1-2. Faandi mbei hii Keesitu sëmbë musu kë ko sabi soni u di weki di Gadu o weki sëmbë u de sa libi a liba ala?

GAANSË u dee dinima u Jehovah, ta biibi taa de o libi a goonliba aki u nöömö. Ma wan piki kulupu Keesitu sëmbë di Jehovah salufu ku di jeje fëën, ta biibi taa de o go libi a liba ala. Dee salufu Keesitu sëmbë aki kë ko sabi unfa libi u de o dë a liba ala. Ma faandi mbei dee Keesitu sëmbë dee o libi a goonliba aki seei musu kë ko sabi di soni dë? Wë kumafa woo si, di go di sëmbë o go libi a liba ala, o tja bunu ko da dee sëmbë dee o libi u teego a goonliba aki tu. Fëën mbei aluwasi woo libi a liba ala nasö a goonliba aki, tökuseei u musu kë ko sabi soni u di libi di sëmbë o go libi a liba ala.

² Gadu bi mbei so u dee bakama u Keesitu sikifi soni, di ta taki u di weki di a o weki sëmbë u de sa libi a liba ala. Apösutu Johanisi bi taki taa: „Fa u dë aki u da miii u Masa Gadu tuu. Nöö wa sabi fa woo dë eti e. Ma u sabi nöö taa te a o ko nöö u seei wojo o si ën kumafa a dë, nöö woo tooka ko kuma hën seei” (1 Joh. 3:2). Di soni aki kë taki taa dee salufu Keesitu sëmbë an sabi unfa de o dë te Gadu o weki de u de sa libi a liba ala. Ma de o si Jehovah tuutuu te de go ala. Di Bëibel an ta piki u finifini unfa soni o dë te Gadu o weki sëmbë u de sa libi a liba ala. Ma apösutu Paulosu bi taki wantu soni di nama ku di soni dë. Dee Keesitu sëmbë dee Gadu salufu o dë ku  Keesitu te a o puu „hii dee takima ku dee hedima, ku dee soni abi makiti a goonliba aki ku mundu ala tuu fiaa”. A o puu dëdë tu. Te u kaba fëën, Jesosi ku dee sëmbë dee o tii makandi ku ën o buta hii soni a Gadu basu, nöö de o saka deseei da Gadu tu (1 Kol. 15:24-28). Di ten dë o dë wan apaiti ten seei! *

3. Paulosu bi ta biibi taa sëmbë bi o weki ko a libi baka. Andi di soni dë bi heepi ën faa du kumafa 1 Kolenti 15:30-32 ta taki?

³ Di biibi di Paulosu bi ta biibi taa sëmbë o weki ko a libi baka, bi heepi ën faa bi sa hoi dou te soni bi ta miti ën. (Lesi 1 Kolenti 15:30-32, NW.) A bi piki dee sëmbë u Kolenti taa: „Hiniwan daka mi sa lasi mi libi.” A bi taki tu taa: „Mi feti ku hogi mbeti a Efeise.” Kandë a bi ta taki sö, u di de bi butëën faa feti ku tuutuu mbeti a Efeise (2 Kol. 1:8; 4:10; 11:23). Nasö kandë a bi ta taki sö u di so Dju ku wanlö woto sëmbë bi ta du ku ën, leti kuma „taku mbeti” (Tjab. 19:26-34; 1 Kol. 16:9). Aluwasi fa soni bi dë, tökuseei u sa taki taa gaan hogi bi miti Paulosu. Ma tökuseei a bi ta biibi go dou taa soni bi o waka bunu dëën a di ten di ta ko.​—2 Kol. 4:16-18.

4. Unfa di weki di sëmbë o weki ko a libi baka, ta da dee Keesitu sëmbë taanga a di ten aki? (Luku di peentje u di kafiti.)

⁴ U ta libi a wan hogi pisiten. De ta du hogi ku so u dee baaa ku dee sisa fuu. So u de ta libi a kamian ka de ta dë pantapanta u di feti ta feti a di kamian. So u de ta libi a kamian ka de tapa di wooko fuu. Nöö de ta dini Jehovah, hii fa de sa söötö de nasö hii fa de sa lasi de libi. Ma hii dee baaa ku dee sisa aki tuu ta dini Jehovah go dou, nöö de dë sëmbë di u sa djeesi a di fasi fa de ta du soni. De an ta fëëë, u di de sabi taa aluwasi ee de lasi de libi a di ten u dë aki, tökuseei Jehovah o mbei de feni wan möön gaan bunu a di ten di ta ko.

5. Un fasi u si soni sa mbei taa wa ko ta biibi möön taa sëmbë o weki ko a libi baka?

⁵ Paulosu bi piki dee baaa ku dee sisa u de ta köni ku wan fasi fa so sëmbë bi ta pakisei. Dee sëmbë aki bi ta taki taa: „Ee dee sëmbë dee dëdë an o toona weki ko a liba baka, nöö ’boo njan bebe, biga amanjan woo dëdë’.” Sëmbë bi ta si soni a di lö fasi dë gaanduwe kaa ufö di ten dë. A kan taa Paulosu bi toona taki di soni di bi sikifi a Jesaaja 22:13, di ta taki u di fasi fa dee Isaëli sëmbë bi ta du soni. Ka u de bi mbei möiti u de ku Gadu bi sa ko dë möön gaan mati, nöö de bi ta möön biinga a piizii baka. Hën da fuu taki ën, dee Isaëli sëmbë dë bi ta hoi taa de bi musu piizii u di libi wante, biga hiniwan ten de bi sa dëdë go. Sëmbë ta si soni a di lö fasi dë a di ten aki jeti. Ma di Bëibel ta piki u un hogi bi miti dee Isaëli sëmbë u di de bi ta si soni a di lö fasi dë.​—2 Klon. 36:15-20.

6. Faandi u musu ta köni te woo tei sëmbë ko dë mati fuu?

⁶ U di Jehovah o weki sëmbë ko a libi baka, mbei u musu ta köni ku dee sëmbë dee u ta tei ko dë mati fuu. Dee baaa ku dee sisa u Kolenti bi musu ta köni u de an ta hulu sëmbë di an bi ta biibi taa Gadu o weki sëmbë ko a libi baka. Useei sa lei wan soni a di soni aki tu: Wa o feni bunu ee u dë mati ku sëmbë di ta pakisei nöö taa de musu ta piizii u di libi. Ee wan tuutuu Keesitu sëmbë ta nama ku dee lö sëmbë dë, nöö di soni dë sa mbei a disa dee bunu guwenti dee a abi. Boiti di dë, dee sëmbë aki sa mbei a du soni di Jehovah ta buuse. Fëën mbei Paulosu bi taki taa: „Un bia kumutu disa di [sösö] pakisei dë, nöö un ko ta libi wan leti libi a Gadu wojo. Un musu kaba ku dee hogi du fuunu.”​—1 Kol. 15:33, 34.

7. Andi so sëmbë sa hakisi te a nama ku di weki di sëmbë o weki ko a libi baka, kumafa 1 Kolenti 15:35-38 ta taki?

⁷ Lesi 1 Kolenti 15:35-38, NW. Wan sëmbë di kë u wotowan si kuma sëmbë an o weki ko a libi baka, sa hakisi taa: ’Wë unfa sëmbë o weki baka a dëdë?’ Wë a bunu fuu luku unfa Paulosu bi piki di soni aki, u di sömëni sëmbë u di ten aki abi u de soni ta biibi, te a nama ku di soni di ta pasa ku wan sëmbë te a dëdë. Ma andi di Bëibel ta lei u?

8. Un woto sa heepi u fuu fusutan di weki di sëmbë o weki u de sa libi a liba ala?

⁸ Te wan sëmbë dëdë, nöö sinkii fëën ta poi. Ma di Sëmbë di mbei di mundu sa toona weki sö wan sëmbë ko a libi baka, nöö a dëën di sinkii di a o abi fanöudu. Wë biga di Sëmbë aki an bi tei na wan soni u mbei di mundu (Ken. 1:1; 2:7). Paulosu ta konda wan woto u lei taa an o dë u Gadu da di sëmbë di seei sinkii kuma di a bi abi fosu. Pakisei wan „böngö” nasö wan soni „sii”. Te i paandi di sii, nöö a ta bigi göö u te a ko toon wan pau. Di njunjun pau dë, ta tooka seei ku di piki sii di i bi paandi. Paulosu bi konda di woto aki u lei taa di Sëmbë di mbei u, sa da wan sëmbë „wan hii oto sinkii kumafa a kë”.

9. Andi 1 Kolenti 15:39-41 ta taki u dee tookatooka sinkii dee dë?

⁹ Lesi 1 Kolenti 15:39-41. Paulosu bi taki taa Gadu an da hii dee soni dee a mbei di wan seei sinkii. A mbei soni di abi tookatooka sinkii, kuma kau, fou, ku fisi. A bi taki taa te u luku go a liba, nöö u ta si taa di sonu ku di liba wojo tooka. A bi taki taa ’dee sëndë u dee teeja an dë di wan fasi, de tooka ku de na de’. Wë kandë wa sa si ku wojo taa de tooka, ma sö di soni aki dë tuu. Dee sabima ta piki u taa peipei teeja dë. I abi gaanwan, i abi pikiwan, i abi bëwan, wetiwan, söseei i abi kookowan kuma di sonu. Paulosu bi taki tu taa „dee soni dë a liba ala tooka ku dee u goon aki”. Unfa sö? Wë dee soni dee dë a goonliba aki abi sinkii di u sa si. Nöö dee soni dee dë a liba ala abi sinkii di wa sa si, leti kuma di u dee ëngëli.

10. Un pei sinkii dee sëmbë dee o weki ko a libi u de sa libi a liba ala o abi?

 ¹⁰ Luku andi Paulosu bi taki baka di dë. A bi taki taa: „Wë nöö sö nöö di weki baka a dëdë o dë tu e. Di sinkii de ta tja go bei dë, a dë wan sinkii di dëdë ta poi nöö. Ma di sinkii di o toona weki dë, hën an dë soni di o dëdë poi möönsö.” U sabi taa te wan sëmbë dëdë, nöö sinkii fëën ta poi, nöö a ta toona ko doti (Ken. 3:19). Nöö unfa a sa dë taa wan ’sinkii di o toona weki, an o dë soni di o dëdë poi möönsö’? Wë Paulosu an bi ta taki u dee sëmbë dee bi weki ko a libi baka a goonliba aki, leti kuma dee sëmbë di Elia, Elisa ku Jesosi bi weki ko a libi. Paulosu bi ta taki soni u sëmbë di bi o weki ko a libi ku wan sinkii u de sa libi a liba ala.​—1 Kol. 15:42-44.

11-12. Andi bi tooka a Jesosi di a weki ko a libi baka, nöö unfa di seei soni dë ta pasa ku dee salufu Keesitu sëmbë tu?

¹¹ Di Jesosi bi dë a goonliba aki, a bi abi libisëmbë sinkii. Ma di Gadu weki ën ko a libi baka, hën a ko dë wan jeje di ta da sëmbë libi. Wë sö nöö dee Keesitu sëmbë dee Gadu salufu, o weki ko a libi baka ku wan sinkii u de sa libi a liba ala. Paulosu bi taki taa: „Leti kumafa u dë aki u abi di wan sinkii kumafa di fosu sëmbë u goonliba bi abi, nöö söseei wan daka woo ko abi di wan sinkii kumafa di fosu sëmbë u Gadu Köndë abi.”​—1 Kol. 15:45-49.

¹² A dë fanöudu u hoi a pakisei taa Jesosi an bi weki ko a libi baka ku libisëmbë sinkii. Di Paulosu bi ta dou a kaba pisi u di woto fëën, hën a bi konda faandi mbei. A bi taki taa: „Dee sinkii fuu dee dë ku buuu u go dëdë poi aki, de an o sa go a Gadu Köndë söndö tooka e” (1 Kol. 15:50). Dee apösutu ku dee woto salufu Keesitu sëmbë an bi o weki go a liba ala ku wan sinkii di sa poi kaba a sösö. Na un ten de bi o weki ko a libi baka? Paulosu bi taki taa de bi o weki ko a libi bakaten, ma na wantewante te de dëdë. Di Paulosu bi sikifi di buku 1 Kolenti, nöö so bakama u Keesitu bi „lasi libi kaa”. Wan u de bi dë apösutu Jakobosi (Tjab. 12:1, 2). Woto apösutu ku woto  salufu Keesitu sëmbë bi o „lasi libi” bakaten tu.​—1 Kol. 15:6.

13. Andi bi o pasa te Jesosi bi o toona ko baka?

¹³ Jesosi ku apösutu Paulosu tuu bi taki u wan apaiti ten di musu ko. Di ten dë da di ten di Keesitu bi o toona ko baka. Dee soni dee bi o lei taa di ten dë dou, hën da gaan feti, taku siki, ku woto gaangaan soni di bi o ta pasa. Wë u ta si fa dee soni u di tjabukama woto aki ta pasa, sensi di jaa 1914. Ma wan woto soni bi o pasa di bi o lei taa di ten dë zuntu. Jesosi bi taki taa di bunu buka u di Könuköndë u Gadu bi o ’paaja te dou hii goonliba, be hii föluku musu jei’ (Mat. 24:3, 7-14). Paulosu bi taki taa di ten di „Keesitu o toona ko baka”, bi o dë wan ten ka salufu Keesitu sëmbë bi o weki ko a libi baka.​—1 Tes. 4:14-16; 1 Kol. 15:23.

14. Andi ta pasa ku dee salufu Keesitu sëmbë te de dëdë a di pisiten di Keesitu toona ko baka?

¹⁴ Dee salufu Keesitu sëmbë dee ta dëdë a di ten aki, nango wantewante a liba ala. Di soni aki Paulosu bi taki a 1 Kolenti 15:51, 52. A bi taki taa: „Na hii u tuu o dëdë bifö di kaba juu dou e. Ma te di juu dou di tutu böö kaa, nöö wantewante bifö i mëni, nöö Gadu o tooka di sinkii fuu.” Dee soni di Paulosu bi taki aki, ta pasa a di ten fuu aki! Te dee baaa u Keesitu o weki ko a libi baka u de sa libi a liba ala, nöö de o dë waiwai seei. Nöö ’hii juu de o dë makandi ku Keesitu’.​—1 Tes. 4:17.

15. Un wooko dë ta wakiti dee salufu Keesitu sëmbë dee o go libi a liba ala?

¹⁵ Di Bëibel ta piki u un wooko dee salufuwan aki o du te de o go a liba ala. Jesosi bi piki dee salufuwan taa: „Ee wan sëmbë wini dee soni dee ta tapa pasi dëën nöö a ta hoi go dou ku dee soni dee mi ta mandëën faa du,  nöö di sëmbë naandë hën mi o da taki a dee nasiönnasiön u goonliba palalaa te dou. Nöö leti kumafa mi Tata da mi taki, nöö söseei mi o toona da di sëmbë dë taki tu.” (Ako. 2:26, 27). De o waka a Jesosi baka, nöö de o tii dee sëmbë u goonliba ku wan felu pau.​—Ako. 19:11-15.

16. Unfa sömëni sëmbë o wini di felantima fuu de kai dëdë?

¹⁶ A dë gbelingbelin u si taa dee salufuwan o wini di felantima fuu de kai dëdë (1 Kol. 15:54-57). Di weki di de o weki ko a libi baka, o mbei de o sa heepi feti di gaan feti u kii hogihati sëmbë a di feti u Amagedon. Milionmilion womi ku mujëë di dë Keesitu sëmbë o „pasa di gaan fuka libilibi”, nöö de o libi a di njunjun goonliba (Ako. 7:14). Dee sëmbë aki o si unfa milionmilion sëmbë di bi dëdë o weki ko a libi baka. Pakisei unfa woo piizii te dee soni aki o pasa! (Tjab. 24:15) Te u kaba fëën, dee sëmbë dee hoi deseei a Jehovah an o dëdë nöiti möön. De o sa libi u teego a goonliba aki.

17. Andi u musu ta du te u luku di soni di sikifi a 1 Kolenti 15:58?

¹⁷ Hiniwan Keesitu sëmbë a di ten aki musu dë ku tangi a hati da dee soni di Paulosu bi piki dee sëmbë u Kolenti, di nama ku di weki di sëmbë o weki ko a libi baka. Wa abi lasi ee u du di soni di Paulosu bi taki, di a bi taki taa u musu abi hia soni ta du „a di wooko u Masa”. (Lesi 1 Kolenti 15:58.) Ee u ta du di wooko u Masa fajafaja, nöö woo dë möön waiwai a di ten di ta ko. Na piki suti di ten dë o suti. A o ko dë gbelingbelin u si taa di wooko di u bi ta du da Masa, an bi dë u sösö.