1-2. Haʼátʼíí biniyé tʼáá ałtso Oodlání éí nááʼdiijeehgi hoł béédahózin doo?

LĄʼÍ Jiihóvah yá ndaalʼaʼí éí nahasdzáán bikááʼ hoolʼáágóó dahiiná dooleełgo baa ił chodahooʼı̨́. Oodlání níłchʼi diyinii bee anoint ádaalyaaígíí tah nahasdzáán yikááʼ dahólónígíí éí yáʼąąshgóó náábidiʼdooljah. Díí anoint ádaalyaaígíí éí beʼiinaʼ ádaatʼéii dooleełgi yaa nitsídaakees. Nahasdzáán bikááʼgóó baa ił chodahooʼínígíishąʼ? Yáʼąąshgóó náádiʼdooljahgi binahjįʼ éí nahasdzáán bikááʼ hoolʼáágóó dahiiná dooleełígíí bikʼidahozhdoodliił. Áko háájí shı̨́ı̨́ nihá ił chohooʼı̨́ shı̨́ı̨́ díí yáʼąąshgóó nááʼdiijeeh dooleełígíí baa nitsídeikees doo.

² Diyin éí first century yę́ędą́ą́ʼ Jesus bídahoołʼaahii łaʼ éí yáʼąąshgóó nááʼdiijeehgi kótʼéego ádaʼdoołííł yidííniid. Yilʼaadii John ání: “Kʼad Diyin God baʼáłchíní daniidlı̨́. Ádaniitʼée dooleełii tʼah doo bééhózin da nidi, Christ nádzáago tʼáá bí átʼéhígi ádaniitʼé dadiidleełgo nihił béédahózin.” (1 John 3:2) Áko Oodlání anoint ádaalyaaígíí éí yáʼąąshgóó níłchʼi danilı̨́įgo náábiʼdiiljéeʼgo ádaatʼéii dooleełgi doo bił béédahózin da. Áko níłchʼi danilı̨́įgo náábiʼdiyiiljéeʼgo éí Jiihóvah yił daʼahiidooltsééł. Yáʼąąshgóó nááʼdiijeehgi éí Diyin Bizaad doo ayóó hazhóʼó yaa chʼíhwiiʼaah da. Ndi yilʼaadii Paul éí łaʼ nihił chʼíiníʼą́ągo átʼé. Anoint ádaalyaaígíí éí Christ yił “nidantʼáii áádóó dahwéeʼaahii índa bídahólníihii” ałtso yikʼeh dadidoodleełgo  ałtso ádeesdįįdóó bikʼijįʼ éí ‘anaʼí akéeʼdi ádeidoołdįįłígíí éí aniné.’ Áádóó akʼeh dazhdeesdlı̨́įʼgo éí Jiihóvah íiyisíí Bóhólníihii nilı̨́įgi biyaa ánizhdookah. (1 Cor. 15:24-28) Kódzaago dooládóʼ baa hózhǫ́ǫ da dooleeł. *

3. 1 Corinthians 15:30-32 áníigi Paul éí nááʼdiijeeh yoodlą́ągi haitʼéego bíká aalwod?

³ Paul éí haʼátʼíí shı̨́ı̨́ bee bichʼįʼ nahwiisnáa ndi, nááʼdiijeeh yoodlą́ągo bíká aalwod. (1 Corinthians 15:30-32 yíníłtaʼ.) Kórinth dineʼé kóníigo yichʼįʼ haadzííʼ: “Tʼáá ákwíí jı̨́ shidiyoołhéełii kǫ́ǫ́ hólǫ́.” Áádóó ałdóʼ ání: ‘Éfasasgi nidaaldlooshii báádahadzidii bił daʼaheeshgą́ą́ʼ.’ Díí shı̨́ı̨́ Éfasasdi tʼáá aaníí éí naaldlooshii yił ahoogą́ą́ʼ yę́ędą́ą́ʼ yeinítʼı̨́įgo ání. (2 Cor. 1:8; 4:10; 11:23) Éí doodaiiʼ Jew dineʼé dóó náánáłaʼ dineʼé bikʼijįʼ danilínę́ę éí “naaldlooshii báádahadzidii” yiłníigo ááhyiłní. (Acts 19:26-34; 1 Cor. 16:9) Áko Paul kótʼéego yéigo báádahadzidii yikʼóoyáa ndi, bił hózhǫ́ǫgo bił chohooʼı̨́.—2 Cor. 4:16-18.

4. Nááʼdiijeeh bee ił chohooʼı̨́įgi haitʼéego Oodlání bíká análwoʼ? (Naaltsoos bikááʼdę́ʼígíí níníłʼı̨́.)

⁴ Dííshjı̨́įdi tʼáá íiyisíí tʼóó náhádzidgo nihił hoogááł. Nihibrothers łaʼ yéigo atídabiʼdoolníiłgo átʼé. Łaʼ éí anaaʼ dahólǫ́ǫgi kéédahatʼı̨́, áko tʼóó náhádzidgo bił nahazʼą́. Áádóó łaʼ éí daakéyahgóó nahaneʼ yę́ęgi bitsʼą́ą́ʼ neʼ ádaalyaa. Áko azhą́ ákótʼée ndi, tʼáá ndahalneʼ. Azhą́ shı̨́ı̨́ biniinaa awáalyaagóó bá adahwiiztʼiʼ doodaiiʼ biniinaa bidiʼyoolyééł shı̨́į ndi, Jiihóvah tʼáá yá ndaalʼaʼ. Áko wołí bee Jiihóvah yá ndaalʼaʼgo nihinááł nizhónígo ádaʼałʼı̨́. Bidiʼyoolyééł shı̨́į ndi, doo nídaaldzid da, háálá Jiihóvah éí tsʼídá yáʼátʼéehii nihaa deeshłééł yiłní.

5. Nááʼdiijeeh woodlą́ągi haʼátʼíí łaʼ nihidinółtłʼah?

⁵ Paul éí bibrothers łaʼ tʼáadoo kótʼéego nitsídaahkeesii yidííniid: “Tʼáá aaníí daneeznáanii doo náábiʼdiiljeehgóogo kóháʼnínígíí bikʼehgo, haaʼíshąʼ daʼiidą́ áádóó daʼiidlą́ą doo, jó, yiską́ągoda dadíníiʼnéełgo daʼátʼé.” Paul bíyoołkááł yę́ędą́ą́ʼ nahdę́ę́ʼ shı̨́ı̨́ tʼáá ákótʼéego nitsáhákees ńtʼééʼ. Éí shı̨́ı̨́ Isaiah 22:13 yaa yáłtiʼ, éí Ízrel dineʼé kódaatʼéé ńtʼééʼ. Háálá éí Diyin áhą́dígo yił dahólǫ́ǫ dooleeł yę́ęgi honeenijída yíká daatʼı̨́ı̨́ ńtʼééʼ. “Ádee naʼíldįįh háálá yiską́ągo doo éédahózin da,” haʼnínígíí átʼéego shı̨́ı̨́ nitsídaahkees ńtʼééʼ. Ízrel dineʼé kótʼéego doo yáʼátʼéhígi nitsídaahkeesgo biniinaa doo yáʼátʼééhgóó bił hooʼaʼgi, éí Diyin Bizaad biiʼ bikʼiniiʼnil.—2 Chron. 36:15-20.

6. Bił ahéídiikahii éí nááʼdiijeeh woodlą́ągi haitʼéegi nihitsʼą́ą́ʼ yidoołchǫǫł?

⁶ Nihił béédahózingo Jiihóvah éí daneeznáanii nínéididoołjahgo átʼé. Áko bił ahéídiikahii éí díí yiniidlą́ągi nihitsʼą́ą́ʼ yidoołchǫǫł. Kórinthdi nihibrothers danilínę́ę éí doo nááʼdiijeeh da daaníigo dayoodlánígíí bitsʼąą ádaa ádahojilyą́ą doo. Éí dííshjı̨́įdi díí bitsʼą́ą́dóó íhooʼaahii átʼé. Áko éí neeʼniʼjįʼ doo nitsídaakeesii índa honeení bił ayóó ádaatʼéii bił ahéídiikahgo doo nihá yáʼátʼéeh da. Éí doo yáʼátʼééhgóó nitsíikeesgo ánihidoolííł. Diyin bikʼehjígo yáʼátʼéehgo oodááł yę́ęgi nihitsʼą́ą́ʼ yidoołchxǫǫł. Áko biniinaada Diyin éí bąąhági ádaatʼéii yijoołáii biyiʼ góneʼ anihidínóoʼah. Paul yéigo náʼookąąhgo ání: “Chʼéédanohdzííd! Tʼáá ákogi ádaahnííł; tʼáadoo bąąhági ánáádaahtʼíní.”—1 Cor. 15:33, 34.

7. 1 Corinthians 15:35-38 áníigi éí łaʼda haʼátʼíí níigo naʼídíłkid doo?

⁷ 1 Corinthians 15:35-38 yíníłtaʼ. Łaʼda éí nááʼdiijeeh bił naaki nílı̨́įgo kóníi łeh, ‘daneeznáanii haitʼéego náádidooljah?’ Paul ádííniid yę́ę baa nitsíikeesgo yáʼátʼéeh doo. Háálá ląʼí diné éí łaʼda ádin yileehgo kótʼįįh daaníigo dayoodlą́. Ndi Diyin Bizaad haʼátʼíí níigo yee naʼnitin?

8. Diyin éí diné nínéiidiyiiłjeehgo háájí shı̨́ı̨́ hináa dooleełgi Paul áníigi haitʼéego bikʼidiʼdiitı̨́ı̨́ł?

⁸ Łaʼda ádin yileehgo éí bitsʼíís diłdziʼ. Ndi yá adahwiisʼáágóó Áyiilaii éí ninéididoosaałgo átʼé. Éí yee hináa dooleełii yeininéididoosaał. (Gen. 1:1; 2:7) Paul éí binahjįʼ bee nanítinii łaʼ nihił ííshjání áyiilaa. Éí łaʼda náábidiʼdoolzáałgo Diyin éí doo tʼáá éí atsʼíís yę́ę yeininéidioosaał da. Paul áníigo ‘álástsiiʼ’ kʼidilyéehgo dínísééh áádóó hanisééh. Díí haniisánígíí éí álástsiiʼ eejaaʼ yę́ę doo tʼáá ákónóolnin da. Áko Paul áníigo éí “Diyin tʼáá bí bił yáʼátʼéhígi átʼéego” ádin silı̨́ʼígíí yee hináa dooleełii yeidoolééł.

9. 1 Corinthians 15:39-41 éí haʼátʼíí ałʼąą ádaatʼé níigo yaa halneʼ?

⁹ 1 Corinthians 15:39-41 yíníłtaʼ. Paul áníigo éí tʼáá daʼníłʼąą ádaatʼéego ádaʼalyaa. Éí atsʼíís danilíinii tʼáá ałʼąą ádaatʼé ní. Éí béégashii, tsídii, dóó łóóʼ ádaatʼéii. Yá biiʼ dahólóonii ałdóʼ tʼáá sahdii ánáádaatʼé, éí jóhonaaʼéí dóó ooljééʼ. Ałdóʼ áníigo “sǫʼ ayóó ádanóolninígíí tʼáá daʼniłʼąą ádaatʼé.” Sǫʼ nihinááʼ doo bee deiitʼíinii éí scientists ałʼąą ádaatʼé daaní. Łaʼ ayóó daníłtsxo, łaʼ áłtsʼísí, łaʼ daalchííʼ, łaʼ éí daalgaii, áádóó łaʼ éí jóhonaaʼéí nahalinígi átʼéego daaltsoh. Paul ałdóʼ ání: “Yótʼááh hiníláii yee hadadítʼéii índa nahasdzáán yee hadadítʼéii ałdóʼ dahólǫ́.” Éí haitʼéego ákótʼé? Jó, nahasdzáán bikááʼ dahólóonii éí atsʼíís bee hadilyaa. Ndi yáʼąąshdi éí diyingo ndaalʼaʼí níłchʼi danilínígi átʼéego níłchʼi danilı̨́.

10. Yáʼąąshgóó náábidiʼdooljahígíi éí haadaatʼéego náábidiʼdooljah ní?

 ¹⁰ Paul éí kónáádíʼní: “Daneeznáanii náádiijeehii ałdóʼ tʼáá ákónáánátʼé. Atsʼíís kʼeelyéigi átʼéego łeeh biʼdiltéehii éí diłdziʼ, tʼáá éí náábidiʼdoodláałii éí doo dółdzid átʼée da.” Tʼáá aaníí nihił béédahózingo łaʼda daatsaahgo éí bitsʼíís diłdziʼ áádóó łeezh nádleeh. (Gen. 3:19) Áko haitʼéego éí atsʼíís “tʼáá éí náábidiʼdoodláałii éí doo dółdzid átʼée da?” Paul éí Iiláíjah dóó Iiláísha índa Jesus éí ádaadinę́ę nahasdzáán bikáaʼjįʼ ninádeidiiyiisahą́ą doo yeinítʼı̨́į da. Paul yeinítʼínígíí éí yáʼąąshgóó hináa dooleełgo náábiʼdiilzahígíí yeinítʼı̨́, éí “níłchʼi nilı̨́į” dooleeł.—1 Cor. 15:42-44, NW.

11-12. Jesus éí haitʼéego náábiʼdiildzá, áádóó anoint ádaalyaaígíí ałdóʼ haitʼéego tʼáá ákótʼé?

¹¹ Jesus éí nahasdzáán yikááʼ naagháhą́ądą́ą́ʼ atsʼíís nilı̨́ı̨́ ńtʼééʼ. Ndi nááhoʼdiilzáádóó éí níłchʼi índa “iiná eidiiʼaahii” jizlı̨́įʼgo yáʼąąshgóó aníjoodzá. Tʼáá ákótʼé Oodlání anoint ádaalyaaígíí éí níłchʼi danilı̨́įgo yáʼąąshgóó náádabiʼdiiljéeʼ doo. Paul ání: “Łeezh bitsʼą́ą́dóó áhoʼdiilyaaígi ádaniitʼéé nítʼéʼígi átʼéego yáʼąąshdę́ę́ʼ jílínígi ádaniitʼée dooleeł.”—1 Cor. 15:45-49.

¹² Bééhániih dooleełgo éí Jesus náábiʼdiilzáago éí doo atsʼíís bee nááhoʼdiilzáa da. Paul éí nááʼdiijeeh kʼadę́ę ałtso yaa níhoolniihgo “atsʼíís índa dił éí Diyin biNahatʼaʼ doo biishdoogáał da,” nínę́ęgi ííshjání ííłʼı̨́. (1 Cor. 15:50, NW) Daalʼaadii áádóó náánáłaʼ anoint ádaalyaaígíí éí atsʼíís diłdzidii doo bee yáʼąąshgóó bee náábidiʼdooljah da. Díí éí hahgo náábidiʼdooljah? Paul áníigo éí tʼah náasdi índa; éí dajitsaahgo tʼáá akǫ́ǫ́ doo nááhodiilzaah da. Paul éí 1 Corinthians naaltsoos ííléehgo ídahoołʼaahii łaʼ tʼáá íídą́ą́ʼ “łaʼ bikééʼ ádahasdįįd.” Éí yilʼaadii James łaʼ tʼáá íídą́ą́ʼ ájídin. (Acts 12:1, 2) Łaʼ daalʼaadii índa anoint ádaalyaaígíí éí tʼah doo ‘bikééʼ ádahadįįh da.’—1 Cor. 15:6.

13. Nihoogháahjįʼ ayííłką́ągo haahootʼée doo?

¹³ Jesus dóó Paul éí nihoogháahjįʼ ayííłką́ągo kóhootʼée doo níigo chʼíiníʼą́. Éí anaaʼ dahólǫ́ǫ doo, neʼ nídahidiʼnáah doo, naałniih, áádóó tʼáá ałtsogóó ayóó ádahooníił doo. Díí 1914dóó wóshdę́ę́ʼ tʼáá ałtso nihinááł ádahoonííł. Jesus ałdóʼ áníigo Diyin biNahatʼaʼ nizhónígo baa haneʼii éí “nahasdzáán nidahoneesʼą́ą́góó, ałʼąą dineʼé tʼáá ałtso . . . bee hoł dahodoonih, áko áadi índa nihodoogááł.” (Matt. 24:3, 7-14) Paul éí “nihoogháahjįʼ ayííłką́ągo” éí Oodlání anoint ádaalyaaígíí “daneeznáanii” náábidiʼyiiljeeh doo níigo ałdóʼ chʼíiníʼą́.—1 Thess. 4:14-16, NW; 1 Cor. 15:23.

14. Nihoogháahjįʼ yoołkáałgo anoint ádaalyaaígíí ádin yileehgo haitʼįįh?

¹⁴ Paul éí 1 Corinthians 15:51, 52gi ání: “Doo tʼáá áníiltso dadíníiʼnéeł da, nidi tʼáá áníiltso łahgo ádanihidiʼdoolnííł, béésh łitsoii dilní akéeʼdi ádííniidgo índa jineeskʼołígi átʼéego tsxı̨́įłgo łahgo ádanihidiʼdoolnííł.” Díí éí tʼáá aaníí dííshjı̨́įdi ákótʼé, anoint ádaalyaaígíí ádin daaleehgo éí tʼáá akǫ́ǫ́ tsxı̨́įłgo yáʼąąshgóó náábiʼdiilzá. Díí éí kʼad bohoolnííł. Éí Christ bikʼis danilı̨́įgo náádabiʼdiilzáahgo ayóó yaa bił dahózhǫ́, háálá éí “hoolʼáágóó áádóó ahóyéelʼáágóó Bóhólníihii yił dahólǫ́ǫ doo.”—1 Thess. 4:17.

15. Anoint ádaalyaaígíí éí yáʼąąshdi haʼátʼíí naanish bibaʼ hólǫ́?

¹⁵ Diyin Bizaad áníigo anoint ádaalyaago náábiʼdiiljéʼígíí yáʼąąshdi binaanish ádeidoolíłígíí yaa halneʼ. Jesus éí kwíidííniid: “Tʼáá akʼesdeesdlı̨́ʼígíí índa nihoolzhiizhjįʼ íinisinii ájoolíłígíí éí ałʼąą dineʼé bił dah nidahazʼáanii bee hóhólníihgo  áhodeeshłííł. Tʼáá shiTaaʼ bitsʼą́ą́dę́ę́ʼ bee óhólníihii shee hazlı̨́ʼígi átʼéego bee hóhólníihgo áhodeeshłííł. Béésh hał bee binazhnitʼáa doo; ásaaʼ ííłʼíinii bileetsʼaaʼ nihídazdeestsxis nahalingo nihídadidooltsxisgo ałtso dadidoozéí.” (Rev. 2:26, 27) Áko éí díí honanitʼaʼí Jesus bikʼeh dahojíłʼı̨́įgo ałʼąą dineʼé éí béésh hał bee bikʼidahojíʼaah doo.—Rev. 19:11-15.

16. Aniné haitʼéego bikʼeh hodidoodleeł?

¹⁶ Oodlání anoint ádaalyaaígíí yáʼąąshgóó náábiʼdiiljéeʼgo éí aniné bikʼeh hodeesdlı̨́įʼ doo. (1 Cor. 15:54-57) Áko éí Armagédango nahasdzáán bikááʼgóó tsʼídá doo yáʼádaashxóonii ádahooníłígíí atah yikʼeh dadidoodleeł. Tʼóó ahayóí Oodlání hastóí dóó sáanii éí “ayóó átʼéego achʼįʼ nahwiiʼná yiiʼdę́ę́ʼ chʼéheeskaigo” ániidí ánáhoolyaago yiih góneʼ yisdádoohkah. (Rev. 7:14) Áko éí nahasdzáán bikáaʼjįʼ yisdáákaii éí náánáłahgo aniné bikʼeh nááhodidoodleeł, éí diné tsʼídá tʼóó ahayóí ádaadinę́ę hanááł náádabidiʼyiljeeh doo. Dooládóʼ shı̨́ı̨́ díí baa hózhǫ́ǫgo nihinááł áhodoonííł. (Acts 24:15) Áádóó wołí bee ádaatʼı̨́įgo Jiihóvah yikééʼ naazíinii éí díí aniné Ádam bitsʼą́ą́dóó hodeezlı̨́įʼii ałdóʼ bikʼeh hodidoodleeł. Áko éí tʼáá ałtso ahoyéelʼáágóó dahináa doo.

17. 1 Corinthians 15:58 baa nitsáhákeesgo haʼátʼíí kʼad ádeiiʼníił doo?

¹⁷ Tʼáá ałtso Oodlání dajílíinii éí díí Paul Kórinth dineʼé nááʼdiijeehgi yaa halneʼgo yichʼįʼ áyiilaa yę́ę baa ahééh dazhnízin doo. Áko tʼáá ákónéehee éí Paul yee haadzíʼígíí bikʼeh ádaniitʼéego éí “doo nihízhdóyííł átʼéégóó tʼáá áłahjįʼ tʼááłáhígi átʼéego Bóhólníihii bá” nideilʼaʼ doo. (1 Corinthians 15:58 yíníłtaʼ.) Áko wołí bee díí bee akééʼ siidzı̨́įgo éí iiná ániidíii baa hózhóonii bíká díníitʼı̨́įʼgo íitʼı̨́. Bóhólníihii bá neiilʼaʼgi doo tʼáadoo biniyéhígóó íitʼı̨́į da.