1-2. Bulya gurhi Abakristu boshi bakwanine bashagalukire okuyiga lugenda obufûke bw’okuja empingu?

ENE, bakozi banji ba Yehova bagwerhe obulangalire bw’okuyish’ilama hanw’igulu ensiku n’amango. Lubero n’oko, Abakristu bashîge amavurha baciri hanw’igulu bagwerhe obulangalire bw’okuyish’ifûka baje empingu. Abo Bakristu bashîge amavurha banakacidosa gurhi akalamo kabo kayishiyorha omu mango gayisha, cikone ka na balya bayish’ilama hanw’igulu ensiku n’amango banashagalukira okuyiga lugenda obo bufûke? Nk’oku rhwayish’ibona, obufûke bwabayish’ija empingu bwayish’ilerhera migisho minji balya bagwerhe obulangalire bw’okuyish’ilama hanw’igulu ensiku n’amango. Co cirhumire, ciru akaba obulangalire bwirhu buli bwakuyish’ilama empingu erhi hanw’igulu, rhweshi rhushinganine rhushagalukire obufûke bw’abayish’ija empingu.

² Nnamahanga alongozize banafunzi baguma na baguma bw’omu myaka igana mirhanzi bayandike okubiyerekire obulangalire bw’okuyish’ija empingu. Entumwa Yowane yayandika ntya: “Buno rhuli bana ba Nyamuzinda, ci oku rhwayish’iyorha kurhac’ibonekana. Kwône rhumanyire oku amango kwabonekana, rhwayish’imushusha, bulyala rhwanamubone nk’oku anali.” (1 Yn. 3:2) Abakristu bashîge amavurha barhayishi gurhi omubiri gwabo gwayish’iyorha hano baj’ilama empingu. Cikone, hano bahâbwa oluhembo lwabo, bayish’ibona Yehova nk’oku anayorha. Ebibliya erhayerekini ngasi kantu okubiyerekire obufûke bw’okuja empingu, cikone entumwa Paolo yaganirire bintu biguma na biguma lugenda obo bufûke. Abakristu bashîge amavurha bayish’iba haguma na  Yezu amango anabulabuze “ngasi burhegesi na ngasi bukulu na ngasi buhashe.” Kandi bayish’iba haguma naye hano abulabuza “omushombanyi muzinda, . . . Lufû.” Buzinda, Yezu n’ababo bayish’irhambula boshi bayish’icihira idako ly’olya wamuhâga byoshi, kw’okuderha Yehova. (1 Kr. 15:24-28) Bwayish’iba buzinda bwinja bwenene! *

3. Nk’oku biyerekinwe omu lwandiko lwa 1 Abakorinti 15:30-32, bici okuyemera obufûke kwarhabire Paolo ajire?

³ Bulya Paolo al’iyemire obufûke, oko kwamurhabala alembere mazibu manji. (Osome 1 Abakorinti 15:30-32.) Abwira Abakorinti ntya: “Ngasi lusiku erhi ndi omu lufû.” Paolo ashub’iyandika ntya: “Nalwisa ebiryanyi e Efezi.” Nkaba ajaga aganirira gurhi akag’ilwisa ensimba zali omu ciwanja c’emicezo câli e Efezi. (2 Kr. 1:8; 4:10; 11:23) Erhi kandi nkaba aganiriraga okulibuzibwa akag’ilibuzibwa n’Abayahudi n’abandi bantu bali nka “biryanyi.” (Ebj. 19:26-34; 1 Kr. 16:9) Bibe erhi Paolo ajaga aganirira ebyo erhi bindi, rhumanyire oku alwisize mazibu manji. Cikone, oko kurharhumaga abula burhagendekera okulangalira akasanzi kayisha.​—2 Kr. 4: 16-18.

4. Gurhi obulangalire bw’obufûke buli bwazibuhya Abakristu ene? (Olole enfoto eri oku cijalada c’eyi gazeti.)

⁴ Nirhu rhulamire omu kasanzi kazibu. Bene wirhu baguma baguma bajirirwe kubî bwenene. Abandi balamire omu maeneo galimwo ivita na ntyo barhali omu murhula. N’abandi balamire omu bihugo bihanzibwemw’omukolo gwirhu, na ntyo bali bacihangana okukolera Yehova erhi barhanagwerhi oluhûma lw’okujira ntyo na ciru akaba oko kwanahira akalamo kabo omu mazibu. Ciru akaba ntyo, abo bene wirhu na bali birhu bagendekîre baharamya Yehova banali mw’ago mazibu, babîre nyiganyo nyinja kuli rhwe. Babà bayemire n’obwalagale oku ciru bakaheza akalamo kabo mwakano kasanzi, Yehova ayish’ibahâ akalamo kinja bwenene omu mango gayisha.

5. Ntanya zihi mbi zakarhuma obuyemere bwirhu lugenda obufûke bwarha?

⁵ Paolo ahaniza bene wabo lugenda entanya mbî bantu baguma bâligwerhe. Bakag’iderha ntya: “Akaba abafîre barhakafûka, ‘rhulye rhunanywe bulya irhondo rhwafâ.’” Bantu baguma bal’igwerhe ezo ntanya ciru embere z’amango ga Paolo. Nkaba aganiriraga olwandiko lwa Izaya 22:13, luganirire enkomêdu aba Israheli bagoma balikola bagwerhe. Ahali bayegere Nnamahanga, bazigira oku kacishagalusa omu kalamo kone. Bakag’irhanya ntya: “Rhuhali ene cikone irhondo rhurhahali,” ciru n’ene nalyo entanya za ntyo ziri omu bantu banji. Cikoki, Ebibliya eyerekine ebyayishirihikira ishanja ly’aba Israheli enyanya ly’ezo ntanya mbi bagwerhe.​—2 Nga. 36:15-20.

6. Gurhi okulangalire obufûke kwakarhurhabala okucishoga abîra birhu?

⁶ Kobinali, okumanya oku Yehova ayish’ifûla abafîre kushinganine kurhurhabale rhucishoge bwinja abîra birhu. Bene wirhu b’e Korinti balish’inganine bayake okujira obwîra n’abantu bakag’ilahira oku harhakabà obufûke. Ene nirhu isomo lihi rhwakakula aho? Kurhali kwinja okukomerana n’abantu balibabona nk’akalamo rhulamire kwo n’aka kone. Okukomerana n’abo bantu kwanashereza entanya zirhu n’oborherhe bwirhu bwinja. Oko kwanarhuma rhwahikira aha rhwalama akalamo Nnamahanga ashomba: kalamo k’okujira ebyaha. Na ntyo, Paolo asêgeza ntya: “Murhenge omu balalwe nk’oku bikwanine, murhanacihîra mukajira ebyaha.”​—1 Kr. 15:33, 34.

7. Nk’oku biyerekinwe omu 1 Abakorinti 15:35-38, idoso lihi bantu baguma baguma bakadosa lugenda obufûke?

⁷ Osome 1 Abakorinti 15:35-38. Olonza okuhira akarhinda lugenda obufûke anakadosa ntya: ‘Gurhi abàfîre bafûke wâni?’ Kuli kwinja rhuganirire ishuzo Paolo ahânaga lugenda er’idoso bulya mwakano kasanzi kirhu ngasi muntu anabe agwerhe ezage ntanya lugenda akalamo enyuma z’okufâ. Cikone gurhi Ebibliya yohe eyigirizize?

8. Lwiganyo luhi lwakarhurhabala rhuhûgukwe obufûke bw’okuja empingu?

⁸ Erhi omuntu afâ, omubiri gwage gunabole. Cikone Owalemâga amalunga kurhenga omu busha anafûla oyo muntu n’omubiri gumushinganine. (Murh. 1:1; 2:7) Paolo akolesize olwiganyo luyerekine oku Nnamahanga arhayishibe n’obulagirire bw’okugalulira omuntu gulya mubiri gwafâga go nagulya. Orhanye oku “mburho” erhi kw’ebi barhwerha. Emburho y’ecishimbo erhi ya ngano erhi wakayirhwera enayishimera yindi yindi mburho. Emburho yarhweragwa erh’imera enabe mpyahya. Paolo akolesa olo lwiganyo ly’ayerekana oku Omulemi wirhu anahâna “omubiri nk’oku yene alonzize.”

9. Oganirire olubero lw’emibiri luhâba luyerekinwe omu lwandiko lwa 1 Abakorinti 15:39-41.

⁹ Osome 1 Abakorinti 15:39-41. Paolo ayerekine oku obulemi buba bwa ngasi lubero. Kwa lwiganyo, ebiremwa bijira omubiri gw’obunya-nyama n’omuko biba bya lubero-lubero nka enkafu, orhunyunyi n’ensamaki. Ayerekâna oku omu malunga rhunabone olubero luba egarhi kw’omwezi n’izûba. Acib’iyerekana oku ciru “n’enyenyezi erhalangashana kuguma n’eyindi.” Neci, ciru akaba rhurhakahash’iberûla enyenyezi omu kuzilola n’amasu, hali ezi abantu basomire esiyanse bahamagala nyenyezi ndukula nnenene, hali eziba nyeru nsungunu-ngunu n’ezindi ziba za male, kwa lwiganyo izûba. Paolo acibiyushula ntya: “Haligi emibiri [y’eby’empingu, n’ey’ebya hanw’igulu, NWT].” Bici alonzagya okuderha?  Kobinali, hanw’igulu rhujira omubiri gw’obunya-nyama n’omuko, cikone ababa empingu bajira omubiri gw’ekiroho nk’ogwa bamalahika.

10. Mubiri gwa gurhi abayishifûka n’okuja empingu bayishiba nago?

¹⁰ Okengere ebi Paolo acibir’iyushula, aderha ntya: “Ntyo kwo biri n’oku bufûke bw’abafû. Omubiri gunarhwerwe guli gwa kubola, gufûke gurhaciri gwa kubola.” Kobinali, erhi omuntu afâ omubiri gwage gunabole na buzinda ashub’iba budaka. (Murh. 3:19) Gurhigi ogo mubiri ‘gwakafûka gurhaciri gwa kubola’? Arhali obufûke bw’abantu bafûlagwa n’okucib’ilama hanw’igulu bwo Paolo akag’iganirira, kwa lwiganyo balya bafûlagwa na Eliya, Elisha na Yezu. Paolo ajâga aganirira obufûke bw’omuntu wakafûlwa n’omubiri gw’empingu, kw’okuderha mubiri gwa “obunya-mûka.”​—1 Kr. 15:42-44.

11-12. Mpindûlo zihi Yezu ageziremwo erhi afûka, na gurhi abashîgwa amavurha nabo bazigeramwo?

¹¹ Amango Yezu ali hanw’igulu, aligwêrhe omubiri gw’obunya-nyama n’omuko. Cikone erhi afûlwa, “ajirwa mûka guhâna obuzîne” na buzinda agaluka empingu. Ko n’oko, Abakristu bashîge amavurha banafûlwe n’omubiri gw’obunya-mûka. Paolo ahugûla ntya: “Kulyala rhwalikwo enshusho y’omuny’igulu, kwo rhukwanine rhujekwo n’enshusho y’ow’omu mpingu.”​—1 Kr. 15:45-49.

¹² Paolo ahikira aha ashwinja enganîro ajirâga lugenda abufûke. Kuli kwa bulagirire okuhûgukwa oku Yezu arhafûkanâga omubiri gw’obunya-nyama. Paolo adesire ntya: “Omubiri n’omuko birhankayima omu Bwami bwa Nyamuzinda” e mpingu. (1 Kr. 15:50) Entumwa n’abandi bashîge amavurha bayish’ija empingu barhakafûka banagwerhe omubiri gwakabola gw’obunya-nyama n’omuko. Mangaci bakafûzirwe? Paolo ayerekana oku obo bufûke bwakabire amango gayishe, barhakafûsire ho n’aho enyuma z’okufâ. Amango Paolo ayandikâga olwandiko lwa 1 Abakorinti, banafunzi baguma baguma bali “bàfîre,” kwa lwiganyo entumwa Yakobo.  (Ebj. 12:1, 2) Entumwa n’abandi Bakristu bashîge amavurha nabo ‘bàkafîre’ enyuma z’aho.​—1 Kr. 15:6.

13. Bici byakayerekine okubâho kwa Yezu?

¹³ Yezu na Paolo bombi basegize akasanzi kago-kago kakabireho: okubâho kwa Kristu. Oko kubâho ka Kristu kwakabonekine kugerera ivita, emisisi y’obudaka, endwala z’okuyahukira n’ebindi bintu biri byagera omw’igulu ene. Obo bulebi buli omu Bibliya bwahikirire kurhenga omu mwaka gwa 1914. Hali ecindi cimanyiso c’obulagirire cakayerekine oko kubâho kwa Kristu. Yezu aderha oku omwanzi mwinja gw’Obwami bwa Nnamahanga gwakayalizibwe “omu igulu lyoshi, ebe cimanyiso oku mashanja goshi. Obwo lyo olusiku luzinda lwayishe.” (Mt. 24:3, 7-14) Paolo asegeza oku “okubâho kwa Nnawirhu” kwo kakabire kasanzi k’abashîge amavurha “bàfîre” okurhondera bafûka.​—1 Ts. 4:14-16; 1 Kr. 15:23, NWT.

14. Gurhi biba lugenda abashîge amavurha bali bafâ omu kasanzi kw’okubâho kwa Kristu?

¹⁴ Mwakano kasanzi, abashîge amavurha bali bayusa olugenzi lwabo lwa hanw’igulu bali bafûka ho n’aho n’okuja empingu. Rhwanaderha ntyo n’obwalagale kugerera enderho za Paolo ziri omu lwandiko lwa 1 Abakorinti 15:51, 52: “Rhweshi rhurhakafâ, ci rhweshi rhwayish’ihinduka kundi kundi, oku irindo liguma, omu kugohya ntya, oku izu ly’omushekera muzinda.” Ezi nderho za Paolo ziri zahikirira ene! Hano abo bene wabo Yezu boshi bafûka, banabe n’omwishingo munji bwenene; “bayishiba haguma na Nnawirhu ensiku zoshi.”​—1 Ts. 4:17, NWT.

15. Mukolo guhi abayish’ihinduka kundi kundi “omu kugohya ntya” bayishigend’ijira empingu?

¹⁵ Ebibliya edesire omukolo abo bayishihinduka kundi kundi “omu kugohya ntya” bayishigend’ijira  empingu. Yezu aderha ntya: “Owanahime akanankolera bwinja kuhika olusiku luzinda, namuha obuhashe bw’okurhegeka amashanja, agayâbule n’ehirhi hy’ecûma, gavunyunguke nka kulya ebintu byajiragwa n’ibumba bivungunyuka. Obwo buhashe nani Larha wabumpâga.” (Maf. 2:26-28) Bayish’ikola haguma n’Omukulu wabo Yezu lyo bayâbula amashanja n’ehirhi hy’ecuma.​—Maf. 19:11-15.

16. Gurhi abandi bantu bayish’ihikira aha bahima olufû?

¹⁶ Kobinali, abashîge amavurha bayishihima olufû. (1 Kr. 15:54-57) Obufûke bwabo bwayishibahashisa nabo balwe okw’ivita lya Armagedoni lyayishikula obubi boshi omw’igulu. Emiliyoni y’abandi Bakristu balume n’abakazi ‘bayish’irhenga omu malibuko madârhi’ bayishicunguka n’okuja omw’igulu lihyahya. (Maf. 7:14) Abayishicunguka hanw’igulu bayish’ibona obundi buhimi bwayish’ijirwa oku lufû, kw’okuderha, obufûke bw’emiliyoni y’abantu bafîre omu mango ga mîra. Orhanye gwayishiba mwishingo munganaci han’oko kuhikirira! (Ebj. 24:15) Na balya boshi bayishigendekera babà bishwekerezi loshi emwa Yehova bayishiba n’obuhimi oku lufû rhwayimaga. Bayish’ilama ensiku n’amango.

17. Omu kurhanya oku lwandiko lwa 1 Abakorinti 15:58, bici rhushinganine okujira muli gano mango?

¹⁷ Ngasi Mukristu anashagalukira enderho z’okurhuliriza Paolo ayandikirâga Abakorinti lugenda obufûke. Rhugwerhe ebirhumire by’okuyerekana oku rhuyemire okucihâna loshi “omu mukolo gwa Nnawirhu,” nk’oku Paolo anaderhâga. (Osome 1 Abakorinti 15:58, NWT.) Erhi rhwakajira ogo mukolo n’okucihâna muligo, rhwanaba rhuli rhacirheganya bwinja lyo nirhu rhuyish’iba n’ogo mwishingo omu mango gayisha. Ako kanabe kasanzi kinja bwenene kulusha ngasi kantu rhwakarhanya. N’oko kwayishiyerekana oku ebi rhwajijire omu mukolo gwa Nnawirhu birhali bya busha.