1-2. Ang’o momiyo Jokristo duto onego onon wach chier mar joma biro dhi e polo?

THOTH jotich Jehova ma kindegi nigi geno mar dak e piny nyaka chieng’. Kata kamano, Jokristo mowal ma pod ni e piny nigi geno ni ibiro chiergi mondo gidhi gidag e polo. Jokristo mowalgo nigi siso mar ng’eyo ni ngimagi biro chalo nade ka gidhi e polo. Kata kamano, ang’o momiyo Jokristo ma nigi geno mar dak e piny bende onego onon wachno? Mana kaka wabiro neno, chier mar joma biro dhi e polo biro kelo gueth ne joma biro dak e piny nyaka chieng’. Omiyo, bed ni wageno dhi e polo kata dak e piny ka nyaka chieng’, ber ka wanono wach chier mar joma biro dhi e polo.

² Nyasaye notayo moko kuom jopuonjre Yesu mondo ondik weche moko e wi chier mar joma biro dhi e polo. Jaote Johana nondiko niya: “Sani koro wan nyithind Nyasaye, kata kamano, pok oelnwa maler gino ma wanabed. Wang’eyo ni e kinde mar fwenyruokne, wanabed ma chal kode.” (1 Joh. 3:2) Kuom mano, Jokristo mowal ok ong’eyo kaka gibiro chalo bang’ kosechiergi gi del mar roho. Gima ging’eyo en ni gibiro neno Jehova gi wang’gi e kinde ma obiro miyogie pokgi. Muma ok nyiswa weche duto e wi chier mar joma biro dhi e polo, kata kamano, jaote Paulo nonyisowa weche moko e wi wachno. Jokristo mowalgo biro bedo gi Yesu e kinde ma obiro goloe “loje, gi telo, kod teko duto.” Mano oriwo ‘jasigu mogik  ma ibiro tiek ma en tho.’ Gikone, Yesu, kaachiel gi joloch wetene, biro dwoko ne Jehova gik moko duto. (1 Kor. 15:24-28) To mano kaka kindeno nobed kinde ma jaber! *

3. Ka luwore gi 1 Jo-Korintho15:30-32, ere kaka geno ma Paulo ne nigo e wi chier nokonye?

³ Geno mar chier nokonyo Paulo nano e bwo tembe ma noromogo. (Som 1 Jo-Korintho 15:30-32.) Nowacho ne Jo-Korintho niya: “Tho ochoma pile.” Paulo nondiko bende niya: “Asekedo gi ondiegi e Efeso.” Samoro ne owuoyo e wi kedo gi le aching’ mana kaka ne itimo e pewe mag Efeso. (2 Kor. 1:8; 4:10; 11:23) Kata, nyalo bedo ni nowuoyo e wi Jo-Yahudi kod jomamoko ma ne nigi kido ma chal gi mag “ondiegi.” (Tich 19:26-34; 1 Kor. 16:9) Kata bed ni Paulo noromo gi chandruoge malich ma chalo nade, pod nosiko komor nikech geno ma ne en-go mar kinde ma biro.​—2 Kor. 4:16-18.

4. Ere kaka geno mar chier osejiwo Jokristo mathoth e kindegi? (Ne picha manie nyim gaset.)

⁴ Wadak e kinde matek ahinya. Moko kuom owetewa oseyudo hinyruok nikech timbe mag mahundu. Moko kuomgi to odak kuonde ma lweny ng’enyie kendo mano miyogi luoro ahinya. Moko kuomgi bende odak e pinje ma sirkal ogoyoe tijwa marfuk kata kuonde ma sirkal oketo chike moko matek ma monogi lamo Jehova ka gin thuolo. Kata kamano, pod gitiyo ne Jehova kata ka po ni mano nyalo miyo otuegi e jela kata oneggi. Owete gi nyimine modak e pinje kaka mago ketonwa ranyisi maber ahinya mar nano. Ging’eyo maber ni kata ka githo e kindegi, Jehova osingonegi ngima maber e kinde ma biro.

5. En paro mane mobam ma nyalo ketho geno ma wan-go mar chier?

⁵ Paulo nosiemo owetene ni gitang’ gi joma ne nigi paro moro mobam ma ne wacho niya: “Ka kare ok chier jo motho, ‘wachiemuru kendo wameth nimar kiny wanatho.’” Nitie joma ne nigi paro ma kamano kata e kinde ma Paulo ne pok ochako tij yalo. Nyalo bedo ni Paulo ne wacho weche ma yudore e Isaya 22:13 ma nyiso paro mobam ma Jo-Israel ne nigo. Kar sudo machiegni gi Nyasaye, ne gidich mana gi gik ma ne kelonegi mor giwegi. Paro ma Jo-Israelgo ne nigo ne en ni gicham achama ngima nikech ginyalo tho sa asaya, to mano e paro ma ji mathoth nigo e kindegi. Muma nyisowa gima paro marachno nokelo ne ogandano.​—2 We. 36:15-20.

6. Ere kaka geno mar chier onego okonywa sama wayiero osiepewa?

⁶ Adiera ma wan-go ni Jehova biro chiero jo motho onego omi wayier maber osiepe ma wang’iyogo. Owete ma ne ni Korintho ne onego otang’ gi osiepe ma ne kwedo wach chier. Mano puonjowa gimoro e kindewagi: Onge ber moro amora ma wabiro yudo ka wamako osiep gi joma odich mana gi gik ma kelonegi mor gin giwegi. Ka wariwore gi joma kamago, ginyalo ketho timbewa mabeyo. Joma kamago nyalo miyo wachak timo gik ma Nyasaye osin-go. Mano e momiyo Paulo nosiemogi matek niya: “Pachu mondo ochiew e yo makare kendo weuru timo richo.”​—1 Kor. 15:33, 34.

7. En penjo mane ma jomoko ne nyalo penjo e wi chier kaka inyisowa e 1 Jo-Korintho 15:35-38?

⁷ Som 1 Jo-Korintho 15:35-38. Ng’at ma dwaro ni jomamoko obed gi kiawa e wi chier ne nyalo penjo niya: “Ere kaka ibiro chier jo motho?” Ber nono dwoko ma ne Paulo ochiwo e wi penjono, nikech ji mang’eny nigi paro mopogore opogore e wi kuma jo motho dhiye. En ang’o ma Muma puonjo e wi wachno?

8. En ranyisi mane ma nyalo konyowa ng’eyo kaka ibiro chier joma dhi e polo?

⁸ Sama ng’ato otho, dende tow. Kata kamano, Jachuech mar gik moko duto nyalo chiero ng’at ma kamano ma chak miye del manyien kendo. (Cha. 1:1; 2:7) Paulo notiyo gi ranyisi ma nyiso ni Nyasaye nyalo chiero ng’ato ma ok ochuno ni odwokne ringre ma ne en-go chon. Par ane ranyisi mar ‘kodhi moro matin.’ Sama ochuo kodhi e lowo, otwiga. Gima twino opogorega ahinya gi kodhi ma ne ochuo. Paulo notiyo gi ranyisino e nyiso ni Jachuechwa nyalo miyo ng’ato “del kaka en owuon ohero.”

9. Ndiko mar 1 Jo-Korintho 15:39-41 wacho ang’o e wi kit del mopogore opogore?

⁹ Som 1 Jo-Korintho 15:39-41. Paulo nowacho ni Nyasaye ne ok ochueyo ringruok duto e yo ma chal. Kuom ranyisi, nitie ringruok mar jamni, mar winy, kod mar rech. Nowacho bende ni nitie pogruok e kind chieng’ kod dwe. Kendo nowacho ni “sulwe achiel nigi duong’ moloyo sulwe machielo.” Kata obedo ni ok wanyal neno sulwe mopogore opogore gi wengewa, jo sayans nyisowa ni nitie sulwe madongo, matindo, ma rochere, ma rokwere, kod ma rotonge kaka wang’-chieng’. Paulo nowacho bende ni “nitie del mag polo gi del mag piny.” Ang’o ma notemo wacho? Gima nowacho en ni e piny kae wan gi del mag ringruok, to joma odak e polo nigi del mar roho kaka mar malaike.

10. Joma ibiro chier mondo odhi e polo biro bedo gi del ma chal nade?

 ¹⁰ Ne ane gima Paulo nowacho bang’ mano: “Kamano bende e kaka ichiero jo motho. Ichuoye e del ma tow; to ichiere gi del ma ok tow.” Wang’eyo maber ni ka ng’ato otho, to dende tow kendo odok e buru. (Cha. 3:19) Omiyo, ere kaka inyalo wach ni ‘ichiero ng’ato gi del ma ok tow’? Paulo ne ok wuo kuom joma ichiero mondo odag e piny kaka joma ne Elija, Elisha, kod Yesu ochiero. To nowuoyo e wi joma ichiero gi del mar roho, tiende ni, “del mar polo.”​—1 Kor. 15:42-44.

11-12. En lokruok mane ma notimore e ngima Yesu ka nochiere, to ere kaka gima kamano bende timorega ne Jokristo mowal?

¹¹ Ka ne Yesu nie piny ka, ne en gi del mar ringruok, to ka ne ochiere, nomiye “del mar polo ma chiwo ngima,” kae to odhi e polo. E yo ma kamano, Jokristo mowal bende ibiro chier gi del mar roho. Paulo lero wachno niya: “Mana kaka wasebedo e kit jal mochue gi buru, wanabed bende e kit jalo moa e polo.”​—1 Kor. 15:45-49.

¹² Ber ng’eyo ni ne ok ochier Yesu ka en gi del mar ringruok. Ka ne Paulo chiegni tieko wuoyo e wi chier, nolero wachno kowacho ni “ringruok gi remo ok nyal yudo pok e Pinyruodh Nyasaye” e polo. (1 Kor. 15:50) Joote Yesu kaachiel gi Jokristo mamoko mowal ok nyal chier mondo gidhi e polo ka pod gin gi del mar ringruok gi remo ma en gima tow. To ne idhi chiergi kinde mage? Paulo nowacho ni chier ma kamano ne dhi timore e kinde ma biro, to ok mana mapiyo bang’ thogi. E kinde ma Paulo nondiko barua mokwongo ne Jo-Korintho, nitie jopuonjre moko ma ne “osenindo e tho,” kaka jaote Jakobo. (Tich 12:1, 2) Joote kaachiel gi Jokristo mamoko mowal bende bang’e ne dhi ‘nindo e tho.’​—1 Kor. 15:6.

13. Ere kaka ji ne dhi ng’eyo ni Yesu koro nitie e loch?

¹³ Yesu gi Paulo nowuoyo e wi kinde moro makende, tiende ni kinde ma Kristo ne dhi bedo e loch. E kindeno, lweny, yiengni mag piny, tuoche, kod gik mamoko maricho ne dhi betie. Waseneno ka weche ma Muma nokorogo timore chakre higa mar 1914. Nitie gimoro machielo makende ma be ne dhi timore e kindego. Yesu nowacho ni wach maber mar Pinyruodh Nyasaye ne idhi “yal e piny mangima mondo obed ranyisi ne ogendni duto, eka giko nobi.” (Mat. 24:3, 7-14) Paulo nowacho ni “kinde ma biro yudo ka Ruoth nitie” e loch, e kinde ma Jokristo mowal ma ‘nosenindo e tho’ bende ne idhi chier.​—1 The. 4:14-16; 1 Kor. 15:23.

14. En ang’o ma timore ne Jokristo mowal ma tho e kinde ma Kristo nitie e loch?

¹⁴ Jokristo mowal ma tieko wuodhgi e kindegi, ichiero gikanyono mondo gidhi e polo. Mano luwore gi weche ma Paulo nowacho e 1 Jo-Korintho 15:51, 52 niya: “Ok wabi nindo waduto e tho, to waduto ibiro lokwa mapiyo ka diemo wang’, e kinde ywak mar turmbeta mogik.” Weche ma Paulo nowachogo timore e kindegi! Bang’ kosechier owete Kristogo, gibiro bedo ma mor gadier nimar ‘ginibed gi Ruoth kinde duto.’​—1 The. 4:17.

15. En tich mane ma joma ibiro ‘lok mapiyo ka diemo wang’’ biro timo?

¹⁵ Muma nyisowa tich ma joma ibiro ‘lok mapiyo ka diemo wang’go’ biro timo. Yesu wachonegi niya: “Ng’at ma olocho kendo ma oluwo timbena nyaka giko, abiro miye teko mar locho e  wi ogendni, kendo jalo biro bedo jakwadh oganda kotiyo gi luth mar chuma, mi enotogi matindo tindo ka gik mochue gi lowo, mana kaka an bende aseyudo teko koa kuom Wuora.” (Fwe. 2:26, 27) Gibiro luwo Jatendgi ka gikonye e tij kwayo ogendni gi luth mar chuma.​—Fwe. 19:11-15.

16. En yo mane ma ji mathoth biro nenoe ka iloyo tho?

¹⁶ Nenore maler ni Jokristo mowal biro loyo tho. (1 Kor. 15:54-57) Ka osechiergi, gibiro tiyo kanyachiel gi Yesu e tieko gik maricho duto ma ni e piny e lweny mar Har–Magedon. Jokristo mamoko tara gi tara moriwo chwo kod mon biro ‘wuok e masira maduong’’ kendo ginitony ma gidonj e piny manyien. (Fwe. 7:14) Joma biro tonygo biro neno kiloyo tho e yo machielo kendo​—ginine kichiero ji tara gi tara ma notho e kinde machon. Parie kaka kinde ma kamago nobed kinde mag mor mogundho! (Tich 24:15) Kae to joma biro siko komakore gi Jehova ok nochak otho nikech richo mar Adam. Gibiro dak nyaka chieng’.

17. Ka luwore gi 1 Jo-Korintho 15:58, en ang’o monego watim?

¹⁷ Jakristo moro amora ma pod ngima onego obed ma mor nikech adiera ma wan-go e wi chier ma Paulo nondiko ne Jo-Korintho. Wan gi gik mang’eny momiyo wayie gi wach ma Paulo nowacho ni wadhi nyime bedo “modich e tij Ruoth.” (Som 1 Jo-Korintho 15:58.) Ka watimo duto ma wanyalo e tijni, to mano biro miyo wabed gi geno ma jaber mar kinde ma biro. Ngima e piny manyien nobed mamit moloyo kaka waseparoga. E kindeno, wanane gadier ni kinda ma ne watimo ne ok odhi nono.