1-2. Mwahaya bwaddi onona muselu wodhela ovenyihiwa wodhulu okala wofuneya?

ADHARI owinjhiva a Yehova enna ejhehedhelo yokala mwilaboni yavati ni mukalakala. Mbwenye nikuru vang’ono na makiristawu ninna ejhehedhelo yovenyihiwa wihina yakale odhulu. Makiristawu ala othikitheliwa enofuna onona makalelo enakalegiwa odhulu. Ni mambilaya mamodha enohowela onona, mwaha ninga nnahudherihu mu yohudhera ela, ejhehedhelo yovenyihiwa wihina yakalege odhulu enere odhana mareliho mwilaboni yavati. Bumwahaya, kannapwatha ejhehedhelwihu akala — fudhowa odhulu obe elabo yavati — wonelamo muselu ola fwathima watene iyo.

² Anamahara obajha a Yesu yahivetheliwa wihina elebe wodhela ejhehedhelo yokala odhulu. Murumiwi Juwawu ohusoriha egi: ‘Vano, nili ahima a Mulugu, mbwenye kannaddeliwe ele nnakalihu. Nnonnihu sowi, oliye abajha othonga nnaliganege nuuliye.’ (1 João 3:2) Makiristawu othikitheliwa kinonne makalelo enakaliwa egumi yewa yavenyihiwa muukwani. Enonniwa sowi, yakela yowakela yewa, enere omona Yehova. Bibliya kanawoga makalelo enakalegiwa odhulu. Murumiwi Pawulo ohuwoga vang’ono wodhela muselu yola. Oliye wera makiristawu othikitheliwa enakale ni Kiristu ‘amala ogujhula onamathonga watene, owedha ni kopolo dhatedhene,’ vamodha ni ‘mwiddaniya ogomihera,’ okwa. Omagomihero wa, Yesu ni makiristawu othikitheriwa enere weriha wihina dhithu dhatedhene dhimwiwelelege oliye. (1 Cor. 15:24-28) Mwebaribarene, dhinere okala dhithu dhohagalasa! *

3. Ninga munawogela 1 Coríntios 15:30-32, nroromelo na Pawulo wodhela ovenyihiwa wanookwa namukavihere avi?

 ³ Nroromelo Pawulo anniyena wodhela ovenyihiwa waanookwa wahimukavihera ogonjhiha makathamiho ohiyana-iyana. (Omwileri 1 Coríntios 15:30-32.) Oliye ahalebela addibila oKorinto egi: ‘Malabo amatene ginowanana okwa.’ Teto Pawulo ahiwoga egi: ‘Miyo gihiwana ni anenyama owoopiha elabo yo Efeso.’ Podi wera Pawulo awagana anenyama yakala murudda wo Efeso. (2 Cor. 1:8; 4:10; 11:23) Obe podi wera awagana maJudewu obe athu amodha yakala ninga ‘anenyama’ yawana nuliye. (Atos 19:26-34; 1 Cor. 16:9) Podi okala dhendho obe naari, Pawulo ohuwanana makathamiho owopiha. Mbwenye kayelenle nroromelo anniyena wodhela osogolo. — 2 Cor. 4:16-18.

4. Ejhehedhelo yovenyihiwa waanookwa enakavihera avi makiristawu peeno? (Osugwe fotu yavakapani.)

⁴ Mudhidhi ola bowopiha. Addibila amodha enofwanyiwa ni atinbwini. Amodha enofwanyiwa koddo, newene kawili obareleya. Teto amodha enakala murudda mabasa ehu olaleya enakoddihiwiwa, amodha podi okwa obe oyelela ofuru wewa mwaha omulabela Yehova. Naari dhigarive ndo, addibila vamodha ni arogola ala atene kinaselela omulabela Yehova, aliwa tajhiha yapama. Kinoova mwaha ehinona wi yakwa ovanene, Yehova anere wavenyiha ni ekanne egumi yapama osogolo.

5. Mubuwelo baani wabure onaridhihe nroromelo nehu wodhela ovenyihiwa waanokwa?

⁵ Pawulo wawaddela addibila yanna mubuwelo wabure wodhela ovenyihiwa waanookwa egi: ‘Akala anookwa kinavenyihiwe, “njhege ning’wege mwaha mangwana nnere okwa.’” Mubuwelo ola wahikalawo murumiwi Pawulo ahinakale mukiristawu. Podi wera oliye agana ele Izayiya awogiliye va Isaías 22:13. Ohiya onfiyedha Yehova, amwaana Ezarayeli yaja dhofuna dhomwilini. Dhithu amwaana Ezarayeli yeriwa sila: “Njhe ovanene mwaha mangwana nnere okwa.” Mubuwelo ola ohukalawo ofiyedha peeno. Mbwenye yapadduwele amwaana Ezarayeli enoonxagiha. — 2 Cró. 36:15-20.

6. Ejhehedho yovenyihiwa waanookwa enanikavihere avi wasakula pama akwihu?

⁶ Nroromelo wodhela ovenyihiwa waanokwa podi onikavihera wasakula pama akwihu. Addibila oKorinto yohowela wasakula pama akwiwa, wihina ehandane naale yahirumedha ovenyihiwa waanokwa. Ela enonxagiha peeno. Nandana naathu enubuwela ojhavo elabo baahi, podi ohuneddela pama. Wandana wula podi ononga moonelo ni dhowera dha mukiristawu ebaribari teto podi omuthukulela muthu werana dhithu Yehova aniddiye. Bumwahaya Pawulo ohunxagiha egi: ‘Muhogolowele mubuwelo wenyu wapama, mweragana dhithu dhapama teto kamweregena yothega.’ — 1 Cor. 15:33, 34.

7. Nikoho baani nili va 1 Coríntios 15:35-38 athu enikohesiwa?

⁷ Omwileri 1 Coríntios 15:35-38. Muthu ahinna nroromelo wodhela ovenyihiwa waanookwa podi wikoha: “Anookwa enavenyihiwe avi?” Sapama wubuwela yowakula ya murumiwi Pawulo mwaha athu owinjhiva ehikanna mubuwelo wohiyana-iyana wodhela muthu akwa. Ki Bibliya anahudhiha ddi?

8. Nladdaniho baani nnanikavihera wonelamo wodhela ovenyihiwa wodhowa odhulu?

 ⁸ Muthu akwa mwili waye ononyowa. Mbwenye eyo kenamukatamiha ole opadduse elabo yatene. Mulugu podi onvenyiha muthu oyo ni onvaha mwili wapama. (Gén. 1:1; 2:7) Pawulo ohuladdaniha wihina onihe wi Mulugu kanahowela onvenyiha muthu ni mwili mmodhave. Oliye ohulabihedha nladdaniho na “thanga” ya muthanko. Thanga yaliwa enomela wunnuwa okala muthanko mmodha. Muthanko ola onohiyana ni thanga yaliwe. Pawulo aparihedhe yoladdaniha ela wi oonihe wi mpaddusi podi onvenyiha muthu “ni mwili oliye onafuniye.”

9. 1 Coríntios 15:39-41 anawoga ddi wodhela mwili?

⁹ Omwileri 1 Coríntios 15:39-41. Pawulo onowoga wi Mulugu ohupaddusa mwili dhohiyana-hiyana. Motajhiha, mwili wa ng’ombe, wa balame, wa oba dhatedhene dhinohiyana. Nuwindo Pawulo wera nduwa ni mweri dhihiyana. Oliye wera “thendderi enohiyana ni thendderi emodha”. Naari nihandaga woona pama, masiyentista enowoga wi wihikala ohiyana wa thendderi dhimodha dhinithaniwa gigantes vermelhas, anãs brancas ni thendderi dhanjhani, ninga nduwa. Pawulo onowoga wi “ohukalawo mwili wemuthu ni mwili wodhulu.” Ni makalelo baani? Mwilabonni yavati orivo mwili wa nyama ni makuva, mbwenye odhulo mwili oriwo bomuzimuni, ninga ole enna angero.

10. Mwili enavenyihiwena ale enaya odhulu buuvi?

¹⁰ Kasugwa ele Pawulo awogiliye voharelava: “Emodhave enoligana ni ovenyihiwa waanokwa. Onaliwa mwili wonyowa, vano ovenyihiwa mwili ohunanowa.” Nihinona wi, muthu akwa mwili waye ononyowa oliye ohogolowela onthubini. (Gén. 3:19) Ki dhinandeya avi muthu ovenyihiwa ni “mwili wohunyowa”? Pawulo kaagana mwili wemuthu onavenyihiwe wi okale elabo yavati, ninga ale avenyihile Elias, Elizeu ni Yesu. Mwebaribarene, Pawulo aagana muthu ovenyihiwa  wi akalege odhulu, obe, “mwili womuzimuni.” — 1 Cor. 15:42-44.

11-12. Nuuvenyihiwa muukwani yampadduwele Yesu ddi, ki enapadduwele ddi makiristawu othikitheliwa?

¹¹ Yesu agaali mwilaboni yavati, anna mwili wemuthu. Mbwenye numala ovenyihiwa mukwani, “okala muzimu onavaha egumi” nuwindo odhowa odhulu. Emodhave, makiristawu otikitheliwa enavenyihiwe ni mwili womuzimuni onanda okala odhulu. Pawulo anowoga egi: ‘Bumwahaya ninga nnaliganihu nuule adhele onthubini, nnerege oligana nuule adhele odhulu.’ — 1 Cor. 15:45-49.

¹² Pawulo anna ofiya vapontoniva yinlubale yamwahaye wodhelka ovenyihiwa muukwani. Sofuneya onona wi Yesu kavenyihiwe ni mwili wemuthu. Pawulo anosoriha mwahaya egi: ‘Nyama nnikame kadhinavolowa muweneni mwa Mulugu’ odhulu. (1 Cor. 15:50) Emodhave, arumiwi ni makiristawu othikitheliwa kiyavenyihiwe ni mwili wonyowa wi yakele odhulu. Yavenyihiwe woragani? Murumiwi Pawulo anowoga wi ovenyihiwa wewa wakale mudhidhi osogolo. Kiyavenyihiwe numala okwa. Mudhidhi Pawulo alebiliye karta nna na 1 Coríntios, arumiwi amodha “yahimala okwa” ninga motajhiha, murumiwi Tiyago. (Atos 12:1, 2) Arumiwi amodha ni makiristawu mamodha othikitheliwa yohowela ‘ogona muukwani.’ — 1 Cor. 15:6.

13. Dhithu baani dhonihe wihina Yesu “anna othonga”?

¹³ Yesu vamodha ni Pawulo ehiwoga wodhela mudhidhi wohagalasa — Kiristu abajha othonga. Othonga wula woneye ni koddo, oddiginyewa wa elabo, dhiredda ni dhithu dhimodha dhabure dhapadduwege. Okuma yaka ya 1914, nnowona dhovuhulela ndha dha Bibliya dhakwanelaga. Mbwenye dhopadduwa dhimodha dhere woniha wi Yesu anna othonga. Oliye ahiwoga wi muthenga dhapama dha Omwene wa Mulugu  dhere olaleyiwa ‘elabo yatene, ni onamona wa malogo atene, yindo omakuthulo [ofiyege].’ (Mat. 24:3, 7-14) Pawulo ohuwoga wihina, “Yesu abajha othonga,” ovenyihiwa wa makiristawu othikitheliwa ‘ale egonne muukwani’ were wereya. — 1 Tes. 4:14-16; 1 Cor. 15:23.

14. Ethu baani enapadduwela makiristawu otikiyheliwa enakwa mudhidhi wa othonga wa Yesu?

¹⁴ Makiristawu othikitheliwa ‘enagona muukwani, mudhidhi ola wa othonga wa Kiristu, enovenyihiwa mowaguva wihina edhowe odhulu. Pawulo ohuwoga va 1 Coríntios 15:51, 52: ‘Kahi wihina atene enere ogona muukwani, mbwenye atene enere osadduliwa mohilegela, ninga muthu apinya mento, mudhidhi wowobiwa palaza.’ Madhu ala a Pawulo enna wakwanela ovanene! Makiristawu othikitheliwa yavenyihiwa muukwani enere ohagalala vanlubale. Aliwa enakale ‘nnabwiya nimukalakala.’ — 1 Tes. 4:17.

15. Mabasa baani enapare makiristawu othikitheliwa odhulu?

¹⁵ Bibliya anowoga mabasa enakanne makiristawu othikitheliwa odhulu yamala ‘ovenyihiwa mohilegela.’ Yesu anowoga egi: ‘Ole anagonjhihe ni anahare dila dhaga ofiyedha omakuthulo, miyo ginere onvaha owedha wa malogo, ni anere wakukula ni muddoddo wa mujhila, mowindo aliwa enere onyenyiwa ninga ologo, ninga gakenlimi owedha wa Ababa.’ (Apo. 2:26, 27) Emuharaga Namasogolela ewa, Yesu, makiristawu othikitheliwa enere wakukula malogo ni mukumbuzu wa mujhila. — Apo. 19:11-15.

16. Athu owinjhiva enagonjhihe avi okwa?

¹⁶ Makiristawu othikitheliwa enere ogonjhiha okwa mwaha enere ovenyihiwa muukwani. (1 Cor. 15:54-57) Vano, mudhidhi wa  koddo ya Armajedo, enere okanna gari yoweddiha muselu mmodha: ogonjhiha obure waatene. Adhari amodha a Mulugu enere ovuluwa mudhidhi wa makathamiho manlubale, teto enere ovolowa mwilaboni exa. (Apo. 7:14) Muthithi ola onavuluwe onere okanna gari yowona ethu emodha yohagalasa ogwenjhihiwa wa okwa: ovenyihiwa wa matxikwi ni matxikwi aathu. Wubuwele ohagalala wehu eyo yapadduwa! (Atos 24:15) Atene ale enakale ororomeleya wa Yehova enere woona ethu emodha yohagalasa. Enere ogwenjhiha okwa nibaliwihuna mwaha wa Adawu, ni enere okalawo ni mukalakala.

17. Yokongomedha baani nnafwanyeya va 1 Coríntios 15:58?

¹⁷ Mukiristawu di mukiristawu atamalelege madhu a murumiwi Pawulo enafwanyeya va 1 Coríntios enawoga muselu wovenyihiwa muukwani. Nihikanna ethu enanthukulela wooniha wi nnorumedha yolaga ya Pawulo ‘wenjhedhedha mabasa ehu omulabela Nabwiya.’ (Omwileri 1 Coríntios 15:58.) Nenjhedhedha wapara mabasa, nnere okanna egumi yohagalala osogolo. Egumi yehu enere othabwa owomela. Mabasa ehu oviheya nnamulabelihu Nabwiya kinakale eebewene.