1, 2. ¿Imaraykun Diosta serviqkuna janaq pachapi kausarimpuymanta yachananku?

DIOSTA llapa serviqkunaqa astawanmi yachayta munanchis janaq pachapi kausarimpuy kananmanta. Astawanqa kay pachapi kashaq ajllasqa cristianokunan chaymantaqa yachayta munanku. Ichaqa, ¿iman pasanqa kay pachapi kausarimpuqkunawan? Paykunaqa sumaq bendicionkunatan chaskinqaku janaq pachapi kausarimpuy kasqanrayku.

² Jehová Diosmi Jesuspa wakin qatikuqninkunaman yuyaychaspa qelqachiran imayna janaq pachapi kausarimpuy kananmanta. Apóstol Juanmi niran: “Noqanchisqa Diospa wawankunaña kanchis chaypas, manan yachanchisraqchu imaynapunichus kasun chaytaqa. Ichaqa yachakunñan pay rijurimuqtinqa pay jina kananchista”, nispa (1 Juan 3:2). Janaq pachapaq ajllasqa cristianokunaqa manan yachankuchu imaynachus janaq pachapi espíritu jina kausaytaqa. Ichaqa yachankun janaq pachapi kausarichisqa kaspa Jehová Diosta rikunankuta. Bibliaqa wakillanmantan willan janaq pachapi kausarimpuymantaqa. Chaymi apóstol Pabloqa willaran ajllasqa cristianokuna Jesuswan kuska kanqaku “llapa gobiernokunata, llapa autoridadkunata, llapa atiyniyoq kaqkunata”, ‘último kaq enemigonchis wañuytapas’ ch’usaqyachishaqtin. Chay  qhepamanmi Jesús llapa ajllasqa cristianokuna kay pachapi tiyaqkuna ima Jehová Diospa ñaupanpi k’umuykunqaku (1 Cor. 15:24-28). ¡Chayqa may kusikunapaqmi kanqa riki! *

3. 1 Corintios 15:30-32 nisqan jina, ¿imaynatan kausarimpuypi iñisqan Pablota yanaparan?

³ Pablotaqa kausarimpuypi iñisqanmi yanaparan sasachakuykunata aguantananpaq (leey 1 Corintios 15:30-32). Chaymi Corinto iñiqmasikunata niran: “Sapa p’unchaymi wañuy patapi rikukushani”, nispa. Nillarantaqmi: ‘Éfeso llaqtapipas juj runakuna jina salqa animalkunawan maqanakurani’, nispa. Yaqapaschá cheqaqtapuni salqa animalkunawan maqanakunman karan (2 Cor. 1:8; 4:10; 11:23). Otaq judío runakuna, enemigonkunapas pay contra jatarisqankurayku salqa animalkuna jina kankuman karan (Hech. 19:26-34; 1 Cor. 16:9). Chhaynapiña tarikuran chaypas mana manchakuspan Pabloqa chay sasachakuykunata aguantaran (2 Cor. 4:16-18).

4. ¿Imaynatan kausarimpuypi suyakuy kay tiempopi Jehová Diosta serviqkunata kallpachashan? (Qhaway tapanpi kaq fotota.)

⁴ Noqanchispas sasa tiempokunapin kausashanchis. Chaymi wakin iñiqmasinchiskunaqa sasachakuykunapi tarikunku. Wakintaq guerrakunaq kasqan ladokunapi tiyanku. Chaymantapas juj llaqtakunapin Diosmanta willayninchis jark’asqa kashan, chhaynaña kashan chaypas iñiqmasinchiskunaqa Jehová Diosmantan mana manchakuspa willashallanku. Chaymi noqanchistaqa mayta kallpachawanchis. Imapiña tarikunku chaypas wañuy patapiña tarikunku chaypas manan manchakunkuchu, yachankun jamuq tiempopi Jehová Dios kausarichimpunanta.

5. ¿Imayna piensaymi kausarimpuypi iñisqanchista pisiyachinman?

⁵ Pabloqa sut’itan niran wakin cristianokunaq mana allin yuyaykusqankumanta cuidakunankupaq, paykunan niqku: “Manataq wañusqakuna kausarichisqachu kanqaku chayqa, [...] mijusunchis, ujasunchis, paqarinmi wañupusun”, nispa. Chhayna piensayqa unay watakunamantañan karan. Yaqapaschá Pabloqa Isaías 22:13 textomanta rimashanman karan, chaypin willashan imaynatachus Israel runakuna Diosta servinankumantaqa kusirikuykunallapi kasqankuta. Kay tiempopi jinan Israel runakunapas niranku: “Kusirikusun, manan yachanchischu paqarin kausasunchus manachus chayta”, nispa. Chayraykun Israel llaqtaqa mana allinkunapi tarikuran (2 Crón. 36:15-20).

6. ¿Imaynatan yanapawasun kausarimpuypi iñisqanchis mana allin amigokunawan ama juñukunanchispaq?

⁶ Kausarimpuypi iñiymi yanapawasun allin amigokunayoq kananchispaq. Corinto iñiqmasikunaqa manan juñukunankuchu karan mana kausarimpuypi iñiqkunawanqa. ¿Imatan chaymanta yachasunman? Sichus kunan tiempo kusirikuykunallapi piensaq runakunawan juñukusun chayqa, mana allinkunapin tarikusun. Paykunawan juñukuspaqa allin ruwayninchiskunatan saqepusunman. Chaymi tanqawasunman Diospa cheqnikusqan ruwaykunata ruwananchispaq. Chayraykun Pabloqa kayta niran: “Chanin kaqta ruwaspa yuyayniykichisman kutiychis, amataq juchapi puriychischu”, nispa (1 Cor. 15:33, 34).

7. 1 Corintios 15:35-38 nisqan jina, ¿imatan wakin runakuna kausarimpuymanta tapuwasunman?

⁷ (Leey 1 Corintios 15:35-38). Kausarimpuymanta iskayachiyta munaq runaqa yaqapaschá kayta tapuwasunman: “¿Imaynatataq wañusqakunari kausarichisqa kanqaku? ¿Imayna cuerpoyoqtaq kausarinqakuri?”, nispa. Chaypaqqa allintan yachananchis Pabloq imaynachus kutichisqanmanta, ¿imarayku? Askha runakunan jujnirayta piensanku wañusqanchis qhepaman imachus pasan chaymanta. Ichaqa, ¿imatan Biblia yachachin?

8. ¿Ima rijch’anachiymi yanapawasun janaq pachapaq kausarimpuymanta allinta yachananchispaq?

⁸ Pipas wañupuspaqa allpamanmi tukupun. Ichaqa kay pachata kamaq Jehová Diosqa atinmi wañupuq runata kausarichiyta imayna cuerpota qoytapas (Gén. 1:1; 2:7). Pabloqa juj rijch’anachiywanmi yachachiran imaynatas janaq pachapi kausarimpuqkunaqa mana kaq cuerpollawanchu kausarichisqa kanqaku chayta. Paymi rimaran ‘juj trigo mujumanta’, chay mujuta allpaman t’akaspaqa q’achu jinan wiñanpun. Chaymi mujuqa mana kaqllachu kapun allpamanta wiñamusqan q’achuwanqa. Chhaynallataqmi janaq pachaman ripuqkunawanpas kanqa.

9. 1 Corintios 15:39-41 nisqan jina, ¿llapa Jehová Diospa kamasqankuna kaq cuerpoyoqchu kanku?

⁹ (Leey 1 Corintios 15:39-41). Apóstol Pablon willaran Diospa ima kamasqanpas mana kaqllachu kasqanta. Chaykunamantan kashan: Uywaq cuerpon, alton phawaq animalkunaq cuerpon, challwakunaq cuerponpas. Chaymantan nillarantaq: “Intiq k’anchayninqa jujniraymi, killaq k’anchayninpas jujniraymi, [...] ch’askakunapas manan llapankuchu igual-llata k’anchanku”, nispa. Manaña llapantachu reparanchis chaypas, ch’askakunamanta yachaq  runakunan khaynata wakin ch’askakunata sutichanku: “Jatun puka ch’askakuna, juch’uy yuraq ch’askakuna, intinchis jina q’ello ch’askakuna”, nispa. Chaymantan Pablo nillarantaq: “Kallantaqmi janaq pachapi cuerpokuna, kay pachapi cuerpokunapas”, nispa. ¿Imaninantan chaywan nisharan? Kay allpapi tiyaqkunaqa aycha cuerpoyoqmi kanchis, janaq pachapi tiyaqkunan ichaqa angelkuna jina espíritu cuerpoyoq kanku.

10. ¿Imayna cuerpoyoqmi janaq pachapaq kausarimpuqkuna kanqaku?

¹⁰ Chaymantan Pabloqa nillarantaq: “Chhaynallataqmi wañusqakunaq kausarimpuyninpas. Ismuq cuerpotan p’ampakun, chaymantataq mana ismuq jatarimpun”, nispa. Arí, juj runa wañupuspaqa allpamanmi tukupun (Gén. 3:19). Chhaynaqa, ¿imaynatan ismusqa cuerpomanta “mana ismuq jatarimpun”? Pabloqa manan kay allpapi imaynatachus Elías, Eliseo, Jesuspas kausarichisqanmantachu rimasharan, aswanpas rimasharan janaq pachapaq “espíritu cuerpo” jina kausarimpuymantan (1 Cor. 15:42-44).

11, 12. ¿Imayna cuerpoyoqmi Jesús kausarimuran, ajllasqa cristianokunapas imayna cuerpoyoqmi kausarinqaku?

¹¹ Jesús kay allpapi kashaspaqa runa jinan aycha cuerpoyoq karan. Kausarimpuspan ichaqa, ‘kausay qoq espíritu kapuran’ jinaspataq janaq pachaman kutipuran. Chay jinallataqmi janaq pachapaq ajllasqa cristianokunapas espíritu jina kausarimpunqaku. Chayraykun apóstol Pabloqa niran: “Imaynan allpamanta ruwasqa runaman rijch’akunchis, chhaynallataqmi janaq pachamanta kaqman rijch’akusunchis”, nispa (1 Cor. 15:45-49).

¹² Manan qonqananchischu espíritu jina Jesús kausarisqantaqa. Apóstol Pabloqa sut’itan janaq pachapaq kausarimpuymanta niran: “Aycha cuerpoqa manan Diospa gobiernonmanqa jaykunmanchu”, nispa  (1 Cor. 15:50). Apostolkunapas wakin ajllasqa cristianokunapas manan janaq pachamanqa aycha-tulluyoqchu rinqaku, chay cuerponkuqa allpamanmi tukupun. Chhaynaqa, ¿jayk’aqmi kausarinqaku? Pablon sut’ita niran mana wañusqanku qhepallamanchu kausarinankuta aswanpas jamuq tiempopi kausarinankumantan. Apóstol Pablo 1 Corintios cartata qelqashaqtinqa wakin apostolkunaqa wañukapurankuñan, chhaynallatataqmi tiempowanqa wakin apostolkunapas ajllasqa cristianokunapas wañukapunanku karan (Hech. 12:1, 2; 1 Cor. 15:6).

13. ¿Imakunan pasanan karan Jesuspa “chayamunan” tiempopi?

¹³ Jesuspas Pablopas ñaupaqmantañan rimaranku Cristoq chayamunan tiempomanta, chay tiempopiqa imaymanakunan pasanan karan guerrakuna, terremotokuna, onqoykuna, jujkunapiwan. Chay ñaupaqmanta willakuykunaqa 1914 watamantapachan kay tiemponchispi junt’akushan, chaymantapas Jesusmi niran: “Diospa gobiernonmanta allin willakuykunan pachantinpi willasqa kanqa llapa nacionkuna yachananpaq, jinan tukukuyqa chayamunqa”, nispa. (Mat. 24:3, 7-14). Pablon willaran ‘Señorpa chayamusqan tiempopi’ ajllasqa cristianokuna wañupunqaku chayqa janaq pachapin kausarimunqaku (1 Tes. 4:14-16; 1 Cor. 15:23).

14. ¿Iman pasanqa Jesuspa chayamunan tiempopi ajllasqa cristianokuna wañupuqtin?

¹⁴ Ajllasqa cristianokuna kay allpapi wañupuqtinkuqa kaq pachan janaq pachapi kausarimpunqaku. ¿Imaynatan chayta yachanchis?  Pablon 1 Corintios 15:51, 52 textopi kutichishan, chaypin nin: “Manan llapanchischu wañuypi puñusunchis, ichaqa llapanchismi cambiasqa kasunchis juj ratollapi, ñawi ch’illmiyllapi, último trompeta waqashaqtin”, nispa. Chay nisqanqa kay tiempokunapin junt’akushan. Jesuspa wayqenkuna kausarimpuqtinkuqa may kusisqan kanqaku ‘señorwan kuskataqmi’ wiñaypaq kanqakupas (1 Tes. 4:17).

15. ¿Imatan janaq pachapi ruwanqaku espíritu jina cambiasqa kaqkuna?

¹⁵ Biblian willan janaq pachapi espíritu jina “ñawi ch’illmiyllapi” cambiasqa kaqkuna imachus ruwanankuta. Jesusmi niran: “Pipas atipaqmanqa kamachisqaytapas tukukuykama kasukuqmanqa atiytan qosaq nacionkunata kamachinanpaq, imaynan Yayaymantapas chaskirani chhayna atiyta; jinan payqa fierro varawan runakunata michinqa, jinaspa t’uru p’uyñuta jina lliuta ñut’unqa”, nispa (Apo. 2:26, 27). Ajllasqa cristianokunaqa Jesustan qatikunqaku “fierro varawan” llapa nacionkunata kamachinqaku (Apo. 19:11-15).

16. ¿Imaynatan waranqanpi runakuna wañuyta atipanqaku?

¹⁶ Ajllasqa cristianokunaqa wañuytan atipanqaku (1 Cor. 15:54-57). Janaq pachapi kausarisqankuraykun kay pachapi mana allin ruwaykunata Armagedón guerrapi chinkachipunqaku. Chay ñak’ariy tiempotaqa askhan Jehová Diosta serviqkuna kausashaqllan mosoq pachaman chayanqaku (Apo. 7:14). Chaymantapas paykunaqa waranqanpi wañupuqkunaq kausarimpusqanta rikuspan reparanqaku jujmanta wañuy atipakusqanta. ¡Chayqa may kusikunapaqmi kanqa! (Hech. 24:15.) Sichus llapanchis Jehová Diosta junt’aq sonqowan servishallasun chayqa, atipasunmi wañuyta chhaynapin wiñay wiñaypaq kausasunchis.

17. 1 Corintios 15:58 nisqan, ¿imata ruwananchispaqmi kallpachawanchis?

¹⁷ Apóstol Pabloq Corinto iñiq t’aqaman kausarimpuymanta qelqasqanqa maytan kallpachawanchis, riki. Chaymi apóstol Pabloq nisqantaqa kasukunanchis Señorpa llank’ananpi tukuy tiempo imaymanata ruwaspa (leey 1 Corintios 15:58). Sichus tukuy atisqanchista ruwasun Jehová Diosta servinanchispaq chayqa, jamuq tiempopin sumaq kausay suyakusqanchista chaskisun, chayqa may munaymi kanqa. Chhaynaqa Jehová Diospaq tukuy ima ruwasqanchisqa manan yanqapaqchu kanqa.