1-2. Ngenyi Makristu ese anodikana kubatikana ngo rumuko hwo mugore?

VANDHU vazinji vanoshandira Jehovha nyamasi uno, vano vetero yo kuzopona pasi pano. Asi Makristu mashoma akazojwa ndi Jehovha, ano vetero yo kuzomuswa kwenda kudenga. Makristu aya okuzojwa anoda kuziva kuti, upenyu hwavo unozova hwakadini kudenga. Asi ngenyi vanovetero yo kuzopona pasi pano vanodikanavo kuziva ngo pamusoro pazvo? Inga zvaticada kuzovona, rumuko wo kudenga unozoviisa makomborero kuno vaya vanozopona pasi pano kwenda no kwenda. Ngokudaro, azvinenyi dangani vetero yedu ngo yo kwenda kudenga kana ngo yo pasi pano, tese tinodikana kubatikana ngo rumuko hwo kudenga.

² Mwari wakafemera vajiji vamweni va Jesu vo muzana ro kutanga kuti vatare ngo pamusoro po vetero yo mugore. Mupostori Johani wakatara kudari: “Wari tiri vana va Mwari. Kaveta, abzito bzavoneswa kuti tinozoita ani. Tinoziva basi kuti, ngari yo kuvoneswa kwake, tinozoezana na yena.” (1 Johani 3:2) Ngokudaro, Makristu okuzojwa aazvizivi kuti anozova akadini paanozomuswa kuti aende mugore no muviri wo kumujimu. Asi tingatonanga kuti ivona vanozovona Jehovha pavanozoashira mupfupo wavo. Bhaibheri arinangi zvizinji ngo pamusoro po rumuko hwo mugore, asi mupostori Pauro wakananga zviro zvinganani. Vokuzojwa vanozova na Kristu ‘paanozofujura Ukuru hwese, Usimba hwese no Utongi hwese.’ Izvo zvinobatanijavo “mukorore wokupejisira . . . rufu.” Perapo, Jesu no vaanozotonga navo, vanozojidira pasi po utongi hwa Jehovha vosiya zvese mu nyara jake. (1 VaKorinto 15:24-28) Uwu unozova mukuvo unoshamaisa maningi! *

3. Inga zvatinovona pana 1 VaKorinto 15:30-32, kutenda kwakaita Pauro rumuko kwakamubesera kuti aitenyi?

 ³ Kutenda kwakaita Pauro rumuko kwakamubesera kuti acungirire zvineso zvizinji. (Verenganyi 1 VaKorinto 15:30-32.) Iyena wakavhunja Vakorinto kudari: “Inini njiku jese ndiri mu rufu.” Wakaengejerazve eciti: ‘Ndakahwisana . . . mu Efeso, no bzikara.’ Kangaije waibhuya ngo pamusoro po kuhwisana no zvinyama ku ndau yaihwisana vandhu ku Efeso. (2 VaKorinto 1:8; 4:10; 11:23) Kangaije wainangira kuteverehwa kwaaitwa ngo Vajudha no vamweni vaidari inga “bzikara.” (Maitiro o Vapostori 19:26-34; 1 VaKorinto 16:9) Pikija Pauro wakasongana no zvineso zvakashatisisa, iyena wakaenderera mberi ecithemba kuti waizova no kumbeji kwakanaka.—2 VaKorinto 4:16-18.

4. Vetero yo rumuko inovangisa kudini Makristu nyamasi uno? (Vonanyi pikica yo pa kapa.)

⁴ Tiri kupona munguva yokunesa. Hama jedu jimweni jiri kuitihwa zviro zvakashata. Hama jimweni jiri kugara ku ndau jiri kuizwa hondo zvokuti avajizwi vakangwaririka. Kuveni vamweni vari kushandira Jehovha mu nyika jo kuti basa redu ro kucumaera riri kurambijwa asi ivona vari kushandira Jehovha pikija kutodira upenyu hwavo pa ngozi vacina rusujunuko. Hama jese iji no hambzaji, jiri kwenderera mberi jecinamata Jehovha, jova muezaniso wakanaka kwatiri. Ivona avaripi kuthya ngokuti vanoziva kuti pikija vakaruza upenyu hwavo wari Jehovha wakavanasirira ciro cinosisira maningi kumbeji kwatiri kwendari.

5. Ngoapi mavonero akashata aizovoja rutendo hwedu ngo pamusoro po rumuko?

⁵ Pauro wakangwanga hama jake ngo pamusoro po mavonero akashata ainga no vamweni, okuti: “Kudari vakafa vakatama kumuka, ‘ngatihe no kumwa, ngokuti tinozofa mangwana.’” Vamweni vari kutorangariravo kudaro inga zvaaitwaya mu njiku ja Pauro. Iyena kangaije wakanyokora magama anowanika pa Isaia 22:13, ainangira murangariro wainga no Vaiziraeri. Kusiyapo kueja kuvangisa rudo hwavo kuna Mwari, ivona vaibatikana pa zviro zvaivadakajisa basi. Izvo zvinoda kunanga kuti, murangariro waingaya no Vaiziraeri wainga wo “kubusa upenyu wari perapo mangwana kakufa,” mavonero avo ariyovo nyamasi uno. Pikija zvakadaro, Bhaibheri rinonanga muviyo wakashata wakazova no jinja ro Iziraeri.—2 Kronike 36:15-20.

6. Kuitisa kudini vetero yatinayo yo rumuko inopsasa makhetere atinoita ushamwari?

⁶ Tinozviziva kuti Jehovha anozomusa vakafa, ngo kudaro izvo zvinozopsasa makhetere atinoita shamwari jedu. Hama jo ku Korinto jaidikana kungwarira kuti jitame kupeja mukuvo no vandhu vacikatendi rumuko. Tingajijavo zviri zvese nyamasi uno: Kudari tikapeja mukuvo tino shamwari jicikataji zvinozoitika kumbejiyo, jinoda basi zvokunyama, zvingativiisira muviyo jakashata. Kudari Makristu okadi kadi akapeja mukuvo wakawanda no mukhaindi uwu wo vandhu, iwona angatoruza mugariro wavo waushoni. Vandhu avo, vangaita kuti tiite zviro zvinonyenya Mwari, ushaishi. Ngokudaro, Pauro ngo kucunga kwese wakati: “Itanyi vandhu vanojibata, mucaxaixa.”—1 VaKorinto 15:33, 34.

7. Inga zvatinovona 1 VaKorinto 15:35-38, ngowapi muvhunjo ungaitwa ngo mundhu ngo pamusoro po rumuko?

⁷ Verenganyi 1 VaKorinto 15:35-38. Mundhu anoda kuti vamweni vakane-kane ngo pamusoro po rumuko, angavhunjisa kudari: “Vakafa vanomukisa kudini?” Zvinosisira maningi kwatiri kuvona mupinguro wakapa  mupostori Pauro, ngokuti vandhu vazinji nyamasi uno vano mavonero avo ngo pamusoro po upenyu pasure po kufa. Asi ngozvapi zvinojijiswa ngo Bhaibheri?

8. Ngowapi muezaniso ungatibesera kuzwisisa rumuko wo vanoenda kudenga?

⁸ Mundhu paanofa muviri wake unovora. Asi mundhu wakasika nyika yese nyezuru no pasi, angakwanisa kumumusa no kumupa mukhaindi wo muviri unodikana. (Genesi 1:1; 2:7) Pauro wakaita muezaniso unovonesa kuti Mwari aacaizoviisa mundhu no muviri wakavoreya. Amborangariranyi ngo mbeu iri yese. Mbeu ikapandihwa, inomera yova muti mupsa. Muti mupsa unomeraya unonga wakasiyana padoko no mbeu yakapandihwaya. Pauro wakashandisa muezaniso uwu kuti akhombije kuti Musiki wedu angakwanisa kupa mundhu ‘muviri kudari ngo kuda kwake.’

9. 1 VaKorinto 15:39-41, inosanangurisa kudini musiyano wakaita muviri?

⁹ Verenganyi 1 VaKorinto 15:39-41. Pauro wakananga kuti Mwari aazivi kusika muviri jese mu njira yakaezana. Inga muezaniso, nyama yese aizivi kuezana, iriyo nyama yo vandhu, yo shiri, yo zvifuyo no hove. Iyena wakatangavo kubhuya ngo pamusoro po mugore, tinovona musiyano pakati po zuva no mweji. Cimwenizve, iyena wakavona kuti “ndhondo jese jakasianavo pa uveneki.” Hina, pikija itusu ticikakwanisi kuzvivona ngo meso edu kamare, masientista anonanga kuti kuno ndhondo jakasiyana-siyana, jimweni jakakura, jimweni dokowane, jimweni jakapsuka, jimweni jakacena, jimweni jakaita kori yosafarau kudari inga zuva. Pauro wakatogumavo pakunanga kuti, “[iriyo muviri yo mudenga iriyo muviri yo mu nyika.]” Kuitisa kudini? Bhem, pa nyika pano itusu tino muviri yo ku nyama asi kudenga kuno muviri yo kumujimu, yakadari inga ino ngirozi.

10. Vandhu vanozomuswa kuti vaende mugore, vanozomuswa no muviri wakadini?

¹⁰ Vonanyi zvakazonanga Pauro: “Ngo bzinoitikavo pa kumuka ko muviri yo vakafa: Unosimwa muviri uri wokuvora, womuka  ucikavori.” Zvokadi kamare, itusu tinoziva kuti mundhu paanofa muviri wake unovora wohwirirazve ku bukuta. (Genesi 3:19) Waro ungaitisa kudini kuti muviri “womuka ucikavori”? Pauro aacainanga ngo vandhu vakamuswa kuti vagare pasi pano, inga vakamuswa ndi Eriya, Erizeu na Jesu. Apa, Pauro wainga ecinangira mundhu anozomuswa no muviri wo mugore, ecinangira “muviri womwiha.”—1 VaKorinto 15:42-44.

11-12. Jesu paakamuswa, wakamuswa no muviri womushovonyi, vokuzojwa vanozomuswa no muviri wakadini?

¹¹ Jesu, paainga pasi pano wainga no muviri wo kunyama, asi paakamuswa kwenda mugore iyena wakazova “mujimu wokupa uhomi.” Mukufananavo, Makristu o kuzojwa, anozomuswa no muviri unonakira kugara mugore. Pauro wakazvisanangura eciti: “Inga bzo tino muyemo wo mundhu wo pasi, tinozovavo no muyemo wo mundhu wo mu gore.”—1 VaKorinto 15:45-49.

¹² Pauro wainga eciguma pa mbhejiso yo hurukuro yake ngo pamusoro po rumuko. Zvinosisira maningi kuceukija kuti Jesu aazivi kumuswa no muviri wo kuunyama. Iyena wakasanangura kudari: “Nyama no ngazi abzikwanisi kuwana umambo hwa Mwari,” mugore. (1 VaKorinto 15:50) Vapostori no vamweni vokuzojwa avazomuswi no muviri unovora, muviri uno nyama no ngazi. Waro ivona vanozomuswa rini? Pauro wakananga kuti ivona vaizomuswa pa mukuvo waizotevera kumbejiyo, haiwa pa mukuvo wondhowo wovaizofaro. Pauro paakatara 1 VaKorinto, vajiji vamweni vainga ‘vakavata mu rufu,’ inga muezaniso, mupostori Jakobo. (Maitiro o Vapostori 12:1, 2) Vapostori vamweni no vamweni vokuzojwa ‘vaizovatavo mu rufu.’—1 VaKorinto 15:6.

13. Zvicinyi zvaizoitika pa “kuviya” ka Jesu?

¹³ Jesu na Pauro vakabhuya ngo pamusoro po mukuvo unosisira maningi, kuviya ka  Kristu. Mukuvo uwu, waizovoneka ngo zviro zvakashata maningi zvaizoitika, zvakadari inga hondo, muduma ngo pasi, ndhendha no zviro zvimweni zvakashatisisa zvaizoitika kutenderera pasi pese. Tiri kuvona kukwanirisika ko ciporofita ici co Bhaibheri kuvhira mu gore ro 1914. Asi kunazve divi rimweni rinosisira maningi ro ciporofita ici. Jesu wakananga kuti masoko akanaka o Umambo hwakagajwa hwa Mwari aizocumaehwa “pasi pese, kuita ufakazi ku vandhu vese. Pondhopo kunozovia kupejwa ko bzese.” (Mateu 24:3, 7-14) Pauro wakananga kuti, “kuvia kwa Tenji,” waizovavo mukuvo wo kumuswa ko Makristu okuzojwa aya ainga ‘avata mu rufu.’—1 VaTesalònika 4:14-16; 1 VaKorinto 15:23.

14. Zvicinyi zvinoitika no Makristu okuzojwa paanofa pa mukuvo uwu wo kuviya ka Tenji?

¹⁴ Vokuzojwa vanofa nyamasi uno, ngo kukasika vanomuswa kwenda mugore. Tinokwanisa kuva no ghwinyiso razvo tikavona magama a Pauro anowanika pana 1 VaKorinto 15:51, 52, anoti: “Asipi tese tinofa, kaveta tese tinozophindujwa, pa cimukuvo, pa kupaira [ko] jiso, pa kurira ko mbayapaya [yo kupejisira].” Magama aya akanangari Pauro ari kukwanirisika nyamasi uno. Pajinopera kumuswa, hama ja Kristu iji, jinozova no mudakaro mukuru, ijona ‘jinozogara na Tenji makore ese.’—1 VaTesalònika 4:17.

15. Ngorapi basa rinozoitwa nga vaya vanozophindujwa ‘pa kupaira ko jiso’?

¹⁵ Bhaibheri rinotivhunja kuti ibasa rapi rinozoitwa ku matenga ngo vaya vanozophindujwa ‘pa kupaira ko jiso.’ Jesu wakavavhunja kudari: “Ndiani anonyisa, eciteveja maitiro angu mbhera kumagumo, anozopuwa ndini utongi hwo nyika jese, hwondinahwo hwa Baba wangu, anozofambisa nyika  jese ngo ndonga yo utare, wojiphwanya inga anophwanya majuvi o dongo.” (Apokalipsi 2:26, 28a, 27) Ivona vanozotevera Jesu no kuhavisa majinja no ndonga yo utare.—Apokalipsi 19:11-15.

16. Vandhu vazinji vanozonyisisa kudini rufu?

¹⁶ Zvakajeka kuti vokuzojwa vanozonyisa rufu. (1 VaKorinto 15:54-57) Kumuswa kwavo kunozovaita kuti ivona vakwanise kubesera pa kupeja ushati hwese pa hondo yo Armagedhoni. Mamirioni o Makristu amweni vanarume no vanakaji, ‘vanozovha ku dambujiko guru’ kuti vanghwine mu nyika imbza. (Apokalipsi 7:14) Vanozoponari pasi pano vanozokwanisa kuvona kunyiswa kumweni ko rufu, kumuswa ko mabhirioni o vandhu vakafa kareko. Amborangariranyi mudakaro unozova no vese vaya vanozovepo pa mukuvo uwu unodakajisa! (Maitiro o Vapostori 24:15) Cimwenizve, vese vanozoramba vakagondeka kuna Jehovha vanozokwanisa kunyisa rufu hwakatanga ndi Adhamu. Ivona vanozokwanisa kupona kwenda no kwenda.

17. Tecirangarira zvinonangwa pana 1 VaKorinto 15:58, zvicinyi zvatinodikana kuita wari?

¹⁷ Makristu ese nyamasi uno, angavangiswa kamare ngo magama akatara Pauro ku Vakorinto ngo pamusoro po rumuko. Zvokadi kamare, tino mathangwe akanaka maningi o kuzwira ngwanjo ya Pauro yo kuita zvese zvatinokwanisa wari ‘pa kubatira Tenji.’ (Verenganyi 1 VaKorinto 15:58.) Kudari tikaita zvese zvatinokwanisa mu basa iri, tinozokwanisa kuvona kuti tinozova no upenyu unodakajisa kumbejiyo. Mukuvo uwo, unozova mukuvo unoshamaisa watingamborangarira. Izvi zvinozovonesa kamare kuti kushandira kwedu Tenji akuzivi kuva kwabiresi.