1-2. Sose sa e hrišćanen valjani te zanimini o uskrsenje ko đivdipe ko nebo?

BUT manuša kola akana služinena e Jehovase isi len nada so ka živinen zauvek ki phuv. Ama, disave hrišćanija kola tane pomazime isi len nada so ka živinen ko nebo. On mangena te đanen savo ka ovel olengo đivdipe ko nebo. Ama, sose amen kola isi amen nada te živina ki phuv valjani te sikljova odolestar? Sar so ka dikha, odova so disave ka uskrsninen te živinen ko nebo, ka anel blagoslovija hem okolenđe kola večno ka živinen ki phuv. Odolese, bilo te ovel amen nada so ka živina ko nebo ja ki phuv, valjani te đana diso pobuter ando uskrsenje ko đivdipe ko nebo.

² Ko prvo veko, o Devel pe sveto duhoja vodinđa disave e Isusese učenikonen te pisinen andi nebesko nada. O apostol Jovan phenđa: „Akana hijam e Devlese ćhave, ama pana nane amenđe mothovdo so ka ova. Ipak, đanaja so, ked ov ka mothovi pe, ka ova sar oleste“ (1. Jov. 3:2). Odova mothovi so ni o pomazime hrišćanija na đanena sar ka izgledini olengo đivdipe ko nebo. Ama, ked ka dobinen pi nagrada, on ćaće ka dikhen e Jehova. I Biblija na vaćeri amenđe sa kotar o uskrsenje ko nebo, ama o apostol Pavle pisinđa diso odolestar. O pomazanikija ka oven e Hristeja ked ov „ka uništini svako vladavina hem svako vlast hem sila.“ Odova odnosini pe hem ko „poslednjo dušmani... o meribe.“ Ko krajo, o Isus hem  okola kola ka vladinen oleja, sa ka den e Jehovase ko vasta hem on kokri ka oven ko olese vasta (1. Kor. 15:24-28). Odova ka ovel ćaće jekh posebno vreme! *

3. Premali 1. Korinćanima 15:30-32, sar odova so o Pavle verujinđa ko uskrsenje pomožinđa lese?

³ Odova so o Pavle verujinđa ko uskrsenje pomožinđa lese te istrajini ko razna pharipa. (Čitin 1. Korinćanima 15:30-32.) E hrišćanenđe ko Korint, phenđa: „Svako dive suočinava man e meribaja.“ Isto ađahar, ov pisinđa: „Borinđum man e zverijencar ko Efes.“ Ked phenđa akava, šaj mislinđa ko odova so ćaće borinđa pe e divljo životinjencar ki arena, ko Efes (2. Kor. 1:8; 4:10; 11:23). Ja šaj mislinđa ko progonstvo, kova doživinđa ando Judejcija hem ando avera kola hine sar „zverija“ (Dela 19:26-34; 1. Kor. 16:9). So god hine odova, but putija o Pavle hine le bare problemija, ama ov na našalđa pi nada so ađićeri le diso pošukar (2. Kor. 4:16-18).

4. Sar i nada ko uskrsenje dela snaga e phralenđe hem e phenjenđe avdije? (Dikh i slika ko početko ando akava časopis.)

⁴ Živinaja ko but pharo vreme. Disave amare phralja hem phenja tane žrtve ando kriminal. Avera bešena ko phuvja kaj tano maribe hem sebepi odova on nane bezbedna. A avera služinena e Jehovase iako šaj te oven mudarde ja phanle ko phuvja kuri amare aktivnostija tane ograničime ja čak zabranime. Sa odola phralja hem phenja kola istrajno služinena e Jehovase tane but šukar primer amenđe. On na darana sebepi so đanena so ako akana hem našalena po đivdipe, ki budućnost o Jehova ka del len diso but pošukar.

5. Kova pogrešno stav šaj te tiknjaćeri amari vera ko uskrsenje?

⁵ O Pavle upozorinđa e phralen ko jekh pogrešno stav kova disave hine len: „Ako o mule na uskrsninena ’hajde te ha hem te pija sose tajsa ka mera.‘“ Hem but angleder so živinđa o Pavle, disave manuša ađahar razmislinđe. O Pavle šaj citirinđa o lafija ando Isaija 22:13, ko kola mothovi pe savo stav o Izraelcija hine len. Umesto te dikhen sar te oven paše e Devleja, on samo dikhlje sar te uživinen. On hine len stav „uživin avdije, sose tajsa na đaneja so ka ovel“, a ađahar hem but manuša avdije mislinena. Ama, i Biblija mothovi amenđe kola lošna buća o Izraelcija doživinđe sebepi odova lošno stav kova hine len (2. Let. 36:15-20).

6. Sar i nada ko uskrsenje valjani te utičini ko odova kas birinaja te ovel amaro amal?

⁶ Odova so đanaja so o Jehova šaj te irini e mulen ko đivdipe valjani te utičini ko odova kas birinaja te ovel amaro amal. O phralja ko Korint valjanđe te arakhen pe ando odova te družinen pe okolencar kola na verujinđe ko uskrsenje. So amen sikljovaja? Ako redovno družinaja amen okolencar kolen jedino zanimini sar akana te uživinen ko đivdipe, odova na ka anel amenđe ništa šukar. Odova šaj te rumini amare stavija hem amare šukar navike. Sebepi o lošno društvo, šaj te počmina te ćera o buća kola o Jehova mrzini. Odolese, o Pavle podstaknini amen: „Oven razumna, ćeren odova soj tano ispravno hem ma grešinen“ (1. Kor. 15:33, 34).

7. Premali 1. Korinćanima 15:35-38, so disave pućlje pe ando uskrsenje?

⁷ Čitin 1. Korinćanima 15:35-38. Neko ko manglja te ćhivel averen te sumnjinen ko uskrsenje, šajinđa te pućel: „Sar o mule ka uskrsninen?“ Šukar tano te dikha sar o Pavle odgovorinđa, odolese so but manuša avdije verujinena ko razna buća ando odova so ovela amencar palo meribe. Ama, so i Biblija sikavi odolestar?

8. Kova primer šaj te pomožini amen te haljova o uskrsenje ko đivdipe ko nebo?

⁸ Ked neko merela, oleso telo ćirnjola. Ama, Okova kova nisostar ćerđa o svemir, šaj te uskrsnini e manuše hem te del le nevo telo (Post. 1:1; 2:7). O Pavle koristinđa jekh primer te mothovi so nane potrebno o Devel te del len isto telo. Razmislin ando „seme.“ Ked o seme ćhivela pe ki phuv, ov počmini te barjol hem olestar ovela jekh biljka. I biljka tani potpuno averćhane kotar o tikno seme. O Pavle koristinđa akava primer te bi mothovi so amaro Stvoritelj odlučini savo telo ka del nekase.

9. So ki 1. Korinćanima 15:39-41 vaćeri pe ando različita vrste ando telo?

⁹ Čitin 1. Korinćanima 15:39-41. O Pavle vaćerđa so but buća kola o Devel stvorinđa tane averćhane. Na primer, o telo ando gurumnja, ćiriklja ja ando maćhe tano averćhane. Ov phenđa so hem ko nebo, o kham hem o mesec, razlikujinena pe hem so „o šužipe andi svako ćereni tano averćhane.“ Iako odija razlika našti te dikha amare jaćhencar, o naučnikija phenena so isi ćerenja sar soj tane lole džinija, parne patuljkija, hem žuta ćerenja, sar soj tano amaro kham. Isto ađahar, o Pavle phenđa so „o duhovna bića isi len telo hem o bića ki phuv isi len telo.“ So značinena olese lafija? Amen kola živinaja ki phuv, isi amen telo ando rat hem  ando mas, ama o bića ko nebo, sar soj tane o anđelija, isi len duhovno telo.

10. Savo telo ka ovel len okola kola ka uskrsninen ko đivdipe ko nebo?

¹⁰ Dikh so o Pavle phenđa palo odova: „Ađahar tano hem okolencar so uskrsninena kotar mule. Sejini pe o telo kova ćirnjola, a o telo kova našti te ćirnjol, uskrsnini.“ Amen đanaja so ked o manuš merela, oleso telo ćirnjola hem irini pe ko praho (Post. 3:19). Sar onda šaj te uskrsnini „o telo kova našti te ćirnjol“? O Pavle na vaćerđa ando manuša kolen o Ilija, o Jelisej hem o Isus angleder uskrsninđe ko đivdipe ki phuv. O Pavle vaćerđa ando manuša kola tane uskrsnime ko đivdipe ko nebo hem kola isi len „duhovno telo“ (1. Kor. 15:42-44).

11-12. Savi promena o Isus doživinđa ked uskrsninđa hem savi slično promena doživinena o pomazanikija?

¹¹ Ked o Isus hine ki phuv, ov hine le telo kotar rat hem mas, ama ked uskrsninđa ov „ulo duh kova dela đivdipe“ hem irinđa pe ko nebo. Isto ađahar, ked ka uskrsninen hem o pomazanikija ka ovel len duhovno telo. O Pavle objasninđa: „Sar so hijam slična okolese kova tano ćerdo ando praho, ađahar ka ova slična okolese kova alo ando nebo“ (1. Kor. 15:45-49).

¹² Važno tano te na bistra so ked o Isus uskrsninđa na hine le manušikano telo. Ked o Pavle reslja đi o krajo ando odova so vaćerđa ando uskrsenje, ov objasninđa sose, ked phenđa: „O telo hem o rat našti te nasledinen e Devleso Kraljevstvo“ ko nebo (1. Kor. 15:50). O apostolija hem avera pomazanikija na ka uskrsninen ko đivdipe ko nebo ko telo ando rat hem ando mas kova ćirnjola. Ked ka uskrsninen? O Pavle phenđa so o uskrsenje tano tek anglo lende, so on na ka uskrsninen odmah palo meribe. Ked o Pavle završinđa o pisibe andi 1. Korinćanima, disave učenikija već mulje, sar soj  tano o apostol Jakov (Dela 12:1, 2). Avera apostolija hem pomazanikija kasnije mulje (1. Kor. 15:6).

13. So ka ovel đi trajini e Hristesi prisutnost?

¹³ Hem o Isus hem o Pavle vaćerđe kotar jekh posebno vreme ki e manušengi istorija – andi e Hristesi prisutnost. Ði trajini olesi prisutnost, ko celo sveto ka oven mariba, zemljotresija, nabormipa hem avera lošna buća. Amen dikhaja so akava biblijako proročanstvo ispunini pe pana kotar o 1914. berš. Ama, đi trajini e Hristesi prisutnost pana diso ka ovel. O Isus phenđa so i šukar vest ando e Devleso Kraljevstvo ka propovedini pe „ko celo sveto sar svedočanstvo sa e narodonđe, hem tegani ka avel o kraj“ (Mat. 24:3, 7-14). O Pavle phenđa so đi trajini e Hristesi prisutnost, o pomazanikija „kola mulje“ ka uskrsninen ko đivdipe ko nebo (1. Sol. 4:14-16; 1. Kor. 15:23).

14. So doživinena o pomazanikija kola merena đi trajini e Hristesi prisutnost?

¹⁴ Avdije, ked o pomazanikija merena on odmah uskrsninena ko đivdipe ko nebo. Odova potvrdinena hem e Pavlese lafija andi 1. Korinćanima 15:51, 52: „Na ka ova sare dugo mule, ama sare ka ova menjime, ko jekh trenutko, posigate nego so i jakh treptini, ko zvuko andi poslednjo truba.“ E Pavlese lafija akana ispuninena pe. Palo odova so ka uskrsninen, e Hristese phralja ka oven but bahtale, sose „zauvek ka oven e Gospodeja“ (1. Sol. 4:17).

15. So ka ćeren ko nebo o pomazanikija kola ka uskrsninen „posigate nego so i jakh treptini“?

¹⁵ I Biblija mothovi amenđe so ka ćeren ko nebo o pomazanikija kola ka uskrsninen  „posigate nego so i jakh treptini.“ O Isus phenđa lenđe: „A okolese ko pobedini hem ko sa đi o krajo ka ćerel sa so zapovedinava, ka dav i vlast upro narodija, sar so hem me dobinđum i vlast ando mo Dad, pa ka vladinen upro lende e palicaja ando sastron hem ka phagel len sar o ćare andi glina“ (Otkr. 2:26, 27). On ka sledinen e Isuse hem ka vladinen upro manuša „e palicaja ando sastron“ (Otkr. 19:11-15).

16. Sar o manuša ka pobedinen o meribe?

¹⁶ Šaj te ova uverime so o pomazanikija ka pobedinen o meribe (1. Kor. 15:54-57). Sebepi so ka uskrsninen, ko Armagedon on ka učestvujinen ko odova te cidel pe o lošnipe kotar i phuv. Milionija avera manuša kola ka preživinen i „bari nevolja“ ka khuven ko nevo sveto (Otkr. 7:14). Odola manuša kola preživinđe ka dikhen sar o meribe tano pobedimo ko pana jekh način, ked ka uskrsninen milionija manuša kola angleder mulje. Zamislin samo kobor ka ova bahtale tegani (Dela 24:15). Sare kola ka mothoven soj tane verna e Jehovase ko sa, ka pobedinen o meribe kova nasledinđam ando Adam. On ka živinen večno.

17. Premali 1. Korinćanima 15:58, so valjani akana te ćera?

¹⁷ Svako hrišćanin avdije valjani te ovel zahvalno aso ohrabrujuća lafija ando uskrsenje kola o Pavle pisinđa e hrišćanenđe ko Korint. Isi amen svako razlog te ćera sa so šaj ki amari služba e Devlese. (Čitin 1. Korinćanima 15:58.) Ako daja sa amendar ki služba, šaj te nadina amen so ki budućnost ka ovel amen but bahtalo đivdipe. O đivdipe tegani ka ovel pošukar nego so šaj te zamislina. Tegani ka dikha so amaro trud na hine uzaludno.