1-2. Mwomwo ika vaka-Kulishitu vosena vatela kumona chihande chakusanguka nakuya mwilu kupwa chachilemu?

VATU vavavulu vaze vali nakuzachila Yehova oholyapwa vatalilila kukayoyela hano hamavu. Oloze vaka-Kulishitu vawavisa vaze vali hano hamavu, vatalilila kukayoyela mwilu. Ava vaka-Kulishitu vasaka kutachikiza omwo nachikapwa chiyoyelo chavo mwilu. Nyi ngachilihi vaze vatalilila kukayoyela hamavu? Nganomu natushimutwila, kusanguka chavaze navakaya mwilu nachikanganyalisa navaze navakayoyela hamavu haya myaka yosena. Shikaho, numba twatwama nalutalililo lwakukayoyela mwilu chipwe hano hamavu, twatela kumona kusanguka nakuya mwilu kupwa chachilemu.

² Kalunga ahwiminyinyine tumbaji twaYesu vamwe vamulikulukaji lyamyaka lyakulivanga mangana vasoneke hachihande chakusanguka nakuya mwilu. Chakutalilaho, kaposetolo Yowano asonekele ngwenyi: “Tunapu jino tuvana vaKalunga, oloze omu natukapwa kanda lyehi muchisoloke. Oloze tunatachikiza ngwetu omu mwakasoloka, natukapwa ngana mwaikiye.” (Yowa. 1, 3:2) Shikaho, vaka-Kulishitu vawavisa kavatachikiza omwo nayikapwa mijimba yavo yakushipilitu yize navakapwa nayo mwilu hanyima yakuvasangulako. Oloze omu navakaya mwilu, navakamona Yehova nameso avo kapu. Numba tuhu Mbimbiliya kayahanjika vyuma vyosena hachihande chakusanguka nakuya mwiluko, oloze kaposetolo Paulu ahanjikileko vyuma vimwe kutalisa kuchihande kana. Vawavisa navakapwa hamwe naYesu omu mwakanongesa  “jifulumende josena, namawata osena, nangolo jeka josena.” Kaha nawa “kufwa chize chapwa muka-kole wakukuminyina, navakachifumisako.” Kutwala muze, Yesu navaze mwakayula navo navakaliluula kuli Yehova nakuluula nawa vyuma vyosena kuli ikiye. (Koli. 1, 15:24-28) Chuma kana nachikawaha chikuma! *

3. Kweseka naWavaka-Kolinde 1, 15:30-32, kufwelela mukusanguka chakafwile ngachilihi Paulu?

³ Paulu omikile vyeseko vyakulisezaseza mwomwo afwelelele mukusanguka. (Tangenu Wavaka-Kolinde 1, 15:30-32.) Alwezele vaka-Kolinde ngwenyi: “Ngweji kulitalasananga nakufwa hakumbi hakumbi.” Kaha ambile nawa ngwenyi: “Ngunalipikinga navisuma kuEfwesu.” Awa mazu pamo atalisa kuvisuma vaze alipikilenga navo muchivaza chakuhemena muEfwesu. (Koli. 2, 1:8; 4:10; 11:23) Nyi pamo apwile nakuhanjika havaYuleya navatu veka vaze vamufumbukililenga, vaze vapwilenga kwijiva nge “visuma.” (Vili. 19:26-34; Koli. 1, 16:9) Oloze kala mweshomwo chapwile, Paulu amwenenga ukalu wauvulu. Chipwe ngocho, ashishikile havyuma vyamwaza vyakulutwe.—Koli. 2, 4:16-18.

4. Uno lutalililo lwakusanguka lunakolezeza ngachilihi vaka-Kulishitu makumbi ano? (Talenu muvwimbimbi wahalipapilo lyahelu.)

⁴ Tuli nakuyoyela mulwola lwalukalu chikuma. Vandumbwetu vamwe veji kuvalemekanga kuvihwanga. Veka nawa vatwama mujingalila muze mwatwama jijita, ngocho kavapwa vakukingiwako. Vakwavo nawa vali nakuzachila Yehova mumafuchi muze vakanyisa mulimo wetu, kaha vali nakulinga ngocho chamokomoko nakuvalweza ngwavo navavakasa mutumenga chipwe kuvajiha. Ava vandumbwetu vosena vaze vali nakuhita muukalu tunavuluka vali nakutwalaho kulemesa Yehova, ngocho vali nakutuhana chakutalilaho chamwaza. Kavevwa womako, mwomwo vatachikiza ngwavo numba tuhu navavajiha, oloze Yehova mwakavalingila vyuma vyamwaza vyavivulu kulutwe.

5. Vishinganyeka muka vyakuhenga vize vinahase kutulingisa tuhone kufwelela mukusanguka?

⁵ Paulu ahuhumwine vandumbwenyi havishinganyeka vyakuhenga vize vapwile navyo vamwe, ngwenyi: “Kachi nge vafu kaveshi kukavasangulako, kahanyi ‘tulyenu, tunwenu mwomwo hamene natufwa.’” Vishinganyeka kana vyapwileko lyehi shimbu kanda makumbi aPaulu. Shikaho, Paulu hakuhanjika mazu kana pamo anukile chisoneka chaIsaya 22:13 chize chahanjika hamuchima vapwile nawo vaIsalele. Vazangilenga viseke muchishishisa chakuzanga Kalunga. Ava vaIsalele vapwile namuchima uze vali nawo vatu vavavulu makumbi ano, wakwamba ngwavo, “tulyenu, tunwenu mwomwo hamene natufwa.” Oloze Mbimbiliya yalumbununa ukalu vamwene vaIsalele mwomwo yamuchima kana.—Miji. 2, 36:15-20.

6. Uno kufwelela mukusanguka chatela kutulingisa tulikatenga navatu vakufwana ngachilihi?

⁶ Kutachikiza ngwetu Yehova nahase kusangula vafu, chatela kutulingisa tusakulenga kanawa vatu vakulikata navo. Vandumbwetu muKolinde vatelelele kulihenda kukulikata navatu vaze vakanyine ngwavo kakwatwama kusangukako. Chishina muka natulinangulako? Kulikata chikuma navatu vaze vandupukila muviseke, chinahase kuzeyesa lufwelelo lwetu. Vatu kana vanahase kulingisa muka-Kulishitu apwenga navishinganyeka vyavipi, najitato jajipi. Ngocho nachimulingisa aputuke kulinga vyuma ahunga Kalunga. Echi  chikiko chalingishile Paulu ambenga ngwenyi: “Shinganyekenu mwamangana mulinge mwaya kwoloka, kaha kanda namulinganga shiliko.”—Koli. 1, 15:33, 34.

7. Kweseka naWavaka-Kolinde 1, 15:35-38, vatu vamwe pamo vahulishilenga chihula muka hachihande chakusanguka?

⁷ Tangenu Wavaka-Kolinde 1, 15:35-38. Vatu vaze vasakilenga kulingisa vakwavo vahuhwasane chihande chakusanguka, pamo vahulishilenga ngwavo: “Uno vafu navakavasangula ngachilihi?” Chinapu chachilemu kuli etu kushimutwila jila yize Paulu akumbulwililemo chihula kana, mwomwo vatu vavavulu makumbi ano vatwama navishinganyeka vyakulihandununa kutalisa kuli vaze vafwa. Jino Mbimbiliya yanangula vyuma muka?

8. Chakutalilaho muka nachitukafwa twivwishise omwo navakapwa vaze navakasanguka nakuya mwilu?

⁸ Nge mutu nafu, mujimba wenyi weji kupolanga. Oloze uze atengele melu namavu, nahase kumusangula nakumuhana mujimba ukwavo. (Kupu. 1:1; 2:7) Paulu ahanjikile chakutalilaho chakusolola nge Kalunga keshi kusangula mutu namujimba apwile nawoko. Chakutalilaho kana shina ‘chalinona,’ chipwe “mbuto.” Linona lize vanatumbu, lyeji kuchivikilanga nakupwa jino himutondo wauhya. Mutondo kana naulihandununa nalize linona. Paulu azachishile chakutalilaho kana mangana alumbunune ngwenyi Tengi nahase kusangula mutu ‘namujimba uze nasake ivene’ Tengi.

9. Kweseka naWavaka-Kolinde 1, 15:39-41, mijimba yalihandununa ngachilihi?

⁹ Tangenu Wavaka-Kolinde 1, 15:39-41. Paulu ambile ngwenyi Kalunga katengele mijimba mujila yoyimweko. Chakutalilaho, kwatwama mijimba yanyama yakulisezaseza, yakufwana nge yavangombe, nayatujila nayavaishi. Ambile nawa ngwenyi muutangatanga mwatwama likumbi nakakweji. Kaha nawa ngwenyi “upahu watanganyika hitanganyika  walihandununa.” Numba tuhu chuma kana katweshi kuhasa kuchimona nameso etuko, oloze vaka-sayasi ngwavo kwatwama vatanganyika vachila vavanene, nava vatoma vavandende, nava vausungwa vakufwana nge likumbi. Paulu ambile nawa ngwenyi, “kwatwama nawa mijimba yamwilu namijimba yahamavu.” Twatachikiza ngachilihi? Etu hano hamavu twatwama namijimba yanyama, oloze vaze vatwama mwilu vatwama namijimba yakushipilitu ngana yize yavangelo.

10. Mijimba muka veji kupwanga nayo vaze veji kusangukanga nakuya mwilu?

¹⁰ Paulu ambile nawa ngwenyi: “Omu mukiko chapwa nakusanguka chavafu nawa. Mujimba navaufunda nakupola, navausangula wakuhona kupola.” Twejiva vene ngwetu nge mutu nafu, mujimba weji kupolanga nakupwa cheka lukungu. (Kupu. 3:19) Jino mwomwo ika ahanjikilile ngwenyi mujimba “navausangula wakuhona kupola”? Kapwile nakuhanjika hali vaka-kusanguka nakuyoyela hano hamavu, ngana mwavatu vaze vasangwile kuli Elija, naElisha naYesuko. Oloze apwile nakuhanjika hamutu uze navasangula namujimba wamwilu, kulumbununa “mujimba wakushipilitu.”—Koli. 1, 15:42-44.

11-12. Uno Yesu asangukile namujimba muka? Kaha chuma muka cheji kusolokanga kuli vawavisa?

¹¹ Omu Yesu apwile hano hamavu, apwile namujimba wanyama. Oloze omu asangukile, “apwile jino shipilitu yakuhana kuyoya,” kaha ayile mwilu. Navaka-Kulishitu vawavisa, veji kusangukanga namijimba yakushipilitu. Paulu alumbunwine ngwenyi: “Nganomu twafwana ou wakuumba nalukungu, mukiko nawa munatukafwana uze wamwilu.”—Koli. 1, 15:45-49.

¹² Paulu apwile nakukukulula jino chihande chakusanguka. Twatela kwanuka ngwetu Yesu kavamusangwile namujimba wanyama namanyingako. Paulu ambile ngwenyi: “Ou ukwechi nyama namanyinga keshi kuhasa kuswana Wangana waKalungako.” (Koli. 1, 15:50)  Hano, asolwele ngwenyi, vaposetolo navawavisa veka, kaveshi kukasanguka nakuya mwilu namijimba yanyama namanyingako. Uno navakavasangula lwola muka? Paulu ambile ngwenyi kusanguka kana chapwile kulutwe ngocho kavasangukilenga hahaze vene vafwilengako. Paulu asonekele mukanda wavaka-Kolinde wakulivanga oku tumbaji vamwe, vakufwana nge Yakova, “vanasavala lyehi tulo twakufwa.” (Vili. 12:1, 2) Oloze kwapwile vaposetolo navawavisa veka vaze vapwile kanda vasavale “tulo twakufwa.”—Koli. 1, 15:6.

13. Vyuma muka twatachikijilaho kupwako chaYesu?

¹³ Yesu naPaulu vapolofwetele chimweza lwola lwamwaza lwakulutwe. Lwola kana shina lwakupwako chaKulishitu. Vahanjikile ngwavo lwola kana navakalutachikijila kujijita namindenda namisongo yachihita navyuma vyeka vyavipi. Tunamono omu unatesangamo upolofweto kana kufuma vene mu 1914. Yesu ambile nawa ngwenyi, nakukapwa chinjikizo chikwavo chachilemu. Ambile ngwenyi, mujimbu wamwaza waWangana waKalunga navakawambulula “hamavu hosena, nakupwa unjiho kuli vaka-mafuchi osena, numbanyi kukuma chikeze.” (Mateu 24:3, 7-14) Paulu ambile ngwenyi, halwola “[lwa]kupwako chaMwata,” hakiko nawa navakasanguka vaka-Kulishitu vawavisa vaze ‘vasavalile tulo twakufwa.’—Teso. 1, 4:14-16; Koli. 1, 15:23.

14. Chuma muka cheji kusolokanga kuli vaze vawavisa mulwola luno lwakupwako chaKulishitu?

¹⁴ Vawavisa vaze veji kufwanga makumbi ano, veji kuvasangulanga hahaze vene nakuya mwilu. Omu mukiko ahanjikile naPaulu hali Wavaka-Kolinde 1, 15:51, 52 ngwenyi: “Tuvosena katweshi kukasavala tulo twakufwako, oloze tuvosena navakatwalumuna mweka,  mukapyapya kaha, mukukemwina chaliso, halwola nalukavuma luneta lwamakumishilo.” Mazu ahanjikile Paulu ali nakutesamo makumbi ano. Omu veji kusangukanga ava vandumbu jaKulishitu, veji kuwahililanga chikuma mwomwo “[navapwanga] naMwata shimbu yosena.”—Teso. 1, 4:17.

15. Mulimo muka navakazata vaze veji kwalumunanga “mukukemwina chaliso”?

¹⁵ Mbimbiliya yatulweza mulimo navakazata mwilu, vaze veji kwalumunanga “mukukemwina chaliso.” Yesu avalwezele ngwenyi: “[Ou] mwafungulula nakukavangiza vilinga vyami palanga nakusongo, nangukamuhana ngolo jakuyula vaka-mafuchi, nganomu ngwajitambula lyehi nayami nawa kuli Tata, kaha mwakafunganga vatu nambwechi yafwelu, mangana vakavachike nge jindeho jaunonga.” (Kuso. 2:26, 27) Ngocho navakakavangiza Twamina yavo, nakukafunga vaka-mafuchi nambwechi yafwelu.—Kuso. 19:11-15.

16. Uno vatu vavavulu navakafungulula ngachilihi kufwa?

¹⁶ Chikupu vene vawavisa navakafungulula kufwa. (Koli. 1, 15:54-57) Kusanguka chavo nachikavalingisa vakazane mumulimo wakufumisako upi hajita yaAlamangetone. Vaka-Kulishitu vavavulu navakayovoka “muluyando lwalunene” nakukengila mukaye kakahya. (Kuso. 7:14) Vatu vaze navakayoyela hamavu navakamona kufwa vanachifungulula omu navakasanguka vatu vaze vafwile. Achishinganyekenu kuwaha natukevwa omu nachikasoloka chuma kana enu vayaya! (Vili. 24:15) Kaha vosena vaze navakapwa vakushishika kuli Yehova, navakafungulula nawa kufwa chize twaswana kuli Alama. Navakayoya jino haya myaka.

17. Uno hali Wavaka-Kolinde 1, 15:58, vatukolezeza tulingenga ika?

¹⁷ Vaka-Kulishitu vosena valiko makumbi ano, vatela kumona mazu aze Paulu asonekelele vaka-Kolinde hachihande chakusanguka kupwa amalemu. Shikaho, twatela kusolola ngwetu twetavila mazu ahanjikile Paulu hakupwa “navyuma vyavivulu vyakuzata mumulimo waMwata.” (Tangenu Wavaka-Kolinde 1, 15:58.) Kachi nge natwazananga chikuma mumulimo waMwata, kaha natukalivwisa kuwaha vyuma vyamwaza kulutwe. Chiyoyelo nachikawaha chikuma. Natukatachikiza jino ngwetu kukilikita chetu kachapwile chakulishina tuhuko, kutalisa kuli Mwata.