1-2. Baalunku Kiristaani iimi kaore rosa hasiissannonsahu mayiraati?

XAA yannara Yihowara soqqamanno manni giddo rooreho uullate aana hegerera heeˈrate hexxo noonsa. Ayyaanunni buuraminohu boodu Kiristaanira kayinni, reyotenni kae iima heeˈrate hexxo noonsa. Kuni buuramino Kiristaani albillitte iima heeˈranno heeshsho hiittootero afate quqquxamanno. Uullate aana heeˈrate hexxo noonsarina? Iimi kao, uullate aana hegerera heeˈrate hexxo noonsarira mayi atoote abbitannorono laˈneemmo. Hexxonke iima heeˈranno ikkito uulla, iimi kaore rosa hasiissannonke.

² Umi xibbi diro heedhinore mite Yesuusi rosaano, Maganu ayyaanunni iimi hexxore borreessitanno gede assinonsa. Soqqamaasinchu Yohaannisi togo yiino: “Xa ninke Maganu oosooti; hiittoore ikkineemmoro xaara dixawinsoonninke; Kiristoosi daanno waro kayinni, ayimmasi anfeemmo daafira, iso lambeemmota egenninoommo.” (1 Yoh. 3:2) Konnira buurantino Kiristaani reyotenni kaˈe iima heeˈrate ayyaanu biso uddidhanno woyite, hiittoore ikkitannoro diaffino. Ikkollana baˈlattonsa adhitanno woyite Yihowa xaaddote laˈanno. Qullaawu Maxaafi iimi kaore mitto mittonka coye tittire dikulanno; ikkollana tenne daafira soqqamaasinchu Phaawuloosi mite hedo borreessino. Kiristoosi “roorroota, gashshaanonna wolqaataamma baala” hunanno woyite, buurantinori Yesuusi ledo ikkitanno. ‘Goofimarchu diini reyono’ baˈanno. Jeefoteno Yesuusinna ledosi gashshitannori  hattono baalunku coyi Yihowa angara higanno. (1 Qor. 15:24-28) Hatti dhagge ikkitanno yannaati! *

3. Umi Qorontoosi 15:30-32 kultanno garinni, Phaawuloosi kao noota ammanasi maaho kaaˈlitinosi?

³ Phaawuloosi kao noota ammanasi addi addi qarra dandee saˈˈanno gede kaaˈlitinosi. (1 Qorontoosi 15:30-32 nabbawi.) Isi Qorontoosi Kiristaanira, “Ane barru baala reyo agarte nooe” yiino. Phaawuloosi lede, “Efesooni moyichu ledo” gaaraminota borreessino. Phaawuloosi Efesooni gaarammanni xawira addanka moyichu ledo sharraminota coyiˈranni nooha ikkara dandaanno. (2 Qor. 1:8; 4:10; 11:23) Woy isi “moyichu” gedee akati noonsare gibbannosire Ayihudete mannanna woloota kulanni nooha ikkara dandaanno. (Soq. 19:26-34; 1 Qor. 16:9) Ikkihano ikkiro, Phaawuloosira buutote qarri iillinosi. Ikkollana isi albillitte afiˈrannota hagiirsiissanno hexxo dideino.—2 Qor. 4:16-18.

4. Kaote hexxo xaa yannara noo Kiristaana jawaachishshannohu hiittoonniiti? (Aaniidi qoolira noo misile lai.)

⁴ Heeˈnoommohu lowo geeshsha qarrissanno yanna giddooti. Mito roduuwanke beebba gawajjinoonninsa. Wolootu roduuwinke olu noo qooxeessira heedhanno daafira, beˈe yitanni heedhanno. Mitu roduuwi sabbakate loosonke hoolloonni woy agamboonni gobbuwara heedhanno; kuri roduuwa usurransara woy shinansara dandiinanniha ikkirono Yihowara soqqantanni no. Kuri baalunku roduuwi qarra dandiite ammanante Yihowa magansiˈransanni ninkera dancha lawishsha ikkitannonke. Insa xaa yannara reyituro nafa, Yihowa albillitte woyyaabbino heeshsho aannonsata affino daafira diwaajjitanno.

5. Kaote hexxora noonke ammana shoshshoggitanno gede assitara dandiitanno hedo hiittenneeti?

⁵ Phaawuloosi mitu ammanate roduuwisi, “Reyino manni kaˈˈannokkiha ikkiro, ‘gaˈa reyineemmo daafira, into ango’” yitannota gara ikkitinokki hedo biddi assidhanno gede qorowisiisinonsa. Togoo hedo Phaawuloosi yannara albaanni nafa noote. Isi Isayaasi 22:13te noota Israeelete mannira noonsa hedo qummi assinoha ikkara dandaanno. Insa Maganoho noonsa baxilli lexxanno gede assiˈra agurte insaneeto hagiirsiisate aana illachishshino. Israeelete manni “Teyo inte, gaˈa reyino” yee hedanno; tini yaatto xaa yannarano egennantinote. Ikkirono Qullaawu Maxaafi Israeelennihu gedensinsa seyinokkita kulanno.—2 Dud. 36:15-20.

6. Kaote hexxo dancha jaalla doodhate kaaˈlitannonkehu hiittoonniiti?

⁶ Yihowa reyitinore kayisannota afanke dancha jaalla doodhineemmo gede kaaˈlitannonke. Qorontoosira noo Kiristaani kao ammantannokkiri ledo jaalooˈmitannokki gede qoropha hasiissinonsa. Tennenni ninke maa ronseemmo? ‘Techora calla heeˈno’ yite heddannori ledo jaalooˈma gawajjitanno. Mittu Kiristaanchi togoo manni ledo jaalooˈmannoha ikkiro, dancha amanyootesi huˈnara dandaanno. Hattono kuni Kiristaanchi Maganu giwannore nafa assara dandaanno. Konnira Phaawuloosi, “Wodana assidhe; cubbono loossinoonte” yee kaajjishe amaalinonsa.—1 Qor. 15:33, 34.

7. Umi Qorontoosi 15:35-38 kultanno garinni, mitu manni kaote daafira mayyee xaˈminoha ikkara dandaanno?

⁷ Umi Qorontoosi 15:35-38 nabbawi. Mannu kaote daafira huluullamanno gede assitannori, “Mannu reyotenni hiitto ikke kaˈˈanno?” yite xaˈmitinoha ikkara  dandaanno. Phaawuloosi yiinore seekkine heda hasiissannonke; mayira yiniro xaa yannara lowo mannira ‘Mannu reyihu gedensaanni hiitto ikkanno?’ yitanno xaˈmora addi addi lao noonsa. Tenne daafira Qullaawu Maxaafi mayyaanno?

8. Iimi kao wodanchineemmo gede kaaˈlannonke lawishshi hiikkoonneeti?

⁸ Mittu manchi reyihu gedensaanni bisisi bushsha ikkanno. Ikkirono kalqe alame kalaqinohu hakko manchira hasiisanno biso oye kayisasira dandaanno. (Kal. 1:1; 2:7) Phaawuloosi, Maganu reyino manchira hakkawari biso oye kayisannokkita leellishanno lawishsha horoonsiˈrino. Hanni “qamade [sinde] woy wole gide” hendo. Winxoonni gidi hoqihu gedensaanni haaro ikke muˈranno. Hakku muˈrino gidi winxihuwiinni baxxanno. Phaawuloosi konne lawishsha horoonsiˈrinohu, Kalaqaanchinke reyinohura “hasiˈrino biso aanno[ta]” kulateeti.

9. Umi Qorontoosi 15:39-41 hiikku addi addi bisi noota kultanno?

⁹ Umi Qorontoosi 15:39-41 nabbawi. Phaawuloosi kalaqamu kuˈu koˈonniwiinni babbaxxannota coyiˈrino. Maala afiˈrino kalaqami addi addiho; lawishshaho, saadate, ceatenna qulxuˈmu maali babbaxxinoho. Isi gordoho arrishshonna aganu addi addiha ikkinota coyiˈrino. Phaawuloosi, “mitte beeddakko biinfilli woletewiinni baxxanno” yiino. Kuri beeddahe illete leella hooggunkerono, sayinse addi addi beeddahe noota kultannonke; mite jajjabbate, mite shiimmaaddate, mite duumete, mite waajjote, mite qolte arrishshote gedee baqqalaati. Phaawuloosi lede “gordu widi bisinna baattote widi bisi” noota coyiˈrino. Hatto yaasi mayyaate? Baattote aana maalu bisi no; iima kayinni sokkaanote gede ayyaanu bisi no.

10. Iima heeˈrate kaˈannorira hiittoo bisi heeˈrannonsa?

¹⁰ Phaawuloosi hakkiinni aane mayyiinoro wodanchi; isi togo yiino: “Reyotenni kaˈˈanno  mannitino tenne labbanno. Winxi bisi baˈˈannoho; reyotenni kaˈˈannohu heeˈrannoho.” Mannu reyihu gedensaanni maalisi hoqannotinna bushsha ikkannoti egennantinote. (Kal. 3:19) Ikkina kuni bisi ‘heeˈrannoha woy baˈˈannokkiha’ ikke kaˈˈannohu hiittoonniiti? Phaawuloosi, reyotenni kaˈe uullate aana heedhinori daafira yaano, Eeliyaasi, Elsai, hattono Yesuusi kayisino mannire coyiˈranni nooha diˈˈikkino. Phaawuloosi coyiˈranni noohu iima heeˈrate reyotenni kaˈannori yaano “ayyaanaamo biso” uddidhannori daafiraati.—1 Qor. 15:42-44.

11-12. Yesuusi reyotenni kainohu hiittoonniiti? Buurantinorino isite gedee kao kaˈannohu hiittoonniiti?

¹¹ Yesuusi uullate noo yannara maalu bisinni heeˈrino. Reyotenni kai woyite kayinni “heeshsho aanno ayyaana” ikke iimira haˈrino. Hatteente gede buuramino Kiristaani ayyaana ikke iima heeˈrate kaˈˈanno. Phaawuloosi togo yiino: “Baattote manchi dana uddiˈnummonte gede, gordunnihu danano uddiˈneemmo.”—1 Qor. 15:45-49.

¹² Yesuusi maala uddiˈre kainokkita wodancha hasiissannonke. Phaawuloosi kaote daafira borreessinore gumulanni togo yiino: “Maalunna mundee [iimiha] Maganu Gashshoote diragidhanno.” (1 Qor. 15:50) Soqqamaasinenna wolootu ayyaanunni buurantinori iima heeˈrate kaˈannohu baˈˈanno maalanna mundee uddidhe diˈˈikkino. Insa mamoote kaˈanno? Phaawuloosi tini kao albillitte ikkitannota ikkinnina, insa reyitanni heedheenna ikkinokkita coyiˈrino. Phaawuloosi 1 Qorontoosi sokka borreessi woyite mite rosaano “reyitino.” Lawishshaho reyitinori giddo mittu Yaiqoobiiti. (Soq. 12:1, 2) Wole soqqamaasinenna buurantinori kayinni yannate gedensaanni “reyitino.”—1 Qor. 15:6.

13. Yesuusi leellanno woyite mayi ikkanno?

¹³ Yesuusinna Phaawuloosi albillitte dancha yanna daggannota, yaano Kiristoosi  leellannota masaaltino. Hattenne yanna bade leellishanno malaati olaho, baattote huxanooti, dhibbahonna alamete aana ikkanni nooho wole busha coyeeti. Tini Qullaawu Maxaafi masaalo 1914nni kayisse woˈmitanni no. Kiristoosi leellinota woy moote ikke gashsha hanafinota leellishannohu wolu dhagge ikkanno malaatino no. Yesuusi Maganu Mangiste xintantinota kulannohu danchu duduwi “gosa baalate naqaashshe ikkanno gede . . . gobba baalate kulamanno; hattee yannara goofimarchu daanno” yiino. (Mat. 24:3, 7-14) Phaawuloosi ‘reyitinori’ ayyaanunni buurantino Kiristaani “Mootichu daanno [“leellanno,” NW]” woyite iima heeˈrate reyotenni kaˈannota coyiˈrino.—1 Tes. 4:14-16; 1 Qor. 15:23.

14. Kiristoosi leelle heeˈreenna reyitinori buurantino Kiristaani hiikkitanno?

¹⁴ Xaa yannara noohu buuramino Kiristaani, reyanni heeˈrenni iimi heeshsho ragiˈrate kaˈˈanno. Phaawuloosi 1 Qorontoosi 15:51, 52te tenne leellishshannore coyiˈrino; isi togo yiino: “Ninke baalunku direyineemmo; goofimarchu xurumba ufuunfanni woyite, baalunku mitte hinge illete lipheessi giddo soorrammeemmo.” Phaawuloosi coyiˈrinoti tini hedo xa woˈmitanni no. Kuri reyotenni kaˈinori Kiristoosi roduuwi lowo geeshsha hagiidhitanno; insa ‘Mootichu ledo hegerera heedhanno.’—1 Tes. 4:17.

15. “Illete lipheessi giddo” soorrame iimira haˈranno Kiristaani maa loosanno?

¹⁵ Qullaawu Maxaafi illete lipheessi giddo soorrante iimira hadhuri maa assitannoro kulanno. Yesuusi insa togo yiino: “Qeelannohanna ani hedeemmore gawalote geeshsha iillishannoha dagate aana moohiseemmo. Isi, siwiilu siqqonni gashshannonsa;  doru uduunni gede asse cancanannonsa. Tini roorre ani Aniˈyawiinni adhoommote gedeete.” (Aju. 2:26, 27) Insa Yesuusa harunsite daga siwiilu siqqonni allaaltanno.—Aju. 19:11-15.

16. Lowo manni reyo qeelannohu hiittoonniiti?

¹⁶ Buurantinori reyo qeeltannoti egennantinote. (1 Qor. 15:54-57) Reyotenni kaˈˈansa uullate aaninni bunshe hunanno ola yaano Armagedooni ola olantanno gede assitannonsa. Wolu lowo miliyoone ikkanno Kiristaani ‘lowo qarra qeele saˈˈe’ haaro alame eˈˈanno. (Aju. 7:14) Kuri haaro alame eˈannori, alba reyinohu lowo biliyoone ikkanno manni reyotenni kaˈˈanna laˈanno woyite, reyo qeelantinota farcidhanno. Reyo qeelantanno woyite hagiirrinke lowoha ikkanno! (Soq. 24:15) Yihowara woˈmunni woˈma ammanante heedhinori baalunku Addaamiwiinni ragidhino reyo nafa qeeltanno. Insa hegerera heedhanno.

17. Umi Qorontoosi 15:58 maa assineemmo gede jawaachishshannonke?

¹⁷ Xaa yannara noo Kiristaani baalunku, Phaawuloosi Qorontoosi Kiristaanira kaote daafira borreessinote sheshifachishshanno sokkara galatannoha ikka hasiissannonsa. Phaawuloosi dandiinummo deerrinni “Mootichu looso” loonseemmo gede amaalinonke; tenne amaale harunsineemmo gede assannonkehu danchu coyi noonke. (1 Qorontoosi 15:58 nabbawi.) Konne looso ammanammenna diinaggaambe loonsummoro, albillitte afiˈneemmota hagiirsiissanno heeshsho illachinsheemmo. Hatti heeshsho hendeemmohunni roore dhagge ikkitannote. Hatti yanna ‘Hawallella Mootichu looso loosanni heeˈrummo’ yineemmota ikkitanno.