1-2. Għala l-​Kristjani kollha għandhom jitgħallmu dwar l-​irxoxt għall-​ħajja fis-​sema?

IL-​MAĠĠORANZA tan-​nies li jaqdu lil Ġeħova għandhom it-​tama li jgħixu għal dejjem fuq l-​art. Imma xi Kristjani li ġew midlukin minn Ġeħova għandhom it-​tama li jiġu rxoxtati għall-​ħajja fis-​sema. Dawn l-​aħwa midlukin jixtiequ jkunu jafu kif se tkun ħajjithom fis-​sema. Imma, dawk li se jgħixu fuq l-​art għala jridu jitgħallmu dwar dan ukoll? Kif se naraw, l-​irxoxt għas-​sema se jġib barkiet ukoll lil dawk li għandhom it-​tama li jgħixu għal dejjem fuq l-​art. Hi x’inhi t-​tama tagħna, għandna nkunu interessati fl-​irxoxt għas-​sema.

² Alla nebbaħ lil xi Kristjani tal-​bidu biex jiktbu dwar l-​irxoxt għas-​sema. L-​appostlu Ġwanni spjega: “Issa aħna wlied Alla, imma s’issa għadu ma ntweriex x’se nkunu. Nafu li meta jintwera se nkunu bħalu.” (1 Ġw. 3:2) Mela, il-​Kristjani midlukin ma jafux kif se tkun il-​ħajja fis-​sema wara li jiġu rxoxtati. Però, huma jafu li se jaraw lil Ġeħova meta jirċievu l-​premju tagħhom. Il-​Bibbja ma tgħidilniex id-​dettalji kollha dwar l-​irxoxt għall-​ħajja fis-​sema, imma l-​appostlu Pawlu pprovdielna xi informazzjoni. Il-​midlukin se jkunu maʼ Kristu meta hu jġib “fix-​xejn kull gvern u kull awtorità u qawwa.”  Dan jinkludi wkoll “l-​aħħar għadu, il-​mewt.” Fl-​aħħar, Ġesù u dawk li se jmexxu miegħu se jissottomettu ruħhom u kollox lil Ġeħova. (1 Kor. 15:24-28) Dan se jkun żmien tal-​għaġeb! *

3. Kif jurina l-​1 Korintin 15:30-32, il-​fidi taʼ Pawlu fl-​irxoxt x’għenitu jagħmel?

³ Il-​fidi taʼ Pawlu fl-​irxoxt għenitu biex jissaporti diversi provi. (Aqra l-​1 Korintin 15:30-32.) Hu qal lill-​Korintin: “Kuljum niffaċċja l-​mewt.” Pawlu qal ukoll: “Jien iġġilidt mal-​bhejjem salvaġġi f’Efesu.” Jistaʼ jkun li kien qed jitkellem dwar annimali letterali li kellu jiġġieled magħhom fl-​arena f’Efesu. (2 Kor. 1:8; 4:10; 11:23) Jew jistaʼ jkun li kien qed jirreferi għall-​oppożizzjoni mil-​Lhud u oħrajn li kienu qishom “bhejjem salvaġġi.” (Atti 19:26-​34; 1 Kor. 16:9) Kienu x’kienu, Pawlu ffaċċja perikli kbar, imma hu kien konvint li se jkun ferħan fil-​futur.—2 Kor. 4:16-18.

4. It-​tama tal-​irxoxt, kif issaħħaħ lil ħutna llum? (Ara l-​istampa tal-​qoxra.)

⁴ Aħna qed ngħixu fi żminijiet perikolużi. Xi wħud minn ħutna spiċċaw vittmi tal-​kriminalità. Oħrajn jgħixu f’pajjiżi fejn hemm il-​gwerra u għalhekk jgħixu fil-​biżaʼ. F’xi pajjiżi, in-​nies taʼ Ġeħova ma jistgħux jippritkaw, imma huma jibqgħu jaqduh minkejja li jistgħu jispiċċaw il-​ħabs jew jiġu maqtulin. Dawn l-​aħwa huma eżempju eċċellenti għalina. Huma ma jibżgħux għax jafu li anki jekk jitilfu ħajjithom issa, Ġeħova jwegħedhom li se jagħtihom xi ħaġa aħjar fil-​futur.

5. Liema attitudni perikoluża tistaʼ ddgħajjef il-​fidi tagħna fl-​irxoxt?

⁵ Pawlu wissa lil ħutu dwar attitudni perikoluża li xi wħud kellhom: “Jekk il-​mejtin mhux se jiġu mqajmin, ‘ħa nieklu u nixorbu, għax għada mmutu.’” Anki qabel żmien Pawlu, xi nies kellhom din l-​attitudni. Hu jaf kien qed jikkwota minn Isaija 22:13 li jitkellem dwar l-​attitudni li kellhom l-​Iżraelin. Minflok ma provaw ikabbru l-​imħabba tagħhom għal Alla, huma riedu jgawdu l-​ħajja. Bażikament, l-​attitudni tal-​Iżraelin kienet bħal dik taʼ ħafna nies illum, “illum hawn u għada le.” Fil-​fatt, fil-​Bibbja nsibu l-​konsegwenzi ħżiena li l-​poplu taʼ Iżrael kellu jbati minħabba din l-​attitudni ħażina.—2 Kron. 36:15-20.

6. Li nemmnu fl-​irxoxt kif għandu jaffettwa maʼ min nagħmluha?

⁶ Li nafu li Ġeħova se jirxoxta lill-​mejtin, għandu jaffettwa maʼ min nagħmluha. L-​aħwa f’Korintu kellhom bżonn joqogħdu attenti biex ma jagħmluhiex maʼ dawk li ma kinux jemmnu fl-​irxoxt. Minn dan nistgħu nitgħallmu lezzjoni: Jekk inqattgħu ħafna ħin maʼ wħud li ma jimpurtahomx x’se jiġri fil-​futur u li moħħhom biss biex igawdu l-​ħajja, dawn jistgħu jinfluwenzaw lilna. Jekk Kristjan veru jqattaʼ ħafna ħin maʼ nies bħal dawn, jistgħu jħassrulu l-​attitudni u d-​drawwiet tajba tiegħu. Fil-​fatt, jistgħu jġegħluh jagħmel affarijiet li Alla jobgħod. U għalhekk li Pawlu wissa: “Stenbħu biex tkunu f’sensikom għall-​ġustizzja u tipprattikawx id-​dnub.”—1 Kor. 15:33, 34.

7. Kif juri l-​1 Korintin 15:35-38, xi wħud liema mistoqsija jistgħu jqajmu dwar l-​irxoxt?

⁷ Aqra l-​1 Korintin 15:35-​38. Xi wħud li jridu jqajmu d-​dubji dwar l-​irxoxt, jistgħu jistaqsu: “Kif se jiġu mqajmin il-​mejtin?” Nagħmlu tajjeb li naħsbu dwar it-​tweġiba taʼ Pawlu għax ħafna nies għandhom ideat differenti dwar x’jiġri wara l-​mewt. Imma l-​Bibbja x’tgħallem?

8. Liema eżempju jistaʼ jgħinna nifhmu l-​irxoxt għall-​ħajja fis-​sema?

⁸ Meta xi ħadd imut, il-​ġisem tiegħu jispiċċa. Imma l-​Wieħed li ħalaq l-​univers mix-​xejn jistaʼ jirxoxta lil dik il-​persuna, u jagħtiha l-​ġisem li jkollha bżonn. (Ġen. 1:1; 2:7) Pawlu uża eżempju biex juri li Alla mhux bilfors iqajjem lil persuna bl-​istess ġisem. Aħseb f’żerriegħa. Meta ż-​żerriegħa tinżeraʼ fil-​ħamrija, tibda tikber u ssir pjanta. Din il-​pjanta se tkun differenti ħafna miż-​żerriegħa. Pawlu uża dan l-​eżempju biex juri li l-​Ħallieq tagħna jistaʼ jagħti ġisem “skond kif jogħġbu.”

9. L-​1 Korintin 15:39-41, x’jgħid dwar l-​iġsma differenti?

⁹ Aqra l-​1 Korintin 15:39-​41. Pawlu semma li Alla ħalaq il-​ġisem tal-​bnedmin, tal-​bhejjem, tal-​għasafar, u tal-​ħut, kollha differenti. Hu qal li fis-​sema, aħna nistgħu naraw id-​differenza bejn ix-​xemx u l-​qamar. Hu qal ukoll li “kewkba hi differenti minn kewkba oħra fil-​glorja.” Dan huwa minnu minkejja li ma nistgħux narawhom b’għajnejna stess. Xjentisti jgħidu li hemm stilel differenti, uħud minnhom kbar, żgħar, ħomor, bojod, u sofor bħax-​xemx. Pawlu qal ukoll li “hemm iġsma tas-​sema, u iġsma taʼ l-​art.” X’ried ifisser? Fuq l-​art, aħna għandna ġisem tal-​laħam imma fis-​sema hemm iġsma  tal-​ispirtu bħal dawk li għandhom l-​anġli.

10. Dawk li se jiġu rxoxtati għas-​sema x’tip taʼ ġisem se jkollhom?

¹⁰ Innota x’qal Pawlu wara: “Hekk ukoll hu l-​irxoxt tal-​mejtin. Jinżeraʼ fit-​taħsir, jiġi mqajjem bla taħsir.” Aħna nafu li meta xi ħadd imut, ġismu jispiċċa u jsir trab. (Ġen. 3:19) Allura l-​ġisem kif jistaʼ “jiġi mqajjem bla taħsir”? Pawlu ma kienx qed jitkellem dwar in-​nies li ġew imqajmin minn Elija, Eliżew, u Ġesù. Pawlu kien qed jirreferi għal dawk li se jiġu rxoxtati b’ġisem li jkun jistaʼ jgħix fis-​sema, li hu “ġisem spiritwali.”—1 Kor. 15:42-​44.

11-12. X’bidla esperjenza Ġesù meta ġie rxoxtat, u l-​midlukin kif jesperjenzaw xi ħaġa simili?

¹¹ Meta Ġesù kien fuq l-​art, hu kellu ġisem tal-​laħam. Imma meta ġie rxoxtat, hu “sar spirtu li jagħti l-​ħajja” u reġaʼ mar lura fis-​sema. Bl-​istess mod, il-​Kristjani midlukin ikunu rxoxtati b’ġisem li jistaʼ jgħix fis-​sema. Pawlu spjega dan: “Bħalma lbisna x-​xbieha taʼ dak li hu magħmul mit-​trab, se nilbsu wkoll ix-​xbieha taʼ dak li hu tas-​sema.”—1 Kor. 15:45-​49.

¹² Huwa importanti niftakru li Ġesù ma kienx irxoxtat b’ġisem tal-​laħam. Meta Pawlu kien kważi spiċċa d-​diskussjoni tiegħu, hu qal: “Il-​laħam u d-​demm ma jistgħux jirtu s-​saltna t’Alla” fis-​sema. (1 Kor. 15:50) L-​appostli u l-​midlukin ma kinux se jiġu rxoxtati fis-​sema b’ġisem tal-​laħam u d-​demm li jistaʼ jispiċċa. Huma meta kienu se jiġu rxoxtati? Pawlu qal li huma kienu se jiġu rxoxtati fil-​futur, mhux eżatt malli jmutu. Meta Pawlu kiteb l-​1 Korintin, xi dixxipli kienu diġà “raqdu fil-​mewt,” bħal pereżempju l-​appostlu Ġakbu. (Atti 12:1, 2) Iktar tard l-​appostli u midlukin oħrajn kienu se ‘jorqdu fil-​mewt.’—1 Kor. 15:6.

13. X’kellu jiġri matul il-​preżenza taʼ Kristu?

¹³ Ġesù u anki Pawlu pprofetizzaw dwar żmien importanti li kellu jiġi. Dan iż-​żmien jissejjaħ il-​preżenza taʼ Kristu. Matul il-​preżenza taʼ Kristu kellu jkun hemm gwerer, terremoti, mard li jittieħed, u problemi oħrajn madwar id-​dinja. Aħna rajna din il-​profezija tal-​Bibbja titwettaq mill-​1914 ’l hawn. Però, kellu jkun hemm sinjal importanti ieħor. Ġesù qal li l-​aħbar tajba li s-​Saltna t’Alla qed tmexxi se tkun pritkata “fl-​art abitata kollha bħala xiehda lill-​ġnus kollha; u mbagħad jiġi t-​tmiem.” (Mt. 24:3, 7-​14) Pawlu qal ukoll li “l-​preżenza tal-​Mulej” kienet se tkun iż-​żmien meta l-​Kristjani midlukin li “raqdu fil-​mewt” jiġu rxoxtati.—1 Tess. 4:14-16; 1 Kor. 15:23.

14. X’jiġri lill-​Kristjani midlukin li jmutu matul il-​preżenza taʼ Kristu?

¹⁴ Il-​Kristjani midlukin li jmutu issa jiġu rxoxtati mill-​ewwel għall-​ħajja fis-​sema. Dan jikkonfermah Pawlu fl-​1 Korintin 15:51, 52: “Mhux ilkoll se norqdu fil-​mewt, imma lkoll se nitbiddlu, f’mument, f’ħakka t’għajn, matul l-​aħħar trumbetta.” Dan il-​kliem taʼ Pawlu issa qiegħed jitwettaq! Malli jirxoxtaw, ħut Kristu se jkollhom ferħ kbir; huma se jkunu “dejjem mal-​Mulej.”—1 Tess. 4:17.

15. Liema xogħol se jagħmlu dawk li se jinbidlu “f’ħakka t’għajn”?

¹⁵ Il-​Bibbja tgħidilna liema xogħol se jagħmlu fis-​sema dawk li se jinbidlu  “f’ħakka t’għajn.” Ġesù se jgħidilhom: “Lil min jirbaħ u josserva l-​għemejjel tiegħi sat-​tmiem nagħtih l-​awtorità fuq il-​ġnus, u jirgħa lin-​nies b’xettru tal-​ħadid sabiex jitkissru biċċiet bħal reċipjenti tal-​fuħħar, bħalma jien irċivejt l-​awtorità mingħand Missieri.” (Riv. 2:26, 27) Huma se jsegwu lil Ġesù u ‘jirgħu lin-​nies b’xettru tal-​ħadid,’ jiġifieri, jeqirdu lill-​ġnus.—Riv. 19:11-15.

16. Miljuni taʼ nies kif se joħorġu rebbiħin fuq il-​mewt?

¹⁶ Bla dubju, il-​midlukin se joħorġu rebbiħin fuq il-​mewt. (1 Kor. 15:54-57) Permezz tal-​irxoxt tagħhom se jkunu jistgħu jgħinu lil Ġesù biex ineħħi l-​ħażen kollu matul il-​gwerra taʼ Armageddon. Miljuni oħra taʼ rġiel u nisa Kristjani se ‘joħorġu mit-​tribulazzjoni l-​kbira,’ u jgħaddu għad-​dinja l-​ġdida. (Riv. 7:14) Dawk li se jibqgħu ħajjin fuq l-​art se jaraw rebħa oħra fuq il-​mewt meta biljuni taʼ nies li mietu fil-​passat se jiġu rxoxtati. Immaġina kemm se nkunu ferħanin meta jiġri dan! (Atti 24:15) Imbagħad, dawk kollha li jkunu leali lejn Ġeħova se jirbħu l-​mewt li wirtu mingħand Adam ukoll, u se jkunu jistgħu jgħixu għal dejjem.

17. L-​1 Korintin 15:58, x’qed jinkuraġġina nagħmlu?

¹⁷ Kull Kristjan għandu japprezza l-​kliem inkuraġġanti li Pawlu kiteb lill-​Korintin dwar l-​irxoxt. Għandna raġunijiet tajbin biex nobdu l-​parir taʼ Pawlu u nagħmlu dak kollu li nistgħu “fix-​xogħol tal-​Mulej.” (Aqra l-​1 Korintin 15:58.) Jekk dejjem nagħmlu l-​almu tagħna f’dan ix-​xogħol, nistgħu nħarsu ’l quddiem għall-​ħajja mill-​isbaħ fil-​futur. Dan il-​futur se jkun isbaħ minn kull ħaġa oħra li nistgħu nimmaġinaw. Dakinhar se naraw li l-​isforz li għamilna għal Ġeħova ma kienx għal xejn.