1-2. Manino ro tokony hahakinto ty Kristiana iaby ty fameloma ty maty an-danitsy any?

MITAMÀ ho velo zisiky farany an-tany etoy ty ankamaroan’olo manompo ani-Jehovah henanizao. Fe misy Kristiana vitsivitsy voahosotsini-fanahy, mitamà hiay an-danitsy any. Tena tean-drozy ho hay hoe hanao akory ty fiainan-drozy lafa an-danitsy any. Ndre azy mitamà hiay an-tany etoy reo koa aza mba ta hahay mikasiky ani-zay. Fa manino? Ho hitantsika ato fa handay fitahia maro ho ani-ze ho velo zisiky farany an-tany etoy koa ty fameloma ty maty an-danitsy any. Ka ndre mitamà ho an-danitsy any tsika ndre ho an-tany etoy, le tokony hahakinto antsika ty fameloma ty maty an-danitsy any.

² Nitarihini-fanahy masi-Ndranahary ty mpianatsini-Jesosy sasany tamy taonjato voalohany, mba hanoratsy mikasiky ty fameloma ty maty an-danitsy any. Ho zao ty nihazavanini-apostoly Jaona: “Anaki-Ndranahary tsika henanizao, fe mbo tsy naseho hoe hanao akory tsika. Zao ty raha haintsika: Hanahaky azy tsika lafa haseho ie.” (1 Jaona 3:2) Tsy haini-Kristiana voahosotsy reo zany hoe hanao akory rozy lafa hovelomy ho vata ara-panahy an-danitsy any. Fe hahita ani-Jehovah ara-bakiteny rozy lafa mahazo ty valisoan-drozy. Tsy miresaky ty tsipiriany iaby mikasiky ty fameloma ty maty an-danitsy  any ty Baiboly, fe manome fanazavà vitsivitsy mikasiky ani-zay ty apostoly Paoly. Hiaraky amy Kristy voahosotsy reo lafa ie handrava “ty fanjakà noho ty fahefà voho ty hery iaby.” Hiaraky aminy koa rozy lafa hataony tsy misy sasy “ty fahafatesa, azy fahavalo farany iny.” Amy farany Jesosy miaraky amy mpiaraky manjaka aminy rey le haneky ani-Jehovah, le hampanekeny ani-Jehovah koa ty raha iaby. (1 Kor. 15:24-28) Tena ho soasoa amy zay! *

3. Laha hentea ty 1 Korintianina 15:30-32, nanampy ani-Paoly hanao ino ty finoany ty fameloma ty maty?

³ Nanampy ani-Paoly hiaritsy fitsapà sankarazany ty finoany ty fameloma ty maty. (Vakio 1 Korintianina 15:30-32.) Hoy ty asany tamy Korintianina reo: “Fa ho nimaty aho sanandro.” Nivola koa ie hoe: “Nialy tamy bibinala ta Efesosy any ... aho.” Mety aly tamy biby tamy pilasy fanaova fisà ta Efesosy ao resahiny io. (2 Kor. 1:8; 4:10; 11:23) Na ty fanoherani-Jiosy noho ty olo hafa manahaky “bibinala” io. (Asa. 19:26-34; 1 Kor. 16:9) Ndre ino zay ndre ino, le niatriky raha tena sarotsy Paoly, fe mbo nitamà ie hoe ho soa ty hoavy.—2 Kor. 4:16-18.

4. Manino ty fitamana fameloma ty maty ro manome hery ty Kristiana henanizao? (Henteo sary amy fononi-gazety toy.)

⁴ Mampatahotsy ty fotoa iainantsika henanizao. Sereseren’olo na atahora hovonoan’olo ty rahalahintsika sisany. Ty ilany mipetraky amy pilasy misy aly ka miasa loha lava. Eo koa ty mipetraky amy tany anakantsakana na andrarà ty asa fitoria, ka mety hogadrà na hovonoa mihintsy. Fe manompo ani-Jehovah avao rahalahy noho anabavintsika rey. Tena modely soa ho antsika rozy. Tsy matahotsy rozy, satria hain-drozy hoe ndre hafoin-drozy aza ty ain-drozy, le mbo misy raha soa marè hameani-Jehovah an-drozy amy hoavy.

5. Ino ty raha mety hampihena ty finoantsika ty fameloma ty maty?

⁵ Nampitandrina ty rahalahiny Paoly satria nisy olo sisany nanao ho zao: “Laha tsy hovelomy ty maty, le ‘ndao tsika hihina noho hino fa hamaray ho maty avao.’ ” Tsy vo tamy androni-Paoly ro nisy olo nieritseritsy manahaky an’io, fa ndre talohani-zay aza. Mety ho niresaky ty Isaia 22:13 ie. Resahy ao ty toe-tsaini-Israelita rey. Naleon-drozy nanao ze teatean-drozy, tany hamonjy a Ndranahary. Nivola rozy hoe: ‘Ndao hihina noho hino fa tsika raha ho maty avao hamaray.’ Vomaiky manjeky manao ho zay ty olo henanizao. Kanefa resahini-Baiboly fa raty ty vokatsini-raha zay tamy Israelita reo.—2 Tan. 36:15-20.

6. Manino ty fitamanantsika fameloma ty maty ro tokony hisy vokany amy fifiliantsika nama?

⁶ Tokony hisy vokany amy fifiliantsika nama ty fahaizantsika hoe hamelo ty maty Jehovah. Nila nanalavitsy ty finamà amin’olo tsy nino ty fameloma ty maty rahalahy ta Korinto any rey. Zao ty fianara ho antsika: Tsy mahasoa antsika ty fiaraha matetiky amin’olo tsy miasa loha mikasiky ty hoavy fa manao ze teateany avao. Hanimba ty toe-tsay noho ty fahazara soa ananani-Kristiana raha zay. Mety hitariky azy hana fomba fiaina hala-Ndranahary mihintsy aza olo rey. Zay ro nahavy ani-Paoly nananatsanatsy marè hoe: “Mieritsereta ka manaova ty marina, sady ka zatsy manota.”—1 Kor. 15:33, 34.

7. Ino ty fanontanea mety hapetrakin’olo sisany mikasiky ty fameloma ty maty, laha hentea ty 1 Korintianina 15:35-38?

⁷ Vakio 1 Korintianina 15:35-38. Mety hanontany ho zao ty olo raiky laha teany hisalasala mikasiky fameloma ty maty tsika: “Akory  ty fomba hameloma ty maty?” Soa tsika laha mandiniky ty valin-tenini-Paoly, satria samby mana ty hevitsiny mikasiky ty fiaina afarani-fahafatesa ty olo maro henanizao. Fe ino ty ampianarini-Baiboly?

8. Ino ty ohatsy manampy antsika hahatakatsy mikasiky ty fameloma amy maty ho an-danitsy any?

⁸ Lafa maty ty olo raiky, le mihasimba ty vatany. Fe Azy namoro ty kila raha iaby iny afaky manome azy vata mifanaraky amy ze ilàny. Raha tsy nisy aza vitany ty nampisy azy. (Gen. 1:1; 2:7) Nampiasa fanohara Paoly mba hampisehoa hoe tsy mila ani-vatan’olo iny taloha iny Ndranahary. Mba eritsereto moa voan-tsako rey. Lafa atseliky ie, le mitombo bakeo manjary tsako vaovao. Tsy tena mitovy amy voan-tsako natseliky iny sasy ie. Ho zay koa hoasani-Paoly ty ataoni-Mpamoro antsika iny. Afaky ameany “vata araky ze teany” tsika.

9. Laha resaky vata ro hentea, ino ty volanini-​1 Korintianina 15:39-41 mikasiky ani-zay?

⁹ Vakio 1 Korintianina 15:39-41. Hitani-Paoly hoe misy tsy itovizany ty zavaboary iaby. Samby hafa, ohatsy, ty nofotsini-aomby, voro, noho fia. Nivola ie hoe hitantsika amy lanitsy eny ty tsy fitovizani-masoandro noho ty vola. “Samby mana ty voninahitsiny”, hoasany, “ty basia.” Marina zay, ndre mety tsy hitantsika maso aza. Mivola ty mpahay siansy fa misy karazany ty basia, ao ty bevata, ao ty kelikely, misy mena, foty, zony manahaky masoandro io. Nivola koa Paoly hoe “hafa ty vatani-ze an-danitsy any, le hafa ty vatani-ze an-tany etoy.” Manao akory zao? Nofotsy ty vatantsika an-tany etoy, fa vata ara-panahy manahaky ty ani-anjely reo ty an-drozy an-danitsy any.

10. Vata manao akory ro hananani-azy hovelomy an-danitsy any rey?

¹⁰ Henteo amy zay raha nivolanini-Paoly toy: “Manahaky ani-zay koa ty fameloma ty maty. Vata mety lo ie lafa ambolè, fa vata tsy mety lo lafa velomy.” Haintsika hoe lafa maty ty olo raiky, le mihasimba ty vatany bakeo mimpoly lemboky. (Gen. 3:19) Ka manao  akory ty hahavy ani-vata iny ho “tsy mety lo lafa velomy”? Tsy olo nivelomy an-tany etoy rey ro nivolanini-Paoly, ohatsy hoe azy nivelomini-Elia, Elisa noho Jesosy rey. Olo hovelomy amy maty hana “vata ara-panahy” an-danitsy any ro niresahini-Paoly eo.—1 Kor. 15:42-44.

11-12. Ino ty fiovà niseho tamy Jesosy lafa ie nivelomy tamy maty, le akory ty hisehoani-raha manahaky ani-zay amy voahosotsy reo?

¹¹ Vata ara-nofo ro nananani-Jesosy tamin’ie tan-tany etoy, fe lafa nivelomy ie le “nanjary fanahy mahavelo” bakeo nimpoly an-danitsy any. Manahaky ani-zay koa Kristiana voahosotsy reo. Hamea vata ara-panahy rozy lafa hovelomy. Nanazava Paoly hoe: “Manahaky ty andaisantsika ty sorakini-azy natao tamy lemboky iny ro handaisantsika koa ty sorakini-azy baka an-danitsy any iny.”—1 Kor. 15:45-49.

¹² Nafana fo Paoly lafa niresaky mikasiky ty fameloma ty maty. Tena ilà ty mitiaro hoe tsy namea vatan’olombelo Jesosy lafa nivelomy. Nihazavanini-Paoly ty antoni-zay lafa narìny ho tampitsy ty raha niresahiny. Hoy ty asany: “Tsy afaky mandova ty Fanjakà-Ndranahary” an-danitsy any “ty nofotsy noho ty lio.” (1 Kor. 15:50) Tsy hiaraky amy vata mety lò misy nofotsy noho lio sasy ty apostoly noho ty voahosotsy hafa lafa hovelomy an-danitsy any. Fe ombia rozy ro hovelomy? Nivola Paoly hoe raha mbo hiseho amy hoavy fameloma io fa tsy hoe afara ty ahafatesan-drozy. Tamy Paoly nanoratsy ty 1 Korintianina, le “fa nimaty” ty mpianatsy sisany, ohatsy hoe apostoly Jakoba. (Asa. 12:1, 2) Tafara atoy vo “nimaty” apostoly sisany rey noho ty voahosotsy hafa.​—1 Kor. 15:6.

13. Akory ty hahaiza hoe fa manatriky Jesosy?

¹³ Ndre Jesosy ndre Paoly, le samby niresaky mikasiky ty fotoa raiky hiavaky amy tantara, tsy ino io fa ty fanatrehani-Kristy. Amy fotoa io, le hisy aly, horohoron-tany, arety noho  raha raty hafa hiseho amy tany toy iaby. Hitantsika hoe tanteraky faminaniani-Baiboly io liany tamy 1914. Mbo hisy famantara hafa bevata koa. Nivola Jesosy fa hotorỳ “amy tany toy iaby” ty vaovao soa hoe fa manday an-danitsy any ty Fanjakà-Ndranahary, “ho vavolombelo amy firenena iaby, zay vo ho avy ty farany.” (Mat. 24:3, 7-14) Amy “fanatrehani-Tompo” io koa hoasani-Paoly ro hameloma ani-Kristiana voahosotsy “fa nimaty” rey ho an-danitsy any.​—1 Tes. 4:14-16; 1 Kor. 15:23.

14. Hanao akory ze Kristiana voahosotsy maty anatini-fanatrehani-Kristy?

¹⁴ Avy le hovelomy an-danitsy any ze Kristiana voahosotsy maty henanizao. Manamafy ani-zay ty safàni-Paoly amy 1 Korintianina 15:51, 52 hoe: “Tsy ho maty iaby tsika, fa tsika iaby reo hovà, anatini-fotoa kelikely, indraiky mipỳ maso avao, lafa maneno ty trompetra farany.” Tanteraky raha nivolanini-Paoly reo henanizao! Tena ho falifaly rahalahini-Kristy reo lafa hovelomy, satria “hiaraky amy Tompo avao” rozy.​—1 Tes. 4:17.

15. Ino ty asa mandiny ani-azy hovà anatini-“indraiky mipỳ maso” rey?

¹⁵ Resahini-Baiboly amintsika hoe hanao ino an-danitsy any azy hovà anatini-“indraiky mipỳ maso” rey. Nivola tamin-drozy Jesosy hoe: “Ze mandresy ka manatanteraky ty asako zisiky farany, le hameako fahefà amy firenena reo. Le hifehy ty olo amy tehim-by ie, ka ho potipotiky manahaky valàny tanimanga rey rozy. Hameako fahefà ie, manahaky ze niazoko tamy Babako.” (Apok. 2:26, 27) Hanaraky ani-Jesosy rozy ka hifehy ty firenena iaby amy tehim-by.​—Apok. 19:11-15.

16. Amy fomba akory ty handreseani-Kristiana voahosotsy noho olo hafa tsy mivaliky rey ty fahafatesa?

¹⁶ Mazava ho azy fa ho resini-Kristiana voahosotsy reo ty fahafatesa. (1 Kor. 15:54-57)  Lafa hovelomy rozy, le afaky handramby anjara amy fangalà ty raha raty iaby an-tany etoy amy aly Hara-magedona. An-tapitrisany ty Kristiana ho tafaboaky “amy fijalea bevata” ka hiay amy tontolo vaovao ao. (Apok. 7:14) Ho resy ndraiky ty fahafatesa amy zay. Hahita maso ani-zay azy ho tafaboaky velo an-tany etoy rey lafa hovelomy ndraiky ty olo an-tapitrisany nimaty taloha any. Mba eritsereto moa ty ho hafaleantsika amy fotoa zay! (Asa. 24:15) Handresy ty fahafatesa nilovà baka amy Adama koa amy zay ze olo iaby tsy mivaliky amy Jehovah. Afaky hiay zisiky farany rozy.

17. Ino ty tokony hataontsika laha hentea ty 1 Korintianina 15:58?

¹⁷ Tokony ho falifaly iaby lafa atao Kristiana henanizao, satria nanoratsy safà mampahery mikasiky fameloma ty maty ho ani-Korintianina reo Paoly. Vomaiky aza tsika tokony hanaraky ani-torohevitsini-Paoly iny. Nivola ie fa tokony hanao ze fara herintsika “amy asani-Tompo” tsika. (Vakio 1 Korintianina 15:58.) Laha manao ze fara herintsika avao tsika amy asa io, le hahazo fiaina feno hasambara amy hoavy. Mbo soa marè mandilatsy ani-ze raha mety ho eritseretintsika ty ho hitantsika amy zay. Ho hitantsika soa koa hoe tsy nisera mihintsy ty asa mafy nataontsika amy Tompo ao.