1-2. Ino nceebonshi Beneklistu boonse balyeelete kwiiya pamakani akubushikwa kwa baabo beshi bakaye kwiculu?

BANTU baanji batosebensela Yehova pacecino ciindi balalangila kuba abuumi butamaani pacishi capanshi. Ano Beneklistu baniini Yehova mbaakananika, batolangila kuba abuumi bwakwiculu. Beneklistu bananikitwe aba balisunishishi kushiba buumi bwabo mbweshi bukabe kunembo. Ano ino mbuyani abo batolangila kuba abuumi pacishi capanshi? Kweelana ambweshi twiiye, kubushikwa kwa baabo beshi bakaye kwiculu kulaakuleta shoolwe kubaabo batolangila kuba abuumi butamaani pacishi capanshi. Aboobo inga caba ayi tutolangila kuba abuumi kwiculu na pacishi capanshi, soonse tulyeelete kuba alusuno lwakwiiya pamakani akubushikwa kwa baabo beshi bakaye kwiculu.

² Lesa wakatanjilila bashikwiiya bakwe Yesu bamwi bamuciindi ca batumwi kulemba pamakani akulangila kuya kwiculu. Mutumwi Joni wakaamba ayi: “Bulya tuli bana bakwe Lesa, sombi tacishibikitwe mbweshi tukabe. Sombi tulishi kwaamba ayi na akaboneke tulaakuba bweenka mbuli nguwe.” (1 Joni 3:2) Aboobo Beneklistu bananikitwe tabacishiwo mbweshi bakabe na bakabushikwe kuya kwiculu. Nacibi boobo, balaakumubona Yehova na bakatambule cilambu cabo. Baibo tayaambi makani oonse akubushikwa kwa baabo beshi bakaye kwiculu, sombi mutumwi Paulo wakaambawo makani amwi. Bananikitwe balaakuba pomwi a Klistu kwiculu ndyeshi akanyonyoole mfulumeende shoonse abweendeleshi  boonse alimwi ankusu shoonse, kwiilikaawo a “mulwani wakweelaako kukomwa, lufu.” Mukweelaako, Yesu—pomwi abeendeleshinyina balaakushiya shintu shoonse mumaansaakwe Yehova. (1 Koli. 15:24-28) Ici cilaakuba ciindi cisangalasha abuumbi! *

3. Kweelana a 1 Bene Kolinto 15:30-32, ino kulangila kubuka kwa bafu kwakacafwa Paulo kucita nshi?

³ Paulo wakacikonsha kuliyumya mumapensho apusenepusene ceebo cakulangila kubuka kwa bafu. (Amubelenge 1 Bene Kolinto 15:30-32.) Wakalwiita Bene Kolinto ayi: “Bushiku abushiku ndakalinga kulangana alufu.” Alimwi wakeelikawo akwaamba ayi: “Ndakalwana ashinyama sha muluundu ku Efeso.” Mpashi wakalinga kwaamba ayi wakalwana ashinyama shiine mulubaansa lwa shisekano ku Efeso. (2 Koli. 1:8; 4:10; 11:23) Na mpashi wakalinga kwaamba pa ba Juda bamwi bakalinga kumupensha abuumbi anga “nshinyama sha muluundu.” (Milimo 19:26-34; 1 Koli. 16:9) Muli moonse mweenga cabeta, Paulo wakeenda mumapensho anene. Sombi wakatolelela kulangila ayi shintu shilaakuba kabotu kunembo.—2 Koli. 4:16-18.

4. Ino kulangila kubuka kwa bafu kwa bayuminisha buyani Beneklistu bamwi? (Amubone cikope cili pa peeji yakutaanguna.)

⁴ Tutokala mushiindi shiloondesha. Bamakwesu bamwi batopenshekwa. Bamwi mushishi mobekala muli nkondo cakwaamba ayi tabalinyumfwi kushitilishikwa. Mushishi shimwi, basebenshi bakwe Yehova tabacite lwaanguluko lwakushimikila sombi balatolelela kumusebensela nabi kwaamba ayi kucita boobo inga kwapa kwaamba ayi baangwe nabi kucaikwa. Nacibi boobo, bamakwesu abenankashi aba batolelela kulambila Yehova, akutondesha cakubonenaako cibotu kuli ndiswe. Tabaloondi mukwiinga balishi kwaamba ayi nabi bacaikwe pacecino ciindi, Yehova wabashomesha kubapa cintu cimwi cibotu kunembo.

5. Ino nkuyeeya kutabete kabotu kwa buyani kweenga kwanyonyoola lushomo lwesu mukubuka kwa bafu?

⁵ Paulo wakacenjesha bashominyina kuleya muyeeyo utabete kabotu wakalinga kucite bamwi ayi: “Sombi na taaku kubuka kwa bafu, ‘atulye akunwa ceebo ciilo mabala tulaakufwa.’” Kwakalinga bantu bakalinga kuyeeya munshila iyi nabi Paulo kaatana kubaako. Mpashi wakalinga kwaamba maswi ngotucana pa Isaya 22:13, aamba bene Isilaeli mbobakalinga kuyeeya. Muciindi cakuyumya bushicibusa bwabo a Lesa, bakabikila maano kukucita shakulikondelesha. Bene Isilaeli bakalinga kuyeeya bweenka mbuli bantu mbobayeeya munshiku shino ayi balyeelete kusangalala mubuumi pacecino ciindi mukwiinga inga bwamana paciindi cili coonse. Nacibi boobo, Baibo ilatondesha mapensho akacana bene Isilaeli ceebo cakukonkela kuyeeya kutabete kabotu.—2 Maka. 36:15-20.

6. Ino kulangila kubuka kwa bafu kulyeelete kutucafwa kusala beshicibusa bali buyani?

⁶ Kushiba kwaamba ayi ncakwiila Yehova alaakubusha bafu kulyeelete kutucafwa kusala kabotu beshicibusa. Bamakwesu baku Kolinto bakalinga kweelete kuleya kuba bushicibusa a bantu batakalinga kushoma mukubuka kwa bafu. Ciiyo pacecino ciindi ncakwaamba ayi: Tamuswiiwo shibotu na lyoonse katucanika abantu batabikili maano kubuumi bwakunembo, sombi basunibo kusekana akulikondelesha. Mukwiinga kucanika abantu ba mushobo uyu inga kwaalula Mwineklistu mbwabona shintu alimwi amibo yakwe. Alimwi ici inga capa kwaamba ayi atalike kucita  shintu Lesa nshaapatite. Ici ncecakapa Paulo kubayuminisha cankusu ayi: “Amutalike kusebensesha maano mbuli mbwaaelete alimwi amucileeke kubisha.”—1 Koli. 15:33, 34.

7. Kweelana a 1 Bene Kolinto 15:35-38, ino ngumwiipusho nshi bamwi ngweenga beepusha pamakani a kubuka kwa bafu?

⁷ Amubelenge 1 Bene Kolinto 15:35-38. Muntu usuni kwaamba ayi bantu banootonsha makani a kubuka kwa bafu mpashi inga weepusha ayi: “Ino bafu balaakubuka buyani?” Inga cabota na twayeeya pamakani Paulo ngakaamba mukwiinga bantu baanji munshiku shino balashoma shipusenepusene pashicitika na muntu wafwa. Ano ino Baibo ilaiisha nshi?

8. Ino ncikoshanyo nshi ceenga catucafwa kunyumfwishisha shicitika kubaabo babushikwa akuya kwiculu?

⁸ Na muntu wafwa, mubili wakwe ulabola. Nacibi boobo, uyo wakalenga bubumbo boonse inga wacikonsha kumubusha akumupa mubili weelete. (Mata. 1:1; 2:7) Paulo wakaamba cikoshanyo citondesha kwaamba ayi Lesa teshi akabushe muntu amubili ngwakafwaawo. Amuyeeye pa “luseke,” na “imbuto.” Na mwashanga mbuto mubulongo ilatalika kumena akuba cishango cipya. Imbuto na yamena ilaba cishango cipya cipusene a imbuto mboyakalinga kuboneka ndyemwakaishanga. Paulo wakaamba cikoshanyo ici kutondesha kwaamba ayi Mulengi wesu inga wapa muntu “mubili kweelana akuyanda kwakwe.”

9. Ino lilembo lya 1 Bene Kolinto 15:39-41 lilaamba nshi pa mibili ipusenepusene?

⁹ Amubelenge 1 Bene Kolinto 15:39-41. Paulo wakalinga kucishi kwaamba ayi Lesa wakalenga shintu shipusenepusene. Kucakubonenaako, mibili ya ŋombe, tuyuni, alimwi answi ilipusene. Alimwi wakaamba ayi mwiculu amwalo tulabona bupusano buli pakati ka lisuba alimwi amweenshi. Alimwi wakabona ayi “nyenyeenshi ashalo shilicite bulemu bupusenepusene.” Nabi kwaamba ayi bupusano  ubu inga tatububooni ameenso, beshisayansi balaamba ayi kuli nyenyeenshi shinene, shiniini niini, shisalala, shituba, alimwi ashimwi shiboneka yelo mbuli lisuba. Paulo wakeelikawo akwaamba ayi kuli “mibili yakwiculu alimwi amibili yapacishi.” Ino wakalinga kusansulula nshi? Pacishi capanshi tulicite mibili yabuntu, ano kwiculu kuli mibili yamushimu, bweenka mbuli icite baanjelo.

10. Ino abo beshi bakabushikwe akuya kwiculu balaakuba amubili wa buyani?

¹⁰ Amubone shakaboolawo Paulo nshaakaamba ayi: ‘Ubu mbocibete akubuka kwa bafu. Mubili ngotubika mucuumbwe ulabola; ano na wabushikwa ulaba mubili utabooli.’ Ncakwiila kwaamba ayi na muntu wafwa mubili wakwe ulabola akuboolela kubulongo. (Mata. 3:19) Aboobo ino inga wabushikwa buyani amubili “utabooli”? Paulo taakalinga kwaamba kubushikwa kwa bantu beshi bakekale pacishi capanshi bweenka mbuli balya bakabushikwa kuli Elija, Elisha, alimwi a Yesu. Sombi wakalinga kwaamba pabaabo babushikwa amubili wakwiculu.—1 Koli. 15:42-44.

11-12. Ino nshiinshi shakaaluka kuli Yesu ndyaakabushikwa, alimwi ino nshiinshi shaaluka kubananikitwe na babushikwa?

¹¹ Yesu ndyaakalinga pacishi capanshi, wakalinga kucite mubili wa buntu, ano ndyaakabushikwa wakaba “mushimu upa buumi” akuboolela kwiculu. Aboobo Beneklistu bananikitwe abalo balaakubushikwa amubili wamushimu. Paulo wakaamba ayi: “Ono bweenka mbotwakakosha wooyo wakaswa kubulongo, mbweshi tukakoshe wooyo wakaswa kwiculu.”—1 Koli. 15:45-49.

¹² Ncintu ciyandika kushiba kwaamba ayi Yesu taakwe kubushikwa amubili wa buntu. Paulo ndyaakalinga kumamanino amubandi wakubushikwa kwa bafu, wakasansulula cakapa kwaamba ayi Yesu abushikwe amubili wamushimu, wakaamba ayi: “Muntu ucite mubili wa buntu taakoonshi kunjila mu Bwaami bwakwe Lesa” kwiculu. (1 Koli. 15:50) Batumwi alimwi abananikitwe bamwi tabakalinga  kusa mukubushikwa akuya kwiculu amibili ya buntu. Ino ndilili ndyeshi bakabushikwe? Paulo wakatondesha ayi kubushikwa uko kwakalinga kunembo, tabakalinga kusa mukubushikwa pesule lyakufwabo. Paciindi Paulo ndyaakalinga kulemba libuku lya 1 Bene Kolinto, bashikwiiya bakwe Yesu bamwi mbuli mutumwi Jemusi kabali “boona kale mulufu.” (Milimo 12:1, 2) Alimwi mukuya kwaciindi batumwi alimwi a bananikitwe bamwi abalo “bakafwa.”—1 Koli. 15:6.

13. Ino nshiinshi shakalinga kusa mukuba shitondesho sha ‘kubaako kwakwe Yesu’?

¹³ Yesu alimwi a Paulo bakaamba sha ciindi ciyandika cakalinga kusa kunembo, nkokwaamba ayi kubaako kwakwe Klistu. Paciindi ico kulaakuba nkondo, shitentaanshi, malwashi alimwi a shintu shimwi shibiibi sheshi shikanoocitika pacishi. Twaboona kukumanishikwa kwa bushinshimi ubu kuswabo mu 1914. Kuli acimwi ceshi cikabe citondesho ciyandika cakubaako kwakwe Klistu. Yesu wakaamba ayi makani abotu a Bwaami alaakushimikilwa ‘mucishi coonse kwaamba ayi akabe mbobukamboni kushishi shoonse, lyalo mamanino alaakushika.’ (Mate. 24:3, 7-14) Paulo wakaamba ayi “kuciindi cakubaako kwa Mwaami,” Beneklistu bananikitwe ‘bakoona mulufu’ balaakubushikwa akuya kwiculu.—1 Tesa. 4:14-16; 1 Koli. 15:23.

14. Ino nshiinshi shicitika ku Beneklistu bananikitwe bafwa muciindi cakubaako kwakwe Klistu?

¹⁴ Beneklistu bananikitwe bafwa munshiku shino balabushikwa akuya kwiculu peenkapo. Aya ngomakani Paulo ngakashinisha pa 1 Bene Kolinto 15:51, 52 paamba ayi: “Swebo soonse teshi tukafwe, sombi soonse tulaakusandulwa muciindi ciniinibo ceelenebo akukapula  kwa liinso, pakulila lupeenga lwakweelaako.” Cino nceciindi maswi akaamba Paulo ndyaatookumanishikwa! Bamakwabo Klistu aba na babushikwa, balasangalala abuumbi; “aboobo balaakunokala a Mwaami lyoonse.”—1 Tesa. 4:17, NWT.

15. Ino abo beshibakasandulwe “muciindi ciniinibo ceelenebo akukapula kwa liinso” balaakunoosebensa ncito nshi?

¹⁵ Baibo ilatulwiita ncito abo beshibakasandulwe “muciindi ciniinibo ceelenebo akukapula kwa liinso” njeshi bakasebense kwiculu. Yesu wakabalwiita ayi: “Uyo eshi akakome akutolelela kukonkela kuyanda kwangu kushikila kumamanino, ndaakumupa nkusu shakweendelesha mishobo yoonse ya bantu, alimwi alaakunoobembela ankooli ya ceela alimwi akubanyonyoola anga ninongo yapwaika, bweenka andime mbondakatambula kuswa kuli ba Ta.” (Ciyu. 2:26, 27) Balaakusebensela pomwi a Yesu incito yakweembela bantu ankooli yaceela.—Ciyu. 19:11-15.

16. Ino lufu lulaakukomwa buyani?

¹⁶ Ncakutatoonsha kwaamba ayi bananikitwe balakukoma lufu. (1 Koli. 15:54-57) Kubushikwa kwabo kulaakupa kwaamba ayi bakaabanemo lubasu muncito yakukushawo shibiibi shoonse pacishi capanshi ciindi ca Amagedoni. Beneklistu bamwi baanji abuumbi basankwa abanakashi ‘balaakupula mumapensho anene’ akupuluka kunjila mucishi cipya. (Ciyu. 7:14) Abo beshibakapuluke balaakubona lufu mbweshi lukakomwe pacishi capanshi ciindi bantu baanji abuumbi bakafwa ndyeshi bakabushikwe. Ano amuyeeyebo mbweshi tukasangalale paciindi cakucitika cibotu abuumbi ici ndyeshi cikanoocitika! (Milimo 24:15) Alimwi abo boonse batolelela kushomeka kuli Yehova balaakukoma lufu ndotwakapyana kuswa kuli Adamu. Balaakukala kwamuyayaya.

17. Ino 1 Bene Kolinto 15:58 ilatuyuminisha kucita nshi?

¹⁷ Makani Paulo ngakaamba pakubushikwa kwa bafu munkalata njaakalembela bene Kolinto alayuminisha Beneklistu boonse munshiku shino. Tulicite sheebo shiinji sheelete kutupa kukonkela Paulo nshaakayuminisha ayi munosebensa cankusu “muncito ya Mwaami.” (Amubelenge 1 Bene Kolinto 15:58.) Na lyoonse katusebensa cakushomeka alimwi cankusu muncito iyi, inga twalangila kusangalala abuumi bubotu kunembo. Buumi kunembo bulaakubota abuumbi kwiinda ambweenga twabuyeeyela. Alimwi cilaakutondesha patuba kwaamba ayi tatukwe kusebensela Mwaami kwakubula mpindu.