1-2. Morwasinke Vakriste nava lirongera kuhamena evhumbuko lyemeguru?

SINZI sovakareli vaJehova kwa kara nehuguvaro lyokukaparukira pevhu. Nye wovasesu tupu ava ga gwaveka Jehova yiwo va kara nehuguvaro lyemeguru. Vagwavekwa va hara kudiva omu eparu lyawo lyemeguru ngali ka kara, nye ngapi kuhamena ava ngava ka parukira pevhu? Ngomu natu ka yi lironga, evhumbuko lyemeguru ngali ka retera mauwa navenye ava va kara nehuguvaro lyokukaparukira pevhu. Yipo nye, yi kare asi twa kara nehuguvaro lyokukaparukira meguru ndi pevhu, twa hepa kulironga kuhamena evhumbuko lyemeguru.

² Karunga kwa tanterere varongwa vamwe vaJesus mosiruwo sovapositoli va tjange kuhamena evhumbuko lyemeguru. Mupositoli Johanesa kwa tjenge asi: “Ntaantani ose tu vana vaKarunga, nye simpe kapi va yi tu horwera asi ngapi omu ngatu ka fana. Nye twa diva asi, apa nga horoka Jesus Kristusa, ngatu ka lifana nendi.” (1 Joh. 3:2) Yipo nye, Vakriste wovagwavekwa kapi va diva omu ngava ka fana apa ngava va vhumbwira keparu lyemeguru nomarutu gopampepo. Nye awo ngava ka mona Jehova apa ngava ka gwana mfeto zawo. Bibeli kapi za gava mauzera nagenye kuhamena evhumbuko lyemeguru, nye mupositoli Paurusa ga gava ko mauzera gamwe. Vagwavekwa ngava kara kumwe naJesus apa “nga hanagura po epangero nerero lyoMudona nononkondo nadinye donompepo donondona.” Kukwatera mo “nkore zokuhulilira, nomfa.” Konyima  zoyo, Jesus ntani nava nga ka pangera nendi ngava ka gava epangero kwaJehova. (1 Kol. 15:24-28) Aso ngasi kara siruwo soruhafo! *

3. Ngomu va yi tumbura mo-1 Vakolinte 15:30-32, yisinke Paurusa ya mu tumangedere a rugane morwa kupura mevhumbuko?

³ Paurusa kwa pulire mevhumbuko, ano eyi ya mu vaterere a lididimikire maudigu. (Resa 1 Vakolinte 15:30-32.) Paurusa kwa tanterere Vakolinte asi: “Nkenye ezuva sili mosimpagwa sonomfa na kara.” Ntani ga tjenge hena asi: “Ame kwa rwana noyikasama yovantu moEfeso.” (2 Kol. 1:8; 4:10; 11:23) Nampo “noyikasama yovantu” kwa tembe koVajuda ntani navamwe ava ngava mu rwanesa. (Yirug. 19:26-34; 1 Kol. 16:9) Paurusa kwa ligwanekerere nomarwaneso gomanzi. Nye ga kere nehuguvaro asi komeho nga ka kara neparu lyoruhafo.—2 Kol. 4:16-18.

4. Ngapi ehuguvaro lyevhumbuko ali nkondopeke Vakriste naina? (Tara efano lyopontunda.)

⁴ Ose kuna kuparuka poyiruwo yoyidigu. Vanavazinyetu vamwe kwa ligwanekera noukorokotji. Vamwe kwa tunga monomukunda omu mwa kara yita ntani awo kulizuvha asi eparu lyawo mosiponga lina kara. Ano vamwe kukarera Jehova monomukunda omu va silika sirugana setu sokuzuvhisa, yipo nye awo kutura eparu lyawo mosiponga mokutwikira kukarera Jehova. Vanavazinyetu ava ava twikire kukarera Jehova, awo sihonena sosiwa kwetu. Awo va yi pura asi nampili va zumbanese eparu lyawo ngesi, Jehova ga va tumbwidira mokukavapa eparu lyewa.

5. Egano musinke lyepuko nali sesupika epuro lyetu mevhumbuko?

⁵ Paurusa kwa rondwere vapuli vakwawo kuhamena egano eli va kara nalyo vamwe asi: “Ano vafe nsene kapi ngava va pindura, sa vyuka sa sisewe esi asi, ‘Tu lyeni oku tatu nu! Mungura tatu fu.’” Egano olyo yiko lya kere komeho zomazuva gaPaurusa. Age nampo kwa temwinine Jesaya 22:13, ezi za tembe konkareso zoVaisraeli. Mevango lyokunkondopeka elikwatakano lyawo naJehova, awo kwa demenenene mokulihafesa vene. Awo ngava uyunga asi ‘tu hafereni eparu ngesi morwa mungura tatu fu,’ egano lyangoso yilyo vana kara nalyo vantu naina. Nkareso zangesi yizo za ninkisire muhoko goVaisraeli gu ligwanekere noyitundwamo yoyidona.—2 Hist. 36:15-20.

6. Ngapi ehuguvaro eli twa kara nalyo mevhumbuko nali tu vatera tu horowore vakaume?

⁶ Mokumona asi Jehova nga ka vhumbura vafe, eyi kundama omu atu horowora vakaume. Vanavazinyetu womoKolinte va hepere kunyokera po kutulisa po ukaume novantu ava va dilire kupura mevhumbuko. Nose kuvhura tu lirongere ko kwawo. Nsene tu kara nkenye apa novantu ava va kara nonkareso ezi asi tu lyeni oku tatu nu mungura tatu fu, ngayi tu kundama momudona. Morwa ngayi zonagwisa po nkareso zetu zongwa. Ntani kuvhura hena ngayi tu ninkise tu tameke kurugana yininke eyi ga nyenga Jehova. Eyi yiyo Paurusa ga tu rondwera asi: “Kareni monondunge donongwa, walye omu zono.”—1 Kol. 15:33, 34.

7. Kuliza no-1 Vakolinte 15:35-38, epuro musinke vamwe va lipura?

⁷ Resa 1 Vakolinte 15:35-38. Muntu  ogu ga hara kuninkisa wopeke va kare nomasinganyeko kuhamena evhumbuko kuvhura a pure asi: “Vafe ngapi omu ngava va pindura?” Ayo ya wapa kugazadara ko kelimbururo lyaPaurusa, morwa sinzi sovantu naina va kara nomagano gokulisiga kuhamena eyi ayi horoka konyima zonomfa. Nye yisinke azi rongo Bibeli?

8. Sifanekeso musinke nasi tu vatera tu kwate egano kuhamena evhumbuko lyemeguru?

⁸ Apa a fu muntu, rutu kuwora. Nye ogu ga sita uzuni kuvhura kupindura muntu ogo, nokumupa rutu roruwaawa. (Gen. 1:1; 2:7) Paurusa kwa ruganesere sifanekeso pokulikida asi Jehova kapi nga pindura vantu nomarutu gokuzonauka. Gazara kuhamena “mbuto.” Mbuto apa ava zi kunu mevhu, azo kukura tazi ya kara simeno sosiwaawa. Simeno oso kulisiga nombuto ezi ava kunu. Paurusa kwa ruganesere sifanekeso oso mokulikida asi Musiti gwetu kuvhura ‘kugava rutu moomu ana ru harere.’

9. Kuhamena marutu, yisinke azi uyunga ko Vakolinte wokuhova 15:39-41?

⁹ Resa 1 Vakolinte 15:39-41. Paurusa kwa tente asi marutu kapi ga lifana. Pasihonena, marutu gopanyama ga lisiga, pwa kara gonongombe, goyidira ntani gonomfi. Age kwa tente hena asi epaimo lyokwedi lya lisiga neli lyezuva. Ntani age kwa uyungire asi “nombungururu dene nadene hena da lisiga mepaimo.” Nampili tu dire kudimona nomeho getu, nye vadivi unsitwe kwa uyunga asi nombungururu dimwe nonene dimwe nonunu, ano dimwe nongeha, dimwe nonzera, dimwe uhenga ngwendi ezuva. Paurusa ga uyungire hena asi “pwa kara marutu gemeguru naga gepevhu.” Yisinke ga tembe? Pevhu kwa kara po marutu gopanyama, nye meguru kwa kara mo marutu gopampepo, ngwendi govaengeli.

10. Marutu musinke ngava kara nago ava ngava vhumbwira keparu lyemeguru?

 ¹⁰ Koneka eyi Paurusa ga kwamesere ko: “Pevhumbuko lyovafe yimo ngapa kara ngesi: kukuna yeyi ayi zonauka, ngayi ka vhumbuka yokudira kuzonauka.” Twa yi diva asi apa a fu muntu rutu kuwora ntani kutengura kombundu zevhu. (Gen. 3:19) Ngapi omu rutu ngava ru “vhumbura rokudira kuzonauka”? Paurusa kapi ga tembe kovantu ava va vhumbwilire keparu lyepevhu, ngwendi ava ga vhumbwire Eliya, naElisa ntani Jesus. Paurusa kwa tembe komuntu ogu ngava vhumbwira keparu lyemeguru ‘norutu ropampepo.’—1 Kol. 15:42-44.

11-12. Rutu musinke va mu vhumbwire naro Jesus, ntani rutu musinke ngava va vhumbura naro vagwavekwa?

¹¹ Apa Jesus ga kere pevhu age kwa kere norutu ropanyama, nye apa va mu vhumbwire kwa kere “Mpepo ezi azi gava mwenyo” ntani kwa tengwire meguru. Vakriste wovagwavekwa nawo ngava va vhumbura nomarutu gopampepo. Paurusa kwa fatwilire asi: “Moomu twa lifana nogu ga tunda mevhu, yimo hena ngorooro ngatu ka lifana nogu ga tunda meguru.”—1 Kol. 15:45-49.

¹² Paurusa ga fatwilire yininke yomulyo kuhamena evhumbuko. Ayo ya kara nomulyo tu dive asi Jesus kapi va mu vhumbwire norutu ropanyama. Paurusa kwa uyungire asi: “Rutu rwepevhu nokuvhura si kupinga Untungi waKarunga” meguru. (1 Kol. 15:50) Vapositoli ntani novagwavekwa vakwawo kapi ngava va vhumbura nomarutu gopanyama aga aga zonauka. Siruwoke ngava va vhumbura? Paurusa kwa yi nkondopekere asi kapisi konyima tupu zonomfa dawo, nye va hepere kundindira. Siruwo esi ga tjenge Paurusa Vakolinte wokuhova, varongwa vamwe awo “va fa” nare, pasihonena ngwendi mupositoli Jakopo. (Yirug. 12:1, 2) Vapositoli  vakwawo ntani vagwavekwa vamwe ‘kwa ya fire’ konyima.—1 Kol. 15:6.

13. Yisinke ngayi horoka pekaropo lyaJesus?

¹³ Paurusa naJesus navenye kwa uyungire kuhamena ekaropo lyaKristusa. Yita, ekankamo lyevhu, mauvera ntani noyininke yoyidona eyi ya kuhoroka mouzuni kuna kara sidiviso sekaropo lyaJesus. Kutundilira mo-1914, ose twa limonena omu uporofete ou womoBibeli una kusika mo. Nye, koruli hena ruha rumwe romulyo rosidiviso. Jesus kwa tente asi mbudi zongwa zoUhompa waKarunga “ngava zi divisa mwa za uzuni mudima, zi kare umbangi wonomuhoko nadinye, ntani nye ngaku kwama uhura.” (Mat. 24:3, 7-14) Paurusa kwa uyungire asi ‘ezuva eli nga wiza ndi pekaropo lyaHompa’ yipo Vakriste wovagwavekwa ‘ava va fa’ ngava va vhumbwira keparu lyemeguru.—1 Tes. 4:14-16; 1 Kol. 15:23.

14. Yisinke ayi horokere vagwavekwa ava ava fu posiruwo esi sekaropo lyaKristusa?

¹⁴ Vagwavekwa ava ava fu ngesi kuvapindwira keparu lyemeguru konyima tupu zokufa. Paurusa kwa kwatesere ko egano eli apa ga uyungire nonkango domo-1 Vakolinte 15:51, 52 asi: “Ngatu fa, nye natuvenye ngava tu situnukisa, mokaruwogona tupu ngapa katu popi, apa ngaru hagara rumbendo rwEpanguro lyokuhulilira.” Nonkango edi kuna kusikilira mo ngesi! Apa ava va vhumbura awo kukara noruhafo rorunene morwa awo ‘ngava kara narunye naHompa,’ Jesus.—1 Tes. 4:17.

15. Sirugana musinke sina kundindira ava ngava “situnukisa ngapa katu popi”?

¹⁵ Bibeli kututantera eyi ngava ka rugana meguru ava ngava “situnukisa ngapa katu popi.” Jesus ngava tantera asi: “Ogu  ana kufunda, nye a kare moyirugana eyi na panga dogoro nokouhura, ngani mu pa nonkondo dokupangera nomuhoko. Moomu na kara ame nononkondo edi ga pa nge Tate, nage yimo nga va lisa nomburo zosivera, oku ta va taura moomu ava taura yipako.” (Ehor. 2:26, 27) Awo ngava kwama Mupitisili gwawo mokusikisa mo sirugana oso sokupangura nomuhoko nomburo zosivera.—Ehor. 19:11-15.

16. Ngapi omu vantu wovanzi ngava funda nomfa?

¹⁶ Yosili, vagwavekwa ngava funda nomfa. (1 Cor. 15:54-57) Konyima zevhumbuko lyawo, awo ngava gwana mpito zokukagusa po maudona pevhu poyita yaHarumagedoni. Vakriste wovanzi wovagara novakadi ngava “tunda momahepeko gomanene” ntani ngava ka paruka mouzuni woupe. (Ehor. 7:14) Ava ngava ka parukira pevhu ngava limonena omu nomfa ngava di funda po, apa ngava vhumbura mabiliyona govantu ava va fa. Gazara tupu ruhafo oru ngatu kara naro apa ngayi horoka oyo! (Yirug. 24:15) Ava ava twikire kulimburukwa Jehova ngava ka funda nomfa edi va pinga kwaAdamu. Awo ngava ka paruka narunye nanarunye.

17. Kuliza no-1 Vakolinte 15:58, yisinke twa hepa kurugana ngesi?

¹⁷ Nkenye Mukriste ogu a kuparuka ngesi kuvhura kumuhengagwida nonkango edi Paurusa ga tjangerere Vakolinte kuhamena evhumbuko. Ose twa kara nokonda zongwa zokulimburukwa epukururo eli ga tjenge Paurusa lyokukara nkenye apa nomupampi “moyirugana yaHompa.” (Resa 1 Vakolinte 15:58.) Nsene tu kara noulimburukwi ntani noupampi mosirugana oso, ose ngatu demenena keparu lyoruhafo eli lina tu kara komeho. Eparu olyo ngali kara lyewa po kupitakana nkenye eyi. Ayo ngayi likida asi yirugana yetu twa ruganena Hompa kapisi yomawoko-woko.