1-2. Ntakhara heeni Akristu oothene anaphwanelaaya ohuserya vooloca sa ovinya mookhwani wa yaale anaya wirimu?

ACHU ancipale yaawo anamurumeela Yehova hiihaano annaweherya okhalano ekumi veelaponi yavathi okhala wookhala. Nikhuuru na Akristu oothanliwa ni munepa waweela, nnaweherya oviihiwa mookhwani ni oya wirimu. Akristu yaala oothanliwa ni munepa waweela, annachuna osuwela mukhalelo taani okumi aya onahaalaaya okhala, vano hanka vooloca sa yaale arino ewehereryo ya okhala veelaponi yavathi? Hiihaa ntoko nnahaalaahu woona mmwaha yoola, ovinya mookhwani ntakhara oya wirimu onahaala waaruuhela mphurelo oothene yaale arino ewehereryo ya okhala veelaponi yavathi okhala wookhala. Mwawiihiiha, moohipwacha waakhanle wi ewehereryo ahu ti ya oya wirimu naari okhala veelaponi yavathi nnaphwanela osuwela vooloca sa ovinya mookhwani ntakhara oya wirimu.

² Muluku aahaaveerela akina a oohuserya a Yesu a mu nsana noopacerya orepa vooloca sa ovinya mookhwani ntakhara oya wirimu. Murummwa Yohani oothariha: “Oosiveliwa vano na anamwane a Muluku, nto nlelo haakunve wooneya makhalelo ahu a muhoolo. Noosuwela wi vaavaa oneereiye iisooneihe yoowo, nnii nnamphwanaphwanano, vawi nnammoona yoowo ntoko okhalenleiye.” (1 Yoh. 3:2) Mwawiihiiha, Akristu oothanliwa ni munepa waweela, hanasuwela mukhalelo mwiili aya onahaalaaya okhala vaavaa anahaalaaya oviihiwa mookhwani ni oya wirimu. Mwawiihiiha, awo anahaala omoona Yehova vaavaa anahaalaaya waakhela nchuwelo naya wirimu. Piipiliya hanaloca ichu soothene vooloca sa ovinya mookhwani wa yaale anaya wirimu, nyenya murummwa Paulo oovahererya sooleeliherya ikina vooloca sa yeeyo. Oothanliwa ni munepa waweela anahaala okhala vamoha ni Kristu vaavaa owo onahaaleiye omaliha “olamula woothene, owerya woothene ni ikuru soothene.” Eyo enaphitaanyerya “mwiicani ookuchulela, okhwa.” Vookuchula,  Yesu—vamoha ni yaale onahaaleiye olamulelano vamoha—anahaala olamulelaka nave Yehova onahaala okhala soothene wa oothene. (1 Kor. 15:24-28) Ela enahaala okhala yoohakalaliha chiryene! *

3. Hiihaa ntoko yooniheryiwaaya mu 1 Korinto 15:30-32, ororomela ovinya mookhwani waamukhavihenrye Paulo opaka eheeni?

³ Ororomela ovinya mookhwani waahimukhaviherya Paulo ovilela ni saweeha soohiyanahiyana. (Mwaalakhanye 1 Korinto 15:30-32.) Paulo aahaaleela Akorinto ariki: “Nihiku nnihiku kinnakhwa.” Owo tho aahirepa wi, ‘Aanawana ni ashinama ooluwa wEefesu.’ Akhweya owo aaloca sa owana ni axinama awooneya yaawo yaakhala mmapuro makina o Efeso. (2 Kor. 1:8; 4:10; 11:23) Naari akhweya aawaaha Ayuta yaawo yaamwiikara ni achu akina yaawo yaalikana ni “ashinama ooluwa.” (Saw. 19:26-34; 1 Kor. 16:9) Moohipwacha mukhalelo ene, Paulo aahihoolela makacamiho oovila. Nyenya naamwi hiihaa owo aahikhalano moonelo woophwanelela vooloca sa omwaahiyu awe.—2 Kor. 4:16-18.

4. Ewehereryo ya ovinya mookhwani enaalipiha hai Akristu olelo? (Moone eruku ya ekaapa.)

⁴ Olelo nnakhala mu ilukuluku sawoopiha. Annihu akina anniiphiwa ni achu oonanara murima. Akina anakhala mu ilapo seiho oriwo ikhoco nave awo anniisoona okhala oohiikhapeleleya. Nave akina annamurumeela Yehova ehelaka okumi aya naari otaphuwa waya va yawoopiha mu ilapo seiho muteko ahu woolaleerya onakhwatiihiwaaya. Mwawiihiiha, anna ni arokora oothene yaale anatitelela omurumeela Yehova annavaha yootakiherya yaphaama wa hiyo. Awo hanoova, nthowa nawi aasuwela wi wakhala wi aayeleela okumi aya hiihaano Yehova ohaaroromeliha echu yaphaamaxa muhoolo.

5. Moonelo taani wawoopiha waahaala oceecheiha nroromelo nahu vooloca sa ovinya mookhwani?

⁵ Paulo aahaalopola asinnawe vooloca sa moonelo wawoopiha yoowo akina yaalocaaya eriki: “Yaarimwi achu ookhwa ehivinyaka, nlye, niwurye, ntakhara omeelo nnamukhwa.” Ophiyerya wi moonelo si yoola achu akina yaahikhalano ehaakumve elukuluku ya Paulo. Woonaru Paulo aaloca sa yoorepa ya Isaiya 22:13, yeeyo enaloca sa moonelo wa Aisarayeli. Ohiya omwaacamela Muluku, Aisarayeli yaatikitheryen’ye mu ichu soohakalaliha okumi. Xaxaxa moonelo wa Aisarayeli, waari wawi “nlye, niwurye, ntakhara omeelo nnamukhwa,” nave moonelo ola ti wawunlaana olelo. Mwawiihiiha, sookhumelela soonanara sa nloko na Aisarayeli mwaha woochuneya wuupuwelela.—2 Math. 36:15-20.

6. Ewehereryo ahu ya ovinya mookhwani enaphwanela ovolowela hai mukhalelo nnaathanlaahu asinthamwene?

⁶ Chiryene, eparipari yawi Yehova onahaala waaviiha alipa ookhwa, enaphwanela ovolowela mukhalelo nnaathanlaahu asinthamwene. Anna o Korinto yaaphwanela osepa omaliha elukuluku ni achu yaawo yahaaroromela ovinya mookhwani. Hiyo tho nnaphwanela ohuseryavo echu olelo: Wakhala wi ninnamaliha elukuluku yincipale ni achu yaale ahinapwacha sa yeeyo enahaala weereya muhoolo naari yaale anateteiwa ni soohakalaliha sa okumi awo anahaala onivolowela moonanara. Wakhala wi Mukristu onnamaliha elukuluku yincipale ni achu sintoko yaawo, onanwerya onanariha makhalelo awe aphaama. Mweeparipari, eyo enammweeriha muchu opaka yeeyo Muluku oniiceiye—yoocheka. Mwawiihiiha, Paulo oonilopola ariki: “Mwaakamuwe moophwanelela, muhicheke tho.”—1 Kor. 15:33, 34.

7. Makoho taani akhweya akina aryaayano vooloca sa oviihiwa mookhwani, hiiha ntoko elociwaaya mu 1 Korinto 15:35-38?

⁷ Mwaalakhanye 1 Korinto 15:35-38. Muchu yoowo onachuna waaruuhela akina minikwa vooloca sa ovinya mookhwani, onanwerya okoha ariki: “Achu ookhwa enii eviihiwe hayi wookhwani?” Nnaphwanela othokororya phaama naakhulo na Paulo nthowa nawi achu ancipale aakhalano soororomela saya vooloca sa yeeyo eneereya muchu akhwa. Nyenya tiheeni Piipiliya onahusiheiye?

8. Niphwanaphwaniho taani nnahaala onikhaviherya wiiwexexa vooloca sa ovinya mookhwani wa yaale anahaala oya wirimu?

⁸ Vaavaa muchu onakhweiye, mwiili awe onnuuca. Nyenya yoowo otikithenrye elapo vasiiyoni vene, onanwerya omviiha muchu wookhwani ni omvaha mwiili waphaama yoowo onachuneiye. (Map. 1:1; 2:7) Paulo oopharihela niphwanaphwaniho wi ooniherye wi Muluku haahaala ochuna omukookiherya muchu mwiili mmohamoha. Muupuwele vooloca sa “enuku ya tiriku,” naari “mmiso” wa mwiri. Mmiso naari enuku yaaliwa vacheyani, ennamela nave ekhala mwiri muvyaani. Mwiri muvyaani owo onnahiyana ni mmiso yoole waari mukhaani. Paulo aahipharihela niphwanaphwaniho nenla wi ooniherye wi Mpatuxa ahu onanwerya “ovaha mwiili ntoko onakhweleleiye.”

9. 1 Korinto 15:39-41, tiheeni olonceiye sa ohiyana wa mwiili?

⁹ Mwaalakhanye 1 Korinto 15:39-41. Paulo olonce wi Muluku hapatunxe miili soothene mmukhalelo woolikana. Ntoko yootakiherya, sookhalavo miili soohiyanahiyana, ntoko miili wa axinama, apalame ni ihopa. Paulo ooloca tho wi mmeekuni ninnoona ohiyana variyari va nsuwa ni mweeri. Owo tho ooloca wi “waarya waya wa etheneeri ni etheneeri onnahiyana tho.” Ela, eparipari naamwi nihoonaka ohiyana iwo ni miitho ahu, masiyentista analoca wi wookhalavo ohiyana wa etheneeri ti etheneeri ikinaaku itokotoko, nave ikinaaku ikhaani, ikinaaku sooxeerya, ikinaaku saweela, nave ikinaaku inakhala ntoko sa ncalu. Paulo ooloca tho wi  “sookhalavo tho miili sa wirimu ni miili sa veelaponi.” Tiheeni owo aachuneiye oloca? Veelaponi, nrino miili soomuchu, nyenya wirimu iriwo miili soomunepani, soolikana ni seiho ankeelo aryaayano.

10. Yaale anahaala oviihiwa mookhwani ni oya wirimu mwiili wa mukhalelo taani anahaalaaya okhalano?

¹⁰ Moone tho yeeyo Paulo olonceiye voocharela owo oriye: “Ovinya wookhwani ti hiiha tho. Mwiili onaaliwa wawuuca, onnaviihiwa woohiwerya wuuca.” Mweeparipari muchu amanle okhwa mwiili awe onnuuca okookela okhala nchupi. (Map. 3:19) Vano mmukhalelo taani mwiili “onaviihiwaaya woohiwerya wuuca”? Paulo tahi wi aaloca sa achu yaale yaaviihiwe ni okhala veelaponi yavathi, achu yaawo yaaviihiwe ni Eliya, Eliseu, naari ni Yesu. Paulo aawaaha achu yaale anaviihiwa ni mwiili wa wirimu, eyo tiwi “Mwiili wa Munepa.”—1 Kor. 15:42-44.

11-12. Matorokelo taani yeeren’ye vaavaa Yesu aaviihiweiye mookhwani, nave ela eneereya hai mmukhalelo woolikana ni oothanliwa ni munepa waweela?

¹¹ Vaavaa Yesu aareiye veelaponi yavathi, owo aarino mwiili woomuchu. Nyenya vaavaa aaviihiweiye mookhwani, owo aakhala “munepa onavaha okumi” nave aakookela wirimu. Mmukhalelo woolikana, Akristu oothanliwa yaahaala oviihiwaka mookhwani ni okumi woomunepani. Paulo oothariha wi: “Ntoko eruku ahu enalikanaaya ni muchu yoole avachayani, nnarwa nlikana ni yoole awirimu.”—1 Kor. 15:45-49.

¹² Paulo aahanle vakhaani ophiya omakuchuwelo wa mwaha awe vooloca sa ovinya mookhwani. Ti yoohakalaliha osuwela wi Yesu haaviihiwe mookhwani ni mwiili woomuchu. Paulo oothariha wi: “Mwiili nnikhami hiiwerya waakhela omwene wa Muluku” wirimu. (1 Kor. 15:50) Arummwa vamoha ni Akristu oothanliwa ni munepa waweela, hiyaahaala oviihiwa mookhwani ni mwiili vamoha nnikhami seiyo inawerya wuuca. Awo yaahaala oviihiwa liini? Paulo olonce wi awo yaahaala oviihiwa elukuluku ya muhoolo; ohiya elukuluku vakhaani emanle okhwa. Elukuluku Paulo aamurepeiye 1  Korinto, oohuserya akina yiiha “erumpe mookhwani,” ntoko yootakiherya, murummwa Yakopo. (Saw. 12:1, 2) Arummwa akina vamoha ni Akristu  akina oothanliwa ni munepa waweela ohoolo waya yaahaala ‘orupa tho mookhwani.’—1 Kor. 15:6.

13. Tiheeni yaahaala weereya variyari va elukuluku ya “ophiya” wa Yesu?

¹³ Oopiili Yesu ni Paulo, yaahilaiherya sa elukuluku yavameekhaaya. Elukuluku ya ophiya wa Yesu, yaahaala osuweliwa moorweela wa ikhoco, a mwaacikinye, ireca, ni ichu ikinaaku soonanara sineereya veelaponi. Nohoona waakhwanela wa yooloherya yeela ya Piipiliya ovinyerya mu eyaakha ya 1914. Yaahaala okhalavo echu ekina yoochuneya yeeyo enapaka makupa a eneneeryo yeela. Yesu aaloca tho wi michaka yaphaama ya Omwene, yawi Omwene wa Muluku wootikitheryiwa yaahaala olaleiwa “mweelapo yoothene yookhalamo achu wi iweerele onamoona maloko oothene. Vaavaa teneeraaya ephiye makuchuwelo.” (Mat. 24:3, 7-14) Paulo aahiloca tho wi elukuluku ya ‘ophiya wa Apwiya’ yaahaala tho okhala elukuluku Akristu oothanliwa ni munepa waweela yeeraaya eviihiwe ni oya wirimu.—1 Tes. 4:14-16; 1 Kor. 15:23.

14. Tiheeni eneereya ni Akristu oothanliwa variyari va elukuluku ya ophiya wa Kristu?

¹⁴ Akristu oothanliwa yaawo anakhwa mmahiku ahu annaviihiwa mookhwani mwawaakuveya wi yaakhele okumi wirimu. Ela enneerela onamoona ni Masu yaawo Paulo orempeiye mu 1 Korinto 15:51, 52: “Chiri kinnooleelaani yawiiphini: Tahi wi oothene nnarwa nrupa, nto oothene nnarwa ntatushiwa, omoharu weiwo, mu waaphila wa niitho, narumaru nipeca, nookuchula.” Masu yaala a Paulo annaakhwanihereya chiryene! Emanle oviihiwa mookhwani, anna a Kristu anahaala waakhwaniherya ohakalala; mu “okumana ni Apwiya.”—1 Tes. 4:17.

15. Muteko taani oothanliwa ni munepa waweela anaweheryaaya emanle oviihiwa mookhwani mu “waaphila wa niitho”?

¹⁵ Piipiliya onnanleela muteko yoowo anahaalaaya  opaka emanle okuxiwa mu “waaphila wa niitho”wi eye wirimu. Alocaka sa yaawo Yesu oriye: “Yoowo onavootha, atitelela ophara miteko saka ophiyerya omakuchuwelo: Kinarwa kimvaha owerya olamula maloko; ohoolela ni ekopo ya muthipo, apwesha ntoko mwaapu wa chaya.” (Wup. 2:26, 27) Awo anaya okhala vamoha ni Yesu mu olamulelo awe yaakukhulaka achu a maloko ni ekopo ya muthipo.—Wup. 19:11-15.

16. Ti mwawiihai achu ancipale anahaalaaya ovootha okhwa?

¹⁶ Mweeparipari, oothanliwa ni munepa waweela anahaala ovootha okhwa. (1 Kor. 15:54-57) Ooviihiwa mookhwani anahaala okhala oorehereya mu ovootha onacharela, variyari va ekhoco ya Armaketo. Amilyawu a alapeli a Muluku anamutitelela okhala evinre “makacamiho matokotoko” ni ovolowa mu elapo evyaani. (Wup. 7:14) Oothene yaawo anahaala okhala veelaponi, anamweerela onamoona ovootha okina wa okhwa—moorweela wa owoona amilyawu aachu akhwile khalai eviihiwaka mookhwani. Mwaanyiherye ohakalala nneeraahu nikhaleno mu yaweereya yeela! (Saw. 24:15) Nave oothene yaawo anahaala otitelela okhala oororomeleya wa Yehova anahaala ovootha okhwa yoowo yaaramvaaya orweela wa Atamu. Awo anamvootha okhwa aramvaaya ni Atamu ni otitelela okhala ni okumi okhala wookhala.

17. 1 Korinto 15:58, onanlipiha hai?

¹⁷ Mukristu ti Mukristu onaphwanela othamalela masu a Paulo oolipiha yaawo aarepenleiye o Korinto vooloca sa ovinya mookhwani. Oothene ahu nookhalano mathowa oophwanelela a wiiwelela ekano ya Paulo ya opaka sincipale mu “opharasha muteko wa Apwiya.” (Mwaalakhanye 1 Korinto 15:58.) Wakhala wi nootitelela okhala oororomeleya ni wiivoliiherya mmuteko yoowo, nnahaala okhalano okumi woohakalaliha muhoolo. Okumi ahu onahaala okhala woohakalalihaxa opwaha mukhalelo nnaanyiheryaahu. Moohikhwa minikwa, wiilipixerya wahu ophara muteko wa Apwiya honi okhale wasiiyo ene.