1-2. Tae-i ǃaroma i hoa Xristeǁîna ǀhommi di khâis xa nî ǁkhāǁkhāsen?

ǂGUI khoen hîna nētsē Jehovaba ra ǃoaban ge ǀamosib kōse ǃhūbaib ai hâs di ǃâubasensa ūhâ. Tsî i ge ǀoro Xristeǁîn Jehovab xa ǂkhauhe hâna ǀhommi di ǃâubasensa ūhâ. ǁNā ǂkhauhesan ge ǁîn ûib mati ǀhommi ǃnâ nî īsa ra ǂanǂgao. Xawe tae-i ǃaroman ǁnān hîna ǃhūbaib di ǃâubasensa ūhâna nēs xa ra ǁkhāǁkhāsen ǂgao? Mû da nî khami i ge ǀhommi di khâisa ǁnān hîna ǃhūbaib ai hân ǃgaos tsîna ǀkhaega nî hau. ǁNā-amaga da ge ǃhūbaib ai da ga ra hâs tamas ka io da ga ǀhomsi khâisa ga ra ūhâ xawe ǃgâiǃgâibasensa nî ūhâ ǁnā ǀhomsi khâis ǃnâ.

² Elob ge ǀnî apostelgu Jesub di ga ge daoǁgau î gu ǀhomsi khâis xa xoa. Apostel Johaneb ge ge mîǃā: “Nēsi da a Elob ôa, tsî i ge gorose ǂhai tama, mati da nî īsa; xawe da ge a ǂan, ǁîb ga ǂhai ǃnubai da nî ǁîb khami ī ǃkhaisa.” (1Jhn. 3:2) ǁNā-amaga i ge ǂkhauhesa Xristeǁîna a ǀū ûib mati nî īsa ǀhommi di khâisan ga gagasi sorodi ǃnâ a hō o. Xawen ge ǁîna Jehovaba ǁîn di madawa-āmsan ga hō o nî mû. Elobmîs ge hoa xūna mîbada tama hâ ǀhomsi khâis xa. Xaweb ge Apostel Pauluba ǀnî xūna ǁnās xa ge xoa. Aiǁgause i ge ǂkhauhesana Xristub ǀkha nî hâ. “Hoa ǂamkhoesib tsî ǁkhāsib, tsî ǀgaib tsînab ga hîkākā” o. Nēs ge ‘ǀuni khakhoeb ǁōb’ tsîna  ǃkhōǂgā hâ. ǀUnisi i ge Jesub tsî ǁnān ǁîb ǀkha nî ǂgaeǂguin tsîna hoa xūna Jehovaba nî mâǁnâ. (1Kor. 15:24-28) ǁNāb ge kaise nî ǁkhoaxa i ǁaeba. *

3. Paulub ge khâis ǃnâ gere ǂgom ǃkhaisa mati ge huibi, 1 Korinteǁin 15:30-32 ǃnâ i xaosa khami?

³ Paulub ge khâis ǃnâ gere ǂgom ǃkhais ge ge huibi ib ǂgui ǃgomsin hînab gere ǃkharuǃnâ na mû tsî mâǃkharu. (1 Korinteǁîn 15:30-32 sa khomai re.) Korinteǁînab ge ge mîba: “Tita ge tsēkorobe ra ǁō ta.” Paulub ge ge xoa: ‘Efesus tawa ta ge ǀgurun ǀkha’ gere ǃkham. ǀNîsib ge ama xamanin hîna ge Efeses ǃnâ hâ în xa gere ǃhoa. (2Kor. 1:8; 4:10; 11:23) Tamas ka iob ge ǀnîsi ǁgâiǀāb hînab ge Jodeǁîn tamas ka io naun hîna “ǀgurun” khama īna xub gere hōǃâ xūn xa gere ǃhoa. (ǃNǃkh. 19:26-34; 1Kor. 16:9) Paulub ge ǂgui ǁkhōǁkhōsa mâsigu ǃnâ ge ǃkharu. Xaweb ge gere ǂgom hānîǁaeb ǃnâb nî ǂkhîba hō ǃkhaisa.—2Kor. 4:16-18.

4. Khâis di ǃâubasensa mati Xristeǁîna nētsē ra ǀgaiǀgai? (Tsoastsoas ai hâ ai-īsiba mû re.)

⁴ Kaise ǃaorosa ǁaeb ǃnâ da ge ûi hâ. ǀNî ǃgâsan sida din ge ǃgâi tama mâsigu ǃnâ hâ tsîn ge torogu hâ ǃhūgu ǃnâ ra hâ tsî ǃnorasase tsâ tama hâ. ǀNî ǃhūgu ǃnâ i ge Jehovab di khoena mā-amhe tama hâ în ǃnorasase aoǁnâ xawen ge ǁîba ra ǃoaba tronkhedi ǃnâ ǂnûihe tsîn ga ǃgamhe ǂgao xawe. ǁÎn ge sida aiǁgaus ase a ība. ǁÎn ge ǃao tama hâ ǁîn ûiban ga nēsi ǂoaǃnâ xawe. Jehovab ǁîna hānîǁaeb ǃnâ kaise ǃgâi xū-e a mîmâiba amaga.

5. Mâ ǁkhōǁkhōsa ǂâiǀgauga Xristeǁî i di ǂgomsa a ǂkhabu kai ǁkhā?

⁵ Paulub ge ǁîb ǃgâsana ge mîba în ǀnî khoen ūhâ ǂâiǀgauba xu ǂgōsen. ǁŌ hân ga khâi tama io: “A da ǂû, î da ā; ǁari da nî ǁō xuige!” Paulub tsēdi ais ais tsînan ge ǀnî khoena nēti i ǂâi ǀgauga ge ūhâ i. ǁÎb ge ǀnîsi Jesajab 22:13 sa xū nē mîde ge hîǂui hîna ge Israelǁaes ge ūhâ i ǂâiǀgaub xa gere ǃhoade. ǁÎn di ǀnammi Eloban ūba hâba ǀgaiǀgai tama i tsîn ge ǁîna ǃgâi ǁaeba ūhâs ai ǁîn ǂâisa gere ǂnûi. ǁÎn ge gere mî nēsin ge ǃgâi ǁaeba nî ūhâ mâǁaes ǀamsa nî hâ ǃkhaisan a ǀū amaga. “Nētsē hâ tsî ǁari a ǀkhai,” nē ame ǂâiǀgaub ge nētsēs tsîna hâ. ǁÎn di ǃgâi tama ǂâiǀgaugu ǀkha i ge mati a hasa da ge Elobmîs ǃnâ ra mû.—2Kro. 36:15-20.

6. Mati i khâis ǃnâ da ūhâ ǃâubasensa ǀhōsana da ra ǁhui ǀgauba nî ǁgau?

⁶ ǂAn da ge a Jehovab khâisa nî māda ǃkhaisa. ǁNā-amaga da ge haman ǀkha da ra hâ ǃkhaisa nî kō. Korintes ǃnâ gere hâ ǃgâsan ge ǁnān hîna khâis ǃnâ ǂgom tama hâ khoen ǀkha hâsa xū nî ǂgōsen. Nēsa xū da ge sida tsîna nētsē ra ǁkhāǁkhāsen. Kai ǁaeba da ga ǁnâ khoen hîna tae-i hānîǁaeb ai nî īs ǃnâ ǂgom tama hân ǀkhā ga ra hâ o, tamas ka io ǁnān hîna ǃgâiǁaeb ǀguiba ūhân ǀkhā ga ra hâ, os ge nēsa ǃgâi tama sîsen ǂuiba sida ai nî ūhâ. Xristeǁî i ga ǃnāsa ǁaeba nēti i khoe-i ǀkha ga ra hâ o i ge ǁî i tsîna ǁî i ūhâ ǃgâiǀgauga nî ǂoaǃnâ. Nēti i khoe-i ge Elob ǃkhui hâ xūna ǁî-e a dī kai ǁkhā. ǁNā-amagab ge Pauluba ge mî: “Î du ǀguia ǂhanuse ǂkhaikhâi, î du tā ǁore.”—1Kor. 15:33, 34.

7. 1 Korinteǁîn 15:35-38 ǃnâ i xoasa khami i ǂgui khoena khâis xa tae-e di dîna ūhâ?

⁷ Khomai re 1 Korinteǁîn 15:35-38. Khoe-i hîna nau khoen tā khâis ǃnâ nî ǂgomsa ǂhâba hân ge ǀnîsi ra dî: “Matin kha ǁōhana nî khâi?” Kaise i ge a ǃgâi Paulub di ǃereams xa ǂâiǃgâsa. ǂGui khoen ge ûib ǁōb khaos ai hâb xa ǂgui ǂâiǀgauga ūhâ. Xawe Elobmîsa tae-e ra ǁkhāǁkhā?

8. Mâ aiǁgausa a huida ǁkhā î da ǀhomsi khâisa ǁnâuǃā?

⁸ Khoe-i ga ǁō o i ge ǁî i sorosa ra ǀō. Xawe ǁnāb hîna ge ǃhūbaiba xū-i a ǀkhai ǃkhaib ai a kurub ǁnāb ge ǁnā khoe-e khâisa nî mā tsî ǁî-i ǂhâba hâ sorosa nî mā. (Gen. 1:1; 2:7) Paulub ge ǂkhōsa ge sîsen-ū hîna ra ǁgausa ǂhâbasa tama i hâsa Elob ǁnā sorosa khoe-e nî mā-oa ǃkhaisa. ǃHoro i tamas ka io “ǃkhom-i” xa ǂâi re. ǃKhoms ge ǃhūb ǃnâs ga ǃhana-e o ǀasa hais ase ra ǂoaxa. ǁNā ǀasa hais ge ǀkharadi ǃkhomsa xu ra mûsen. Paulub ge ǃkharagagusiba ge ǁgau. ‘Elob ǁî-e ǂgaob ra khami ī soro-e ra mā’ ǃkhaisa.

9. 1 Korinteǁîn 15:39-41 sa tae-e ra mî ǃkharagagusib sorodi dib xa?

⁹ Khomai re 1 Korinteǁîn 15:39-41. Paulub ge ge xoa Elob ge hoa sorode ǀguidi-īse kuru tama hâ i ǃkhaisa. Aiǁgause i ge goman, anin tsî ǁaun tsîna ǃkharagagu sorodi ǀkha ge kuruhe. ǀHommi ǃnâs tsîna da ge ǃkharagagusiba sores tsî ǁkhâb ǁaegu ra mû. ǁÎb ge ge xoa “ǀgui ǀgamiro-i ge nau ǀgamiro-e ǂkhaisib ǃnâ ra ǃnā.” ǃKharagagusiba da ga sida di mûdi ǀkha mû tama ka ra i xawes ge nēsa a ama. ǂAnsa ūhâ khoen ge ra mîba da, ǃkharagagusib ǂgui ǀgamirodi ǃnâ hâsa. ǀNîn ge a kai, ǀnîn ge a ǂkhariro, ǀnîna ǀapa, ǀnîna ǃuri, ǀnîna ǃhuni.  Aiǁgause sida sores khami. Paulub ge ge xoa “ǀhomsi sorode hâ, tsî di ge ǃhūsi sorode hâ.” ǁNāsa tae-e ra ǂâibasen? ǃHūbaib ai da ge ǁgansi sorode ūhâ xawe ǀhommi ǃnâ i ge gagasi sorode hâ, ǀhommi ǃnâ hâ ǀhomǃgān khami.

10. Mâ ame sorosan ǁnân hîna ǀhommi ǃnâ nî hâna nî ūhâ?

¹⁰ Paulub ge saorase a mî xū-e ǃgaoǃgâ re: “ǁNās ǁkhās khamis ge ǁkhāti ǁō hân di khâisa nîra ī. ǁGaoǁgaosa xūse i ra tsorohe, tsî i ge ǁgaoǁoasa xūse nîra khâi.” ǂAn da ge a khoe-i ga ǁō, o i ge ǁî-i di sorosa ra ǀō tsî ra tsara kai. (Gen. 3:19) Mati i khoe-i sorosa “ǁgaoǁoasa xūse nîra khâi”? Paulub ge khoe-i hîna ǃhūbaib ai khâisa nî hō i xa ge ǃhoa tama hâ i. Eliab, Elisab tsî Jesu hâgu khami. Paulub ge ǁnān hîna ǀhommi ǃnâ si nî hâ sorodi xa gere ǃhoa. ǁNā i ge “gagasi soro-i” hîna ǀhommi ǃnâ nî hâ-e.—1Kor. 15:42-44.

11-12. Tae-i ǀkharaǀkhara-eb ge Jesuba hōǃâ khâisab ge hōs khaoǃgâ tsî mati i ǂkhauhesana ǁkhā xū-e nî hōǃâ?

¹¹ Jesub ge ǃhūbaib aib ge hâ i o ǁgansi sorosa ge ūhâ i. Xaweb ge ǀhomma ǃoab ge oa o ge “ûi-ûi ra Gaga kai.” ǁNā-amaga i ge ǂkhauhesana ǀhommi ǃnâ a hâ ǁkhā sor ame sorode nî ūhâ ǀhommi khâisan ga hō o. Paulub ge ge xoa: “ǃHūb dib di īsiba da gere tanis ǁkhās khami da ge ǁkhāti ǀhommi di īsiba nîra tani.”—1Kor. 15:45-49.

¹² Kaise i ge a ǂhâǂhâsa î da ǂâis ǃnâ ūhâ Jesub ge khoesi soros ǀkha khâisa hō tama hâ i ǃkhaisa. Paulub ge khâis xa hâ ǃhoas ǁîb di ǀams ai gere hā ob ge ǁîba ge mîǃā tae-i ǃaromas asa mîb ge o ‘ǁgans tsî ǀaob tsîra Elob gaosiba a ǀumi ǁoa ǃkhaisa.’ (1Kor. 15:50) Apostelgu tsî nau ǂkhauhesan tsîn ge ǀhommi di khâisa sorosi ǁgans hîna ra ǀōs ǀkha hō tide. Mâ ǁaen ǁîna khâisa nî hō? Paulub ge gere mî nē khâis hānîǁaeb ǃnâ nî īsa.  Nēs ge ǁōtoan gas khaosi ī tide. Paulub ge 1 Korinteǁîn ǂkhanisa gere xoa ǁaeb ai i ge ǀnî Xristeǁîna ‘ǀnai ge ǁō,’ aiǁgause Apostel Jakobuba. (ǃNǃkh. 12:1, 2) Nau Apostelgu tsî ǂkhauhesan tsîn ge hānîǁaeb ǃnâ ‘nî ǁō.’—1Kor. 15:6.

13. Jesub di “hās ǃnâ” i taena nî ī?

¹³ Jesub tsî Paulub tsîn ge ǂhâǂhâsa ǁaeb hîna nî hāb xa ge kēbo. ǁNā ǁaeb ge Xrsitub hās tiba. Xristub hās ǁae i ge toron, ǃhūǂgubin, ǀaen tsî nau ǁgai xūn tsîna ǃhūbaib ǂhabase nî ī. Nē Elobmîs kēbosa da ge 1914ǁî kuriba xūs ta dīǀoaǀoahesa ra mû. ǁNā kēbodi ǀgui ǂhâǂhâsa xū-i ge hâ ǃgâiǂhôas Gaosib dis ge “ǃhūbaib hoab ai nîra aoǁnâhe, hoa ǁaedi mîdansa ǃoa; tsî ǁnāǃnubais ge ǀamsa nîra hā.” (Mat. 24:3, 7-14) Paulub ge ge mî, “ǃKhūb di hās ǃnâ” i ge ǂkhauhesan, “Xristub ǃnâ ge ǁōna aibe” khâisa nî hō.—1Tes. 4:14-16; 1Kor. 15:23.

14. Tae-e ǂkhauhe hâ ǃgâsan Xristub di hâs ǃnâ ra ǁōn ǀkha nî ī?

¹⁴ ǂKhauhesa ǃgâsan hîna nē ǁaen ai ra ǁōn ge ǁnā ǁaeb ǂûb ai khâisa ra hō tsî ǀhomma ǃoa ra ī. Nēs ge Paulub ge 1 Korinteǁîn 15:51, 52 ǃnâ xoa mîdi ǃnâ hâ: “Mû, ǂganǃgâsi-e ta sado ra mîba: Hoada ge ǁō tide, xawe da ge hoada nîra ǀkharaǀkharahe. ǃNubu ǁaerob ǃnâ, ǀgui mûsǀapirob ǃnâ, ǀuni (trompets) ǀgapadas ra ǀō hîa.” Nē mîdi ge nēsi ra dīǀoaǀoahe. Khâisan ga hō o i ge Xristub di ǃgâsana kai ǂkhîba nî ūhâ tsîn ge “ǃKhūb ǀkha” nî hâ.—1Tes. 4:17.

15. “Mûsǀapirob ǃnâ” khâisa nî hōna tae-i xa ǃâuhe hâ?

¹⁵ Elobmîs ge ra mîba da ǁnān hîna  “mûsǀapirob ǃnâ” khâisa nî hōn tae-e ǀhommi ǃnâ sī nî hîsa. Jesub ge ǁîna ge mîba: “Dan ra-i tsî ti sîsenga ǀunis kōse ra ǃkhōǀgaipebasen-i, ǁî-e ta ge nî ǀgaiba mā ǀūben ǂama, o i ge ǁîna ǂnūǀuri haib ǀkha nîra ǃûi, on ge sūǂnubi-aob di soadi ra ǂkhūǂkhūhe khami nîra ǂkhūǂkhūhe, tita on ge ti Îba xu hō xase.” (J.ǂHa. 2:26, 27) ǁÎn ge Jesuba nî sao ai tsî hoa ǃhaode nî ǃûi ǀurihaib ǀkha.—J.ǂHa. 19:11-15.

16. Matin ǂgui khoena ǁōba nî dan?

¹⁶ ǃGāsa i ge a ǂkhauhehan ge ǁōba nî dan. (1Kor. 15:54-57) ǁÎn khâis ge nî ǃaroma in hoa Eloxoresasiba ǃhūbaib ǂkhabase ūbe Armagedons ga ra hā o. ǂGui aore tsî tare Xristeǁîn ge “kai ǁgâiǀāba xu” nî ǂoaxa tsî ǀasa ǃhūbaiba nî hō. (J.ǂHa. 7:14) ǁNā ǃhūbaib ai hān ge ǁōb di dansa nî mû. ǂGui khoen hîna ge ǁōn ga khâisa ga ra hō o, ǂâis ǀguisa hî re matikō ǂkhîb nî hâsa nēs ga ra io. (ǃNǃkh. 24:15) Hoan hîna Jehovab ǃoa ai a ǂgomǂgomsan ge ǁōb di dansa nî hō Adamma xūn ge ǀumisa tsîn ge ǀamosib kōse ǃhūbaib ai nî hâ.

17. 1 Korinteǁîn 15:58 sa ǂâis ǃnâ ūhâse da tae-e nēsi nî dī?

¹⁷ Khâis xab ge Pauluba Korinteǁîna ǃoa xoa mîdi xa i ge mâ Xristeǁî-i hoa-i nēsi ûitsama-e kaise ra ǁkhaeǂgaohe. ǃGâi ǃaromasa da ge ūhâ î da Paulub di ǀawemāsa ǁnâuǀnam tsî ǁkhāda a i hoa-e dī “ǃKhūb di sîsenni ǃnâ.” (Khomai re 1 Korinteǁîn 15:58.) Hoa ǁaeda ga ǁnā sîsenni ǃnâ ǃgarise sîsen o, o da ge ǂkhîsa ûiba hānîǁaeb ǃnâ ūhâsa ra mûǂui. Nēsi da ra ǂâis xa i ge ǁnā hānîǁaeba kaise nî ǃgâi i. Sida sîsenni ǃKhūb ǃnâ da gere dī i ǁautama hâsa i ge nî ǁgau.