1-2. Muloñadi akwaKristu ejima chatela kukeñelawu kwiluka nsañu yakusañuka kwakuya mwiwulu?

ANTU amavulu anakumukalakela Yehova akweti kuchiñeja kwakushakama hamaseki haya nyaaka. Hela chochu, akwaKristu antesha awayishewa akweti kuchiñeja kwakuyisañula nakuya mwiwulu. AkwaKristu awayishewa akeñaña kwiluka chakekala chihandilu chawu mwiwulu. Indi antu akweti kuchiñeja kwakushakama hamaseki akeñelañadi kwiluka iyi nsañu? Neyi chitukumona, kusañuka kwakuya mwiwulu kwakaleta cheñi nkisu kudi antu akweti kuchiñeja kwakushakama hamaseki haya nyaaka. Hela kuchiñeja kwetu kwakushakama mwiwulu hela hamaseki haya nyaaka, twatela kwiluka nsañu yakusañuka kwakuya mwiwulu.

² Nzambi woneneni atumbanji twaYesu amakwawu mumafuku awapostolu kusoneka nsañu yakuchiñeja kwakuya mwiwulu. Kapostolu Yowanu walumbulwili nindi: “Ichi dinu tudi anyana kaNzambi, ilaña chitwakekala, kanda achisololi. Tweluka netu neyi yena anamusololi dehi, twakekala neyi yena.” (1 Yow. 3:2) Dichi akwaKristu awayishewa eluka wanyi chakekalawu neyi anayisañuli dehi nakuya mwiwulu nanyijimba yakuspiritu. Hela chochu, akamumona Yehova neyi anatambuli dehi wuloku wawu. Bayibolu hiyashimuna nsañu yejima hakusañuka kwakuya mwiwuluku, ilaña kapostolu Pawulu washimwiniku nsañu yantesha. Awayishewa akekala naKristu “hampinji yakela najilumuni dehi nfulumendi jejima, niwuswa wejima niñovu jejima.” Munabombeli “chilumbu wakukumishaku, dikwila nawu kufwa.” Nkumininaku, Yesu niakwawu mwakayulilañawu hamu akadovwahisha nikuhana yuma  yejima kudi Yehova. (1 Kor. 15:24-28) Iyi yikekala mpinji yamuzañalu! *

3. Neyi chinamwekeshiwu ha 1 Akorinda 15:30-32, kukuhwelela mukusañuka kwamukwashili Pawulu kwiladi?

³ Pawulu wakuhweleleli mukusañuka nawa chumichi chamukwashili kuumika makabi amboka-mboka. (Tañenu 1 Akorinda 15:30-32.) Wayilejeli akwaKorinda nindi: “Hefuku-hefuku natalañanaña nakufwa.” Pawulu wasonekeli cheñi nindi: “Ami nazuñi nawanyama amwisaña ayisumi kuEfwesesa.” Hadaha wahosheleña hakuzuña kwazuñiliyi nawanyama muEfwesesa. (2 Kor. 1:8; 4:10; 11:23) Hela hadaha wadiña nakutena aYudeya niantu amakwawu adiña nakumukabisha adiña neyi “[anyama] amwisaña ayisumi.” (Yilw. 19:26-34; 1 Kor. 16:9) Pawulu wamweni kukala kwakuvulu. Ilaña watwalekelihu kukuhwelela nindi kumbidi yuma yikamuwahila.—2 Kor. 4:16-18.

4. Indi kuchiñeja kwakusañuka kwayikoleshaña ñahi akwaKristu makonu? (Talenu mwevulu wudi hakava.)

⁴ Tunakushakama mumpinji yakala. Amanakwetu amakwawu anakuyikabisha. Amakwawu ekala mumatuña mwekala jinjita nawa hiyekala akiñewaku. Hela chochu, amakwawu anakumukalakela Yehova hela chakwila anakusha wumi wawu muwubanji mumatuña mwalekeshawu hela mwakaanishawu mudimu wetu wakushimwina. Awa amanakwetu niahela anatwalekihu kudifukula kudi Yehova nawa anakutwimikila chakutalilahu chachiwahi. Hiyatiyaña woma kufwaku, muloña eluka nawu Yehova wayikana yuma yayiwahi kumbidi.

5. Yitoñojokanyi yatama yinateli kutuletesha kubula kukuhwelela mukusañuka?

⁵ Pawulu wayisoñamishili amanakwindi kutalisha hayitoñojoka yatama yadiña nawantu amakwawu yakwila nawu: “Neyi afu hiyakayisañulaku, dichi “tudenu nikunwa, muloña kumadiki twakafwa.” Diyi yilwilu yadiñaku nikunyima henohu Pawulu kanda yavwaliki. Hadaha wahosheleña mazu ekala haIsaya 22:13, ahosha hayilwilu yadiña nawaIsarela. Chatela akoleshi wubwambu wawu naNzambi, ilaña wena afwilileña yuma yakuditiyisha kuwaha awenawu. Dichi, yitoñojoka yanawa aIsarela yadiña yakwila nawu “tudyenu tunwenu kumadiki hitukufwa,” diyi yilwilu yidiku nimakonu. Hela chochu, Bayibolu yashimuna yuma yatama yayimwekeneni aIsarela hamuloña wayitoñojoka yawu yatama.—2 Kushi. 36:15-20.

6. Kuchiñeja kwakusañuka kunateli kutukwasha ñahi kutonda chiwahi amabwambu?

⁶ Tweluka netu Yehova wakasañula afu, dichi chumichi chatela kutukwasha kutonda chiwahi antu atela kwikala amabwambu jetu. Amanakwetu muKorinda ateleleli kutondolwela antu ahosheleña nawu kwakekala wanyi kusañuka. Twatela kudizilaku ninetu: Neyi tudikundaña nawantu abula kusha maana hayuma yakumbidi nawa asha maana hachiseki, akutuluwañesha. Neyi mukwaKristu yadikundaña nawantu amuchidiwu niyena wukwikala nayilwilu yatama. Kafwampi nateli kutachika kwila yuma yahelayi Nzambi. Dihafumini Pawulu kukonkomwena nindi: “Toñojokenuña chiwahi kulonda mwileña mwaya kuloña nawa bayi mukoña nshidiku.”—1 Kor. 15:33, 34.

7. Kwesekeja na 1 Akorinda 15:35-38, lwihwinyi lwadihwileñawu antu amakwawu kutalisha hakusañuka?

⁷ Tañenu 1 Akorinda 15:35-38. Muntu wakeñeleña nindi akwawu ajinokeña hansañu  yakusañuka watela wehwileña nindi: “Indi afu akayisañula ñahi?” Twatela kutoñojoka hañakwilu yaPawulu muloña antu amavulu makonu atoñojokaña chambukaku kutalisha hachuma chamumwekenaña muntu neyi nafwi. Indi Bayibolu yatañishaña nawudi?

8. Chakutalilahwinyi chinateli kutukwasha kwiluka mwatalisha kusañuka kwakuya mwiwulu?

⁸ Muntu neyi nafwi mujimba windi watokaña. Ilaña Yena waleñeli mawulu nimaseki nateli kusañula muntu nikumwinka mujimba wawuwahi. (Kutach. 1:1; 2:7) Pawulu wazatishili chakutalilahu chinakumwekesha nawu Nzambi hanateli kumusañula muntu namujimba wowumuku. Toñojokenu ‘halubutu’ hela “lubutu” lwamutondu. Lubutu neyi analutumbi lwamenaña nakwikala mutondu. Mutondu wunameni wambukaña nalubutu. Pawulu wesekejeli ichi chuma nakumwekesha nindi Nleñi yetu nateli kutwinka “mujimba kwesekeja nanochu chinakeñiyi yomweni.”

9. 1 Akorinda 15:39-41 yahosha nawudi kutalisha hanyijimba yamboka-mboka?

⁹ Tañenu 1 Akorinda 15:39-41. Pawulu washimwini nindi Nzambi haleñeli nyijimba chochimuku. Chakutalilahu kwekala nyijimba yamboka-mboka chidi neyi añombi, atuda niinshi. Wahosheli nindi mwiwulu twamonañamu chaambu chekala hakachi ketena nakakweji. Nawa washimwini nindi, “katumbwa-hikatumbwa kashiyashana nakakwawu mukulema.” Hela chakwila hitwamonaña ichi chaambu namesu etuku, asayantisiti ahoshaña nawu kwekala tutumbwa twamboka-mboka tukwawu twamaneni, tukwawu twanyanya, tukwawu tuchinana, tukwawu tutooka tukwawu tukweti wulombu wansela, chidi neyi itena. Pawulu washimwini cheñi nindi “kwekala nyijimba yamwiwulu ninyijimba yahamaseki.” Watalishili mudihi? Hanu hamaseki tukweti nyijimba yanyisunyi, ilaña mwiwulu akweti nyijimba yakuspiritu, neyi yikweti añelu.

10. Mujimba wamuchidinyi wekalaña namuntu asañulañawu nakuya mwiwulu?

 ¹⁰ Talenu chahosheliyi cheñi Pawulu, nindi: “Dichi chekala nikusañuka kwawafu. Mujimba watokaña awutumbaña, ilaña mujimba wasañulañawu watokaña wanyi.” Hela chochu, muntu neyi nafwi, mujimba watokaña nawa wafuntaña cheñi kulunkuñu. (Kutach. 3:19) Hanu dinu “mujimba wasañulañawu watokaña wanyi” munjilanyi? Pawulu wahosheleña wanyi hadi antu asañulañawu nawumi wahamaseki, chidi neyi ana asañwiluwu kudi Elija, Elisha niYesu. Pawulu wateneneña antu asañulañawu namujimba wamwiwulu, dikwila nawu ‘mujimba wakuspiritu.’—1 Kor. 15:42-44.

11-12. Kuhimpikanyi kwamumwekeneni Yesu hamusañwiliwu, nawa awayishewa amonaña ñahi chuma chochimu?

¹¹ Hampinji yadiñayi Yesu hamaseki, wadiña namujimba wawuntu. Ilaña chamusañwiliwu “wekalili spiritu yahanaña wumi” nawa wafuntili mwiwulu. Munjila yoyimu, akwaKristu awayishewa akayisañula nawumi wamwiwulu. Pawulu walumbulwili nindi: “Neyi chochitwafwana muntu aleñeliwu nalunkuñu, dichi chitwakafwana ninowu wafumini mwiwulu.”—1 Kor. 15:45-49.

¹² Pawulu wakunkulwileña nsañu yahosheleñayi kutalisha hakusañuka. Twatela kwanuka netu Yesu hiyamusañwili namujimba wawuntuku. Dichi, Pawulu wahosheli nindi: “Mujimba wamashi hiwakaswana Wanta waNzambiku,” dikwila nawu mwiwulu. (1 Kor. 15:50) Apostolu niawayishewa amakwawu hiyakayisañula nakuya mwiwulu nanyijimba yanyisunyi yatokaña nawa yamashiku. Akayisañula mpinjinyi? Pawulu washimwini nindi akayisañula kumbidi; bayi neyi hanyima yakufwaku. Hampinji yasonekeliyi Pawulu mukanda wa 1 Akorinda, atumbanji amakwawu adiña “anakaami dehi mutulu twakufwa,” chakutalilahu kapostolu Yakoba.  (Yilw. 12:1, 2) Apostolu amakwawu niawayishewa adiña kanda ‘akaami mutulu twakufwa.’—1 Kor. 15:6.

13. Yumanyi yikamwekana “hampinji yakwikalahu” kwaYesu?

¹³ Yesu niPawulu ateneneña mpinji yalema yakumbidi, mpinji yakwikalahu kwaKristu. Hampinji yakwikalahu kwaKristu mukaayi mwakekala jinjita, nyitentanshi, yipupu niyuma yikwawu yatama. Kufuma tuhu mu 1914, tunakumona iwu wuprofwetu wamuBayibolu chiwunakushikijewa. Kwakela cheñi chinjikijilu chikwawu chalema chikamwekana. Yesu wahosheli nindi nsañu yayiwahi yaWanta waNzambi akayishimwina “mwahita iseki dejima mwashakamawu antu kulonda yikekali wunsahu kudi akwanyuza yejima, mwaka dinu kukuma kwakenzi.” (Mat. 24:3, 7-14) Pawulu washimwini nindi “hampinji yakwikalahu kwaMwanta” yakekala cheñi mpinji yakusañula akwaKristu awayishewa “akaama mutulu twakufwa.”—1 Tes. 4:14-16; 1 Kor. 15:23.

14. Chumanyi chamwekanaña kudi akwaKristu awayishewa anakufwa mumpinji yakwikalahu kwaKristu?

¹⁴ Awayishewa adiku makonu ashikenaña dakuyisañula hohenohu nakuya mwiwulu neyi anafwi. Chumichi chinesekani chiwahi namazu aPawulu asonekawu ha 1 Akorinda 15:51, 52, nawu: “Wejima wetu hitwakakaama mutulu twakufwaku, ilaña wejima wetu akatuhimpa, mukapinji kantesha, mukulabula kwadisu, hampinji yakavuma mpuña yakukumishaku.” Awa mazu aPawulu anakushikijewa. Chikayisañulawu awa amanakwaKristu akekala namuzañalu chikupu nawa akekalaña “hamu naMwanta mpinji yejima.”—1 Tes. 4:17.

15. Mudimwinyi wukazatañawu antu akahimpawu “mukulabula kwadisu”?

 ¹⁵ Bayibolu yatulejaña mudimu wukazatañawu mwiwulu antu akahimpawu “mukulabula kwadisu.” Yesu wayilejeli nindi: “Muntu wemikaña mushindu nawa walondelaña nyidimu yami ndo-o nikunsa, nakamwinka wuswa hadi nyuza yejima, nawa iwu muntu wakabiñaña antu nakabama kachikuñu kulonda yakayibaloli neyi yuma yamawumba, neyi chinatambwila ami wuswa kudi Tata.”(Chim. 2:26, 27) Akamulondelaña Yesu nikubiña nyuza nakabama kachikuñu.—Chim. 19:11-15.

16. Indi antu amavulu akemika ñahi mushindu kufwa?

¹⁶ Awayishewa akemika mushindu kufwa. (1 Kor. 15:54-57) Neyi anayisañuli dehi, chikayikwashaku kuzatila hamu mudimu wakufumishahu yuma yatama yejima hanu hamaseki hampinji yanjita yaAmagedoni. AkwaKristu amavulu amayala niambanda “[akafuma] mulukadi lwasweja” nakwiñila mwituña dadiha. (Chim. 7:14) Antu akapuluka akamona cheñi chakashindawu kufwa hampinji yakasañulawu yihita yawantu afwili dehi kunyima. Toñojokenu hamuzañalu wutukatiya hampinji yitukamona yumiyi! (Yilw. 24:15) Antu ejima ashinshika kudi Yehova akashinda cheñi kufwa kwaswanawu kudi Adama. Akashakama haya nyaaka.

17. Kwesekeja 1 Akorinda 15:58, chumanyi chitwatela kwila?

¹⁷ AkwaKristu ejima adiku makonu atela kuzañalala namazu akukundeja asonekeleliyi Pawulu aKorinda kutalisha hakusañuka. Tukweti yuma yayivulu yinateli kutuletesha kovwahila mazu aPawulu akuzata nankashi “mumudimu waMwanta.” (Tañenu 1 Akorinda 15:58.) Neyi tuzataña hakumina ñovu jetu muniwu mudimu, tukekala namuzañalu kumbidi. Ichi chihandilu chikawaha chikupu kubadika chuma chidi chejima chidiku makonu. Chumichi chikamwekesha nawu kudikita kwetu kutwadikitaña mudi Mwanta kwamukunkulwayi wanyi.