1-2. Mukunda natshi gufuzummuga ha guya mujinga mu dilu gudi mutadila Aklisto agasue?

ATHU avula adi mukombelela Yehowa mangino, ana khala nu felela dia gujinga mayilago ha mavu. Uvi Aklisto azonda anyi ambiwe maji mu nyuma anakhala nu felela dia gufuzumuga ha gujinga mu dilu. Aklisto anyi adi nu felela dia gujinga mu dilu ana gukamba gujiya luholo lujingu luawo mbalukhala mu dilu. Uvi Aklisto anyi adi nu felela dia gujinga ha mavu ana kamba gujiya itshi? Gifua luholo tuza guyimona, gufuzumuga ha guya mujinga mu dilu mbagubatela athu anyi adi nu felela dia gujinga mayilago ha mavu gubonga. Ikhale felela dietu didi dia gujinga mu dilu nga ha mavu, gufuzumuga ha guya mujinga mu dilu gudi gututadila.

² Nyuma ya Nzambi yakuatesele alandudi a Yesu a mu siekle ya thomo ha gusonega felela diatadila gufuzumuga ha guya mujinga mu dilu. Mupostolo Yone wazuelele egi: ‘Tudi ana Nzambi luenyelu, uvi khenji atuwambelago luholo mbatukhala. Tudi mujiya egi tangua Klisto mbaamonega mbatukhala gifua muene.’ (1 Yone 3:2) Hene, Aklisto anyi ambiwe maji mu nyuma anago gujiya gula mbaakhala luholo lutshi tangua mbaafuzumuga ha guya mu dilu nu muila wa mu nyuma. Uvi mbaamona Yehowa tangua mbaaheta gishimbigo giawo. Biblia ishigo gutuwambela ndaga jiagasue jiatadila gufuzumuga ha guya mu dilu, uvi mupostolo Phaula wazuelele ndaga jiazonda jiatadila ndaga yene. Aklisto ambiwe maji mu nyuma mbaakhala nu Klisto ‘tangua muene mbaashiya ufumu wagasue,  uhinyinyi wagasue nu ngolo jiagasue.’ Ikhale ‘mbalagaji wa gisugishilo gufua’, mbagukatudiwa. Hangima Yesu nu athu agasue mbaahinyina nenji, mbaadibulumuna hakhawo gudi Yehowa. (1 Kol. 15:24-28) Mbadikhala diago tangua diabonga! *

3. Luholo 1 Kolinto 15:30-32 idi guyimonesa gutshigina gua Phaula gua taditala gufuzumuga gua mukuatesele ha gukalagala itshi?

³ Felela dia gufuzumuga dia Phaula dia mukuatesele ha gukolesela mu malamba avula. (Tanga 1 Kolinto 15:30-32.) Wawambelele enya gu Kolinto egi: ‘Gufua gudi mungubandemena lusugu nu lusugu.’ Wasonegele luko egi: ‘Ngaluile gu Efeso nu shitu jia mu foto.’ Yajiya gukhala egi waluile diago nu shitu mu stade gu dimbo dia Efeso. (2 Kol. 1:8; 4:10; 11:23) Nga ndo wakhalele muzuelela umbalagaji wa enya Yuda anyi akhalele gifua ‘shitu jia mu foto.’ (Makal. 19:26-34; 1 Kol. 16:9) Phaula wataganele nu ingoza yakola, uvi wakhalele nu gutshigina egi mbawuheta gusuangulaga mu masugu adi muza.—2 Kol. 4:16-18.

4. Luholo lutshi felela dia gufuzumuga diana hana Aklisto gikhesa mangino? (Tala gifuanesa holu dia gizula.)

⁴ Tudi mujinga mu matangua abola. Aphangi etu ako adi mukalegewa ndaga mu luholo luabola. Ako adi mujinga mu mafundo adi muluiwa ita nu ashigo mu ubambi. Aphangi ako adi mukalegela Yehowa mu ifutshi yinyi mudimo wetu wana tunyishiwa nu adi muhaga lujingu luawo mu gingonza ha gukalegela Yehowa. Uvi aphangi awa a mala nu a akhetu adi mulandula gukalegela Yehowa mudimo nu adi gifezegeselo giabonga mukunda nu esue. Ashigo nu woma handaga adi mujiya egi ngatshima afua mangino, Yehowa waalahele ndaga imoshi yabonga mu masugu adi muza.

5. Matangi atshi abola ajiya gubolesa gutshigina guetu mu ndaga yatadila gufuzumuga?

⁵ Phaula wawambelele aphangi’enji ha gutuna matangi abola akhalele nawo athu ako egi: “Gula athu a gufua mbaafuzumugago, ‘tudienu nu tunuenu handaga gufua gudi guene.’” Matangi a luholo elu asendesele gale mualeha ikhale gutuama egi Phaula avualewe. Yajiya gukhala egi wakhalele muzuelela ndaga jidi mu Yeshaya 22:13, idi muzuelela khadilo dia enya Isalele. Ha fundo dia gusala ya gujinginyina gudi Nzambi, akhalele musuanguluga gawo nu lujingu (monyo). Khadilo diabola dia enya Isalele diakhelele gifua khadilo didi nu athu avula mangino, anyi anazuela egi “diagaye gufua gudi guene.” Biblia idi muzuela egi khadilo diabola dia enya Isalele diaabatele malamba avula.—2 Gudi. 36:15-20.

6. Luholo lutshi felela dia gufuzumuga diajiya gutukuatesa ha gutomba mafuta abonga?

⁶ Gula tudi nu gutshigina egi Yehowa mbawufuzumuna athu gu gufua, mbayitukuatesa ha gutomba mafuta abonga. Aphangi a gu Kolinto akhalele naye gutuna gukhuata ufuta nu athu anyi akhalele mutuna egi gufuzumuga mbagukhadigo guene. Edi longo dia ndando diago mukunda nu esue mangino: Gula tudi mukhuata ufuta nu athu ashigo mujiya ndaga mbajibua mu masugu adi muza nu adi mutala phamba ndaga jia mangino, ene ajiya gubolesa makalegelo etu. Gula Muklisto wa giamatshidia udi mubalegesa tangua nu athu a luholo elu, wajiya gubolesa makalegelo enji abonga. Luko, mafuta ene ajiya gumutuma ha gukalagala ndaga jiana tuna Nzambi. Uvi Phaula wazuelele egi: ‘Vutugilenu matangi abonga mu nduedi mukalagalago gubola.’—1 Kol. 15:33, 34.

7. Luholo 1 Kolinto 15:35-38 Idi guyimonesa, muhu utshi watadila gufuzumuga athu avula ajiya gudihula?

⁷ Tanga 1 Kolinto 15:35-38. Athu anyi ana tuna egi gufuzumuga mbagukhadigo guene ajiya gudihula egi: “Luholo lutshi athu agufua mbaafuzumuga?” Tutadilenu mvutu yahanele mupostolo Phaula handaga athu avula mangino ana khala nu matangi a gudisha mukunda nu ndaga jiana balega gungima dia gufua. Uvi itshi Biblia idi mulongesa?

8. Gifezegeselo gitshi giajiya gutukuatesa ha gukotelesa gufuzumuga ha guya mu dilu?

⁸ Gula muthu wafua, muila wenji wanabola. Uvi muthu wafugile ima yagasue, wajiya gumufuzumuna nu muila wabonga. (Gis. 1:1; 2:7) Phaula wakalegele gifezegeselo ha gumonesa egi Nzambi ashigo nu funu ya gufuzumuna muthu nu muila unu muthu muene afuile nawo. Tangiza gale “lumbale lua mutshi.” Tangua lumbale luana kunyiwa, luana sendesa guzoga gungima luana gubua mutshi. Mutshi wene wana khala diago wa gudisha nu lumbale luazonda luakunyiwe. Phaula wakalegele gifezegeselo egi ha gumonesa egi Mufugi wetu wajiya gufuzumuna muthu nu ‘muila udi gumusuanguluisa.’

9. Ndaga itshi 1 Kolinto 15:39-41 idi muzuela mu ndaga yatadila mila ya gudisha?

⁹ Tanga 1 Kolinto 15:39-41. Phaula wamonesele egi Nzambi wafugilego mila yagasue mu luholo lumoshi. Ha gufezegesa, muila wa ngombe, wa tunjila nu wa jishui wakhalago luholo lumoshi. Wazuelele egi tuana mona gudisha guana khala mu dilu mukatshi dia tangua nu ngonda. Wazuelele luko egi “themua jiagasue jiakhalago nu lutumbu lua luholo lumoshi.” Ngatshima tuajiyilego gumona gudisha guene nu meso etu, uvi enya ndunge anazuela egi themua jiakhala mu maluholo avula a gudisha. Jiko jiakhala jiakoma, jiko jiazonda, jiko jiabenga, jiko jia phelegeta, jiko jia jaune gifua kumbi dietu. Phaula wazuelele nji egi “guakhala nu muila wa mu dilu nu muila wa ha mavu.” Yakotelesa itshi? Yakotelesa egi ha mavu tuana khala nu muila wa umuthu, uvi  mu dilu anakhala nu muila wa mu nyuma gifua unu anjelo akhala nawo.

10. Athu anyi mbaafuzumuga ha guya mu dilu mbaakhala nu muila wa luholo lutshi?

¹⁰ Phaula wazuelele luko gungima egi: ‘Idi luholo lumoshi nu gufuzumuga gua athu a gufua. Muila udi mufundiwa udi unu wanabola; udi mufuzumuiwa udi unu wanago gubola.’ Gula muthu wafua, muila wenji wanabola nu wana gubua fuluguta dia mavu. (Gis. 3:19) Luholo lutshi muila wene wajiya gubua muila udi ‘mufuzumuiwa unu wanago gubola’? Phaula wakhalelego muzuelela athu anyi afuzumuiwe ha gujinga ha mavu gifua anyi afuzumuiwe gudi Eliya, Elisha, nu Yesu. Uvi, wakhalele muzuelela athu mbaafuzumuga nu muila wa mu dilu. Yakotelesa egi ‘muila wa mu nyuma.’—1 Kol. 15:42-44.

11-12. Usombegeshi utshi wakalegele Yesu ha fuzumugine muene? Luholo lutshi Aklisto ambiwe maji mu nyuma akalegele nji usombeshi wa luholo lumoshi?

¹¹ Tangua Yesu wakhalele ha mavu, wakhalele nu muila wa umuthu uvi ha fuzumugile muene, ‘wabuile nyuma idi muhana monyo.’ Luholo lumoshi nji Aklisto ambiwe maji mu nyuma ana fuzumuga nu muila wa mu dilu. Phaula wazuelele luko egi: ‘Gifua luholo tuadifuanene nu muthu wafugiwe nu fuluguta dia mavu, mbatudifuana nji nu muthu wa mu dilu.’—1 Kol. 15:45-49.

¹² Phaula wakhalele muzuelela ndaga ya ndando yatadila gufuzumuga. Ndaga ya ndando idi egi Yesu afuzumugilego nu muila wa umuthu. Ha hetele Phaula gu gisugishilo gia mudimo wenji wazuelele egi: ‘Mahatshi nu meya ajiyilego gungina mu Ufumu wa Nzambi’ mu dilu. (1 Kol. 15:50) Apostolo nu Aklisto ako ambiwe maji mu nyuma akhalelego naye gufuzumuga ha guya mu dilu nu muila udi nu mahatshi nu meya. Tangua ditshi akhalele naye gufuzumuga? Phaula wazuelele egi akhalelego naye gufuzumuga mu tangua dienji uvi mu masugu adi muza. Tangua Phaula wakhalele musonega mukanda wa 1 Kolinto, alandudi ako akhalele ‘afuile gale’ gifua mupostolo Yakoba. (Makal. 12:1, 2) Apostolo  ako nu Aklisto ambiwe maji mu nyuma ‘afuile’ nji gungima. —1 Kol. 15:6.

13. Ndaga jitshi mbayikalegewa mu sungi ya “gukhala” gua Yesu?

¹³ Yesu nu Phaula azuelele ndaga imoshi ya ndando yakhalele naye gukalegewa mu sungi ya gukhala gua Klisto. Sungi yene yakhalele naye gusendesa nu ita, gudigita gua mavu nu ba   épidémie nu ndaga jiko jiabola jidi mukalegewa ha mavu. Profesi eyi ya Bilbia yasendesele gutagana mu 1914. Guakhalele nji nu gijiyishilo giko gia ndando. Yesu wazuelele egi lukuma luabonga ludi muzuela egi Ufumu wa Nzambi mbawuhinyina, mbawulongesewa ha mavu agasue gifua ulondolodi gudi ‘ifutshi yagasue, gungima gisugishilo mbagiza.’ (Mat. 24:3, 7-14) Phaula wamonesele nji egi Aklisto ambiwe maji mu nyuma anyi ‘afuile gale’ mbaafuzumuga gu gufua mu sungi ya ‘gukhala gua Fumu.’—1 Tes. 4:14-16; 1 Kol. 15:23.

14. Ndaga itshi yana gubua gula Aklisto ambiwe maji mu nyuma afua mu sungi eyi ya gukhala gua Klisto?

¹⁴ Mangino Aklisto ambiwe maji mu nyuma, gula afua, anafuzumuga giphungu gimoshi ha guya mu jinga mu dilu. Ndaga yene idi mu mbimbi jiazuelele Phaula mu 1 Kolinto 15:51, 52 egi: ‘Mbatufuigo mukuta wetu agasue, uvi mbatusombegesa mbala imoshi mu gukamuna gua meso tangua phungi ya gisugishilo mbayidila.’ Mbimbi eji jia Phaula jidi mutagenesewa diago mangino! Tangua aphangi a Klisto ana fuzumuga, ana khala nu gusuanguluga guavula handaga mbaakhala ‘tangua diagasue nu Fumu.’—1 Tes. 4:17.

15. Mudimo utshi udi munengena athu mbasombegesa mu “gukamuna gua meso”?

¹⁵ Biblia idi gutuwambela mudimo wana kalagala athu anyi asombegesewe mu “gukamuna  gua meso” mu dilu. Yesu waawambelele egi: ‘Muthu munu mbawubinga nu mbawulandula midimo yami uu nu gugisugishilo, mbangumuhua uhinyinyi holu dia ifutshi. Muene mbawuhinyina nu muhango wa utadi, ngenyi ene mbamuangana gifua nzungu jialondewe nu mavu luholo ame nji ngahetele uhinyinyi gudi Sh’ami.’ (Yat. 2:26, 27) Mbaalandula Yesu nu mbahinyina ifutshi nu muhango wa utadi.—Yat. 19:11-15.

16. Luholo lutshi athu avula mbaabinga gufua?

¹⁶ Yadiago, Aklisto ambiwe maji mu nyuma mbaabinga gufua. (1 Kol. 15:54-57) Gufuzumuga guawo mbaguakhuatesa ha gubinga athu agasue abola ha mavu mu ita ya Alemagedona. Ba milio a Aklisto ako a mala nu akhetu mbazoga ‘mu lamba diakola’ nu mbajinga mu mavu ahe-ahe. (Yat. 7:14) Athu anyi mbaangina mu mavu ahe-ahe mbaamona luko luholo athu avula anyi afuile gale mbafuzumuga. Tangiza gusuanguluaga mbatukhala nago tangua mbatubinga gufua! (Makal. 24:15) Athu agasue adi musala a gujinginyina gudi Yehowa mbabinga balagaji wakoma gufua gunu guatubatelele Adama. Mbaajinga mayilago.

17. Ha gutadila 1 Kolinto 15:58 ndaga itshi tudi naye gukalagala?

¹⁷ Aklisto agasue adi nu monyo mangino, adi naye guhana mersi mukunda nu ndaga Phaula wasonegele enya gu Kolinto jidi muzuelela gufuzumuga. Tudi nu ndaga jiavula jidi gututuma ha gutumagela longo dia Phaula dia gukalagala yagasue tuajiya gukalagala ‘mu mudimo wa Fumu.’ (Tanga 1 Kolinto15:58.) Gula tudi mutshita mudimo wene nu gujinginyina guagasue, tuajiya gumona masugu adi muza nu gusuanguluga guagasue. Masugu ene adi muza, mbaakhala abonga diago gubalega ndaga yagasue tuajiya gutangiza. Mbayimonesa diago egi mudimo tuakalegele mukunda nu Fumu, wakhalelego wa githuhu.