MWAHA WOOSOMIYA 50
“Atthu ookhwa anhala wunwelelihiya manannani?”
“We nookhwa, wiiva wanwo uri vayi? We nookhwa, uweerya wanwo uri vayi?”—1 AKOR. 15:55.
NCIPO 141 Ukumi unkhala itthuvo ya Nluku
NINHALA WIITTHUCANI? *
1-2. Kontha isiyani otheene cihu nihaana nicuwelaka wunwelelihiya waale anrwaa ukhala wiirimu?
ATTHU enci anonswalela Yehova ilelo, anweherera urwaa ukhalana ukumi woohimala watuninyani. Masi ihaavo ikhurupu yankaani yo makristau anweherera wunwelelihiya wiira arwee yakhale wiirimu. Ayo makristawaayo anaapheela venci ucuwela mananna cinhalaaya ukhala wiirimu. Ale akhanle ikhontwaa cikiina ciicammo anaapheela ucuwela iyo, kontha toko cinhaleehu woona nhina ula mwahoola, wunwelelihiya wo makristau oothanliya unaahala waaphwanyiha iparakha. Phimaana, hataa ukhalaka wiira ninweherera urwaa ukhala wiirimu awula watuniyani, otheene cihu nihaana nicuwelaka wunwelelihiya waale anrwaa ukhala wiirimu.
2 Nluku ahowiiriha makristau oopacera akiina wantikha mananna cinhalaaya ukhala wunwelelihiya waale anweherera ukhala wiirimu. Apostolu Joau hantikha: “Vano nihokhala asaana a Nluku, masi nanlelo khaninathoonyeriya mananna cinhaleehu ukhala. Ninaacuwela wiira, ukati uyova unhalaawe uthoonyeriya, hiiva ninhala ukhala toko uyova, kontha ninkoomoona ciryaawe.” (1 Jo. 3:2) Iyo inthoonyera wiira makristau oothanliya khancuwela mananna cinhalaaya urwaa ukhala wiirimu yunwelelihiyaka. Masi ayo ancuwela wiira anaahala umoona Yehova yarwaaka wiirimu. Ibiiblya khinttonkaca venci mananna cinhalaaya ukhala ukumi wiirimu. Masi cihaavo citthu cihimyalyaawe apostolu Paulu. Makristau oothanliya anhala ukhala wamoca ni Yesu ukati unhalaawe “umalamaliha ikuvernu cotheene, ukhulupale wotheene ni ikuru cotheene,” ni ciicammo ummalamaliha “nwanani oomalela,” ukhwa. Vano, Yesu ni makristau oothanliya otheene anaahala umwiiwelela Yehova nhina citthu cotheene. (1 Akor. 15:24-28) Khweeliini, nnyo cikhanle citthu cootteeliha nrima cinhala wiirannya! *
3. Toko cinthoonyeraaya 1 Akorintu 15:30-32, waamini wunwelelihiya waatthu ookhwa wahonkavihera Paulu upanka isiyani?
3 Waamini wunwelelihiya waatthu ookhwa wahonkavihera Paulu uvilela masakha menci. (Nsome 1 Akorintu 15:30-32. *) Uyo ahowantikhela mayamunna o Korintu co: “Miiva kinawaanana ukhwa khula nihuku.” Paulu ciicammo hantikha wiira ‘ahaattakanana inama u Efesu.’ Atthunaka Paulu aaca waattakanana inama wokhweeli nipuro no Efesu naattikheliya atthu wiira yaattakanane inama. (2 Akor. 1:8; 4:10; 11:23) Awula atthunaka uyo aawaca ayuuta ni atthu akhwaawe yanlupattha khampa “inama” cinonlupatthaaya ntthu. (Mite. 19:26-34; 1 Akor. 16:9) Khanincuweleeha wakhala wiira aaca waattakanana inama cokhweeli awula aawaaca atthu yanlupattha, masi itthu incuweleehu phiila: Paulu cahonkhumelela citthu cowoopiha, masi uyo khaahiile wuupuwela niweherero noohoolo naarinaawe.—2 Akor. 4:16-18.
Amuci ankhala ilapo unkhottihiyaaya ntekweehu, khanhiya unswalela Nluku ni wuupuwela iparakha cinhalaaya waakhela uhoolo (Nwehe iparaagarafu 4)
4. Uweherera wunwelelihiya waatthu ookhwa, unaalipiha cani makristau ilelo? (Nwehe ilatarato iri wakaapani.)
4 Hiiva ninkhala ukati wowoopiha. Mayamunneehu akiina anaapankiya ikhirini. Akhwaawe ankhala mapuro anlavaniyaaya ikhotto, ni ankhala yoovaka. Ni mayamunneehu akiina ankhala ilapo unkhottihiyaaya ntekweehu woolalyeera, ni ayo ahaana yalevaka ukumyaaya awula ahaana yaaminiki utthukeliya nkhattyaa wiira answalele Yehova. Hataa yakhalanaka masakha otheene ayo, ayo mayamunnaayo khanhiya unswalela Yehova ni unaareera waatakiha. Ayo khanoova kontha anaacuwela wiira hataa yakhwaaka nnava, Yehova naahala uwunweleliha ni waavaha ukumi womaana.
5. Moopuweleloni yaahala uniiriha uhaamini wunwelelihiya waatthu ookhwa?
5 Paulu ahaahimyera mayamunnaawe wiira anyeme moopuwelelo yaarinaaya atthu akiina. Uyo enre co: “Wakhala wiira khunhala ukhala wunwelelihiya waatthu ookhwa, paahi nttwee ‘nilye ni niwurye, kontha meelo ninookhwa.’” Ayo moopuwelelwaayo yahaavo khalayi uhinaphiya ukati wa Paulu. Uyo atthunaka aaca moolumo Isaiya yaahimyenryaawe asarayeli nhina Isaiya 22:13. Asarayeli uhiya wiikurumica umpatthanana Yehova, ayo yeekurumica utotha citthu cowaacivela. Ayo yoopuwela co: “Nttwee niilawe nenna co, kontha khanincuwela itthu inhala unikhumelela meelo.” Ayo phi moopuwelelwaayo arinaaya atthu enci ilelo. Masi itthu yaakhumelenle asarayeli inaaniitthuciha ikano yofayita.—2 Ikor. 36:15-20.
6. Kontha isiyani waamini wunwelelihiya waatthu ookhwa unaaniiriha waathanla ratta apatthaniihu?
6 Waamini wunwelelihiya waatthu ookhwa unaaniiriha waathanla ratta apatthaniihu. Mayamunna u Korintu khayaalamuliya waapatthanana atthu yahaamini wiira wahoolo unaahala ukhala wunwelelihiya waatthu ookhwa. Iyo inaaniitthuciha itthu yofayita ilelo. Naapatthananaka atthu ahinoopuwela iparakha coohoolo, masi anhoolelihera uthuka ni wiilawa paahi, anaahala unihapusa. Ayo apatthannyaayo pooti urukunusa moopuwelelweehu ni unihiiha meettelo omaana eekristau ni mpaka pooti uniiriha upanka citthu cinonrusa Yehova. Phimaana apostolu Paulu howiirela makristau: “Nkhalane ankhili omaana mpankaka citthu cosariya, ni nhivare itampi.”—1 Akor. 15:33, 34.
ANHALA WUNWELELIHIYA NIIRUTTHUNI?
7. Nihokoni niromoliye nhina 1 Akorintu 15:35-38 atthu enci nineekohaaya?
7 Nsome 1 Akorintu 15:35-38. * Ntthu hinaamini wunwelelihiya waatthu ookhwa atthunaka naakoha co: “Atthu ookhwa anhala wunwelelihiya manannani?” Unaareera wuupuwela mananna Paulu caakhunlyaawe nno nikohonno, kontha atthu enci ilelo ankupali citthu coovirikana nhina itthu inwiirannyeela atthu ookhwa. Masi Ibiiblya ineetthuciha isiyani?
Paulu ahoopela mwaha itthaka yo mwiri ukati waapheelaawe utaphulela wiira Nluku pooti waavaha atthu anhalaawe uwunweleliha irutthu yo waaphwanela (Nwehe iparaagarafu 8)
8. Ntakiheroni ninnikavihera ucuwela mananna cinonwelelihiyaaya ale anrwaa ukhala wiirimu?
8 Ntthu akhwaaka, irutthwawe inawuntta. Masi Ule umpale ituninya ni citthu cotheene khunhala unrika umunweleliha uyo ntthuuyo ni unvaha irutthu inhala umphwanela. (Upha. 1:1; 2:7) Waapankilyaawe nno ntakiheronno, Paulu aapheela uthoonyera wiira Nluku khanhala umunweleliha ntthuuyo niirutthu yaarinaawe khalayi yunttale. Uyo hotakihera itthu inkhumelela ‘niitthaka’ yo mwiri. Yaaliyaka vathi itthaka yo mwiri, iyo inaamela ni unaakhumelela mwiri wo naanaano. Uyo mwiri wophiyaaruuyo unaavirikana niitthaka yankaani yaaliye. Uttonkaca wawe nno nlattaniheronno, Paulu aapheela uthoonyera wiira Mpattusiihu pooti unvaha “irutthu” ntthu khwile “toko cinoncivelaaya.”
9. Isiyani 1 Akorintu 15:39-41 inoolumaaya nhina uvirikanaca worutthu?
9 Nsome 1 Akorintu 15:39-41. * Paulu hohimya wiira Nluku humpa irutthu cinci coovirikana, toko irutthu comope, caasinuni ni cohopa. Irutthu cotheennyo cinaavirikana. Ciicammo, Paulu hohimya wiira ncuwa ninaavirikana ni mweeri. Ni heera wiira “itthonttwa imoca inaavirikana niitthonttwa ikiina nhina mananna cinttitthimaaya.” Hiiva khaninkhitiri wooneeha itthonttwa ni miithweehu. Hataa ukhalaka commo, ahaavo anamasoma aneera wiira cihaavo itthonttwa cineehaniya “itthonttwa cuulupale cooseerya,” “itthonttwa cankaani cootteela” ni “itthonttwa cosafarawe awula copirincila,” toko ncuwa. Paulu ciicammo heera wiira “cihaavo irutthu co wiirimu ni irutthu co watuninyani.” Manannani? Ibiiblya ineera wiira cihaavo irutthu cookhalana ithayi ni makhuva, masi wiirimu cihaavo irutthu coominepani, toko irutthu irinaaya malayikha.
10. Irutthuni inkhalanaaya ale anonwelelihiya wiira arwee yakhale wiirimu?
10 Moone itthu ikiina yuulumalyaawe Paulu. Uyo enre co: “Ineerannya itthu imocaaru naale anhala wummwelela. Asikhiye niirutthu yookhwa, masi anhala uwusiya niirutthu ihinkhwa.” Hiiva ninaacuwela wiira ntthu akhwaaka, irutthwaawe inawuntta ni inaahokolela ukhala itthaya. (Upha. 3:19) Vano unkhitiryaa cani ntthu wunwelelihiya “niiritthu ihinkhwa”? Nhina iyo iveeruswiiyo, Paulu khanawaaca atthu owunwelelihiya wiira akhale watuninyani, toko ale yonwelelihiye ni Eliyasi, Elisewu ni Yesu. Masi Paulu nomwaaca ntthu nonwelelihiya niirutthu yo wiirimu, awula “yo nnepa.”—1 Akor. 15:42-44.
11-12. Yesu onwelelihiye niirutthuni, ni wunwelelihiya wawe unlattanaca cani ni wunwelelihiya wo makristau oothanliya inrukunuwa?
11 Ukati Yesu waaryaawe watuniyani, uyo aarina irutthu yeepinaatamu. Masi ukati wonwelelihiyaawe uyo hokhala “nnepa unvaha ukumi” ni hoturuwela wiirimu. Inanna imoca, makristau oothanliya yaahala wunwelelihiya niirutthu inlamuliya ukhala wiirimu. Paulu heera: “Toko cinonlatteehu ule pankiye ni ntthupi notthaya, ciicammo ninaahala unlatta ule khanle o wiirimu.”—1 Akor. 15:45-49.
12 Paulu aheetthuciha itthu yuulupale waamaliheraawe wuuluma mananna cinhalaaya wunwelelihiya atthu akhwile. Unareera wuupuwela wiira Yesu khunwelelihiye niirutthu yeepenaatamu. Ukati Paulu waamaliheraawe mwahaawe, uyo aheera: “Ithayi ni iphome khinkela muumweneni wa Nluku,” wiirimu. (1 Akor. 15:50) Phimaana, apostolu Paulu ni makristau oothanliya akiina khayaahala wunwelelihiya wiira yakhale wiirimu niirutthu yothayi ni yophome inontta. Vano ayo makristawaayo yaahala wunwelelihiya ukatini? Paulu hohimya wiira wunwelelihiya waya ayo atthwaayo waahala ukhala wahoolo. Wunwelelihiya waya khawaahala wiirannya uwakati unkhwaaya. Ukati Paulu wantikhalyaawe iwarakha yoopacera ya Akorintu, atthari a Yesu akhwaawe ‘yahoorupa muukhwaani,’ toko apostolu Tiyaku. (Mite. 12:1, 2) Maapostolu ni makristau oothanliya akiina yahaana yapacaka ‘urupa muukhwaani.’—1 Akor. 15:6.
UMALAMALIHIYA UKHWA
13. Citthuni caahala ukhumelela ‘ukati waahalaawe uwa’ Yesu?
13 Yesu ni hataa apostolu Paulu yahooluma ukati waahalaawe uwa Kristu. Uyo ukatyuuyo, caanaahala ukhumelela ikhotto, uttettemela wotthaya, iretta ni caanaahala ukhumelela citthu coohinamaana cikhwaawe ntuninyani motheene. Ukhuma mwaakha wo 1914, ninnoona iyo inatiri yo mbiiblyaniiyo yiirannyaaka. Masi ihaavo itthu yuulupale ikiina yaahala ukhumelela ukati waahalaawe uwa Yesu. Uyo enre wiira ihapari comaana co Umwene caanaahala ulalyeeriya “ntuninyani motheene munkhaliya, yahimyeriyaka atthu o khula ilapo; vano [phaahalaaya] umala ulumwenku wotuninya.” (Mat. 24:3, 7-14) Paulu hohimya wiira “ukati unhalaaya uwa Apwiiya” ciicammo yaanaahala wunwelelihiya makristau oothanliya ‘yaarupale muukhwani.’—1 Atesal. 4:14-16; 1 Akor. 15:23.
14. Isiyani inaakhumelela makristau oothanliya ankhwa ukati wa Kristu?
14 Makristau oothanliya ‘anrupa muukhwani’ nnava, ukati wa Kristu, anawunwelelihiya wowaakuvya wiira arwee yakhale wiirimu. Paulu holipihera iyo nhina 1 Akorintu 15:51, 52: “Kahi wiira atthu otheene ninaahala urupa muukhwani, masi otheene cihu ninaahala ukhalihiya inanna ikiina, wowaakuvya, uphila nuuweha, ukati unhalaaya wiipiya nipalapatta noomalela.” Ayo moolumwaayo ari mowiirannya ilelo! Makristau oothanliya yonwelelihiyaka, anaahaala ukhala ootteeliya venci. Ayo ‘ukati wotheene anhala ukhala wamoca ni Apwiiya.’—1 Atesal. 4:17.
Ale anhala wunwelelihiya “uphila nuuweha” ankonkavihera Yesu umalamaliha citthu coohinamaana cotheene (Nwehe iparaagarafu 15)
15. Ntekoni makristau oothanliya unhalaaya uvara wiirimu?
15 Ibiiblya inaanihimyera ntekoni unhalaaya uvara makristau oothanliya yonwelelihiyaka “uphila nuuweha” wiira arwee wiirimu. Awaacaka ayo makristawaayo, Yesu heera: “Ule nohala utthema ni nohala utthara iphiro caka mpaka wuumaleloni, mi kinaahala unvaha ukhulupale iriyari wolapo cotheene, ni uyo naahala uhoolela nnyo ilaponnyo niikopo yoyuuma, phimaana naahala upwesakaca nnyo ilaponnyo toko mwaapu wooloko, khampa Apaapa cikivahilyaaya ukhulupale.” (Apoka. 2:26, 27) Makristau oothanliya anaahala untthara Nhoolelyaaya, Yesu, ni anaahala uhoolela ilapo cotheene niikopo yoyuuma.—Apoka. 19:11-15.
16. Manannani apinaatamu cinhalaaya utthema ukhwa?
16 Khweeliini, makristau oothanliya anaahala utthema ukhwa, kontha ayo anaahala wunwelelihiya. (1 Akor. 15:54-57) Vano yanceraka ikhotto yo Harmacetom, ayo anhala ukhala ootthenkaciyeene wiira attheme citthu coohinamaana cotheene. Atthu enci akiina anonswalela Nluku anaahala woopwa ukati wo masakha moolupale ni anaahala ukela upeephoni. (Apoka. 7:14) Ayo anaahala ukhalana iparakha yo woona ni miithwaaya mananna ukhwa cinhalaaya utthemiya: ukati unhalaaya uwoona atthu ookhwa enci yunwelelihiyaka. Muupuwele mananna cinhaleehu ukhala ootteeliya venci noonaka iyo yiirannyaaka! (Mite. 24:15) Ni atthu otheene anhala unvaresesa Yehova anaahala utthema niinanna ikiina. Ayo anaahala utthema ukhwa uniwaanenlyaawe Atamu, ni khanhala ukhwaa-tho.
17. 1 Akorintu 15:58 innikurumica isiyani?
17 Khula nkristau haana asukhurweelaka moolumo oonilipiha anoopela mwaha wunwelelihiya waatthu ookhwa yantikhalyaawe Paulu nhina iwarakha yoopacera ya Akorintu. Otheene cihu nihaana nithoonyeraka wiira ninaatthuna weettela ikano Paulu yantikhalyaawe yo wiikurumica uvara “nteko wa Apwiiya.” (Nsome 1 Akorintu 15:58. *) Neekurumicaka uvara cinene uyo ntekooyo, ninaahala ukhalana ukumi woonitteeliha nrima wahoolo. Makhalelweehu anhala ukhala omaana, uvikana inanna cinweherereehu. Nteko wotheene unaavareleehu Apwiiya khunhala ukhala wo mahala.
NCIPO 140 Vida Eterna, Enfim!
^ par. 5 Mphatte woomalela nhina iwarakha yoopacera ya Akorintu ikapiitulu 15, unawuuluma mananna cinhalaaya wunwelelihiya atthu, venci-venci mananna cinonwelelihiyaaya makristau oothanliya. Masi citthu Paulu cantikhilyaawe pooti ciicammo waakavihera ale akhanle ikhontwaa cikiina. Ula mwahoola unaahala uthoonyera manannani wunwelelihiya waatthu ookhwa cinrukunusaaya makhalelweehu ilelo ni manannani cinnikaviheraaya uweherera makhalelo omaana uhoolo.
^ par. 2 Mwapheela wiiweeha moolumo a Paulu ari nhina 1 Akorintu 15:29, nsome mphantte wo “Makoho Aanamasoma” nhina ila irevisteela.
^ par. 3 1 Akorintu 15:30 Nlattuni hiiva ciicammo unnikhumelelaaya citthu cowoopiha khula ukati? 31 Miiva kinawaanana ukhwa khula nihuku. Iyo ikhanle ikhweeli toko cinoohimyeryaakani wiira nyuuva mayamunna nnaakitteeliha nrima, wamoca ni Yesu Kristu, Apwiiyeehu. 32 Wakhala wiira atthu ookhwa khanhala wunwelelihiya, ifayitani inhalaaka uphwanya waattakanana waka inama u Efesu, toko alopwana akiina? Wakhala wiira khunhala ukhala wunwelelihiya waatthu ookhwa, paahi nttwee “nilye ni niwurye, kontha meelo ninookhwa.”
^ par. 7 1 Akorintu 15:35 Masi, haavo nohala wiira: “Atthu ookhwa anhala wunwelelihiya manannani? Ni anhala wunwelelihiya niirutthuni? 36 Nlolo! Waalaka ipyo, iyo khinhala umela ihipacale ukhwa. 37 Ni ipyo inaalaa kahi phinhala wuunuwa, masi unhala wuunuwa nkoko wotthaka paahi, pooti ukhala nkoko wotiriku awula wotthaka ikiina; 38 masi Nluku naavaha iyo itthakeeyo irutthu toko cinoncivelaaya, ni naavaha khula itthaka irutthwaaya.
^ par. 9 1 Akorintu 15:39 Ithayi khacinlikana. Ihaavo ithayi yaapinaatamu, ni ihaavo ciicammo ithayi yomope, ithayi yaasinuni ni ithayi yohopa. 40 Ni cihaavo irutthu co wiirimu ni irutthu co watuninyani, masi uttitthima waya irutthu co wiirimu unaavirikana nuuttitthima cirinaaya irutthu co watuninyani. 41 Uttitthima wo ncuwa uri inannaaya, uttitthima wo mweeri uri inanna ikiina, ni uttitthima wotthonttwaa ciicammo uri inanna ikiina; khweeliini itthonttwa imoca inaavirikana niitthonttwa ikiina nhina mananna cinttitthimaaya.
^ par. 17 1 Akorintu 15:58 Phimaana asuulupalyaaka oofentiya, nkhale oolipa, oohittikhinyaa, ni ntepeke uvara cinene nteko wa Apwiiya, ncuwelaka wiira nteko mwinci unaavareleenyu Apwiiya khunakhala wo mahala.
