1-2. Aiseā e tatau ai i Kerisiano uma ona aʻoaʻoina atili le toetū i le lagi?

O LE toʻatele o tagata o loo auauna iā Ieova i aso nei, e faamoemoe e ola e faavavau i le lalolagi. Ae o le vaega totoe o Kerisiano faauuina, e faamoemoe e toetutū e ola i le lagi. E naunau nei Kerisiano faauuina e fia iloa pe e faapeʻī o latou olaga o le a iai i le lagi. Ae faapefea i latou e faamoemoe e ola i le lalolagi? O le a tatou aʻoaʻoina i lenei suʻesuʻega, o le toetū i le lagi o le a maua ai e i latou e faamoemoe e ola e faavavau i le lalolagi faamanuiaga. Pe e tatou te faamoemoe la e ola i le lagi po o le lalolagi, e tatau ona tatou naunau e aʻoaʻo atili e faatatau i le toetū i le lagi.

² Na faagaeeina e le Atua nisi o soo o Iesu i le uluaʻi senituri e tusi e faatatau i le faamoemoe mo le lagi. Na faamatalaina e le aposetolo o Ioane: “O i tatou o le fanau a le Atua, ae e leʻi faailoa maia pe e faapeʻī i tatou. E tatou te iloa pe a faaali mai o ia, o le a pei i tatou o ia.” (1 Ioa. 3:2) O lea, e lē iloa e Kerisiano faauuina pe faapeʻī le olaga o le a latou ola ai pe a faatutūina aʻe i le lagi o ni tino agaga. O lea, o le a mafai ona latou vāai iā Ieova pe a maua lo latou taui. E lē o auʻiliʻili maia e le Tusi Paia faamatalaga uma e faatatau i le toetū i le lagi, ae na taʻua e le aposetolo o Paulo nisi o faamatalaga e faatatau i lenā toetū. O le a faatasi le ʻaufaauuina ma Keriso pe a “ia faaumatia malo uma, ma pule, ma ē malolosi uma.” O le a faaumatia foʻi e Iesu le “fili mulimuli,  o le oti.” O le mea mulimuli lava e faia e Iesu ma ana pule lagolago, o le tuu atu lea o i latou lava ma mea uma iā Ieova. (1 Kori. 15:24-28) Maʻeu se taunuuga matagofie o le a i ai! *

3. E pei ona taʻua i le 1 Korinito 15:30-32, o le ā na fesoasoani iā Paulo e fai ona o lona talitonuga i le toetū?

³ O le talitonuga o Paulo i le toetū na fesoasoani iā te ia e onosaʻia ai faafitauli eseese. (Faitau le 1 Korinito 15:30-32.) Na ia faapea atu i tagata Korinito: “O aso uma ou te fesagaʻi ai ma le oti.” Na tusi foʻi Paulo: “Na ou tau ma manufeʻai i Efeso.” Atonu na faasino atu Paulo i se taimi na ia tau ai ma ni manufeʻai i se malae na fai ai faafiafiaga i Efeso. (2 Kori. 1:8; 4:10; 11:23) Pe atonu foʻi na ia faasino atu i tagata sauā Iutaia ma isi na pei o ni “manufeʻai.” (Galu. 19:26-34; 1 Kori. 16:9) Po o le ā lava le tulaga, ae na feagai Paulo ma ni lamatiaga mataʻutia. Peitaʻi, na iā te ia pea se vaaiga saʻo i le lumanaʻi.​—2 Kori. 4:16-18.

4. E faapefea ona faamalosia Kerisiano i aso nei ona o le faamoemoe o le toetū? (Tagaʻi i le ata i le faavaa.)

⁴ O loo tatou ola i taimi e sili ona mataʻutia. Ua aafia nisi o tatou uso ma tuafāfine i sauāga. O nisi o loo ola i vaipanoa o loo matuā vevela ai taua ma ua matuā lē saogalemu lava. Ae o nisi o loo auauna pea iā Ieova i atunuu e iai faasāsāaga i le galuega talaʻi po o atunuu foʻi ua matuā faasā ai, e ui ina lamatia ai o latou ola ma lē maua ai so latou saʻolotoga. Peitaʻi, e lē o faavaivai nei uso ma tuafāfine i la latou tapuaʻiga iā Ieova, ma ua avea ai i latou ma faaaʻoaʻoga lelei mo i tatou. E latou te lē fefefe ona ua latou iloa, e tusa lava pe latou te feoti ai i le taimi lenei, ae e iai se taui e sili ona mataʻina ua folafola mai e Ieova mo i latou i le lumanaʻi.

5. O le ā le manatu sesē e faavaivaia ai lo tatou faatuatua i le toetū?

⁵ Na lapataʻia e Paulo ona uso i le mataʻutia o le manatu sesē na iai i nisi: “Afai e lē toe faatutūina mai o ē ua oti, ʻseʻi o tatou aai la ma inu auā o a taeao e tatou te feoti ai.’” Na iai i tagata lenā manatu a o leʻi oo i aso o Paulo. Atonu na sii mai e Paulo le Isaia 22:13, lea o loo taʻua ai uiga na iai i tagata Isaraelu. Na pupū na tagata i mea faafiafia nai lo o le mafuta vavalalata atu i le Atua. O le mea moni, na manatu na tagata Isaraelu, “ona e puupuu le olaga, e tatau la ona faafiafia o tatou olaga i le taimi lenei.” Ua taatele foʻi lenā manatu i aso nei. Peitaʻi, o lenā manatu sesē na oo ai i tagata Isaraelu ni iʻuga leaga.​—2 No. 36:15-20.

6. E faapefea i le faamoemoe o le toetū ona taaʻina ai i tatou pe a filifili a tatou uō?

⁶ O le mea moni, ua tatou iloa e mafai e Ieova ona faatutū mai ē ua oti. E tatau la ona taaʻina o tatou mafaufau i lenā faamoemoe pe a filifili a tatou uō. Na manaʻomia e uso i Korinito ona puipuia i latou mai i le faauō atu i ē e lē talitonu i le toetū. O le lesona mo i tatou i aso nei: E leai se mea lelei e maua mai i le faifaimea e lē aunoa ma ē e pupū i mea faafiafia ae e lē ano i le lumanaʻi. O le faauō i na ituaiga tagata, o le a faaleagaina ai uiga ma masaniga faa-Kerisiano. O le mea moni, e ono taaʻina atu ai se Kerisiano e ola i se olaga agasala e inosia e le Atua. O le māfuaaga lenā na naunau ai Paulo e fautua atu: “Inā ala mai ia i le amiotonu, ma aua le faia pea le agasala.”​—1 Kori. 15:33, 34.

7. E pei ona taʻua i le 1 Korinito 15:35-38, o le ā le fesili na ono fesili ai se tasi e faatatau i le toetū?

⁷ Faitau le 1 Korinito 15:35-38. Atonu na fesili se tasi o loo taumafai e faatupu le masalosalo i isi i le toetū: ʻE faapefea ona toe faatutūina mai ē ua oti?’ E lelei ona tatou manatunatu i le tali a Paulo, ona e toʻatele tagata i aso nei e iai o latou lava talitonuga i le mea e tupu i le tagata pe a oti. Ae o le ā le aʻoaʻoga a le Tusi Paia?

8. O le ā le talafaatusa e fesoasoani iā i tatou e malamalama ai i le toetū e ola i le lagi?

⁸ Pe a oti se tagata, e pala lona tino. Peitaʻi, e mafai e Lē na foafoaina le vateatea mai i le leai o se mea, ona faatūina lenā tagata i se tino fou. (Kene. 1:1; 2:7) Na faaaogā e Paulo se talafaatusa e faaalia ai, e lē manaʻomia e le Atua ona toe faatū mai le tagata i le tino na iai ina ua oti. Seʻi mafaufau i se fatu saito po o se isi lava fatu laau. O se tamaʻi fatu laau e totō i le palapala e ola mai ma avea ma laau fou, o le laau lea ua ola mai i le fatu e matuā eseese lava ma le tamaʻi fatu na totō. Na faaaogā e Paulo lenei faatusatusaga e faaalia ai, e mafai e Lē na foafoaina i tatou ona saunia “se tino e pei ona ia finagalo i ai.”

9. E tusa ai ma le 1 Korinito 15:39-41, o ā ituaiga tino eseese o loo taʻua ai?

⁹ Faitau le 1 Korinito 15:39-41. Na mātauina e Paulo le matuā eseese o tino na foafoaina e le Atua. O se faataʻitaʻiga, e ese tino o povi mai i manulele ma iʻa. Na ia faapea mai, e tatou te vaaia i le lagi le eseesega o le lā ma le masina. Na ia mātauina foʻi, “e eseese pupula o lea fetu ma lea fetu.” Atonu e lē iloa e o tatou mata, ae e iai fetu ua taʻua e saienitisi o fetu tetelē lanu mūmū, fetu lāiti papaʻe ma fetu samasama e pei o lo tatou lā. Na taʻua foʻi e Paulo “e iai tino faalelagi ma tino faalelalolagi.” O le ā le uiga o le tala a Paulo? I le lalolagi, e iai tino faaletino, ae i le lagi e iai tino agaga e pei o tino o agelu.

10. O le ā le ituaiga tino o le a toe faatutū aʻe ai i latou e ola i le lagi?

 ¹⁰ Seʻi mātau le faamatalaga o loo sosoo mai a Paulo: “E faapena foʻi le toetutū mai o ē ua oti. Ua lūlūina le tino e pala, a ua toe faatūina mai i le tino e lē pala.” Pe a oti le tagata e pala lona tino ma toe foʻi i le efuefu. (Kene. 3:19) O lea la, e faapefea ona ʻtoe faatūina mai se tasi i le tino e lē pala’? E lē o talanoa Paulo i le toe faatūina mai o se tagata e ola i le lalolagi e pei o i latou na faatutūina e Elia, Elisaia ma Iesu. Ae na uiga atu Paulo i le toe faatūina mai o se tasi i se tino faalelagi po o le “tino faaleagaga.”​—1 Kori. 15:42-44.

11-12. O le ā le suiga na oo iā Iesu ina ua toe faatūina o ia, ma o le ā le suiga talitutusa o le a oo i le ʻaufaauuina?

¹¹ A o iai Iesu i le lalolagi na iai lona tino faaletino. Peitaʻi, ina ua toe faatūina mai na ʻavea o ia ma agaga e foaʻi mai ai le ola,’ ma toe afio ai o ia i le lagi. E faapena foʻi Kerisiano faauuina, o le a faatutū i latou i ni tino agaga e ola i le lagi. Na faamatalaina e Paulo: “E pei ona faia i tatou i foliga o lē na faia mai i le efuefu, e faapena foʻi ona foliga i tatou i lē e faalelagi.”​—1 Kori. 15:45-49.

¹² Ua oo le talanoaga a Paulo i le mea sili ona tāua e faatatau i le toetū. E tāua lo tatou iloa e leʻi faatūina aʻe Iesu i se tino faaletagata. Na faamatilatila mai e Paulo: ʻE lē mafai ona fai le malo o le Atua i le lagi ma tofi o i latou ua iai tino aano ma toto.’ (1 Kori. 15:50) E lē faatutūina i le lagi le ʻauaposetolo ma isi ʻaufaauuina i tino e pala e faia aʻe i aano ma toto. O afea e toe faatutūina ai i latou? Na faamatilatila foʻi e Paulo o le a faatutūina i latou i le lumanaʻi, o lona uiga e leʻi faatutūina i latou i le taimi na maliliu ai. I le taimi na tusia ai e Paulo lana tusi muamua i Korinito, “ua maliliu” isi soo e pei o le aposetolo o Iakopo. (Galu. 12:1, 2) Mulimuli ane “maliliu” isi aposetolo ma le ʻaufaauuina.​—1 Kori. 15:6.

13. O le ā le faailoga o le faatasi mai o Iesu?

¹³ E iai se taimi faapitoa i le talafaasolopito na faasino atu i ai Iesu ma Paulo, o le faatasi mai o le Keriso. O le faailoga o le faatasi mai o le Keriso e iloa i taua, faamaʻi ma isi mea o le a tutupu i le lalolagi. Ua tatou vaaia le faataunuuina o le valoaga lenei a le Tusi Paia talu mai le 1914. Ae e iai foʻi se isi vala mataʻina o lenei valoaga. Na fetalai Iesu, o le a talaʻia le tala lelei o le Malo o le Atua “i le lalolagi atoa e fai ma molimau i atunuu uma; ona oo mai ai lea o le iʻuga.” (Mata. 24:3, 7-14) Na taʻua e Paulo, “o le faatasi mai o le Alii” o le taimi foʻi lenā e faatutū ai Kerisiano faauuina “ua maliliu.”​—1 Tesa. 4:14-16; 1 Kori. 15:23.

14. O le ā e tupu i le ʻaufaauuina e maliliu i le taimi o le faatasi mai o le Keriso?

¹⁴ O Kerisiano faauuina e maliliu i aso nei, e otometi lava ona faatutūina e ola i le lagi. E faamaonia lenā manatu i upu a Paulo o loo faamauina i le 1 Korinito 15:51, 52: “E lē momoe i tatou uma i le oti, ae e suia i tatou uma, e vave lava e pei o le emo o le mata, i le taimi e ili ai le pū mulimuli.” O loo faagasolo le faataunuuina o upu nei a Paulo. Pe a toe faatutūina aʻe uso nei o Keriso, o le a faaatoatoaina lo latou olioli ma “nonofo faatasi pea ma le Alii.”​—1 Tesa. 4:17.

15. O le ā le galuega e faia e i latou o le a suia faafuaseʻi e pei o le “emo o le mata”?

¹⁵ Ua faamatala mai e le Tusi Paia galuega e faia i le lagi e i latou e suia faafuaseʻi e pei o le “emo o le mata.” Na fetalai atu Iesu iā i latou: “O lē foʻi e manumalo ma mulimuli i aʻu galuega seʻia oo i le iʻuga, ou te tuuina atu iā te ia le pule i atunuu, ma e pule foʻi o ia i tagata i le tootoo uʻamea, ina ia faaumatia i latou e pei ona nutililiiina  o ipu ʻele, e pei ona ou maua mai i loʻu Tamā.” (Faaa. 2:26, 27) O le a latou mulimuli i lo latou Taʻitaʻi, i le faia o le galuega o le pule i atunuu i le tootoo uʻamea.​—Faaa. 19:11-15.

16. E faapefea ona manumalo le toʻatele o tagata mai i le oti?

¹⁶ O le mea moni, o le a manumalo le ʻaufaauuina i le oti. (1 Kori. 15:54-57) O le toe faatutūina o i latou, o le a mafai ai ona latou maua ni tulaga e faia ai so latou sao i le tafiesea o le amioleaga, i le taua o Amaketo o loo fotuaʻi mai. E faitau miliona isi tane ma fafine Kerisiano o le a “sao mai i le puapuaga tele” ma faasaoina atu i le lalolagi fou. (Faaa. 7:14) O le a molimauina foʻi e i latou na le isi manumalo mai i le oti, o le toetutū lea o le faitau piliona o tagata na maliliu i le taimi ua teʻa. Seʻi faaāta le olioli o le a i ai pe a tupu lenā manumalo mataʻina! (Galu. 24:15) O i latou uma e faamaoni atoatoa iā Ieova, o le a manumalo i le oti na tuufaasolo mai iā Atamu ma mafai ai ona latou ola e faavavau.

17. Pe a tatou manatunatu i le 1 Korinito 15:58, o le ā e tatau ona tatou faia i le taimi lenei?

¹⁷ E ao i Kerisiano uma o loo ola i le taimi lenei, ona lotofaafetai i upu faalaeiau a Paulo e faatatau i le toetū na tusi atu ai i tagata Korinito. Ua iā i tatou la māfuaaga uma e faaalia ai lo tatou talisapaia o le fautuaga a Paulo ina ia faia se sao atoatoa i le taimi lenei i le “galuega a le Alii.” (Faitau le 1 Korinito 15:58.) Pe a tatou faamaoni i le faia o se sao atoatoa i lenā galuega, o le a tatou tofo ai i se lumanaʻi e tumu i le olioli. O le a sili atu ona matagofie lenā lumanaʻi nai lo so o se mea matagofie e tatou te mafaufau i ai. O le a faamaonia ai, e lē iʻuvale a tatou galuega fitā i le Alii.