1-2. Aˬ htoꞈ ma te Hkriꞈ yaˇ teˇ gʼaˇ le le lehˬ, kʼawꞈ teꞈ tu la leh mvuhˇ naw ma hkʼoˆ taˆ˗e tuˬ ve htaꞈ a yeˇ yuˬ ve le?

 Chi beuꞈ teˇ co˗e Yaˬhoˉvaˬ ve kanˉ te ve chaw maˇ˗awˍ ve lehˬ, miˬ guiˬ hkʼoˆ lo co co taiˍ taiˍ chehˇ tuˬ dawˇ law taˍ ve yoˬ. Yaꞈ hkʼaˇ, Yaˬhoˉvaˬ leuˆ yuˬ taˍ ve Hkriꞈ yaˇ awˬ moˍ ehˉ lehˬ, yawˇ hui kʼawꞈ teꞈ tu la leh mvuhˇ naw ma hkʼoˆ taˆ˗e tuˬ dawˇ law taˍ ve yoˬ. Leuˆ yuˬ taˍ ve chi teˇ moˍ awˬ gʼuˇ suhˍ hpawˇ yawˇ hui ve a shaꞈ hkʼaˬ hkʼe hpehꞈ ve shiˍ gaˇ ve yoˬ. Yaꞈ hkʼaˇ, Hkriꞈ yaˇ miˬ guiˬ hkʼoˆ dawˇ law kuiˬ cawˬ ve chaw kaꞈ aˬ htoꞈ ma te awˬ lawn chi htaꞈ a yeˇ yuˬ ve le? Awˬ lawn kʼo, kʼawꞈ teꞈ tu la leh mvuhˇ naw ma hkʼoˆ taˆ˗e ve chaw lehˬ, miˬ guiˬ hkʼoˆ lo dawˇ law kuiˬ cawˬ ve chaw htaꞈ kaꞈ awˬ bon gʼa tuˬ te laˇ tuˬ ve pa taw yoˬ. Chi htaꞈ pa taw, mvuhˇ naw ma hkʼoˆ taˆ˗e tuˬ dawˇ law kuiˬ cawˬ ve chaw maˇ heˆ leh, miˬ guiˬ chi hkʼoˆ co co taiˍ taiˍ chehˇ tuˬ dawˇ lo kuiˬ cawˬ ve chaw kaꞈ, kʼawꞈ teꞈ tu la leh mvuhˇ naw ma hkʼoˆ taˆ˗e tuˬ ve htaꞈ ngaˬ hui a yeˇ yuˬ cawˇ ve yoˬ.

² Awˉ lawˉ peuˇ ve Yeˍsuˆ ve awˬ laꞈ gʼawˇ kaꞈ kʼawꞈ teꞈ tu la leh mvuhˇ naw ma hkʼoˆ taˆ˗e tuˬ ve dawˇ law kuiˬ htaꞈ caˉ daꞈ ve bvuhꞈ tuˬ, Yaˬhoˉvaˬ dawˇ pawnˍ piˇ ve yoˬ. Tcuh yaˇ Yoˇhanˬ awˬ lawn chi htaꞈ kʼoˆ maˍ ve yoˬ. Leh yawˇ kʼoˆ ve, “chi beuꞈ ngaˬ hui Gʼuiˬ sha ve awˬ yaˇ awˬ duˬ hpehꞈ ve yoˬ. Awˬ hkʼawꞈ nawˉ ngaˬ hui hkʼaˬ hkʼe hpehꞈ la tuˬ ve htaꞈ maˇ hpeuꞈ maˍ laˇ sheˍ. Yaꞈ hkʼaˇ, yawˇ kʼawꞈ tawˆ la ve teˇ yanˇ, ngaˬ hui yawˇ hkʼe hpehꞈ la tuˬ ve htaꞈ ngaˬ hui shiˍ ve yoˬ.” (1 Yoˇhanˬ 3:2) Leuˆ yuˬ taˍ ve Hkriꞈ yaˇ mvuhˇ naw ma hkʼoˆ ve a shaꞈ hkʼaˬ hkʼe hpehꞈ tuˬ maˇ shiˍ ve htawˇ, yawˇ hui Yaˬhoˉvaˬ htaꞈ awˬ tehˬ awˬ na mawˬ tuˬ yoˬ tehꞈ shiˍ ve yoˬ. Kʼawꞈ teꞈ tu la leh mvuhˇ naw ma hkʼoˆ taˆ˗e tuˬ ve awˬ lawn Liꞈ hpu hkʼaw hkʼa tawˍ lehˆ maˇ gʼa kʼoˆ laˇ taˍ. Yaꞈ hkʼaˇ, awˬ lawn chi htaꞈ caˉ daꞈ ve Pawˇluꞈ teˇ ceuˬ ceuˬ kʼoˆ maˍ  laˇ ve yoˬ. Yeˍsuˆ lehˬ “uˉ peunˍ ve hkʼa peu˗eˬ, aˉ yaˇ hkʼa peu˗eˬ leh, kanˇ paˆ hkʼa peu˗eˬ htaꞈ te luˬ” leh “awˬ leh meuˇ te luˬ piˇ tuˬ ve canˇ paˍ lehˬ, suh ve teˇ ceuˬ htaꞈ” kaꞈ te luˬ htaˇ, leuˆ yuˬ taˍ ve Hkriꞈ yaˇ kaꞈ yawˇ geh chehˇ taˍ tuˬ yoˬ. Awˬ leh meuˇ htaˇ Yeˍsuˆ leh yawˇ geh teˇ geh uˉ peunˍ tuˬ ve chaw, teˇ ceuˬ le le Yaˬhoˉvaˬ ve kanˇ paˆ awˬ hawˉ lo chehˇ tcuh tuˬ yawˇ hui te ve yoˬ. Yeˍsuˆ leh yawˇ geh teˇ geh uˉ peunˍ ve chaw kaꞈ Yaˬhoˉvaˬ ve kanˇ paˆ awˬ hawˉ lo chehˇ tuˬ yoˬ. (1 Kawˇrenˍhtuˆ 15:24-28) Awˬ yanˇ chi ve lehˬ ha lehˬ jaˇ tuˬ yoˬ! *

3. 1 Kawˇrenˍhtuˆ liꞈ 15:30-32 hkʼaw kʼoˆ taˍ ve hkʼe, Pawˇluꞈ kʼawꞈ teꞈ tu la ve htaꞈ yonˍ ve lehˬ yawˇ htaꞈ hkʼaˬ hkʼe ga piˇ ve le?

³ Kʼawꞈ teꞈ tu la ve htaꞈ yonˍ ve lehˬ, Pawˇluꞈ shoꞈ shaꞈ ve leh tuꞈ ve hkanˍ ve laiˉ ceuˬ htaꞈ yeunˇ hkanˍ gʼaˇ tuˬ ga piˇ ve yoˬ. (1 Kawˇrenˍhtuˆ 15:30-32 gʼaw sheˍ.) Yawˇ Kawˇrenˍhtuˆ Hkriꞈ yaˇ htaꞈ liꞈ bvuhꞈ piˇ ve hkʼaw kʼoˆ ve, Pawˇluꞈ lehˬ “teˇ nyi le le suh ve teˇ ceuˬ htaꞈ hpuˇ daꞈ chehˇ ve yoˬ.” Leh kʼawꞈ kʼoˆ sheˍ ve, “ngaˬ lehˬ Eˇfeˇsuꞈ venˇ awˬ hkʼaw lo haiˬ ve to nuˇ to shaˆ teˇ hpaˍ htaꞈ gʼa loˍ yuˬ daꞈ jaw ve” yoˬ. Eˇfeˇsuꞈ venˇ hkʼaw lo to nuˇ to shaˆ htaꞈ awˬ tehˬ loˍ yuˬ daꞈ jaw ve htaꞈ yawˇ kʼoˆ ve yoˬ. (2 Kawˇrenˍhtuˆ 1:8; 4:10; 11:23) Maˇ heˆ leh teˇ pawˆ pawˆ, Yuˇdaꞈ chaw leh awˬ nu ve chaw “haiˬ ve to nuˇ to shaˆ” htaꞈ shuˍ ve Pawˇluꞈ htaꞈ tawˍ piˇ ve htaꞈ kʼoˆ gaˇ ve yoˬ. (Tcuh yaˇ 19:26-34; 1 Kawˇrenˍhtuˆ 16:9) Tawˍ piˇ ve hkʼaˬ hkʼe ve htawˇ maˇ kʼoˆ, Pawˇluꞈ lehˬ kawˆ tuˬ uiˍ jaˇ ve awˬ lawn gʼa hpuˇ ve yoˬ. Yaꞈ hkʼaˇ, yawˇ awˬ gʼuˇ suhˍ hpawˇ daꞈ ve htaꞈ dawˇ nyi ve yoˬ.—2 Kawˇrenˍhtuˆ 4:16-18.

4. Kʼawꞈ teꞈ tu la ve awˬ lawn chi beuꞈ teˇ co˗e Hkriꞈ yaˇ co ha hpawˇ awˬ gʼaˇ hehnˇ tuˬ hkʼaˬ hkʼe ga piˇ ve le? (Awˬ htaꞈ hpawˇ ve awˬ han htaꞈ nyi sheˍ.)

⁴ Ngaˬ hui kawˆ tuˬ uiˍ ve awˬ yanˇ hkʼaw chehˇ taˍ ve yoˬ. Awˬ viˉ awˬ nyi teˇ hpaˍ hpaˍ lehˬ shu haiˬ ve te piˇ ve htaꞈ gʼa hpuˇ ve yoˬ. Leh teˇ hpaˍ hpaˍ kʼo, maꞈ bawˆ ve awˬ paˇ lo gʼa chehˇ leh kawˆ tuˬ cawˬ ve yoˬ. Leh awˬ viˉ awˬ nyi laiˉ gʼaˇ kʼo, Gʼuiˬ sha ve kanˉ maˇ te tcuh laˇ kuiˬ mvuhˇ miˬ hkʼaw chehˇ leh Gʼuiˬ sha ve kanˉ hkʼa dehꞈ te maˇ gʼa. Yawˇ hui chi hkʼe te ve kʼo, htawnˍ hkʼaw lo yuˬ keu laˇ ve maˇ heˆ leh shu tiˇ pehˍ laˇ tuˬ ve htaꞈ shiˍ ve htawˇ, yawˇ hui hkʼa peu˗eˬ caˉ leh Yaˬhoˉvaˬ htaꞈ oˉ kʼoˍ pui ve pa taw, ngaˬ hui awˬ pon daꞈ ve henˇ yuˬ kuiˬ hpehꞈ ve yoˬ. Chi teˇ hkui yawˇ hui gʼa suh tuˬ ve htaꞈ shiˍ ve htawˇ maˇ kawˆ leh, awˬ gʼuˇ suhˍ hpawˇ daꞈ jaˇ ve awˬ ceuˬ peꞈ laˇ tuˬ yoˬ tehꞈ Yaˬhoˉvaˬ ka tiꞈ te taˍ piˇ ve yoˬ.

5. Kʼawꞈ teꞈ tu la ve htaꞈ ngaˬ hui hkʼa dehꞈ maˇ yonˍ tuˬ te laˇ ve, hkʼaˬ hkʼe ve dawˇ hkʼaˇ le?

⁵ Pawˇluꞈ awˬ viˉ awˬ nyi htaꞈ chaw teˇ hpaˍ hpaˍ ve dawˇ hkʼaˇ htaꞈ shaˍ tiꞈ te˗o tehꞈ kʼoˆ piˇ ve yoˬ. Leh yawˇ kʼoˆ ve, “suh ve chaw hui maˇ kʼawꞈ teꞈ tu la kʼo, shu kʼoˆ ve hkʼe, shawˉ pawˍ ngaˬ hui gʼa suh tuˬ ve pa taw, caˇ bvuhˆ dawˬ bvuhˆ te chehˇ˗a veuˬ.” Dawˇ hkʼaˇ chi hkʼe ve lehˬ, Pawˇluꞈ ve awˬ co˗e maˇ heˆ htaˇ kaꞈ cawˬ maw jaˇ˗oˬ. Leh Iˉsaˍyaˆ liꞈ 22:13 hkʼaw Iˉsaˍreˍlaˆ chaw hui ve dawˇ hkʼaˇ htaꞈ kaꞈ yawˇ kʼoˆ gaˇ ve yoˬ. Yawˇ hui Yaˬhoˉvaˬ geh meuˆ daꞈ jaˇ cawˇ ve htawˇ, yawˇ hui pyawˍ pyawˍ sha sha ve htaꞈ a yeˇ yuˬ ve yoˬ. Chi beuꞈ teˇ co˗e ve chaw hui kaꞈ Iˉsaˍreˍlaˆ chaw hui hkʼe dawˇ ve yoˬ. Yawˇ hui kʼoˆ ve, “ngaˬ hui dawˇ taˍ ve hkʼe te˗o. Maˇ maw kʼo gʼa suh˗e tuˬ yoˬ.” Yaꞈ hkʼaˇ, Liꞈ hpu hkʼaw kʼoˆ ve dawˇ hkʼaˇ chi hkʼe ve lehˬ Iˉsaˍreˍlaˆ chaw maˇ daꞈ ve gʼa hpuˇ tuˬ te piˇ ve yoˬ.—2 Raˍsaˍvanˍ 36:15-20.

6. Suh ve chaw htaꞈ Yaˬhoˉvaˬ kʼawꞈ teꞈ tu la piˇ ve ngaˬ hui shiˍ ve lehˬ, ngaˬ hui awˬ chawˇ leuˆ ve htaꞈ heuˆ la kuiˬ hkʼaˬ hkʼe cawˬ la ve le?

⁶ Suh ve chaw htaꞈ Yaˬhoˉvaˬ kʼawꞈ teꞈ tu la piˇ ve ngaˬ hui shiˍ ve lehˬ, ngaˬ hui awˬ chawˇ leuˆ ve htaꞈ heuˆ la kuiˬ cawˬ la ve yoˬ. Kawˇrenˍhtuˆ venˇ hkʼaw ve awˬ viˉ awˬ nyi lehˬ kʼawꞈ teꞈ tu la ve awˬ lawn htaꞈ maˇ yonˍ ve chaw geh awˬ chawˇ maˇ te tuˬ shaˍ tiꞈ gʼa te cawˇ ve yoˬ. Pyawˍ ve htaꞈ tiˉ a yeˇ yuˬ ve chaw leh, awˬ gʼuˇ suhˍ hpawˇ ve awˬ lawn htaꞈ maˇ dawˇ nyi ve chaw geh awˬ chawˇ te ve lehˬ, awˬ bon maˇ cawˬ tehꞈ ngaˬ hui htaꞈ maˍ laˇ ve yoˬ. Chi hkʼe ve chaw geh awˬ chawˇ te ve lehˬ ngaˬ hui ve te hkʼaˇ dawˇ hkʼaˇ htaꞈ heuˆ la kuiˬ cawˬ jaˇ leh, ngaˬ hui Yaˬhoˉvaˬ  maˇ dawˇ cawˇ ve awˬ ceuˬ htaꞈ kaꞈ te tuˬ te laˇ gʼa ve yoˬ hehˉ. Chi htaꞈ pa taw, Pawˇluꞈ hteˇ˗ehꞈ shaˍ tiꞈ peꞈ laˇ ve, “nawˇ la leh hteˇ ve cawˇ ve awˬ hkʼaˇ suh te kʼai˗o. Venˇ baˆ htaꞈ taˇ kʼawꞈ te.”—1 Kawˇrenˍhtuˆ 15:33, 34.

7. 1 Kawˇrenˍhtuˆ liꞈ 15:35-38 hkʼaw kʼoˆ taˍ ve hkʼe, kʼawꞈ teꞈ tu la ve htaꞈ caˉ daꞈ ve, chaw teˇ hpaˍ hkʼaˬ hkʼe na ve le?

⁷ 1 Kawˇrenˍhtuˆ liꞈ 15:35-38 gʼaw sheˍ. Kʼawꞈ teꞈ tu la ve htaꞈ maˇ yonˍ tuˬ te piˇ ve chaw lehˬ, “suh ve chaw hui lehˬ, hkʼaˬ hkʼe te kʼawꞈ teꞈ tu la tuˬ le?” tehꞈ na piˇ ve yoˬ. Chi beuꞈ teˇ co˗e ve chaw hui htaꞈ pa taw, ngaˬ hui Pawˇluꞈ kʼoˆ maˍ laˇ ve tawˇ hkawˇ htaꞈ a yeˇ yuˬ cawˇ ve yoˬ. Suh peuˬ hkʼawꞈ nawˉ hkʼaˬ hkʼe dawˇ ve maˇ shuˍ daꞈ ve pa taw yoˬ. Awˬ lawn chi htaꞈ Liꞈ hpu hkʼaw hkʼaˬ hkʼe maˍ laˇ ve teˇ geh nyi sheˍ.

8. Kʼawꞈ teꞈ tu la leh mvuhˇ naw ma hkʼoˆ taˆ˗e tuˬ ve awˬ lawn ngaˬ hui na gʼa tuˬ, aˬ htoꞈ ma ve tawˇ pa haˉ tehˆ maˍ laˇ ve le?

⁸ Chaw yaˇ suh˗oˬ htaˇ, yawˇ ve awˬ to kaꞈ kuiˇ kʼai ve yoˬ. Yaꞈ hkʼaˇ, teꞈ chiˉ awˬ hoꞈ awˬ han maˇ cawˬ sheˍ htaˇ, mvuhˇ naw ma leh miˬ naˆ ma htaꞈ te hpanˍ shehˍ hpaˇ Gʼuiˬ sha lehˬ, suh ve chaw htaꞈ yawˇ kʼawꞈ teꞈ tu la piˇ leh yawˇ htaꞈ keunˍ daꞈ ve awˬ to piˇ gʼa ve yoˬ. Chi yawˇ awˬ pon haˍ ve maˇ heˆ. (Awˬ hkuiˉ puiˍ 1:1; 2:7) Gʼuiˬ sha lehˬ chaw yaˇ suh peuˬ ve kʼawꞈ teꞈ tu la piˇ leh awˬ to awˉ lawˉ htaˇ hkʼe cawˬ tcuh tuˬ maˇ loˍ tehꞈ, ngaˬ hui shiˍ tuˬ Pawˇluꞈ tawˇ pa haˉ chi tehˆ maˍ laˇ ve yoˬ. Awˉ lawˉ htaˇ, ngaˬ hui awˬ yawˇ sheˍ ve htaꞈ dawˇ nyi sheˍ. Uiˍ la htaˇ, awˉ lawˉ htaˇ ve awˬ yawˇ htaꞈ maˇ shuˍ˗oˬ. Pawˇluꞈ tawˇ pa haˉ chi tehˆ maˍ laˇ ve lehˬ, teˇ ceuˬ le le htaꞈ hpanˍ shehˍ hpaˇ Gʼuiˬ sha lehˬ, ‘awˬ to htaꞈ yawˇ a loˍ cawˇ ve hkʼe, hpehꞈ la piˇ’ tuˬ tehꞈ hpeuꞈ maw laˇ ve yoˬ.

9. 1 Kawˇrenˍhtuˆ liꞈ 15:39-41 hkʼaw awˬ to htaꞈ caˉ daꞈ ve laiˉ ceuˬ hkʼaˬ hkʼe kʼoˆ taˍ ve le?

⁹ 1 Kawˇrenˍhtuˆ liꞈ 15:39-41 gʼaw sheˍ. Gʼuiˬ sha lehˬ chaw yaˇ htaꞈ awˬ to hkʼa shuˍ hpanˍ taˍ laˇ ve maˇ heˆ tehꞈ Pawˇluꞈ kʼoˆ maˍ laˇ ve yoˬ. Tawˇ pa haˉ te kʼo, a shaꞈ teꞈ ve awˬ to, nuˇ, ngaˇ, ngaˆ, chi ve teˇ hpaˍ kaꞈ peun daꞈ ve yoˬ. Mvuhˇ naw ma hkʼoˆ cawˬ ve awˬ ceuˬ mvuhˇ nyi, ha pa kaꞈ maˇ shuˍ daꞈ tehꞈ yawˇ kʼoˆ ve yoˬ. Meuꞈ keu shiˍ teˇ shiˍ leh teˇ shiˍ ve awˬ gʼeuˆ kaꞈ peun daꞈ ve yoˬ. Meuꞈ keu shiˍ teˇ shiˍ leh teˇ shiˍ hkʼaˬ hkʼe peun daꞈ ve ngaˬ hui maˇ mawˬ ve htawˇ,  chaˬ nyi tehˆ nyi paˍ lehˬ meuꞈ keu shiˍ laiˉ ceuˬ cawˬ ve tehꞈ kʼoˆ ve yoˬ. Teˇ shiˍ shiˍ uiˍ jaˇ ve, teˇ shiˍ shiˍ i ve, teˇ shiˍ shiˍ nyiˉ˗ehˍ hpehꞈ ve yoˬ. Tawˇ pa haˉ te kʼo, meuꞈ keu shiˍ lonˉ nyiˉ˗ehˍ ve, teˇ shiˍ shiˍ hpuˉ˗ehˍ ve, maˇ heˆ leh teˇ shiˍ shiˍ kʼo shiˉ˗ehˍ mvuhˇ nyi htaꞈ shuˍ ve yoˬ. Leh Pawˇluꞈ kʼawꞈ kʼoˆ sheˍ ve, “mvuhˇ naw ma htaꞈ caˉ daꞈ ve awˬ to teˇ hpaˍ cawˬ leh, miˬ guiˬ htaꞈ caˉ daꞈ ve awˬ to teˇ hpaˍ htawˇ cawˬ ve yoˬ.” Chi hkʼaˬ hkʼe kʼoˆ gaˇ ve le? Miˬ guiˬ hkʼoˆ chehˇ ve chaw lehˬ awˬ suhˍ awˬ shaˍ ve awˬ to cawˬ leh, mvuhˇ naw ma hkʼoˆ chehˇ ve lehˬ awˬ to mvuhˇ naw ma tcuh yaˇ hkʼe hpehꞈ ve yoˬ.

10. Kʼawꞈ teꞈ tu la leh mvuhˇ naw ma hkʼoˆ taˆ˗e ve chaw awˬ to hkʼaˬ hkʼe hpehꞈ ve le?

¹⁰ Pawˇluꞈ kʼoˆ ve awˬ ceuˬ htaꞈ teˇ geh kʼawꞈ chaˬ nyi sheˍ. Yawˇ kʼoˆ ve, “suh peuˬ ve chaw hui kʼawꞈ teꞈ tu la tuˬ ve lehˬ, oˇ ve hkʼa shuˍ shuˍ hpehꞈ tuˬ yoˬ. Awˬ to lehˬ, luˬ puiˉ kuiˇ puiˉ ve awˬ hkʼaw lo sheˍ leh, maˇ luˬ maˇ kuiˇ puiˉ ve awˬ hkʼaw lo kʼawꞈ teꞈ tu la piˇ tuˬ yoˬ.” Ngaˬ hui suh˗e ve kʼo, awˬ to kuiˇ kʼai leh jeꞈ kʼawꞈ hpehꞈ kʼai ve tehꞈ shiˍ ve yoˬ. (Awˬ hkuiˉ puiˍ 3:19) Chi htaꞈ pa taw, ‘awˬ to lehˬ, maˇ luˬ maˇ kuiˇ puiˉ ve awˬ hkʼaw lo kʼawꞈ teꞈ tu la piˇ tuˬ’ hkʼaˬ hkʼe hpehꞈ ve le? Tawˇ pa haˉ te kʼo, Eˇliˇyaꞈ, Eˇliˇshehˇ, leh Yeˍsuˆ kʼawꞈ teꞈ tu la piˇ ve chaw hui htaꞈ Pawˇluꞈ kʼoˆ ve maˇ heˆ. Yaꞈ hkʼaˇ, kʼawꞈ teꞈ tu la leh mvuhˇ naw ma htaꞈ caˉ daꞈ ve awˬ to cawˬ ve htaꞈ Pawˇluꞈ kʼoˆ gaˇ ve yoˬ.—1 Kawˇrenˍhtuˆ 15:42-44.

11-12. Yeˍsuˆ kʼawꞈ teꞈ tu la peuˬ hkʼawꞈ nawˉ, yawˇ awˬ to hkʼaˬ hkʼe pa ve le? Leh awˬ lawn chi hkʼe ve leuˆ yuˬ taˍ ve chaw htaꞈ hkʼaˬ hkʼe hpehꞈ la tuˬ le?

¹¹ Yeˍsuˆ miˬ guiˬ hkʼoˆ chehˇ htaˇ, yawˇ ve awˬ to awˬ suhˍ awˬ shaˍ hpehꞈ ve yoˬ. Yaꞈ hkʼaˇ, yawˇ htaꞈ kʼawꞈ teꞈ tu la piˇ htaˇ, yawˇ kaꞈ mvuhˇ naw ma htaꞈ caˉ daꞈ ve awˬ to cawˬ leh yawˇ kaꞈ mvuhˇ naw ma hkʼoˆ kʼawꞈ˗e ve yoˬ. Leuˆ yuˬ taˍ ve Hkriꞈ yaˇ kaꞈ kʼawꞈ teꞈ tu la piˇ leh mvuhˇ naw ma htaꞈ caˉ daꞈ ve awˬ to cawˬ ve yoˬ. Pawˇluꞈ kʼawꞈ kʼoˆ maˍ laˇ ve, “ngaˬ hui lehˬ, jeꞈ lo tawˆ la ve chaw teˇ gʼaˇ ve awˬ hoꞈ awˬ han htaꞈ pfuhˇ ve hkʼe, mvuhˇ naw ma lo tawˆ la ve chaw teˇ gʼaˇ ve awˬ hoꞈ awˬ han htaꞈ htawˇ ngaˬ hui pfuhˇ tuˬ yoˬ.”—1 Kawˇrenˍhtuˆ 15:45-49.

¹² Yeˍsuˆ htaꞈ kʼawꞈ teꞈ tu la piˇ htaˇ, yawˇ chaw yaˇ hkʼe leˇ awˬ to cawˬ ve maˇ heˆ tehꞈ ngaˬ hui tawnˇ taˍ cawˇ ve yoˬ. Aˬ htoꞈ ma te chi hkʼe hpehꞈ ve le tehꞈ Pawˇluꞈ kʼoˆ maˍ laˇ taˍ ve yoˬ. Yawˇ kʼoˆ  ve, “awˬ suhˍ awˬ shaˍ awˬ to lehˬ, [mvuhˇ naw ma hkʼoˆ] Gʼuiˬ sha ve mvuhˇ miˬ awˬ hkʼaw lo loꞈ˗e maˇ hpehꞈ.” (1 Kawˇrenˍhtuˆ 15:50) Tcuh yaˇ hui leh leuˆ yuˬ taˍ ve chaw hui kʼawꞈ teꞈ tu la piˇ leh mvuhˇ naw ma hkʼoˆ taˆ˗e htaˇ, yawˇ hui awˬ suhˍ awˬ shaˍ kuiˇ puiˉ ve maˇ kʼawꞈ cawˬ. Leh yawˇ hui htaꞈ hkʼaˬ hkʼe htaˇ, kʼawꞈ teꞈ tu la piˇ tuˬ le? Pawˇluꞈ kʼoˆ ve, yawˇ hui htaꞈ kʼawꞈ teꞈ tu la piˇ ve lehˬ, yawˇ hui suh peuˬ hkʼawꞈ nawˉ laꞈ haˆ hpehꞈ la ve maˇ heˆ. Yaꞈ hkʼaˇ, awˬ gʼuˇ suhˍ hpawˇ hpehꞈ la tuˬ yoˬ. Yawˇ 1 Kawˇrenˍhtuˆ liꞈ bvuhꞈ htaˇ, awˬ laꞈ gʼawˇ teˇ hpaˍ hpaˍ “suh peuˬ.” Tawˇ pa haˉ te kʼo, tcuh yaˇ Yaˍkoˆ kaꞈ yoˬ. (Tcuh yaˇ 12:1, 2) Tcuh yaˇ hui leh awˬ nu ve leuˆ yuˬ taˍ ve chaw hui maˇ “suh” sheˍ.—1 Kawˇrenˍhtuˆ 15:6.

13. Yeˍsuˆ yaꞈ la htaˇ hkʼaˬ hkʼe hpehꞈ tuˬ le?

¹³ Yeˍsuˆ leh Pawˇluꞈ kaꞈ tcuh kaˍ paˍ ve tawˇ hkawˇ a yeˇ uiˍ jaˇ ve teˇ yanˇ htaꞈ kʼoˆ taˍ ve yoˬ. Awˬ yanˇ oˇ ve lehˬ Yeˍsuˆ Hkriꞈ yaꞈ la ve awˬ yanˇ gaˬ la tuˬ yoˬ. Yeˍsuˆ yaꞈ la ve awˬ yanˇ lehˬ, maꞈ bawˆ ve, miˬ hiˆ ve, leh naˬ beuˬ teˇ kaˬ peuˬ teˇ kaˬ cawˬ tuˬ yoˬ. Chi hkʼoˆ kaꞈ, miˬ guiˬ chi hkʼoˆ haiˬ ve awˬ ceuˬ gʼaˇ hteꞈ maˇ la ve yoˬ. Tcuh kaˍ paˍ ve tawˇ hkawˇ chi 1914 Hkʼawꞈ htaˇ, awˬ tehˬ hpehꞈ la ve htaꞈ ngaˬ hui gʼa mawˬ ve yoˬ. Yaꞈ hkʼaˇ, Yeˍsuˆ yaꞈ la tuˬ ve htaꞈ shiˍ tuˬ, awˬ nu ve ka tiꞈ teˇ maˬ kʼoˆ laˇ sheˍ ve yoˬ. Yeˍsuˆ kʼoˆ ve, Gʼuiˬ sha ve mvuhˇ miˬ uˉ peunˍ chehˇ˗oˬ ve, awˬ lawn “miˬ guiˬ hkʼoˆ teˇ kaˬ le le lo ca maˍ piˇ tuˬ yoˬ. Oˇ ve hkʼawꞈ nawˉ, awˬ leh meuˇ gaˬ la tuˬ yoˬ.” (Maꞈhtehˍ 24:3, 7-14) Pawˇluꞈ beˆ maˍ laˇ ve, “Jawˇmawˇ Yeˍsuˆ kʼawꞈ gaˬ la htaˇ” leuˆ yuˬ taˍ ve Hkriꞈ yaˇ “suh peuˬ ve chaw teˇ hpaˍ” kʼawꞈ teꞈ tu la piˇ ve awˬ yanˇ hpehꞈ ve yoˬ.—1 Hteˇsaˍlawˇniˆ 4:14-16; 1 Kawˇrenˍhtuˆ 15:23.

14. Leuˆ yuˬ taˍ ve chaw suh˗oˬ ve, Yeˍsuˆ yaꞈ la ve awˬ yanˇ htaˇ hkʼaˬ hkʼe hpehꞈ tuˬ le?

¹⁴ Leuˆ yuˬ taˍ ve Hkriꞈ yaˇ chi teˇ hkui suh˗e ve kʼo, kʼawꞈ teꞈ tu la leh mvuhˇ naw ma hkʼoˆ laꞈ haˆ taˆ˗e tuˬ yoˬ. Awˬ lawn chi ve 1 Kawˇrenˍhtuˆ liꞈ 15:51, 52 hkʼaw Pawˇluꞈ htawˆ hkanˍ laˇ taˍ ve yoˬ. Oˇ kaˬ lo kʼoˆ ve, “nyiˬ hui hkʼa peu˗eˬ gʼaˇ suh tuˬ ve maˇ heˆ. Yaꞈ hkʼaˇ, awˬ leh meuˇ ve behˬ heh ma meuˆ  ve teˇ yanˇ, teˇ hkui tiˉ, mehˆ teˇ meꞈ tiˉ awˬ hkʼaw lo, nyiˬ hui hkʼa peu˗eˬ gʼa pa tuˬ yoˬ.” Pawˇluꞈ ve tawˇ hkawˇ chi teˇ hkui awˬ tehˬ hpehꞈ chehˇ ve yoˬ. Yawˇ hui htaꞈ kʼawꞈ teꞈ tu la piˇ htaˇ, Yeˍsuˆ Hkriꞈ ve awˬ viˉ awˬ nyi ha lehˬ jaˇ tuˬ yoˬ. Awˬ lawn kʼo, yawˇ hui ‘Jawˇmawˇ Yeˍsuˆ geh hkʼaˬ htaˆ kaꞈ gʼa chehˇ tuˬ yoˬ.’—1 Hteˇsaˍlawˇniˆ 4:17.

15. “Mehˆ teˇ meꞈ tiˉ awˬ hkʼaw lo” awˬ suhˉ pa piˇ ve chaw aˬ htoꞈ ma ve kanˉ te tuˬ le?

¹⁵ Liꞈ hpu hkʼaw kʼoˆ ve, “mehˆ teˇ meꞈ tiˉ awˬ hkʼaw lo” awˬ suhˉ pa piˇ ve chaw htaꞈ mvuhˇ naw ma hkʼoˆ aˬ htoꞈ ma ve kanˉ te tuˬ le? Yeˍsuˆ yawˇ hui htaꞈ kʼoˆ piˇ ve, “gʼaˇ shehˍ hpaˇ hpehꞈ leh, awˬ leh hkʼa gaˬ ngaˬ ve kanˉ htaꞈ te ve chaw teˇ gʼaˇ htaꞈ, mvuhˇ miˬ teˇ hpaˍ awˬ hkʼoˆ uˉ peunˍ tuˬ, Awˬ pa ngaˬ htaꞈ kanˇ paˆ peꞈ laˇ ve hkʼe, ngaˬ htawˇ yawˇ htaꞈ kanˇ paˆ piˇ tuˬ yoˬ. Jeꞈ muꞈ hkʼu htaꞈ dawˆ hkoˇ ve hkʼa shuˍ shuˍ, yawˇ lehˬ sho juˇ fuiˍ htaꞈ yehˇ leh yawˇ hui htaꞈ uˉ peunˍ tuˬ yoˬ.” (Hpeuꞈ maˍ ve 2:26, 27) Yawˇ hui htaꞈ sheh kʼai piˇ shehˍ hpaˇ Yeˍsuˆ sho juˇ fuiˍ taˍ htaꞈ yehˇ leh mvuhˇ miˬ hkʼa peu˗eˬ htaꞈ uˉ peunˍ htaˇ, yawˇ hui kaꞈ Yeˍsuˆ geh ga tuˬ yoˬ.—Hpeuꞈ maˍ ve 19:11-15.

16. Suh ve htaꞈ gʼa ponˬ ve hkʼaˬ nyiˇ gʼaˇ cawˬ tuˬ le?

¹⁶ Leuˆ yuˬ piˇ taˍ ve chaw kʼawꞈ teꞈ tu la leh mvuhˇ naw ma hkʼoˆ taˆ˗e htaˇ, yawˇ hui kaꞈ suh ve htaꞈ gʼaˇ peuˬ. (1 Kawˇrenˍhtuˆ 15:54-57) Chi htaꞈ pa taw, yawˇ hui gaˬ la tuˬ ve awˬ yanˇ Aˍmaˍgeˍdonˍ hkʼaw miˬ guiˬ hkʼoˆ haiˬ ve hkʼa peu˗eˬ htaꞈ yawˇ hui te luˬ tuˬ yoˬ. Hkriꞈ yaˇ laiˉ lanˬ gʼaˇ hawˉ hkʼaˆ leh yaˇ miˇ “uiˍ jaˇ ve tuꞈ ve hkanˍ ve awˬ hkʼaw lo tawˆ la leh” miˬ guiˬ awˬ suhˉ hkʼaw loꞈ˗e tuˬ yoˬ. (Hpeuꞈ maˍ ve 7:14) Chi htaꞈ ponˬ ve chaw lehˬ, suh ve awˬ nu ve teˇ ceuˬ htaꞈ gʼaˇ ve gʼa kʼawꞈ mawˬ tuˬ yoˬ. Suh˗oˬ ve chaw laiˉ lanˬ gʼaˇ htaꞈ teˇ pawˆ kʼawꞈ teꞈ tu la piˇ tuˬ yoˬ. Oˇ ve teˇ yanˇ ngaˬ hui hkʼaˬ hkʼe taw ha lehˬ leh pyawˍ jaˇ ve htaꞈ dawˇ nyi sheˍ. (Tcuh yaˇ 24:15) Yaˬhoˉvaˬ htaꞈ ka tiꞈ yeˬ ve tehꞈ hpeuꞈ maw piˇ ve chaw hkʼa peu˗eˬ lehˬ, Aˍdanˍ geh gʼa ve suh ve teˇ ceuˬ htaꞈ yawˇ hui gʼa ponˬ leh co co taiˍ taiˍ ve a shaꞈ gʼa tuˬ yoˬ.

17. 1 Kawˇrenˍhtuˆ liꞈ 15:58 hkʼaw kʼoˆ taˍ ve hkʼe, chi teˇ hkui ngaˬ hui aˬ htoꞈ ma te cawˇ ve le?

¹⁷ Pawˇluꞈ Kawˇrenˍhtuˆ venˇ hkʼaw chehˇ ve awˬ viˉ awˬ nyi htaꞈ kʼawꞈ teꞈ tu la ve awˬ lawn liꞈ bvuhꞈ piˇ ve lehˬ, ngaˬ hui teˇ gʼaˇ le le awˬ bon gʼa leh awˬ gʼaˇ gʼa tuˬ te laˇ ve yoˬ. Chi teˇ hkui “Jawˇmawˇ Yeˍsuˆ ve kanˉ” htaꞈ te tuˬ ngaˬ hui awˬ yanˇ yuˬ tanˇ ve Pawˇluꞈ beˆ maˍ laˇ taˍ ve awˬ hkʼaˇ laiˉ hkʼaˇ cawˬ ve yoˬ. (1 Kawˇrenˍhtuˆ 15:58 gʼaw sheˍ.) Kanˉ chi htaꞈ ngaˬ hui ka tiꞈ yeˬ leh te gʼa ve hkʼe te ve kʼo, awˬ gʼuˇ suhˍ hpawˇ ngaˬ hui ve a shaꞈ ha lehˬ jaˇ ve cawˬ tuˬ yoˬ. Oˇ ve teˇ yanˇ ve a shaꞈ ngaˬ hui dawˇ taˍ ve aꞈ kehˉ daꞈ jaˇ tuˬ yoˬ. Oˇ ve teˇ yanˇ gaˬ kʼo, Jawˇmawˇ Yeˍsuˆ ve kanˉ ngaˬ hui te ve lehˬ a hkʼe leˇ hpehꞈ ve maˇ tehꞈ mawˬ tuˬ yoˬ.