1-2. Fu san ede ala Kresten musu wani sabi moro fu na opobaka di den salfuwan o kisi?

FURU sma di e dini Yehovah now abi a howpu fu libi fu têgo na grontapu. Ma wan tu Kresten di Gado salfu abi a howpu fu libi na hemel. Den salfuwan dati wani sabi fa a o de fu libi na hemel. Ma fu san ede den sma di abi a howpu fu libi na grontapu musu wani sabi moro fu na opobaka di den salfuwan o kisi? Wi o si taki na opobaka dati o tyari furu blesi kon gi den wan di abi a howpu fu libi fu têgo na grontapu. Sobun, awinsi wi abi a howpu fu libi na hemel noso na grontapu, wi musu wani sabi moro fu na opobaka di den salfuwan o kisi fu libi na hemel.

² Gado ben meki sonwan fu den disipel fu Yesus skrifi fu na opobaka dati. Na apostel Yohanes ben taki: „Nownowde wi na pikin fu Gado, ma a no kon na krin ete san wi o de bakaten. Wi sabi taki awansi o ten Gado o sori ensrefi, wi o de leki en” (1 Yoh. 3:2). Sobun, salfu Kresten no sabi fa a o de te den o libi na hemel leki yeye. Ma san wi sabi, na taki den o man si Yehovah te den kisi den pai. Bijbel no e taki finifini fa a o de te den salfuwan o libi na hemel, ma na apostel Paulus ben fruteri pikinso fu a tori disi. Den salfuwan o de nanga Krestes te a o „tyari wan kaba kon na ala tirimakti, na ala makti, èn na ala krakti”. Den o tyari wan kaba kon tu na ’dede, a lasti feanti’. Te fu kaba Yesus nanga den salfuwan di o tiri makandra nanga en o gi ala sani baka na Yehovah èn den o  saka densrefi na en ondro (1 Kor. 15:24-28). Dati o de wan moi ten! *

3. Soleki fa skrifi na 1 Korentesma 15:30-32, dan fa na opobaka howpu yepi Paulus?

³ A bribi di Paulus ben abi taki a ben o kisi wan opobaka ben yepi en fu pasa furu tesi. (Leisi 1 Korentesma 15:30-32.) A taigi den Kresten na ini Korente: „Ala dei mi kan lasi mi libi.” Paulus ben skrifi tu: „Mi feti nanga ogri meti na Efeise.” Kande a ben e taki fa a ben feti nanga trutru meti na ini den stadion na Efeise (2 Kor. 1:8; 4:10; 11:23). Noso kande a ben e taki fu den Dyu nanga tra sma di ben e gens en èn di ben de leki „ogri meti” (Tori 19:26-34; 1 Kor. 16:9). Awinsi sortu ogri ben miti Paulus, toku a ben tan bribi na ini a moi howpu di a ben abi.​—2 Kor. 4:16-18.

4. Fa na opobaka howpu e yepi furu brada nanga sisa na ini a ten disi? (Luku a fowtow na tapu a kafti.)

⁴ Wi e libi na ini ogri ten. Sma du ogri nanga son brada nanga sisa fu wi. Tra brada nanga sisa e libi na ini kontren pe feti de èn pe den kan lasi den libi. Trawan e dini Yehovah na ini kondre pe den no mag preiki fri noso pe lanti tapu a wroko fu wi. Toku den e tan dini Yehovah awinsi den kan go na strafu-oso noso awinsi sma kan kiri den. Ala den brada nanga sisa disi e horidoro èn den na bun eksempre gi wi. Den no e frede fu di den sabi taki awinsi den lasi den libi na ini a ten disi, Yehovah o gi den wan moro bun libi na ini a ten di e kon.

5. Sortu fowtu denki kan swaki a bribi fu wi na ini na opobaka?

⁵ Paulus ben warskow den brada nanga sisa fu luku bun nanga a denki di son sma ben abi. Den sma disi ben e taki: „Efu den dede sma no o kisi wan opobaka, dan ’meki wi nyan èn dringi, bika tamara wi o dede.’” A denki disi ben de fosi a ten fu Paulus srefi. Kande a ben taki san skrifi na Yesaya 22:13 di e sori fa den Israelsma ben e denki. Na presi fu kon abi moro lobi gi Gado, den ben wani meki soso prisiri na ini a libi. Te yu luku en bun, den Israelsma ben taki: „Meki wi prisiri tide bika wi no sabi efu wi o de na libi tamara.” Furu sma na ini a ten disi e denki so tu. Ma Bijbel e sori sortu takru bakapisi a denki dati tyari kon gi den Israelsma.​—2 Kron. 36:15-20.

6. Fu san ede wi musu luku bun suma wi e teki leki mati?

⁶ Fu di wi sabi taki Yehovah o wiki den dedesma, meki wi musu luku bun suma wi e teki leki mati. Den brada nanga sisa na ini Korente ben musu luku bun nanga sma di no ben e bribi na ini na opobaka. Wi kan leri wan sani fu disi. Efu wi e moksi furu nanga sma di e prakseri soso prisiri, dan dati kan tyari takru bakapisi kon gi wi. Efu wi ben o abi den sortu mati disi, dan wi ben kan teki a denki fu den abra. Den kan meki tu taki wi e bigin du sani di Gado no lobi kwetikweti. Dati meki Paulus e gi wi a rai disi: „Un musu kisi unsrefi èn du san reti. Un no musu tan du sondu.”​—1 Kor. 15:33, 34.

7. San son sma ben aksi fu na opobaka, soleki fa 1 Korentesma 15:35-38 e taki?

⁷ Leisi 1 Korentesma 15:35-38. Kande wan sma di ben wani meki trawan tweifri na a opobaka ben aksi: „Fa den dede sma o opo baka?” A bun fu luku  sortu piki Paulus ben gi fu di furu sma na ini a ten disi abi den eigi denki fu san e pasa baka te wi dede. Ma san Bijbel e leri?

8. Sortu agersitori kan yepi wi fu frustan san e pasa te wan salfuwan kisi wan opobaka fu go libi na hemel?

⁸ Te wan sma dede, en skin e pori. Ma a sma di meki hemel nanga grontapu kan gi a sma dati wan opobaka èn a kan gi en a skin di a abi fanowdu (Gen. 1:1; 2:7). Di Paulus ben taki fu na opobaka di den salfuwan ben o kisi, a gebroiki wan agersitori fu sori taki Gado no abi fu gi den a srefi skin baka. Prakseri ’wan siri’. Te a siri dati prani na ini a gron, a e bigin gro èn a e tron wan bon. A bon de heri tra fasi leki a pikin siri. Paulus gebroiki na agersitori disi fu sori taki wi Mekiman kan gi iniwan sma wan skin di a feni bun.

9. San 1 Korentesma 15:39-41 e taki fu den difrenti sortu skin di de?

⁹ Leisi 1 Korentesma 15:39-41. Paulus ben sori taki Gado no ben gi ala sani a srefi sortu skin. Fu eksempre, a skin fu kaw, fowru nanga fisi e difrenti fu makandra. A taki dati te wi e luku go na loktu, dan wi e si a difrenti na mindri a son nanga a mun. Èn a taki dati „den stari no moi a srefi”. Kande wi no man si dati nanga wi ai, ma sabiman kon si taki difrenti stari de. Sonwan bigi, sonwan pikin, sonwan redi, sonwan weti èn sonwan geri neleki a son fu wi. Paulus taki tu dati „yu abi libisani na hemel di abi den eigi skin, èn yu abi libisani na grontapu di abi den eigi skin”. San a ben wani taki? Na grontapu yu abi libisani di abi skin fu meti nanga brudu, ma na hemel yu abi yeye soleki den engel.

10. Sortu skin den sma di o libi na hemel o kisi?

¹⁰ Luku san Paulus e taki now: „Na so a de tu nanga na opobaka fu dedewan. A skin de leki wan siri di sai èn a e pori. Ma a skin di e opo baka no man  pori” (Gen. 3:19). Fa wan sma kan kisi wan opobaka nanga wan skin di „no man pori”? Paulus no ben taki fu wan libisma di kisi wan opobaka fu libi na grontapu, neleki den sma di Elia, Elisa nanga Yesus ben gi wan opobaka. Paulus ben taki fu wan sma di kisi wan opobaka fu libi na hemel. So wan sma e kisi „wan yeye skin”.​—1 Kor. 15:42-44.

11-12. Sortu skin Yesus kisi di a kisi wan opobaka èn sortu skin den salfuwan o kisi?

¹¹ Di Yesus ben de na grontapu a ben abi wan libisma skin. Ma di a kisi wan opobaka a „tron wan yeye di e gi libi” èn a drai go baka na hemel. Den salfu Kresten o kisi wan yeye skin tu fu kan libi na hemel. Paulus ben taki: „Wi de leki a sma di meki fu doti. Sobun, wi o de tu leki a sma di de fu hemel.”​—1 Kor. 15:45-49.

¹² A prenspari fu hori na prakseri taki Yesus no ben kisi wan libisma skin baka di a kisi wan opobaka. Na a kaba fu a tori disi Paulus e sori fu san ede. A taki: „Skin nanga brudu no man go na ini a Kownukondre fu Gado” (1 Kor. 15:50). Te den apostel nanga tra salfuwan ben o kisi wan opobaka fu go libi na hemel, den no ben o kisi wan skin fu meti nanga brudu di kan pori. O ten den ben o kisi wan opobaka? Paulus ben taki dati den ben o kisi wan opobaka bakaten. Den no ben o kisi wan opobaka wantewante baka te den ben o dede. Di Paulus ben skrifi 1 Korentesma, son disipel ben „dede” kaba. Wan fu den ben de na apostel Yakobus (Tori 12:1, 2). Tra apostel nanga salfuwan ben o „dede” bakaten.​—1 Kor. 15:6.

13. San ben o pasa na a ten te Yesus ben o tiri leki Kownu?

¹³ Yesus nanga Paulus ben e taki fu wan spesrutu pisi ten. Dati na a ten te  Yesus ben o tiri leki Kownu. Na a ten dati feti, gronseki, siki nanga tra ogri ben o de na grontapu. Wi si taki a Bijbel profeititori disi e kon tru sensi 1914. Wan tra prenspari sani ben o kon tru na a ten dati. Yesus ben taki dati a bun nyunsu fu Gado Kownukondre ben o preiki „gi sma na heri grontapu, so taki sma fu ala kondre kan yere dati, èn dan a kaba o kon” (Mat. 24:3, 7-14). Paulus ben taki dati „te Masra kon”, ala den salfu Kresten di ben dede ben o kisi wan opobaka.​—1 Tes. 4:14-16; 1 Kor. 15:23.

14. San e pasa nanga salfu Kresten di e dede na a pisi ten te Krestes e tiri leki Kownu?

¹⁴ Salfu Kresten di e dede now e kisi wan opobaka wantewante fu go libi na hemel. Paulus e tyari disi kon na krin na ini 1 Korentesma 15:51, 52. A e taki: „Wi alamala no o dede, ma wi alamala o kenki na ini wan momenti, fosi yu pingi yu ai, te a lasti trompeti o bari.” Den wortu disi fu Paulus e kon tru na ini a ten disi! Te den brada disi fu Krestes o kisi wan opobaka, dan den o prisiri srefisrefi fu di den o „de ala ten nanga Masra”.​—1 Tes. 4:17.

15. Sortu wroko den salfuwan o du na hemel?

¹⁵ Bijbel e sori wi sortu wroko den salfu Kresten o du na hemel. Yesus ben taki: „A sma di e wini a strei èn di e du den wroko fu mi te na a kaba, mi o gi en a makti fu tiri den pipel fu grontapu. A sma dati o de leki wan skapuman di o tiri a pipel nanga wan isri tiki. A o naki den broko pisipisi neleki te wan sma e broko prapi. A o kisi a srefi makti di mi kisi fu mi Tata” (Openb. 2:26, 27). Makandra nanga Yesus den salfuwan o tiri  den pipel fu grontapu nanga wan isri tiki.​—Openb. 19:11-15.

16. Fa milyunmilyun sma o wini dede?

¹⁶ A de krin taki den salfuwan o wini dede (1 Kor. 15:54-57). Te den o kisi wan opobaka, dan makandra nanga Yesus den o puru ala ogri na grontapu na ini a feti fu Armagedon. Milyunmilyun tra Kresten brada nanga sisa o „komoto na ini a bigi banawtu” fu kan libi na ini a nyun grontapu (Openb. 7:14). Den sma dati o si wan tra moi sani. Den o si fa milyardmilyard sma di dede na ini a ten di pasa o kisi wan opobaka. Prakseri fa den o breiti te a kefalek moi sani dati o pasa! (Tori 24:15) Èn te fu kaba ala den sma di tai hori na Yehovah o wini dede di den kisi fu Adam fu di den o libi fu têgo.

17. Te wi e luku san 1 Korentesma 15:58 e taki, dan san wi musu du now?

¹⁷ Ibri Kresten di e libi na ini a ten disi e kisi trowstu fu den sani di Paulus skrifi fu na opobaka na ini a brifi gi den Korentesma. Wi abi bun reide fu gi yesi na a deki-ati di Paulus gi fu abi furu fu du „na ini a wroko fu Masra”. (Leisi 1 Korentesma 15:58.) Efu wi e tan du a wroko disi fayafaya, dan wi kan de seiker taki wi o abi wan koloku libi na ini a ten di e kon. Wi no man frustan o switi a libi dati o de. Wi o si taki a wroko di wi e du now gi Masra no ben de fu soso.