1-2. Omolwashike Aakriste ayehe ya pumbwa okutseya kombinga yeyumuko lyomegulu?

AANTU oyendji mboka taya longele Jehova ngashingeyi, oye na etegameno lyoku ka kala nomwenyo sigo aluhe kombanda yevi. Ihe oshihupe shAakriste aagwayekwa mboka ye li kombanda yevi natango, oye na etegameno lyoku ka kala nomwenyo megulu. Oya halelela okutseya kutya onkalamwenyo yawo otayi ka kala ya tya ngiini megulu. Omolwashike mboka ye na etegameno lyoku ka kala nomwenyo kombanda yevi ya pumbwa oku shi tseya wo? Ngaashi tatu ke shi mona, eyumuko lyomegulu otali ke etela mboka taya ka kala kombanda yevi omalalekonuuyamba. Onkee ano, kutya nduno otu na etegameno lyokuya megulu nenge lyokukala kombanda yevi, otwa pumbwa okutseya kombinga yeyumuko lyaamboka taya ka kala nomwenyo megulu.

² Kalunga okwa li a wilike aalongwa yamwe yotango yaJesus ya nyole kombinga yeyumuko lyomegulu. Omuyapostoli Johannes okwa nyola a ti: “Otse aana yaKalunga ngashingeyi, ihe inashi yela natango kutya otatu ka kaleni twa tya ngiini! Ihe otu shi shi kutya uuna Kristus ta holoka, otatu ka ningeni twe mu fa.” (1 Joh. 3:2) Aakriste aagwayekwa kaye shi kutya onkalamwenyo yawo megulu otayi ka kala ya tya ngiini ngele ya yumudhwa. Ihe otaya ka mona Jehova, uuna ya pewa ondjambi yawo. Ombiimbeli inayi tu lombwela kehe shimwe kombinga yeyumuko lyomegulu, ihe omuyapostoli Paulus okwe tu lombwela uuyelele wontumba kombinga yalyo. Aagwayekwa otaya  ka kala pamwe naKristus sho ta ka sinda “aapangeli yomombepo, omapangelo noonkondo,” mwa kwatelwa wo “omutondi gwahugunina,” ano “eso.” Hugunina, Jesus naamboka taya ka pangela pamwe naye, otaya ka kala kohi yepangelo lyaJehova, niinima ayihe otayi ka kala mewiliko Lye. (1 Kor. 15:24-28) Ethimbo ndyoka ito ke li pewa komuntu! *

3. Ngaashi sha popiwa mAakorinto yotango 15:30-32, sho Paulus a kala i itaala meyumuko, oshe mu kwathele a ninge shike?

³ Sho Paulus a kala neitaalo meyumuko, oshe mu kwathele a pite moonkalo oondhigu dhi ili nodhi ili. (Lesha 1 Aakorinto 15:30-32.) Okwa li a lombwele Aakriste yomuKorinto a ti: “Onda taalelwa keso esiku kehe.” Paulus okwa li wo a nyola a ti: ‘MuEfeso onda kondjele niilikama.’ Otashi vulika a li ta popi kombinga yokukondja kokwenekwene niilikama muEfeso. (2 Kor. 1:8; 4:10; 11:23) Nenge a li ta popi kombinga yAajuda nosho wo yalwe mboka ya li taye mu pataneke uusiku nomutenya kutya oya fa ‘iilikama.’ (Iil. 19:26-34; 1 Kor. 16:9) Kutya nduno Paulus okwa li ta kondjo nashike, okwa li muudhigu lela. Ihe okwa li e na einekelo kutya onakuyiwa ye otayi ka kala ombwanawa. — 2 Kor. 4:16-18.

4. Etegameno lyeyumuko ohali kwathele ngiini Aakriste kunena? (Tala ethano lyokombanda.)

⁴ Omathimbo ngaka tu li mugo, omadhigu noonkondo. Aamwatate yamwe oya ninga iihakanwa yokulongelwa omuyonena. Yo yalwe oye li miitopolwa mbyoka ya dhengwa ya lila kiita nokaye li mo ya gamenwa. Yamwe otaya longele Jehova ye li miilongo moka iilonga yetu ya ngambekwa nenge yi indikwa, nonando oye shi kutya otashi vulu oku ya tulitha mondholongo nenge oku ya dhipagitha nokuli. Ihe aamwatate naamwameme ayehe mboka otaya tsikile okulongela Jehova noye tu tulila po oshiholelwa oshiwanawa. Kaye na uumbanda washa, oshoka oye shi kutya, nonando oya se ngashingeyi, Jehova oku uvaneka kutya ote ke ya pa onakuyiwa ombwanawa.

5. Iikala yini ya nika oshiponga tayi vulu okunkundipaleka eitaalo lyetu meyumuko?

⁵ Paulus okwa li a londodha aamwahe ya yande mboka ya li ye na iikala yokutya: “Ngele aasi itaa ka yumudhwa, nena ‘Tu lyeni tse tu nweni, oshoka ngula otatu si.’” Iikala mbyoka oya li nomaantu mboka ya li ko manga Paulus inaa valwa. Otashi vulika a li ta totha muJesaja 22:13, moka mwa popiwa iikala mbyoka ya li yi niwe kAaisraeli. Pehala lyokuhedha popyeelela naJehova, oya li ya pititha komeho omainyanyudho. Aaisraeli oya li ye na iikala mbyoka yi li apuhe kunena yokutya “tu lyeni oshimwenyo nena, oshoka ongula otatu si.” Ihe Ombiimbeli oya popya kutya oshigwana shaIsraeli osha ka adhika kiilanduliko iiwinayi omolwiikala mbyoka. — 2 Ondjal. 36:15-20.

6. Eitaalo lyetu meyumuko oli na oku tu kwathela ngiini ngele tashi ya pokuhogolola ookuume?

⁶ Eitaalo lyetu meyumuko oli na oku tu nwetha mo ngele tashi ya pokuhogolola ookuume. Aamwatate muKorinto oya li ye na okuyanda okupanga uukuume naamboka inaayi itaala meyumuko. Shoka otashi tu longo shike kunena? Ngele otwa panga uukuume naamboka kaaye na ko nasha nonakuyiwa noya pititha owala komeho omainyanyudho, otaye ke tu nwetha mo wo. Ngele Omukriste gwashili oha kala naantu ya tya ngawo, otaya ka nwetha mo nayi iikala ye neihumbato lye ewanawa. Otaya vulu oku mu nwethwa mo nokuli a longe uulunde, oshinima shoka Jehova e tonde. Onkee Paulus ote tu kumagidha ta ti: “Ningeni aanandunge ne mu ethe uulunde.” — 1 Kor. 15:33, 34.

7. Ngaashi sha nyolwa mAakorinto yotango 15:35-38, aantu yamwe otashi vulika ya pule shike kombinga yeyumuko?

⁷ Lesha 1 Aakorinto 15:35-38. Omuntu ngoka a hala okukuna omalimbililo muyalwe shi na ko nasha neyumuko, otashi vulika a pule ta ti: “Otashi vulika ngiini, aasi ya yumudhwe?” Otwa pumbwa okutala keyamukulo ndyoka Paulus a gandja. Omolwashike mbela? Oshoka aantu oyendji kunena oye na omaitaalo gi ili nogi ili kombinga yaashoka hashi ningwa po ngele omuntu a si. Ombiimbeli otayi ti ngiini?

8. Ethaneko lini tali vulu oku tu kwathela tu uve ko kutya mboka taya yumudhilwa megulu otaya ka kala nomalutu ga tya ngiini?

⁸ Ngele omuntu a si, olutu lwe ohalu lika po kevi. Ihe Jehova ngoka e li Omushiti gwiinima ayihe mbyoka kaaya li po, ota vulu oku mu yumudha, e te mu pe olutu talu mu opalele. (Gen. 1:1; 2:7) Paulus okwa longitha ethaneko e tu kwathele tu mone kutya Kalunga ita ka pumbwa okuyumudha omuntu nolutu ndoka a li e na manga inaa sa. Dhiladhila ashike ‘komuma yowala’ yoshilya nenge “ombuto.” Ngele oya kunwa ohayi olo tango, opo yi mene nawa. Oshimeno ohashi kala sha yooloka ko kombuto ndjoka ya kunwa. Paulus okwa longitha efaathanitho ndyoka u ulike kutya ngaashi owala Omushiti gwetu ta vulu okupa ‘omuma omuno, ngaashi a hala,’ ota vulu wo okupa omuyumudhwa olutu olupe.

9. Aakorinto yotango 15:39-41 oyu ulike ngiini kutya iinima oya shitwa yi na omalutu ga yoolokathana?

⁹ Lesha 1 Aakorinto 15:39-41. Paulus okwa popi kutya Kalunga okwa shita iinima yi na omalutu gi ili nogi ili. Pashiholelwa, oongombe, uudhila noohi oyi na omalutu ga yoolokathana. Okwa popi wo kutya ngele tatu tala kegulu, nako oku na etango nomwedhi, ihe nayo oya yoolokathana. Okwa ti wo kutya ‘nomokati koonyothi dho dhene omu na omayooloko.’ Nonando omayooloko ngoka ihatu ga mono nomeho getu gokomutse, aanongononi otaya ti kutya opu na oonyothi dhomaludhi  gi ili nogi ili. Oonyothi dhimwe oonene, dhimwe oonshona, dhimwe oontiligane, dhimwe oontokele nadhimwe oonshunga, ngaashi etango. Paulus okwa popi wo kutya “oku na omalutu gomegulu nomalutu gokevi.” Mbela okwa li a hala okutya shike? Tse mboka tu li kombanda yevi otu na omalutu gopanyama, ihe mboka ye li megulu ngaashi aayengeli, oye na omalutu gopambepo.

10. Mboka taya yumudhwa ya ka kale megulu otaya yumudhwa nomalutu ga tya ngiini?

¹⁰ Paulus okwa tsikile ko a ti: “Osho naanaa tashi ka kala mokuyumudhwa kwaasi. Mevi otamu pakwa olutu lweyonuuko, mokuyumudhwa tamu zi olutu lwokwaayonuuka.” Otu shi shi kutya ngele omuntu a si, olutu lwe ohalu olo e talu ningi ontsi yevi. (Gen. 3:19) Otashi ke enda ngiini, opo ‘mokuyumudhwa mu ze olutu lwokwaayonuuka’? Paulus ka li ta popi kombinga yaamboka taya ka yumudhwa ya kale nomwenyo kombanda yevi ngaashi mboka ya yumudhilwe kuElia, kuElisa nokuJesus. Okwa li ta popi kombinga yaamboka taya yumudhwa ya ka kale nomwenyo megulu ye na “olutu lwopambepo.” — 1 Kor. 15:42-44.

11-12. Mbela Jesus okwa li a yumudhwa nolutu lwa tya ngiini, naagwayekwa otaya ka ningilwa ngiini oshinima sha faathana?

¹¹ Sho Jesus i ile kombanda yevi, okwa li e na olutu lwopanyama. Ihe sho a yumudhwa okwa ningi “Ombepo tayi gandja omwenyo,” e ta shuna megulu. Aakriste aagwayekwa nayo otaya ka yumudhwa momukalo gwa faathana, ye na omalutu gopambepo. Paulus okwa yelitha a ti: “Ngaashi twa zala uukwatya womuntu ngoka a shitwa montsi yevi, osho wo tatu ka zala uukwatya wOmuntu gwomegulu.” — 1 Kor. 15:45-49.

¹² Osha simana tu dhimbulukwe kutya Jesus ka li a yumudhwa nolutu lwopanyama. Paulus okwa popi pehulilo lyontopolwa kutya omolwashike, sho a ti: “Olutu nduka lwonyama nombinzi italu vulu okuya mOshilongo shaKalunga” megulu. (1 Kor. 15:50) Aayapostoli nosho wo aagwayekwa yalwe kaya li taya ka yumudhwa ya ka kale megulu ye na omalutu  gonyama nombinzi, ngoka taga vulu okuyonuka po. Oya li taya ka yumudhwa uunake? Paulus okwa ti kutya otaya ka yumudhwa konahiya. Kaya li taya ka yumudhwa mepathimo lyeho ngele ya si. Sho Paulus ta nyola ontumwafo yotango yAakorinto, aalongwa yamwe oya adhika nale ‘ya sa,’ ngaashi omuyapostoli Jakob. (Iil. 12:1, 2) Ihe aayapostoli nosho wo aagwayekwa yamwe kaya li ‘ya sa’ natango. — 1 Kor. 15:6.

13. Oshike tashi ke tu kwathela tu ndhindhilike kutya ethimbo lyokuya kwaJesus oli li popepi?

¹³ Jesus naPaulus oya li ya popi kombinga yethimbo lya simana mondjokonona yaantu, ethimbo lyokuya kwaKristus. Opo tu dhimbulule kutya ethimbo lyokuya kwe oli li popepi otatu ka mona iita, omakakamo gevi, omikithi niinima yilwe iiwinayi mbyoka tayi ka ningwa apuhe muuyuni. Iinima mbyoka oya hunganekwa mOmbiimbeli noya kala nokugwanithwa okuza momumvo 1914. Ihe opu na ishewe endhindhiliko lilwe lya simana. Jesus okwa ti kutya onkundana ombwanawa kombinga yUukwaniilwa waKalunga mboka wa dhikwa po, otayi ku ‘uvithilwa aantu ayehe, yi ningile iigwana ayihe onzapo; notaku ya ihe ehulilo.’ (Mat. 24:3, 7-14) Paulus okwa li wo a popi kutya ethimbo ndyoka “Omuwa te ya” Aakriste aagwayekwa “mboka ya sa nale” otaya ka yumudhwa ya ka kale megulu. — 1 Tes. 4:14-16; 1 Kor. 15:23.

14. Oshike hashi ningilwa aagwayekwa mboka taya si pethimbo lyetu?

¹⁴ Aagwayekwa mboka taya si pethimbo lyetu ohaya yumudhwa mepathimo lyeho, ya ka kale nomwenyo megulu. Paulus okwa li e shi koleke mAakorinto yotango 15:51, 52 a ti: “Itatu ka seni atuheni, ihe otatu ka shitululweni ombaadhilila, ongepathimo lyeho, uuna enkuma  lyahugunina tali ka hika.” Oohapu ndhika otadhi gwanithwa ngashingeyi! Konima ngele ya yumudhwa, aamwahe yaKristus otaya ka kala ya nyanyukwa noonkondo notaya “ka kala ihe aluhe pOmuwa.” — 1 Tes. 4:17.

15. Mboka taya ka lundululwa ‘mepathimo lyeho’ otaya ka longa shike megulu?

¹⁵ Ombiimbeli otayi tu lombwele kutya mboka taya ka lundululwa ‘mepathimo lyeho’ ya ye megulu otaya ka longa mo shike. Jesus okwe ya lombwele a ti: “Aasindani mboka taa gwanitha ehalo lyandje sigo okehulilo, otandi ke ya pa oonkondo ndhoka nde dhi pewa kuTate: otandi ke ya pa oonkondo dhokupangela iigwana nondhimbo yosheela noku yi tatula, ngaashi omuntu ta tatula oshuma sheloya.” (Eh. 2:26, 27) Otaya ka landula Jesus notaya ka pangela iigwana nondhimbo yosheela. — Eh. 19:11-15.

16. Otashi ke enda ngiini, opo aantu omikimiki ya ka sinde eso?

¹⁶ Osha yela kutya, aagwayekwa otaya ka sinda eso. (1 Kor. 15:54-57) Eyumuko lyawo otali ke shi ninga tashi wapa, opo ya kwathele mokuhulitha po uukolokoshi awuhe kombanda yevi piita yaArmagedon. Aakriste aalumentu naakiintu omamiliyona otaya ka ‘pita momahepeko ngoka omanene’ nenge muudhigu uunene notaya ka ya muuyuni uupe. (Eh. 7:14) Mboka taya ka kala kombanda yevi otaya ka mona sho eso tali ka sindwa, sho aantu omikimiki mboka ya sa muuyuni wonale taya ka yumudhwa. Dhiladhila owala kenyanyu ndyoka tatu ka kala tu na pethimbo ndyoka! (Iil. 24:15) Ayehe mboka aadhiginini kuJehova otaya ka sinda nokuli eso ndyoka ya thigulula kuAdam. Otaya ka kala nomwenyo sigo aluhe.

17. Aakorinto yotango 15:58 otayi tu ladhipike tu ninge shike ngashingeyi?

¹⁷ Aakriste ayehe mboka ye li momwenyo oya pumbwa okupandula oohapu dhaPaulus tadhi hekeleke kombinga yeyumuko, ndhoka a nyolele Aakriste yomuKorinto. Otwa pumbwa okulandula omayele gaPaulus ngashingeyi, mokukala twi ipyakidhila aluhe “niilonga yOmuwa.” (Lesha 1 Aakorinto 15:58.) Ngele ohatu longo iilonga mbyoka nuudhiginini, otatu ka kala nonakuyiwa ombwanawa kaaku na we. Onkalamwenyo monakuyiwa otayi ka kala ombwanawa shimwe to nyengwa. Onakuyiwa ndjoka ombwanawa otayi ka kala euliko kutya ashihe shoka tatu ningile Omuwa, otashi tompola sha.