1-2. Why nao evri Christian shud interest for savve abaotem resurrection lo heven?

STAKA pipol wea servem Jehovah distaem, olketa garem hope for laef olowe lo earth. Bat samfala anointed Christian stap yet distaem and olketa garem hope for laef lo heven. Olketa anointed wan hia barava interest for savve hao nao bae laef blo olketa lo future. Bat, waswe lo olketa wea garem hope for laef lo earth? Olsem bae iumi lukim, datfala resurrection wea bae kamap lo heven, bae mekem staka blessing for olketa wea bae laef olowe lo disfala earth. So nomata iumi garem hope for go lo heven or stap lo earth, iumi interest lo datfala resurrection lo heven.

² God iusim holy spirit blo hem for helpem samfala disaepol blo Jesus lo first century for raet abaotem hope for go lo heven. Aposol John sei olsem: “Distaem iumi olketa pikinini bilong God, bat hem no showimaot long iumi yet evri samting abaotem laef bilong iumi long future. Iumi savve finis, taem hem showaot iumi bae olsem hem.” (1 John 3:2) So olketa anointed Christian no savve hao nao laef blo olketa taem olketa resurrect lo heven and garem spirit body. Bat, olketa bae barava lukim Jehovah taem olketa kasem reward blo olketa. Bible no storyim evri information abaotem resurrection lo heven, bat aposol Paul storyim samfala information abaotem datwan. Olketa anointed bae stap witim Christ taem hem bae “finisim evri gavman and olketa wea garem paoa.” And tu, bae hem ‘finisim datfala last enemy wea hem nao dae.’ Then, Jesus and olketa wea rul witim hem, bae putim olketa seleva and  evri samting anda lo Jehovah. (1 Cor. 15:24-28) Datwan hem wanfala nambawan taem! *

3. Olsem 1 Corinth 15:30-32 storyim, biliv blo Paul lo resurrection helpem hem for duim wanem?

³ Biliv blo Paul lo resurrection helpem hem for winim staka hard taem. (Readim 1 Corinth 15:30-32.) Hem talem olketa lo Corinth: “Evriday mi klosap dae,” and tu, “mi faet witim olketa wild animal long Ephesus.” Maet Paul story abaotem hem faet witim olketa real animal lo stadium lo Ephesus. (2 Cor. 1:8; 4:10; 11:23) Or maet hem minim nomoa olketa Jew and olketa narawan wea wei blo olketa olsem “wild animal.” (Acts 19:26-34; 1 Cor. 16:9) Paul feisim staka danger. Nomata olsem, hem barava bilivim hao hem bae garem hapi future.—2 Cor. 4:16-18.

4. Hao nao hope for resurrection hem strongim olketa Christian distaem? (Lukim piksa lo kava.)

⁴ Iumi stap lo olketa taem wea danger tumas. Samfala lo olketa brata blo iumi kasem hard taem bikos olketa criminal spoelem olketa. Samfala olketa stap lo olketa kantri wea war kamap and olketa no sef. And tu, samfala olketa servem Jehovah lo olketa kantri wea olketa restrictim preaching waka or olketa banim, nomata datwan mekem olketa maet lusim laef blo olketa or freedom wea olketa garem. Nomata olsem, olketa brata and sista hia gohed for worshipim Jehovah. Datwan hem nambawan example for iumi. Olketa feel sef bikos olketa savve nomata olketa lusim laef blo olketa distaem, Jehovah bae hem givim samting wea winim datwan lo future.

5. Wanem dangerous tingting nao savve spoelem faith blo iumi lo resurrection?

⁵ Paul warnim olketa brata blo hem abaotem wanfala tingting wea danger tumas wea samfala garem. Hem sei: “Sapos olketa wea dae finis bae no laef bak, ‘iumi kaikai and drink nomoa bikos tumoro bae iumi dae.’” Datkaen tingting hem stap bifor lo taem blo Paul. Paul maet quotem toktok wea stap lo Aesaea 22:13, wea storyim tingting blo olketa Israelite. Winim wei wea olketa shud fren klos witim God, olketa laek for aftarem nomoa samting wea olketa seleva laekem. Really, olketa garem kaen tingting olsem, “Faetem tuday nomoa, bikos tumoro bae iumi dae.” Kaen tingting olsem hem big tumas distaem. Bat Bible storyim nogud samting wea kasem olketa Israelite from olketa garem kaen tingting olsem.—Mektu Kronikols 36:15-20.

6. Hao nao resurrection hope shud affectim hu iumi chus for associate witim?

⁶ From iumi savve dat Jehovah bae resurrectim olketa wea dae, datwan shud affectim hu nao iumi shud associate witim. Olketa brata lo Corinth need for careful lo wei for associate witim olketa wea no bilivim resurrection. Datwan hem wanfala leson for iumi distaem. Iumi bae no kasem eni gud samting sapos iumi chus for associate evritaem witim olketa wea garem tingting for enjoyim nomoa laef distaem. Wei for associate witim kaen pipol wea garem wei olsem bae spoelem tingting and wei blo wanfala tru Christian. And hem maet leadim iumi for garem olketa nogud wei wea God heitim, wea hem nao for duim sin. Dastawe, Paul hem barava encouragem iumi olsem: “Garem gudfala tingting and duim samting wea stret and no gohed for duim sin.”—1 Cor. 15:33, 34.

7. Olsem 1 Corinth 15:35-38 storyim, wanem kwestin nao maet samfala pipol askem?

⁷ Readim 1 Corinth 15:35-38. Samwan wea daotem resurrection maet ask olsem: “Hao  nao olketa wea dae bae laef bak?” Hem gud for iumi tingim wanem Paul talem bikos staka pipol distaem garem olketa difren idea abaotem laef bihaen man dae. Bat wanem nao Bible teachim?

8. Wanem tokpiksa nao savve helpem iumi for minim resurrection lo heven?

⁸ Taem samwan hem dae, body blo hem rotten. Bat Man wea creatim universe savve resurrectim datfala man and givim wanfala body wea fitim hem. (Jenesis 1:1; 2:7) Paul iusim wanfala tokpiksa for showimaot dat God bae no need for givim bak moa datfala sem body wea hem garem bifor hem dae. Tingim wanfala “seed bilong wheat or eni nara seed.” Datfala seed blo wheat olketa plantim lo graon and hem grow and hem kamap wanfala niu plant. Datfala plant hem barava luk difren from datfala smol seed wea olketa plantim. Paul iusim disfala tokpiksa for showim dat Creator hem savve givim wanfala body fitim wanem hem tingim.

9. Olsem 1 Corinth 15:39-41 storyim, wanem nao hem talem abaotem olketa difren kaen body?

⁹ Readim 1 Corinth 15:39-41. Paul storyim hao God creatim staka difren samting. Olsem example, staka difren kaen body hem stap. Olsem body blo buluka, olketa bird, and fish. Hem storyim hao lo skae tu iumi savve lukim sun hem difren from moon. And hem storyim tu “evri star olketa no semsem.” Hem tru, maet hem hard for iumi luksavve witim eye blo iumi hao olketa star difren, bat olketa scientist sei olketa star olketa difren. Olketa kolem olketa star hia lo red giant star, white dwarf, and yellow star, olsem sun blo iumi. Paul hem sei tu “body bilong olketa long heven hem difren, and body bilong olketa long earth hem difren.” Lo wanem wei? Lo earth iumi garem physical body, bat lo heven olketa garem spirit body olsem olketa angel.

10. Wanem kaen body nao olketa wea resurrect lo heven bae garem?

¹⁰ Lukim wanem Paul storyim moa. Hem sei: “Olketa wea laef bak bae olsem tu. Body  wea dae hem savve rotten bat body wea laef bak hem no savve rotten.” Hem tru, taem man hem dae, body hem rotten and go bak insaed lo graon. (Jenesis 3:19) So hao nao wanfala body hem savve “laef bak and no savve rotten”? Paul hem no story abaotem olketa wea resurrect lo earth, olsem olketa wea Elijah, Elisha, and Jesus resurrectim. Paul hem minim samwan wea resurrect witim wanfala body wea bae stap lo heven, wea datwan hem “wanfala spirit body.”—1 Cor. 15:42-44.

11-12. Wanem change nao Jesus kasem taem hem resurrect, and hao nao olketa anointed kasem semkaen change tu?

¹¹ Taem Jesus stap lo earth, hem garem wanfala physical body. Bat taem hem resurrect, hem kamap “wanfala spirit wea givim laef,” and hem go bak lo heven. Olsem tu, olketa anointed Christian bae resurrect and garem spirit body. Paul hem sei: “Iumi semsem olsem disfala man wea God wakem from graon, so bae iumi semsem olsem datfala man wea go long heven tu.”—1 Cor. 15:45-49.

¹² Paul hem klosap kasem end lo story blo hem abaotem resurrection. Wanfala important samting for tingim nao, Jesus hem no resurrect witim wanfala physical body. Paul hem tok stret and sei: “Body bilong man no savve kasem Kingdom bilong God” lo heven. (1 Cor. 15:50) Olketa aposol and olketa nara anointed wan bae resurrect lo heven bat no witim olketa body wea savve rotten. Wanem taem nao olketa bae resurrect? Paul strongim hao datfala resurrection bae hem no happen stretawe bihaen olketa dae. Taem wea Paul raetem 1 Corinth, samfala lo olketa aposol olketa dae finis, olsem example, wanfala hem aposol James. (Acts 12:1, 2) Olketa nara aposol and olketa anointed wan bae gogo olketa dae tu.—1 Cor. 15:6.

13. Olketa wanem samting nao bae happen lo taem wea Christ bae stap?

¹³ Jesus and Paul, tufala evriwan storyim wanfala important taem lo history, hem nao  taem wea Christ bae stap. Olketa samting wea showimaot datwan nao hem olketa war, earthquake, olketa difren kaen sik, and olketa nara nogud samting wea gohed for happen. Iumi lukim disfala Bible profesi gohed fulfill start kam lo 1914. Wanfala important samting tu hem part blo datfala saen. Jesus sei datfala gud nius blo Kingdom bae olketa preachim lo “evri ples long world mekem pipol long evri kantri mas herem. Bihaen datwan nao, world bae finis.” (Matt. 24:3, 7-14) Paul hem showimaot hao datfala taem wea Lord hem stap, hem nao semtaem wea olketa anointed wan wea dae finis bae resurrect.—1 Thess. 4:14-16; 1 Cor. 15:23.

14. Wanem nao bae happen lo olketa anointed Christian wea dae lo taem wea Christ hem stap?

¹⁴ Olketa anointed wan wea dae distaem bae stretawe resurrect and go lo heven. Paul hem talem diswan lo 1 Corinth 15:51, 52 wea sei: “No evriwan long iumi wea dae bae gohed for stap olsem, bat iumi evriwan bae change kwiktaem nomoa, olsem taem eye hem sat and open moa. Diswan bae happen long taem wea datfala last trumpet hem krae.” Olketa toktok blo Paul hia hem gohed for fulfill distaem lo taem wea olketa brata blo Christ hia olketa resurrect lo heven and bae olketa barava hapi for “stap witim Lord for olowe.”—1 Thess. 4:17.

15. Wanem waka nao hem stap for olketa wea change olsem taem wea “eye hem sat and open moa”?

¹⁵ Bible hem sei olketa wea change “olsem eye hem sat and open moa” bae garem waka for duim lo heven. Jesus hem sei lo olketa: “Man wea win and wea duim olketa samting wea mi talem go kasem end, bae mi givim hem paoa ovarem pipol long world, olsem paoa wea Dadi bilong mi givim long mi. Datfala man bae iusim wanfala iron stik for rulim  olketa pipol. Hem bae finisim olketa and bae olketa olsem clay pot wea barava pisis nao.” (Rev. 2:26, 27) Olketa bae waka witim Komanda blo olketa for shepherdim olketa nation witim wanfala iron stik.—Rev. 19:11-15.

16. Hao nao dae bae no garem paoa for winim olketa man?

¹⁶ Hem klia, hao paoa blo dae bae no winim olketa anointed wan. (1 Cor. 15:54-57) Taem olketa resurrect, olketa bae share lo disfala waka for finisim olketa nogud samting lo taem blo datfala war blo Armageddon. Staka million Christian man and woman wea no dae lo datfala big trabol bae go insaed lo niu world. (Rev. 7:14) Olketa wea no dae lo datfala big trabol bae lukim nara samting moa wea showimaot dae no garem paoa. Hem nao taem wea staka billion pipol wea dae longtaem finis bae resurrect. Tingim hapi blo evriwan lo datfala taem! (Acts 24:15) And olketa wea showimaot olketa barava faithful lo Jehovah bae paoa blo dae no winim olketa. Olketa bae fit for laef olowe.

17. Taem iumi tingim 1 Corinth 15:58, wanem nao iumi shud duim distaem?

¹⁷ Evri Christian distaem shud tinghae lo datfala toktok wea Paul raetem for olketa lo Corinth wea savve strongim biliv blo iumi lo resurrection. Iumi garem olketa gudfala reason for followim datfala encouragement blo Paul for gohed busy lo “waka blo Lord.” (Readim 1 Corinth 15:58.) Sapos iumi faithful and gohed for share lo datfala waka, iumi bae luk forward for barava enjoyim datfala laef lo future. Datfala future hem barava nambawan winim wanem iumi savve tingim. Lo datfala taem bae iumi pruvim hao iumi no hard waka nating taem iumi duim waka blo Lord.