1-2. Etke eaorõk bwe aolep Kũrjin ro en wõr aer kõn̦aan ñan jel̦ã kõn jerkakpeje eo ñan mour ilañ?

ENAÑIN aolep ro rej karejar ñan Jeova kiiõ rej kõjatdikdik bwe renaaj mour indeeo ijin ioon lal̦. Ijoke, ñan bween Kũrjin rũkkapit ro, rej kõjatdikdik bwe renaaj jerkakpeje im mour ilañ. El̦ap an rũkkapit rein kõn̦aan jel̦ã kõn enaaj ewi wãween mour ko aer ilju im jekl̦aj, bõtab ta kõn ro me kõjatdikdik eo aer ej ñan mour ijin ioon lal̦? Ãinwõt ad naaj etale, jerkakpeje eo ñan mour ilañ enaaj bõktok jeraam̦m̦an ko ñan bar ro me ewõr ippãer kõjatdikdik eo ñan mour indeeo ijin ioon lal̦. Kõn men in, meñe kõjatdikdik eo ad ej ñan mour ilañ ak ijin ioon lal̦, ak ej aikuj in wõr ad kõn̦aan ñan jel̦ã kõn jerkakpeje eo ñan mour ilañ.

² Anij ear kõm̦akũt jet iaan ri-kal̦oor ro an Jesus ilo kar tõre ko an rijjilõk ro bwe ren jeje kõn kõjatdikdik eo ñan mour ilañ. Rijjilõk Jon ear kõmel̦el̦e im ba: “Jej kiiõ ajri ro nejin Anij, ijoke ejjañin alikkar enaaj ewi wãweed tokãlik. Bõtab, men eo jejel̦ã in ej bwe ilo iien eo enaaj kwal̦o̦k e make, jenaaj ãinwõt e.” (1 Jon 3:2) Kõn men in, Kũrjin rũkkapit ro rejjab jel̦ã enaaj ewi wãween mour ilañ ñe renaaj jerkakpeje im pãd ilañ ãinwõt juon jetõb. Ijoke, renaaj lukkuun loe Jeova ilo iien eo renaaj bõk jinõkjeej eo aer. Baibõl̦ eo ejjab kwal̦o̦k aolep kõmel̦el̦e ko kõn jerkakpeje eo ñan mour ilañ, bõtab rijjilõk Paul ear kwal̦o̦k jet mel̦el̦e ko kõn men in. Rũkkapit ro renaaj pãd ippãn Christ ilo iien eo enaaj “jol̦o̦k  aolep kien ko im maroñ ko im kajoor ko.” Ebar kitibuj “ri-kõjdat eo ãliktata, . . . mej.” Innem ãliktata, Jesus​—ekoba ro me renaaj tõl ippãn—​renaaj kõttãik er make im Jesus enaaj karo̦o̦ll̦o̦k men otemjej me rej pãd ium̦win maroñ eo an, ñan Jeova. (1 Kor. 15:24-28) Iien in enaaj juon iien el̦ap an kãitoktoklimo! *

3. Ãinwõt an 1 Korint 15:30-32 kwal̦o̦k, an kar Paul tõmak ilo jerkakpeje eo ear jipañe ñan ta?

³ An kar Paul tõmak ilo jerkakpeje eo, ear jipañe ñan kijenmej wõt ium̦win elõñ kain wãween ko reppen me ear iiooni. (Riit 1 Korint 15:30-32.) Ear ba ñan ri-Korint ro: “Raan otemjej ij jelm̦ae mej.” Paul ear bar je im ba: “Iar ire ippãn menninmour ko rellãj ilo Epesõs.” Paul emaroñ kar kõnono kõn an kar ire ippãn m̦oolin menninmour ko ilo juon jikin iukkure ilo Epesõs. (2 Kor. 1:8; 4:10; 11:23) Ak emaroñ kar kõnono kõn ri-Ju ro me rar jum̦ae ekoba ro jet me rar ãinwõt “menninmour ko rellãj.” (Jrb. 19:26-34; 1 Kor. 16:9) Jekdo̦o̦n ewi wõt iaan men kein, ak Paul ear iioon wãween ko relukkuun kauwõtata. Meñe ãindein, ak ear wõnm̦aanl̦o̦k wõt im tõmak bwe enaaj wõr juon an ilju im jekl̦aj elem̦õn̦õn̦õ.​—2 Kor. 4:16-18.

4. Ewi wãween an kõjatdikdik eo kõn jerkakpeje kõkajoore Kũrjin ro rainin? (Lale pija eo ilo kilin bok in.)

⁴ Jej mour ilo juon tõre el̦ap an kauwõtata. Jet iaan ro jeid im jatid em̦õj aer iioon jorrããn ko rej itok jãn kowadoñ. Jet iaaer rej jokwe ilo jikin ko me ewõr tarin̦ae ie im el̦ap an mour ko aer pãd ilo kauwõtata. Ilo jet aelõñ ko, armej ro an Jeova rejjab maroñ anemkwõj in kwal̦o̦k naan, im rej karejar ñan Jeova meñe remaroñ kalbuuj ak remaroñ luuji mour ko aer. Meñe ãindein, ak aolep rein jeid im jatid rej lukkuun kate wõt er ilo aer kabuñ ñan Jeova, im rej juon joñak em̦m̦an ñan kõj. Rejjab mijak kõnke rejel̦ã bwe meñe remaroñ luuji mour ko aer ilo tõre in, ak ewõr men ko rem̦m̦anl̦o̦k me Jeova enaaj lel̦o̦k ñan er ilju im jekl̦aj.

5. Kain l̦õmn̦ak rot eo ekauwõtata me emaroñ kam̦õjn̦o̦ik tõmak eo ad kõn jerkakpeje eo?

⁵ Paul ear kakkõl Kũrjin ro jein im jatin kõn juon l̦õmn̦ak ekauwõtata me jet rar bõke: “El̦aññe ro remej reban jerkakpeje, innem ‘jen m̦õñã im idaak, bwe ilju jenaaj mej.’” Em̦õj an kar jet kadede bõk l̦õmn̦ak in m̦oktal̦o̦k jãn tõre ko an Paul. Im Paul emaroñ kar ãliji naan ko jãn Aiseia 22:13, me ej kwal̦o̦k kõn wãween an kar ri-Israel ro l̦õmn̦ak. Ijello̦kun aer kar ruwaakl̦o̦k ñan Anij, rar mour ekkar ñan kõn̦aan ko aer. Jemaroñ ba bwe l̦õmn̦ak eo an kar ri-Israel rein ej bwe “jej mour rainin, im mej ilju,” juon l̦õmn̦ak me ekkã an ro ilo raan kein bar bõke. Bõtab, Baibõl̦ eo ej kwal̦o̦k kõn tokjãn ko renana me rar wal̦o̦k ñan aelõñin Israel itok wõt jãn aer kar bõk l̦õmn̦ak in ebõd.​—2 Kro. 36:15-20.

6. En kar ewi wãween an kõjatdikdik eo kõn jerkakpeje eo jelõt wõn ro jej kããlõt ñan aetõl er?

⁶ Alikkar bwe ad jel̦ã bwe ewõr an Jeova maroñ ñan kõjerkakpejeik ro remej, men in ej aikuj in jelõt wõn ro jej kããlõt ñan aetõl er. Kũrjin ro ilo Korint rar aikuj in kõjparok jãn aer aetõl ro ejjel̦o̦k aer tõmak ñan jidik kõn jerkakpeje eo. Ewõr juon men jemaroñ katak jãn men in, eñin bwe: Ejjel̦o̦k men en̦ em̦m̦an emaroñ wal̦o̦k itok jãn ad kããlõt ñan aetõl ro me rej bõk l̦õmn̦ak eo ñan kõmaat iien ko aer ñan kalimomo im m̦õn̦õn̦õ kiiõ. Ñe juon Kũrjin em̦ool el̦ap wõt an aetõl armej rot in, men in emaroñ ko̦kkure l̦õmn̦ak ko an im m̦wil ko m̦wilin rem̦m̦an. Ilo m̦ool,  men in emaroñ tõll̦o̦ke ñan mour ilo wãween eo me ej kitibuj men eo Anij edike​—jerawiwi. Kõn men in, Paul ear lukkuun rõjañ er: “Kom̦win ko̦ruj l̦õmn̦ak ko ami im kõm̦m̦ani men ko rejim̦we im bõjrak jãn ami kõm̦m̦an jerawiwi.”​—1 Kor. 15:33, 34.

7. Ta kajjitõk eo kõn jerkakpeje me jet remaroñ kar kwal̦o̦ke, ãinwõt an wal̦o̦k ilo 1 Korint 15:35-38?

⁷ Riit 1 Korint 15:35-38. Juon eo me ear kõn̦aan bwe ro jet en wõr aer pere kõn jerkakpeje eo, emaroñ kar kwal̦o̦k kajjitõk in: “Ewi wãween an ro remej naaj jerkakpeje?” Em̦m̦an ñan l̦õmn̦ak kõn uwaak eo an Paul, kõnke elõñ armej ro rainin ewõr aer make l̦õmn̦ak kõn ta eo ej wal̦o̦k ñan armej ro ãlikin aer mej. Bõtab, ta eo Baibõl̦ ej katakin?

8. Waanjoñak ta eo me emaroñ jipañ kõj ñan mel̦el̦e kõn jerkakpeje eo ñan mour ilañ?

⁸ Ñe juon armej ej mej, ãnbwinnin ej oktak im kõt. Meñe ãindein, ak Eo me ear kõm̦anm̦an lañ im lal̦ ke ear ejjel̦o̦k jabdewõt men, emaroñ kõjerkakpejeik armej in, im lel̦o̦k ñane juon ãnbwin me ejejjet im ekkar ñane. (Jen. 1:1; 2:7) Paul ear kõjerbal juon waanjoñak ñan kaalikkar bwe Anij eban aikuj kõjepl̦aaktok ejja ãnbwin eo wõt. L̦õmn̦ak kõn “juon ineen wiit” ak juon “ine” in menin eddek. Juon ine in wiit me em̦õj kalibwini ilo bwidej, ej eddekl̦o̦k im oktak im erom juon menin eddek. Menin eddek in ebwe an oktak jãn kar ine jiddik eo. Paul ear kõjerbal waanjoñak in ñan kaalikkar bwe ri-Kõm̦anm̦an eo ad emaroñ kõm̦m̦an juon “[ãnbwin] ekkar ñan kõn̦aan eo an.”

9. Ta eo 1 Korint 15:39-41 ej kwal̦o̦k kake ikijjeen ãnbwin ko reoktak jãn doon?

⁹ Riit 1 Korint 15:39-41. Paul ear kwal̦o̦k bwe elõñ menin kõm̦anm̦an ko me reoktak jãn doon. Ñan waanjoñak, eoktak ãnbwinnin kau ko, bao ko, im ek ko jãn doon. Ear ba bwe ilo mejatoto ak lañ, jej kile oktak eo ikõtaan al̦ im allõñ. Ear bar ba bwe “eoktak aiboojojin iju ko jãn doon.” Im em̦ool men in  jekdo̦o̦n ñe jejjab maroñ lo oktak eo ikõtaer ñe jej kalimjeki. Jaintiij ro rej kwal̦o̦k bwe elõñ kain iju ko, ewõr jet rekilep, jet reddik, jet rebũrõrõ, jet remouj, im jet reial̦o ãinwõt al̦ eo. Paul ear bar ba bwe “ewõr ãnbwin ko ilañ, im ewõr ãnbwin ko ilal̦.” Ilo wãween et? Eokwe, ilo ijin ioon lal̦, ãnbwinnid ej kanniõk, ak ilo lañ, ãnbwinnier ej jetõb, ãinwõt enjel̦ ro.

10. Kain ãnbwin rot eo me enaaj wõr ippãn ro me renaaj jerkakpeje im mour ilañ?

¹⁰ L̦õmn̦ak kõn ta eo Paul ear ba tokãlik, ke ear ba: “Ejjel̦o̦k oktak jãn ñe ro remej rej jerkakpeje. Kar kalibwin ãnbwin ko rewabanban, bõtab ñe renaaj jerkakpeje, reban wabanban.” Em̦ool bwe ãlikin an juon armej mej, ãnbwinnin enaaj kõt im bar ro̦o̦l im erom bũñal. (Jen. 3:19) Innem, enãj ewi wãween an juon ãnbwin maroñ ‘jerkakpeje, [ak] eban wabanban’? Paul ear jab kõnnaan kõn juon armej me enaaj jerkakpeje im mour ijin ioon lal̦, ãinwõt ro me Ilaija, Ilaisha, im Jesus rar kõjerkakpejeiki. Ijoke, Paul ear jitõñl̦o̦k ñan juon eo me enaaj jerkakpeje ñan juon ‘ãnbwinnin jetõb.’​—1 Kor. 15:42-44.

11-12. Kar ta oktak eo ear wal̦o̦k ñan Jesus ke ear jerkakpeje, im ewi wãween an rũkkapit ro bar iioon ejja wãween in wõt?

¹¹ Ke Jesus ear mour ijin ioon lal̦, ear bõk ãnbwinnin armej. Bõtab ke ear jerkakpeje, ear “erom juon jetõb eo ej lel̦o̦k mour” im ear bar jepl̦aak ñan lañ. Ejja ãindeinl̦o̦k wõt, Kũrjin rũkkapit ro renaaj jerkakpeje im erom juon jetõb. Paul ear kõmel̦el̦e im ba: “Ãinwõt ad bõk nemãmeen eo kar kõm̦anm̦ane jãn bũñal, jenaaj bar bõk nemãmeen eo ear itok jãn lañ.”​—1 Kor. 15:45-49.

¹² Eaorõk ñan keememej bwe Jesus ear jab jerkakpeje im bõk juon ãnbwinnin armej. Ilo jem̦l̦o̦kinl̦o̦k naan ko an Paul kõn jerkakpeje eo, ear kõmel̦el̦e ta unin, ke ear ba: “Kanniõk im bõtõktõk ejjab maroñ jolõte Aelõñ eo an Anij” ilañ. (1 Kor. 15:50) Rijjilõk ro im rũkkapit ro jet reban jerkakpeje ñan lañ kõn  ãnbwin ko rewabanban me kõm̦m̦an jãn kanniõk im bõtõktõk. Ñããt eo ren kar jerkakpeje? Paul ear lukkuun kaalikkar bwe jerkakpeje in enaaj baj wal̦o̦k wõt ilo raan ko repãd im̦aan; ear jab juon men me enãj kajju wal̦o̦k ãlikin aer nãj mej. Ilo iien eo Paul ear je bokin 1 Korint, em̦õj an jet iaan ri-kal̦oor ro kiki ilo “mej,” ñan waanjoñak rijjilõk Jemes. (Jrb. 12:1, 2) Tokãlik, rijjilõk ro jet ekoba rũkkapit ro jet renaaj bareinwõt kiki ilo “mej.”​—1 Kor. 15:6.

13. Ta ko renaaj wal̦o̦k ilo iien eo Jesus enaaj pãd?

¹³ Jesus im Paul jim̦or rar jitõñl̦o̦k ñan juon iien ejejuwaan ilo ilju im jekl̦aj me ejjañin kar wal̦o̦k ilo bwebwenatoun armej—iien eo Christ enaaj pãd. Iien in enaaj alikkar ikijjeen kõkal̦l̦e ko ãinwõt tarin̦ae, m̦akũtkũt lal̦ ko rel̦l̦ap, nañinmej ko rekapopo, im wãween ko jet me renaaj wal̦o̦k ipel̦aakin lal̦ in. Em̦õj ad loe an jejjet kũtien kanaan in ilo Baibõl̦ jãn kar 1914 eo. Enaaj bar wõr juon kõkal̦l̦e eaorõk me ej m̦õttan kanaan in. Jesus ear ba bwe ennaan eo em̦m̦an kõn Aelõñ eo an Anij, me em̦õj an jutak, naaj kwal̦o̦k kake “ipel̦aakin lal̦ in bwe aolep armej ren roñ, innem ej kab naaj itok jem̦l̦o̦kin.” (Matu 24:3, 7-14) Paul ear kwal̦o̦k bwe “ilo iien eo Irooj enaaj pãd,” enaaj bar juon iien ñan an Kũrjin rũkkapit ro me em̦õj aer “kiki ilo mej” jerkakpeje.​—1 Tes. 4:14-16; 1 Kor. 15:23.

14. Ta eo ej wal̦o̦k ñan rũkkapit ro me rej jako ilo mej ilo iien eo Christ ej pãd?

¹⁴ Rũkkapit ro ilo raan kein me rej jako ilo mej rej kajju jerkakpeje im mour ilañ. Naan ko an Paul ilo 1 Korint 15:51, 52 ej kam̦oole men in, ej ba: “Jeban aolep kiki ilo mej, bõtab kõj aolep jenaaj oktak ilo iien en̦ wõt, aet ilo bũkkinkwõle ilo rom, ilo naaj jilel eo ãliktata.”  Em̦õj an jino jejjet kũtien naan kein an Paul! Ilo iien eo rein jatin Christ rej jerkakpeje, enaaj lukkuun l̦ap aer lañlõñ; renaaj “pãd ippãn Irooj iien otemjej.”​—1 Tes. 4:17.

15. Ta jerbal eo ej kõttare ro me renaaj oktak “ilo bũkkinkwõle ilo rom”?

¹⁵ Baibõl̦ eo ej kwal̦o̦k ñan kõj kõn jerbal ta eo me ro renaaj oktak “ilo bũkkinkwõle ilo rom,” renaaj kõm̦m̦ane ilañ. Jesus ej ba ñan er: “Ñan eo ej bõk anjo̦ im ej l̦oore kõm̦m̦an ko aõ ñan jem̦l̦o̦kin, inaaj lel̦o̦k ñane maroñ ioon aelõñ ko, im enaaj juon jabõt ñan armej ro im enaaj kõjerbal juon jokon̦ aen bwe ren maroñ pedakilkil ñan elõñ m̦õttan, ãinwõt jãpe ko kõm̦m̦an jãn kũl̦e, eñin ejja maroñ eo wõt Jema ear letok ñan ña.” (Rev. 2:26, 27) Renaaj l̦oore Kapen eo aer, im jabõte ri-aelõñ ko kõn juon jokon̦ aen.​—Rev. 19:11-15.

16. Enaaj ewi wãween an elõñ iaan armej ro anjo̦ ioon mej?

¹⁶ Alikkar bwe rũkkapit ro renaaj anjo̦ ioon mej. (1 Kor. 15:54-57) Aer jerkakpeje enaaj kõmaroñ er ñan jipañ jol̦o̦k nana otemjej ipel̦aakin lal̦ in ilo naaj tarin̦ae eo etan Armagedon. Enaaj lõñ milien uwaan Kũrjin em̦m̦aan im kõrã ro jet me renaaj “el̦l̦ã jãn eñtaan eo el̦ap” im del̦o̦ñel̦o̦k lal̦ eo ekããl. (Rev. 7:14) Rein me renaaj el̦l̦ã im bõk lo̦mo̦o̦r ijin ioon lal̦ renaaj loe bar juon kain anjo̦ ioon mej—jerkakpeje eo an elõñ pilien armej ro me rar mej m̦oktal̦o̦k. Baj pijaikl̦o̦k m̦õk joñan ad nãj lañlõñ ilo iien eo me enaaj wal̦o̦k men in! (Jrb. 24:15) Im aolep ro me rar tiljek ñan Jeova, renaaj anjo̦ ioon men eo me rar jolõte, mej. Rein renaaj maroñ mour ñan indeeo.

17. Ta eo 1 Korint 15:58 ej rõjañ kõj ñan kõm̦m̦ane kiiõ?

¹⁷ Kajjojo Kũrjin ro me rej mour wõt kiiõ rej aikuj kwal̦o̦k aer kam̦m̦oolol kõn naanin kaenõm̦m̦an ko me Paul ear je ñan ri-Korint ro ikijjeen jerkakpeje eo. Ewõr un ko rem̦m̦an unin ad aikuj pokake naanin jiroñ ko an Paul ñan kate kõj jerbal joñan wõt ad maroñ “ilo jerbal eo an Irooj.” (Riit 1 Korint 15:58.) El̦aññe jej tiljek im poub wõt ilo ad bõk kun̦aad ilo jerbal in, men in enaaj kõm̦m̦an bwe jen maroñ bõk juon ilju im jekl̦aj me eobrak kõn lem̦õn̦õn̦õ. Ilju im jekl̦aj in enaaj lukkuun l̦ap an em̦m̦an jãn jabdewõt men jemaroñ kõtmãne kake. Ejjel̦o̦k pere bwe iien in enaaj kam̦ool ñan kõj bwe ejjab jejtokjãn jerbal ko jaar kõm̦m̦ani ñan Irooj.