1, 2. ¿Kenke tlauel ipati tijmatisej moyolkuisej katli yasej iluikak?

NOCHI tojuantij nojua tijnekij tijmatisej kenijkatsa moyolkuisej katli yasej iluikak. Uan katli kintlapejpenijtokej yasej iluikak nojua kinekij kimatisej ni pampa nopaya itstotij. ¿Kenke katli timotemachiaj tiitstosej ipan Tlaltipaktli nojkia tijnekij tijmatisej? Pampa uelis tijselisej miak tlateochiualistli. Yeka, tlaj timotemachiaj tiitstosej ipan Tlaltipaktli o amo, nochi tijnekij nojua tijmatisej sekinok tlamantli kema moyolkuisej katli yasej iluikak.

² Jehová kichijki se keskij Cristo itokilijkauaj tlen achtoui siglo ma kiijkuilokaj tlen kichiaj kiselisej katli kintlapejpenijtokej yasej iluikak. Apóstol Juan kiijtok: “Tiitstokej tiikoneuaj toTeko, uan aya technextilijtok kejatsa tiitstosej teipa. Pero tijmatij kema Jesucristo [tekichijtos], tielisej keja yajaya pampa tikitasej kejatsa yajaya itstok” (1 Juan 3:2). Yeka, inijuantij amo kimatij kenijkatsa elis kema itstosej ne iluikak. Maske nopa amo kimatij, motemachiaj kema moyolkuisej kiitasej Jehová. Biblia san kiijtoua se keski tlamantli tlen kema moyolkuisej ne iluikak. Apóstol Pablo kiijtok katli kintlapejpenijtokej yasej iluikak itstosej iuaya Cristo kema “kintlanis nochi ikualankaitakauaj, [...] uan tlen kipiaj tekiuejkayotl” uan nojkia kema kitlamiltis mikilistli. Uan kema Jesús uan katli tlanauatisej iuaya ya kichijtosej nochi tlen kinnauatijkej, Jesús kimaktilis iTata nopa tlanauatijkayotl uan kiampa “kipias nochi tlanauatili ika nochi tlen onka” (1 Cor. 15:24-28). ¡Nelia tlauel kuali tlen panos! *

3. Kej kiijtoua 1 Corintios 15:30-32, ¿tlake uelki kichiua Pablo pampa motemachik moyolkuisej katli miktokej?

 ³ Pablo kiijiyouik nochi tlen kipanok pampa motemachiyaya teipa moyolkuisej katli miktokej (xijpoua 1 Corintios 15:30-32). Yeka, kiniljuik katli euaj Corinto: “Mojmostla eltok keja asi nopa hora para nimikis”. Uan nojkia kiijtok: “Nimoteuijtok ika nopa fiero tlakamej ipan altepetl Éfeso tlen itstoyaj keja tekuanimej”. Uelis kiniljuik nopa judíos katli amo kinekiyayaj kitlakakilisej uan sekinok ikualankaitakauaj (2 Cor. 1:8; 4:10; 11:23). Nojkia uelis Pablo kiijtok: “Nimoteuijtok ika tekuanimej ipan altepetl Éfeso”. Uan uelis panok kema moteuik ika tekuanimej tlen itstoyaj ipan circo tlen nopa altepetl (Hech. 19:26-34; 1 Cor. 16:9). Maske kiampa kipanok, Pablo nochipa kiixnamijki tlaouijkayotl ika pakilistli (2 Cor. 4:16-18).

4. ¿Kenijkatsa kinyolchikaua toikniuaj pampa kimatij moyolkuisej katli miktokej? (Xikita tlaixkopinkayotl ipan ipantsajka).

⁴ Tojuantij nojkia tikixnamikij miak kuesoli. Se keskij toikniuaj kinchiuilijtokej tlen tlauel amo kuali. Sekinok itstokej kampa mochiua tlauilankayotl. Uan ipan se keski altepemej amo kinkauaj ma tlajtolmoyauakaj, yeka toikniuaj kitekipanouaj Jehová maske ueliskiaj kintsakuasej o kinmiktisej. Maske kiampa itstokej nojua kitekipanouaj Jehová, uan tlen kichiuaj tlauel techpaleuia. Ni toikniuaj amo majmauij pampa kimatij maske mikisej, Jehová kitenkajtok kinyolkuis katli miktokej.

5. ¿Tlake ueliskia kichiuas ayokmo ma timotemachikaj nelia moyolkuisej katli miktokej?

⁵ Pablo kiniljuik Cristo itokilijkauaj se keskij amo moiljuiyayaj kej kinamiki, uan kiijtouayayaj: “Ma titlakuakaj uan ma titlaikaj pampa mostla timikisej”. Miakej maseualmej ipa kiampa moiljuiyayaj. Yeka, uelis tlen Pablo kiijtok kikixtik ipan Isaías 22:13, kampa kiijtoua israeleuanij san moyolpakiltiyayaj uan amo monechkauiyayaj ika toTeotsij. Kej kiijtouaj miakej maseualmej ipan ni tonali, israeleuanij kiijtouayayaj: “Ximoyolpakilti pampa amo tijmati tlaj mostla nojua tiyoltos”. Biblia kiijtoua pampa amo moiljuiyayaj kej kinamiki, kinpanok tlen amo kuali (2 Crón. 36:15-20).

6. ¿Kenijkatsa pampa tijmatij moyolkuisej katli miktokej techpaleuis kuali ma tikintlapejpenikaj touampoyouaj?

⁶ Pampa tijmatij Jehová kinyolkuis katli miktokej, techpaleuia kuali ma tikintlapejpenikaj touampoyouaj. Toikniuaj tlen Corinto monekiyaya amo mouampojchiuasej ininuaya katli amo kineltokayayaj moyolkuisej katli miktokej. ¿Tlake techmachtia? Tlaj timouampojchiuaj ininuaya katli san mosentlaliaj moyolpakiltisej uan amo ipan tlen kiselisej teipa, kichiuas nojkia kiampa ma tijchiuakaj. Nojkia, kichiuas ayokmo kuali ma timonejnemiltikaj uan ma tijchiuakaj tlen toTeotsij amo kipaktia. Yeka, Pablo techtlajtolmaka: “Ximotlalnamiktikaj uan ayok xitlajtlakolchiuakaj” (1 Cor. 15:33, 34).

7. Kej kiijtoua 1 Corintios 15:35-38, ¿tlake tlajtlanili ueliskia kichiuas se akajya?

⁷ (Xijpoua 1 Corintios 15:35-38). Se akajya katli kineki kichiuas ayokmo ma tijneltokakaj moyolkuisej katli miktokej ueliskia kiijtos: “¿Kenijkatsa  moyolkuisej katli miktokej?”. Tlauel ipati tikitasej tlen Pablo kiijtok pampa miakej maseualmej amo sanse kineltokaj tlake pano kema miki se akajya. Uan, ¿tlake tlamachtia Biblia?

8. ¿Tlake neskayotl techpaleuis kuali tijkuamachilisej kenijkatsa moyolkuisej katli kintlapejpenijtokej yasej iluikak?

⁸ Kema se akajya miki, itlakayo nempoliui. Maske kiampa pano, Jehová katli kichijchijki nochi, uelis kiyolkuis se maseuali uan uelis kimakas seyok itlakayo (Gén. 1:1; 2:7). Pablo kitekiuik se neskayotl uan kiampa kiixtonki toTeotsij amo kinmaka inintlakayo tlen achtouia kipixtoyaj, ya ueli kinmaka seyok inintlakayo. Pablo kiijtok kema se akajya kitoka se xinachtli teipa peua moskaltia. Yeka, nama nopa xinachtli ayokmo eli sanse ika nopa xiuitl tlen ya moskaltik. Ika ni neskayotl Pablo kinextik Jehová uelis kimakas itlakayo se akajya kej ya kinekis.

9. Ika tlen kiijtoua 1 Corintios 15:39-41, xikijto kenijkatsa totlakayo amo eli sanse.

⁹ (Xijpoua 1 Corintios 15:39-41). Pablo kiijtok toTeotsij amo sanse tlachijchijki. Ma timoiljuikaj ipan ni tlamantli, uakaxmej, totomej uan michimej amo sanse kinchijchijkej. Nojkia, kiijtok Tonati uan metstli amo elij sanse, uan “nochi sitlalimej axkauanij ika sanse ininchikaualis”. Maske amo uelij tikinitaj, ixtlamatinij kiijtouaj onka miakej sitlalimej katli amo elij sanse pampa sekij elij uejueyij, pilsiltsitsij, chichiltikej, chipauakej uan sekij kostikej, kej Tonati. Pablo nojkia kiijtok katli “itstokej ipan iluikak nojkia kipiaj seyok tlamantli ininnakayo uan axkeja tojuantij ipan ni Tlaltipaktli”. ¿Tlake kinejki kiijtos? Tojuantij nojkia amo tijpiaj sanse totlakayo kej iluikaeuanij.

10. ¿Kenijkatsa elis inintlakayo katli itstosej ipan iluikak?

¹⁰ Pablo nojua kiijtok: “Keja nopa elis  kema mijkatsitsij moyolkuisej. Tlakamej kitlalpachouaj se mijkatsi ika itlakayo tlen palani, pero toTeko kiyolitis ika se itlakayo tlen axpalanis”. Kema se akajya miki, itlakayo nempoliui uan sampa eli tlaltejpoktli (Gén. 3:19). Uajka, ¿kenijkatsa itlakayo se akajya ayokmo palanis? Kema Pablo kiijtok “toTeko kiyolitis ika se itlakayo tlen axpalanis” amo kinejki kiijtos katli moyolkuij ipan Tlaltipaktli, kej nopa maseualmej katli kinyolkuikej Elías, Eliseo uan Jesús. Ya kinejki kiijtos nochi katli moyolkuisej uan itstosej iluikak (1 Cor. 15:42-44).

11, 12. 1) ¿Tlake mopatlak kema Jesús moyolkuik? 2) Uan, ¿tlake uelis tikijtosej tlen kintlapejpenijtokej yasej iluikak?

¹¹ Kema Jesús itstoya ipan Tlaltipaktli kipixtoya itlakayo kej tojuantij. Uan kema moyolkuik uan yajki iluikak uelki “temaka yolistli” pampa ayokmo kipixtoya sanse itlakayo. Katli kintlapejpenijtokej yasej iluikak kipiasej inintlakayo, kej Jesús. Pablo kiijtok: “Keja ama totlakayo nesi keja itlakayo Adán tlen elki tlen ni Tlaltipaktli, teipa tijpiasej totlakayo tlen nesis keja itlakayo Cristo tlen eua iluikak” (1 Cor. 15:45-49).

¹² Ma tikilnamikikaj kema Jesús moyolkuik amo kipixki itlakayo kej tojuantij. Kema Pablo nechka tlamiskia tlen kiixtomayaya, kiijtok: “Totlakayo tlen nama tijpiaj ika toeso uan tonakayo, axuelis itstos nepa kampa tlanauatia toTeko” (1 Cor. 15:50). Apóstoles uan katli kintlapejpenijtokej yasej iluikak, nojkia amo yasej iluikak ika inintlakayo katli nempoliui. Uan, ¿kema moyolkuisej? Pablo kiijtok moyolkuiskiaj teipa uan amo ipan nopa tonali kema mikij. Kema Pablo kiijkuilok 1 Corintios, se keskij Cristo itokilijkauaj ya miktoyaj o kejuak kochtoyaj, kej apóstol Santiago uan sekinok katli kintlapejpenijtokej yasej iluikak nojkia kiampa kinpanoskia (Hech. 12:1, 2; 1 Cor. 15:6).

13. ¿Tlake panoskia kema “Cristo mokuepas”?

¹³ Jesús uan Pablo kiijtojkej tlake panoskia kema Jesús tekichijtos, ipan nopa tonali onkaskia tlauilankayotl, mojmoliniskia tlali, onkaskia kokolistli uan sekinok tlamantli tlen panoskia ipan Tlaltipaktli. Ni tlajtolpanextili tlen pejki moaxitia ipan 1914 nojkia moaxitiskia seyok tlamantli tlen tlauel ipati. Jesús kiijtok nopa kuali tlamachtili momoyauaskia “ipan nochi tlaltinij ipan ni Tlaltipaktli [...]. Uan teipa ualas itlamia nochi tlen onka” (Mat. 24:3, 7-14). Pablo kiijtok ipan nopa tonali kema “sampa ualas toueyiTeko” o kema ya tekichijtos, nochi katli kintlapejpenijtokej yasej iluikak uan ya miktosej, moyolkuisej iluikak (1 Tes. 4:14-16; 1 Cor. 15:23).

14. ¿Tlake kinpano katli kintlapejpenijtokej yasej iluikak uan mikij ipan ni tonali?

¹⁴ Ipan ni tonali, nochi katli kintlapejpenijtokej yasej iluikak uan mikij ipan Tlaltipaktli, nima moyolkuij uan yauij iluikak. ¿Kenijkatsa tijmatij? Ika tlen Pablo kiijtok ipan 1 Corintios 15:51, 52, TNM: “Maske amo nochi tiuejkauasej timiktosej, nochi techpatilisej totlakayo, nimantsi, kej kema tiijkopij uan titlachiaj, kema kipitsasej nopa trompeta tlen mokajtos”. Nochi tlen ya kiijtok moaxitia ipan ni tonali. Yeka, kema moyolkuisej katli kintlapejpenijtokej nelia tlauel yolpakisej uan nochipa itstosej “iuaya toueyiTeko” (1 Tes. 4:17).

15. ¿Tlake kichiuatij ipan iluikak katli kintlapejpenijtokej?

¹⁵ Biblia kiijtoua tlake kichiuatij ipan iluikak nochi katli kintlapejpenijtokej. Jesús  kiniljuia: “Tlen kitlanisej tlen axkuali uan kichijtinemisej tlen niinmechiljuijtok hasta itlamia, niinmechmakas tekiuejkayotl inkinnauatisej tlakamej ipan nochi tlaltinij. Chikauak inkinnauatisej. Uan intla tlakamej axinmechtlepanitasej, inkinchiuilisej keja eliskia se komitl tlen tlapani. Inkipiasej sanse nopa tekiuejkayotl keja noTata nechmakatok na” (Apoc. 2:26, 27). Inijuantij kitokilisej inintlanauatijka Jesús uan sansejko kinnauatisej nochi maseualmej (Apoc. 19:11-15).

16. ¿Kenijkatsa kitlanisej mikilistli tlauel miakej maseualmej?

¹⁶ Tijmatij katli kintlapejpenijtokej, uelis kitlamiltisej mikilistli (1 Cor. 15:54-57). Pampa moyolkuisej uelis kitlamiltisej nochi tlen amo kuali ipan Tlaltipaktli kema ya mochijtos Armagedón. Tlauel miakej toTeotsij itekipanojkauaj amo mikisej kema mochiuas ueyi tlauilankayotl uan kiampa itstosej ipan yankuik Tlaltipaktli (Apoc. 7:14). Nojkia, kiitasej seyok tlamantli tlen mochiuas: kiitasej kenijkatsa moyolkuisej tlauel miakej maseualmej katli mijkej uejkajkia. ¡Onkas miak pakilistli! (Hech. 24:15). Uan nochi katli amo kitlauelkauasej Jehová, nojkia uelis kitlanisej mikilistli tlen Adán techpanoltilik uan uelis itstosej nochipa.

17. ¿Tlake techiljuia ma tijchiuakaj 1 Corintios 15:58?

¹⁷ Nochi Cristo itokilijkauaj tlauel tijtlaskamatij pampa tlauel techyolchikaua kema Pablo kiijtok moyolkuisej katli miktokej. Yeka, tlauel kuali tlaj tijchiuaj tlen Pablo kiijtok: “Nochipa xijchiuakaj nochi nopa tekitl tlen toueyiTeko inmechmaka” (xijpoua 1 Corintios 15:58). Tlaj tijchiuaj kampeka tijchiuasej tlen technauatijtokej, uelis tiitstosej ipan Xochimili ika miak pakilistli. Uajka tikitasej nochi nopa tekitl tlen tijchijkej “axsan tlapik”.