʹ кʹьфшкьри жи ԝәк рʹӧһʹ тен рʹакьрьн. Паԝлос гот: «Мә чаԝа кьрасе йе жь хԝәлийе ль хԝә кьрийә, әме ӧса жи кьрасе йе жь әʹзмен ль хԝә кьн» (1 Корн. 15:45-49).

¹² Гәрәке әм бир нәкьн, кӧ Иса Мәсиһ бь бәдәнәкә физики нәһат рʹакьрьн. Ль хьлазийа зәлалкьрьна тʹема рʹабуна мьрийа, Паԝлосе шанди гот кӧ «хун у гошт ль Пʹадшатийа Хԝәде нькарьн ԝар бьн» у һәрʹьн әʹзмана. Ләма, шандийед Иса Мәсиһ у йед майин бь рʹӧһʹ кʹьфшкьри, ԝе бь бәдәнед жь «хун у гошт» нәһатана рʹакьрьн (1 Корн. 15:50). Гәло әԝе кʹәнге бьһатана рʹакьрьн? Паԝлос готьбу кӧ рʹабуна мьрийа ԝе ԝәхтәкә шунда бьбә, демәк әԝе дәрберʹа паши мьрьне рʹанәбуна. Гава Паԝлосе шанди нәʹма хԝә йа пешьн Корьнтʹийарʹа дьньвиси, һьнә шагьрт ида мьрьбун, мәсәлә Аԛубе шанди (Кʹар. Шанд. 12:1, 2). Бь зәманрʹа, шанди у йед дьн бь рʹӧһʹ кʹьфшкьри жи мьрьн (1 Корн. 15:6).

13. Ль ԝәхта һазьрбуна Иса Мәсиһ, чь ԝе бьԛәԝьмийа?

¹³ Һьм Иса Мәсиһ һьм жи Паԝлосе шанди бәʹса ԝәхта һазьрбуна Мәсиһ дькьр. Ԝе дәме, тьштед ԝәк шәрʹ,  әʹрдһʹәж у нәхԝәшийед хьраб, ԝе ль тʹәмамийа дьнйайе бьԛәԝьмийана. Жь сала 1914 һʹәта иро, әв пʹехәмбәртийа Кʹьтеба Пироз ль бәр чʹәʹвед мә те сери. Ӧса жи, Иса Мәсиһ готьбу кӧ мьзгина сазкьрьна Пʹадшатийа Хԝәде «ԝе ль нав тʹәмамийа дьнйайе бе даннасинкьрьне, кӧ һʹәму мьләтарʹа бьбә шәʹдәти у һьнге хьлази ԝе бе» (Мәт. 24:3, 7-14). Хенщи ван тьшта, Паԝлос готьбу кӧ ль ԝәхта һазьрбуна Мәсиһ, шагьртед бь рʹӧһʹ кʹьфшкьри йед кӧ мьрьнә, ԝе рʹабьн (1 Тʹеслн. 4:14-16; 1 Корн. 15:23).

14. Кәсед бь рʹӧһʹ кʹьфшкьри, йед кӧ дь ԝәхта һазьрбуна Мәсиһда дьмьрьн, кʹәнге тен рʹакьрьн?

¹⁴ Кәсед бь рʹӧһʹ кʹьфшкьри, йед кӧ рʹожед мәда дьмьрьн, дәрберʹа бона жийана ль әʹзмана тен рʹакьрьн. Әв йәк жь готьнед Паԝлосе шанди йед ль 1 Корьнтʹи 15:51, 52 тен фәʹм кьрьн: «Әм һʹәмуйе нәмьрьн, ле әм һʹәмуйе жи бенә гӧһастьне, ньшкева, чаԝа чʹәʹве хԝә бьгьри-вәки, дәма борʹийа ахьрийе бе ледане». Әв готьнед Паԝлос ньһа тен сери. Паши рʹабуна жь мьрьне, әв бьред Мәсиһ дьгьһижьн дьлхԝәшикә мәзьн, у әԝе һәртʹьм «тʹәви Хӧдан бьн» (1 Тʹеслн. 4:17).

15. Кәсед кӧ «чаԝа чʹәʹве хԝә бьгьри-вәки» тед гӧһастьн, ԝе чь иши бькьн?

¹⁵ Кʹьтеба Пироз мәрʹа дьбежә кӧ кәсед кӧ «чаԝа чʹәʹве хԝә бьгьри-вәки» тен гӧһәртьн, ԝе ль әʹзмана чь иши бькьн. Иса Мәсиһ ԝанрʹа дьбежә: «Әԝе кӧ сәркʹәвә у һʹәта хьлазийе кьред ль гора дьле мьн бькә, әзе ԝи һʹӧкӧме сәр мьләта бьдьмә ԝи, кʹижан мьн жь Баве хԝә һьлдайә у әԝе пе шьвдара һʹәсьни шьвантийе ль ԝан бькә, мина фьраԛед  чʹьни ԝе бьпʹьшьринә» (Әʹйан. 2:26, 27). Бәле, әԝана тʹәви Фәрмандаре хԝә Иса Мәсиһ, ԝе шьвантийа мьләта бь «шьвдара һʹәсьни» бькьн (Әʹйан. 19:11-15).

16. Гәләк инсан ԝе чаԝа ль сәр мьрьне сәркʹәвьн?

¹⁶ Әшкәрә йә кӧ кәсед бь рʹӧһʹ кʹьфшкьри ԝе ль сәр мьрьне сәркʹәвьн (1 Корн. 15:54-57). Паши рʹабуна жь мьрьне, әԝана ль шәрʹе Һармәгәдоне хьрабийе жь тʹәмамийа дьнйайе кʹӧта бькьн. Бь милйона шагьртед дьн жи ԝе дь «тәнгасийа мәзьнда» сах бьминьн у дәрбази дьнйайа ну бьбьн (Әʹйан. 7:14). Сәрда, йед кӧ ль дьнйайе сах бьминьн ԝе рʹабуна бь милиарда инсана бьвиньн. Бинә бәр чʹәʹве хԝә кӧ әме сәва ве сәркʹәтьне чьԛас шабуне бьстиньн! (Кʹар. Шанд. 24:15). Ӧса жи, һәр кәсе кӧ бь тʹәмами Йаһоԝарʹа амьн ә, ԝе ль сәр мьрьна бь миратʹстанди сәркʹәвә у һʹәта бь һʹәтайе бьжи.

17. Ль гора 1 Корьнтʹи 15:58, гәрәке әм чь бькьн?

¹⁷ Гәло әм бона әʹламәтийа кӧ Паԝлосе шанди дәрһәԛа рʹабуна мьрийа Корьнтʹийарʹа ньвиси, шекьрдар ниньн? Ԝе баш бә кӧ әм гӧһ бьдьн тʹәмийа Паԝлос кӧ әм «һәр гав шьхӧле Хӧданда пешда һәрʹьн» (1 Корьнтʹи 15:58 бьхунә). Һәгәр әм ви иши бь хирәт у бь амьни биньн сери, әме бәрәкʹәтед мәзьн бьстиньн. Бәле, әме дьлхԝәшикә һаԛас мәзьн бьстиньн, йа кӧ мә хәйал жи нәдькьр. Әме бьвиньн кӧ хәбата мә ль бәр Хӧдан, бош-бәтал нинә.