1-2. Соске са о христијања ваљани те интересинен пе башо воскресение ко небо?

ПОВИШЕ мануша акана со служинена е Јеховаске иси лен надеж те живинен вечно ки Пхув. Ама, некобор сој тане помазиме таро Јехова, иси лен надеж те воскреснинен ко небо. Адала помазаникија мангена те џанен саво ка овел ленгоро живото ко небо. Ама, соске адала да со иси лен надеж те живинен ки Пхув ваљани те џанен баши акаја надеж? Сар со ка дикха, о воскресение ко небо ка анел берекетија адаленге да со иси лен надеж те живинен вечно ки Пхув. Бизи разлика дали иси амен надеж те живина ко небо или ки Пхув, амен ваљани те интересина амен башо воскресение ко небо.

² О Девел водинѓа несавен таро е Исусескере прва ученикија те пишинен башо воскресение ко небо. О апостол Јован објаснинѓа: „Акана сием е Девлескере чхаве, ама панда нане откримо со ка ова. Џанаја кај, кеда ов ка сикавел пе аменге, ка ова сар лесте“ (1. Јов. 3:2). Значи о помазиме христијања на џанена сар ка овел ленгоро живото ко небо откеда ка воскреснинен. Ама, ола ка дикхен е Јехова кеда ка добинен пумари награда. И Библија на вакерела аменге секова детали башо воскресение ко небо, ама о апостол Павле денѓа несаве информацие башо адава.  О помазаникија ка овен е Христосеа кеда ов „ка уништинел секоја влада хем секоја власт хем сила“ хем кеда ка овел уништимо „о последно душмани, о мерибе“. Ко крајо, о Исус хем окола со ка владинен леа, ка подложинен песте хем са о буќа е Јеховаске (1. Кор. 15:24-28). Адава ка овел бут шужо време! *

3. Спрема 1. Коринќаните 15:30-32, сар поможинѓа е Павлеске адава со сине ле вера ко воскресение?

³ Е Павлескири вера ко воскресение поможинѓа леске те издржинел различна неволје. (Читин 1. Коринќаните 15:30-32.) Ов вакерѓе е пхраленге таро Коринт: „Секова диве сиум ки опасност те мерав“. О Павле исто аѓаар пишинѓа: „Боринѓум ман ѕверонцар ко Ефес“. Ов шај мислинела сине ки дословно борба е животненцар ки арена ко Ефес (2. Кор. 1:8; 4:10; 11:23). Или, шај мислинела сине ко противибе со сине ле таро Евреија хем таро јавера со сине сар ’ѕверија‘ (Дела 19:26-34; 1. Кор. 16:9). Бизи разлика со сине, о Павле доживинѓа баре неволје. Ама, ов продолжинѓа те верујнел кај ка овел ле бахтали иднина (2. Кор. 4:16-18).

4. Сар и надеж башо воскресение охрабринела е христијанен авдиве? (Дикх и слика тари насловно страна.)

⁴ Живинаја ко опасна времија. Несаве таро амаре пхраља сине жртве таро криминал. Јавера живинена ко тхана коте со иси војне хем на осетинена пе безбедна. А јавера служинена е Јеховаске ко пхувја коте со о проповедибе тано ограничимо, па чак забранимо. Адалеске со служинена е Јеховаске шај те пханден лен ко затвор или те мударен лен. Сепак, са акала пхраља хем пхења понадари да служинена е Јеховаске хем адалеа дена амен бут шужо пример. Ола на дарана, соске џанена кај чак ако акана нашавена пумаро живото, о Јехова ветинела кај ка дел лен нешто пошукар ки иднина.

5. Кова опасно размислибе шај те тикњарел амари вера ко воскресение?

⁵ О Павле вакерѓа пле пхраленге те избегинен о опасно размислибе со сине некасте, сар сој: „Ако о муле на воскреснинена ’те ха хем те пија, соске тајса ка мера‘“. Асавко стави сине несаве манушен панда англедер е Павлескоро време. Ов изгледа цитиринѓа о стихо таро Исаија 22:13, кова со керела лафи башо стави со сине е Израелцон. Наместо те овен попаше е Јеховаја, ола мангена сине те задоволинен пумаре желбе. Уствари, е Израелцонгоро стави сине „авдиве сиан акате, тајса шај те мере“, стави кова со тано вообичаено авдиве да. Ама, и Библија вакерела кола лошна последице доживинѓа о Израелско народо адалеске со сине ле асавко стави (2. Лет. 36:15-20).

6. Сар ваљани амари надеж ко воскресение те влијајнел упро адава касаја ка дружина амен?

⁶ Адава со џанаја кај о Јехова ка воскреснинел е мулен, ваљани те влијајнел упро адава касаја дружинаја амен. О пхраља ко Коринт ваљани сине те избегинен те дружинен пе адаленцар со на верујнена сине ко воскресение. Адаја тани поука аменге да авдиве: Ако често дружинаја амен амаленцар со мангена акана само те задоволинен пумаре желбе, лошно ка влијајнен упри аменде. Ако јекх христијани накхавела бут време асавке манушенцар, шај те нашавел пло шукар стави хем навике. Уствари, асавке мануша шај те чхивен  амен те кера грево, или те кера буќа со о Девел мрзинела лен. Адалеске, о Павле охрабринѓа амен: „Освестинен тумен адалеа со ка керен адава сој исправно, хем ма грешинен“ (1. Кор. 15:33, 34).

7. Сар со пишинела ко 1. Коринќаните 15:35-38, кова пучибе шај некој пучела башо воскресение?

⁷ Читин 1. Коринќаните 15:35-38. Некој со мангела те чхивел е јаверен те сумнинен пе ко воскресение, шај пучела: „Сар ка овен воскресниме о муле?“ Шукар тано амен да те размислина башо е Павлескоро одговор, соске бут мануша авдиве иси лен пумаро верување башо адава со овела е манушенцар пало мерибе. Ама, со вакерела и Библија башо адава?

8. Која споредба шај те поможинел аменге те хаљова о воскресение ко небо?

⁸ Кеда некој мерела, лескоро тело кирњола. Ама, окова со створинѓа о универзум шај те воскреснинел адале мануше хем те дел ле тело саво со ваљани леске (1. Мој. 1:1; 2:7). О Павле користинѓа јекх споредба која со сикавела кај о Девел на ваљани те воскреснинел е мануше исто телоја. Размислин башо „зрно“ или „семе“ таро јекх растение. Кеда адава семе тано садимо ки пхув, ов почминела те бајрол хем овела јекх нево растение. Адава нево растение тано појавер таро тикно семе. О Павле користинѓа акаја споредба те шај те сикавел кај амаро Створители шај секаске „те дел тело саво со мангела“.

9. Спрема 1. Коринќаните 15:39-41, саве различна телија иси?

⁹ Читин 1. Коринќаните 15:39-41. О Павле вакерѓа кај о Девел створинѓа различна буќа. На пример, о тело тари стока, таро чирикља хем мачхе тано различно. Ов вакерѓа кај ко небо дикхаја разлика машкар о кхам хем и месечина. Хем вакерѓа кај „и черени тари черени разликујнела пе спрема и слава“. Иако на дикхаја адава амаре  јакхенцар, о научникија вакерена аменге кај иси различна черења, несаве тане тикне, баре, несаве тане лоле, парне хем несаве жута, сар сој амаро кхам. О Павле исто аѓаар вакерѓа кај иси небесно тело хем пхувјало тело. Со мислинѓа акалеа? Ки пхув иси телесно тело, а ко небо иси духовно тело, сар со иси е ангелен.

10. Саво тело ка овел околен со ка воскреснинен ко небо?

¹⁰ Дикх со понадари вакерѓа о Павле: „Аѓаар ка овел околенцар со воскреснинена таро муле. О тело со мерела кирњола, а о тело со воскреснинела нашти те кирњол“. Џанаја кај кеда некој мерела, лескоро тело кирњола хем иранела пе ки пхув (1. Мој. 3:19). Тегани, сар шај јекх тело со воскреснинела те на кирњол? О Павле на керела сине лафи башо мануш со ка воскреснинел ки Пхув сар адален со воскреснинѓа лен о Илија, о Елисеј хем о Исус. О Павле мислинела сине ки некасте со воскреснинела небесно телоја, сар духовно личност (1. Кор. 15:42-44).

11-12. Сави промена доживинѓа о Исус кеда воскреснинѓа, хем сар о помазаникија ка доживинен нешто слично?

¹¹ Кеда о Исус сине ки Пхув, сине ле телесно тело. Ама кеда воскреснинѓа, ов „уло духо кова со дела живото“ хем иранѓа пе ко небо. Слично аѓаар, о помазаникија да воскреснинена телоја колеа со шај те живинен ко небо. О Павле објаснинѓа: „Сар со сием слична околеа сој тано кердо тари пхув, аѓаар сием слична околеа сој ко небо“ (1. Кор. 15:45-49).

¹² О Павле ко крајо тари пли дискусија вакерѓа и главно бути башо воскресение. Важно тано те џана кај о Исус на воскреснинѓа манушикане телоја. О Павле вакерѓа: „О тело хем о рат нашти те наслединен е Девлескоро царство“ ко небо (1. Кор. 15:50). О апостолија хем о јавера помазаникија нане те воскреснинен ко  небо телесно телоја хем ратеа. А кеда ола ка воскреснинен? О Павле вакерѓа кај ка овен воскресниме некогаш ки иднина, на одма пало ленгоро мерибе. Кеда о Павле пишинѓа о лил таро 1. Коринќаните, несаве апостолија муле, сар на пример о апостол Јаков (Дела 12:1, 2). Јавера апостолија хем помазаникија панда на муле (1. Кор. 15:6).

13. Со ка овел џикоте трајнела е Исусескири „присутност“?

¹³ О Исус хем о Павле пророкујнѓе кај ка авел јекх посебно периоди ки историја — е Христосескири присутност. Џикоте тани и Христосескири присутност ко цело свето ка овен војне, земјотресија, заразна насвалипа хем јавера лошна буќа. Дикхлем сар акала пророштвија исполнинена пе панда таро 1914 берш. Ка овел панда јекх важно дело таро акава знако. О Исус вакерѓа кај о шукар хабери башо е Девлескоро Царство „ка проповединел пе ко цело свето, башо сведоштво са е народонге, хем тегани ка авел о крајо“ (Мат. 24:3, 7-14). О Павле вакерѓа кај џикоте трајнела „е Господарескири присутност“, о помазаникија кола со муле ка овен воскресниме ко небо (1. Сол. 4:14-16; 1. Кор. 15:23).

14. Со ка овел е помазаниконцар со ка мерен џикоте трајнела е Христосескири присутност?

¹⁴ О помазаникија со мерена акана, одма воскреснинена ко небо. Акава потврдинена е Павлескере лафија сој пишиме ко 1. Коринќаните 15:51, 52: „Нане сарине те мера, ама сарине ка менина амен, ко моменти, џикоте шунела пе и последно труба“. Акала лафија е Павлескере акана исполнинена пе! Откеда ка воскреснинен,  акала пхраља е Христосескере ка овен бут бахтале; ола ка овен „секогаш е Господареа“ (1. Сол. 4:17).

15. Сави бути аџикерела околен со ка менинен пе „ко моменти“?

¹⁵ И Библија вакерела аменге со ка керен ко небо адала со ка менинен пе „ко моменти“. О Исус вакерела ленге: „Окова со ка побединел хем ка икерел пе ко мле делија са џи ко крајо, ка дав леске и власт упро народија, сар ме со добинѓум власт таро мло Дад, ов да ка водинел е манушен железно палкаја хем ка пхагел лен сар пхувјале чаре“ (Отк. 2:26, 27). Ола ка џан пало Исус хем ка владинен упро народо железно палкаја (Отк. 19:11-15).

16. Сар бут мануша ка побединен о мерибе?

¹⁶ Јасно тано кај о помазаникија ка побединен о мерибе (1. Кор. 15:54-57). Адалеа со ка воскреснинен ко небо ка поможинен те цидел пе о лошнипе тари цело Пхув ко Армагедон. Милиоња јавера христијања ка накхен и „бари неволја“ хем ка кхувен ко нево свето (Отк. 7:14). Адала со ка преживинен ки Пхув ка дикхен јавер победа упро мерибе кеда ка воскреснинен милијарде мануша кола со муле поангле. Размислин кобор ка ова бахтале кеда ка случинел пе акава! (Дела 24:15). Сарине сој тане верна е Јеховаске ко са, исто аѓаар ка побединен о мерибе со наслединѓем ле. Ола ка шај те живинен засекогаш.

17. Со охрабринела амен акана те кера о стихо таро 1. Коринќаните 15:58?

¹⁷ Секова христијани сој тано акана џивдо ваљани те овел благодарно башо акала утешна лафија со пишинѓа лен о Павле е Коринќаненге башо воскресение. Иси амен шукар причине те ова послушна ко совет со денѓа ле о Павле те ова „зафатиме ки бути е Господареске“. (Читин 1. Коринќаните 15:58.) Ако сием верна хем ревно проповединаја, шај те дикха англе ко јекх бахтало живото со ка овел ки иднина. Адава живото ка овел бут пошужо него со шај акана те замислина аменге. Сигурно адава ка овел аменге доказ кај амаро трудо на сине џабе.