1-2. Mesoriẹ o fo nẹ Ilele Kristi ephian i vwo ọdamẹ kpahen ẹrhọmọnuhwu Ilele Kristi ra djẹha?

IHWORHO buebun ra ga i Jehova vwana, i vwo ifiẹrorhọ aye ine nyerẹn bẹmẹdẹ uvuẹn otọrakpọ na. Ọrẹn, Ilele Krisiti ra djẹha ri hẹrhẹre i vwo ifiẹrorhọ aye ine riẹ odjuwu. Era djẹha na i dabu vwo ọdamẹ kpahen oborẹ akpenyerẹn aye obaro na ono rhirhiẹ. Nẹ eri vwo ifiẹrorhọ aye ine nyerẹn uvuẹn otọrakpọ na vwo? Jerẹ oborẹ ana mẹrẹn, ẹrhọmọnuhwu era djẹha na, ọnọ ha ebrurhọ vwe ihworho ri vwo ifiẹrorhọ aye ine nyerẹn bẹmẹdẹ uvuẹn otọrakpọ na. Omarana, sẹ ifiẹrorhọ ọwan ọrẹ odjuwu yanghene uvuẹn otọrakpọ na, o fori ne vwo ọdamẹ kpahen ẹrhọmọnuhwu era djẹha na.

² Osolobrugwẹ o tiobọnu ẹhẹn ọfuanfon ọnẹyen rẹn idibo i Jesu uvuẹn ọke inyikọ na, nẹ aye i ya kpahen ifiẹrorhọ ọrẹ odjuwu na. Ọnyikọ John ọrhọ ya: “Imizu re vwo ẹguọlọ kpahen, vwana ọwan emọ Osolobrugwẹ, ọrẹn ọ ji dabu fiotọre oborẹ ene rhirhiẹ-ẹ. Ọrẹn e rheri taghene ọke orho fiotọre ne, ana họhiẹ.” (1 John 3:2) Omarana, era djẹha na, e ji rhe oborẹ aye ine rhirhiẹ ọke ra rhọmerẹn aye riẹ odjuwu ne-e. Ọrẹn, aye ina mẹrẹn i Jehova ọke ra na yẹ aye ebrurhọ aye. Baibol na ọ ta rẹn ọwan kpahen ọsoso iyẹnrẹn ẹrhọmọnuhwu odjuwu na-a, ọrẹn ọnyikọ Paul ọ ha iyẹnrẹn ezẹko phia kpahiẹn. Era djẹha na ine kwomakugbe i Kristi ọke ra na “ghwọghọ ọsoso igọmẹti, usuon ọrhẹ omẹgbanhon nie.” Ọrana ọ ji haba “uhwu ro rhiẹ ọvwreghrẹn rọ kẹta na.” Obẹtaye,  Jesu—ọrhẹ eri ne lelie sun—ina homariotọre rẹn Jehova, jeghwai ha i kemru kemru riẹn. (1 Cor. 15:24-28) Ọrana ono ghini rhiẹ ọke omamerhomẹ! *

3. Jerẹ oborẹ ọ ha 1 Corinthians 15:30-32, me yẹ imwẹro ri Paul o vwo kpahen ẹrhọmọnuhwu ọ ha userhumu riẹn ru?

³ Imwẹro i Paul o vwo kpahen ẹrhọmọnuhwu na, ọ ha userhumu riẹn vwo edirin ebẹnbẹn sansan. (Se 1 Corinthians 15:30-32.) Nọ ta rẹn Ilele Kristi ri ha Corinth: “Kẹdẹkẹdẹ mia dẹrughwaroghwu uhwu.” Paul ọrhọ ji ya: “Mi lele eranmo ra djoma wọnrọn uvuẹn Ephesus.” Ọkezẹko ọ ta kpahen eranmo ri ha Ephesus ro ghini lele wọnrọn. (2 Cor. 1:8; 4:10; 11:23) Yanghene o dje kpahen ẹkparehaso ri nẹ abọ itu i Jew na rhe, ọrhẹ awọrọ ri họhọ “eranmo ra djoma.” (Acts 19:26-34; 1 Cor. 16:9) Oborẹ ọ havwọ ephian, Paul ọ rhiẹromẹrẹn erhirhiẹ egbogbanhon, ọrẹn o vwo imwẹro taghene ono vwo obọdẹn obaro akpọ.—2 Cor. 4:16-18.

4. Marhẹ ifiẹrorhọ ẹrhọmọnuhwu na o ru bọn Ilele Kristi inyenana gbanhon ne? (Ni ifoto obaro ọbe na.)

⁴ Ọwan e nyerẹn uvuẹn ọke ri mwuofẹn. E ruẹ imizu ọwan ezẹko gbalogbalo. Awọrọ e rhirhiẹ ekete re fiuvweri, aye e vwo omefuo-on. Habaye, awọrọ a ga i Jehova uvuẹn ẹkwotọre ra dobọ owian aghwoghwo na ji, ọrẹn aye e fiẹ arhọ aye yanghene ugbomọphẹ aye rhẹ erhirhiẹ imwofẹn ga i Jehova. Udabọ erana, imizu enana ephian e vwo erhionrin ga i Jehova, aye obọdẹn udje rẹn ọwan. Ofẹn o vwo mwu aye-e, fọkime aye i rheri taghene aye i rhe hwu vwana, Jehova ọnọ rhọmọ aye obaro na.

5. Iroro ọsọsọ ọgo yọ nọ sabu lẹrhẹ imwẹro ọwan kpahen ẹrhọmọnuhwu na seriotọre?

⁵ Paul ọ ha orhetio rẹn Ilele Kristi nẹ aye i kẹnoma rẹn iroro ọsọsọ rẹ ihworho ezẹko i vwori: “Orhianẹ ẹrhọmọnuhwu ọ vwọ samọ rhirhiẹ ye-e, ‘e gbe jenẹ a re jeghwai da, fọkime odẹ rọ sa na ọwan ine hwuo.’” Aruẹ iroro ọrana ọ homaphia uvuẹn ẹdẹ i Paul. Ọkezẹko i Paul o se nẹ oborẹ a ya rhẹ Isaiah 22:13, rọ rionbọrhọ uruemru emọ Israel. Ukperẹ aye ine tikẹrẹ i Jehova, aye na hatua akpẹriọ. Itiọrurhomẹmro, uruemru emọ Israel na yẹ, “o fori na riakpọ vwana, fọkime ana sabu hwu ọke re vwe roro rhọ,” ọnana yẹ iroro ihworho buebun i ji vwo inyenana. Ọrẹn, Baibol na ọ ta kpahen orharhere iyẹnrẹn ro nerhumu uruemru agbamwa Israel na rhe.—2 Chron. 36:15-20.

6. Marhẹ imwẹro kpahen ẹrhọmọuhwu na ono ru hobọte aruẹ ihworho ra ha mwu ugbehian?

⁶ O fori nẹ imwẹro na taghene Jehova ọnọ rhọmọ ihworho ri hwuru, ọ hobọte okugbe ọwan. O fori nẹ imizu ri ha i Corinth i kẹnoma rẹn ihworho ri vwe vwo imwẹro kpahen ẹrhọmọnuhwu na. O vwo oborẹ ana sabu yono: Omamọ emru o vwo nerhumuie sa-a, orhianẹ ọke ephian ye kwomakugbe ihworho ri vwe roro kpahen obaro akpọ aye. Aruẹ ihworho erana ina sabu hobọte iroro ọrhẹ iruemru obọdẹn Olele Kristi re vwori. Habaye, ọnọ lẹrhẹ ọwan ru ekwakwa i Jehova o vwo utuoma kpahen, nọyẹ ọdandan. Omarana, Paul nọ ha orhetio ọgbogbanhon phia: “Are i jẹ iroro are gba izede ọsoso, are i vwe ruẹ ọdanda-an.”—1 Cor. 15:33, 34.

7. Jerẹ oborẹ 1 Corinthians 15:35-38 o djephia, onọ ọgo kpahen ẹrhọmọnuhwu na yẹ ihworho ezẹko ina sabu nọ?

⁷ Se 1 Corinthians 15:35-38. Ohworho rọ guọlọre nẹ awọrọ i vwo ẹhẹn eveva kpahen ẹrhọmọnuhwu na, ọnọ sabu nọ: “Aruẹ ugboma ọgo ya na rhọmọ eri hwuru na?” O fori ne roro kpahen ẹkpahenrhọ i Paul, fọkime ihworho buebun inyenana i vwo imwẹro omobọ kpahen oborẹ phia ohworho orho hwu hin. Ọrẹn, me yi Baibol na o yonorin?

8. Udje ọgo yọ nọ sabu ha userhumu rẹn ọwan vwẹruọ ẹrhọmọnuhwu riẹ odjuwu na?

⁸ Ohworho orho hwu, ugboma yen no gbon. Ọrẹn, Jehova rọ vwọ ha emru owuorowu ma ọsoso akpọ na, ọnọ sabu rhọmọ ọravwọ jeghwai yẹ ye ugboma ro serhọ riẹn. (Gen. 1:1; 2:7) Paul ọ ha udje owu e dje taghene Jehova, ọ rhọmọ ohworho na rhẹ aruẹ ugboma ro vwori bi-i. Roro kpahen “ukeri owu” yanghene “ukeri” ewawọ. Ukeri ra wọ rhotọre nọ họ, ji rhiẹ owawọ ọkpokpọ. Owawọ ọkpokpọ na ọ vẹnẹ ukeri ra wọre na. Paul ọ ha udje ọnana e dje oborẹ Ọmemama na ono ru sabu ha “ugboma ro jerie” rẹn ohworho ro hwuru na.

9. Me yẹ 1 Corinthians 15:39-41 ọ ta kpahen ugboma sansan?

⁹ Se 1 Corinthians 15:39-41. Paul ọ tare taghene o vwo emama sansan buebun. Jerẹ udje, o vwo aruẹ ugboma sansan, jerẹ erẹ imalu, efen ọrhẹ erhenrin. Ọ ji ta taghene uvuẹn ivwrevwrede na, ovẹnẹ ọ ha uvwre ọren na ọrhẹ ubiamo na. Ọ ji djokarhọ ye taghene “odidi ukereti owu ọ vẹnẹ ọreva ye.” Orhianẹ a sabu mẹrẹn ovẹnẹ na rhẹ ukẹro ọwa-an, o vwo oborẹ otu isaiyẹnsi e se ikereti ebobare eduado, ikereti efuanfon ri kamurun ọrhẹ ikereti erọrọ jerẹ ọren na. Paul ọ ji ta taghene “o vwo ugboma erẹ odjuwu ọrhẹ ugboma erẹ otọrakpọ na.” Izede ọgo? Uvuẹn otọrakpọ na, o vwo  ugboma sansan, ọrẹn obẹ odjuwu o vwo ugboma ẹhẹn, jerẹ aruẹ erẹ emakashe na.

10. Aruẹ ugboma ọgo yẹ erẹ ana rhọmọ riẹ odjuwu ine vwo?

¹⁰ Djokarhọ oborẹ i Paul ọ ta kpahiẹn: “Omaran ẹrhọmọnuhwu erẹ ihwuru na ono rhirhiẹ. A wọ riẹ ọrẹ oghwọghọ; a ha riẹ phia ọrẹ jẹghwọghọ.” Itiọrurhomẹmro, ohworho orho hwu, ugboma yen no gbon jeghwai dẹrẹrhiẹ oghwurhie. (Gen. 3:19) Marhẹ o ru rhirhiẹ taghene ugboma na ọnọ “rhọmọ ọrẹ jẹghwọghọ”? Paul ọ vwọ ta kpahen onyakpọ ra na rhọmọ rhiẹ otọrakpọ na-a, jerẹ aruẹ ẹrhọmọnuhwu Elijah, Elisha, ọrhẹ Jesu i ruru-u. Ọrẹn, Paul ọ ta kpahen ohworho ra na rhọmọ riẹ odjuwu, nọyẹ ugboma “ọrẹ ẹhẹn.”—1 Cor. 15:42-44.

11-12. Ewene ọgo yi Jesu o rhiẹromẹrẹn ọke ra rhọmiẹ hin, marhẹ era djẹha na i ru rhiẹromẹrẹn aruẹ ewene ọrana?

¹¹ Ọke i Jesu ọ ha otọrakpọ na, o vwo ugboma onyakpọ. Ọrẹn ọke ra rhọmiẹ hin “no rhiẹ ohworho ẹhẹn ro tiobọnu arhọ rẹn ihworho,” nọ ji ghwẹrioma riẹ odjuwu. Omaran ọ ji havwọ, ana rhọmọ Ilele Kristi ra djẹha rhẹ ugboma aye ina sabu rhirhiẹ odjuwu. Paul ọrhọ ta: “Jerẹ oborẹ ọwan i vwo ohọhọme ohworho ra ha eyẹn ma na, omaran ene ji vwo ohọhọme ọro nẹ odjuwu rhe na.”—1 Cor. 15:45-49.

¹² Paul o te ifuen ẹmro ọnẹyen kpahen ẹrhọmọnuhwu na ne. Ọ ghanranren na djokarhọ ye taghene a rhọmọ i Jesu rhẹ ugboma onyakpọ-ọ. Paul orho dje yi fiotọre: ‘Uhwen ọrhẹ ọbara i sabu ha Uvie Osolobrugwẹ rọ ha odjuwu riuku-u.’ (1 Cor. 15:50) A rhọmọ inyikọ na ọrhẹ awọrọ riẹ odjuwu rhẹ ugboma uhwen ọrhẹ obara ra ghwọghọ-ọ. Ọkiọgo ya na rhọmọ aye? Paul ọrhọ ta taghene ẹrhọmọnuhwu ọnana ọ ha obaro; o rhiẹ oborẹ aye ine rhiẹromẹrẹn ogege aye i rhe hwu-u. Ọke i Paul ọ ya 1 Corinthians, idibo ezẹko “i merhẹnren ọrẹ uhwu ne,”  jerẹ udje ọnyikọ James. (Acts 12:1, 2) Inyikọ erọrọ ọrhẹ era djẹha na i “merhẹnren ọrẹ uhwu” ọke oru.—1 Cor. 15:6.

13. Me yọ nọ phia uvwre ẹrhiọ i Jesu?

¹³ Jesu ọrhẹ Paul i rionbọrhọ ọke oghẹnrensan uvuẹn ikuegbe ituakpọ, nọyẹ ẹrhiọ i Kristi. Uvwre ẹrhiọ i Kristi, ono vwo uvweri, etọre re kpogho, emiamo ọrhẹ ekwakwa ibiobiomu erọrọ ri na phia. Ọwan i mẹrẹn orugba aruẹmẹrẹn i Baibol na nẹ ẹgbukpe 1914 rhe ne. Ono ji vwo oghọn ọghoghanren ọrọrọ uvuẹn oka ọrana. Jesu ọ tare taghene ene ghwoghwo iyẹnrẹn esiri Uvie Osolobrugwẹ “lele ọsoso ekete re rhirhiẹ uvuẹn akpọ na no rhiẹ oseri harẹn egbamwa na, oba na nọ nọ ki rhe.” (Matt. 24:3, 7-14) Paul ọrhọ ta taghene “ẹrhiọ Ọrovwori na,” ono rhiẹ ọke ẹrhọmọnuhwu Ilele Kristi ra djẹha ri “merhẹnren ọrẹ uhwu.”—1 Thess. 4:14-16; 1 Cor. 15:23.

14. Me yọ nọ phia rẹn era djẹha ri hwuru uvwre ẹrhiọ i Kristi?

¹⁴ A rhọmọ Ilele Kristi ra djẹha na ri hwuru ọke ọwan riẹ odjuwu ogege. Ọnana o mwuẹro nyoma ẹmrọ i Paul ọ tare, ra ya rhẹ 1 Corinthians 15:51, 52: “Ọwan ephian i merhẹn ọrẹ uhwu-u, ọrẹn ọwan ephian ine wene ogege, uvuẹn ibrẹro owu, uvwre ọke ene kporo ukpori rọ kẹta na.” Ẹmro enana ri Paul ọ tare na e ruẹ gba ne! Arha rhọmọ aye, imizu i Kristi na ine vwo aghọghọ rode; fọkime aye rhẹ “Ọrovwori na ni ne rhirhiẹ ye kugbe ọke ephian.”—1 Thess. 4:17.

15. Owian ọgo yọ hẹrhẹ eri ne wene “ogege”?

¹⁵ Baibol na ọ ta rẹn ọwan kpahen owian eri wenerin “ogege,” ina wian obẹ  odjuwu. Jesu ọrhọ ta rẹn aye: “Harẹn ohworho ro fikparobọ rọ ji nyalele irueruo mẹ ye toba, mi na yẹ ye omẹgbanhon no suẹn egbamwa na, ọye ono sun ihworho na rhẹ ukorọkpọ uteru, neneyo aye i ghwọghọ yẹghẹyẹghẹ jerẹ eriẹ ra ha ọphiẹ ru, jerẹ oborẹ Ọsẹ na ọ yẹre mẹ.”(Rev. 2:26, 27) Aye ine lele Osun aye wian owian aye ine sun egbamwa na rhẹ ukorọkpọ uteru.—Rev. 19:11-15.

16. Marhẹ ihworho buebun ine ru fiẹ uhwu kparobọ?

¹⁶ Ọrẹ imwẹro, era djẹha na ine fiẹ uhwu kparobọ. (1 Cor. 15:54-57) Ẹrhọmọnuhwu aye ọnọ ha uphẹn rẹn aye sabu tiẹn ọsoso irueruo ọkon nie uvwre ọke uvweri Armageddon. Iduduru imizu buebun ine “nẹ uvuẹn ukpokpogho rode na rhe,” jeghwai simirhọ ruẹ akpọ ọkpokpọ na. (Rev. 7:14) Eri simirhọ uvuẹn otọrakpọ na, ine rhiẹromẹrẹn efikparobọ ọrọrọ kpahen uhwu, ọke ra na rhọmọ iduduru buebun ri hwu vrẹn rhiẹ akpọ. Roro kpahen aghọghọ ra na mẹrẹn ọke ẹrhọmọnuhwu na ọnọ phia! (Acts 24:15) Ọsoso ihworho ri vwo atamwu kpahen Jehova ine ji fiẹ uhwu kparobọ. Aye ine nyerẹn bẹmẹdẹ.

17. Me yẹ 1 Corinthians 15:58 ọ ha urhebro rẹn ọwan ne ru?

¹⁷ O fori nẹ oma ọ merhen Ilele Kristi re nyerẹn vwana, kpahen ifiẹrorhọ ẹrhọmọnuhwu ri Paul ọ ya vwe imizu ri ha Corinth. O vwo iroro buebun rọ nọ lẹrhẹ ọwan nyalele urhebro i Paul, na dabu vwobọrhọ ewian buebun vwana “uvuẹn owian Ọrovwori na.” (Se 1 Corinthians 15:58.) Arha wian ekete omẹgbanhon ọwan o teri uvuẹn owian ọrana, ene vwo obọdẹn akpọ rọ vuọnren rhẹ aghọghọ obaro na. Obaro akpọ ọrana ono rhomu ghwẹ oborẹ ana sabu roro vwana. Ono djephia taghene omẹdamu ọwan uvuẹn owian Ọrovwori na, orhiẹ ofefe-e.