1-2. Wetin mek ɔlman we na Kristian fɔ lan bɔt di op fɔ gɛt layf bak na ɛvin?

BƆKU pipul dɛn we de sav Jiova naw gɛt di op fɔ de na dis wɔl sote go. Bɔt sɔm pan di anɔyntɛd Kristian dɛn we gɛt di op fɔ gɛt layf bak na ɛvin stil de, ɛn dɛn nɔ bɔku. Dɛn anɔyntɛd Kristian dɛn ya rili want fɔ no aw dɛn layf go tan lɛk na ɛvin. Bɔt wetin mek di wan dɛn we gɛt di op fɔ de na dis wɔl fɔ lan bɔt dis? As wi go lan, di wan dɛn we go gɛt layf bak na ɛvin go ɛp fɔ briŋ bɔku blɛsin fɔ di wan dɛn we gɛt di op fɔ de na dis wɔl sote go. So ilɛksɛf wi gɛt di op fɔ de na ɛvin ɔ dis wɔl, i fayn fɔ lɛ wi lan bɔt di wan dɛn we gɛt fɔ gɛt layf bak na ɛvin.

² Gɔd bin dayrɛkt sɔm pan Jizɔs in disaypul dɛn we bin de trade fɔ rayt bɔt di op fɔ gɛt layf bak na ɛvin. Apɔsul Jɔn bin ɛksplen se: “Wi na Gɔd in pikin dɛn naw, bɔt dɛn nɔ sho wi yet wetin wi gɛt fɔ bi. Bɔt wi no se we i go apia wi go tan lɛk am.” (1 Jɔn 3:​2) So anɔyntɛd Kristian dɛn nɔ no aw dɛn layf go tan lɛk we dɛn go go na ɛvin wit spirit bɔdi. Bɔt dɛn go si Jiova we i go mek dɛn gɛt wetin i dɔn prɔmis dɛn. Di Baybul nɔ tɛl wi ɔltin bɔt di op fɔ gɛt layf bak na ɛvin, bɔt apɔsul Pɔl bin tɛl wi sɔm tin dɛn bɔt dat. Di anɔyntɛd dɛn go de wit Krays we i go mek “ɔl di gɔvmɛnt dɛn ɛn di wan dɛn we gɛt pawa nɔ de igen.” Ɛn we i go mek “di las ɛnimi we na day” nɔ de igen. Dɔn, Jizɔs ɛn di wan dɛn we go rul wit am go put dɛnsɛf ɛn ɔl  di ɔda tin dɛn ɔnda Jiova. (1 Kɔr. 15:​24-28) Dat go bi wɔndaful tɛm! *

3. Akɔdin to 1 Kɔrintians 15:​30-32, we Pɔl bin biliv se di wan dɛn we dɔn day go gɛt layf bak, wetin dat bin ɛp am fɔ du?

³ Bikɔs Pɔl bin biliv se di wan dɛn we dɔn day go gɛt layf bak, dat bin ɛp am fɔ bia di difrɛn prɔblɛm dɛn we bin de mit am. (Rid 1 Kɔrintians 15:​30-32.) I bin tɛl di Kristian dɛn na Kɔrint se: “Ɛvride day de kam mi we.” Pɔl bin rayt bak se: “A dɔn fɛt wit wayl animal dɛn na Ɛfisɔs.” Sɔntɛm i bin de tɔk bɔt di tɛm we i bin fɛt wit animal dɛn na wan stediɔm na Ɛfisɔs. (2 Kɔr. 1:​8; 4:​10; 11:​23) Ɔ sɔntɛm i bin de tɔk bɔt di bad we aw di Ju dɛn ɛn di ɔda pipul dɛn bin de trit am. Dɛn pipul dɛn de bin tan lɛk “wayl animal dɛn.” (Akt 19:​26-34; 1 Kɔr. 16:​9) Ilɛk wetin Pɔl bin de tɔk bɔt, wi no se i bin rili sɔfa. Bɔt i bin kɔntinyu fɔ biliv se tin go fayn fɔ am leta.—2 Kɔr. 4:​16-18.

4. Aw di op fɔ se di wan dɛn we dɔn day go gɛt layf bak dɔn ɛp Kristian dɛn tide? (Luk di pikchɔ na di frɔnt pej.)

⁴ Wi de na tɛm we bad bad tin dɛn de apin. Pipul dɛn we de kɔmit kraym kin du bad tin to sɔm pan wi brɔda ɛn sista dɛn. Ɔda wan dɛn de na say we dɛn de fɛt wɔ, ɛn dɛn nɔ sef atɔl. Insay sɔm kɔntri dɛn, wi brɔda ɛn sista dɛn nɔ gɛt fridɔm fɔ prich, bɔt dɛn de sav Jiova pan ɔl we dat go mek dɛn put dɛn na prizin ɔ ivin kil dɛn. Bɔt stil, ɔl dɛn wi brɔda ɛn sista dɛn ya de kɔntinyu fɔ sav Jiova ɛn dɛn de sɛt fayn ɛgzampul fɔ wi. Dɛn nɔ de fred bikɔs dɛn no se ilɛk dɛn day naw, Jiova gɛt sɔntin we bɛtɛ pas dis layf fa fawe, we i go gi dɛn tumara bambay.

5. Us rɔng we pipul dɛn de tink we go mek wi nɔ gɛt bɛtɛ fet igen pan di op fɔ se di wan dɛn we dɔn day go gɛt layf bak?

⁵ Pɔl bin wɔn in brɔda dɛn nɔ fɔ tink di rɔng we aw sɔm pipul dɛn bin de tink. Dɛn pipul dɛn de bin de se: “If di wan dɛn we dɔn day nɔ go gɛt layf igen, lɛ wi it ɛn drink, bikɔs tumara wi go day.” Sɔm pipul dɛn bin de tink da we de ivin bifo Pɔl in tɛm. I go bi se Pɔl bin de kot Ayzaya 22:​13, we tɔk bɔt di we aw di Izrɛlayt dɛn bin de biev. Dɛn nɔ bin de tray fɔ kam nia Gɔd, bɔt dɛn bin bisin mɔ bɔt ɛnjɔymɛnt biznɛs. Da we de aw di Izrɛlayt dɛn bin de biev sho se dɛn bin jɔs de tɛl dɛnsɛf se, “lɛ wi ɛnjɔy naw, tumara wi go day.” Na da sem we de pipul dɛn de tink tide bak. Bɔt di Baybul tɛl wi bɔt di bad tin we bin apin to di Izrɛlayt dɛn bikɔs ɔf da bad we de aw dɛn bin de biev.—2 Kro. 36:​15-20.

6. Aw di op fɔ se di wan dɛn we dɔn day go gɛt layf bak fɔ afɛkt udat dɛn wi de pik as padi?

⁶ Wi no se Jiova go gi layf bak to di wan dɛn we dɔn day, so dat fɔ afɛkt udat dɛn wi de pik as padi. Di brɔda ɛn sista dɛn na Kɔrint bin nid fɔ tek tɛm lɛ dɛn nɔ mek padi wit pipul dɛn we nɔ biliv se di wan dɛn we dɔn day go gɛt layf bak. Sɔntin de we wi kin lan frɔm dis: If wi de spɛn bɔku tɛm wit padi dɛn we jɔs de ɛnjɔy dɛnsɛf ɛn dɛn nɔ bisin bɔt wetin go apin to dɛn tumara bambay, dat go afɛkt wi bad we. If tru Kristian de spɛn bɔku tɛm wit dɛn kayn pipul dɛn de, dat go mek i nɔ kɔntinyu fɔ gɛt in gud abit dɛn. Infakt, dɛn kayn pipul dɛn de go ivin mek i du tin dɛn we Gɔd et. Na dat mek  Pɔl bin se: “Una soba ɛn du wetin rayt, ɛn una nɔ fɔ de sin.”—1 Kɔr. 15:​33, 34.

7. Akɔdin to 1 Kɔrintians 15:​35-38, us kwɛstyɔn we sɔm pipul dɛn go dɔn aks bɔt di op fɔ se di wan dɛn we dɔn day go gɛt layf bak?

⁷ Rid 1 Kɔrintians 15:​35-38. Sɔntɛm pɔsin we go want fɔ mek ɔda pipul dɛn dawt if pipul dɛn go rili gɛt layf bak, go aks dis kwɛstyɔn we se: “Aw di wan dɛn we dɔn day go gɛt layf bak?” I go fayn fɔ lɛ wi tink bɔt Pɔl in ansa to dis kwɛstyɔn bikɔs bɔku pipul dɛn tide gɛt wetin dɛn biliv bɔt wetin de apin to pɔsin afta we i day. Bɔt wetin di Baybul de tich?

8. Us ɛgzampul go ɛp wi fɔ ɔndastand us bɔdi di wan dɛn we go gɛt layf bak fɔ go na ɛvin go gɛt?

⁸ We pɔsin day in bɔdi de rɔtin, bɔt di Wan we mek di wan ol wɔl go ebul fɔ gi da pɔsin de layf bak, ɛn i go ebul gi am di rayt bɔdi we i nid. (Jɛn. 1:​1; 2:​7) Pɔl bin yuz wan ɛgzampul fɔ sho se Gɔd nɔ go nid fɔ gi di pɔsin di sem bɔdi we i bin gɛt. Tink bɔt “sid.” We dɛn plant sid na grɔn, i kin stat fɔ gro ɛn leta i kin bi nyu plant. Dis nyu plant difrɛn frɔm di smɔl sid. Pɔl bin yuz dis ɛgzampul fɔ sho se di Wan we mek wi ebul fɔ “gi [wi] bɔdi jɔs lɛk aw i want.”

9. Wetin 1 Kɔrintians 15:​39-41 tɔk bɔt di difrɛn kayn bɔdi dɛn we de?

⁹ Rid 1 Kɔrintians 15:​39-41. Pɔl bin tɔk se ɔl di bɔdi dɛn we Gɔd mek nɔto di sem. Fɔ ɛgzampul, kaw, bɔd, ɛn fish dɛn ɔl gɛt difrɛn bɔdi. Pɔl bin tɔk se we wi luk ɔp di skay, wi de si se difrɛns de bitwin di san ɛn di mun. Ɛn i tɔk bak se “di we aw wan sta fayn difrɛn frɔm di we aw ɔda sta fayn.” Na tru tin Pɔl tɔk pan ɔl we wi nɔ de ebul si di difrɛns wit wi yon yay. Sayɛnsman dɛn se, difrɛn kayn sta dɛn de, sɔm big, sɔm smɔl, sɔm rɛd, sɔm wayt ɛn sɔm yɛlo lɛk di san. Pɔl bin tɔk bak se “ɔltin we de na ɛvin gɛt dɛn yon bɔdi ɛn ɔltin we de na di wɔl gɛt dɛn  yon bɔdi.” Wetin i min? Wɛl, wi bɔdi na flɛsh, bɔt ɔp ɛvin na spirit bɔdi dɛn gɛt, lɛk di wan we di ɛnjɛl dɛn gɛt.

10. Uskayn bɔdi we di wan dɛn we go gɛt layf bak fɔ go na ɛvin go gɛt?

¹⁰ Lɛ wi tɔk bɔt di ɔda tin we Pɔl tɔk. I bin se: “Na so i go bi wit di wan dɛn we go gɛt layf bak. Di bɔdi we de day de rɔtin, bɔt di bɔdi we go gɛt layf bak nɔ go rɔtin.” Wi no se we pɔsin day, in bɔdi de rɔtin ɛn i de go bak na di dɔti. (Jɛn. 3:​19) So wetin Pɔl min we i se “di bɔdi we go gɛt layf bak nɔ go rɔtin”? I nɔ bin de tɔk bɔt di pipul dɛn we bin gɛt layf bak na dis wɔl lɛk di wan dɛn we Ilayja, Ilaysha, ɛn Jizɔs bin gi layf bak. Bɔt i bin de tɔk bɔt pɔsin we go gɛt layf bak wit bɔdi we go ebul fɔ de na ɛvin, dat na “spirit bɔdi.”—1 Kɔr. 15:​42-44.

11-12. Aw Jizɔs bin chenj afta we i gɛt layf bak? Aw da sem kayn tin de go apin to di anɔyntɛd dɛn?

¹¹ We Jizɔs bin de na dis wɔl, i bin gɛt mɔtalman bɔdi, bɔt we i bin gɛt layf bak, i bin gɛt “spirit bɔdi” ɛn i go bak na ɛvin. Semweso, anɔyntɛd Kristian dɛn go gɛt layf bak wit spirit bɔdi. Pɔl bin ɛksplen se: “Jɔs lɛk aw wi tan lɛk di wan we Gɔd mek wit dɔti, na so bak wi go tan lɛk di wan we de na ɛvin.”—1 Kɔr. 15:​45-49.

¹² I impɔtant fɔ mɛmba se Jizɔs nɔ bin gɛt layf bak wit mɔtalman bɔdi. We Pɔl bin de rayt di las pat dɛn na 1 Kɔrintians chapta 15, i bin ɛksplen wetin mek Jizɔs nɔ gɛt layf bak wit mɔtalman bɔdi bay we i bin se: “Mɔtalman bɔdi ɛn blɔd nɔ go gɛt Gɔd in Kiŋdɔm” we de ɔp na ɛvin. (1 Kɔr. 15:​50) Di apɔsul dɛn ɛn di ɔda anɔyntɛd Kristian dɛn nɔ go gɛt layf bak fɔ go na ɛvin wit mɔtalman bɔdi ɛn blɔd we de rɔtin. Ustɛm dɛn go gɛt layf bak? Pɔl bin se na leta dɛn go gɛt layf bak, nɔto jɔs afta we dɛn day. Bay di tɛm we Pɔl bin de rayt 1 Kɔrintians, sɔm disaypul dɛn bin dɔn ɔlrɛdi “day,” fɔ ɛgzampul apɔsul Jems. (Akt 12:​1, 2)  Di ɔda apɔsul ɛn anɔyntɛd Kristian dɛn bin “day” leta.—1 Kɔr. 15:​6.

13. Wetin go apin insay di tɛm we Jizɔs go de wit wi?

¹³ Jizɔs ɛn Pɔl bin tɔk bɔt wan spɛshal tɛm we go kam, dat na di tɛm we Krays go de wit wi. Insay di tɛm we Krays go de wit wi, wɔ, atkwek, bad bad sik dɛn we de prɛd, ɛn ɔda bad tin dɛn go de apin ɔlsay na di wɔl. Wi dɔn si se dis Baybul prɔfɛsi bin dɔn stat fɔ apin frɔm 1914. Wan ɔda impɔtant tin go apin we go sho se Krays de wit wi. Jizɔs bin se dɛn go prich di gud nyuz bɔt Gɔd in Kiŋdɔm we de rul “na di wan ol wɔl so dat ɔl di neshɔn dɛn go gɛt chans fɔ yɛri, dɔn di ɛnd go kam.” (Mat. 24:​3, 7-14) Pɔl bin tɔk bak se na “insay di tɛm we di Masta go de wit wi” na in di anɔyntɛd Kristian dɛn we “bin dɔn day” go gɛt layf bak fɔ go de na ɛvin.—1 Tɛs. 4:​14-16; 1 Kɔr. 15:​23.

14. Wetin go apin to di anɔyntɛd Kristian dɛn we day insay di tɛm we Krays go de wit wi?

¹⁴ Di anɔyntɛd Kristian dɛn we kin day naw kin gɛt layf bak wantɛm wantɛm fɔ go de na ɛvin. Pɔl bin tɔk bɔt dis na 1 Kɔrintians 15:​51, 52. I bin se: “Nɔto wi ɔl go day, bɔt wi ɔl go chenj, wantɛm wantɛm, ivin bifo pɔsin wink in yay, di tɛm we dɛn de blo di las trɔmpɛt.” Dis tin we Pɔl tɔk de apin rayt naw. We Krays in brɔda dɛn go gɛt layf bak, dɛn go gladi pasmak bikɔs dɛn “go de wit di Masta ɔltɛm.”—1 Tɛs. 4:​17.

15. Us wok we di wan dɛn we gɛt fɔ chenj “ivin bifo pɔsin wink in yay” gɛt fɔ du?

¹⁵ Di Baybul tɛl wi bɔt di wok we di wan dɛn we gɛt fɔ chenj “ivin bifo pɔsin wink  in yay” gɛt fɔ go du na ɛvin. Jizɔs de tɛl dɛn se: “Di wan we win ɛn du di tin dɛn we a de du, te di ɛnd, a go mek i gɛt pawa oba di neshɔn dɛn, jɔs lɛk aw mi Papa dɔn mek a gɛt pawa. Ɛn i go bi shɛpad fɔ di pipul dɛn ɛn na rɔd we dɛn mek wit ayɛn go de na in an so dat dɛn go brok brok lɛk tin dɛn we dɛn mek wit kle.”(Rɛv. 2:​26, 27) Dɛn go fala Jizɔs we na dɛn Kɔmanda, ɛn dɛn go yuz rɔd we dɛn mek wit ayɛn fɔ shɛpad di neshɔn dɛn.—Rɛv. 19:​11-15.

16. Aw bɔku bɔku pipul dɛn go ebul fɔ win day?

¹⁶ Wi dɔn si klia wan se di anɔyntɛd Kristian dɛn gɛt fɔ win day. (1 Kɔr. 15:​54-57) Afta we dɛn go gɛt layf bak, dɛn go ɛp fɔ pul ɔl di bad tin dɛn we de apin na di wɔl insay di wɔ we na Amagɛdɔn. Bɔku ɔda Kristian man ɛn uman dɛn go “kɔmɔt pan di big big trɔbul,” ɛn dɛn go go insay di nyu wɔl. (Rɛv. 7:​14) Dɛn pipul dɛn ya we go de na di wɔl go si wan ɔda we aw Gɔd go mek wi win day, dat na we i go gi layf bak to bɔku bɔku pipul dɛn we bin dɔn day. Jɔs imajin aw wi go gladi we da wɔndaful tin de go apin! (Akt 24:​15) Ɛn ɔl di wan dɛn we go kɔntinyu fɔ de biɛn Jiova wit ɔl dɛn at go ebul fɔ win di day we Adam mek wi de day. Dɛn go ebul fɔ liv sote go.

17. Wetin 1 Kɔrintians 15:​58 de ɛnkɔrej wi fɔ du naw?

¹⁷ Ɔl di Kristian dɛn we de alayv naw fɔ gladi fɔ we Pɔl rayt fayn tin to di Kristian dɛn na Kɔrint bɔt di op fɔ gɛt layf bak. Wi gɛt gud rizin dɛn fɔ fala Pɔl in advays we se wi fɔ du ɔl wetin wi ebul fɔ “wok fɔ di Masta.” (Rid 1 Kɔrintians 15:​58.) If wi kɔntinyu fɔ du wi bɛst fɔ di Masta, wi kin abop se wi go gɛt gladi-at tumara bambay. Wi nɔ go ebul fɔ imajin aw layf go wɔndaful da tɛm de. Bɔt wi go ebul fɔ si se di wok we wi du fɔ di Masta nɔto fɔ natin.