1-2. Kawe nụe kěbị tau Kristen harusẹ̌ měngěndung soal u kebangkitan sarang sorga?

KAL᷊AWOKANGE ělang i Yehuwa orasẹ̌ ini mělẹ̌harapẹ̌ gunang měbiahẹ̌ kěkalẹ̌ su dunia. Katewe, taumata apang nilanisẹ̌ piạ pělaharapẹ̌ gunang měbiahẹ̌ su sorga. I sire ini tantu mapulu makasingkạ kerea pěbawiahi sire su sorga, katewe kerea dingangu taumata apang piạ pělaharapẹ̌ měbiahẹ̌ su dunia? Kere sarung ěndungang i kitẹ pělaharapẹ̌ gunang saụ ipěbiahẹ̌ sarang sorga ene lai makarěntang al᷊amatẹ̌ gunang taumata apang piạ pělaharapẹ̌ měbiahẹ̌ kěkalẹ̌ su dunia. Hakị u ene, tawẹ soale i kitẹ piạ pělaharapẹ̌ měbiahẹ̌ su sorga arau su dunia, i kitẹ harusẹ̌ měngěndung soal u pělaharapẹ̌ saụ ipěbiahẹ̌ sarang sorga.

² Mawu něngahạ pirang katau muriti Yesus su abad humotong gunang měmohẹ soal u pělaharapẹ̌ saụ ipěbiahẹ̌ sarang sorga. Rasul Yohanes naul᷊ị, ”I kitẹ orasẹ̌ ini kai manga anạu Mawu, katewe i kitẹ bědang běga kerea i kitẹ su tempo mahi. I kitẹ kětạeng masingkạ i kitẹ sarung makoạ kere i Sie su tempong i Sie měnodẹ watangeng’E.” (1 Yoh. 3:2) Hakị u ene, tau Kristen apang nilanisẹ̌ bědang běga kerea pěbawiahi sire su tempong i sire seng měbiahẹ̌ su sorga. Katewe, i sire sarung makasilo si Yehuwa su tempong i sire makatarimạ apa lẹ̌harapeng i sire. Alkitapẹ̌ tawe naul᷊ị kěbị perincian soal u pělaharapẹ̌ saụ ipěbiahẹ̌ sarang sorga, katewe Rasul Paulus něgělị piram baụ informasi soal u hal᷊ẹ̌ ene. Taumata apang nilanisẹ̌ sarung ene dingangi Kristus su tempong i Kristus ’měminasa kěbị pěmamarenta, kawasa, dingangu katatoghasẹ̌’, sarang lai měminasa ”sědụ pěngěngsuenge . . . papate”. Samurine, i Yesus  dingangu manga hapịe sarung tumuhụ si Yehuwa dingangu měkoạ kěbị tumuhụ si Sie. (1 Kor. 15:24-28) Ene sarung makoạ tempo sěbạe makal᷊uasẹ̌! *

3. Kere nilahẹ su 1 Korintus 15:30-32, ual᷊ingu mangimang taumata nate sarung ipěbiahẹ̌, ene nakatul᷊ung si Paulus gunang měkoạ apa?

³ Ual᷊ingu mangimang taumata nate sarung saụ ipěbiahẹ̌, i Paulus nẹ̌tatahang timatěngo haghing sasal᷊ukạ. (Basa 1 Korintus 15:30-32.) I sie naul᷊ị su tau Korintus, ”Ěllo-ěllo iạ tụtatěngo papate.” Paulus lai němohẹ, ’Iạ nẹ̌dal᷊ia dingangu manga binatang buas su Efesus.’ Aramanung i sie nẹ̌bisara soal u mẹ̌dal᷊ia dingangu binatang kahěngang su sěmbaụ arena su Efesus. (2 Kor. 1:8; 4:10; 11:23) Arau, i sie aramanung nẹ̌bisara soal u tau Yahudi dingangu taumata wal᷊inẹ apang mẹ̌sul᷊ungu ”binatang buas” kụ mawěngsing si sie. (Kis. 19:26-34; 1 Kor. 16:9) Tawẹ soale apa ene, i Paulus kai tụtatěngo bahaya sěbạe serius. Katewe, i sie tatapẹ̌ mangimang i sie sarung makaěbạ pěbawiahẹ̌ mal᷊uasẹ̌ su tempo mahi.​—2 Kor. 4:16-18.

4. Kerea pělaharapẹ̌ taumata nate sarung saụ ipěbiahẹ̌ nakatoghasẹ̌ tau Kristen orasẹ̌ ini? (Pěmanda gambarẹ̌ sampul.)

⁴ I kitẹ měbẹ̌biahẹ̌ su tempo makawahaya. Pirang katau anạu sěmbaụ nakoạ korban kakanoạ dal᷊akị. Sěnggạ lai mětẹ̌tanạ su tampạ piạ sekẹ kụ i sire tawe aman. Sěnggạe wue mětẹ̌tahamawu si Yehuwa maning i sire sarung suẹ̌kang su penjara arau pateng, ual᷊ingu i sire mětẹ̌tanạ su negeri měsẹ̌sěding hal᷊ẹ̌ i kitẹ. Katewe, kěbị anạu sěmbaụ ene tatapẹ̌ masatia nẹ̌tahamawu si Yehuwa kụ i sire nakoạ pẹ̌tatěnoěng gunang i kitẹ. I sire tawe natakụ ual᷊ingu masingkạ maning i sire mate orasẹ̌ ini, Yehuwa seng nẹ̌diandi gunang měgělị si sire pěbawiahẹ̌ limembong mal᷊uasẹ̌ su tempo mahi.

5. Tiněna makawahaya apa botonge makal᷊ome pangangimang i kitẹ su pělaharapẹ̌ taumata nate sarung saụ ipěbiahẹ̌?

⁵ Paulus něgělị laingatẹ̌ su anạu sěmbaụe soal u bahaya tiněna nẹ̌sal᷊a bọu pirang katau. I sie nẹ̌bera, ”Mạeng taumata nate memang tawe saụ ipěbiahẹ̌, ’mahịe i kitẹ kumaěng dingangu měnginung, ual᷊ingu dịěllo i kitẹ sarung mate.’” Tiněna nẹ̌sal᷊a kerene seng těbe ene dongkeng kangerẹ. I Paulus aramanung něngutip bawera su Yesaya 22:13, kụ nělahẹ soal u kakanoạu tau Israel. Sul᷊ungu mẹ̌těngkarani su Mawu, tau Israel kai nědeạ karal᷊uasẹ̌ gunang watangeng i sire hala. I sire nẹ̌pikirẹ̌ i sire harusẹ̌ měbiahẹ̌ mal᷊uasẹ̌ orasẹ̌ ini ual᷊ingu i sire běga ange i sire sarung mate. Taumata orasẹ̌ ini lai piạ tiněna kere tau Israel. Katewe, Alkitapẹ̌ něnodẹ tau Israel nakaěbạ tětal᷊ẹ̌ dal᷊akị ual᷊ingu piạ tiněna nẹ̌sal᷊a kerene.​—2 Taw. 36:15-20.

6. Kerea pělaharapẹ̌ taumata nate sarung saụ ipěbiahẹ̌ piạ pěngarune si kitẹ su tempong měmile hapị?

⁶ Nal᷊ahẹ, ual᷊ingu masingkạ Yehuwa sarung mapakawiahẹ̌ taumata apang seng nate, ene harusẹ̌ piạ pěngarune si kitẹ su tempong měmile hapị. Anạu sěmbaụ su Korintus harusẹ̌ maingatẹ̌ tadeạu tawe mědal᷊ahapị dingangu taumata apang tawe mangimang taumata nate sarung saụ ipěbiahẹ̌. Těntirone si kitẹ orasẹ̌ ini ute: Mạeng i kitẹ měpakẹ lawọ tempo gunang mědal᷊ahapị dingangu taumata apang tawe mapadul᷊i soal u pěbawiahẹ̌ su tempo mahi, kụ kětạeng mětẹ̌tiněna soal u karal᷊uasẹ̌ orasẹ̌ ini, ene sarung piạ pěngarune dal᷊akị si kitẹ. Mạeng tau Kristen tutune mědal᷊ahapị dingangu taumata kerene, kebiasaan dingangu kakanoạe mapia ene sarung mailang. Pẹ̌dal᷊ahapị kerene sarung makakoạ si sie měkoạ barang ikẹ̌kawěngsingu Mawu. Hakị u ene, Paulus něgělị sasasa těgasẹ̌, ”I kamene harusẹ̌ sadarẹ̌ dingangu měkoạ barang nihino, kụ abe turusẹ̌ měkoạ dosa.”​—1 Kor. 15:33, 34.

7. Kere nitodẹ su 1 Korintus 15:35-38, kakiwal᷊o apa aramanung kẹ̌kiwal᷊ongu taumata soal u pělaharapẹ̌ taumata nate sarung saụ ipěbiahẹ̌?

⁷ Basa 1 Korintus 15:35-38. Taumata apang mapulu makakoạ taumata wal᷊inẹ ragu soal u těntiro taumata nate sarung saụ ipěbiahẹ̌ aramanung mẹ̌kiwal᷊o, ”Kerea taumata nate sarung saụ ipěbiahẹ̌?” Mapaelẹ̌ mạeng i kitẹ mẹ̌tiněna sasimbahi Paulus gunang kakiwal᷊o ene ual᷊ingu lawọ taumata orasẹ̌ ini lai piạ tinẹ̌na nẹ̌sal᷊a soal u apa sarung mariadi su tempong taumata seng nate. Apa niul᷊ị u Alkitapẹ̌ soal u hal᷊ẹ̌ ini?

8. Sasihing apa botonge makatul᷊ung si kitẹ makaěna soal u badangu taumata apang saụ ipěbiahẹ̌ sarang sorga?

⁸ Su tempong taumata mate, badange sarung mahenẹ. Katewe, Mawu seng něndiadi alam semesta botonge saụ mapakawiahẹ̌ tau ene kụ měgělị si sie badang nẹ̌tatahino. (Kej. 1:1; 2:7) Paulus něpakẹ sěmbaụ sasihing gunang měnodẹ Mawu tawe harusẹ̌ měgělị badang těbe su taumata apang saụ ipěbiahẹ̌. Kěnang pẹ̌tiněna soal u ”bibitu gandum” arau ”bibitu sasuang wal᷊inẹ”. Su tempong bibitu gandum suangeng su ěntana, ene sarung tumuwo makoạ sasuang buhu. Sasuang buhu ene nẹ̌tatěntang dingangu bibitẹ̌ kadodọ seng nisuang kal᷊imona. Paulus něpakẹ sasihing ini gunang měnodẹ Měndariading i kitẹ botonge měgělị ”badang nẹ̌tatahino dingangu kapulu-Ne”.

9. Kerea 1 Korintus 15:39-41 naul᷊ị badangu diadikang piạ pẹ̌tatěntange?

⁹ Basa 1 Korintus 15:39-41. Paulus naul᷊ị Mawu tawe něgělị badang mẹ̌sul᷊ung gunang kěbị diadikang. Contone, badangu sapi, burung, dingangu kinạ, kěbị nẹ̌tatěntang. Paulus lai naul᷊ị su langị diadikang lai nẹ̌tatěntang, kere matangěllo dingangu wul᷊ang. Kụ, i sie naul᷊ị, ”Kěbị bituing piạ kawawantuge sěmbaụ-sěmbaụ.” Maning i kitẹ tawe nakasilo dingangu matang i kitẹ, manga peneliti naul᷊ị manga bituing ene nẹ̌tatěntang. Piạ u gěguwạ dingangu kadodọ, piạ u mahamụ, mawira, dingangu maririhẹ̌, kere matangěllo. Paulus lai naul᷊ị, ”Apang su sorga piạ badang nẹ̌tatěntang dingangu apang su  dunia.” Apa mangal᷊ene hal᷊ẹ̌ ene? Su dunia, i kitẹ piạ badang jasmani, katewe i sire apang su sorga piạ badang rohkẹ̌, kere malaekatẹ̌.

10. Taumata apang saụ nipěbiahẹ̌ gunang mẹ̌tanạ su sorga sarung piạ badang kerea?

¹⁰ Pěmanda apa niul᷊ị i Paulus tuhụe, ”Kerene lai taumata nate apang saụ nipěbiahẹ̌: Nilěbing dingangu badang botonge mawinasa, saụ nipěbiahẹ̌ dingangu badang seng tawe mawinasa.” Tantu su tempong mate, badangu taumata sarung mahenẹ kụ makoạ awul᷊ẹ̌. (Kej. 3:19) Hakị u ene, kerea taumata saụ ”nipěbiahẹ̌ dingangu badang seng tawe mawinasa”? Paulus tawe nẹ̌bisara soal u taumata apang saụ nipěbiahẹ̌ gunang mẹ̌tanạ su dunia, kere seng nipěbiahẹ̌ karạ i Elia, Elisa, dingangi Yesus. Paulus kai nẹ̌bisara soal u taumata apang saụ nipěbiahẹ̌ dingangu badang botonge měbiahẹ̌ su sorga, ene kai ”badang rohani”.​—1 Kor. 15:42-44.

11-12. Pẹ̌bawalui apa nariadi si Yesus su tempong saụ nipěbiahẹ̌, kụ kerea taumata apang nilanisẹ̌ lai sarung makahombang hal᷊ẹ̌ mẹ̌sul᷊ung?

¹¹ Su tempong i Yesus su dunia, i sie piạ badang jasmani. Katewe, su tempong i sie saụ nipěbiahẹ̌, i sie nakoạ ”makhuk roh” kụ saụ nẹ̌bal᷊ị sarang sorga. Kerene lai, tau Kristen apang nilanisẹ̌ sarung saụ ipěbiahẹ̌ makoạ makhuk roh. Paulus nělahẹ, ”Mẹ̌sul᷊ung kere i kitẹ mencerminkan taumata nikoạ bọu awul᷊ẹ̌ ene, i kitẹ sarung mencerminkan i sie seng diměnta bọu sorga ene.”​—1 Kor. 15:45-49.

¹² Pẹ̌tahěndung, su tempong saụ nipěbiahẹ̌, i Yesus tawe nighělịkangu badang taumata. Kawe nụe? Paulus nělahẹ alasange su bageang pěngěngsuenge bọu bisarane soal u pělaharapẹ̌ saụ ipěbiahẹ̌ sarang sorga. I sie nẹ̌bera, ”Daha dingangu gěsi tawe makasuẹ̌ su Kararatuangu Mawu” su sorga. (1 Kor. 15:50) Manga rasulẹ̌ dingangu taumata wal᷊inẹ apang nilanisẹ̌ tawe saụ ipěbiahẹ̌ gunang mẹ̌tanạ su sorga dingangu badang piạ gěsi lai daha. Kange i sire sarung saụ ipěbiahẹ̌? Paulus něnodẹ ene sarung mariadi su tempo mahi. Ene tawe mariadi su tempong i sire mate. Su tempong i Paulus němohẹ suratẹ̌ 1 Korintus, pirang katau muritẹ̌ seng ”nẹ̌tikị su ral᷊ungu papate”,  contone, i Rasul Yakobus. (Kis. 12:1, 2) Manga rasulẹ̌ bal᷊inẹ dingangu taumata apang nilanisẹ̌ lai sarung mẹ̌tikị ”su ral᷊ungu papate”.​—1 Kor. 15:6.

13. Apa sarung makoạ tatiala i Yesus seng ene?

¹³ Yesus dingangi Paulus něněbal᷊ẹ̌ soal u sěmbaụ tempo penting ene kai tempong Kristus seng ene. Tempo ene tatialane ute sarung piạ sekẹ, linuhẹ̌, sahindạ, dingangu barang dal᷊akị bal᷊inẹ sarung mariadi su patikụ dunia. I kitẹ seng nakasilo těbal᷊ẹ̌ ini naghanapẹ̌ dongkeng taung 1914. Kụ piạ lai tatiala mal᷊ahẹ bal᷊inẹ. Yesus naul᷊ị habarẹ̌ soal u Kararatuang seng měpẹ̌parenta ”sarung ihabarẹ̌ su patikụ dunia gunang makoạ kesaksian su kěbị bangsa, bọu ene kiamatẹ̌ sarung marěnta”. (Mat. 24:3, 7-14) Paulus něnodẹ tempong ”Tuang seng ene” lai sarung makoạ tempo gunang taumata apang nilanisẹ̌ kụ seng ’mětẹ̌tikị su ral᷊ungu papate’ sarung saụ ipěbiahẹ̌.​—1 Tes. 4:14-16; 1 Kor. 15:23.

14. Apa sarung mariadi su tau Kristen apang nilanisẹ̌ su kanandụu tempong Kristus seng ene?

¹⁴ Tau Kristen apang nilanisẹ̌ kụ nate orasẹ̌ ini langsung saụ nipěbiahẹ̌ gunang mẹ̌tanạ su sorga. Hal᷊ẹ̌ ini niwohẹ i Paulus su 1 Korintus 15:51, 52. I sie němohẹ, ”Tawe kěbị bọu tal᷊oarang i kitẹ sarung mẹ̌tikị su ral᷊ungu papate, katewe i kitẹ kěbị sarung bal᷊uiang, su ral᷊ungu sěngkakondạ, su tempong těrompetẹ̌ kasamuriange himěte.” Bawerang i Paulus ini naghanapẹ̌ orasẹ̌ ini. Su apang anạu sěngkataung i Kristus seng saụ nipěbiahẹ̌, i sire nakapěndang karal᷊uasẹ̌ gěguwạ. I sire sarung ”sěntiniạ ene dingangi Tuang”.​—1 Tes. 4:17.

15. Hal᷊ẹ̌ apa sarung koatengu taumata apang niwal᷊ui ”su ral᷊ungu sěngkakondạ”?

¹⁵ Alkitapẹ̌ naul᷊ị hal᷊ẹ̌ apa sarung koatengu taumata apang niwal᷊ui ”su ral᷊ungu sěngkakondạ” su sorga. Yesus nẹ̌bera si  sire, ”Su taumata apang makauntung dingangu tumuhụ parentaku sarang pěngěngsuenge, iạ sarung měgělị si sie kawasa gunang mẹ̌parenta manga wangsa, kere kawasa seng takụ nitarimạ bọu i Amangku. I sie sarung měngahạ manga wangsa dingangu těking uase, hakị u i sire sarung makoạ kere potẹ̌ bọu tanah liat kụ nitětụ sarang nakakodọ.” (Why. 2:26, 27) I sire sarung tumol᷊e si Yesus kụ měngahạ manga wangsa dingangu těking uase.​—Why. 19:11-15.

16. Kerea lawọ taumata sarung makauntung lumawang papate?

¹⁶ Nal᷊ahẹ, tau Kristen apang nilanisẹ̌ sarung makauntung lumawang papate. (1 Kor. 15:54-57) Ual᷊ingu i sire seng saụ nipěbiahẹ̌, i sire lai sarung mapakailang karal᷊akisẹ̌ su kanandụu sekẹ Armagedon. Jutane tau Kristen wal᷊inẹ lai sarung masal᷊amatẹ̌ ”lumiu bọu kasasusah masaria” kụ sumuẹ̌ su dunia wuhu. (Why. 7:14) Taumata apang nasal᷊amatẹ̌ su dunia ini sarung makasilo kal᷊auntung wal᷊inẹ lumawang papate, ene kai su tempong i sire makasilo miliarẹ̌e taumata apang seng nate su tempong tamai sarung saụ ipěbiahẹ̌. Kěnang pẹ̌tiněna kerea karal᷊uasẹ̌ sarung kapěndangeng i kitẹ su tempong ene mariadi. (Kis. 24:15) Bọu ene, kěbị taumata apang něnodẹ kasasatia si Yehuwa sarung makauntung lumawang papate siměpụ ual᷊ingu dosang i Adam. I sire sarung měbiahẹ̌ sarang karěngụe.

17. Humotong Korintus 15:58 němahangsang si kitẹ gunang měkoạ apa orasẹ̌ ini?

¹⁷ Kěbị tau Kristen apang měbẹ̌biahẹ̌ orasẹ̌ ini tantu makitarimakasẹ ual᷊ingu apa niwohẹ i Paulus gunang tau Korintus soal u pělaharapẹ̌ taumata nate sarung saụ ipěbiahẹ̌. I kitẹ piạ alasang mapaelẹ̌ gunang tumuhụ sasasang i Paulus tadeạu mẹ̌tawakal᷊i ”měkoạ lawọ hal᷊ẹ̌ gunang Tuang”. (Basa 1 Korintus 15:58.) Mạeng i kitẹ masatia dingangu marading měkoạ hal᷊ẹ̌ ini, i kitẹ sarung makaěbạ pěbawiahẹ̌ sěbạe mal᷊uasẹ̌ su tempo mahi. Pěbawiahẹ̌ ene sěbạe makal᷊uasẹ̌ kụ něngělembo wọu apa tẹ̌tiněnang i kitẹ. Ene lai sarung měnodẹ kěbị saghedi kitẹ gunang měkoạ hal᷊ẹ̌ i Tuang ene tawe sia-sia.