1-2. Engvângin nge Kristian zawng zawngin vân nunna chang tûrte thawhlehna chu an ngaihven ang?

TUNA Jehova rawngbâwl mi tam takte chuan leia chatuana nun beiseina an nei a. Mahse, thlarauva hriak thih Kristian la bângte chuan vân nunna chang tûra kaihthawh an beisei a ni. Chûng hriak thihte chuan nakin huna an nun dân tûr chu an ngaihven tak zet a; a nih leh, lei lam beiseina neite chungchâng hi eng nge ni ve? Kan la hriat tûr angin, vân nunna chang tûrte thawhlehna chuan leia chatuan nun beiseina neite tân pawh malsâwmna a thlen ang. Chuvângin, kan beiseina chu vân lam a ni emaw, lei lam a ni emaw pawh ni se, kan za hian vân nunna chang tûrte thawhlehna chu kan ngaihven ṭheuh tûr a ni.

² Pathianin kum zabi khatnaa Isua zirtîr ṭhenkhat chu vân lam beiseina chungchâng ziak tûrin thlarauvin a thâwk khum a. Tirhkoh Johana chuan: “Tûnah hian Pathian fate kan ni a, engtin nge kan la awm dâwn tih erawh chu a la lang rih lo ve; amah a lo inlâr chuan amah angin kan awm dâwn tih zawng kan hria, amah chu a awm pângngai ang takin kan hmu dâwn si a,” tiin a hrilhfiah a ni. (1 Joh. 3:2) Chuvângin, hriak thih Kristiante chuan thlarau taksaa vân nunna changa kaihthawha an awm hunah eng ang nge an nih dâwn tih an hre lo. Mahse, lâwmman an dawn hun chuan Jehova chu a takin an hmu tawh ang. Bible chuan vân nunna chang tûrte thawhlehna chungchâng chu chipchiar takin a sawi lo va; mahse, tirhkoh Paula chuan chumi chungchâng chu tlêm azâwng a  sawi lang a ni. Hriak thihte chu Krista’n “rorêlna zawng zawngte leh, thuneihna leh thiltihtheihna zawng zawngte a tihbo hnuah” a hnênah an awm ang. Chu a tihbo tûrte zîngah chuan ‘hmêlma hnuhnûng ber, thihna’ pawh a tel a ni. A tâwpah, Isua chuan a rorêlpuite rualin thil engkim chu Jehova kutah a dah tawh ang. (1 Kor. 15:24-28) Hun phûrawm tak a va ni dâwn êm! *

3. Korinth thawn khat 15:30-32-a târ lan angin, Paula chu thawhlehna a rinnain eng ti tûrin nge a ṭanpui?

³ Paula chu thawhlehna a rinnain fiahna chi hrang hrang hmachhawn thei tûrin a ṭanpui a. (1 Korinth 15:30-32 chhiar rawh.) Korinth khuaa mite hnênah: “Nî tin ka thi ṭhîn,” a tih bâkah, ‘Ephesi khuaa sakawlhte chu bei ka ni,’ tiin a ziak bawk. Ephesi khuaa insualna tuala ramsa tak tak a beihna chungchâng a pehhêl zâwnga a sawina a nih a rinawm. (2 Kor. 1:8; 4:10; 11:23) A nih loh leh, Juda thinur takte leh “sakawlhte” ang mi dangte a sawina pawh a ni thei bawk. (Tirh. 19:26-34; 1 Kor. 16:9) A enga pawh chu ni se, dinhmun hlauhawm tak a hmachhawn chung pawhin, Paula chuan hma lam hun chu a êng zâwngin a thlîr tlat a ni.—2 Kor. 4:16-18.

4. Engtin nge thawhleh beiseina chuan tûn laia Kristiante chu a tihchak? (A kâwma milem en rawh.)

⁴ Hun hlauhawm takah kan awm mêk a. Kan unau ṭhenkhat chu dân bawhchhiaa puh an ni a. Mi dangte chu indona hmuna an awm avângin him nia inhriatna an nei lo va. Mi dang lehte chu thu hrilh rawngbâwlna khuahkhirh, a nih loh leh khap behna ramahte Jehova rawngbâwla an awm avângin an nun thâpin emaw, zalênna nei lovin emaw an awm bawk. Chuti chung pawhin, chûng kan unau zawng zawngte chuan Jehova biaknaah ṭhahnem an ngaiin kan tân entawn tûr ṭha an siam a ni. Tûn hunah hian an nun an chân a nih pawhin, Jehova’n an tân nakin hun ṭha zâwk a buatsaih tih an hriat avângin an hlau lo.

5. Eng ngaih dân hlauhawm takin nge thawhlehnaa kan rinna tiderthâwng thei?

⁵ Paula chuan a unaute chu: “Mitthi kaihthawha an awm dâwn loh chuan i eiin i in ang u hmiang, naktûkah kan thi dâwn alâwm,” tia mi ṭhenkhatte ngaih dân hlauhawm tak lakah a vaukhân a. Chutiang ngaih dân chu Paula hun hma aṭang daih tawhin a lo awm tawh a ni. Ani chuan Israel mite rilru put hmang sawina ni thei Isaia 22:13-a thu chu a la chhâwng a nih a rinawm. Pathian hnaih aiin, nawmsip bâwlna nun kawng chu an ûm zâwk a. A nihna takah chuan, chûng Israel mite rilru put hmang chu tûn laia mi nâwlpuite ngaih dân ang, “Dam chhûng hun tawi tê hi i chên ang aw,” tih hi a ni. Mahse, chutiang ngaih dân an neih avânga a tâwpa Israel mite chunga thilthleng ṭha lo tak chu Bible-a chhinchhiah a ni.—2 Chro. 36:15-20.

6. Engtin nge thawhleh beiseina chuan ṭhian kawm tûr kan thlannaah nghawng a neih ang?

⁶ Jehova’n mitthite a kaitho thei tih thu chuan ṭhian kan thlannaah nghawng a nei tûr tih a chiang hle. Korinth khuaa unaute chu thawhlehna ring lotute nêna inkâwm lo tûra an fîmkhur a ngai a. Heta ṭanga kan zir theih chu: Tûn dam chhûng tân chauhva nungte nêna inkawm ziahna aṭangin thil ṭha engmah a chhuak thei lo tih hi a ni. Chutiang mite nêna inkawmna chuan Kristian dikte thlîr dân leh chîn dân ṭhate chu a tichhe thei a. Dik tak chuan, Pathian huat zâwng thilte ti tûrin min chêttîr thei a ni. Chuvângin, Paula chuan heti hian khauh takin a fuih a ni: “Fel takin harh ula, thil tisual suh u,” tiin.—1 Kor. 15:33, 34.

7. Korinth thawn khat 15:35-38-a târ lan angin, mi ṭhenkhatin eng zawhna nge an zawh mai theih?

⁷ Korinth thawn khat 15:35-38 chhiar rawh. Thawhlehna chungchânga rinhlelhna min neihtîr duhtute chuan: “Mitthite chu engtin nge kaihthawhin an awm dâwn?” tiin an zâwt mai thei. Tûn laiah, mi tam takin thih hnu lam nun chungchângah mi mal ngaih dânte an neih ṭhin avângin, Paula chhânna chu ngun taka kan ngaihtuah a ngai a ni. A nih leh, chumi chungchânga Bible zirtîrna chu eng nge ni?

8. Eng tehkhin thuin nge vân nunna chang tûrte thawhlehna hre thiam tûra min ṭanpui thei?

⁸ Mi a thih hian a taksa chu a ṭawihral a. Mahse, engmah lo aṭanga lei leh vân Siamtu chuan mitthi chu kai thovin, a mamawh ang taksa chu a pe leh thei a ni. (Gen. 1:1; 2:7) Paula chuan Pathianin a taksa ngai chiah puin a kaihthawh a ngai lo tih târ lan nân tehkhin thu a hmang a. Thlai “chi” hi han ngaihtuah teh. Thlai chi kan tuh hian a lo chawr chhuakin, a kûng thar a lo insiam ta ṭhîn a. A kûng lo ni ta chu a chi nên chuan a inang tawh lo a ni. Paula chuan min Siamtuin “ama duh ang zêlin taksa” a pe thei tih târ lan nân chu tehkhin thu chu a hmang a ni.

9. Taksa chungchângah, 1 Korinth 15:39-41-na chuan eng thil inang lote nge min ngaihtuahtîr?

⁹ Korinth thawn khat 15:39-41 chhiar rawh. Paula chuan Pathianin a thil siam zawng zawngte chu tisa inang vekin a siam lo tih a sawi a. Entîr nân, ramsa te, sava te, leh sanghate chu an tisa a inang lo vek a. Vâna awm nî leh thla inan lohna pawh a târ lang bawk. Tichuan, “Arsi leh arsi pawh ropuinaah chuan a inang si lo,” tiin a sawi. Ni e, chu chu kan mit ngeiin kan hmu thei lo pawh a ni thei, scientist-te chuan arsi tê deuh te, arsi lian deuh te, arsi sen te, arsi vâr te, leh kan nî ang chi arsi engte pawh a awm thu min hrilh a. Paula chuan, “Vân taksate a awm bawk a, lei taksate pawh,” tiin a sawi bawk. A sawi tum chu eng nge ni? He leiah hian lei taksa kan  nei a; mahse, vâna awmte chuan vântirhkohte neih ang thlarau taksa an nei a ni.

10. Vân kal tûrte chuan an thawhleh hunah eng taksa nge an neih ang?

¹⁰ A dawta Paula sawi hi lo chhinchhiah teh: “Mitthi thawhlehna pawh hi chutiang bawk a ni. Ṭawih theia tuhin a awm a; ṭawih thei lova kaihthawhin a awm,” tih hi. Ni e, kan thih hian mihring taksa chu a ṭawih a, vaivutah a chang leh a ni. (Gen. 3:19) A nih leh, engtin nge taksa chu ‘ṭawih thei lova kaihthawha’ a awm theih? Paula chuan Elija te, Elisa te, leh Isua te’n an kaihthawh mihring chungchâng a sawi a ni lo. Chu aiin, vân taksa, ‘thlarau lam taksaa’ tho lehte chungchâng a sawina a ni zâwk.—1 Kor. 15:42-44.

11-12. Isua a thawhleh khân eng inthlâk danglamna nge a neih a, hriak thihte chuan chutiang chu engtin nge an tawn ang?

¹¹ Isua chuan leia a awm laiin mihring taksa a nei a. Mahse, kaihthawha a awm chuan “nunna petu thlarau a lo ni a,” vânah a kîr leh a ni. Chutiang bawkin, hriak thih Kristiante pawh thlarau nunna neiin an tho leh ang. Paula chuan: “Leia siam mi anna kha kan put angin, vâna mi anna chu kan pu bawk dâwn a ni,” tiin a hrilhfiah a ni.—1 Kor. 15:45-49.

¹² Paula chuan thawhlehna chungchâng a sawina chu a titâwp hnai tawh a. Isua chu mihring taksa pua kaihthawh a ni lo tih chhinchhiah chu thil pawimawh tak a ni. Paula chuan: “Tisa leh thisen hian Pathian ram chu a luah thei lo,” tiin chiang takin a sawi a. (1 Kor. 15:50) Tirhkohte leh hriak thihte chu ṭawih thei tisa leh thisen neiin vân nunna neia kaihthawh an ni lo vang. A nih chuan, eng hunah nge anni chu an thawhleh ang? Ani chuan chu thawhlehna chu nakina thleng tûr a nihzia a sawi uar a; an thih ruala thleng nghâl mai tûr a ni lo. Paula’n Korinth khuaa mite hnêna a lehkha thawn pakhatna a ziah lai chuan zirtîr ṭhenkhat chu ‘thihnaah an muhîl tawh a,’ chûng zîngah chuan tirhkoh Jakoba pawh a tel a ni. (Tirh. 12:1, 2) Mahse, tirhkoh dangte leh hriak thihte erawh chu ‘thihnaah an la muhîl’ rih lo.—1 Kor. 15:6.

13. Engtin nge Isua lo awm lehna chu chhinchhiah a nih ang?

¹³ Isua leh Paula chuan mihring chanchina hun pawimawh tak, Krista lo awm lehna chungchâng an sawi lâwk a. Chu a lo awm lehna chu indona te, lîrnghîng te, ṭâm te, leh khawvêl pum huapa thilthleng dangte hmanga chhinchhiah a ni ang. Chu Bible hrilh lâwkna chu kum 1914 aṭangin a thleng famkim ṭan tih kan hmu a. Chu chhinchhiahnaah chuan pêng pawimawh tak dang pawh a awm a ni. Isua chuan din tawh Pathian Lalram chanchin ṭha chu “hnam zawng zawng hriattîrna tûrin khawvêl zawng zawngah hrilin a awm ang a; chumi zawhah chuan tâwpna chu a lo thleng ang,” tiin a sawi a. (Mt. 24:3, 7-14) Paula pawhin, “Lalpa lo awm lehna” chu ‘thihnaa muhîl’ hriak thih Kristiante tâna thawhlehna hun a ni ang tih a sawi bawk.—1 Thes. 4:14-16, NW; 1 Kor. 15:23.

14. Krista lo awm leh chhûnga boral hriak thihte chungah eng nge thleng?

¹⁴ Tûn laia an lei lam nun hmang zo tawh hriak thih Kristiante chu vân nunna chang tûrin an tho nghâl a. Chu chu 1 Korinth 15:51, 52-a: “Kan zain kan muhîl kher lo vang a; nimahsela, kan zain tawtawrâwt hnuhnûng ber rîk hunah chuan rei lo têah, mit khap kâr lovah tihdanglamin kan awm vek tawh ang,” tia Paula thusawi hian a nemnghet a ni. Chûng Paula thusawite chu a thleng famkim mêk a! An thawhleh hun chuan, chûng Krista unaute chu nasa takin an lâwm ang a, ‘kumkhuain Lalpa hnênah an awm tawh ang.’—1 Thes. 4:17.

15. ‘Mit khap kâr lova’ tihdanglama awmte chuan eng hna nge an thawh ang?

¹⁵ Bible chuan chûng ‘mit khap kâr lova’ tihdanglama awmte vâna an hnathawh tûr chu min hrilh a. Isua chuan an hnênah heti hian a hrilh a ni: “A hnehtu apiang leh a tâwp  thlenga ka thiltihte pawmtu apiang, keiin ka Pa laka ka hmuh ang bawk hian, chu mite chu hnam tin chungah thu ka neihtîr ang; tin, anni chuan bêlvawtu bêlte keh sawm depa a awm angin thîr tiangin an ro an rêlsak ang,” tiin. (Thup. 2:26, 27) Anni chuan an Lalber hnung zuiin, thîr tiangin hnamte chungah ro an rêl dâwn a ni.—Thup. 19:11-15.

16. Engtin nge mi tam tak chuan thihna chungah hnehna an chan ang?

¹⁶ Hriak thihte chuan thihna chungah hnehna an chang dâwn tih a chiang hle. (1 Kor. 15:54-57) Anni chu lo awm tûr Armageddon indo chhûnga khawvêl pum huap suahsualna zawng zawg thenfainaa tel tûrin an tho leh ang. Kristian a hmei a pa maktaduai tam takte chu “hrehawm nasa tak ata” dam khawchhuakin khawvêl tharah an lût ang a. (Thup. 7:14) Chûng dam khawchhuakte chuan thihna chunga hnehna dang—tûn hmaa thi tawh mi tlûklehdingâwn tam tak lo tho lehte—chu an mit ngeiin an hmu bawk ang. Chu hnehna ropui tak a thlen huna a hlimawm dân tûr chu han mitthla teh! (Tirh. 24:15) Chu bâkah, Jehova chunga rinawmna vawngtu zawng zawngte chuan kan rochun thihna chungah hnehna an chang ang a. Anni chu chatuanin an nung tawh ang.

17. Korinth thawn khat 15:58-na chu rilruah dahin, tûnah eng nge kan tih ang?

¹⁷ Tûn laia Kristian zawng zawngte chu Korinth khuaa mite hnêna Paula ziah thawhlehna chungchânga thlamuanna thu avângin lâwm hle tûr kan ni. Chuvângin, “Lalpa hna” ṭhahnemngai taka thawk tûra Paula fuihna kan pawmzia lantîrna tûr chhan tam tak kan nei a. (1 Korinth 15:58 chhiar rawh.) Chu hnathawha rinawm tak leh ṭhahnemngai taka kan tel chuan nakin hun hlimawm tak chu kan beisei thei ang a. Chu nakin hun chu tûna kan ngaihtuah theih eng dang zawng ai pawhin a ṭha zâwk a. Chu chuan Lalpaa kan thawhrimnate chu a thlâwn lo tih a tichiang ngei bawk ang.