1-2. Lamo Akristo ankfumɔ oyɛwɔ ladjɛ ndjila yimba l’ekfundwelo kɛ t’olongo?

EFULA k’anto wakambela Yehova win’ɔsɔ walekɔ la nkongi djɛ ndɔsɛna lotshinda lotshinda lá looko. Koko, antshikadji y’Akristo w’ankfutami w’avuta, ndapɛyɛka djɛ ndjewa wopo wɔ lowiko lɔwɔ iyongotoyala l’olongo. Ko kɛkɔnge kɛ walekɔ la nkongi djɛ nsɛna lá looko ɔkɔpawɔ ndjewa? Etengo ɔkɔpaso nyɛna, ekfundwelo ket’olongo kengoyakala ɛtshɔkɔ efula edjinge le walekɔ la nkongi djɛ nsɛna lotshinda lotshinda lá looko. Djɛkondeke kaanga tolekɔ la nkongi djɛ nsɛna l’olongo kana lá looko, iso ladjɛ ndjila yimba l’ekfundwelo ket’olongo.

² Ndjambe alɔndjɛka ambeki wa Yeso amɔtshi wel’ɛtɛndɔ kɛ ntondo dj’iwɔ nfuna akambo walendana l’ekfundwelo ket’olongo. Ɔpɔstɔlɔ Djɔanɛ apakisolaka ante: ‘Tolekɔ win’ɔsɔ wana wa Ndjambe, koko wopo w’isongoyala wotewama. Iso ndjewaka ente wina wɔ ndɔngɛnama, tongoyala etengo nde.’ (1 Dj. 3:2) Djɛkondeke Akristo w’ankfutami w’avuta wapewe wopo w’iyongoyala wina wiyongokfundɔ t’olongo la demba djɛ nyuma. Koko wina w’iyongowa lofuto lɔwɔ, iwɔ wangɛna Yehova. Bible apatepela ikakambo inkfumɔ yelendana l’ekfundwelo ket’olongo, koko ɔpɔstɔlɔ Poolo atepelaka akambo amɔtshi walendana l’ekfundwelo kɛsɔ. Ankfutami w’avuta wangoyala esanga la Kristo wina wɔ ‘ndongotshita enkfumi enkfumɔ, mbandji inkfumɔ la nkfulu inkfumɔ’ edjinge ‘ontonyi w’ekomo, nyɔyi.’ L’ekomo, Yeso nya wangɔlɔndjɛ lande wangoyakitshɛ iyɔmɛlɛ  edjinge nkete nkfumɔ lanse kɛ Yehova. (1 Kɔ. 15:24-28) Ɔsɔngo eleko kɛsɔ iyongoyala wɔlɔ! *

3. Etengo 1 Kɔrɛntɔ 15:30-32 ɛnyɛwɔ, djawo djɛ Poolo t’ekfundwelo iyokotshɛ djɛ nangha nge?

³ Djawo djeyalisa la Poolo lá ekfundwelo djokotshɛka djɛnde nkfulumeyɛ ekakasano wetshikitanyi. (Wala 1 Kɔrɛntɔ 15:30-32.) Nde ashimelaka ase Kɔrɛtɔ ante: ‘Nfu inkfumɔ lahandaki nyɔyi.’ Poolo afunaka lonkina ante: ‘Nanaka la nyama yɛ mpango lá Ɛfɛsɛ.’ Mbala imɔtshi Poolo ananaka l’anyama yɛ nsɔsɔlɔ l’edjena k’etombo kel’Ɛfɛsɛ. (2 Kɔ. 1:8; 4:10; 11:23) Kana koko nde akanelaki ɛhɛnyɔhɛnyɔ weyisa me ase Juda edjinge me anto ankina wayalisa etengo ‘nyama yɛ mpango.’ (Ele. 19:26-34; 1 Kɔ. 16:9) Kaanga nkambo djɛkɔnge dj’indakɔpe ntepela, Poolo apomanaka l’ekakasano wɛ nkekete efula. Koko, nde akindjɛka ndjala l’ikanyi yɛ wɔlɔ lá kɛnɛ kelendana l’etsho weyaye.​—2 Kɔ. 4:16-18.

4. Wopo wɔkɔnge nkongi dj’ekfundwelo okeketshɛwɔ Akristo lɔɔko kɛnɛ? (Lenda ntshango dje lá loposo.)

⁴ Tolekɔ nsɛna lá ntena djɛ wolo efula. Wananyɔ waso wamɔtshi wambɛna ndjolo l’akambo wa mpango. Wamɔtshi wasɛna l’ewila wonanawɔ ambandji efula la wepalekɔ vu. Ankina wakambela Yehova l’ewila w’iyomboshimba olemo w’ipoposanyɛ, edjnge wakindjɛ ndokambela kaanga okokawɔ nvundama ankando kana ndjakema. Koko, wananyɔ l’ankaana inkfumɔ yɛsɔ, walekɔ nkindjɛ ntɛmɔla Yehova edjinge walekɔ ndjɔmbɔmba yɛ wɔlɔ leso. Iwɔ wapalekɔ la wɔma ladjikɛnde iwɔ ndjewaka ambɔ kaanga tombovɔ l’andja wanɛ, Yehova ambalaka djɛ ndapɛyɛ kɛnɛ keleka wɔlɔ l’etsho weyaye.

5. Ikanyi yɛkɔnge yɛ nyɛtshi ikoka nkitshakitshɛ djawo djɛso tá ekfundwelo?

⁵ Poolo apɛyɛka wananyɔ wande ndjewo lá kɛnɛ kelendana l’ikanyi yɛ nyɛtshi yeyalaki l’anto amɔtshi ambɔ: ‘Ntsha wanɛ wambovɔ wapangokfundɔ, mbɔkoko nyontshɔ ‘tɔle, tɔnɔ, ladjikɛnde lomi tongovɔ.’’ Anto amɔtshi wayalaki l’ikanyi yɛsɔ kaanga lá ntondo k’etsho wɛ Poolo. Mbala imɔtshi nde awalaka etepela welekɔ lá Izaya 22:13, wɛnyɛ ekfumbo keyalaki la ase Isariyɛlɛ. L’edjena k’iwɔ mpona djɛ ndjala entshupa la Ndjambe, iwɔ wahonaka ngo djɛ ndaasasangɛ iyɔmɛlɛ. Nyɛnamaka ente, ase Isariyɛlɛ wayalaki l’ikanyi y’ente, ‘tosasange lɔɔko, ladjikɛnde topewe kɛnɛ kengotokomela lomi.’ Ikanyi yɛsɔ imbotshanghana edjinge lɔɔko kɛnɛ. Koko, Bible nyɛnyɛka eposelo wɛ nyɛtshi wewisa owila w’Isariyɛlɛ m’ikanyi yɛ nyɛtshi yɛsɔ.​—2 Ɛk. 36:15-20.

6. Wopo wɔkɔnge ntombe yɛso okokawɔ ntokfumbola lá kɛnɛ kelendana la djawo djɛso l’ekfundwelo?

⁶ Nsɔsɔlɔ, ndjewa ente Yehova nkoka nkfundola wanɛ wambovɔ ladjɛ ntotshinda djɛ nsɔna wanɛ wakoka ndjala tolongo tɔso. Wananyɔ welá Kɔrɛtɔ wayalaka ladjɛ ntona djɛ ndjala tolongo la wanɛ wapawola ekfundwelo. Olakanyelo w’owaso lanɛ nde: Lako wɔlɔ ndjekesanela la wanɛ wila yimba ngo l’esasa wɛ lɔɔko kɛnɛ ko wapile yimba l’etsho weyaye. Ndjekesanela l’anto wanghɔsɔ, nkoka ntshita tokanyi tɔso edjinge nkfumbo djɛso dj’Akristo. Nkambo djɛsɔ nkoka ntotshinda dj’iso ndjala la yopo yɛ lowiko yepawolama me Ndjambe, ntepela ente nangha mpekanto. Djɛkondeke, Poolo ndotewola ante: ‘Nyokane yimba lá wopo wɔ wɔlɔ edjinge nyotananghake mpekanto.’​—1 Kɔ. 15:33, 34.

7. Etengo 1 Kɔrɛntɔ 15:35-38 ɛnyɛnde, woopó wɔkɔnge anto amɔtshi iyakoka ndawopóla lá kɛnɛ kelendana l’ekfundwelo?

⁷ Wala 1 Kɔrɛntɔ 15:35-38. Onto wɔkɔpa  ntshinda anto ankina dj’iwɔ ndjala l’ehamo l’ekfundwelo akokaki ndjopóla ante: “Wopo wɔkɔnge edjo iyongokfundɔ?” Alekɔ wɔlɔ iso ndjila yimba lá nsakiso kɛ Poolo, ladjikɛnde efula k’anto lɔɔko kɛnɛ walekɔ la tokanyi tɔwɔ iyɔmɛlɛ lakɛnɛ kekomela onto m’ɔkɔngɔ wɔ nyɔyi. Ko kɛkɔnge kelakanyɛ Bible?

8. Ndjɔmbɔmba kɛkɔnge kekoka ntokotshɛ dj’iso nsipisoyɛ wopo wongoyala ekfundwelo kɛ ntɔsɛna l’olongo?

⁸ Wina wovɔ onto, demba djɛnde mpɔndaka. Koko kanga lotongisa andja ipa l’okotshɔ w’ekete kenkina tshɛ, nkoka nkfundola onto wɔkɔ, edjinge ndɔpɛyɛ demba nkina djɛ wɔlɔ. (Ewa. 1:1; 2:7) Poolo apɛyɛka ndjɔmbɔmba kɛmɔtshi djɛ nyɛnyɛ ante Ndjambe apalekɔ la djonyi djɛ nkfundola onto ngo la demba djɛnde djɛ ntondo. Kokanela lá kɛnɛ kelendana la ‘lokopo,’ kana ‘nkonakona nkina nkfumɔ.’ Wina wokonawɔ lokopo lá looko longoposake edjinge longokomake otamba onkina wɔ bango. Otamba wɔ bango wɔsɔ ntshikitanaka la lowambo lɔ daambi liyokonaki. Poolo akambaka la ndjɔmbɔmba kɛsɔ djɛ nyɛnyɛ ante Ontongi wɔso nkoka mpɛyɛ onto wombovɔ ‘demba djɛ wopo wɔkɔpande.’

9. Kɛkɔnge kɛ 1 Kɔrɛntɔ 15:39-41 otepelande lá kɛnɛ kelendana la wopo w’alemba?

⁹ Wala 1 Kɔrɛntɔ 15:39-41. Poolo atepelaka ante Ndjambe atatonga alemba ankfumɔ ngo wopo ɔmɔ. Ndjɔmbɔmba, alemba watshikitanyi walekɔ, demba dj’anyama, djɛ tofulu, edjinge djɛ nse. Nde afunaka ante, l’olongo tɔngɛnake otshikitano wolekɔ l’antenyɛ wina nya ngɔndɔ. Edjinge nde ɛnyɛka ante ‘yɔtɔ la yɔtɔ ilekɔ la lumo lɔnde.’ Nsɔsɔlɔ, kaanga isopakoke nyɛna otshikitano wɔsɔ la wiso waso, ase siansɛ ntoshimelaka ambɔ, tolekɔ la wepo wɛ tɔtɔ wetshikitanyi, tɔmɔtshi nkekete, tɔmɔtshi tontshitshi, tɔmɔtshi nkolankola, tɔmɔtshi mpɛmbɛ mpɛmbɛ edjinge tonkina avuta avuta etengo winá. Poolo afunaka lonkina ante: ‘alemba wa l’olongo walekɔ edjinge alemba wa lá looko walekɔ.’ Nkambo djɛsɔ osakisolande mo? Lá looko, tolekɔ l’alemba w’ankfunda, l’olongo walekɔ l’alemba wa nyuma etengo w’andjelo.

10. Wanɛ wangokfundɔ t’olongo iyongokfundɔ la demba djɛkɔnge?

 ¹⁰ Kolenda kɛnɛ kɛ Poolo ndootepelaka lonkina ante: ‘Nghɔsɔ ndeke oyɛwɔ edjinge l’ekfundwelo kɛ wanɛ wavɔ. Demba nkonamaka etengo ekete kɛpɔnda edjinge nkfundɔka etengo ekete kepapɔnde.’ Wina w’onto ovɔnde, demba djɛnde mpɔndaka, edjinge nkalɔka ngo ovutu. (Ewa. 3:19) Wopo wɔkɔnge demba okokande nkfundɔ etengo ‘ekete kepapɔndɛ?’ Poolo atatepela nkambo dj’onto wokfundɔ djɛ ndɔsɛna lá looko, etengo wanɛ wa kfundwisa me Elidja, Elisha, edjinge me Yeso. Poolo atepelaki nkambo dj’onto wokfundɔ la demba ‘djɛ nyuma’ djɛ tɔsɛna l’olongo.​—1 Kɔ. 15:42-44.

11-12. Otshikitano wɔkɔnge woyalisa le Yeso wina wɔ ndakfundɔ, edjinge wopo wɔkɔnge ankfutami w’avuta iyongotshikitana?

¹¹ Wina wɔ Yeso nyoyalaka lá looko, nde ayalaki la demba dj’ankfunda. Koko, wina w’indakfundɔ, nde ‘ayalaka la demba djɛ nyuma’ edjinge ahandaka t’olongo. Wopo wɔk’ɔmɔ ndeke, Akristo w’ankfutami w’avuta iyongokfundɔka la demba djɛ nyuma. Poolo apakisolaka ante: ‘Etengo ɔfɛnaso l’onto wonanghemisa la nkɛtɛ, ndeke isɔngɔfɛna l’onto woyisa m’olongo.’​—1 Kɔ. 15:45-49.

¹² Tokote ente Yeso atakfundɔ la demba dj’ankfunda. Wina wɔ Poolo ndayale entshupa la nshiyɛ djamba djɛnde djelendana l’ekfundwelo, nde ɛnyɛka nsɔsɔlɔ kɛ nkambo ntshɔ wina w’indapela ante: ‘Akfunda l’ekila wepakoke nkita Onkfumi wɔ Ndjambe’ wel’olongo. (1 Kɔ. 15:50) Apɔstɔlɔ l’ankfutami w’avuta wapakfundɔ djɛ ntɔsɛna l’olongo la demba djɛ pɔnda dj’ankfunda l’ekila. Iya wina wɔkɔnge iyongokfundɔ? Poolo ɛnyɛka papoo ante ekfundwelo kɛkɔ ayalaka ladjɛ nanghema m’ɔkɔngɔ w’etsho efula, koko ape ngo wina w’ovɔwɔ. Koko, wina wɔ Poolo ndafunaka 1 Kɔrɛtɔ, ko Akristo amɔtshi wamboshiyɛka ndjetama ‘l’ilɔ yɛ nyɔyi,’ ndjɔmbɔmba ɔpɔstɔlɔ Djakɔbɔ. (Ele 12:1, 2) Apɔstɔlɔ edjinge ankfutami w’avuta ankina wayalaka ladjɛ djetama edjinge iwɔ ‘l’ilɔ yɛ nyɔyi’ l’ɔkɔngɔ.​—1 Kɔ. 15:6.

13. Akambo wakɔnge wangɛnama wina wɔ ɛnamelo kɛ Yeso’?

¹³ Yeso nya Poolo wewoyɛka lá ntondo ambɔ etena kɛmɔtshi kɛ djonyi efula kengoyala, etena kɛkɔ nde: Ɛnamelo kɛ Kristo. Eleko kɛsɔ kengewama m’ambandji, otshikitelo wɔ looko, elando edjinge nkete nkina djɛ nyɛtshi djengonanghema l’andja w’otondo. Ntateyɛ m’ɔnɔnyi 1914 totateyɛka nyɛna ekotshamelo kɛ prɔfɛsiya kimá Bible kɛsɔ. Nkambo nkina djɛ djonyi efula dekɔ l’eteyi kɛ prɔfɛsiya kɛsɔ. Yeso atepelaka ante, losango lɔ wɔlɔ l’ente Onkfumi wɔ Ndjambe wombopikama, longopoposanyema ‘lá looko l’otondo etengo owakɛ l’ewila enkfumɔ, ko m’asɔ ekomo kengoyɛ.’ (Mat. 24:3, 7-14) Poolo atepelaka ante ekfundwelo k’Akristo w’akfutami w’avuta wetamisa ‘l’ilɔ yɛ nyɔyi’ kengonanghema wina wɔ ‘ɛnamelo kɛ Nkfumi.’​—1 Te. 4:14-16; 1 Kɔ. 15:23.

14. Kɛkɔnge kengokomela Akristo w’ankfutami wavɔ l’etena k’ɛnamelo kɛ Kristo?

¹⁴ Ankfutami w’avuta wavɔ lɔɔko kɛnɛ nkfundɔka ngo mbala kɛkɔ kɛmɔ m’ɔkɔngɔ wɔ nyɔyi kɛwɔ djɛ ntɔsɛna l’olongo. Poolo ashikikɛka nkambo djɛsɔ, wina ndafune etepela welekɔ lá 1 Kɔrɛntɔ 15:51, 52 ante: ‘Ape isankfumɔ ndeke longetama ilɔ yɛ nyɔnyi, koko isankfumɔ tongokadjimɔ mbala kɛkɔ kɛmɔ lá mayimo djɛ ntsho wina w’iyongofula ntsheke dj’ekomo.’ Etepela wɛ Poolo wɛsɔ wekotshama win’ɔsɔ! Wina w’ekfundelo kɛwɔ, wananyɔ wa Kristo wasɔ wangoyala l’osasa w’ekekete. Iwɔ ‘wangoyalaka la Nkfumi lotshinda lotshinda.’​—1 Te. 4:17.

15. Olemo wɔkɔnge wokongela wanɛ wangokadjimɔ lá ‘mayimo djɛ ntsho?’

¹⁵ Bible ntoshimelaka olemo wɔ wanɛ wangokadjimɔ ‘lá mayimo djɛ ntsho’ iyongotonanghaka l’olongo. Yeso ashimelaka ante:  ‘Kanga longila otshumba edjinge longokindjɛ nangha nanghedji djɛmi, lemi langɔpɛyɛ lowandji lɔ nde ndjapemela ewila, ko nde angalɔndjɛ la danga djɛ lowolo djɛ ndjatshatshɛ ewila etengo nkete djɛ bomba wopo wɔ mawa lowandji me Papa.’ (Ndj. 2:26, 27) Iwɔ wangokilika Owandji wɔwɔ l’olemo wonanghande wɔ ndɔndjɛ ewila la danga djɛ lowolo.​—Ndj. 19:11-15.

16. Wopo wɔkɔnge efula k’anto iyongila nyɔyi otshumba?

¹⁶ Nyɛnamaka papo ente, ankfutami w’avuta wangila nyɔyi otshumba. (1 Kɔ. 15:54-57) Ekfundwelo kɛwɔ kengapɛyɛ mbamba kɛ nkotshɛ djɛ nyimɛ anto ankfumɔ wa nyɛtshi má looko wina wɔ mbandji kɛ Armagɛdɔnɛ. Miliyɔ inkina y’Akristo w’ampame la w’amato, ‘wangoyɛ má ndjolo k’ekekete,’ wangokindjɛ mbika l’andja wa bango. (Ndj. 7:14) Anto wangowika lá looko wasɔ, wangɛna la wiso wawɔ iyɔmɛlɛ otshumba onkina w’iyongila nyɔyi wina wɔ miliyara y’anto yevwisa l’etsho wɛ ntondo iyongokfundɔ. Kokanela osasa wongoyala wina w’iyongila nyɔyi otshumba! (Ele. 24:15) Edjinge anto ankfumɔ wɛnyisa nkɔmano djɛwɔ te Yehova wangila nyɔyi k’iyakite me Adama otshumba. Wangoyala l’akoka wa nsɛna lotshinda lotshinda.

17. Kɛkɔnge kɛ 1 Kɔrɛntɔ 15:58 otokeketshɛnde djɛ nangha ma win’ɔsɔ?

¹⁷ Okristo onkfumɔ wolekɔ la lowiko win’ɔsɔ, ladjɛ ndjala la djedjɛ tá etepela wekeketshɛ welendana l’ekfundwelo wɛ Poolo ndafune te ase Kɔrɛtɔ. Tolekɔ la donga djɛ wɔlɔ djɛ nɛmɛyɛ dako djɛ Poolo djɛ ndjalaka wina tshɛ l’akambo efula wanangha ‘l’olemo wɔ Nkfumi.’ (Wala 1 Kɔrɛntɔ 15:58.) Ntsha iso nyɛnyɛ nkɔmano l’osasalo wɔso l’olemo wɔsɔ, tongoyala l’akoka wa nkongela etsho weyaye l’osasa efula. Lowiko lɔso lɔ l’etsho weyaye longoyala wɔlɔ efula ndeka ekete k’enkfumɔ k’okokaso nkanela. Lɔngɔtɛnyɛ djɛ ndjolo yɛnaso l’olemo wɔ Nkfumi, ipalekɔ anyanya.