1-2. Hana wa moguna aboto ba dödö niha Keriso sanandrösa ba wanusugi ba zorugo?

ABÖLÖ ato nono mbanua Yehowa ba götöda andre sanötöna ba wangokhögö faʼauri si lö aetu ba gulidanö. Hizaʼi, so göi ösa niha Keriso si no tebayoini, ba laʼokhögö dötönafö faʼauri ba zorugo. Omasi sibai laʼila ira niha Keriso si no tebayoini, hewisa dania waʼaurira ba zorugo. Moguna göi laʼila daʼö ira niha Keriso sangokhögö tötönafö faʼauri ba gulidanö. Hadia mbörö? Simane nitutunöda dania, fanusugi ba zorugo zangaʼasogö howu-howu ba niha sauri ba gulidanö sagötö faʼara. Börö daʼö, gofu hezoso waʼauri nidöna-dönada, moguna tafahaʼö ita sanandrösa ba wanusugi ba zorugo.

² Ibeʼe wanuturu lala Lowalangi khö ndra nifahaʼö Yesu ba abad siföföna, ba wanura sanandrösa ba wanusugi ba zorugo. Samösa ba gotaluara yaʼia daʼö sinenge sotöi Yohane. Imane ba zurania, ”Ono Lowalangi ita iadaʼa. Hizaʼi, lö taʼila hewisa ita dania. Niʼilada, tobali ita simane Lowalangi na iforomaʼö ia khöda.” (1 Yoh. 3:2) Börö daʼö, lö laʼila ira niha Keriso si no tebayoini, hewisa dania na no tesusugi ira ba zorugo ba mboto eheha. Saboto ba dödöra yaʼia daʼö tola dania laʼila Yehowa na no so ira ba zorugo. Lö izara-zara Sura Niʼamoniʼö ba wanutunö khöda, hewisa dania waʼalua wanusugi ba zorugo. Hizaʼi, so ösa nifatunö zinenge sotöi Faulo sanandrösa ba daʼö. Iwaʼö Faulo wa no fao khö Yesu ndra niha Keriso si no tebayoini ’me ihori fefu wamatörö, faʼakuaso, ba faʼabölö’ hegöi ’udu safuria yaʼia daʼö faʼamate’. Ba gafuriata, Yesu hegöi ira niha si fao khönia ba wamatörö, hasambalö mangalulu ira föna Yehowa. (1 Kor. 15:24-28) Tatu tadöna-döna sibai waʼalua daʼö! *

3. Simane nisura ba 1 Korindro 15:30-32, hadia mbua nitema Waulo börö me faduhu dödönia ba wanusugi?

 ³ Anau gölö Waulo ba wanaögö fefu abula dödö salua khönia börö me faduhu dödönia ba wanusugi. (Baso 1 Korindro 15:30-32.) Imane ba niha Keriso si so ba Gorindro, ”Ero maʼökhö utörö lumö waʼamate.” Imane nasa, ”Fataru ndraʼo ba wolawa urifö samuʼi ba Nefeso.” Tola manö manandrösa wehedenia andre ba watarusa ba wolawa urifö ba nahia fataru si so ba Efeso. (2 Kor. 1:8; 4:10; 11:23) Mazui, te manandrösa daʼa ba wanaisi moroi ba niha si no amaedola ’gurifö samuʼi’, tefarahu ba daʼö ndra niha Yahudi si fatuwu khönia. (Hal. 19:26-34; 1 Kor. 16:9) Gofu hadia geluaha wehedenia andre, tatu no alua khönia zi lö sökhi si tola möi famaʼalania. Hewaʼae simanö, lö aetu faduhu dödönia wa hasambalö irasoi waʼomuso dödö ba zi so miföna.​—2 Kor. 4:16-18.

4. Hewisa wa tola möi fangabölöʼö niha Keriso ba götö iadaʼa dötönafö ba wanusugi? (Faigi gambara ba guli majalah.)

⁴ No so ita ba ginötö safönu ametaʼuö. So ndra talifusöda si no irai morasoi faʼalösökhi. So göi zi toröi ba nahia si so fasuwöta, ba tola manö teʼala nosora ba zi lö ladöna-döna. Baero daʼö, so ösa soi si lö manehegö halöwö nifaluada, irege lö faʼahono dödö khö ndra talifusöda ba wamalua halöwö fanuriaigö ba daʼö. Na lö laböhöli wanuriaigö, tola manö lakuru mazui labunu ira. Ba daʼa taʼila wa oya sibai gametaʼuö nitaögö ndra talifusöda. Hewaʼae simanö, lö ataʼu ira ba lö laböhöli wamosumange Yehowa si fao faʼalöfaröi. Hadia mbörö wa lö ataʼu ira? Börö me faduhu dödöra wa hewaʼae na mate ira iadaʼa, hasambalö isusugi ira Yehowa ba ibeʼe khöra waʼauri sahöli-höli dödö ba zi so miföna. No laröi khöda duma-duma si sökhi si tola taʼoʼö.

5. Hadia lala wangera-ngera si fasala si tola mamakiko famati zi samösa niha sanandrösa ba wanusugi?

⁵ So ösa niha ba abad siföföna sangokhögö lala wangera-ngera simane daʼa, ”Na sindruhu lö tesusugi niha si no mate, ’datalau manga-manga ba mamadu-madu, börö me mate ita mahemolu.’” Ifangelama ndra talifusönia ba wamati Faulo enaʼö lö tedönisi dödöra ba lala wangera-ngera simane daʼö. Sindruhunia, no ara so lala wangera-ngera simane daʼö fatua lö götö waʼauri Waulo. Tola manö fehede si so ba Yesaya 22:13 nitötöi Waulo andre. Itutunö ayati andrö sanandrösa ba mbua-bua niforomaʼö ndraono Gizaraʼeli. Lö laforege ba wangahatöʼö yaʼira khö Lowalangi, hizaʼi lagohi waʼasana dödö ba waʼaurira. Börö me lawaʼö tödöra wa tola manö mate ira ba zi lö ladöna-döna, laforege sibai ba wamalua fefu zomasi-masi dödöra. Hizaʼi, itutunö Sura Niʼamoniʼö wa larasoi lua-lua si lö sökhi iraono Gizaraʼeli börö me laʼokhögö lala wangera-ngera simane daʼö.​—2 Nga. 36:15-20.

6. Börö me faduhu dödöda ba wanusugi, hewisa wamilida si fahuwu khöda?

⁶ Faduhu dödöda wa hasambalö isusugi niha si no mate Yehowa. Börö daʼö, moguna molua-lua waʼafaduhu dödöda andrö ba gangetulada sanandrösa ba wamili si fahuwu khöda. Moguna mangelama ndra niha Keriso si so ba Gorindro enaʼö lö fariawö ira ba niha si lö faduhu tödö ba wanusugi. Hadia wamahaʼönia khöda? Na tahorigö ginötöda fariawö khö ndra awöda si lö moʼameʼegö tödö salua ba zi so miföna ba solohi faʼasana dödö, tola iʼasogö khöda lua-lua si lö sökhi. Na fariawö ita ba niha simane daʼö, tola lafakiko mbua-bua hegöi amuata si sökhi si toʼölö tafalua. Baero daʼö, tola ladönisi dödöda ba wamalua amuata si fatuwu khö Lowalangi. Daʼö mbörö  wa iʼamenesi ita Faulo imane, ”Böi miförö ba mifalua zatulö, böi mitohugö wamalua horö.”​—1 Kor. 15:33, 34.

7. Simane nisura ba 1 Korindro 15:35-38, hadia wanofu si tola manö lafaʼema niha sanandrösa ba wanusugi?

⁷ Baso 1 Korindro 15:35-38. Börö me omasi ia na aombö dödö niha tanö böʼö sanandrösa ba wanusugi, tola manö isofu zimane daʼa si samösa niha, ”Hewisa wa tesusugi niha si no mate?” No faböʼö-böʼö lala wangera-ngera niha sanandrösa ba zalua ba niha si no mate. Hizaʼi, hadia nifahaʼö Zura Niʼamoniʼö? Datafaigi hewisa wanutunö Waulo sanandrösa ba daʼö.

8. Hadia gamaedola si tola manolo yaʼita enaʼö aboto ba dödöda wanusugi ba zorugo?

⁸ Na mate zi samösa niha, obou mbotonia. Hizaʼi, tola isusugi ia Lowalangi Yehowa samazökhi banua si yawa awö danö, ba ibeʼe khönia mboto si tefaudu ba dötönafönia, he na ba zorugo mazui ba gulidanö. (1 Moz. 1:1; 2:7) Iʼogunaʼö gamaedola sanandrösa ba danömö Faulo, ba wangoromaʼö wa lö moguna isusugi zi samösa niha Lowalangi ba mboto si fagölö. Na mutanö zi sambua hunö, tola tumbu ia tobali tanömö si bohou. Faehu sibai danömö andrö na mufaedogö ia ba hunö side-ide no mege. Iʼogunaʼö gamaehuta andre Faulo ba wangoromaʼö wa tola ibeʼe khöda mboto si tefaudu ba zomasi ia Somböi yaʼita.

9. Moloʼö 1 Korindro 15:39-41, hadia manö gamaehuta nitutunö Waulo sanandrösa ba niwöwöi Yehowa?

⁹ Baso 1 Korindro 15:39-41. Iwaʼö Faulo wa lö fagölö-gölö wamazökhi Yehowa fefu niwöwöinia. Duma-dumania, faböʼö mboto zawi ba wofo hegöi iʼa. Baero daʼö, ifatunö Faulo wa so gamaehuta luo hegöi baŵa si so ba dalu mbanua. Iwaʼö göi wa ”ero sambua ndröfi so lakhömira zamösana”. Tefaudu daʼö moloʼö ira ilmuwan sangumaʼö wa oi faböʼö-böʼö ndröfi hewaʼae na lö oroma daʼö ba höröda. Duma-dumania, so zebua ba so göi zide-ide. So zolaʼa-laʼa  soyo, afusi, mazui aʼusö simane luo sohagaini yaʼita. Iwaʼö göi Faulo wa ”faböʼö mboto si so ba zorugo ba faböʼö mboto si so ba gulidanö”. Hadia geluahania? Fefu zonoso si so ba gulidanö andre, laʼokhögö mboto tanö simane yaʼita. Hizaʼi, fefu zonoso si so ba zorugo simane ira malaʼika, laʼokhögö mboto eheha.

10. Hadia mboto nibeʼe ba niha nisusugi ba zorugo?

¹⁰ Nehegö hadia niwaʼö Waulo aefa daʼö. Imane, ”Simanö göi wemaoso zi mate andrö: Sobou nitanö, ba si lö obou nisusugi.” Na mate zi samösa niha, obou mbotonia ba ifuli tobali tambu. (1 Moz. 3:19) Börö daʼö, hewisa wa tola tesusugi zi samösa niha ba mboto ”si lö obou”? Fanusugi nitutunö Waulo andre lö manandrösa ia ba niha nisusugi enaʼö ifuli auri ba gulidanö, simane niha nisusugi Elia, Elisa, hegöi Yesu. Hizaʼi, manandrösa daʼa ba niha nisusugi ba mboto si tola auri ba zorugo, yaʼia daʼö ”boto eheha”.​—1 Kor. 15:42-44.

11-12. Hadia waʼatebulö salua khö Yesu me tesusugi ia, ba hewisa wa alua dania zimane daʼö khö ndra niha Keriso si no tebayoini?

¹¹ Boto tanö niʼokhögö Yesu me auri ia ba gulidanö. Hizaʼi, me no aefa tesusugi ia, ’tobali ia eheha sangorifi’, ba mangawuli ia ba zorugo. Na tesusugi niha Keriso si no tebayoini, tebeʼe khöra mboto si tola auri ba zorugo simane niʼokhögö Yesu. Itutunö Faulo imane, ”Fakhili-khili ita simane niha si no tewöwöi ba dambu, ba fakhili-khili ita göi dania simane si otarai ba zorugo.”​—1 Kor. 15:45-49.

¹² Törö tödöu wa lö tebeʼe mboto tanö khö Yesu me tesusugi ia. Hadia mbörö? Ifatunö daʼö Faulo ba gangohorita wanutunönia sanandrösa ba wanusugi ba zorugo. Imane, ’Tebai möi ndro hegöi boto ba Wamatörö Lowalangi’ si so ba zorugo. (1 Kor. 15:50) Börö daʼö, na tesusugi dania ba zorugo ndra sinenge hegöi ira niha si no tebayoini tanö böʼö, lö tebeʼe khöra mboto tanö, yaʼia daʼö do hegöi nagole si tola obou. Me isura Faulo zura 1 Korindro, so  ösa nifahaʼö Yesu si ’no mörö ba waʼamate’. Duma-dumania, sinenge sotöi Yakobo. (Hal. 12:1, 2) Ba gafuriata, ’mörö göi ba waʼamate’ ndra sinenge hegöi niha Keriso tanö böʼö si no tebayoini. (1 Kor. 15:6) Hawaʼara tesusugi ira? Lö iʼanemaiʼö tesusugi ira na no aefa mate. Iforomaʼö Faulo wa awena alua daʼö ba zi so miföna.

13. Hadia manö zalua sagötö ’waʼatohare’ Keriso?

¹³ Ifaʼeleʼö Yesu hegöi Faulo sanandrösa ba götö si tohude, yaʼia daʼö götö waʼatohare Keriso. Sagötö waʼatohare Keriso, alua wasuwöta, duru danö, fökhö, hegöi ngawalö wamakao tanö böʼö ba zi sagörö ulidanö. No taʼila waʼalua wamaʼeleʼö andrö iʼotarai ndröfi 1914. Baero ngawalö zi lö sökhi andrö, so göi zi tohude tanö böʼö salua ba ginötö daʼö. Iwaʼö Yesu wa teturiaigö dania duria somuso dödö sanandrösa ba Wamatörö Lowalangi ”ba zi sagörö ulidanö misa, tobali famaduhuʼö ba ngawalö soi ba awena dania amozua götö danö andre”. (Mat. 24:3, 7-14) Iwaʼö Faulo wa na ”tohare dania Zoʼaya”, tesusugi dania ba zorugo ndra niha Keriso si no tebayoini si ’no mörö ba waʼamate’.​—1 Tes. 4:14-16; 1 Kor. 15:23.

14. Hadia zalua ba niha Keriso si no tebayoini, si mate sagötö waʼatohare Keriso?

¹⁴ Na so niha Keriso si no tebayoini si mate ba götöda andre, iʼanemaiʼö tesusugi ira ba zorugo. Tefaudu daʼö ba wehede Waulo nisura ba 1 Korindro 15:51, 52: ”Lö fefu moroi ba gotaluada ahori mörö ba waʼamate, hizaʼi tefaböʼöni ita fefu ba zi lö arara, ha mamöʼi hörö, sagötö moli dorofe safuria.” No alua wehede Waulo andrö ba götöda iadaʼa! Na no tesusugi ndra talifusö Keriso andrö, larasoi waʼomuso dödö börö  me ’lö tebulö fao ira khö Zoʼaya’.​—1 Tes. 4:17.

15. Hadia nifalua niha Keriso si no tebayoini na no tesusugi dania ira ba zorugo?

¹⁵ Ifatunö khöda Sura Niʼamoniʼö hadia nifaluara ba zorugo na no aefa tefaböʼöni ira ba zi ”ha mamöʼi hörö”. Imane khöra Yesu, ”Niha si möna hegöi soloʼö oroisagu irugi gamozua, ubeʼe khönia kuaso ba wamatörö ngawalö soi, simane kuaso nitemagu moroi khö Namagu. Ikubaloi ngawalö soi faoma siʼo siʼöli, irege tobali ira bowoa tanö nifufu ba sozawili.” (Fam. 2:26, 27) Hasambalö laʼoʼö Yesu ba lakubaloi ngawalö soi faoma siʼo siʼöli.​—Fam. 19:11-15.

16. Hewisa wa tola möna niha sato ba wolawa faʼamate?

¹⁶ Sindruhu-ndruhu wa möna dania ndra niha Keriso si no tebayoini ba wolawa faʼamate. (1 Kor. 15:54-57) Aefa daʼö, tola fao ira khö Keriso ba wasuwöta Hamagedo, ba wangohori faʼalösökhi ba zi sagörö ulidanö. Niha Keriso tanö böʼö si zuta faʼato, hasambalö teʼorifi ira ”moroi ba wamakao sabölö-bölö”, ba lakhamö gulidanö si bohou. (Fam. 7:14) Niha niʼorifi andrö dania, hasambalö laʼila höröra waʼamöna tanö böʼö ba wolawa faʼamate, yaʼia daʼö na tesusugi niha si miliaran faʼato si no mate ba götö föna. Na taʼila waʼalua wanusugi andrö dania, hasambalö tarasoi waʼomuso dödö! (Hal. 24:15) Ba gafuriata, fefu niha si no mangoromaʼö faʼalöfaröira khö Yehowa, hasambalö möna ira ba wolawa faʼamate si no iröi Adamo. Hasambalö auri ira irugi zi lö aetu.

17. Moloʼö 1 Korindro 15:58, hadia zinangea tafalua iadaʼa?

¹⁷ Tatu terara sibai dödö ndra niha Keriso sauri ba götö andre na labaso sanandrösa ba wanusugi nisura Waulo ba zurania khö ndra niha Gorindro. Börö daʼö, tatu omasi ita ba woloʼö mene-mene Waulo enaʼö owölö-ölö ita ”ba wangai halöwö Lowalangi”. (Baso 1 Korindro 15:58.) Na taforege wamalua daʼö, tola taʼokhögö waʼauri si sökhi ba zi so miföna. Hasambalö dania tarasoi waʼauri sabölö sökhi moroi ba ngawalö zi tola takhalaigö. Daʼö dania zangoromaʼö wa tenga zaya-zaya gölö wamaluada halöwö khö Zoʼaya.