1-2. Dikon tur sirbidó di Yehova ta interesá den e resurekshon selestial?

AWE, tur sirbidó di Yehova ke sa mas di e resurekshon selestial. Ta klaru ku e ungínan ta interesá den e tema akí pasobra e tin di haber ku nan bida den futuro. I pa loke ta trata esnan ku tin speransa pa biba riba tera—ku ta mayoria di e sirbidónan di Yehova—nan tambe ta interesá pasobra e resurekshon ei lo trese hopi bendishon pa nan.

² Dios a inspirá algun di Hesus su disipelnan di promé siglo pa skirbi tokante e resurekshon selestial. Apòstel Huan a splika: “Aworakí nos ta yu di Dios, pero no a keda revelá ainda kiko nos lo ta den futuro. Nos sa sí ku ora Dios keda manifestá, nos lo ta meskos kuné.” (1 Huan 3:2) Pues, e ungínan no sa presis kiko ta nifiká biba den shelu komo kriatura spiritual. Loke sí nan sa ta ku nan lo bai mira Yehova despues ku nan haña nan rekompensa. Beibel no ta duna tur detaye tokante e resurekshon selestial, pero Apòstel Pablo a duna algun informashon tokante esei. E ungínan lo ta huntu ku Kristu “ora ku e kaba ku tur gobièrnu i tur outoridat i poder.” Esei ta inkluí “e último enemigu . . . morto.” Finalmente, Hesus huntu ku su ko-gobernantenan lo someté nan mes i tur kos na Yehova. (1 Kor. 15:24-28)  Sigur esei lo ta masha emoshonante! *

3. Di akuerdo ku 1 Korintionan 15:30-32, kon Pablo su fe den resurekshon a yud’é?

³ E fe ku Pablo tabatin den resurekshon a yud’é soportá tur tipo di prueba. (Lesa 1 Korintionan 15:30-32.) El a bisa e korintionan: “Tur dia mi ta haña mi kara kara ku morto.” El a bisa tambe: “Mi a bringa ku bestia salbahe na Efeso.” Kisas e tabata papia tokante su lucha den un arena na Efeso kontra animal di bèrdat. (2 Kor. 1:8; 4:10; 11:23) Òf, kisas e tabata referí na oposishon di e hudiunan òf di otro hende ku tabata manera “bestia salbahe.” (Echo. 19:26-34; 1 Kor. 16:9) Sea kual sea e kaso, Pablo a pasa den vários situashon peligroso. Pero, tòg el a keda ku un punto di bista positivo tokante futuro.—2 Kor. 4:16-18.

4. Kon e speransa di resurekshon ta fortalesé hopi kristian awe? (Wak e plachi riba portada.)

⁴ Nos ta bibando den tempu masha peligroso. Algun di nos rumannan tabata víktima di krímen. Otronan ta biba den área ku tin guera, i nan no ta sinti nan safe. Tin otro ruman ta sirbi Yehova riskando nan bida òf libertat na pais kaminda nos trabou di prediká ta restringí òf prohibí. Pero, tur e rumannan ei ta sigui sirbi Yehova i ta bunita ehèmpel pa nos. Nan no tin miedu pasobra nan sa ku, asta si nan muri, Yehova ta primintí di duna nan algu muchu mas mihó den futuro.

5. Ki punto di bista peligroso por debilitá nos fe den resurekshon?

⁵ Pablo a spièrta su rumannan tokante un punto di bista peligroso ku algun di nan tabatin: “Si e mortonan no ta ser lantá, ‘laga nos kome i bebe, pasobra mañan nos ta muri.’” E punto di bista ei ya tabata eksistí pa hopi tempu kaba. Kisas Pablo tabata sita Isaías 22:13, ku a referí na e aktitut ku e israelitanan tabatin. En bes di hala serka Dios, nan tabata kore tras di plaser di bida. Meskos ku hopi hende djawe, e israelitanan tabata pensa “awe bo t’ei, mañan bo no t’ei.” Pero, Beibel ta mustra bon kla kiko tabata e mal resultado di e tipo di pensamentu ei.—2 Kró. 36:15-20.

6. Kon e speransa di resurekshon mester influensiá nos eskoho di amistat?

⁶ Nos fe den resurekshon mester influensiá nos eskoho di amistat. E rumannan na Korinto mester a evitá di anda ku hende ku no tabata kere den resurekshon. Kiko esei ta siña nos? Si nos tin amistat ku hende ku ta pensa solamente riba biba pa awe, kos lo no bai bon ku nos. Tipo di amistat asina por pone nos pèrdè nos prinsipionan i bon kustumber. De echo, e por asta laga nos hasi kos ku Dios ta odia. Ta p’esei Pablo a duna e siguiente spièrtamentu: “Bolbe na boso sano huisio, hasiendo loke ta hustu, i no praktiká piká.”—1 Kor. 15:33, 34.

7. Segun 1 Korintionan 15:35-38, ki pregunta algun hende por a hasi tokante resurekshon?

⁷ Lesa 1 Korintionan 15:35-38. Un hende ku kier a kuestioná e speransa di resurekshon por a puntra: “Kon e mortonan lo resusitá?” Ta bon pa nos pensa riba Pablo su kontesta pasobra hopi hende awe tin nan mes punto di bista  tokante bida despues di morto. Pero, kiko Beibel ta siña nos?

8. Ki ilustrashon ta yuda nos komprondé e resurekshon selestial mihó?

⁸ Ora un hende muri, su kurpa ta deskomponé. Pero Yehova, kende a krea universo for di nada, por resusit’é i dun’é e kurpa ku e mester. (Gén. 1:1; 2:7) Pablo a usa un ilustrashon pa splika ku Dios no ta duna hende resusitá e mesun kurpa, sino ku e por duna kada un “un kurpa di Su agrado.” Pablo a papia di “un simpel pipita” òf un “simia” di mata, ku ta ser plantá den tera i ku ta bira un mata nobo. E mata nobo ei ta kompletamente diferente for di e simia chikitu.

9. Kiko 1 Korintionan 15:39-41 ta bisa tokante e diferente sorto di kurpa?

⁹ Lesa 1 Korintionan 15:39-41. Pablo a resaltá e variedat grandi ku tin den kreashon. Por ehèmpel, kurpa di baka, para i piská ta masha diferente for di otro. El a bisa tambe ku solo i luna ta masha diferente, i ku “e gloria di kada strea ta distinto for di otro.” Esei ta bèrdat aunke nos no por mira e diferensia ei ku nos wowo. Sientífiko ta bisa ku tin diferente sorto di strea. Algun ta grandi, algun ta mas chikitu, algun ta kòrá, algun ta blanku i algun ta hel manera nos solo. Pablo a bisa tambe ku “tin kurpa selestial i kurpa terenal.” Kiko e tabata kier men ku esei? Esnan ku ta biba riba tera tin kurpa físiko, pero esnan ku ta biba den shelu tin kurpa spiritual, manera angel.

10. Ki sorto di kurpa esnan ku resusitá pa biba den shelu lo tin?

¹⁰ Pablo a sigui splika: “Asina ta ku e resurekshon di e mortonan. Loke ta ser sembrá ta kaba na nada, loke ta ser lantá no ta kaba na nada.” Nos sa ku ora un  hende muri, su kurpa ta deskomponé i ta bira stòf. (Gén. 3:19) Pero, kon asina “loke ta ser lantá no ta kaba na nada”? Pablo no tabata papia di un hende ku a ser resusitá pa biba aki riba tera, manera e hendenan ku Elías, Eliseo i Hesus a resusitá. Mas bien, e tabata referí na esnan resusitá ku un kurpa selestial, esta, “un kurpa spiritual.”—1 Kor. 15:42-44.

11-12. Ki kambio Hesus a eksperensiá ora el a resusitá, i kiko nos por bisa di e ungínan?

¹¹ Tempu Hesus tabata riba tera, e tabatin un kurpa físiko. Pero ora el a resusitá, el a “bira un spiritu ku ta duna bida” i a bolbe na shelu. E ungínan tambe lo resusitá komo kriatura spiritual. Pablo a splika: “Meskos ku nos tin e semehansa di esun trahá di stòf, asina nos lo tin e semehansa tambe di esun selestial.”—1 Kor. 15:45-49.

¹² Ta importante pa nos kòrda ku Hesus no a resusitá ku un kurpa humano. Ora Pablo tabata yegando na konklushon di e punto importante ei, el a splika: “Kurpa di karni i sanger no por tin parti den e Reino di Dios” den shelu. (1 Kor. 15:50) Pues, e apòstelnan i otro kristian ungí tampoko lo no bai shelu ku kurpa di karni i sanger ku ta kaba na nada. Awor bon, na ki tempu nan lo a resusitá? Pablo a bisa bon kla ku esei lo a tuma lugá den futuro; no mesora despues ku nan muri. Tempu ku Pablo a skirbi 1 Korintionan, algun disipel—manera Apòstel Santiago—ya “a bai sosegá” den morto. (Echo. 12:1, 2) I ku tempu, esei lo a sosodé tambe ku otro apòstel i kristian ungí.—1 Kor. 15:6.

13. Kiko lo pasa durante Hesus su presensia?

¹³ Tantu Hesus komo Pablo a profetisá  di e presensia di Kristu, un periodo masha importante ku ta ser karakterisá ku guera, temblor, pèst i vários otro kos malu rònt mundu. E profesia ei, ku ta kumpliendo desde 1914, tin un parti importante. Hesus a bisa ku e bon notisia di e Reino lo ser prediká “den henter e tera habitá, komo testimonio pa tur nashon, anto e fin lo yega.” (Mat. 24:3, 7-14) Pablo a bisa ku durante “e presensia di Señor,” e kristiannan ungí ku “a bai sosegá” den morto lo resusitá den shelu.—1 Tes. 4:14-16; 1 Kor. 15:23.

14. Kiko lo pasa ku e kristiannan ungí ku muri durante e presensia di Kristu?

¹⁴ Awendia, e kristiannan ungí ku muri lo resusitá inmediatamente den shelu. Pablo a konfirmá esei na 1 Korintionan 15:51 i 52: “Nos tur lo no bai drumi den morto, ma nos tur lo ser kambiá, den un momento, den un fregá di wowo, durante e último tròmpèt.” E palabranan ei di Pablo ta kumpliendo aworakí! Unabes ku e rumannan ei di Kristu resusitá, nan goso lo ta kompleto; nan “lo ta semper huntu ku Señor.”—1 Tes. 4:17.

15. Ki trabou e kristiannan ungí resusitá lo hasi den shelu?

¹⁵ Beibel ta bisa nos ki trabou e kristiannan ungí resusitá lo hasi den shelu. Hesus a bisa nan: “Esun ku sali viktorioso i kumpli te na fin ku loke mi a manda lo mi duna outoridat riba e nashonnan, e mesun outoridat ku mi a risibí di mi Tata. I e persona ei lo goberná e pueblo ku un bara di heru di manera ku nan lo ser destruí na pida pida meskos ku pòchi di klei.” (Rev. 2:26, 27) Nan lo sigui nan  Lider, Hesus, i lo goberná e nashonnan ku bara di heru.—Rev. 19:11-15.

16. Kon miónes di hende lo haña viktoria riba morto?

¹⁶ Sin duda, e ungínan lo haña viktoria riba morto. (1 Kor. 15:54-57) Nan resurekshon lo permití nan yuda kita tur maldat durante e binidero guera di Armagedon. Miónes di otro kristian lo “sobrebibí e tribulashon grandi” i lo drenta e mundu nobo. (Rev. 7:14) E sobrebibientenan ei lo mira ku nan propio wowo un otro viktoria riba morto: resurekshon di míles di miónes di hende ku a muri den pasado. Esta un momento felis esei lo ta! (Echo. 24:15) I tur esnan ku ta kompletamente leal na Yehova tambe lo haña viktoria riba morto heredá for di Adam, i nan por biba pa semper.

17. Kiko 1 Korintionan 15:58 ta animá nos pa hasi?

¹⁷ Tur kristian ku ta na bida awor mester ta masha gradisidu pa e palabranan di konsuelo tokante resurekshon ku Pablo a skirbi na e korintionan. Nos tin bon motibu pa obedesé e konseho di Pablo pa hasi mas “den e trabou di Señor.” (Lesa 1 Korintionan 15:58.) Si nos ta leal i ta hasi tur loke nos por den e trabou ei, nos lo tin speransa di un bida felis den futuro. Un bida muchu mas maravioso ku nos por imaginá. E ora ei, nos lo mira ku nos trabou duru en konekshon ku Señor no tabata enbano.